🔻یەكێتیی داوای لابردنی حكومەتی سێبەر دەكات، پارتی رازی نییە دەستكاریی بكات.

🔻یەكێـتیی داوای لابردنی دەستەی سەرۆكایەتی پەرلەمان و گۆڕانكاریی لە ئەنجومەنی دادوەرییدا دەكات.

🔻هەرحزبێك بچێتە حكومەت لەم بارودۆخەدا، پیاوخراپی بۆ دەمێنێتەوە!

🔻راگەیاندنی ئاشتەوایی تاكە رێگەی بەردەم یەكێتییە بۆ گێڕانەوەی هاوسەنگیی و رووبەرووبونەوەی ئەم بارودۆخە.

✍️ سەرتیپ جەوهەر

كۆبونەوەکەی دێنێی پارتی و یەكێتیی هیچی لێ شین نەبووە. ناكۆكییەكانی پارتی و یەكێـتی قوڵن، ئەوەندەی لێمانەوە دیارە زەحمەتە بەمزووانە بتوانن حكومەتی نوێ‌ دروستبكەن. ناكۆكییەكانی هەردوولا بەشێكی لەسەر پۆستەكانە، بەشەكەی دیكەی لەسەر شێوەی ئیشكردنی حكومەت و هەندێك گۆڕانكارییە لە حكومەتدا، بەڵام لەسەر هیچی نەگەیشتوونەتە ڕێككەوتن. ئەوەی یەكێتیی و پارتی ناكۆكیان لەسەری هەیە جگە لە پرسی دابەشكردنی پۆستە باڵاكان و دابەشكردنی وەزارەتەكان، هاوكات گرفتەكان بەمشێوەیەی خوارەوەیە:

١ــ یەكێتیی داوای لابردن یان نەهێشتنی حكومەتی سێبەر دەكات، بەڵام پارتی رازی نییە و وتویانە ئەو كەسانەی لەئەنجومەنی وەزیران دامەزرێنراون و ئیشوكاری سێكتەر و وەزارەتە جیاوازەكان دەكەن لەلایەن سەرۆكوەزیرانەوە دامەزرێنراون و لایاننابەن.

٢ــ یەكێتیی داوای لابردنی دەستەی سەرۆكایەتی پەرلەمان دەكات كە لەسەردەمی گۆڕاندا (د. یوسف محەمەد)، سەرۆكایەتی پەرلەمان كراوەتە دەستەی سەرۆكایەتی و هەریەكە لە سەرۆكی پەرلەمان و جێگرەكەی و سكرتێری پەرلەمان دەبێت ئیمزا لەسەر بڕیارەكان بكەن. ئێستا یەكێتیی داوادەكات ئەو دەستەیە هەڵبگیرێت و مافی بڕیاردان لە ئیشوكارەكانی پەرلەمان بگەڕێتەوە بۆ سەرۆكی پەرلەمان نەك لای دەستەی سەرۆكایەتی بێت.

٣ــ یەكێتیی داوایكردووە سەرۆك و جێگری سەرۆكوەزیران وەك یەك پاكیج بەیەكەوە لەپەرلەمان دەنگیان لەسەر بدرێت، بۆئەوەی ئەگەر سەرۆك یان جێگر دەستیان لەكاركێشایەوە حكومەت بكەوێت، بەڵام پارتی رازیی نییە.

٤ــ یەكێتیی لە دوایین كۆبونەوەكانیدا باسی گۆڕانكاریی لە ئەنجومەنی دادوەریی یان دەسەڵاتی دادوەرییدا كردووە و داوایكردووە ئەو دەسەڵاتە گۆڕانكاریی تێدابكرێت، گوایە بەتەواوی كەوتۆتە ژێر هەژموونی پارتی و بەسیاسی كراوە.

بۆ پارتی دواكەوتنی حكومەت نەك هیچ گرفتی نییە بەڵكو قازانجی زۆری هەیە، چونكە لەلایەك پەرلەمان لەكاركەوتووە و لەلایەكی دیكە هەموو حكومەت و جومگە گرنگەكانی حكومڕانی بەدەستە، بەبێ‌ گەڕانەوە بۆ پەرلەمان و هیچ لایەك، بڕیار دەردەكات و ئەندامانی خۆی لە پۆستی باڵای حكومەت دادەمەزرێنێت و گرێبەستی درێژخایەنی ئابوریی دەكات، بەڵكو لەوە واوەتریشی بەدەستەوەیە، بەڵام بۆ بارودۆخی هەرێم زۆر خراپە، چونكە هیچ دامەزراوەیەكی شەرعیی نەماوە و ئەوەی هەیە دەسەڵاتدارێتی حزبێكە و هیچیتر. یەكێتیش لە بانگەشەی هەڵبژاردن وەعدی زۆری بەخەڵكداوە، بەتایبەتیش ئەوەی پەیوەندی بەڕاستكردنەوەی هاوسەنگیی حوكمڕانییەوە هەیە، ئەگەر پابەندی جێبەجێكردنی وەعدەكانی نەبێت رەنگە زیانی گەورە بكات، بەتایبەت کە هەڵبژاردنی عێراق نزیكەی دوای كەمتر لە 8 مانگی دیكە پێویستە بكرێت.

ئەوەی دەبینرێت پارتی بەئاسانی نایەتە ژێرباری خوستەكانی یەكێتیی، بگرە بازنەی بزوتن و جوڵەی یەكێتیی و حزبەكانی دیكەش ئەگەر بچنە حكومەت تەسكتر دەكاتەوە، چونكە لەلایەك حكومەتی سێبەری دروستكردووە وەك مەنزومەیەكی بەدیل و فیعلیی حوكمڕانیی، لەلایەكی دیكە بەشێكی زۆری ئیشوكار و خزمەتگوزارییەكانی داوەتە كۆمپانیاكان و ئەوەی ماویشە بە قۆناغ دەیداتە كەرتی تایبەت و كۆمپانیاكان (دیاریشە كۆمپانیاكان هی كێن)! بۆیە ئەوەی بچێتە حكومەت بەتایبەت ئەو وەزارەتانە وەربگرێت كە ئیشوكارەكانیان دراوەتە كۆمپانیا، ناتوانێت هیچ بكات، تەنها پیاوخراپیەكەی بۆ دەمێنێتەوە. كەوایە رێگاكانی بەردەم یەكێتیی بۆ رووبەرووبونەوەی ئەم بارودۆخە زۆر نین، تاكە رێگەیەك كە مسۆگەر بێت و بتوانێت هەم لەپەرلەمان یاخود لە دەرەوەی پەرلەمان بۆ رووبەرووبونەوەی پارتی و گێڕانەوەی هاوسەنگیی حكومڕانیی یارمەتی یەکێتیدا بدات، هەوڵدانە بۆ سازاندنی زەمینەی ئاشتەوایی گشتیی لەپێناو چاككردنەوەی لێكەوتە خراپەكانی بەر لە 8ی تەمموز (كۆنگرەی 4 ی 2020) و دوای 8ی تەمموزی 2021 كە بووە هۆی لێكترازانی زیاتر و سەرئەنجام زیانی گەورەی لێكەوتەوە، بەڵام ئایا یەکێتی وا دەكات؟ ئەوە جێدەهێڵین زەمەن وڵامی بداتەوە..