مامۆستا جەعفەر

پێش چەند  رۆژێك  دكتۆر  عەلی جەباری ، لە ناو فڕۆكەیەك دەبێت و بەرەو سلێمانی  دەگەڕێتەوە . لە پڕ ، بە پەلە ، داوای دكتۆرێك دەكرێت : باری تەندروستی  سەرنشینی فڕۆكەكە لە مەترسیدایە . دكتۆر عەلی  بە دەنگیانەوە دەچێت . دەبینێت ژنێكی زۆر گەنج ، لەسەر پشت كەوتووە و كەس و كارەكەی بۆی دەگرین . پاش پشكنینێكی خێرا ، دەردەكەوێت ئەو ژنە دڵی لە لێدان كەوتووە . گیانی لە دەست داوە!

دكتۆر عەلی  دەتوانێت ، سەرلەنوێ  دڵی ببووژێنێتەوە و بە ئاسانی دەكەوێتەوە هەناسەدان ، پاش ئۆكسجین بۆ بەستن.

ژنە گەنجەكە ، دووبارە دەمرێتەوە .
 دكتۆر عەلی  دەستبەرداری  نابێتەوە . بۆ جاری دووەم  دڵی دەبووژێنێتەوە . هەر یەكسەریش  داوا لە تاقمی فڕۆكەكە دەكات ، لە فڕۆكەخانەكەی نێودەوڵەتی سلێمانی ، ئەمبولانس ئامادە بكرێت . بۆ ئەوەی ، بە زووترین كات ، هەر یەكسەر لە فڕۆكەخانەوە بۆ  نەخۆشخانەی بووژانەوەی دڵ بگوازرێتەوە .

پاش دابەزینی فڕۆكەكە ، ژنە گەنجەكە  هەڵدەستێتەوە و دەستی كیژە چكۆلانەكەی دەگرێت و بەرەو دەرگای  فڕۆكەكە  دەڕوات. دكتۆر عەلی  ئەم دیمەنە ، بە گەورەترین  خەڵات بۆ خۆی  دادەنێت : كاتێك دایك دەبینێت  دەستی خستۆتە ناو دەستی  كیژە چكۆلانەكەیەوە.

 لە وڵاتانی پێشكەوتوودا ، ئەم جۆرە كارە مرۆڤانەیە ، بە پاڵەوانێتی دادەنرێت . بە گەرمترین. شێوە دەستخۆشی لێ دەكرێت . بەرپرسانی شار ئاهەنگ بۆ رزگاركردنی  ژیانی مرۆڤێك دەگێڕن و خەڵاتی ئەو كەسە دەكەن ، كە بە رزگاركردنی ژیانی  كەسێك هەستاون .

ساڵی ١٩٩١ لە شارێكی ئۆروپێ ، هاوڕێیەكی یۆنانی بۆ ئاهەنگێك دەعوەتی كردم . كوڕە چواردە ساڵانەكەی ژنێكی بە تەمەنی لە خنكان لە  گۆماویكدا دەرباز كردبوو. چەندین میدالیای  زێڕیان  بەسەر سینگیەوە هەڵواسیبوو . رۆژنامەكانی  ئەو شارەش ، بە شانازیەوە لەسەر رووداوەكەیان نووسی .

لەم وڵاتەی ئێمەدا رزگاركردنی ژیانی مرۆڤێك ، بە كارێك دانانرێت ، شایانی رێزلێنان بێت . كۆمپانیای فڕۆكەوانی ئێرەش ، رەنگە پێیوابێت ، ئەوە ئەو دكتۆرە ئەركی سەرشانی  خۆی بینیوە . حیسابی ئەوە ناكات ، ژنێك لەسەر  بۆردی فڕۆكەكەی گیانی  لە دەست دا ، چەند زیانی مادی و مەعنەوی  پێدەگەێنێت . هەندێك  جار  دەبێ ، لە ناوەڕاستی  رێگا  بۆ دواوە بگەڕێتەوە..

ئەم وڵاتەی ئێمە  ، كەم و كورتی  زۆرە  : رێزلێنان هەندێك جار  بۆ كەسانێك دەكرێت ، كە گەورەترین  زیانیان  بە مێژوو ، داهاتوو ، ناوبانگی ئەم گەلە گەیاندووە !
كەسانی زۆر جوان ، كردەوەی مرۆڤانەی بەرز ، داهێنان ، بە هیچ  دانانرێت : ئەمەش گەلێك نائومێد دەكات ....