دکتۆر ئەحمەد فاتح محەمەد

لە شانۆگەری زەعیم عادل ئیمام دەڵێت
ئێمەی گەلان  بەداواکارییەکانمان دەبینە مایەی سەرئێشە بۆ دەسەڵاتداران، دەسەڵاتداران کاتیان بۆ ئێمە نییە تکایە.
منیش دەڵێم:

کوردستان وەک نیشتیمانێکی جوان وایە گەوهەری لە ناخیدا هەڵگرتوە، بەڵام ئەو گەوهەرە تەنها بۆ خۆشگوزەرانی وئاسودەیی کەسانێکی کەم بەکاردەهێنرێت.
دەمەوێت بڵێم ئەی زەعیم لەمن باشتر دەزانیت ئەم خاکە پڕ بەپیتە لە هەموو شتێکدا دەوڵەمەندە: 

نەوتی لەخوێن  کەمتر نییە، غازی لە هەناسە کەمتر نییە، کانزای لەگەنم و دانەوێڵە کەمتر نییە. بەڵام کوا ئەو خۆشییەی لە دەموچاوی کوڕ و کچی ئەم خاکەدا بەدی دەکرێت؟
بەڵام کوا ئەو  داهاتەی بۆ مامۆستا وفەرمانبەر و کارمەند وچین وتوێژەکان دەستەبەرکراوە؟

جوتیارەکان، کاتێک دەچنە کێڵگەکانیان، تەنها خەیاڵی نانێکی پاک لە مێشکیاندایە. کاتێک مامۆستا دەچێتە پۆلەکەی، تەنها ئارەزووی ئەوەی هەیە کە زانیاری سود بەخش بە قوتابییەکان بگەیەنێت. کاتێک نەخۆش دەچێتە نەخۆشخانە، تەنها هیوای ئەوەی هەیە کە چارەسەری باش وەربگرێت.

بەڵام ئەم خەڵکە خۆشەویستە بەردەوام لە نائومێدی و دڵتەنگیدا دەژین، چونکە ئەو سامانە گەورانە بەردەوام لە گۆڕەپانی نادروست وتایبەتدا خول دەخۆن.
ئێمە داواتان لێ ناکەین کە عەرشی ئاسمان دابگرن. داوامان تەنها ئەوەیە کە:
وەک باغەوان بن کە گوڵەکانی باخچەکەی بە یەکسانی ئاو دەدات، نەک تەنها چەند لق و گوڵێک.

وەک کوردێکی دڵسۆز بن کە گیانی بۆ نیشتمانی فیدادەکات، نەک ئەوەی نیشتمان بۆ گیانی فیدا بکات.
وەک باوکێکی میهرەبان بن کە هەموو منداڵەکانی بە یەکسانی خۆشدەوێت، نەک تەنها یەکێکیان.

ئەگەر دڵتان دەیەوێت کە کوردستان وەک گوڵستانێکی بەهەشتی بێت:
 شەفافیەت وەک ئاوی ڕوون بێت لە هەموو کارەکانتاندا
 دادپەروەری وەک خۆر بێت کە لەسەر هەموو کەسێک هەڵدێت

پاکی وەک بەفری سپی بێت لە هەموو بڕیارەکانتاندا
 خزمەت وەک دایک بێت کە هەمیشە وریای منداڵەکانی دەبێت.

کۆتایی بە ئومێدەوە… یان ئاگاداری؟

بەرێزان سەرۆک وبەرپرسانی ئەم وڵاتە، ئەم خاکە پیرۆزە چاوەڕێی ئەوە دەکات کە وەک بارانێکی بەرەکەتدار بن کە هەموو ڕووەکەکان گەشە پێبدەن، نەک وەک ڕەشەبای وێرانکەر کە تەنها ڕیشاڵەکان وشک بکات.
مۆڵەت نەبێت کە مێژوویی داهاتووی ئەم نەوەیەی ئێستا بە نەوەی لەدەستدەرانی دەرفەت بناسێنێت. گەر بە ڕاستی خۆشەویستی کوردستانتان لە دڵدایە، ئەوا ئەم خۆشەویستیە بە کردار دەربخەن.

بەڵام، بزانن کە سەبر و بەرگریی خەڵک سنووری هەیە. ئەو خەڵکەی کە دەیان ساڵە بە ئومێدەوە چاوەڕێ دەکات، ئەگەر ببینێت کە هیچ گۆڕانکارییەک ڕوونادات، ڕەنگە دەنگی زوڵاڵی بۆ ئاوابون بگۆڕێت.
کاتێک خەڵک بزانێت کە دەنگی بەرگوێی کەس ناکەوێت، ئەوا ڕەنگە ڕێگای تری بۆ دەربڕینی نارەزایەتی هەڵبژێرێت.
مێژوو گەواهیدەرە بۆ هەموو ئەو سەرۆکانەی گوێ لە هاواری خەڵک ناگرن. کاتێک با بە توندی هەڵدەکات دار و بەردوویی پتەوی هەردووکیان بە یەکسانی هەڵدەکەن.

خەڵکی کوردستان، ئەو خەڵکە ئاشتیخوازەی کە بەردەوام بە ڕێگای مەدەنی ودیموکراسی و ئاشتیانە هەوڵی دەربڕینی ناڕەزایەتییەکانی خۆی داوە. بەڵام ئەگەر بە توندی لەگەڵ خاک و خەڵکەوە نەیەن، ڕەنگە ئەو ڕەشەبای توڕەییە دروست بکەن کە ڕەحم بە هیچ کەس و هیچ شتێک ناکات.
بە چاوەڕێی ڕۆژی گەشاوەی کوردستان،
ئەو خەڵکەی هێشتا بە ئومێدی چاوەڕێیە