ئاسۆس هەردی

بەهەنگاوی بچووك بەڵام هیوای گەورەوە دەستمانپێكرد. رەنگە بتوانم بڵێم هوشیارانە یا ناهوشیارانە پەیڕەویمان لەو بۆچوونە دەكرد كەدەڵێ "كاریگەری بەرهەمی بەردەوامییە، پتر لەوەی بەرهەمی بەهێزی بێت". بۆیە هەنگاوەكانی سەرەتامان زۆر هێمن و حساب بۆكراو بوون. وردە وردە دەچووینە پێشەوەو لەبابەتە هەستیارەكان نزیك دەبووینەوە. تا سەرەنجام گەیشتینە ئەوەی كەمترین (تابو) و زۆرترین وتراومان هەبێت.

نزیكەی ٢٢ ساڵ لەمەوبەر، كاتێك یەكەمین ژمارەی هاوڵاتی بڵاوكرایەوە، بارودۆخی كوردستان لەهەموو روویەكەوە سەخت و ئاڵۆز بوو. دوو ئیدارەیی و شەڕی ساردی حزبەكان فەزای سیاسیی بەتەواوی داخستبوو و ئەوەی حوكمی دەكرد، عەقڵییەتی سەربازی و ئەمنی بوو. هەلومەرجی سەختی ئابووری و ئابڵوقەی رژێم و دەوڵەتانی دراوسێ لەسەر كوردستان، بڕستی لەبەر خەڵك بڕیبوو. حزبەكان هەموو جومگەكانی حكومەت و كۆمەڵگەیان داگیركردبوو بەمیدیاشەوە. دامودەزگا حكومی و ئیدارییەكان سست و بێ ئیرادە كرابوون و بەبێ بڕیارو ئیرادەی حزبە دەسەڵاتدارەكان، هیچ كارێكیان پێ نەدەكرا. لەسەر ئاستی كۆمەڵگەیش، جەمسەرگیری و دابەشبوونی سیاسی و ئایدیۆلۆجی سیمای سەرەكیی ئەو سەردەمە بوون ...هتد. بۆیە هەندێك لەهاوڕێكانمان وایان مەزەندە دەكرد ئەستەمە بگەینە ژمارە (٥٠). زۆر نابا دوو حزبە دەسەڵاتدارەكە پەتی تەحەممولیان دەپچڕێ و قفڵ لەدەرگای هاوڵاتی دەدەن.

بێگومان ئەو پێشبینییە پاساوی خۆی هەبوو و لەبۆشاییەوە نەهاتبوو. ئەو هەموو قەیران و كێشە ئاڵۆزانە لەسەر ئەرزی واقیع بەربەست و كێشەی گەورەیان لێدەكەوتەوە. بەتایبەت بۆ رۆژنامەیەك كەدەیویست سنوورە سیاسی، ئیداری و ئایدیۆلۆجییەكان تێپەڕێنێ و (هاوڵاتی بوون) بكاتە بنەمای تێڕوانین و كاری خۆی.

لەڕاستیدا گێڕانەوەی چیرۆكی ئەو كێشەو ئاستەنگانەی بۆمان دروستكرا ئەوەندە درێژە كات و رووبەرێكی زۆری دەوێ، كە لێرەدا جێگەی نابێتەوە. ئەوەندە هەیە وەك ئاشكرایە هیچ یەكێك لەوانە نەیانتوانی هاوڵاتی رابگرن. بەڵام گرنگە ئەوە بڵێم ئەمڕۆش ئەو جۆرە ئاستەنگانە نەك كۆتایی نەهاتوون، بەڵكو كۆمەڵێك كێشەی تریش لەبەردەم ئازادیی رۆژنامەگەری و بیروڕادەربڕیندا قوت بوونەتەوە كەهیچیان لەوانە كەمتر نییە.

ئەمڕۆ شەڕی ئابووری لەگەڵ میدیای ئازاددا پێی ناوەتە قۆناغێكی مەترسیدارەوە. لەكاتێكدا كەهەرێمی كوردستان بەدەست قەیرانی داراییەوە دەناڵێنێ و میدیای ئازادیش وەك بەشێكی دانەبڕاو لەخەڵك چنگەكڕێیەتی بۆ ئەوەی لانیكەم بەردەوامی خۆی مسۆگەر بكات، میدیایەكی زەبەلاحی حزبی و سێبەرمان هەیە كەبەردەوام لەگەورەبوون و بەرفراوانبووندایە. قەیرانی دارایی كێشەی بۆ ئەوان دروستنەكردووە، بەڵكو خەریكە بەتەواوی فەزای میدیایی هەرێم داگیردەكەن. لەم هەلومەرجە سەختەدا ئەستەمە میدیایەكی كەمینەی كەم داهات، ركەبەری لەگەڵ لەشكری دەوڵەمەندو بێباكی میدیای حزب و سێبەردا بكات.

جگە لەوەش، لەهەرێمی كوردستاندا رەوتێكی توندڕەوی سەلەفی بەناوی دینەوە هاوردەی كوردستان كراوەو لەگەشەسەندندایە، دەیەوێ گوتارە توندڕەوەكەی خۆی باڵادەست بكات. هەرچی وەك خۆی نەبوو، تەكفیری دەكاو لێشاوی لایەنگرەكانی لەسۆشیال میدیادا بەكۆمەڵ و بەبەرنامە جنێوبارانی دەكەن. ئەوەی مەترسییەكە گەورەتر دەكات، حزبە دەسەڵاتدارەكان موجامەلەیان دەكەن و لێیان بێدەنگن. سەرباری  سووكایەتی و هەڕەشە راستەوخۆكانی بانگخوازو لایەنگرەكانیان لەمنیبەرو كەناڵە بێشومارەكانیانەوە، دامودەزگاكانی دادوەری و لێكۆڵینەوە هیچ كاردانەوەیەكیان نییەو بێدەنگییان هەڵبژاردووە. ئەو حزبە ئیسلامییانەش كەخۆیان بەمیانڕەوو كراوە لەقەڵەمدەدەن، نەك هەر بەرامبەریان بێدەنگن، بەڵكو هەندێجار خۆیان گوتەنی "رەگەڵیان دەكەون" و بە هەمان نەفەس و زمانی ئەوان قسە دەكەن. ئەمە لەكاتێكدایە ئەگەر ئەم رەوتە پلانەكەی بۆ بچێتەسەر، تەنها میدیای ئازاد زەرەرمەند نابێت، بەڵكو هەموو كۆمەڵگە بەحزبە عەلمانی و ئیسلامییەكانیشەوە دەبێ بارگەو بنەیان بپێچنەوە.

سەرباری هەموو ئەوانە، من دڵنیام لەوەی درەنگ یا زوو ئەم قۆناغە تاریكەش كۆتایی دێت و داهاتوو هەر بۆ ئازادی و ئازادیخوازانە. ئەوەتا سەرباری هەموو لەمپەرەكان، ئەمڕۆ ژمارە (٢٠٠٠)ی رۆژنامەی (هاوڵاتی) بڵاودەكرێتەوە. بەڵام دیارە ئەگەر وریا نەبین و فریای هەرێمەكەمان نەكەوین، تووشی نەهامەتی و كێشەی گەورە دەبین كەتێپەڕاندنیان ئاسان نابێت.