ڕێبوار سیوەیلى

1. هیچ لەوە خۆشتر نییە جەنگ كۆتایی بێت. بەتایبەتی ئەو جەنگانەی هیچ پرانسیپێكی مرۆییان تێدا ڕەچاو ناكرێت: جەنگی قێزەوون كە تیایدا جیاوازیی ناكرێت لە نێوان لەناوبردنی وڵاتان و شارستانییەتەكان و ڕژێم و سیستەمەكان. لێرەوە من ستایشی هونەری كەسانێك دەكەم، كە لەسەردەمی جەنگاكانیشدا خەندەیان دەخستەوە سەر لێومان، لە پێش هەمووشیانەوە: شەمۆی گەورە و شەمۆی نەتەوە..

2. زۆربەی فیلم و گرتەكانیم بینییوە. زۆر پێشئەوەی بگەڕێمەوە بۆ كوردستان؛ ئەو لەناو واقیعێكی تاڵ و شەڕی ناوخۆییدا پێكەنینی بەسەر مرۆڤ و ماڵاندا دەبەشییەوە و خۆی لە ناو ئازار و كۆژان و هەژارییدا دەكوڵی. 

3. زۆركەم ڕستەیەكی زیادەییم گوێ لێبووە: زمانی ئەو پڕە لەگەوهەر و شێوەزارە هەولێرییەكەشی وەك بریسكانەوەیەتی. زمان لە كۆمیدیا و قۆشمەجاڕییدا بنەمای كارەكەیە و ئاوێنەیەكی دوو دیوە: دیوێكی قاقای هونەرمەند بە دنیا پەرچدەكاتەوە و گاڵتەجاڕی بەرهەمدەهێنێت. دیوەكەی دیكەشی ناخی شاراوەی هونەرمەندەكە ئاشكرا دەكات. بەدیوێكدا ئەو شتانە دەڵێت و شتێكی دیكەی مەبەستە، بەدیوێكیشدا ئەو شتانە ئاشكرا دەكات كە دەیانشارێتەوە. 

4. ئەو لە نێوان دنیای دەرەكیی و جیهانی ناخەكییدا پردێك ڕایەڵ دەكات: لەمسەرییەوە پێكەنین و لەو سەرییەوە گریان. لە دەستپێكا خەندە و قۆشمەجاڕیی و لە كۆتاییدا حوزن و ڕاستەقینەی ناخی خۆی دەشارێتەوە. بۆ ئەوەی بە دنیا پێبكەنین دەبێت مەودای لێبگرین و هونەرمەند لەم كاتەیا ئەوە دەڵێت كە مەبەستیی نییە و ئێمە لە مەبەستە نەگوتراوەكەی تێدەگەین و لەم هەڵگەڕانەوەیشدا دەدەینە قاقای پێكەنین. بەڵام هەموو ئەمە لەسەر حسابی خۆخواردنەوە و گریان و خامۆشییەكی بێدەنگ كە لە ئێمەی دەشارێتەوە. 

5. هەرگیز لە نزیكەوە بە خزمەتی ئەم مامۆستا گەورەیەی نێو ڕشتەی مرواریی هونەری كوردی نەگەیشتووم، بەڵام بەسەدانجار منی لە خەم و پەژارەكانم دەرهێناوە و دڵنیاشم من تاكەكەس نیم. ئەو هەم هێورت دەكاتەوە و هەمیش وریا. هەم زلـلەیەك لە هووشیاری درۆزنانەمان دەسرەوێنێ و هەمیش عەتری پێكەنین دەخاتەوە سەر لێو. 

6. لە ئاستی نواندندا هەموو شتێكی لێدێت: تەنانەت ئەوكاتەش كە لە نێو نومایشێكدا تەریقدەكرێتەوە، لێیدەقەومێ و كەتنێك دەكات، ئەو وەك وەستایەكی كارامە ئەو ساتەوەختە بەجۆرێك ڕزگار دەكات، كە تەریقبوونەوە و لێقەومان و كەتنەكانیشت خۆشبوێن. هێند وەستایانە زمان و ڕووخسار، دەست و جەستەی، برۆ و نیگای، تەریقبوونەوە و شەرمەزاریی دەڕازێنێتەوە، وەكئەوەی لە بەشی تەلارسازیی و نەشتەرگەریی و فریاكەوتنی سەرەتایی خوێندبێتی نەك شانۆ. بەڵام كاتێك بیرمان دێتەوە ئەمە شانۆ و نواندنە، بیریشمان دێتەوە، كە ئەو پێناسەیە بۆ شانۆ چەند جوانە كە دەڵێت: شانۆ هونەری ژیانە. شەمۆ هونەرمەندی ژیانی كوردە و دەبێت كوردیی بزانیت بۆ ئەوەی لە بەرزیی هونەری ئەم گەورەیە تێبگەیت. 

7. بینایی چاوان سوپاس! وەكچۆن ئەم جەنگەت لەكۆڵكردینەوە و مرۆڤایەتیت لەم شڵەژانە گەردوونی و دڵەڕاوكێ و شپرزەییە ڕزگار كرد و جارێكی دیكە ئومێدی بەردەوامیت بۆ گەڕاندینەوە؛ ئاواش تەمەنی ئەم شەمۆیەمان دەهێندەی دیكە بۆ درێژبكەیتەوە و هەرگیز بە نەخۆشیی و بێتاقەتی و خەمبار نەیبینین.. 

هەولێر
24/6/2025