عبدولڕەحمان گەورکی

بەنزیکبوونەوە لەخۆپیشاندان و گردبوونەوەی ساڵانەی موقاوەمەتی ئێران کەدۆست و دوژمن لێی ئاگاداربوو، ئەم نیگەرانییە لەئاڕادا بوو کە چ چارەنووسێک لەبەردەم موقاوەمەتی ئێراندا چاوەڕوان دەکرێت! حکومەتی فەڕەنسا خۆپیشاندانەکەی رۆژی یەکەمی ژوئییە (10ی پووشپەڕ)ی بەقەدەغە راگەیاند! پۆلیسی ئاڵبانی رۆژی 20ی ژوئەن (30ی جۆزەردان) هێرشی کردەسەر ئەشڕەفی3 و دەستی بەسەر شتومەکی دانیشتوواندا گرت! بەپێی هەواڵێک کەهێشتا باسەکەی گەرمەو لەسەر مێزەو لەهەنگاوێکی کتۆپڕو شۆک هێنەردا، پۆلیسی ئاڵبانی زیاد لە (200) کامپیۆتەری ئەشڕەفی3ی رادەستی رژێمی ئێران کردووە! وەزارەتی دەرەوەی ئەمریکایش بەکاوێژکردنی هەڵوێستی قێزەونانەی هەمیشەیی خۆی، وێڕای پشتیوانیکردنی لەم هەنگاوەی پۆلیسی ئاڵبانی، تیشکی سەوزی بۆ رژێمی ئێران لێدا! هەموو ئەو شتانە نیگەرانییەکانی بەسەر یەکدا کەڵەکە کردبوو!

ئەم کەشوهەوایە، جیا لەمیکانیزم و هەندێک رەهەندی، زۆر لەگۆڕانکارییەکانی بەهاری 2003 دەچوو کە لەو رۆژانەدا فڕۆکەکانی هاوپەیمانان، بنکەو بارەگاکانی موقاوەمەتی ئێران لەناو خاکی عێراقیان بۆمباباران کرد! لەفەڕەنساش هەزاران پۆلیسی ئەو وڵاتە لەهەنگاوێکی نایاساییدا هێرشیان کردبووەسەر بارەگای ئەنجوومەنی نیشتمانیی موقاوەمەتی ئێران و ... هتد.

هەروەک رۆژانی یەکەمی گۆڕانکارییەکانی ئەمدواییە، دەسەڵاتی دیکتاتۆریی مەزهەبیی ئێران، دابووی لەقاقای پێکەنین و هەڵپەڕکێ و هەڵبەزو دابەزکردن! بەڵام لەهەردوو ئەم کەشوهەوایەداو بەمەودای زەمەنیی بیست ساڵ، شایی و هەڵپەرکێی دەسەڵاتی ئاخوندی زۆری پێنەچوو کە لێی بوو بە (شین) و (ڕۆڕۆ) و رەوتی گۆڕانکارییەکان بەجۆرێک گۆڕدراو بەرەو ئاقارێک چوو کە لەدەسەڵاتی ئاخوندی بوو بە (ژار) و تاڵی زیاتریشی بەدواوەیە! لەم دوو پێشهاتەیەدا، دوو هێزی دژ بەیەک و نەیار لەدژی یەکتر ریزیان بەستووە. خەڵکی و بەرخۆدانی ئێران لەلایەک و دیکتاتۆرییەت و پشتیوانانی دیکتاتۆرییەت لەلایەکی ترەوە!

سازان لەگەڵ دەسەڵاتی دیکتاتۆرییەتی ئێران!

ئەگەرچی بەدرێژایی مێژووی دەیان ساڵەی ئەمدواییەی تایبەت بەئێران، سیاسەتی سازان لەگەڵ دیکتاتۆرییەتی مەزهەبی بەردەوام لەکاردا بووە، بەڵام ئەوەی سازانی ئەمجارەمان بۆ جیا دەکاتەوە، راپەڕینی ئەمدواییەی خەڵکی ئێران و رۆڵی ناوازەی بەدیلی راستەقینەو دیموکراتیکی خەڵکی ئێرانە!

لەم راپەڕینەدا، لەلایەک، گەلانی جیهان بەچاوی خۆیان بینییان کەخەڵکی ئێران خوازیاری رووخاندن و نەمانی دیکتاتۆرییەتن لەوڵاتەکەیان و لەپێناویدا و لەمێژوودا تێچوویەکی زۆری گیانی و ماڵییان بۆ داوە! لە لایەکی ترەوە، ئەم راستییە بۆ جارێکیتر دەرکەوت کەبەرانبەر بەدیکتاتۆرییەت لەئێران، لە (بەدیلی دیموکراتیکی ئەنجوومەنی نیشتمانیی موقاوەمەتی ئێران) بەدەر، هیچ بەدیلێکی تر بوونی نیەو ئەوەی لەم راپەڕینەی دواییداو لەلایەن هەندێک لایەنی ناوچەیی و نێودەوڵەتیەوە زەق کرایەوە، بێ بنەماو وابەستەو هەڵقوڵای دیکتاتۆرییەت بوون لەئێران و لەناو کۆمەڵگای ئێراندا بێ رەگ و ریشەن!

وتەی نوێ!

خۆپیشاندان و گردبوونەوەی ئەمساڵی رەوەندی ئێرانی لەپاریس، کە دیمەنێک بوو لەچالاکوانان و هۆگرانی ئازادی لەسەرتاسەری جیهان، بەر لەهەر شتێکی تر، هەڵقوڵاوی رووبەڕووبوونەوەیەکی مێژوویی و نایەکسان بوون لەنێوان ئەم دوو هێزە دژ بەیەکە، کە لەڕاپەڕینی ئەمجارەی خەڵکی ئێراندا، چووە ناو دواقۆناغی خۆیەوە!

(راپەڕینێکی سەرکەوتوو) کە دەسەڵاتی دیکتاتۆرییەت لەئێرانی گەیاندە لێواری رووخاندن و (بەدیلێکی بەهێز) کە پوتانسیەل و ناوازەبوونی خۆی لەناوخۆی ئێران و دەرەوەی ئێران بەتەواوی سەلماند. بەواتایەکی تر، ئەوەی ئێستا کەوتووەتە بەر دیدی هەمووان، پەلەقاژەی کۆنەپەرستی و کۆلۆنیالیزم (ئیستیعمار)ە کە نزیکبوونەتەوە لەکۆتایی خۆیان. بەوتەی مایک پێنس، پاڵێوراوی سەرۆکایەتیی کۆمار لەئەمریکا کە لەوتارەکەی خۆیدا لەگردبوونەوەی پاریس رایگەیاند، نە رژێمی ئێران ئەوەندەی ئێستا (لاواز) بووەو نە موقاوەمەتی ئێران ئەوەندەی ئێستا (بەهێز)و (رەوا) دەرکەوتووە!

ئەگەر سیاسەتی سازان لەگەڵ دیکتاتۆرییەتی مەزهەبی لەئێران لە فەڕەنسا، بەڕێگەی قەدەغەکردنی خۆپیشاندان و بەپاساوی نەبوونی ئاسایشی خۆپیشاندەران هاتە مەیدان، موقاوەمەتی ئێران بەرێگەی (یاسا و دادگا)وە تووشی شکستی کرد! ئەگەر ئەم سیاسەتە، ویستی جلوبەرگی یاساو داد، بە بەر هێرشکردنی پۆلیس بۆ سەر (ئەشڕەفی3)دا بکات، موقاوەمەتی ئێران بە رێگەی (دادگا و یاسا)وە بەرەنگاری بووەوەو تەنانەت بەر لەسەرکەوتنی داد، بەخێرایی پێناسەی نادادگەری و دژە یاساییەکەی ئەم هێرشکردنەیش دەرکەوت!

دووڕێیانی مێژوو!

پرسی ئێران و بەرخۆدانی ئێران کهئێستا لەسەر مێزی کۆمەڵگای نێودەوڵەتیدایە، لەسەرووی بەرنامە و سیاسەت و تەنانەت ستراتیژیی یەک یان چەند وڵاتی پێوەندیدارە لەپێوەند لەگەڵ ئێران. ئایا دەوڵەتانی جیهان، دێنە تەنیشت خەڵک و بەرخۆدانی ئێران، یان دەچنە تەنیشت دەسەڵاتی دیکتاتۆرییەت لەو وڵاتە؟! لۆژیکی مرۆیی و واقیعبینی و پێشکەوتووانە پێمان دەڵێت کە لەوەرچەرخانێکی مێژووییدا ناچار دەبن لەبەرژەوەندیی خەڵک و موقاوەمەتی ئێراندا هەنگاو بنێن!

هێزو بەهێزبوونی بەدیل!

موقاوەمەتی ئێران لەڕێڕەوی پێشهاتە جەرگبڕەکانی سەردەمدا، زۆرجار وەک قەقنەس لەخەڵووزی خۆیدا باڵی گرتووەو رەوایەتی خۆی سەلماندووە. وەک چۆن رەوتی کۆنەپەرستی و کۆلۆنیالیزم، بەتایبەت لەچەند دەیەی رابردوودا، هەوڵی ئەوەیان داوە ئەم موقاوەمەتە لەناوبەرن. بەڵام هەموو جاریک لوتیان شکاوەو تووشی شکستی گەورە بوونەتەوە!

هەموو گەلانی جیهان بەچاوی خۆیان بینیان کە لەڕاپەڕینی ئەمدواییەدا، پاشماوەکانی دیکتاتۆرییەتی شا، چۆناوچۆن بەهانای دەسەڵاتی دیکتاتۆرییەتی مەزهەبییەوە چوون تادەستکەوتەکانی راپەڕینی خەڵکی ئێران و موقاوەمەتی ئێران بەتاڵان ببەن هەتا دیکتاتۆرییەت لەئێران لەسەرپێ و لەدەسەڵاتدا بمێنێتەوە!

هەموو گەلانی جیهان بەچاوی خۆیان بینیان کەچۆناوچۆن (کۆلۆنیالیزم) بەهانای (دەسەڵاتی کۆنەپەرستی)یەوە چوو بۆ یارمەتیدانی ماڵی و میدیایی و پڕوپاگەندەیی دیکتاتۆرییەتی ئایینی و جارێکیتر، هەندێک (بووکە شووشە)یان قوت کردەوە بەمەبەستی (رفاندنی سەرکردایەتیی شۆڕش) و خستنە پەڕاوێزی (بەدیلی دیموکراتیک)!

هەموو گەلانی جیهان بەچاوی خۆیان بینیان کە ئەگەر موقاوەمەتی ئێران، ئامادەی شەقام و گۆڕەپانی سیاسی نەبوایە و لەبەرانبەر دیکتاتۆرییەتدا نەوەستایە، چارەنووسی هەموو تاک و لایەنە ئێرانیەکان، بەتایبەتی لەڕاپەڕینی ئەمدواییانەدا چی بەسەردەهات و بەرەو کوێ دەچوو! موقاوەمەتێکی کە بەر لەهەر شتێک، گەنجینەو سەرمایەیەکی مێژوویی و نیشتمانییە بۆ هەموو ئەو ئێرانیانەی هۆگری ئازادی و رزگاریی ئێرانن!

هەموو گەلانی جیهان بەچاوی خۆیان بینیان کە (خۆڕاگری لەبەرانبەر سازان لەگەڵ دیکتاتۆرییەتدا) و (خۆڕاگری بەرانبەر بەپیلانگێڕییەکانی کۆنەپەرستی و کۆلۆنیالیزمدا) تەنیا لەتواناو توانستی ئەم بەدیلەدا بووە کەهەم خۆپیشاندان و گردبوونەوەکەی لەپاریس بەڕێوەبردو هەم بەدیلە دەستکردو بێ بنەماو وابەستەکانی پووچەڵ کردەوەو هەمیش پیلانگێڕییە سیاسی و بەڕواڵەت دادوەرییەکانی سازشتکارانی کردە بڵقی سەر ئاوو رێگای خۆی و گەلەکەی بەرەو سەرکەوتن لەئێران کردەوە!

گەشەسەندنی موقاوەمەتی ئێران!

گردبوونەوەی ساڵانەی موقاوەمەتی ئیران، جارێکیتر ئەم راستیەی سەلماند کە (ئەشرەف دووبارە ئەشرەف) وەک (رەمزی سەرکەوتن)ی بەدیلی دیموکراتیک بەسەر کۆنەپەرستی و کۆلۆنیالیزمدا دووبارە گەشەی سەندو جیهانی لەدژی دیکتاتۆرییەت لەئێران بەهاندراوی و گرژی هێشتەوە!

لەخۆڕا و بێهۆ نیە کەهەزاران پەرلەمانتاری جیهان، سەدان کاربەدەست و کەسایەتیی بەرجەستەی نێودەوڵەتی و لەوانە مایک پێنس، پاڵێوراوی سەرۆکایەتیی کۆمار لەئەمریکاو خاتوو لیز تراس، سەرۆک وەزیرانی بەریتانیا (2022) و ...هتد لە ریزی ئامادەبووانی ئەم گردبوونەوەیەدا بوون و پشتیوانیکردنی خۆیان لەڕاپەڕین و موقاوەمەتی ئێران و بەدیاریکراوی، پلاتفۆڕمی خانمی مریەم رەجەوی بۆ ئێرانی ئازادی دواڕۆژ راگەیاند. دیمەنێک کە نەک تایبەت بەوڵاتیکی دیاریکراوی وەک ئێران، بەڵکو باس لەڕووبەڕووبوونەوەی مێژوویی جیهان دژ بەدیکتاتۆرییەتی مەزهەبی دەکات و ئاسەواری ئەو رووبەڕووبوونەوەیە، تەنانەت بەر لەڕووخاندنی دیکتاتۆرییەت لەئێران، هەموو جیهانی گرتەوە!