رۆژنامەیەکی ئەمریکی ئاشکرای دەکات سەرجەم ئەو چەکانەی ئێران کە لەلایەن هێزەکانی ئەمریکاو و فەڕەنسا دەستی بەسەردا گیراوە رەوانەی ئۆکرانیا دەکرێن.

رۆژنامەی (وۆڵستریت جۆرناڵ)بڵاوی کردوەتەوە؛ پێشتر هێزەکانی ئەمریکا و فەڕەنسا  لە دەریای عوممان-دا دەستیان بەسەر سێ کاروانی چەک و تەقەمەنیی ئێران گرتوە کە بڕیاربوە رادەستیی چەکدارە حوسییەکان لە یەمەن بکرێت.

ئەو رۆژنامەیە لە زاری بەرپرسانی ناوەندی فەرماندەیی هێزەکانی ئەمریکا ئاشکرای کردوە، سەرجەم ئەو کاروانە چەک و کەرەستە سەربازییانەی ئێران رەوانەی ئۆکرانیا دەکرێن بۆ بەکارهێنانیان دژی روسیا.

ئەو سێ کاروانە زیاتر لە پێنج هەزار چەک و یەک ملیۆن و 600 هەزار فیشەک و 250 موشەکی دژە تانک و دەیان تۆپ لەخۆ دەگرێت.

پێشتر یەکەی پێنج-ی هێزە دەریاوانییەکانی ئەمریکا بڵاوی کردبوەوە کە لەگەڵ هێزێکی تایبەتی فەڕەنسا لە ئاوەکای دەریای عومان دەستیان گرتوە بەسەر هەزار جۆر چەک و 100 بزوێنەری فڕۆکەی بێفڕۆکەوان و 23 موشەکی ئێران.

لە لایەکی دیکەوە رۆژی سێشەممە(14/2/2023) هێزە دەریاوانییەکانی بەریتانیا ئاماژەیان بەوە کردوە سوپای پاسداران زانیارییەکانی ناو درۆنەکەی نەسڕیوەتەوە و دەرکەوتوە ئەو درۆنە 22 جار لە تاران تاقی کراوەتەوە و دواجار کە کۆتاییەکانی ساڵی رابردودا لە لاین هێزەکانی بەریتانیاوە دەستی بەسەردا گیراوە.

لە تۆمارە ڤیدیۆییەکان ئەو درۆنە دەرکەوتوە ئێران چەک و موشەکی پێشکەوتوی رادەستی چەکدارە حوسییەکان لە یەمەن کردوە.