ئەبوبەکر کاروانی

⁠ دزە پێکردن و بڵاوکردنەوەی ملیۆنان بەڵگەنامەی  ئیبستن و دوورگەکەی، لە لایەن وەزارەتی دادو دەزگای داوەری ئەمریکاوە، شۆکێکی تری گەورەی بە دوای خۆیدا هێنا، لانی کەم بۆ ئەو کەس و  ناوەندانەی هێشتا بەرگری لە مرۆڤی سروشتی و ئەخلاق و کۆمەڵگەو بەها ئەخلاقی و کۆمەڵایەتی و ئینسانییەکان دەکەن.

 تێوەگلانی  سەدان سەرمایەدارو دەسەڵاتدار و دەست رۆیشتوو، لەو ئابڕووچوونە گەورەو دڕندایەتیە، چیرۆکی ڕووە تاریک و ترسناکەکەی خۆرئاواو سەرمایەداری و دەرهاویشتە نائەخلاقی و لادانەکانی ناو شارستانی نوێمان بۆ دەگێرنەوە، رووە تاریکەکەی خۆرئاواو مۆدێرنە هەرلەسەرەتاوە هاوشانی روەکەیتر ئامادەبووە، کۆڵۆنیالیزم وفاشیزم ونازیزم و کۆمۆنیزم ڕاسیزم وتاوانە مەزنەکانیان  رەنگدانەوەی ئەوبوون. ئەم رووە تاریکەی مۆدێرنەو شارستانیتی نوێ وخۆرئاواش، هەر لەخۆرئاوادا قەتیس نەبووە، بەڵکو لانی کەم لەهەندێ روەوە بەجیهانی بووەو رەنگدانەوەی کارەساتباری لەزۆر گۆشەی جیهان و لەوانەش دنیای ئیسلام وخۆرهەڵاتی ناوەڕاست وکوردستاندا هەبووە، هەر بۆنموونە ئەتکردنی ژنانی موسوڵمانی بۆسنەو کۆمەڵکوژی مسوڵمانە بۆسنەییەکان لەسەردەستی سربییە رەگەزپەرستەکان، ئەنفال وکۆمەڵکوژکردنی کوردو ئەتککردنی ناموسی چەندەها ئافرەت لەوچوارچێوەدا، ئیغتیسابکردنی زیاتر لەهەڤدەهەزار(١٧٠٠٠) ژن لەزیندانەکانی سووریاو گیان لەدەستدانی زیاتر لەسەدهەزارکەسیتر لەژێر ئەشکەنجەدا، کۆمەڵکوژی یەزیدییەکان لەسەردەستی داعش و کردنی سەدان کیژۆڵەیان بەکۆیلەی سێکسی، دەستدرێژی بۆسەر هەزاران ژنی سودانی لە شەری ناوخۆی سودان کەتاکوئێستاش بەردەوامە و چەندەها کارەساتی تری هاوشێوە، پێمان دەڵێن، مەترسیەکە لەم روەوە جیهانییە.

 لەسەرئاستی خودی ئەم کەیسەشدا،  چەندین تۆڕی تاوانکاری لە تورکیا و هەندێ وڵاتی کەنداوو، ڕووسیا و چین تێوەگلاون.

 ئەوەی قوڵایی ئەم کارەساتەش دەردەخات،  هەستکردنە بە ڕاکردنی مرۆڤ لە مرۆڤایەتی خۆی.  بە زمانی قورئان هەمەجیی بوونی مرۆڤە لە دۆخی هەست کردن بە بێ نیازیدا  (إِنَّ الْإِنْسَانَ لَيَطْغَىٰ * أَنْ رَآهُ اسْتَغْنَىٰ)،  بەجۆرێك کاتێک مرۆڤ بە هۆی سەروەت و سامانی زۆر و دەسەڵاتەوە، خۆی لەسەروو هەمووان و سەرجەم  پێوەرە دینی و ئەخلاقی و ئینسانییەکانەوە دەبینێتەوە، جۆرێک لە هەستی خواوەندێتی تێدا دەڕوێت.بەڵام بە گوتەی ئەرستۆ، هەوڵێکی لەو جۆرە، مرۆڤ ناکات بە خوداوەند بەڵکو لە مرۆڤبوونی دەخات و بەرەو  دۆخی ئاژەڵبوونی دەبات، زمانی حاڵی بەشێک لەوانەی لەم ئابڕوو چوونە  مەزنەشەوە گلاون ئەوەیە، مادام من لە هەموو کەس بێنیاز بم، بۆم هەیە لە هەمووانیش جیاواز بم، ئەویش لە ڕێی بە خواوەندکردنی حەز و ئارەزووەکان و چێژ بردن لە دۆخی ئاژەڵی و وەلانانی هەموو  بەهاو پێوەرانەی چوارچێوە  بە ژیانی ئەخلاقی وکۆمەڵایەتی مرۆڤەکان لەدۆخی ئاسایی ژیاندا  دەبەخشن!