غازی حەسەن

چەندین جار ئەم بابەتەم رەشکردۆتەوە، بۆ ئەوەی هیچ لەبارەی هەڵوێستی ئەو کەسانە نەبێژم، کەڕقهەڵگرتووانە پاڵپشتی بڕیاری دادگای فیدراڵی بەغدا دژی هەرێمی کوردستان دەکەن و راشکاوانە و بێ شەرمانە دەڵێن ئەمەی رووی داوە (یاساییە، بەغدا لەسەر هەقە، هەرێم تاوانبارە..). بۆیە دەڵێم ئێستا هێندە لەو کوردەی تەنیشتە خۆم، لەو گروپە سیاسییەی تەنیشە خۆم، لەو نووسەرەی ناوی بەتەنیش منەوەیە دەترسم، نیو هێندە لەدوژمنەکانمان ناترسم. 

هێندەی کتێبی مێژووم خوێندبێتەوە، هەمیشە وانیشانیان داوە، کە کەوتنی کورد، بێ دەوڵەت مانەوەی کورد، کارەساتەکانی کورد لەستۆی دوژمنەکانیەتی، نەخێر ئەوەی ئێستا دەیبینم و ئێوەش هەمووتان دەیبین، ژمارەیەک کەسی بنووس، راشکاونە بێ ئەوەی شەرم لەمێژوو، لەخۆیان و نمەکەکانیان بکەنەوە، دەڵێن (بەغدا وەرە) داگیرمان بکەوە، چونکە ئێمە بەحکوم و بڕیارو کردەوەکانی پارتی دیموکراتی کوردستان و تەبایی و رێککەوتنی ستراتیژیی (پارتی و یەکێتی) رازیی نین. ئەمە چ ماڵوێرانییە لەم سەردەمەدا دەیبینین.

تەنیا گومان دەکەم، لەژیر ئەم فسارە دەروونی و تێڕوانینە خراپەدا، وایان لەیەکێتی کرد گومان لەپەیوەندییەکانی لەگەڵ پارتی بکات، یان پارتی وا لێ بکەن، چی دیکە تەحەمولی یەکێتی و کێشەکانی نەکات.
بڕوا ناکەم هیچ عەشیرەت و خێڵ و مەلای خەتێیەک هێندە (ئازایانە!!) و بەئاشکراو بەنوێژی نیوەڕۆ ئیرادەی دوژمنایەتی خودی خۆیان و خزمەتی دوژمنانیان کردبێت. مەبەستم ئەوەیە لەهیچ سەردەمێکدا هەندێک تاکی کوردیی بەقەد ئێستا ئازادو نابەرپرس نەبووە، بەم ئاشکراییە بڕیارەکانی دوژمنەکانی خۆی پێ باش و هەق و دادپەروەرانە بێت. 
من لەهەندێک لەوانە پتر ناکۆکم لەگەڵ شێوازی بیرکردنەوەو کارکردنی حکومەت، هەندێک لەو کوردانەی ئێستا بەم زەقییە دژی هەرێمی کوردستانن، زۆر سوودیان لەتوانای دارایی و  پرۆسەی سەربەخۆیی ئابووری و بەرهەمهێنانی نەوت لەلایەن حکوومەتی کوردستان و توانای دارایی حکومەت کردبێت، بەڵام وەکو نانی کوردی بێ خوێ بێت، بۆیەشە بێ سنوور و بێ پێچ و پەنا نەک تەنیا لایەنگیریی بڕیارەکەن بەڵکو پاڵپشتیی بڕیاری دادگای فیدراڵی و تەنیا لەشکرکێشی بەغداش دژی هەرێم دەکەن.
هەموو کارە نایاساییەکانی بەغدایان پێ رەوایەو هەموو هەنگاوێکی یاسایی حکومەتی هەرێمیان لەبەر دژایەتی (پارتی)، یان دژایەتی (پارتی و یەکێتی)، یان لەژێر پەردەی ئەوەی (پارتی و یەکێتی ناتەبان) پێ رەوایە و نەک هەر پێیان رەوایە و بێلایەن دەبن، نەخێر پاڵپشتیشی دەکەن و وزەیان هەبووایە پێش لەشکرەکەشیان دەکەوتن.
من لەبەر هەڵوێستی رقهەڵگرتووی ئەم کوردانە دژی لایەنێکی سیاسی، یان دژی دەسەڵاتی کوردستان و لەکردەوەشدا فەشەلی هەندێکیان، دەزانم کوردستان لەسەر هەقە، چونکە لێم روونە و دڵنیام ئەمانە لەبەر نەبوونی هەڵەو نایەکسانی و نادادپەروەریی دژی دەسەڵاتی کوردی نین، نەخێر ئەوانە لەگۆشەیەکی داخراوی دژایەتی و لەڕقی پارتی دژایەتی خودی هەرێم دەکەن، یان پێشوازیی و پاڵپشتی بڕیاری دادگای بەغدا دەکەن. لەبەر ئەوە دەڵێم من لەبەر هەڵوێستی خراپی ئەمانە، ئەگەر داکۆکیش لەهەڵەی حکومەت نەکەم، بەڵام نامەوێت پێشوازیی لەبڕیاری دوژمنکارانەی دادگای فیدراڵی بکەم. لێتان ناشارمەوە، ئەوەی دەمترسێنێت، هەڵوێست و قینی ناوخۆیی و تێگەیشتنی هەندێک کوردی تەنیشتە خۆمە، نەک هێزو بڕیاری دوژمنەکانمان.