عەبدولڕەزاق شەریف

 ئەو، زۆرجار تەلەفۆنێکی بچوک، لە گیرفانی قەمسەڵەکەی نەم شەڕواڵەکەیا بوو، کە وەڵامی زەنگەکەی ئەدایەوە وەک چەرخی  جگەرەکەی دەستی، لەناو مشتیا، ون ئەبوو .

 وەک هەمو جارێک لەیەکەم وەڵامدا، وتی :

-  من باشم ، ئێوەباشبن .

 ئیتر بەردەوام بوو و وتی:

- من چیت بۆ بکەم؟ لەناو یەکێتی ئەمێنیتەوە مینبەر و کوتلە دروستدەکەیت، شەڕ دەکەیت، پشتیوانیت ئەکەم ...

 دێیتە دەرەوە لەیەکێتی، حیزب دروستدەکەیت هەر پشتیوانیت دەکەم ...

 ئەگەر دێیتە لای ئێمەش، وەک رێکخەری گشتی بزوتنەوەکە، شوێنەکەی خۆمت بۆ جێدەهێڵم .

 نەوشیروان مستەفا، ئەو قسانەی کرد و تەلەفۆنەکەی داخستەوە .

 هێشتا تەواو دەستی دانەگرتبو، پێم وت :

+ کاکە ئەوە کێ بوو ؟

وتی: بەرهەم ، بەرهەم ساڵح . وەزعی لەناو یەکێتی خراپ بوە .

وتم: ئنجا تۆ بەراستت بوو، جێگەکەی خۆتی بۆ جێدەهێڵی؟

وتی: من هەرگیز لەگەڵ هاوڕێکانمدا، درۆم نەکردوە. بەڵێ داوای هاوکاری لێکردوم هەرئەوەندەم پێدەکرێت ، هەرئەوەشم هەیە بیدەمێ ! ( مژێکی جگەرەکەی چەند چرکەیەک رایگرت) ئینجا وتی : بیرت نەچێت شای ئێران شاپەرستەکان خستیان، پێشوەخت ئەوان لێی هەڵگەڕانەوە، خومەینی هاتە سەر حازری !

وتم: هاوڕێکانمان لەناو بزوتنەوەکە ، قبوڵی دەکەن ؟

وتی: بەرهەم،  مەترسی لەدوو کەسی ئێمە هەیە ! منیش ئەو دوانە ئەنێرمە بەردەرگای گردەکە بۆ پێشوازیکردنی، وێنەکانیش بڵاو ئەکەینەوە ئیتر ترسەکەی ئەڕەوێتەوە، خۆشم شەش مانگ لەگەڵیا دەمێنمەوە ، هەتا تەواو گەنجەکانیشمان لەگەڵیا رادێن .

وتم: ئەی غەزەبی ماڵی مام جەلال ؟

وتی: هێرۆ چەند جارێک پێی وتوم بەرهەم بەرە لای خۆت بانەڕوات بەملاولادا .

 لەجوغزێکی بچوکی دەوروپشتی هاوڕێکانماندا، بەچەند جۆرێک هەواڵەکە ئەملاولای کرد، ئیتر باسی لێ نەکرایەوە .

 ئەو شەڕ و زویربونەی بەرهەم ساڵح، دوای ماوەیەکی کەم، لەناو یەکێتیدا، ( ناوەندی بڕیار ) ی وەک مینبەرێکی جودا، لێکەوتەوە .

 دوای مەرگی نەوشیروان مستەفا، بەرهەم ساڵح بەتەواوەتی لەیەکێتی جیابۆوە، هاوپەیمانیەتێکی بەسەرۆکایەتی خۆی دروستکرد .

 پێش هەڵبژاردنی دووهەزاروهەژدە، پەیامێکی بۆ بزوتنەوەی گۆڕان نارد، تیایدا ئامادەیی خۆی و هاوپەیمانێتیەکەی بۆ یەکبون و یەکگرتنی بێ مەرج لەگەڵ بزوتنەوەی گۆڕان بەیانکردبوو، وتبوشی کاندیدەکانی حکومەت و پەرلەمان و سەرۆکی لیستەکەش هەموی بزوتنەوەی گۆڕان دیاریانبکات . وەک بیستمان خۆی تەنیا داوای سەرۆکایەتی قەوارە پەرلەمانیەکەی کردبوو .

لە کۆبونەوەی جڤاتی نیشتیمانیا، پەیامەکە، بەپێشەکیەکی شەفەهی سەید عومەرەوە، کەتیایدا وتی ( بەرهەم ئەیەوێ بێت و دەست بەسەر بزوتنەوەکەمانا بگرێت و بمانخوات ) خرایە دەنگدانەوە . حەمە تۆفیق رەحیم بەتوندی پشتیوانی سەید عومەر و رەتکردنەوەی پەیامەکەی بەرهەم ساڵحی کرد .

لەبەر ئەوەی من پێشتر هەوڵی یەکەم و حیکایەتی پێشوازیەکەی ساڵانی پێشوم ئەزانی، لەو کۆبونەوەیەدا، بۆم دەرکەوت ئەو دوو کەسەی نەوشیروان مستەفا  وەک مەترسی بۆ هاتنی بەرهەم ساڵح باسیکردن، ئەم دوانەن کە ئێستا دەسەڵاتی یەکەم و دوەمی بزوتنەوەی گۆڕانیان لەدەستدایە.

 کاشکێ کۆنوسی کۆبونەوەکان وەک خۆی مابێتن چونکە بە موداخەلەیەکی کورت لەسەر پێشەکیەکەی سەید عومەر و قسەکانی حەمە تۆفیق وتم ( دەی ئەگەر ئەم بزوتنەوەیە هێندە لاواز بێت ، بەرهەم ساڵح لەهاتنیدا قوتمانبدات، یارەبی عافێتی ئەو بین، وتیشم  کەعێراق و ئێران و ئەمریکا و هاوپەیمانەکانی، ئەویان وەک سەرۆک کۆماری ئایندەی عێراق پێشنیاز کردوە! لەو حاڵەتەیا کاندیدی سەرۆکی کۆمار، ئێمە دیاریدەکەین و لەبزوتنەوەی گۆڕان دەبێت ) .

 حەمە تۆفیق هەمیشە لەکینەی شەخسی خۆیەوە شیکردنەوەی بۆ روداوە سیاسییەکان ئەکرد! هەربۆیە چەندجارێک لەوەڵامی ئەم قسەیەی مندا ئەیوت ( شتی وا رونادات سەرۆک کۆمار ئەمجارە بۆ عەرەبی سوننە دەبێت ) .

 ساڵی دواتر، بۆئەوەی پێشنیازی پۆستی سەرۆک کۆماری لەدەست نەچێت! بەرهەم ساڵح بەناچاری گەڕایەوە ناو یەکێتی و بەکورسی سەرۆکایەتی گەیشت .

   ساڵ تێپەڕی و بەسەرۆکی و  لەدیدارێکدا، باس و شایەتیم لەسەر ئەو گفتوگۆیانەی پێشوو، هەوڵەکان و روداوەکان، بۆ دەگێڕایەوە، باسی هەڵەی رەتکردنەوەی ئەو پێشنیازەی نەوشیروان مستەفام کرد ! خواهەڵناگرێ تائەوکاتەش بەرهەم ساڵح بەهانەی بەهێزی بۆ نەبون بەرێکخەری گشتی بزوتنەوەی گۆڕان هەبوو .