هاوڵاتی

هاوپەیمانێتیەكی نوێ لەنێوان حزبەكانی رۆژهەڵاتی كوردستان پێكهێندرا، وەك خۆیان دەڵێن "هاوپەیمانیی سەربەخۆییخوازانی كوردستان وەك زەروورەت و پێویستیەكی سیاسی و مێژوویی پێكهاتووە".

لەبڵاوكراوەی پێكهێنانی هاوپەیمانێتیەكەدا هاتووە: "سەرەنجام پاش دوو مانگ كۆبوونەوەی هێز و لایەنە سەربەخۆییخوازەكانی ڕۆژهەڵاتی كوردستان و نووسینەوە و داڕشتنی دەستوور و بەرنامە و پێڕەوی هاوپەیمانی، توانرا هاوپەیمانیی سەربەخۆییخوازانی كوردستان HSK پێك بێ و بڕیارە لە ڕێكەوتی ٩ی ژانویەی ٢٠٢٢ی زایینی كاتژمێر ١٧ بە كاتی ئورووپای ناوەندی بە شێوەی ئانلاین بە ڕەسمی و بە بەشداریی حیزب و لایەنە سیاسیەكانی كورد و بیانی و هەروەها بە بەشداریی میدیاكار و ڕۆژنامە نووسان كۆنفڕانسی ڕۆژنامەنووسی و راگەیاندنی هاوپەیمانی بەڕێوە بچێت.

هەر بەپێی ئەو بڵاوكراوەیە "لەو هاوپەیمانییە دا بڕیار دراوە كاری هاوبەش(( سیاسی،نیزامی، ئەمنیەتی، میدیایی)) ، بەیان و گوتاری هاوبەش ، پێوەندی و لۆبیگەریی هاوبەش و كار بۆ پڕۆژەی هاوبەش بكرێت" .

پێكهێنەرانی هاوپەیمانێتیەكە وەك خۆیان دەڵێن " لەو باوەڕە دان كە بەم چەشنە دەتوانن ببین بە ئادرەسێكی بە هێزی سەربەخۆییخوازی چ لە ناوخۆی ڕۆژهەڵات و كوردستان ، چ لە ئاستی دەرەوە بۆ دیالۆگ و لۆبیگەری و تەنانەت دانیشتن لە گەڵ دژبەرانی ڕژیمی ئێرانی و هەروەها هەوڵدان بۆ پێكهێنانی بەرە لە گەڵ سەرجەم هێز و لایەنەكانی ڕۆژهەڵاتی كوردستان".

لە بڵاوكراوەكەدا ناوی حیزب و لایەنەكانی پێكهێنەری ئەو هاوپەیمانێتیە بەمشێوەیە هاتووە:

1- ڕێكخراوی یارسانیی یاری كورد.

2- یەكێتیی شۆڕشگێڕانی كوردستان.

3- تەڤگەری ڕزگاریخوازانەی دێموكراتیكی كوردستان.

4- بزووتنەوەی سەربەخۆییخوازانی كوردستان. پاش پێكهێنانی هاوپەیمانی لە لایەن ئەندامانی ئەو چوار لایەنە لە ڕێگەی دەنگدان و هەڵبژاردنەوە ١٧ كەس وەك ئەندامی ڕێبەریی گشتی هەڵبژێردران .

دواتر لە كۆبوونەوەی ڕێبەریی گشتی دا پێنج كەس وەك دەستەی سەرۆكایەتی هەڵبژێردران كە بریتین لەو كەسانە: ڕۆستەم ئەڵماسی مێهران میرزایی عەلی فەزڵی جەماڵ پووركەریم سەردار وەلەدبەیگی پاشان لە لایەن دەستەی سەرۆكایەتییەوە بە كۆی دەنگ جەماڵ پووركەریم وەك سەرۆكی هاوپەیمانی بۆ ماوەی یەك ساڵ هەڵبژێردرا.