ئارام ڕەفعەت

قەتەڕ و ئیسڕائیل بەیەکەوە مانۆڕ و راهێنانی سەربازی لە یۆنان ئەنجام دەدەن. لەم چالاکییە هاوبەشەی قەتەڕ و ئیسڕائیلدا دە وڵاتی تریش بەشدارن، لە ناویاندا ئەمریکا و ئیمارات.

چالاکییە هاوبەشەکەی قەتەڕ و ئیسڕائیل لە ٢٤ی ئازار دەستی پێ کردووە و تا ١١ی نیسان، واتە بۆ ١٩ رۆژ، بەردەوام دەبێت.

هەر یەک لە قەتەڕ و ئیسڕائیل بە پێشکەوتووترین  فڕۆکەی بەردەستیان بەشداری چالاکییە هاوبەشەکەن.

هەر ئەم لەحزەیە فڕۆکە و فڕۆکەوانەکانییان وەک دوو ئاشقە و ماشقە بە ئاسمانی یۆناندا بەجووتە سەما دەکەن.

لە ماوەی چالاکییە هاوبەشەکەی قەتەڕ و ئیسڕائیلدا، سەدان فەلەستینی گیانیان لەدەست داوە یان بریندار بوون.

کەچی تەواوی ئیخوانەکانی دونیا لەئاست قەتەڕ و چالاکییە هاوبەشەکەیدا بوونەتە کەڕەی شەربەت.

جا برای ئیخوانی… ئایا تۆش یەکێک بوویت لەو ئیخوانیانەی باشور کە لە دوو ساڵی ڕابردوودا بێڕێزی و تەشقەڵەت بەرامبەر ئەو کوردستانییە شکۆمەندانە کردووە کە دۆزی رەوای کورد و ئازارەکانی نەتەوە بێکەس و ژێردەستەکەی خۆیان لە هی فەلەستین لە پێشتر  دەبینن؟

ئایا تۆش تۆمەتی پیاوی جولەکەت داوەتە پاڵ ئەو  کوردستانییە خاوەن هەڵوێست  و راستگۆیانەی کە وەک خەڵکی تری بەنگلادیشی، مالیزی، ئەڵمانی، ئەفریقایی یان پاکستانی کێشەی فەلەستین و ئیسڕائیل بە کێشەی خۆیان نازانن؟

ئەگەر وەڵامەکەت بەڵێیە و بێڕێزیت کردووە… ئێستا پرسیارێکی ترم هەیە، ئایا هیچ هەڵوێستت  بەرامبەر قەتەر، سەرچاوەی ناز و نیعمەتی سەرانی ئیخوانەکەت  دەربڕیوە یان متەقت لێوە نەهاتووە؟

ئەگەر بەرامبەر چالاکییە سەربازییەکەی ئیسڕائیل و قەتەر مێش میوانت نییە، ئەوا هیچ داوایەکم لێت نییە تەنها بڕۆ بەردەم ئاوێنە و لەوێش خۆت و مەردایەتی خۆت.