عومەر حاجی عنایەت هەڵەبجەیی

سی ویەك ساڵە دەسەڵاتێك لەباشوور هەیە پێیدەڵێن حكومەتی هەرێمی كوردستان، كاری باش و خراپی كردوە، من نامەوێ ئەوەی ئەم دەسەڵاتە لەماوەی نزیكەی سیی و یەك ساڵی رابوردودا ئەنجامی داوە (لەبواری خزمەتگوزاری و ئاوەدانكردنەوە)  كەڕەتی سفری بكەم، بەڵام ئەبێ ئەو راستیە نادیدە نەگرین، كە كاری باش وەك (پاراستنی ئەمنیەت و مسۆگەركردنی ژیانێكی شایستە بۆ یەك بەیەكی تاكەكانی كۆمەڵگە، خزمەتی گشتی و رێگاوبان و فڕگەو نەخۆشخانەو خوێندنگا، ئاوو ئاوەڕۆو كارەبا.....هتد) كاری لەپێشینە و ئەركی دەسەڵاتەو دەبێ وابێ، ئەوەی كە نابێ وابێ لادانە لەبەرنامەی خزمەتی خەڵك و نەمانی ئەمنیەت و لەدەستدانی خاك و خەڵك و گەندەڵی و نادادی لەئەرك و مافی تاك.

 هێشتا دوو ساڵی تەمەنی تەواو نەكردبوو، دەسەڵاتی كوردی كە خۆی لەیەكێتی و پارتیدا چڕكردبوویەوە، بەهاندانی توركیا شەڕی پەكەكەیان كرد، دواتر، بەپشتیوانی ئێران، ئیسلامییە جیهانیەكان، شەڕی دەسەڵاتی كوردیان كرد، لە هەموی گورچكبڕتر و بەفیتی وڵاتانی دراوسێ و لەسەر بنەمای پەرتكەو زاڵبە، زیندوكردنەوەی شەڕە بەردەوامەكەی شەستەكانی سەدەی رابووردوو، مەلایی و جەلالیی، لەساڵی 1993 چەند بارە بووەوە و بووەهۆی لەتكردنی دەسەڵات و دوو ئیدارەیی و لاوازبوونی پێگەی كورد لەناوچەكە، ئیتر لێرەوە  هەردوو ئیدارەكە، لەبری بونیادی تاكی رۆشنبیر و زانستخواز و بەرهەمدار، چەكداری ئازایان بونیادنا (ئازا لەبەرامبەر یەكتر)، یەكێ لەكارە جوانەكانیان، لە هەناوی بەرەی كوردستانیەوە پەرلەمانی كوردستانیان هێنایە دەرەوە، بەڵام لەبری ناردنی كەسانی ئەكادیمی و زانا و بیرمەند و پسپۆڕ و رۆشنبیر، دامەزراوەی پەرلەمان سیخناخكرا، لەكەسانی حزبی و سەربازی لەسواری شەمەندەفەری شەرعیەتی شۆڕشگێڕیەوە لە بینای پەرلەمان دابەزبن، لەنگەریان گرت، لەبری كێبڕكێ لەسەر چۆنیەتی بەهێزكردنی قەوارەی هەرێم و خزمەتی خەڵك، پەرلەمانیان كردە شوێنی كێبَركێێ لەسەر بەرنامەی حزب، قیتاری شەرعیەتی شۆڕشگێڕی بەدابەزاندی نەفەرەكانی لەبینای پەرلەمان چۆڵ نەبوو، ئەوەی مایەوە لەبینای ئەنجومەنی وەزیران و گشت دامودەزگاكانی حكومەت دابەزێنرا، لێرەوە زۆربەی دەسەڵاتی حكومەتی كوردی كەوتە دەست خەڵكی نەشارەزاو بەهەڵپە بۆ پڕكردنی گیرفان و تێركردنی ئارەزووە س...كانیان، بەنەفەسی شاخەوە حوكمی شاریان كرد، سەرئەنجام شەڕ بووە ئەو بەڵایەی خەڵكی كوردستانی بەئاقاری برسێتی و نەهامەتی برد، هەرێمی كوردستان بووە دوولەت  و سێ و هەندێ جار چوار لەت، برسێتی قات و قڕی، دزی و (تەڵبڕین و محەویلە بردن و فرۆشتنی بۆری ئاوی ژێر زەوی و ستون و تەلی كارەبا، كەرەسەی بەنداوەكان و فەرمانگەكان، ئاودیو كردنی شۆڤڵ و حەفارەو بیلدۆزەر و گەڵابەو ئامێرە سەنگینەكان و ئاسەوار) لەحاڵەتەوە بوونە دیاردە، هەرچەندە ساڵی 1998  تا 2006 هەوڵی چارەسەری شەڕی ناوخۆو یەكگرتنەوەی دووئیدارەكە درا بەڵام بەكردار تائێستا ئەم دیاردەی دوو ئیدارەییە بەردەوامی هەیەو ئاسەواری بەسەر خەڵكی كوردستانەوە دیارە، تاكی كوردو دۆستەكانی بێزار كردو دڵی دوژمنانی بەم چەند پەرتی و لاوازییە خۆشكرد، عێراق و وڵاتانی ئیقلیم بە تایبەت ئێران و توركیا بە راستەوخۆ و ناڕاستەوخۆ بەمەبەستی بەردەوامی ئاگری شەڕی ساردی پارتی و یەكێتی بەشدارن، زۆرینەی خەڵك كرانە ئەندام و چەكداری حزب، كوردستان بووە سەربازگەیەكی گەورە، هەموو شتێك بە پێچەوانەی ویستی خەڵك ئاوەژوو بوو، لەئەنجامی شەڕی دوو حزب (پارتی و یەكێتی) دەرگای پەرلەمان و زۆربەی وەزارەتەكان داخران، ئیتر لێرەوە ئازادییەكان سنوورداركران، سەرباری شەڕ، ئابڵوقەی ئابوری لەسێ لاوە سەپێنرا، بارودۆخی ئابووری تێكچوو، گرانی بازار بەشێوەیەك بوو، هەژارەكان بۆ بژێوی خۆیان، كەوتنە گوڵەچنینی دوای دەڕاسەی دروێنە، كۆكردنەوەی شمەكی ناو زبڵدانەكان، فرۆشتنی دەرگاو پەنجەرەو كتێبی ناو كتێبخانەكانیان، كۆچكردن بۆ وڵاتانی دراوسێ و بۆ ئەوروپا، ئەوەی لەحزبەكان نزیك بوو خۆشگوزەران و ئەوانیدی هەژارو نەدار، سەرئەنجامی ئەم جۆرە لەدەسەڵات دوای سێ و یەك ساڵ بەكوێی گەیاندین؟!

لەبری ئازادی، تاكی كۆمەڵگە كرایە كۆیلە، ئازادی رادەربڕین سنوورداركرا (چەندین چالاكوان لەسەر كۆمێنت و رای سەربەست گیران) زیندانە تایبەت و گشتیەكانی دەزگای زانیاری و پاراستن و ئاسایش لەكانی گۆمەو قەڵاچۆلان و ئاكرێ و بادینان بەشێوەیەك مافی مرۆڤیان تێدا پێشێلكراوە زیندانەكانی ئەمنە سوورەكە و فوزیلیە و هەیئەی كەركوك و موصڵ و ئەبوغرێبی لەزیهنماندا سڕیوەتەوە
رۆژ لەدوای رۆژ باری ئابوری خەڵك خراپتر دەبێ، بەرهەمی سی و یەك ساڵی دەسەڵاتی كوردی، كۆمپانیای زەبەلاح بۆ حزب و كەسانی نزیك لەسەرانی حزب، كەڵەكەبوونی سەرمایەیەكی بێشوومار لای بەرپرسە حزبی و حكومیەكان ئەوانەی لەسایەی ئەواندان، ژیانی كولەمەرگی بۆ تاكی كۆمەڵگەو فەرمانبەری ئاسایی و مردنی خانەنشیەكانە لەبەردەم بانكەكان، بردنی زیاتر لەچوار ملیار دۆلاری مووچەخۆرانی دەوڵەت بەناوی پاشەكەوت، ئاستی بژێوی رێژەیەكی بەرچاوی خەڵك بۆ خوار هێڵی هەژاری شۆڕبوەتەوە، رێژەی بێكاری رۆژ لەدوای رۆژ لەزیادبووندایە هەلی كار بۆ دەرچوانی زانكۆو پەیمانگاكان نەماوە، بارودۆخی كارمەندانی دەوڵەت و خانەنشینانە، كەس ئێرەییان پێنابات، سەروەت و سامانی هەرێم كەوتە ژێر ركیفی ژمارەیەك بەرپرس و سەرمایەدار بەشێوەیەك 10% تا 15% ی خەڵك سەروەتمەندو ژیانێكی شاهانەو 85% بۆ 90%ی خەڵك لەژیانێكی كولەمەرگی پڕ چەرمەسەریدان، بەرپرس و سەرمایەدارەكان خۆیان لەخەڵكی ئاسایی جیاكردوەتەوە، گەڕك و بازاڕو یانەو زانكۆو خوێندنگاو تەنانەت گۆڕستانەكانیشیان لە خەڵكی ئاسایی جیایە، لەسەردەمی شۆڕشی ئەیلول و شۆڕشی نوێ و شۆڕشی گوڵانەوە وەعدو پەیمان بە خەڵكی كوردستان دەدەن  كاتێك شۆڕشگێرەكان دەبنە دەسەڵاتدار بۆری نەوت و غاز دەگەیننە ماڵەكان، خۆشترین ژیان بۆ گوندنیشینان مسۆگەر دەكەن،  بەڵام چییانكرد؟ خەڵكیان كردە پاسەوانی ریزە بەرمیل و بوتڵی غاز،  لەبری نیعمەت نەوت و گاز بوونە نیقمەت بۆ خەڵك و خێرو بەرەكەت بۆ دەسەڵاتدارانی ناو دوو حزب و حاشیەكانیان، گوندەكان و شارۆچكەكان وێران و چەند شارێك ئاوەدان، رێژەی گوندنشین لەهەرێم لەچاو شارنشین بووە 11% بۆ 89% بەپێی ستانداردی وڵاتان ئەمە كارەساتە،
كەرتی تەندروستی روو لەداڕوخانە، ژمارەی نەخۆشخانەی تایبەت روو لەزۆری و نەخۆشخانەی كەرتی گشتی روو لەدابەزینە، دەرمانی ئیكسپایەر و گرانی دەرمان بووەتە دیاردە، باسێك لەدەستەبەری تەندروستی و كۆمەڵایەتی نیە، ئەوەی دەیەوێ بمرێ بۆ نەخۆشخانەی گشتی و سەروەتمەندە هەڵتۆقیوەكانی دوای راپەڕین، بەرەو ئەوروپا.
خوێندن بەرەو كەرتی تایبەت دەچێ، منداڵی بەرپرس و سەرمایەدارەكان لەقوتابخانەو خوێندنگا و زانكۆی تایبەت و  زانكۆكانی ئەوروپاو ئەمریكا، منداڵی هەژارو نەدار لەزانكۆكانی كەرتی گشتی، دوای دەرچوونیش جگە لەبڕوانامەیەكی چوارچێوەداری بێگیان هیچیان چنگ ناكەوێ، لەساڵی 2014 وە دەرچووەكانی زانكۆو پەیمانگاكان لەچاوەڕوانی دامەزراندن و هەلی كاردا بۆ سەر جادەو دەسگێڕی و كرێكاری و پاسەوانی و رێگای ئەوروپا بەقاچاغ و سەرئەنجام دەبنە خۆراكی ماسیەكانی دەریای ئیجە یان ژیانی كولەمەرگی ئەوروپا و سنورداش.
كەرتی گواستنەوەی گشتی سفرە، لەبری پاسی مەصڵەحە چاوەڕێ میترۆو ترام و شەمەندەفەربووین، پاسی مەصڵەحەكەش هیچ، كوردستان كرایە گەراجێكی گەورەو فراوانی ئۆتۆمبێل
 بەهیوابوین تانكی  ئاوی سەربانی ماڵان لەسایەی دەسەڵاتی شۆڕشگێرەكانی دوێنێ و حوكمڕانانی ئەمڕۆ نەمێنێ، كەچی ئاو كڕین بووە دیاردەو تانكیەكانی سەربانیش زۆربەی كات بەتاڵن
كەرتی وەبەرهێنان و زەوی و زارو پەیمانكاری قۆڕغە بۆ ژمارەیەك لە كۆمپانیا حزبی و ئەوانەی لەبەرپرسانەوە نزیكن، زەوی و زاری ناوەوەو دەرەوەی شارەكان، گردو گردۆڵكەكان لەسەر دەسڕۆیشتوانی دەسەڵات تاپۆكران.
بەهیوای سوپایەكی یەكگرتوی نیشتمانی بووین، كەچی هێزی حزب و هێزی خێڵ و هێزی بەرپرسەكان بووە دیاردە
بەهیوای كەناڵێكی تەلەفزیۆن (میدیایی) فەڕمی حكومەت بوین، بە دامەزراندنی دەیان كەناڵی حزب و كۆمپانیای حزبی و بەرپرسە باڵاكانی حزبیان بۆ بەرهەمهێناین
لەئەنجامی دووبەرەكی و پەیوەستبوون حزبەكانی كوردستان بەسیاسەتی وڵاتێكی دراوسێوە 50% ی خاكی كوردستانیان دۆڕاند
سوپای توركیا و ئێران بەشێك لەخاكی هەرێمیان داگیركردووە و دەزگای میت و ئیتیلاعات لەكوردستان بێسانسۆر تەراتێن دەكەن
بازرگانی خواردنەوە كحولی و ناكحولی، جگەرە، ئاڵتون، مەروماڵات بۆ خەڵكی ئاسایی بڤەیە، تایبەتە بە كۆمپانیا حزبیی و سەرانی حزبەوە
 سەرمایەدارو بەرپرسەكان لە یانە پێنج ئەستێرەكان و ڤێلای سەر گردە داگیركراوەكان شەوان رۆژ دەكەنەوە، هەژارەكانیش دەستەو یەخە لەگەڵ مەوادی كحولی ئێكسپایەر و ماددە هۆشبەرەكان
هیچ بەرهەمێكی كشتوكاڵی نییە هاوردە نەكرێت، هەزاران دۆنم كرا بەمەزراو كێڵگەی بەرپرسەكان و مەزرای جوتیارەكان كەوتە بەر قینی وشەكەساڵی و قین لەدڵەكانی عەرەب و توركمانی ناوچە داگیركراوەكان
لە بەغدا لەبری شەڕی نەتەوە و خاك، بەردەوام شەڕی پارەو پۆست كراوە
دەسەڵاتی  دادوەری و پەرلەمان بوونەتە دامەزراوەیەكی چاولەدەستی حكومەت، لەبری ئەوەی ئەوان چاودێری حكومەت بن، چاوەڕێی چاوی بەزەیی حكومەت دەكەن
كارەبای بەردەوام بۆ ئەوان و دوو ئەمپێریەكەش بۆ ئەوانەی كە بوونە پەیژە بۆ سەركەوتنی ئەوان، لەوڵاتان ستونی كارباو هێڵی مەكشوف نەماوە و كرایە كێبڵی دفن، لێرە ئاسمانی شارەكان  بەهۆی تەلی كارەبای موەلیدە ئەهلیەكانەوە لە داوی جاڵجاڵۆكە دەچێت
 لەبری پڕۆژەی گەشتو وزار و كشتوكاڵ و پیشەسازی،  وڵات سەرلەبەری بووەتە ڤێلاو شوقەی گرانبەها  بۆ سەروەتمەندەكان.
خەڵكی كوردستان ئەوانەی بەر شاڵاوی ئەنفال و راگواستن زۆرەملێ و وێرانكاری  كەوتبوون، دانیشتوانی دە قەزاو زیاتر لەپەنجا ناحیە و پێنج هەزار گوند بەهیوا بوون، حكومەتەكەیان قەرەبوی ئەو هەموو ستەم و كوشتوبڕەیان بۆ بكاتەوە و بودجەی تایبەت لەحكومەتی بەغداوە بۆ ئەم مەبەستە تەرخان بكرێت، وەك ئەوەی بۆ كوەیتیەكان كرا، زەرەرمەندانی كوردستان لەچاوەڕوانیدا زۆربەیان سەریان نایەوە.
بەكورتی:

ئەوان كۆشكی سەر گردو ڤێلانشین، ئەمان لەچاوەڕوانی دوو ژووردا رزین

ئەوان بەرپرس و ئامری پشتی بەرەی شەڕ، ئەمان پێشمەرگە و مأموری پێشەوەی بەرەی شەڕ

ئەوان خاوەن سەرمایە و كۆمپانیا، ئەمان پاسەوانی و كرێكاری و جوتیاری بێ دەسمایە

ئەوان لە نەخۆشخانەكانی ئەوروپا و چارەسەر ، ئەمان لە نەخۆشخانەی خۆماڵی پڕ دەردیسەر

ئەوان خاوەن رەگەزنامەی ئەوروپاو ئەمریكا، ئەمان  دەسگێڕی بەرخانەقا و دامێنی قەڵا

شەوانی ئەرخەوانی ئەوان لەدوبەی و توركیا و ئەمریكا و ئەوروپا، ئەمانیش، بەربەلەدێكە و گازینۆی شەعب و مچكۆ  و تەیراوا

قاسەی ئەوان پڕو گیرفانی ئەمان خاڵی

بەهیوای سنووری حەمرین و مەندەلی، هەوارمانە هاتەوە بانی مەقان و كفری

سەیارەی جام رەش و دوا مۆدێل بۆ ئەوان و  ئۆتۆمبێلی داشقەو ماتۆڕسكیلیش هی ئەمان

كارەبای فوول بۆ ئەوان و دوو ئەمپێر بۆ ئەمان

ئاوی مەعدەنی بۆ قوڕگی ماندوی ئەوان و ئاوی بەلوعەو كانیاوەكان بۆ سكی برسی ئەمان

دەیان ئەوان و ئەمانی تر.........

پرسی جددی ئەمەیە لە كاتێكدا دەسەڵاتی كوردی لەسەر خاكی كوردستان ئەو هەموو ستەم و نادادیە لەگەلەكەی خۆی بكات بۆچی گەلی كوردستان قەبوڵی دەكات و پەرچەكرداری وەك پێویست نییە؟! ئایا جورئەتی رووبەڕووبونەوەی نیە؟! هەست بەم ستەمە ناكات؟! حزبە ئۆپۆزسیۆنەكان بێئومێدیان كردوون،  یان چی و چی.....؟!

بۆ وەڵامدانەوەی ئەم پرسە سەرنجی ئەم شیكارییە بدەن:-

سەرباری ئەو هەموو تاڵان و بڕۆ و ئاودیوكردن و داگیركردنی ماڵ و سامانی دەوڵەتی پێش رووخانی رژێمی بەعسی فاشت و كورد كوژ، من قسەم لەسەر دوای رووخانی رژێمە كە بە بۆچوونی بەندەو بەخەمڵاندنێكی سەرپێی لەساڵی  تا 2003 تا 2022(20ساڵ)  بەو گوژمە پارانەی لەحكومەتی عێراقەوە هاتوە و بەداهاتی ناوخۆوە زیاتر لە 250 ملیار دینار دەسكەوتی حكومەتی هەرێم بووە بۆ 3ملیۆن كەس لە 2003 تا 6 ملیۆن كەس لە 2022 لەكاتێكدا میزانیەی وڵاتی ئوردن لەماوەی 2003 تا 2022 واتە لەو 20 ساڵەدا تەنها 140 ملیار دۆلار بووە بۆ 5,5 ملیۆن كەس لەساڵی 2003 تا 10 ملیۆن كەس لە ساڵی 2022

گریمان ئێستا ژمارەی دانیشتوانی هەرێمی كوردستان - عێراق شەش ملیۆن كەسە

لەم ژمارەیە (دوو ملیۆن) كەس تەمەنیان لە خوار 15 ساڵیەوەیە، سەرگەرمی خوێندن و دەورانی باخچەی ساوایان و منداڵی و مێردمنداڵی خۆیانن.

قسەی ئێمە لەسەر چوار ملیۆن كەسە:-

لەم چوار ملیۆنە  (شەش سەد هەزار) كەس لە دەرەوی هەرێم دەژین بەوانەشەوە كە لەوڵاتانی ئەوروپان

  نزیكەی (شەش سەد هەزار) كەس لەكەرتی تایبەت كار دەكەن، بەوانەی دەرەوەی وڵات دەكاتە 1،2 ملیۆن، ئەم ژمارەیە تا رادەیەكی زۆر (جگە لەچالاكوانەكانی دەرەوەی هەرێم) دەستیان بەكڵاوەكەی خۆیانەوە گرتوە و كاریگەری راستەوخۆیان لەسەر ناڕەزاییەكانی خەڵكی كوردستان بەرامبەر دەسەڵات نییە.

نزیكەی (پێنج سەد و پەنجا هەزار) كاسبی ناوبازاڕ و بازرگانی دەروازە سنورییەكانن، تا رادەیەكی زۆر دوورە پەرێزن لە ناڕەزاییەكانی خەڵك و بەشداری كارو چالاكی و ناڕەزاییەكان ناكەن سەرگەرمی ژیانی تایبەتی خۆیانن.

(سەدو پەنجا هەزار ) كەس خانەنشینی شارستانی ئەمانە تەمەنیان لەسەروو 63 ساڵەوەیە و توانای بەشداری نارەزایی و خۆپیشاندانیان زۆر لاوازە

(سەد هەزار) كەس خانەنشینی سەربازی، ئەمانە جگە لەوەی زۆربەیان سەر  بەحزبەكانی دەسەڵاتن ژمارەیەكی بەرچاویشیان بەپلەیەك خانەنشنین كراون، باڵاترە لەشایستەی خۆیان، بۆیە بەهیچ جۆرێك بەشداری ناڕەزایی و خۆپیشاندانەكان ناكەن مەگەر ستەمی راستەوخۆ لەخۆیان بكرێت

 (چوارسەد هەزار) كەس سەر بە هێزە چەكدارەكانن( پۆلیس، ئاسایش، زێرەڤانی، بەرگری فریاكەوتن و پێشمەرگە.....) ئەمانەش جگە لەوەی لەگەڵ ناڕەزایی خەڵكدانین زۆربەی كاتەكان ئامرازی سەركوتكردن و كوشتن و لێدانی خۆپیشاندەران و چالاكوانەكانن

ئەوەی دەمێنێتەوە 1600000 ( یەك ملیۆن و شەش سەد هەزار)  كەسە لەم ژمارەیە (حەوتسەد هەزار) كارمەندی كەرتی گشتین (حكومەتی هەرێم)

200000كەس خوێندكاری زانكۆ و پەیمانگاكانن

100000كەس خاوەن تاكسی و بارهەڵگرەكانن

ئەوانیتر دەرچوانی زانكۆو پەیمانگاكانی بێكارو شۆفێری تاكسی و دەسگێڕو كریكارو جوتیارەكانن....هتد

1-قورسایی ناڕەزاییەكان دەكەوێتە سەرشانی 1600000كەس، لەم ژمارەیە نیوەی زیاتر لەسنوری ناوچەی زەرد (900000كەسن) بەهۆی بارودۆخی ناوچەی زەرد زۆر بە ئەستەم خۆپیشاندان دەكەن و ناڕەزایی دەردەبڕن،  قورسایی ناڕەزاییەكان دەكەوێتە سەر شانی ئەوانەی لەزۆنی سەوز دەژین، كە تارادەیەك ئازادی رادەربڕین و خۆپیشاندان زیاترە و ژمارەیان (700000كەسە)،  ئەوەی جێگای سەرنجە ئەوانەی لەزۆنی سەوز ناڕەزایی بەرامبەر دەسەڵاتی زەرد دەردەبڕن زۆر ئازادانە ئەتوانن راوبۆچونی خۆیان دەربڕن و هێرش بكەنەسەر ئەولا، ناڕازییەكانی ناوچەی زەردیش ئازادانە رەخنەكانیان ئاڕاستەی دەسەڵاتی زەرد دەكەن، بەم شێوەیە بەشێك لەئینێرجی ناڕازییەكان لەلایەن دەسەڵاتی هەردوو زۆنەوە بە قازانجی خۆیان ئیحتوا كراوە

2- لەكۆی ئەو 1600000 كەسە كە زۆربەیان گەنجن بەشێكیان سەرگەرمی یاری فتبۆَلێن و چاودێری یارییە جیهانیەكان و یانە پاڵاوانەكانی جیهان، خواردنەوەی مەی و ئالودەبوون بە مەوادی هۆشبەر، كافتیریا و نێرگەلە كێشان....هتد

3- بەشێكیان سەرگەرمی نوێژو خوداپەرستین و قانعن بەو بەشەی خودا پێیداون و لەو باوەڕەدان بەشی ژیانی ئەوان هەرئەوەندەیەو ئەوە پشكیانە لەژیان و خودای گەورە نەبێت بەكەس ناگۆڕێت و ناڕاستەوخۆ پشتگیری دەسەڵاتی وەلی ئەمر دەكەن و بەخەلیفەی خودای لەسەر زەوی دەزانن .

4- لەو 700000 كەس كارمەندی دەوڵەتن، كاتێك مافەكانیان دابین نابێت ناڕازی دەبن و بایكۆتی دەوام قورسترین چەكیانە، كاتێك مافەكانیان ئەدرێت (مووچە وەك نمونە) ئیتر بێدەنگ دەبن

5- خوێنكارەكانی زانكۆش، كاتێك دەرماڵەیان بۆ خەرج ناكرێت، یان لەسەر شێوازی وانە وتنەوە یان بەرنامەی خوێندن، كەمی خزمەتگوزاری بەشە ناوخۆییەكان دێنە سەر شەقام كاتێك پەیمانی بەرپرسان وەردەگرن ئیتر بڵاوەی لێدەكەن و بێدەنگ دەبن

6- خاوەن تاكسی بارهەڵگرەكان لەسەر گرانی سووتەمەنی و خراپی رێگاوبان و گەندەڵی لەهێڵەكانی گواستنەوە، جادەو بانەكان دەگرن و بە كەمترین پەیمان یان لەژێر فشاردا پاشەكشە دەكەن

7- لێرەو لەوێ ناڕەزایی جوتیاران و پیشەوەران و كاسبكاران بەكزی و لاوازی هەیە لەسەر مافەكانی خۆیان و لە ماوەیەكی كورتدا بێدەنگدەبن

8-ئەو ناڕەزاییانەی لەلایەن هەندێ حزبی ئۆپۆزسیۆن رێكدەخرێ وەك پێویست خەڵك بەشداری ناكات، بەبیانوی ئەوەی ئەم حزبانەش وەك ئۆپۆزسیۆنەكانی پێشتر دەیانەوێ سواری شەپۆلی ناڕەزاییەكان ببن و بەسودی خۆیانی بشكێننەوە و دواتر  پشت لەخەڵك دەكەن، دیارە ئەم جۆرە ناڕەزاییانەش بە لاوازی دەمێنێتەوە

ئەگەر بەوردی سەرنجی ئەم جۆرە ناڕەزایی و خۆپیشاندانانە بكەین، هەر چین و تووێژو گروپێك بە جیا داوای مافی خۆی دەكات، جگە لەكۆمەڵێ خەڵكی رۆشنبیر وچالاك و ئەكتیڤی ناو كۆمەڵگەو رێكخراوە مەدەنیە سەربەخۆكان كە خەمی ئایندەی خەڵكیانە بەگشتی، كەس حەقی بەسەر داواكردنی مافی گشتی و گەندەڵی و نادادی كۆمەڵایەتی و دزین و بردن و تاڵانكردنی سەروەت و سامانی گشتیەوە نیە، هەر تووێژو چین و گروپێك بە جیاو بەشێوەیەكی نا رێكخراو شپرزە و كاتی دێنە سەرشەقام یان بایكۆت دەكەن و لەماوەیەكی كورتدا بەدەستكەوتی كاتی و كەمەوە، یان لەژێر فشاری هێزە ئەمنییەكان بڵاوەی لێدەكەن و دەچنەوە سەر كارەكانیان، سەرنج بدەن، كاتێك خوێندكارەكان لەسەر مافی خۆیان دێنە سەر شەقام، تەنها باسی نەبوونی دەرماڵەو خزمەتگوزاری خۆیان دەكەن، باس لەنادادی و گەندەڵی و ستەمی گشتی ناكەن، لەو كاتەدا مامۆستاكانی زانكۆ و كارمەندانی دەوڵەت هیچ هاوكارییەكیان ناكەن، كاتێك مامۆستایانی زانكۆ لەسەر دابیننەبونی مافەكانیان، بایكۆتی دەوام دەكەن خوێندكارەكان لەدوورەوە تەماشاچین، لەكاتێكدا كارمەندانی وەزارەتی تەندروستی، كارەبا، شارەوانی، پەروەردە......هتد بەجیا لەبەر پێنەدانی مووچە و دواكەوتنی بایكۆتی دەوام دەكەن، وەزارەتەكانی دیكە بەشدارنابن و لەشاشەی تی ڤی لاینە ئۆپۆزسیۆنەكانەوە سەیریان دەكەن، خوێندكاران و مامۆستایانی زانكۆ هەر خۆشیان تێناگەیەنن، تووێژی مامۆستایانی سەرەتایی و ئامادەیی زۆرترین پشكی ناڕەزایەتی و خۆپیشاندانیان لە ئەستۆ گرتووە بەڵام بە تەنها خۆیان بوون و تەنانەت مامۆستاكانی زانكۆ بۆ ئەوەی(ئاستی خۆیان نەهێننە خوارەوە لەڕووی زانستییەوە) لەهاوكاری براو خوشكە مامۆستاكانیان دوورەپەرێزن، كارمەندانی دەوڵەت خۆیان دووردەگرن لەناڕەزایی مامۆستایان، كاتێك حزبێكی ئۆپۆزسیۆن بانگەشەی ناڕەزایەتی دەكات، حزبەكانی تر نەك پشتگیری بەڵكو دژایەتی دەكەن

بەم جۆرە لەكۆمەڵگە دەوترێت كۆمەڵگەی (مستقر) كەمن ناوم ناوە (كۆمەڵگەی دەستەمۆ)، بەو كۆمەڵگانە دەوترێت كە بەشێكی كەم ناڕازی لەسەر مافی تاك (نەك گشتی) بەشێكی زۆری بێدەنگ و خۆی داوەتە دەس چارەنووس و قەدەر، سەرگەرمی ویستە تایبەتیەكانی خۆیەتی و مافی گشتی و بێدادی لای ئەوانە بابەتێك نییە خۆیانی بۆ بڕەنجێنن.

دیارە دەسەڵاتدارانی هەرێم بەووردی دیڕاسەی چین و تووێژو كەسە ناڕازییەكانی  كۆمەڵگەیان كردووە بۆیە هیچ باكیان بەناڕەزایەتیەكان نییە و كەمترین حسابی لەسەر دەكەن، تا كۆمەڵگەی كوردستانی باشوور بەم شێوەیە بێت و رێبەرێك، حزبێكی خۆنەویست نەبێ بۆ ئاڕاستەكردنیان، چەوسانەوە و ستەم و نادادی زیاتر و زیاتر دەبێت

دەرئەنجام ناڕەزایی و خۆپیشاندانی لاواز بێكارێگەر و  بێبەرهەم   كەدەسەڵات بەئاسانی توانیویەتی دەتوانێت سەركوتی بكات.