هونەر تۆفیق

سەرسامی ئینسانی خۆرهەڵاتی بە خۆرئاوا ،  بچوکبوونەوەیەکە تا حەدی خۆبەناحەقزان و هەمیشە ئەو بەخاوەن هەق ئەگەر بکوژ و ببڕیشی بێت . 

ئەمریکا هەر لە مانگی یەکەمەوە لەڕێگای نەتەوە یەکگرتووەکانەوە وەک هێزی داگیرکاری عێراق خۆی ناساند . کەچی ئێمە بە ئێستاشەوە  ئەو داگیرکاریە بە پرۆسەی ئازادی ناودەبەین . 

لە دەرەوەش ، واتە لەناو کۆمەڵگەکانی خۆرئاوادا ، بەسیفەتی پەناهەندەیی بێت یان کۆچەری ، نەوەکانی دووەم و سێهەمیشمان کە زادەی خۆرئاوان ، هەروەک سارسین سەیردەکرێن . 

سارسین saracen دەستەواژەیەکی ڕۆمانیە دواتر چۆتە ناو زمانە ئەوروپیەکانەوە ، هێمایە بۆ ئینسانی خۆرهەڵاتی و موسڵمان . ئەسڵی وشەکە لە عەرەبیەوە وەرگێراوە  ( السارقین ) کە دەکاتە دز_ چەتە ،  نووسینی بیتی ک  ، بە ce , نووسراوە کە لە لەفزدا سارکینە و دواتر لە زمانە ئەوروپیەکاندا بووە سارسین . 

داخۆ لە رۆمانەوە تا ئەمڕۆ ، وەک پێمان دەڵێن سارسین ، ئێمە زیاتر سارقین بووین یان ئەوان ؟ 

ئەوەی سەردانی مۆزەخانەکانی خۆرئاوای کردبێت بینیوویەتی کە هەزاران جۆر گەنجینەی شوێنەوارەکانی خۆرهەڵات  لەڕێگای سارسینەکانی ئەوانەوە گواستراونەتەوە بۆ کۆشکی پاشاکانی ئەوان کە ئێستا کراونەتە مۆزەخانە ، هاوشێوەی ئەم مۆزەخانەیەی کۆپنهاگن Carlsberg Glyptotek کارلسبێرگ گلیپتۆتیک ، کەبەراورد بە مۆزەخانە گەورەکانی سارسینەکانی بەرلین و پاریس و لەندەن ،  بەشێکی بچوکە ، کەچی لایەکی تەنیا  ئەو شوێنەوارە   میزۆپۆتامیایانەن کە  سارسینەکانیان دزیویانن.
بەڵام بە ئێمە دەڵێن سارسین و بێ شارستانی . بە لوتبەرزی ئینسانی سپیەوە بە خۆشیان دەڵێن ئادەمیە ئاشتی خوازەکانی ئاوەدانی .