سەردار ستار

دەنگدانەوەو کاریگەریەکانی کۆنگرەی ١٢ی پەکەکە، تا چەند ساڵی تریش بەردەوام دەبێ. چونکە قەڵەمبازێکی نوێیە لە مێژووی کوردستان و ناوچەکە. ئەم کۆنگرەیە راستەوخۆ لە ژێر رێنمایی و پلانی ر.ئاپۆ بەڕێوەچوو، بۆ قۆناغێکی نوێی تێکۆشان. بەواتایەکیتر کۆنگرەیەکی خۆدووبارە کردنەوە نەبوو، تەنها بۆ پرس و کێشە رێکخستنیەکان. 

بۆیە لێکدانەوەو قسە لەسەر کردنی زیاتری پێویستە. لە دۆخێکدا پەکەکە کۆنگرەی ئەنجامدا لەناو دوو لە ئەشکەوتەکانی کە بەدەستی گەریلا دروست کراون و پاراستن و بەڕێوەبردنی خودی گەریلا خۆی بووە. لەوانەیە پلانی هەندێک هێز و دەوڵەت هەبووبێ، بۆ ئەوەی نەهێڵن کۆنگرە بەئەنجام بگات، بەڵام هەستیاری لە بەرانبەر قۆناغەکە، نەیهێشت نیازە خراپەکان بگەنە ئامانج. 

جاری یەکەم بوو، پەکەکە یەک کۆنگرە لە دوو شوێنی جیاواز ئەنجامبدات، بە دوو دیوانی جیاواز، بەڵام هەردووکیان بگەن بە هەمان بڕیار و رێنمای بۆ قۆناغی داهاتوو.

لە ٢٦ ساڵی رابردوو، ر.ئاپۆ ئیمرالی کردە ئەکادیمیای بیر و هزر نوێ کردنەوەو پێشخستن و وەرچەرخان. بۆیە دەتوانین بڵێین کۆنگرەی ١٢مینیش لە ئیمڕالی بەڕێوەچوو، ئەوەش یەکێک بوو لە دەستکەوتەکانیتری ئیمڕالی. پەکەکە لەبەر دۆخی ئاسایشی و سەختی قۆناغی ١٠ ساڵی رابردوو، نەیتوانیبوو کۆنگرەکانی ئەنجامبدات، بەڵام لەناو هەمان بارودۆخ، بەبێ ئەوەی هیچ دۆخێکی ناهەموار رووبدات، ر.ئاپۆ کۆنگرەی ١٢مینی ئامادەکرد و ئەنجامیشیدا.

ئامادەکاریەکانی ر.ئاپۆ چیبوون ؟؟
کۆنگرەی حیزبێک ئەگەر نەیتوانی رێنمایەکی فرەلایەنبێ بۆ قۆناغەکە و داهاتوو، ئەوکات دەبێتە کۆنگرەیەکی رۆتین. لەبەر ئەوەی ر.ئاپۆ زووتر خۆی ئامادەکردبوو، لەلایەنی هزری و فەلسەفی و سیاسی، بۆیە لە بچوکترین دەرفەت سوودی وەرگرت و وەڵامی لێدوانەکانی د.باخچەلی دایەوە. 

بۆیە لەلایەک دەیەوێت ئەو گۆڕانکاری و وەرچەرخانەی لە هزری خۆی کردوویەتی بیانخاتە پراکتیک، لەلایەکیتریش متمانە دەداتە لایەنی بەرانبەر و گەلانی تورکیا، کە دەتوانێ قۆناغێکی نوێی خەبات دەستپێبکا. ئەمەشی پشتڕاست کردۆتەوە، نە بە شەڕ و توند و تیژی، بەڵکو بە رێگەی سیاسەت و یاسای و دەستوری. ئەنجام توانی بە چوار دیدار، دەوڵەتی تورکیا رازی بکات کە دەتوانێ پەکەکە ئامادە بکات بۆ کۆنگرە، بۆیە تا ئەو رۆژانەی کۆنگرەش ئەنجام دەدران، هێشتا بەرپرسانی دەوڵەت گومانیان هەبوو، ئایا هەمان بڵێن و بیرۆکە و بڕیاری ع.ئۆجالان دەبنە بڕیاری کۆنگرە یان نەخێر، پێچەوانە پەکەکە و هەپەگە وەک خۆیان بەردەوام دەکەن!!! بۆیە سەرەتا دەوڵەتی تورکیاش وەک زۆر کەس لە کوردستان و ئەوروپا، شۆکبوون بەوەی چۆن پەکەکە هەمان بیرکردنەوەکانی ع.ئۆجالانی کردنە بڕیار!!!

ر.ئاپۆ هەوڵیدا بە رێگەی دیمەن، هەروەها بە نووسین و بە وەرگرتنی رای کۆمیتەی ئامادەکاری کۆنگرە، بەشداری ئامادەکاریەکانی کۆنگرە بکات. ئەنجام بەگوێرەی زانیاریەکان توانی بە سێ شێوازی جیاواز، بەشداربوونی خۆی بۆ کۆنگرە پێکبێنێ، بەمشێوەیە توانی پلان و پرۆژەی ئاشتی و کۆمەڵگەی دیموکراتی، بگەێنێتە هەمووان و کۆنگرە بکاتە دەرفەتێکی بەهێز بۆ قۆناغی داهاتوو.

پەکەکە چۆن وا زوو توانی یەکێتی هزری و رێکخستنی دروست بکات ؟؟
هەموو ئەو کۆنگرانەی لە رابردووش ئەنجامدراون، ر.ئاپۆ رەنجێکی زۆری لەبەرداون. واتا لە ئامادەکردنی راپۆرتی سیاسی کۆنگرە، تا رێنمای بۆ ئاراستە کردن و چۆنیەتی بەشداربوونی قۆناغەکان، لە زۆربەی کۆنگرەکانی تریش وەک خود خۆی ئامادە نەبووە، بەڵام وەک هزر، کۆنگرەی بەڕێوە بردووە. ئەم کۆنگرەیان هێشتا زەحمەتربوو، بەڵام توانرا لە سێ رۆژ کۆتای بەکارەکانی بێنێ.

پەکەکە ٢٦ ساڵە پەروەردە لەسەر بیر و هزری ر.ئاپۆ دەبینێ، واتا ئەوانەی پێیان وایە ر.ئاپۆ لە پەکەکە دابڕاوە، هەڵەیەکی جدی دەکەن، چونکە لە ماوەی ٢٦ ساڵی رابردوو ر.ئاپۆ نزیکەی ٢٥ هەزار لاپەڕەی نووسیوە، سەرجەم ئەو پەرتوکانە وەک کەرستەی پەروەردەی کادیر و لە کۆنگرە و کۆنفرانسەکان بەکارهاتوون، واتا پەکەکە هەموو ئەندام و کادیر و جەماوەری خۆی لەسەر ئەو پەرتووکانە پەروەردە کردووە. بۆیە کادیر و سەرکردایەتی پەکەکە دەزانن رێبەرەکەیان چۆن بیر دەکاتەوە، بەهەمان شێوە ر.ئاپۆش دەزانێ بنکەی رێکخستنی و پێشەنگانی چۆن بیر دەکەنەوەو چۆن خەبات بەڕێوەدەبن.
١٠ ساڵ چ نوێگەریەک لە بیری ر.ئاپۆ دروست بووە ؟؟

لەگەڵ ئەوەی ماوەی ٣٥ ساڵە لێپرسینەوە لە هزری سیاسی و فەلسەفی سۆسیالستی دەکات. بەڵام وەک پیشەی بەردەوامی زیندی بوونی هزری ئەوەندە بەهێزە، دەتوانێ بەردەوام نوێکاری بکات. بۆیە سەیربکەین ساڵانی نۆوەت ر.ئاپۆ بەهێزترین بزووتنەوەی هزری و فەلسەفی لەکوردستان و ناوچەکە بوو. دوای دیلکەوتن و مانەوەی ١٥ساڵ لە زیندان دیسان پێشەنگایەتیە هزریەکەی خستە ئەستۆی خۆی. پاشان لە دوای ٢٠١٦ وە کەوتە ژێر گۆشەگیریەکی سەخت و بەهیچ شێوەیەک نەیان هێشت هەناسە بدات و هەموو پەیوەندیەکیان لەگەڵ دەرەوە لێ قەدەغە کرد، بەڵام دیسان پێداچوونەوەی زیاتری بەلایەنە هزری و فەلسەفی و سیاسیەکانی کردووە. ئەمەش وادەکا لە تەمەنی ٧٦ ساڵی و لەناو کونجی زیندان بڵێ، بەرپرسیاری قۆناغەکە دەخەمە ئەستۆی خۆم.
لەلایەنی هزری و ئایدیۆلۆژی، جارێکیتر پێداچوونەوەی بە سۆسیالیزمی بونیادنراو کردووە، بۆ ئەوەی خۆی و تەڤگەرەکەی لە سۆسیالیزمی بونیادنراو رزگار بکات، بۆ ئەمەش رەخنەکانی لە سەر پێشەنگانی سۆسیالیزمی بونیادنراو چڕ کردۆتەوە( لە مارکسەوە تاکو ماو)، بەتایبەت لە بابەتی ئابووری، ململانێی چینایەتی، پێشەنگانی کۆمەڵگە، پرسی ئازادی، دەوڵەت و دەسەڵات. ئەوەی وەک ئەنجامیش لە مێژووی ١٥٠ ساڵەی سۆسیالیزمی زانستی و بونیادنراوی وەریگرتووە، ئەزمونی کۆمۆنەی پاریسە. واتا زیاتر قوڵبوونەوە لە کۆمۆنە و تێکۆشان بۆ کۆمەڵگەیەکی کۆمیناڵ و پێداگری لەسەر رووبەڕووبوونەوەی مۆدێرنیتەی سەرمایەداریە. ئەمەش هێز دەداتە سەرجەم هێزە چەپ و سۆسیالیست و مارکسیستەکان کە پێداچوونەوە بەخۆیانەوە بکەن، سلاڤۆدێر ژیژکیش وەک چەپگەرێک، بۆ ئەمەیە ستایشی هەوڵەکانی دەکات. بۆیە لەداهاتوو زیاتر لەگەڵ چەمک و دەستەواژەی سۆسیالیزمی کۆمەڵگەیی و کۆمین بەریەککەوتنمان دەبێ، بەمشێوەیەش لە هزر و فەلسەفەی سۆسیالیزمی بونیادنراو و چەپی کلاسیک رزگارمان دەبێ.
لەلایەنی چارەسەر پرسی کورد و دیموکراتیزەکردنی رۆژهەڵاتی ناوەڕاست و تێزی پێکەوە ژیانی گەلان، لەمە هێشتا ڕوونتر و بەبڕیارتر دێتە مەیدانی پراکتیکی لەگەڵ دەوڵەت – نەتەوە، بۆیەش هەڵوەشانەوەی پەکەکەی وەک هەنگاوی یەکەم بەسەرکەوتووی بەڕێوە برد. وەک ئەنجام هەموو دەوڵەت – نەتەوەکان ئامانجن، بۆ ئەوەی بچوکبکرێنەوەو نەبنە کۆسپ لەبەردەم تێکۆشانی نەتەوەی دیموکراتی، لە چوار بەشی کوردستان. لە قۆناغی یەکەم باکور و تورکیا، هەروەها سوریا و رۆژئاوا زیاتر بوونەتە بابەتی هەڵسەنگاندنەکان، بەڵام بۆ داهاتوو بەهەمان رەوتی جاران، باشور و رۆژهەڵات و شەنگال و ئەوروپا، راوەستەیان لەسەر دەکات و بەشێک لە خەباتی قۆناغی داهاتووی دەبن، بێگومان بەشێواز و رێبازی پەکەکە وەک جاران نا، بەڵکو بەوشێوازەی کە گۆڕانکاری تێدا کراوە. بۆیە ئەوانەی خۆ هەڵوەشاندنەوە وەک پەشێمان بوونەوە تێگەیشتوون، زوو بەخۆداچوونەوە بە هزری خۆیاندا بکەن، ئەگەرنا لە کاروانەکە زۆر دادەبڕێن.
بۆ ئەوەی پرسی نەتەوەیی لەم سەدساڵەی رابردوو باشتر تێبگەین و لەچەقبەستن و هزری دەوڵەتگەرای سیستەمی سەرمایەداری رزگارمان بێ و چیتر کێشەی کورد لەدەستی هێز و دەوڵەتەکاندا نەمێنێتەوەو یاری بەچارەنووسی نەکەن، بۆیە لەجیاتی تێزی مافی چارەی خۆنوسینی نەتەوەکان، ر.ئاپۆ دەیەوێ گەلی کورد خۆی بڕیار لەسەر شێوازی چارەسەری دیموکراتیانەی خۆی بدات لە دەرەوەی رێگەچارەکانی دەوڵەتگەرایی. بۆ ئەمەش لە رابردووی نزیک بەتایبەت لە رۆژئاوای کوردستان تاقی کردەوە، لە هێڵی نەتەوەی دیموکراتی و خۆبەڕێوەبەرایەتی دیموکراتیانە و پێکەوە ژیانی ئازاد بە پێشەنگایەتی ژنان و گەنجان، سەرکەوتن و دەسکەوتی زۆری بەدەستخستوون لەگەڵ کەموکوڕیەکانی. واتا ئەگەر لەرابردوو هەندێک دەیانگوت ئەوەی ع.ئۆجالان دەیڵێ خەیاڵە و دەرفەتی جێبەجێکردنی نییە، بەڵام دوای سەرکەوتنی لە رۆژئاواو باکورو رۆژهەڵاتی سوریا، ئیدی ئەمشێوازە دەبێتە رێبازی چارەسەری کێشەی کورد. زۆرکەس هەڵە تێگەیشتن کاتێک ر.ئاپۆ گوتی هیچ یەکێک لە شێوازەکانی چارەسەری دەوڵەتگەرام پەسند نییە (کۆنفیدراڵ، فیدراڵ و ئۆتۆنۆمی)، ئەوانە هەرسێ شێوازەکە چارەسەری دەوڵەتگەران لە چوارچێوەی مافی چارەی خۆنوسینی نەتەوە یەکگرتووەکان کە لەبنەمادا دەوڵەتە یەکگرتوەکانە لەژێر هەژموونی مۆدێرنیتەی سەرمایەداریدا. بۆیە ئەوەی لەداهاتوو کاری لەسەر دەکرێت، لە هێڵی مۆدێرنیتەی دیموکراتی، رێبازی نەتەوەی دیموکراتیە، بۆ چارەسەری کێشەی نەتەوەیی. بۆ ئەمەش جارێکیتر خوێندنەوەی بۆ مێژووی کورد و بزووتنەوەکانی لە سەد ساڵی رابردوودا کردووە، گۆڕانکاری و وەرچەرخانیش وەک پێویستیەکی هەنووکەی لەوانیشدا دەبینێ.
وەک بەردەوام بەبنەما گرتن و پێداگری لەسەر هێڵی ئازادی ژن و ژینگەپارێزیە، چونکە لە گۆڕانکاری بنەڕەتی کوردستان و رۆژهەڵاتی ناوەڕاست، ژن خاوەن رۆڵی سەرەکیە، لەوبارەیەوە ژن زیاتر دەبێتە خاوەن رۆڵ. بۆیە کەسایەتی سۆسیالیستی و کۆمەڵگەیەکی سۆسیالیستی، ئەرکیان لەبەرانبەر ئازادی ژن و ئازادی کۆمەڵگە چیە و خاوەن چ هێز و تایبەتمەندیەکن روونتر دەبێتەوە؟؟ ئەمەش رەهەندی سەرەکیە لە تێکۆشانی داهاتووی ر.ئاپۆ، واتا ژنان لەوبارەیەوە مەیدانی تێکۆشانیان زۆرتر لەبەردەم دەکرێتەوە.

پرسێکیتری گرنگ ئەویش دۆخی ئەمڕۆی ناوچەکەیە، بەتایبەت ئەنجامی شەڕی غەززە و لوبنان و سوریا و یەمەنە. 

ئەوەی جێگەی سەرەنجە ر.ئاپۆ دەڵێت، لەلای من ئیسلام وەک سیاسەت و بەڕێوەبردن لە سەدەی ١٨ وە سەردەمی تەواو بووە، ئەو ئیسلامەی ئێستا هەیە، مەبەستی ئیسلامی سیاسیە دەڵێت، ئیسلامی سەرمایەداریە، بۆیە لە دەرەوەی ماڵوێرانی شتێکیتری بۆ گەلانی رۆژهەڵاتی ناوەڕاست پێنییە. لەگەڵ ماڵوێرانی غەززەو فەلەستین و لوبنان و یەمەن، لەولاشەوە رێککەوتنە سەدان ملیاریەکانی دەوڵەتە موسلمانەکانیش دەبینین، ئەم دەستەواژەیەش (ئیسلامی سەرمایەداری) زیاتر بەرچاومان روونتر دەکاتەوە، سەبارەت بەو گێژاوەی ئەمڕۆ ئیسلامی سیاسی لە ناوچەکە دروستی کردووە.

خاڵێکیتری گرنگ و جێی بایەخ، ئەویش لە پرسی چەک و دانانی و چۆنیەتی خۆپاراستنی کۆمەڵگەیە. گەلی کورد گەیشتۆتە ئەو قۆناغەی بەبێ شەڕی چەکداری خۆی بپارێزێ؟ وەک زۆرجار ئەمە دووبارە کراوەتەوە، کورد ئاشقی چەک و شەڕی چەکداری نییە، بەڵام لە بەرانبەر لە ناوبردن و توانەوەو قڕکردن، ناچاربووە چەک هەڵگرێ، واتا پاراستنی رەوای خۆی کردووە. هەنگاوێکی مەترسیدارە، بەڵام پێویستی قۆناغی داهاتووە.

لایەنی سەرەکی لەم بابەتە، دەبێ بزانرێ ئاستی تێکۆشانی گەلی کورد پێی گەیشتووە، ئایا لە قۆناغی داهاتوو پێویستە گەلی کورد چۆن خۆی بپارێز؟ بۆ ئەمەش خۆڕێکخستن و چڕکردنەوەی تێکۆشانی جەماوەری و دیموکراتی، تاکو هیچ کەس و لایەنێک نەتوانێ پەنجە بۆ کوردێک و ئازادیخوازێک درێژ بکات. لایەنی دووەم بۆ گەرنتی چەکدانان دەوڵەتی تورکیا چ گۆڕانکاریەکی یاسایی دەکات؟ بۆیە ئێستا باسی کۆمسیۆنی ١٠٠ کەسی دەکرێ، لە شەش لایەنی سیاسی پێکبێ، ئەمەش لەلایەک بۆ هەموار کردنەوەی دەستور و هەڵوەشانەوەی هەندێک لە یاساکانە ( یاساکانی یەک دەوڵەت و یەک نەتەوەو ئەو یاسایانەی لە دژی تیرۆر بەناو دەکرێن)، هەروەها دەرخستنی یاسای نوێ و چاودێری کردنی قۆناغەکەیە (یاسا بۆ چارەسەری کێشەی کورد وەک پەیمانێکی نوێ لەنێوان گەلی کورد و تورک بەناو بکرێ، ئازادی زیندانیان و ئازادی سیاسەت کردن بەناوی کورد).

خاڵی هەرە گرنگ و کۆتایش، چیتر ر.ئاپۆ نایەوێ گەلی کورد لە کەنار و ئۆپۆزسیۆنێکی پاسیف و بێکاریگەر بێ، بەڵکو دەیەوێ لە ناوەندی رووداوەکان و بەڕێوەبردنبێ. ئەمە لەلایەک گرەنتی پاراستن و پێشکەوتنە، لەلایەکیتریش گەلی کورد چیتر وەک نامۆ و پارچکار و جیاکار سەیر ناکرێ، ئەمەش لەسەر بنەمای فەلسەفەی پێکەوە ژیانی دیموکراتیانە جێبەجێ دەبێ. بەو رێبازەش دەخوازرێ، کورد پێشەنگایەتی رۆژهەڵاتی ناوەڕاستی دیموکراتیانە بکات، بەمشێوەیە ناوچەکەمان لە شەڕ و ئاڵۆزی و چەقبەستن و دۆگماتیزم رزگارببێ و بەڕووی مۆدێرنیتەی دیموکراتیاندا بکرێتەوە.

هەموو هەنگاوەکانی ر.ئاپۆ لە هەموو کات و سەردەمێکدا، رووی لە کۆمەڵگەیە نەک دەوڵەت و دەسەڵات، بەتایبەتی کۆمەڵگەی کوردستان و دۆستانی و مرۆڤە ئازادیخوازەکان. بۆیە چەندەی بتوانین لە ر.ئاپۆ تێبگەین، ئەوەندە دەتوانین پرۆژەکانی بخەینە بواری جێبەجێکردن. واتا ر.ئاپۆ بەتەنها فریادڕەس و سوپەرمان نییە، ئەگەر گەلەکەی و ئازادیخوازان و دیموکراتخوازان پشتیوانی نەکەن و لە هەمان رەوتدا خەبات بەرەوپێشەوە نەبەن. پێشبینی و خوێندنەوەکانی ر.ئاپۆ بۆ قۆناغ زۆر وردن، ئەگەر لە جێبەجێکردندا شانبەشانی خەبات و تێکۆشان بکرێت، بێگومان سەرکەوتنیان مسۆگەرە.