کاوه‌ ره‌ش. به‌ریتانیا

‎ئینگلیز رستەی جوان دەبێژن کەدەڵێن، ( no news good news)نەبوونی هەواڵ، هەواڵێکی خۆشە.

‎ لەنەبیستنی هەواڵی ئەو هەموو رادیۆو تەلەفیزیۆنە حزبی و سێبەرەکانیان، بۆ ئێمە دەبێتە هەواڵێکی خۆش.

‎مایەی لەنگی و شەرمەندەییە لەو سەردەمەدا حزب خۆی پێ سۆشیال دیموکرات بێت ، یاخود خۆی ناو نابێت پارتی دیموکرات، کەچی هەریەکەو دەیان راگەیاندنی حزبی و بەرسێبەری هەبێت.  کەهەریەکەو سەر بەباڵێکی نێو حزبەکەو بەرپرسێکی دەستڕۆیشتوو و سەرمایەدارە.

‎بزوێنەری راگەیاندنی حزبی، کە بەقوتی خەڵک و پارەی بیرە نەوتەکان دوکەڵەی بێزارکەر دەردەهاوێ، هیچ بەهانەو مانایەکی نیە کە بۆ لەمەو دوا بەردەوام بن لەنیشاندانی رووی دزێوی دەسەڵات بەمێکاج کراوی.   ئەمڕۆ لەو سەردەمی پێشەکەوتنی تەکنەلۆجیایەدا بەهۆی تۆڕی ئینتەرنێت و مۆبایلە زیرەکەکەی ناو لەپی دەستت دەزانی لەوپەڕی گۆی زەوی چی دەگوزەرێ و چی ڕوو دەدات، نەخوازە لەگەڕەک و شارو شارۆچکەکەت.

‎هیچ بەهانەیەک نیە کەحزبی کوردی بەردەوام بێت لەبەهەدەردانی سەروەت و سامانی میللەت، لەبەڕێوەبردنی ئەو هەموو دەزگا بێ کەڵکانەی راگەیاندن، لەشارو شارۆچکەکانى هەرێم.

‎لەوڵاتانی پێگەیشتوو تێگەیشتوو، جگە لەدەزگایەکی راگەیاندنی  نیشتیمانی، هیچ حزب و دەسەڵاتدارێک، خاوەنی راگەیاندن  و دەزگای مدیایی نیە.

‎جگە لەکەناڵە بێلایەن و سەبەخۆکان، کەدەبێ خۆیان سەرچاوەی داهات بەدەست بخەن، لەپرۆگرام و پڕوپاگەندە بازرگانیەکان، یاخود وەرگرتنی کرێی مۆڵەتی سەیرکردن، لەلایەن ئەو کەناڵانەی خەڵک ئارەزوویان دەکات.

‎ئەوانەی رۆژێک سەیری راگەیاندنە پڕۆفیشناڵەکانی دەرەوەی وڵاتیان کربێ، هەرگیز نایبینی هەواڵی  قیرکردنی شەقامێک و چاککردنەوەی بۆریەکی شکاو، سەردانی بەرپرسێکی حزبی بۆ گەڕەک و شارێک، ببێتە هەواڵ و مانشێتی راگەیاندن.

‎لەو هەرێمۆچکەی باشور کەهێشتا سنوری نەزاندراوە، حزب نەک بە یەک راگەیاندنی نووسراو بیندراو ی تێر ناخوا، بەڵکو خاوەنی دەیان راگەیاندنی  بێ کەڵکە، کەبۆتە شوێنی  کەسانی مشەخۆرو بێ ئیش.

‎حزب ڕاگەیاندنی فەرمی و سێبەری کردۆتە رێگایەک، کەهەرچی خۆی بەباش و خراپی بزانێ تێیدا بەگەڕی دەخات.

‎راگەیاندنی سێبەرو حزبی هەیە، کەنزیکەی هێندەی وەزارەتێک  پارەی تێدا خەرج دەکرێ،  لەکاتێکدا نەبونی سودی زیاترە وەک لەبەهەدەردانی پارەو قوتی خەڵکی تێیدا.

‎ئەگەر تەنها لەپێنج وڵاتی ئەوروپی یاخود دەرەوە 10 کارمەند  کاری بۆبکەن، جگە لەوانەی ناوخۆ، دەبێ ئەو 10 کارمەندە  لانی کەم هەریەکەی رۆژی سەد دۆلارێک  موچەو داهاتی دەستبکەوێت لەکەناڵ و دەزگادا، جگە لەتێچوی  کارەکانیان، خۆئەوەی لەدەرەوە ژیابێ دەزانێ  تێچوی ژیان و کاروبارەکان چۆنە.

‎ئەوا ئەو 10 کارمەندە مانگانە  لانی کەم سێ چوار دەفتەر دۆلاریان خەرجیە،‎ئەگەر سەردەمانێک گرنگی و رۆڵیان هەبووبێت، ئەوا‎ لەدوای  ساڵی ٢٠٠٣ وەو نەمانی رژێمی بەعس، هیچ بەهانەیەک نەماوە بۆ بەفیڕۆدانی سامانی میللەت لەڕاگەیاندنی حزبی.

‎ راگەیاندنی  سێبەرو حزب، چونکە بەپارەی دزراو  دەنەڕێنێ، لەناوجەرگەی پایتەخت خەڵک  ئاو و کارەباو پێداویستی سەرەتایی دەستناکەوێت نایکاتە هەواڵ و راپۆرتێکی مەیدانی لەسەر بکات، بەڵکو  پەیامنێرە گیرفان پڕەکانیان لەگوانتانامۆ و دارستانەکانی ئەمەزۆنەوە راپۆرت دەکەن، کەهیچ سەرەداوێکی ئەو شوێنانە بەمیللەتی کوردەوە گرێ نەدراوە.

‎یان لەوەش کارەستبارتر دێن، کەسانی هەژارو کەمدەرامەت دەخەنە گۆشەیەکەوە، تا بپاڕێتەوە لەسەر شاشەکانیان، گوایە خەڵک هاوکارییان بکەن، لەکاتێکدا هەر ئەو راگەیاندنەو ئەو حزبەی لەپشتیەوەیەتی، قوتی ئەو کەسە کەمدەرامەت و بێ دەرەتانانەی  دزیوەو خۆڵی پێدەکەنە چاوی بینەرەوە.

‎ ئیدی کاتی ئەوە هاتوە تەواوی راگەیاندنە حزبی و سێبەرەکان، دابخرێن.  ئەو سەروەت و سامانەی لەوانە بەفیڕۆدەدرێ، بخرێتە خزمەتی بواری تەندروستی و خوێندنەوە.

‎بائیدی دەستهەڵبگرن لەدابەشکردنی کۆمەڵگەو لێگەڕێن با راگەیاندنی نیشتیمانی و  ئازادو سەربەخۆ دروستبێت و ببێتە  گۆڕەپانی نووسین و داهێنان، تێیدا دەنگ و رەنگی هەموو چینەکانی کۆمەڵگە لەخۆ بگرێ.

‎ بۆیە نەبونی هەواڵی راگەیاندنی حزبی و سێبەر، بۆ خەڵک هەواڵێکی خۆشە.