ئێران ... شەڕێكی قورسی دژ بە دیكتاتۆرییەت!

تێڕوانینێك بە سەر بەرەنگاربوونەوەی دیكتاتۆرییەت لە ماوەی ٤٤ ساڵی ڕابردووی ئێراندا!

7 ڕۆژ لەمەوپێش



 

 

عەبدولرەحمان گەوركی

 

شۆڕشگێڕان و ئازادیخوازانی ڕاستەقینەی خاكێك، لە هەر كوێیەك بن، دڵیان بۆ گەلەكەیان و نیشتمانەكەیان لێدەدات. ئەوان هەرگیز شەڕ بەرانبەر بە داگیركەرانی زێدی خۆیان پشتگوێ ناخەن. موجاهێدینی خەلقی ئێران وەك نموونەیەكی زەقی ئەم راستییە. ئەوان لە هەموو كاتێكی دووركەوتنەوەی نەخوازراویان لە خاكی خۆیان، شەڕی خۆیان لە دژی دەسەڵاتی ئێران زیادتر كردووە. چونكە ئەوان ئەم شتە بە رەمزی «وەفاداربوون بۆ بەڵێن و قوربانیدانی بێكۆتایی» دەزانن و هەر لە سەرەتاوە ئەوەیان داوەتە بەر خۆیان و لەسەری پێداگرن و  گرێدراوی بەردەوامبوون و هەمیشەیی بوونیانە.

روونە كە بەر لە هەمووان، رژێمی ئێران ئەم ڕاستییە دەزانێت و چەندین جار  شایەدی لەسەر داوە (هەڵبەت بە زمانی دەسەڵات خۆی). لە هەمان كاتدا ئەم ڕاستییە لەلایەن كۆڕ و كۆمەڵە سیاسییە ئاگادارەكان و شارەزایانی كاروباری ئێران جەختی لەسەر كراوەتەوە. هەر  ئەمەیشە كە لە ماوەی چوار دەیەی رابردوودا «ئەنجومەنی نیشتمانیی موقاومەتی ئێران»ی  وەك «تاكە ئاڵتڕناتیڤی ئەم رژێمە» پاراستووە كە  موجاهیدینی خەلق ئەندامی سەرەكییە تیایدا.

بە ڕووخاندنی ڕژێمی دیكتاتۆرییەتی شا لەلایەن خەڵك و هێزە سیاسییەكانی ئۆپۆزیسیۆنی شا لە ساڵی 1979 و هاتنە سەركاری ڕژێمی مەلاكان، (خومەینی) بە پێچەوانەی خواست و چاوەڕوانییەكانی خەڵكی ئێران، هەر زوو دیكتاتۆرییەتێكی زۆر خراپتری بەسەر كۆمەڵگادا فەڕز كرد و كەشوهەوای كراوەی سیاسیی كۆمەڵگای داخست و ئازادییەكانی سەركوت و هێزە ئازادیخوازەكانی كۆمەڵگای لە ژێر ناوی ئیسلام(!)دا زیندانی كرد و دوای ئەشكەنجەدان و لە سێدارەدان و لە زۆر حاڵەتیشدا قەتڵوعامی كردن، كە كۆمەڵكۆژكردنی زیاتر لە (30) هەزار زیندانیی سیاسی لە هاوینی 1988 یەكێكە لە نموونە زەقەكانی. پرۆسەیەك كە تا ئەمڕۆیش هەر بەردەوامە.

ئەم هێزە هاوكات لەگەڵ درێژەدان بە خەبات لە دژی دەسەڵات و بە گواستنەوەی سەركردایەتی موقاومەتی ئێران بۆ سەر سنووەكانی ئێران (عێراق) لە ساڵی ١٣٦٦دا، «ئەڕتەشی ئازادیبەخشی میللیی ئێران»ی دامەزراند و لە ماوەی كەمتر لە ساڵێكدا، توانیی وەها گورز لە ڕژێمی ئێران بووەشێنێت كە (خومەینی) خۆی، كاتێك بینی ڕووخاندنی ڕژێمەكەی نزیك بۆتەوە، دەستبەجێ ژەهری ئاگربەستی نێوان ئێران و عێراقی نۆشی، كە ئەگەر ئەو كارەی نەكردبایە، بە دڵنییاوە ئێستا ئەو و ڕژێمە نەمابوو و ئێران و ناوچەی ڕۆژهەڵاتی ناوەڕاست و تەنانەت جیهانیش لە دۆخێكی جیاوازدا دەبوون!

پێشهاتەكانی پەیوەندیدار بە عێراق لە ساڵی ٢٠٠٣، هەرچەندە ئاڵۆزبوونی دۆخ و هاوكێشەكانی ناوچەكەی زیاد كرد، بەڵام بە هەمان پێوەر، موقاومەتی ئێران توانی ئاستەنگ و سەختییەكانی سەر ڕێگا، یەك لە دوای یەك، وەلا بنێت و بە سەركەوتوویی بەسەریدا تێپەڕێت. چونكە داگیركردنی عێراق، هەرچەندە لەژێر ناو و ئاڵای ئەمریكا و هاوپەیمانیی نێودەوڵەتیدا ئەنجامدرا، بەڵام لە ڕاستیدا داگیركەری سەرەكی عێراق (ڕژێمی ئێران) بوو، كە جگە لە داگیركردنی ئەم بەشە لە ڕۆژهەڵاتی ناوەڕاست، توانیبووی هێزەكانی موقاومەتی ئێران لە «ئەشرەف 1» و پاشان «ئەشرەف 2» گەمارۆ بدات و زۆر جار هێرشی سەربازی و مووشەكی و زەمینی و تیرۆریستی بكاتە سەریان. بەڵام لە ماوەی ١٤ ساڵ خۆڕاگرییەكی شكۆداردا، موجاهیدین نەك هەر توانیان خۆیان بگرن و لەسە پێ بمێننەوە، بەڵكو بوون بە «ئاستەنگێكی پۆڵایین» لە بەرانبەر دەستدرێژیكردن و داگیركارییەكانی ڕێژیمی ئێران بۆ سەر ناوچەكە.

ئەگەر چی لە میانەی پێشهاتەكانی عێراق لە ساڵی ٢٠٠٣دا، بەڕواڵەت ئاراستەی جوڵەی هێزەكانی موقاومەتی ئێران پێچەوانە دەردەكەوت كە گوایە موجاهیدینی خەلق خوازیاری دووركەوتنەون لە ناوچەكە، بەڵام ئەوان بە ستراتیژی و پێوەرەكانی تایبەت بە خۆیان لەمەڕ خەبات و تێكۆشان، دۆخەكەیان كردە «پردێك بەرەو تاران» و بە دەرچوونیان لە عێراق لە ساڵی 2016، هاوكێشەكەیان گۆڕی، بە جۆرێك كە رژێمی ئێرانی خستە دۆخێكی قەیراناوی و بێدەرەتانیدا. وەك ئێستا دەبینین دۆخی ڕێژیمی ئێران ڕۆژ لە دوای ڕۆژ زیاتر هەستیارترە و ئەم رژێمە لە هەنگاوەكانی پێشووی خۆی «پاشگەز» و لە داهاتووی خۆی «نیگەران»ە. چونكە بە پێچەوانەی گەشەسەندن و پەرەسەندن و بەرەوەپێشچوونی موقاومەتی ئێران، ئەم رژێمە لە هەموو روویەكەوە «لاوازتر و بێ تواناتر»ە.

هەر بۆیە دەكرێت تابلۆی سیاسی شەقامی ئێران بەم شێوەیە وێنا بكرێت كە موقاومەتی ئێران، جگە لە فراوانبوونی چالاكییەكانی لە سەرانسەری جیهان و دامەزراندنی «ئەشرەف ٣» لە وڵاتی ئەلبانیا، كە ناوازە و بێ هاوتایە لە مێژوودا، « ئێستا خاوەنی هەزاران (یەكینەی شۆڕش)ە لە سەرانسەری ئێراندا كە لە ماوەی ساڵانی ڕابردوودا و بە تایبەت لە رەوتی ڕاپەڕینی ساڵی 2019دا، لێهاتوویی و كارامەیی خۆیان لە هەموو ڕوویەكەوە نیشانداوە و ئەگەر دۆخەكە بگاتە خاڵێكی «خوازراو»، دەتوانن چارەنووسی خەڵكی ئێران لە بەرامبەر ڕژێمی دیكتاتۆری دەسەڵاتدار یەكلایی بكەنەوە!

«یەكینەكانی شۆڕش» ئێستا جگە لە كاری ڕێكخستن و بەڕێوەبردن لە سەراسەری شار و شارۆچكەكانی ئێراندا، خاوەنی پوتانسییەل و ورە و شەڕەوانییەكانی ئەوتۆن كە تەنگیان بە ڕێژیم و هێزەكانی حكومەت هەڵچنیوە و هەموو لیڤەرەكانی دێواندنی موقاومەت لە لایەن ڕێژیمەوە و پیلانگێڕییەكانی حكومەت دژ بە موقاومەتی ئێرانی پووچەڵ كردۆتەوە و هەموو رێگەكانیشی بەسەر (بە لاڕێدابردنی راپەڕین بەرەو رووخاندنی دەسەڵات) داخستووە كە ئاشكراكردنی پڕۆژەی «ڕەزا شا ڕۆحت شاد» كە پرۆژەیەكی دەستكردی وەزارەتی ئیتڵاعاتی ئێرانە و بۆ بە لاڕێدابردنی ڕاپەڕین و شەرعیەتدان بە سەركوتكردن و لە كار خستنی موقاومەتی ئێران هێنرابووە مەیدان، یەكێكە لە نوێترین نموونەكانی.

ئێستا زنجیرەیەك هەڵمەتی نێودەوڵەتیی موقاومەتی ئێران لە ماوەی چەند مانگی ڕابردوودا، چ لە ناوەوە و چ لە دەرەوەی ئێران، دوا قۆناغی ڕاستەقینەی ئێرانی خستۆتە بەرچاوی گەلانی جیهان. سەركەوتنەكانی موقاومەتی ئێران لە بواری یاسایی و دادگاكاندا و لەوانە لە وڵاتی سوید و بلژیكا، كە بووە هۆی زیندانیكردنی كرێگرتە تیرۆریستییەكانی سەر بە رژێمی ئێران، لە دەستكەوتەكانی ئەمدواییانەن، كە قەدەغەكردنی گواستنەوە و گەڕاندنەوەی دیپلۆمات تیرۆریستێكی وەك (ئەسەدوڵڵا ئەسەدی) كە لە نێوان حكومەتی بلژیكا و بانكەوانی تیرۆریزمی جیهانی (واتا رژێمێ ئێران) رێككەوتننامەی لەسەر كرابوو، دوایین ئاڵقەكانیەتی تاكو ئەمڕۆ.

ئێستا بەهێزبوونی تاكە ئاڵتڕناتیڤی دێموكراتیكی رژێم، واتا (ئەنجومەنی نیشتمانیی موقاومەتی ئێران) بووەتی راستییەكی حاشا هەڵنەگر و بەرەو ئەوە هەنگاوی دەنێت كە گۆڕانكارییەكی گەورە لە ئێراندا ڕووبدات!

بابه‌تی په‌یوه‌ندیدار