هاوڕێ سورە

ئاشكرایە بەهۆی نەبوونی سەرژمێریەكی ڕاست و دروست بەباشی نازانرێت ژمارەی كوردان چەند ملیۆنە ئەوەی هەیە مەزەندەیە گوایە پانزە ملیۆن لە ڕۆژهەڵاتە و سی ملیۆن لە باكورە و سێ‌ بۆ چوار ملیۆن لە ڕۆژئاوایە و زیاتر لە شەش ملیۆنیش لە باشورە . بێگومان چەندین ملیۆنیش لەناو نەتەوە سەردەستەكانی وەك عەرەب و تورك و فارس تواوەتەوە نەوە و نەتیجەكانیان نازانن لە بنەڕەتدا كوردن . ئەوانەشی بوونە ئاوارە و پەناهیندە لە ناو وڵاتانی جیهاندا دیار نیە چەندن . دڵنیاین ئەوانیش بە ملیۆنن لەلایەكی دیكەوە ئەو كوردانەی لە لوبنان و ‌وئیسرائیل و كۆمارەكانی یەكیەتی سۆڤیەتی پێشو جێگیر بوون ژمارەیان یەكجار زۆرە بە تایبەتی لە ئەرمینیا . ئەوە جیا لەقڕكردنی سەدان هەزار كورد بەجۆرەها شێوە .. بە هۆی بەرخۆدان و بەردەوامیدان بە شۆڕش و بەرگری پرسی كورد لە باشور بەتایبەتی دوای شۆڕشی چواردەی تەموزی (1958) لە چاو پارچەكانی دیكە زیاتر بەرەو پێشەوە چووە هەندێك مافی كورد لە دەستووری عیراقدا دانیپێدانراوە لەگەڵ ئەوەشدا حكومەتەكانی عەرەبی عیراق بەردەوام بوون لەشەڕ فرۆشتن و خاك داگیركردن هەتا 11ی ئازاری (1970) كە بە چوار ساڵی دوور لە شەڕی ڕاستەوخۆ ئەژمار دەكرێت . دوای پیلانە نەگریسەكەی ئەلجەزائیر لە (6-3-1975 ) بەعسیەكان هێندە لەخۆ بیی بوون وەك دەڵێن هار بوون لەسەردەمی شەڕی هەشت ساڵەی لەگەڵ ئێراندا و دوای وەستانی شەڕەكە بەتایبەتی لە ساڵەكانی 1988 و1989 و 1990 واتا هەتا 5ی ئازاری ( 1991) ڕژێم ( 4500 ) گوند و شار و شارۆچكەی كوردستانیان لە گەڵ خاك یەكسان كرد و ناوچەكەیان میم ڕێژكرد دانیشتووانەكەشیان ڕاگواست هەر بەشەی بۆ شوێنێك دەیان شوێنی كوردستانیان كیمیا باران كرد و بەو هۆیەوە هەزاران خەڵكی بێتاوان خنكان و شەهید بوون هەروەها لە ژێر پەردەی ئایەتێكی قورئاندا هەشت هەزار بارزانی و ( 182) هەزار مرۆڤی بێتاوانیان ئەنفال كرد لەساڵی ( 1991 ) لەترسی سوپا فاشیەكەی بەعس زیاتر لەدوو ملیۆن كورد ڕایانكردە سنورەكانی توركیا و ئێران . بۆیە ئاماژەم بەهەندێك لە تاوانەكان كردووە هەتا نەوەی تازە بزانێت چەندین جار هەوڵی قڕكردنمان دراوە . دڵنیام هەر حكومەتێك لە جیهاندا نیو ئەوەندە تاوان بەرامبەر هاوڵاتیانی سڤیل بكات هەر ئەوكاتە ڕیسوای دونیا و قیامەتی دەكەن بەڵام بەرامبەر ئەو هەموو كارەساتە گەورانە كۆمەڵگەی مرۆڤایەتی ئەوروپا و ئەمریكا و ماركسی و كۆمۆنیستەكان . وڵاتانی ئیسلامی و زانایانی ئایینی بەگشتی كەڕو لاڵ و بێهەڵوێست بوون كە لە مێژوودا هیچ حكومەتێك تاوانی وای بەرامبەر بەگەلەكەی ئەنجام نەداوە . دوای ئەوە بەرامبەر كوشتنی سێ‌ بۆ چوار هەزار كەس لە یوغسلافیا هەموو دونیا لێیان وەخۆكەوت و سەركردەی سڕبەكان لەدادگەی لاهای دادگایی كران و خزانە زیندان و یوغسلافیاش دابەشكرا بۆ چەند دەوڵەتێك . ساڵی (1990 ) كە كوێت داگیركرا بە ( 31 ) وڵات سوپای عیراقیان لە كوێت وەدەرنا و زیاتر لە سەد هەزاریان لێكوشتن و سەد و بیست هەزاریشیان لێ‌ بەدیل لێگرتن !! . پێویستە گەلی كورد بەگشتی و حزبەكان بەتایبەتی دڵنیابن كە عەرەبی عیراق سونە یان شیعە هەموویان بەیەك چاو سەیری كورد و كوردستان دەكەن بۆیە هەمیشە كوردستان بە بەشێك لە عیراقی عەرەبی دەزانن مێژووی دوور و نزیكیش ئاشكرای كردووە هەركاتێك لاواز بوون ئامادە بوون بۆ وتووێژ لەگەڵ كورد بۆ ئەوەشیان هەزار و یەك پیلانی نامرۆڤانەیان لە ژێر سەردابووە هەركاتێكیش كێشەی ناوخۆیان چارەسەر بووە ڕێك سێبەری خۆیان دیوە و گورگ ئاسا كەڵپەكانیان گڕ كركووە و پەلاماری كوردیان داوە بۆیە هەتا لەناوخۆیاندا ناتەبابن لە بەرژەوەندی كوردە . ئەوەی بۆمن جێگەی بایەخە لێرەدا ئاماژەی پێبكەم ئەوەیە دوێنی سونە . بەعس یان ئەوانی دی كەحوكمی عیراقی دەكرد بە ئاشكرا حكومەتێكی دیكەی دراوسێ‌ پشتیوانی نەدەكردن بەڵام ئێستا كە شیعە هەموو جومگەكانی دەسەڵاتیان بەدەستەوەیە ڕاستەو خۆ و بە ئاشكرا وابەستەی سوپای پاسدارانن و كۆماری ئیسلامی ئێران بەهەموو توانای خۆی بەرگریان لێدەكات شیعەكانی عیراقیش شیعەگەرایی دەكەن بەئاشكرا وێنەی خومەینی و خامامەینی لەهەموو شوێنێكی ژێر دەسەڵاتیان دانراوە . دیارە بەبێ‌ پرسی ئاخوندەكانی ئیران دەست لە ئاو نانێن .. لەوەش دڵنیام ئەگەر ئەمریكا و هاوپەیمانەكانی لەناوچەكە نەبن بەعس ئاسا پەلامارمان دەدەن .. دەی كە ڕژێمێك هەتا بنهەنگڵان دەستەكانی سووربن بەخوێنی خەڵكەكەی. لەچل ساڵ تەمەنیدا لەگەڵ كۆمەڵگەی نیودەوڵەتی لەسەنگەردا بوو بێت . بەملیۆنان دۆلار بۆ میلیشیا مرۆڤ كوژەكانی عیراق – لوبنان – یەمەن و سوریا و فەڵستین بنێرێت .گەلی ئیرانیشی غەرقی خوێنكرابێت و تروسكایی ئازادی بوونی نەبێت جگە لە پاسدار و ئاخوندەكان ئەوانی دیكە مەمرە مەژی بژین .لەلایەكی دی شاقەلیان كەوتبێتە ژێر پۆستاڵی جولەكە و هەندێك زلهێزی دیكە بەڵام گێچەڵ بە خەڵك وحكومەتی هەرێم بكات ؟!! بێگومان ڕوخانی ئەو ڕژێمە لە بەرژەوەندی گەلانی ئێران و ناچەكەیە بە نەمانیشی ئارامی و ئاسایش بەرقەرار دەبێت خۆفرۆش و باقی شیعەكانی جیهان بەچۆكدادێن .. ناكرێت ئەو ڕاستیەش نادیدە بگرین ئەگەر سیستەمی سیاسی لەسوریا و توركیا بەتایبەتی لە ئێران نەگۆڕێت ئەستەمە كورد ئاسودەبن و بەئامانج بگەن بۆیە رۆژی سەركەوتنی كوردان گۆڕانكاریە لە سیستەمی سیاسی لە وڵاتانی داگیركەری كوردستان بە تایبەتی ئێران چونكە شیعەكانی ئێران لە هەموویان مەترسیدار ترن دەستیان بەهێزە و پیلانگێڕێكی گەورەی ناوچەكەن . بەداخەوە لەجیاتی یەكگرتن كە هۆكارێكی سەرەكی سەركەوتنە هەندێك لایەنی كوردی كلكیان بەدەستی ئاخوندەكانەوەیە هەر كە زانیان كورد خەریكن هەنگاو بۆ پێشەوە هەڵدێنن ڕایاندەكێشن بۆ دواوە .. دەمێكیشە بەهۆی ڕاگەیاندنی چەواشەكارانی بەرژەوەندخواز خەڵكی سادە و بەشێك لە كوردستانیان بەلاڕێدا دەبرێت . ئەوەش ئەركی سەرشانی خەمخۆرانی گەلەكەمانی گرانتر كردووە ..