هاوڕێ توانا

ئەگەر تیلەچاوێک بەسەر ڕابردووی ئەوێ ڕۆژێی دەرچونی یەکەم ژمارەی ڕۆژنامەی کوردیدا بگێڕینەوە، ئەوا بێگومان دەکرێت وەک ڕووداوێکی قۆناغ دابڕ، سەیربکرێت. جا  قۆناغێک کە نەتەوەیەک بە زمانی خۆی و بە میکانزم و کەناڵی سەردەم کە ڕۆژنامەیە، تەعیبر لە بوونی خۆی دەکات، من پێموایە ناکرێت دەرچوونی ڕۆژنامە لەوێ ڕۆژێدا، تەنها وەک لەدایکبوونی کەناڵێکی خوێندراو سەیری بکرێت و بایەخ پێدانەکانیش، هەر لەچوارچێوەی میدیایدا، قەتیس بکرێت، چونکە ئەگەر دیقەت لە زەمەن و زمان و زەمینی ئەو سەردەم بدەین، دەبینن کەوا زەمەنێکە  ئیمپڕاتۆریەتی عوسمانی لە ڕوخی داڕزانێک دایەو زۆری نەماوە بکەوێتەوە ڕەوەزی هەڵدێران و  بیری ناسیۆنالیزم و غەرب زەدەیی لەهەناوی ئیمپڕاتۆریەتدا، تەواو  چەکەرەی کردووە.  ئیدی لەوکاتەدا  خوێندەواران و منەوەرانی نەتەوە جیاوازەکانی چوارچێوەی ئێپڕاتۆرییەت لە خەم و خەونی ئەوەدان کە  تەگبیری ئایندەیی  بۆ نەتەوەکانیان دەکەن.

جا لەو کاتەدا، یەکێک لەجوامێرانی بنەماڵەی بەدرخان کە هۆشیارە  لە هەنبەر زەمەن و زمانی سەردەم، لە دەرێی سنورەکانی ئیپڕاتۆریەت بیر لە دەرکردنی ڕۆژانامە دەکاتەوە،  بۆیە ناو و ناوەڕۆک و پەیام و بابەتی ڕۆژنامەکە تەواو ئامانجدارەبووە، چونکە  بەرلەوە ڕۆژنامە چوارچێوەی بابەت و ئیتک و تەکنیکی میدیایی لە بەرچاوگیرابێت، ئەوا پەیام و بزاڤی نەتەوەی ئەولەوییەت بووە.

 ئەمە جگە لەوەی کە ڕۆژنامەی کوردستان مەکۆی نوسەران و ئەدیبان و  منەوەرە پەرتەکانی کورد بووە. ئێستا حەقە دوای سەد و چل و یەک ساڵ لە دەرکەوتنی یەکەم ڕۆژنامەی کوردیدا، ئێستا پرسیار ئەوە بێت، ئایە، چەندە میدیای کوردی هەڵگری پەیامێکی نەتەوەیی و نیشتیمانی و دروست لەخەم و خواستی ئەوەدایە، کە  هاوتای پیشەیی بوون و بابەتی بوون و ئیتیک و ئەو چوارچێوە میدیایەیی، کە حەقە هەیبێت کە نیەتی، ئەوا خاوەن چواچێوەیەکی نیتشتمانیە ؟ من ئەزانم  ناکرێت بە پێوەری ڕۆژنامەی کوردستان، سەدو چل و یەک ساڵ لەمەوبەر ئەرکی میدیایی بار بکرێت، بەڵام هۆشیارم بەوەی کە ئەمڕۆ میدیا وەک  دەسەڵاتی چوارەم توانادارە و دەتوانێت  ڕۆڵێکی ئێجگار گەورە، ببینێت لە هۆشیاری  کۆمەڵایەتی و  سیاسی و ڕۆشنیری و نیشتیمانی.