ئاوات نامق ئاغا

ماوەیەك لەمەوبەر بە ڕێكەوت ژمارە ٦٧٥١ی ڕۆژی ١٣ ئۆگوستی ٢٠١٥، ی ڕۆژنامەی (كوردستانی نوێ) م بەرچاوكەوت و بینیم كەسێك بەناوی (ئەژین قادر)، لە چوارەم لاپەڕەیدا، كۆمەڵێك وێنە و نووسینێكی بە ناونیشانی ( ژیانەوەی كوردستان؛ ژیاندنەوەی خۆشەویستی خاك و نیشتمان) بڵاو كردۆتەوە، كە بە داخەوە چەندین هەڵە و ئافەرۆزكاریی لە خۆ گرتبوو، بۆیە منیش سەبارەت بە پێوەندی دێرینەی نزیكم بەو باسەوە لە پێناوی ڕێگری لە شێواندنی ڕاستییەكان حەزم كرد ئەم چەند سەرنجە بخەمە ڕوو! 
ئاشكرایە یەكێك لە دیاردە هەرە نەرێنییەكانی ئەمڕۆی بواری داهێنانی كۆمەڵگاكەی ئێمە بەتایبەتی میدیا، بریتییە لە نەبوونی مافی خاوەندارێتیی و فڕاندنی بەری ڕەنج و ئەفڕاندنی كەسانی تر، بە جۆرێك داگیركردنی بیرۆكە و دەستپێشكەریی بووەتە نەریتێكی ئاسایی و كارێكی گەلێك سادە و ئاسان، بەبێ ئەوەی رێگریی لێبكرێ. ئەمە لە تێكڕای كایەكانی نووسین، میوزیك، شانۆ، سینەما، تەلەفزیۆندا زۆر بە ئاسانی دەرئەكەون و وا بۆ سێ دەیە ئەچێ زەقتر و زەقتر ئەبێتەوە. كت ومت وەك ئەوەی یەكێك بێت لە سەر سەربانی ماڵەكەت خانوویەك دروست بكات و هەموو رۆژێك تۆ لەجێگەی خۆت نوقوم بكات تا وای لێ بێ خۆی بەرێتە كەشكەڵانی فەلەك و تۆش نغرۆ و كەسیش دادت نەپرسێ!
كاك نەهرۆ ساڵح دەلۆیی، كە سەرەڕای ئەوەی خاڵی منداڵەكانمە، زۆر دەمێكە پێوەندییەكی ئەدەبیی، هونەریی و ڕۆحیی لە ڕادەبەدەرمان هەیە.  ئێوارەیەكی دەوروبەری فێبریوەری ١٩٩٢ بوو، لە چێشتخانی ماڵی خۆمان ئاگاداری كردم، لەگەڵ هەریەك لە كاك ئازاد ڕەفیق چالاك و كاك شوان كەریم كابان لە (تەلەفزیۆنی گەلی كوردستان)، كە بنكەكەی كەوتبووە ناو حەرەمی زانكۆی سلێمانی گوێزراوەوە گفتوگۆیان سەبارەت بە دروستكردنی بەرنامەیەك كردووە كە هاندان بێ بۆ گەڕاندنەوەی خەڵكی ڕاگوێزراوی كورد بۆ زێدی خۆیان و سەرلەنوێ ژیاندنەوەی مەزرا و بنیاتنانەوەی تیكڕای ئەو شارو گوندانەی رژێمی بەعسی عێراق خاپور و وێرانی كردبوون. 
ئەو پێشتریش لەگەڵ ڕێكخراوی خێرخوازیی (كرۆ) دا كاری میدیایی كردبوو، و  بەرنامەیەكی هاوبابەتی بۆ بەڕێوە ئەبردن؛ لە ١٩٩١ یشدا پێكەوە بەرنامەیەكمان لە سەر كارەساتی ٩ی حوزەیرانی ١٩٦٣ بۆ كەناڵی سلێمانی (تەلەفیزیۆنی كوردستان) دروست كردبوو؛ ئەنجا نووسراوێكی یەك لاپەڕەیی ‌لەسەر شارۆچكەی پێنجوێن دامێ  و وتی " حەز ئەكەم  بەمەدا بچیتەوە و سەرنجی خۆتم پێ بڵەیت"؛ نووسینەكەم بەكەمێك دەستكارییەوە داڕشتەوە و ئەوەی بیرمە خێرا بەم شیعرەی موفتی دەستمان پێكرد: 
پێنجوین بەبێ تۆ نزیكە مەرگم
لوبنان شكێن بووی، داخی بەجەرگم
تاقە گوڵێك بووی بەسەر چیاوە
ئەهاتنە سەیرت لەملاو ئەولاوە
ئیتر هەر ئەو شەوە بیروبۆچوونێكی سەرەتاییمان ئاڵوگۆڕ كرد و ڕەنگە بڵێم ناوی بەرنامەكەشمان چەسپاند!
بەرنامەكە پەخشكراو دیتم بەبێ ئاگاداركردنەوەم ناوەكەم وەك یەكێك لە ئامادەكارانی نووسرابوو. دیارە بەدواییدا سوكە دەستخۆشیی و سەرنجی دڵسۆزانە و نەرمە گلەییشمان گوێ لێ بوون، كە بە هەمووی هاندانێكی ورەبەخشی چاك بوون بۆ بەردەوامی و بەرەو پێشەوەچوون.
من ئەو كاتە لەبەر باری ئابووریی ناجۆری وڵات، (كەبابخانەی پیرەمێرد) م لە تەلاری عەتاری سەر شەقامی سالم دانابوو، و ڕۆژانە لەگەڵ گزنگی خۆردا تا نیوەشەوانێكی درەنگ تێكڕا لەگەڵ وەستا و شاگردەكاندا لەوێ ڕوابووین، ئەنجا ژیانمان دەر ئەبرد، بەڵام چونكە نووسین و خوێندنەوە هەمیشە بەشێك بوون لە ژیانم، هەمانكات هەستم ئەكرد ئەتوانم خزمەتێكی بچووك بە گەل و وڵاتەكەم بكەم، كاتێك ڕووی لێنام كە لەگەڵیاندا بەردەوام بم، بە گەرمی بەرەو بیرۆكەكە چووم و وا ڕێككەوتین كە ستراتیجی ئێمە جگە لە هاندانی هاونیشتمانییان بۆ بنیاتنانەوەی كوردستان، بریتیی بێ لە پەیداكردنەوەی بڕوا بەخۆبوون، بە مێژووی پڕ سەروەریی و خەباتی نەپساوەی كورد، كلتور، فێركردنەوەی خۆشویستنی خاك و وڵات و پلانێكمان داڕشت كە سەرەتا لە قەزا و ناحیەكانەوە دەست پێ بكەین و دواتر وردە وردە بچینە دێهاتەكان و قوڵاییەوە.
یەكێك لە بەرنامەكانی دوای ئەوە لەسەر شارۆچكەی قەڵادزێ بوو، كاك نەهرۆ وتی ئیتر ئامادەكاریی بەتۆ ئەسپێرم، لەوێڕا دەستم ئاوەڵاتر بوو و خولیایەكی زۆرترم تێدا دروست بوو. لەو پێناوەدا هەر دوو هەفتە جارێك بۆ قۆناغی پێش بەرهەمهێنان ڕۆژێك و هەندێك جار دوو ڕۆژیشم لە خۆم ئەگرتەوە، ئەچومە كتێبخانەی گشتی سەرچاوەم پەیدا ئەكرد و سەرنج و سەرەقەڵەمەكانم ئامادە ئەكردن.
 ئەمە جگە لەوەی كە زۆرجار هەر جێگەیەكمان هەڵبژاردایە پێشتر لە كەسانی پسپۆر و شارەزای وەك مامۆستا (عبدالرقیب یوسف)م ئەپرسی داخۆ كێ ببینم و كوێ بەسەر بكەمەوە؟  بۆ قۆناغی دووەمینیش كە بەرهەمهێنان بوو، واتە ڕۆژی وێنەگرتن من و كاك نەهرۆ و كاك (بەكر فەرەج)، هەندێك جاریش كاك (مەریوان عبداللـە) بە كامێرایەكی (ڤی ئێچ ئێس)ەوە ئەڕۆیشتین و ئەو جێگەیەمان كێوماڵ ئەكرد.  
ئەمە ئەزمونێكی بایەخدار بوو، چونكە سەرەڕای ئاسودەیی ویژدانم بەرامبەر خاك و نەتەوە، زۆر جێگەم بینی، تواناكانم باشتر ڕسكان وخۆشەویستی فیڵمسازیشم بۆ هەتایی لەلا چەسپی.  گەرچی وەكوتر زیانی مادییشم لێ ئەكەوت، چونكە سروشتی ئیشی كەبابخانەكە وابوو، كڕیارەكان لەگەڵ بوونی خۆمدا لەوێ ڕاهاتبوون و وەك كەسوكاری یەكدیمان لێهاتبوو.  بۆیە زۆرجار ئەو ڕۆژانەی لەوێ نەئەبووم، فرۆش كەمی ئەكرد و قازانج سەری مایەی ئەخوارد! بەڵام ئەمە بۆ من مایەی نیگەرانیی نەبوو چونكە لایەنە مەعنەوییەكە هەقی بۆ كردبوومەوە و هەستم ئەكرد، لەگەڵ  هاوكارەكانمدا خزمەتێكی كەم وێنە ئەكەین.
جێگەی ئاماژەیە كە بڵێم من پێشترهیچ خوێندنێكم لەو كایەیەدا نەخوێندبوو، بەڵام خۆشویستنی ئیشەكە و ئامانجەكەی خۆڕسكانە فێری زۆر شتی كردم كە دواتر بۆم دەركەوتن زۆرینەیان لە جێگەی خۆیاندا بوون. 
ئەمە جگە لەوەی ئەم كارەی من سەر لەبەری هەر بە خۆبەخشیی و دەروێشانە بوون. هەرگیز هیچ باربۆیەكی داراییم نە لە تەلەفزیۆن و نە لە هیچ كەس و لایەنێكیش وەرنەگرتووە. هیچ بەرپرسێكیشم نەئەبینی تەنانەت كاك چالاك وكاك كابانیش، كە لە نزیكەوە دووەمیانم ئەناسی و دەمێك ساڵیش بوو، لەگەڵ یەكەمدا هاوڕێی نزیك بووین. 
دوای گەڕاندنەوە لەو شوێنانە، ئەنجا ڕۆژێكی تر لەماڵەوە بۆ قۆناغی دوای بەرهەمهێنان خۆم لێ ئەدا بەعەرزا؛ بێكەس ئاسا لەرزم لێ ئەهات و لەسەر پێخەفەكەم دەستم ئەكرد بە نووسینەوەی سیناریۆی بەرنامەكە بەو شێوەیەی كە خۆم ئەمویست.  
دواتر كە لە نووسینەوە ئەبوومەوە، دوو قۆڵی لەگەڵ كاك نەهرۆدا ئێوارانێكی درەنگ ئەچووینە ستۆدیۆی (ژمارە یەك)ی تەلەفزیۆن و دەستمان بە تۆماركردن ئەكرد و تا بەرەبەیان ئەماینەوە. ئەو خۆی كاری پێشكەشكردنی ئەگرتە ئەستۆ. هەموو بەرنامەكانی ئەخوێندەوە و كاك (عوسمان نوری)ش مۆنتاجی بە میكسەرێكی گەورە بۆ ئەكردین، منیش جار جارە ڕووم لە كاك نەهرۆ ئەنا كە چۆن نووسینەكە بخوێنێتەوە و داوای لابردن و كورتكردنەوە و پاش و پێشخستنی دیمەن و دیمانەكانیشم لە كاك عوسمان ئەكرد! 
 ئەمە سەرەڕای ئەوەی لە قۆناغی دووەمدا كاتی سەردانەكان جار جارە ئاڕاستەكردنی كامێرا وئەوانەی چاوپێكەوتنمان لەگەڵ ئەكردن ئەگرتە ئەستۆ، منداڵانم ئامادە ئەكرد، و شیعرم بۆ ئەنووسینەوە تا بیڵێن.  بەو جۆرە جگە لە بەرنامەی یەكەم، دوور و نزیك ناڕاستەوخۆ ڕینوێنیی بەشێكی ئەوانەی تریشم ئەكرد، گەرچی هەرگیز ناوم وەكو ڕێنوێن (دەرهێنەر) نەچووە سەر پەردەی تەلەفزیۆنی گەلی كوردستان!
بەو جۆرە بەرە بەرە فێری هونەری ڕێنوێنیی كردن ئەبووم و وام هەست ئەكرد گەلەكەمان دوو هەفتە جارێك تامەزرۆیانە چاوەڕێی بەرهەمی نوێ و دەوڵەمەندمان لێ ئەكەن، هەر بۆیە باشتر قۆڵمان لێ هەڵماڵی و لە درێژەی كارەكانماندا جگە لە پێنجوین، قەرەداخ، قەڵادزێ، هەڵەبجە، ئاغجەلەر، كفری، مەیدان، شوان و هەمەوەند، كۆیە، ڕەواندوز، شەقڵاوەمان بەسەركردەوە و هەموو جار ئافەرین و دەستخۆشیی بینەرانمان پێ ئەگەیشتەوە.  لێرەوە (ژیانەوەی كوردستان) وردە وردە درێژ كرایەوە و وای لێهات بووە نزیكەی كاتژمێرێك لەدوای ئەوەی كە یەكەم ئەڵقەی ماوەكەی تەنها پانزە خولەك بوو. 
لە بەرنامەی كۆیەدا هەنگاوێكی تریشمان نا، ئەو ڕۆژەی كە چوینە ناو شارەكەی حاجی،  كوڕەكانیشمم كە تەمەنیان حەوت و نۆ ساڵان بوون لە گەڵ خۆ بردبوون. ئەو زەمان هێشتا سەدام و ڕژێمەكەی بەعس، ناو بەناو دەستیان ئەوەشاند،  لەبەر ئەوە ئاسایشی كۆیە بە سوپاسەوە كۆمەڵێك پێشمەرگەیان بۆ ئاگالێبوونمان تەرخان كردبوو. دوای ئەوەی كە ئیشەكانی ناوشارمان تەواوكرد و لە كارەكانمان بووینەوە،  یەكێك لە پێشمەرگەكان وتی "كاك ئاوات، بۆ شیواشۆكیش ناچن؟" وتم "ئەوێ كوێیە؟" وتی"ئەوە ئەو جێگەیەیە كە نەوتەكەمانی لێیە!" ڕاستییەكی ئەوە بۆ هەموو ئێمە مایەی ڕامان و سەرسوڕمان بوو.
ئیتر بە چاوساغی برا پێشمەرگەكان خۆمان گەیاندە ئەوێكانێ، نەوتمان دیتەوە و شاگەشكە بووین. بینیمان بۆڕییەكی ئاسنی نزیكەی چل سانتیمەتریی ئەستوور لە ناوەڕاستی حەوزێكی چیمەنتۆكراوی نزیكەی چوار بە چوار مەتریی بە قوڵی مەتر و نیوێك، قوتبۆتەوە و بە توندی كڵۆمدراوە كەچی هێشتا لە درزی بورغو و سەمونەكانییەوە نەوت ورد ورد فیچقە ئەكات و چاڵی حەوزەكەی ڕەش داگیرساندووە! بۆیە لەسەر پێشنیاری هەموان و بە پێی ئەو زانیارییە كەمەی، پێشتر لە ڕێگەی كاك مونیری ئەندازیاری نەوتەوە كە سەر بە دەزگای فریاكەوتنی ئیسلامی بوو؛ بارەگاكەیان لە ماڵێكدا بوو نزیك بە كەبابخانەكە و هاموشۆی ئەكردم لەسەر نەوت پەیدام كردبوون، دەستم كردە قسەكردن و باسی چۆنیەتی بنیاتنانی پاڵاوگە و ڕێژە و جۆری بەرهەمم بەگشتی كرد؛ لەو كاتەشدا بۆ تۆكمەكردنی قسەكانم كاك (وەلید ئەحمد) كە پورزای گەورەی كاك نەهرۆیە ئاگرێكی بچوكی لە پشتەوە كردەوە، و  پەیتا پەیتا لەگەڵ كۆڕەك و كۆزاری كوڕم نەوتیان لە حەوزەكەی بەردەممان دەرئە‌هێناو ئەیانكرد بە ئاگرەكەدا و زۆرتر كڵپەی ئەسەند. ئەمە جۆرێكی تر بوو لە ڕێنوێنیی و داهێنانی تەلەفیزیۆنی كە بە ڕێكەوت لەو شوێنەدا فێری بووم! 
(بەرنامەی كۆیە) یەكێك بوو لە بەرهەمە هەرە دەگمەنەكان و دەنگدانەوەیەكی چاكی لەسەر ئاستی كوردستان هەبوو. ڕۆژێك دوای یەكەم پەخشی بەرنامەكە بۆ پینەوپەڕۆی كەبابخانەكەم پێویستم بە چیمەنتۆ كڕین بوو!  چوومە لای ئەو كەرەسە فرۆشەی كە كەوتبووە كۆتایی شەقامی قەدەم خێر، بەرانبەر كۆڵانی موزەخەكە، وناوەندی ڕەنگینی كچان لە سلێمانی و سەوای چیمەنتۆم لێكرد. كابرای فرۆشیار سەیرێكی كردم و وتی "بەچەند ئەڵێی بەوەندە!"، وتم "بۆ وا سەغی و سڵاواتی و دڵت خۆشە، چی قەوماوە؟"، وتی "مامۆستا ئەمشەو موهەندیسێكی ئەمەریكی نەوتی دۆزیەوە!"، وتم (لەكوێ؟)، وتی "لە كۆیە"، وتم "ئەنجا ڕاستی ئەكرد؟"، وتی "كە قسەكانی ئەكرد  لە بەردەمیەوە نەوتەكەیان دەرئەهێناو لە پشتیەوە ئەیان سوتاند!"، وتم "ئەنجا ئەوە چی لە مەسەلەكە ئەگۆڕێ؟" ،وتی "چۆن، ئیترهەموو شت هەرزان ئەبێ مادام نەوتمان كەشف كرد؟!"، كەمێك لەیەك وردبووینەوە و وتم "ئەی ڕات چییە، ئەگەر ئەو موهەندیسە من بم؟" كابرا زۆر وردتر تێم ڕاما و وتی" توخوا تۆ بووی؟"، وتم "بەڵێ"، وتی "تو خوا ئەو نەوتە ڕاست بوو؛ نەوتمان هەیە؟"، وتم "بەڵێ"، وتم "ئێستا پێم بڵی چیمەنتۆكەت بە چەند؟"، وتی "وەڵڵا بۆ تۆ بەبەلاش!"
ئەمە بۆ من هەڵسەنگاندێكی زۆر گرنگ بوو، بەردەوامیش لە كەسانی وەك مامۆستا (مستەفا ساڵح كەریم)م بیستبووەوە كە چەندە تامەزرۆیانە چاوەڕێی بەرنامەكە ئەكا! هونەرمەندی سروودبێژ (لالۆ ڕەنجدەر) یش، لە جێگەیەك وتبووی كە ئەو شەوەی بەرنامەكەی (ڕەواندوز) نیشان دراوە تا لێبوونەوەی بەرنامەكە بە دیار تەلەفزیۆنەكەوە گریاوە.. تاد، جگە لەو نامانەی كە بۆمان ئەهاتن و پراو پڕ بوون لە هاوسۆزیی و زانیاریی سود بەخش. 
دوا بەرنامەی من لەسەر (شەقڵاوە)ی بوكی كوردستان بوو. ئەو كات كاتی ئابڵوقەی نێو دەوڵەتیی بوو لەسەر تەواوی عێراق و ئابڵوقەیەكی عێراقییش بوو لەسەر كوردستان، زەمانیش زەمانی داگیركردنی موڵكی دەوڵەت بوو لەلایەن هەموو حیزبە چەكدارەكانەوە،  بۆیە كە دیتمان سەركردایەتی یەكێتی نیشتمانی كوردستان ئوتێلەكەی شەقڵاوەی ڕادەستی گەشتوگوزار كردۆتەوە و سەرلەنوێ ئامادەكراوەتەوە تا گەشتیاران ڕووی تێ بكەن و ببێتە داهاتێكی بەرچاو بۆ دەوڵەت، بە هەنگاوێكی گەورەو بەرپرسانەمان ئەژمار كرد و وامان باس كرد كە گۆڕ وایە هەموو لایەنەكانی دیش چاوی لێ بكەن!
ئەو شەوەی ئەو ئەڵقەیە ئەبوو پەخش بكرێ، خۆم لە كەبابخانە دزییەوە ولە ماڵی ڕەحمەتی (شێخ تەیبی شێخ محەمەدی برایماوە)، ی هاوڕێم كە هەمانكات خاوەنی تەلاری عەتاریش بوو پێكەوە سەیری پەخشی بەرنامەكەمان ئەكرد.  لە پڕ (ژیانەوەی كوردستان) لەناو قەددا وەستا و وێنەیەكی نەجوڵاوی شاخ و داخێك بە مۆسیقاوە متی كردین! پەشۆكام و وتم داخۆ ئەبێ لە كوێیدا قرتابێ یاخود سڕدرابێتەوە تا ئەو كاتەی بابەتێكی تر پەردەی تەلەفزیۆنەكەی داگیر كرد ودڵنیا بووم كە لێنادرێتەوە.  هەر لەوێوە تەلەفۆنم بۆ پەخشی (گەلی كوردستان) كرد كە ئەو كات لە شاخی ئەزمڕ بوون، تا بپرسم  هۆكار چی بوو بەرنامەكەیان وەستاند؟
ئەو كەسەی كە وەڵامی دامەوە وتی، "كاك ئاوات جەنابتیت؟" وتم "بەڵێ"، وتی"كاك ئاوات، دوو جار تەلەفۆنیان بۆ كردم پەخشەكە ڕاگرم، بە قسەم نەكردن، جاری سێیەم وتیان گەر هەر ئێستا ڕاینەگریت، ئەنێرین بە شەق بتهێننە خوارەوە!" ، وتم "كێ بوو؟"، وتی "ناتوانم پێت بڵێم!"
كاك نەهرۆش لەگەڵ مندا كە یەكترمان بینی نەیزانی مەسەلە چییە و زۆر لە من توندتر بوو، كەچی كە بۆ ڕۆژی دوایی سەری تەلەفزیۆنی دابوو، ئەویان هێور كردبووەوە و بە كۆمەڵێك قسەوە گەڕایەوە كە هیچیان بیانوی بە هێز نەبوون، بۆ ئەو خەنجەر لێدانە لە پشتی بەرنامەكە.  
یەكێك لە گلییەكان ئەوەبوو كە وتومانە "كڵێسەی مریەمی عەزرا، لەسەر ئەركی مام جەلال نۆژەن كراوەتەوە"، و گوایە نەئەبوو ئەو شەوە باسی ئەوە بكەین چونكە ڕۆژی لە دایكبوونی پێغەمبەری ئیسلام بووە! ئەم پاساوە زۆر كرچ و كاڵ بوو، چونكە (ژیانەوەی كوردستان) ڕاستەوخۆ نەبوو و ئێمەش بەرپرسی ڕێكخستنی بەرنامەكانیان نەبووین، كە دیارە من نە ئەوساو نەئێستاش ئەو بیانوو و موزایەدەیەم نەسەلماند و ناسەلمێنم! 
یەكێك لە دیمەنە كاریگەرەكانی بەرنامەی شەقڵاوە، هەڵسوكەوت و وتەكانی منداڵێكی كریستیان بوو، كە بەدەم پێڵاو بۆیاخكردنەوە ئەیووت، "من بۆیە لە هاویندا بۆیاخچێتی ئەكەم تاوەكو زستان بتوانم جل و بەرگ و دەفتەرو قەڵەمی پێ بكڕم و بخوێنم!" لەبەرئەوە بە مەزەندەی خۆم وام لێكدایەوە ئەم قسانە بوون كە ڕەنگە ئەو هەڤاڵە شەقوەشێنەی توڕە كردبێ، بەتایبەت لەو كاتەدا كە وڵاتان لە پەیتا كۆمەك و یارمەتیی زۆر و زەوەندیان بۆ گەلێك بواری وەك خوێندن و تەندروستی و ئاوەدانكردنەوە....تاد،  ئەناردە كوردستان و دیار نەئەمان! 
كاك نەهرۆ كە دیارە زۆر دڵپاكە، بە دوای ئەو سەردانەیدا بۆ تەلەفزیۆن باوەڕی گۆڕی، و وتی "با مۆنتاجی بكەینەوە!"، منیش دیارە بەوە قایل نەبووم و وتم، "من بە خۆبەخش ئەم كارە ئەكەم و لەكاتی خۆم و بژێویم ئەگرمەوە تا خزمەتی مەسەلەیەك بكەم؛ من نە لە تەلەفزیۆن ئیش ئەكەم و نە كەسێكی حیزبییشم وا مامەڵەم لەگەڵ بكەن!" لەبەر ئەوە بە حەیای خۆمەوە كشامە دواوە! 
ئەوەبوو ئەوان بۆ هەفتەی دواتر بە بێ پرسكردن بە من ئەو ئەڵقەیەیان مۆنتاج كردەوە وكردیان بەتەیرەكەی مەلای مەشهور، بۆیە ئیتر چاوم بەرایی نەهات سەیری بكەمەوە!  بە دوای ئەوەشدا وردە وردە (ژیانەوەی كوردستان) ئاقارێكی تری وەرگرت و بوو بە سەردانی ئەم گوند ئەو گوندی بێ توێژینەوە و ئامادەكاریی، سەرەڕای فێركردنی منداڵان بە ڕاكردن بەناو تۆز و خۆڵی دوای ئۆتۆمبێلی بەرنامەكەدا، چوون ڕاكردنی منداڵانی كۆتایی ( ١٩٦٠)كان بە دوای ئوتۆمبێلی (دوكەڵی مێشەكە) دا، ئەنجام پاش ماوەیەك كاك نەهرۆش بڵاوەی لێكرد.
لەوێش بەدواوە بەرنامەكە ڕێرەوی گۆڕدرا و بوو بە دەستییاوكاریی و بەسەركردنەوەی دێی ئەم فڵان و ئەو فیسار و لە سكەی خۆی دەرچوو، بەڵام هێشتا وەختە و هیوادارم  هەرچی زووە پێداچوونەوەیەكی وردی بۆ بكەن تاكو بتوانرێ زۆرترین سوود بگەیەنێ و هەر بریتیی نەبێ لە وەرگرتنی قسەی دانیشتوانی گوندەكان پێش بەرنامەكە و دواتر لە بەرەوە خوێندنەوەیان وتنەوەیان بۆ كات پڕكردنەوە!  
ئێستاش كە وا سی ساڵێكە (ژیانەوەی كوردستان) درێژە بە مانەوەی خۆی ئەدا و بووەتە بەتەمەنترین بەرنامەی تێكڕای تەلەفیزیۆنە كوردیی و كوردستانییەكان، كەچی بۆ ئاهی سوێندیش لە هیچ بۆنەو یادێكدا تەنانەت لەو نووسینەشدا كە لە كوردستانی نوێدا بڵاوكراوەتەوە ئاماژە بۆ ئەوە نەكراوە كێ و كێ دەستپێشخەر وداڕێژەری بەرنامەكە بوون؟  كێ ڕچەشكێن و دا‌هێنەری ئەو شێوازی تێكەڵاوبوون و هاندان وڕێنوێنیی و داڕشتنەی هێنایە گۆڕێ كە بە دوایدا چەندین كەس بەو شێواز و تۆنە لە زۆرێكی بەرنامە تەلەفیزیۆنییەكاندا قسەی پێ بكەن؟! دیارە بە پلەی یەكەم ئەركی (تەلەفیزیۆنی گەلی كوردستان)ە كە ئەو زانیارییانە ڕاست بكاتەوە، وەلێ ئەفسۆس تا ئێستا نەك حسابی سەربازی ون بەڵكو سەربازی شەترەنجیشیان بۆ نەكردین!  
خودی خۆم و دڵنیام تێكڕای هاوڕێكانیشم نە پێداهەڵدانمان ئەوێ نە هیچ دەسكەوتێكی مادییش، بەڵام كورد وتەنی (لەبەر نەفسێم نییە، لەبەر قەدرێمە!) من بۆ گەلەكەی خۆم و كوردستانم كردووە و پەشیمانیش نیم، تا ئەمڕۆش كە گوێم لە موزیكی (خوایە وەتەن ئاواكەی) ئەبێ كە بۆ پێشەكی و پاشەكی (ژیانەوەی كوردستان) هەڵمانبژاردبوو، موچوڕكێك لە تەوقی سەرمەوە دێ و لە نووكی پێمەوە دەرئەچێ، چونكە بێگومانم كاتی خۆی جێگەی خۆی گرت، و بۆ داهاتوش بوو بە كلتورێكی دەوڵەمەند!