دكتۆر سەباح غالب

سەرەتای دەستپێكردنی شۆڕشی ئەیلول بوو، وەچە و تەمەنی ئێمەش لەسەرەتای عاقڵی و هەرزەكاریدا بووین، ئەو سەرەتای شۆڕشە، پێویستی بەوزەو توانای هەموو كوردێك بەگەورەو بچووكەوە هەبوو، ئەگەر ئێمە رۆڵەی نەتەوەیەكی ئازادو خاوەن دەوڵەت بووینایە، كاتی منداڵی و هەرزەكاریمان، سەردەمانی بزێوی و گاڵتە و یاریمان بوو، كاتی بێ‌ غەمی و بێ‌ ئازار و دوور لەچەوساندنەوەمان بوو، دەبوایە بەسێ‌ باز، قەلەكەفڕیوە، جۆلانەو گوریس هەڵخستن، مزراحێن و كێل و بەردەوە سەر گەرم بین، بەڵام بۆ ئێمە وا نەبوو، كنگرو ماست بۆ ئێمە پەیدانەبوو، هەموو تەمەن و خۆشی منداڵیمان لێ‌ بووە ناسۆر و ژان، زۆرمان هەبوو یا باوكی گیرا بوو، یا چووبووە شاخ ببوە پێشمەرگە، پێشمەرگەی چی؟ ئەو ناوەی لەو كاتەدا، لەو پیرۆزتر نەبوو، لەپانتایی گەرمیان و كوێستاندا، رەنگە پێشمەرگەیەكی داوێن پیس نەبووبێ‌، پێشمەرگەیەكی دزو ناپاك دەرنەكەوتبێ‌، هەموو ئەوەی هەیبوو، شوكرانەی دەبژارد، كەس بیری لەوە نەدەكردەوە كە لەڕێگای پێشمەرگایەتییەوە ببێتە زۆردار و ناحەزی خەڵك، سەرپاكی سەرو ژوور وایان دەبینی كە پێشمەرگە یادگاری كۆمارو پێشەوا قازی بوو، مەلا مستەفا بارزانی وشەی پێشمەرگەو مانا جوانەكانی لەدڵ و ناخی بەستبوو، بەدیاری و پڕ بەماناوە لەگەڵ خۆیدا بردبووی بۆ دەربەدەری، لەوێوە بەئەمانەتەوە هێنابوویەوە بۆ باشوور، لەیەكەم هەلی چالاكی چەكداریدا، مانای وشەی پێشمەرگە بووە مانایەك بۆ تێكەڵاوی كۆمەڵێك هێما: كۆماری كوردستان، پێشەوا قازی محەمەد، ئازادی و مەلا مستەفا بارزانی.

زۆر كەسی ناو شار، وایان دەزانی پێشمەرگە لەمرۆڤــ باڵاترە، شتێكە وەك پەروانە یا پەری. كاتێك بۆ یەكەم جار لەمانگی شوباتی 1963دا، پێشمەرگە لەگەڵ مام جەلال-دا هاتنە ناو شاری سلێمانی، ئەو رۆژە خەڵكی شار چاویان بەپێشمەرگە كەوت، كڵاوە مەرەزە بەگوڵینكەكەی مام جەلال بووە تاجی پاشایەتی لەسەری ئەودا، سورمەی كەوای ژنانی سلێمانی ناونرا ریشی مام جەلال، دەیان كچانی سلێمانی خۆیان دانابوو كە شوو بەپێشمەرگە بكەن، گەنجێكی زۆریش هەبوو، بەڵێنیان دابوو تاسەركەوتن و ئازادی نەیەتەدی، ریش نەتاشن، هەڵبەت حەقیان بوو، چونكە هەموومان دروشمی «كوردستان یا نەمان»مان لەمێشك و لەدڵ و ناخدا نەخش كردبوو، هەرگیز بیرمان لەوە نەدەكردەوە كەڕۆژێك دابێ‌ چاوی رەشمان كاڵ بێتەوە، وەك ئێستای حكومەتی هەرێم لەبەردەم حكومەتی عێراقدا بۆ پارە، چاو لەبەرو قرچۆك بین.

سەردەمێكی خۆش بوو، ئێمەی منداڵ یا هەرزەكاری ئەو رۆژە، واماندەزانی ئیدی كورد هەر بەرەو ئاسۆ هەنگاو دەنێ‌، رۆژ بەڕۆژ هەر باڵا دەكا، بەرە بەرە ئاسۆ گەشتر دەنوێنێ‌، ئازادی، دادو یەكسانی كوردستان دادەگرێ‌، زۆر چاك لەبیرمە لەدێهات، دەیان كەس تەڵاقیان خواردبوو كەجارێكی دیكە عێراق فەرمانڕەوایەتیمان ناكاتەوە، پۆلیسێكی عێراقی یا سورییەك كوردێك راو ناكا. كەس زۆری بۆ كەس نەدەهێنا، رۆژ نەبوو، هەفتە نەبوو، مانگ نەبوو، پۆلیسی كورد لەچەند مەخفەرو بنكەیەكدا بەخۆیان و تفەنگە پێنج تیر، یا یانزدە تیرەكانیانەوە نەیەنە ریزی شۆڕش، جاری وا هەبوو دەمانچەی دە تیرو رەشاشیان دەهێنا. دوا بەدوا كۆمەڵێك ئەفسەری كورد لەسوپای عێڕاق، دەستە دەستە سەرباز هەڵدەهاتن و پەیوەندییان بە «لەشكری شۆڕشگێڕی كوردستان»ەوە دەكرد. لەشكری شۆڕشگێڕی كوردستان لەشێوەی سوپایەكی رێكخراوەییدا دامەزرا بوو، بۆنی بەرەو ئامانجی دەوڵەت بوونی لێدەهات، ئەو بوون و ناوە بەرزەو دروشمی كوردستان یا نەمان وایان دەگەیاند كەئێمە خاوەنی لەشكری شۆڕشگێڕی كوردستان بین، ئەوا بەشی یەكەمی دروشمی كوردستان یا نەمان، خۆی لەخۆیدا مانا بەخشین بوو بەسەرفرازی كوردستان و مژدەش بوو بەنەمانی بەشی دووەمی دروشمەكە كە نەمان بوو.

ئەوكاتە  باوكی رەحمەتیم گیرابوو، باوكم حەزێكی زۆری بەلای سیاسەتدا هەبوو، لەدامەزراندنی حزبی هیواوە تا دواڕۆژی سەرنانەوەی ئەو حزبە بەجوامێرانە و بەدڵسۆزی بەخۆدابڕان كاری تێدا كردووە، لەسەر ئەوە گیراوەو لەسەرەتای چلەكانەوە دوورخراوەتەوە بۆ هەولێر كە ئەوكات تۆفیق ئەفەندی ئاغا فەتحوڵڵا، فەرمانبەرێكی گەورەبوو لەوێ‌ و لەماڵی ئەواندا حساوەتەوە، جگە لەناسیاوی و كەسێتی لەگەڵ تۆفیق ئەفەندیدا، عەتێ‌ خانی یەكەم ژنیشی لەگەڵ باوكم خاڵۆزاو پورزایەكی وا بوون ئاو لێڵ نەكا. پێش ئەوەی سەرگەرمی سیاسەت بێ‌، باوكم ئارەزوویەكی تەواوی لەتێكەڵاوی لەگەڵ بنەماڵەو كەسایەتییەكانی سلێمانی و دەوروبەردا هەبوو، رەنگە زیادەڕۆیی نەبێ‌ بڵێم پەیوەندی لەگەڵ هەموو خەڵكی شاردا هەبوو، بۆ گەشت و سەردانی ناوچەكانی كوردستان و گەڕان بەوڵاتاندا سەرمەست و ئارەزوومەند بوو، دۆستایەتیشی لەگەڵ زمان فێربووندا هەبوو، جگە لەكوردی، عەرەبی، فارسی و توركییەكی ئەستەمبوڵیانەی زۆر چاكی زانیوە، لەو سەرچاوانەوە بینی بەزەریای ئەدەبیات و مێژووی كورد و بێگانەوە ناوە، لەگەڵ ئەوەشدا هەر تینوێتی نەشكاوە، ئەو بەدەستمایەیەكی پڕو بەدڵكراوەییەكی فراون، بەعەقڵێكی ورشەدار، بەتێگەیشتنێكی ئاسۆ روون و بەچاو گەشی بۆ دواڕۆژو بەبڕوایەكی پتەو بەدۆزی كورد، پەنجەی لەگەڵ سیاسەت و حزبایەتیدا نەرم كردبوو.

بۆ غالیب ئاغای عەبدوڵڵا ئاغای سڵێمان ئاغای باوكی گۆڕی پڕ لە نوورم، ئاغایەتی بەمانای بێ‌منەتی لەماڵی دنیاو هەرچی پارەو پوڵی هەیە، ئەمڕۆ نانی هەبووبێ‌، غەمی بەیانی نەبووە، ئاغایەتییەكەی وای لێكردبوو هێندە نەفس بەرزبێ‌، فەرمانبەرێتی و كاری حكومەتی بەخەیاڵدا نەهاتووە، هەر شتێكی بەپێوانەی عەقڵ و تێگەیشتنی خۆی و قانوونی نەبووبێ‌، دەستبەرداری وەزیفەكەی بووە، ئەوجا بەكاوەخۆ لەئیشێكی دیكە گەڕاوە، هەرگیز كارەبەدەستە گەورەكانی خزم و دۆستی خۆی وەك: حەمەسەعید قەزاز (لەناو ماڵی ئێمەدا پێی نەوتراوە سەعید قەزاز)، عەلی كەمالی گەورە، فایەق هۆشیار، قادر ئەفەندی حاجی مەلا محێدین و حەمە ساڵ بەگ و كەمال قەزاز و زۆری دیكە بۆ دامەزراندن و بۆ وەزیفە دەستكەوتن بەكاری نەهێناون، لایەنێكی دیكەی ئاغایەتی باوكم برێتی بووە لە چاونەترسی، میوانداێتی و لەگەڵ خەڵكدا نان خواردن، بیروباوەڕ گۆڕینەوە لەسەر بناغەی لێزانین و رێزی یەكدی گرتن ... هەروەها، هەزار مخابن زۆری لێوە فێرنەبووم. 

خاڵەكانم عەزیزو عوسمان محێدین ماوەتی زوو تێكەڵاوی پارتی و پێشمەرگایەتی بوو بوون، خاڵە عەزیزم تاقەتی رێكخستنی نەبوو، بەڵام ببووە میراتگری باپیرم، دیواخان گەرمی و جوامێری، ئازایەتی و چاكەخوازی هەر لەخۆی دەهات، ئەگەر نانبدەی كوردو خاوەن دیوەخانی كورد وەك عەرەب، گرنگی پێبدرایەو لەكتێباندا تۆمار بكرابان، ئەوا بەدڵنیاییەوە خاڵە عەزیزم بەیەكێك لەحاتەمەكانی كورد ناوی دەنووسرا، لەیادمە خاڵە عەزیزم تفەنگێكی هۆڵەندی دارشووشەیی بەدیاری بۆ هاتبوو، هێندە دەگمەند بوو، پۆل پۆل ئاغاواتی سیوەیل و ئەزمەك و ئاوەكورتێ‌، هەروەها تفەنگ عاشقانی پشدەر دەهاتنە ماوەت، هەم بۆ دیدەنی خاڵم و هەم بۆ تەماشای ئەو پیرە تفەنگە. 

خاڵە عوسمانم زۆر كەیفی بەحزبایەتی دەهات، لیژنەی ناوچەی پێنجوین كابرایەكی ناجسن مەسئولی بوو، پیاوی ناو پیاوان نەبوو، رێزی خەڵكی بەلاوە نەبوو، وای دەزانی دەسەڵات تاسەر بۆی دەمێنێ‌ و بە ئارەزووی خۆی بەچەپ و ڕاستدا دەخواو دایدەكوتێ‌، زۆری پێنەچوو ئەو لابرا، خاڵە عوسمانم بووە مەسئولی لیژنەی ناوچەی پێنجوین، ئەو وا بیری دەكردەوە كەحزبایەتی بێ‌ تێكەڵاوكردنی حزب و كۆمەڵگە هیچ مانایەك نابەخشێ‌، لەو روانگەیەوە خاڵم هەمیشە پێی وابوو كە دەبێ‌ حزب باوەش بۆ خەڵك بكاتەوە و لەپێشدا هۆشیاری كۆمەڵایەتی بڵاوبكاتەوە ئەوجا هۆشیاری سیاسی تاكۆمەڵگەش ئەو بپارێزێ‌ و پێشیبخا. بۆیە ئەو هات لەناوچەی پێنجوین كەدەوڵەمەند بوو بەکەسایەتی گەورە، لەوانە: پیاوی هەرە ناوداری ناوچەكە ژەنەڕاڵ حەمەڕەشید خانی بانە (حەمەڕەشید خانی قادرخان) یا خانی بانە، شلێر و دارۆخان و كوڕەكانی، قانعی شاعیر، گەورە شاعیری بەهیممەت و بەعەزیمەتی پاڵەو جوتیارو چەوساوەكان، بنەماڵەی قازی و مەلایان، بنەماڵەی سۆفی و تەریقەت، میرزا سابیری ئەحەی مینە رەندان، عەبدولكەریمی مەلا عەبدوڵڵای موفتی پێنجوینی كەدەبێتە باوكی ئەو عەتا موفتییەی كە لەندەنە، كە بەچالاكی و بزێوی و سەرگەرمی چاكەو هاوكاری و تێكەڵاوی لەگەڵ خەڵكدا، عەتا لەندەنی داگیركردووە، ماڵە جوتیار و رەنجدەرو سەپان، یەك بەیەك سەركارو ئاشەوان، خاڵە عوسمانم پەیوەندی و تێكەڵاوی لەگەڵ هەموویاندا بەستبوو، تا وایلێهات پارتی بووە خزمەتكاری خەڵك و خەڵك بووە ویژدان پاك و دڵسۆز و یەكڕیز بۆ كورد و بۆ شۆڕش، گشت لایەك بۆ سەركەوتن و بۆ سەرفرازی چاو لەڕێ‌ بوون، نەنكە ئایشێم حەقی بوو لەپێش ئەوەدا كە بەماڵ و سامانی ماڵە مێردییەوە شانازی بكا، دەیگوت: «ئەوە نییە ناوی عەزیز گەیشتۆتە دنیاو عوسمانیش بووە بەمەنسول، عەلی كوڕیشم هەموو نینۆكەكانی قاچ و دەستی هەڵكێشران، واش هەر خوی تەسمیلی حكومەتان نەكرد».

لەو كەشوهەوایەی ماڵە باوان و ماڵە خاڵواندا، من چاوم كردەوە، لەوانەوە فێری زۆر شتی سادەو ساكار بووم، لە ڕوانگەی هەستی خۆڕسك و سروشتییەكی خاوێن، دڵم، ناخ و هەستم تەنیا بۆ كورد دەجوڵا، هێشتا مابووم مشتێك لەخۆشەویستی بەكیژێك ببەخشم یا كیژێك دڵم داگیربكا، هەم بوو نەم بوو هەر بۆ كورد بوو، پێش ئەوەی بچمە قوتابخانەی ناوەندی، بۆ كوردایەتی و حزبایەتی جاك خۆشە بووبووم، ماندووبوونی نەدەویست، هەر ئەوەندەم دەخواست یەكێك بناسم بۆ ئەوەی ببم بەپارتی، بۆیە كاتێك چوومە پۆلی یەكی قوتابخانەی «ناوەندی شۆڕش» كە لەدامێنی خەستەخانەی گەورەی شاری سلێمانییەوە لەسەر شەقامی پیرەمێرد، لەنێوان تاقیگەی نەخۆشخانە كە لەسەر سووچەكە بوو لەگەڵ لانەی بێ‌ لانان (مەیتەم) كە لەسەر ئەو جادەیە بوو كەدەچوو بۆ شێخ جافرو گەڕەكی شێخان، ئیدی لەڕێوە پارتی باوەشی بۆ كردمەوەو منیش خۆم خستە كۆشییەوە. ئەو زەمانە حزبی شیوعیش زۆر هەراش و چالاك بوو، بەڵام دوای هەڵگیرسانی شۆڕشی ئەیلوول، خەڵكی گشتی زیاتر هەر پارتی دیموكراتی كوردستانی بەحزبی كوردی دەزانی و هەر روویان لەو بوو، منیش بەبوونە پارتی ئارەزووم هاتەدی، لەهەنگاوی یەكەمدا بۆ ماوەی چەند مانگێك لەپلەی دۆستیدا بووم، دێتە بیرم مانگی 50 فلس كە بۆ قوتابییەكی ناوەندی كەم نەبوو، ئابوونەم دەدا، ئەو سەردەمە خەڵك حزبی بەخێو دەكرد، لەو قۆناغەدا پەیوەندییم بەیەكێكەوە بوو، واتا كۆبوونەوەو شتی وامان نەبوو، لەو ماوەیەدا خەڵكم زۆر بۆ پارتی راكێشا و زۆرم كردە دۆستی پارتی، مانگ هەبوو بە عانە عانە و زۆرو كەم، دینارو نیوێكم كۆدەكردەوە، بۆ كەسێك هەبوو قورەتی بێ‌ فلسێكی لێ‌ گلبداتەوە، لەكاتێكدا كەس نەبوو چاودێرو ئاگادار بێ‌، ویژدانی پاك و لەخودا ترسان هەبوو، دوای ئەوە بوومە لایەنگر، لێرەدا لەشانەیەكدا لەگەڵ چەند كەسێكدا رێكخرام، دواتر بوومە پاڵێوراو، ئیدی شەومان دەخستە سەر رۆژ بۆ كۆكردنەوەی جلە كۆن: لەكراسە كۆن، شڕواڵ و مرادخانی، كڵاو و جامەدانی، مشكی و مێزەر، گۆرەوی و پێڵاو، ئیدی هەموو جۆرە شیتاڵێك كۆدەكرایەوە، كە دەبوونە چەند فەردەیەك، دەی كێ‌ كوڕە بەشانیدا بداو بیگەیەننە بارەگایەكی پێشمەرگە، پێشمەرگە بەزەكات و بەنان و ئاوی خەڵكی دێهات و بە هاوكاری و باربووی خەڵكی شار بەڕێوەدەچوون. دوو ساڵێكی زیاتری پێچوو تا بوومە ئەندام، لەبێژەنگیان دەداین، دەستەبژێریان دەكردین، تاقیان دەكردینەوە تا ببین بەئەندام، كە بوومە ئەندام نامەی لقم بۆ هات كەشەرەفی ئەندامێتیم پیبەخشراوە، ئەوە لەو تەمەنەدا، وەك پلەی پیاوەتی و ئازایەتی و كارامەیی بوو بۆ من، لەجاران زیاتر و گەورەتر كارم پێدەسپێررا، وردە وردە زیاتر خۆم دەناسی و بیرم دەكردەوە، تێكەڵاوی خەڵك بوم، بەیاناتم دەخوێندەوە و دابەشم دەكردن، بەشەو بەدزییەوە دروشممان لەسەر دیواران دەنووسی، بەڕۆژیش جگە لەقوتابخانە، بڕۆ بەرەو كتێبخانەی گشتیی سلێمانی، لەپاڵ كتێبی قوتابخانەدا، كتێبی دیكەم دەخوێندەوە، لەوێ‌ بوومە ناسیاوی حەمە ساڵح دیلانی شاعیر، كە برادەرو دۆستی باوكم بوو، پێكیشەوە گۆرانیان وتووە، عەبدوڵڵا جەوهەر، ساڵح هیتلەر، لەگەڵ ئەوانیشدا عەبدوڵڵای كەریم چاوشین كە بەڕێوەبەری كتێبخانەكە و هاوسێمان بوو، یادیان بەخێر.

یەكێك لەكارە گرنگەكانی حزبایەتی ئەوكاتە كۆبوونەوەی نهێنی و فێركردن و تێگەیشتن بوو لەنەتەوەو لەخاك، لەشۆڕش و لەڕزگاری، لەپاراستنی هەموو كەس و هەموو ناسیاوێك. فێری ئەوە بووین رێزی خەڵك بگرین و هەموو كوردێكمان خۆش بوێ‌، لەسنووری خۆماندا، خزمەتكاری خەڵك بین، كێشەیان بۆ چارەسەر بكەین و بەهانایانەوە بچین، گوێیان لێبگرین، لەئاوات و خۆزگەو داواكارەییەكانیان تێبگەین، تاقیكردنەوە فێربین، فیربووین بەهێز بین، ئازا بین، هیوامان هەبێ‌، باوەڕمان بەدواڕۆژ و سەركەوتن هەبێ‌، داوێن پاك و چاو پاك بین، دەست پاك و زمان پاك بین، بەكورتی كوردمان لەخۆمان لا خۆشەویستر بێ‌.

بەخەیاڵی ئاسۆ روونی، حەتمییەتی سەركەوتنی شۆڕشی كوردستان، بەیەكڕیزی و یەك سەركردایەتی، یەك ئامانج و یەك دڵی و یەك نەخشەیی، چاومان كرایەوەو بەڕێ‌كەوتین, هەزار مخابن ئەوە زۆری نەخایاند، وردە وردە كەم دەبۆوە، تا وایلێهات، ئەوانە بوونە خەیاڵ، سەیرو سەمەرە ئەوەیە، لای میللەتان خەیاڵ دەبێتە واقیع، خەیاڵ لەدایك دەبێ‌، كەچی لای ئێمە خەیاڵ نەزۆك دەبێ‌، لای خەڵك خەیاڵ بەردار دەبێ‌، لای ئێمە بێ‌ بەر، لەگەڵ ئەوەشدا من هەمیشە بەو خەیاڵەی جارانەوە دەژیم، بەهیوام رۆژێك لەڕۆژان، ئەو خەیاڵانە ببنە واقیع، بگەینە ئاسوودەیی و سەرفرازی، لەگەڵ یەكدا عاقڵ و نیان بین، لەگەڵ دوژمنیشدا بیان ناسین و بەزەبر بین، هەمیشەش كارێك بكەین كەخۆمان بناسین و بیربكەینەوە بۆ نەتەوەو بۆ نیشتمان، كاتێك كورد گەورە بێ‌ هەموومان گەورەین، بەڵام لەئێستادا بڵێی هەبێ‌ خۆی بەگەورە بزانێ‌، بێ‌ كەركوك و ناوچە داگیركراوەكانی دیكە، هەموومان بریندارین، هەموو ریسواو رەجاڵین، هەموو بێ‌ كڵاوین.

سەرەتای شۆڕش و خەباتی چەكداری و شاخ، سیمایەكی كۆمەڵایەتی و هەستی سادەو ساكاری خەڵك بوو بۆ كوردایەتی و یەكبوون و یەكڕیزی، واتا جارێ‌ وای لێنەهاتبوو، رۆشنبیرانی سیاسی و حزبی ناوشار بەشێوەیەكی سەقەت باسی بیری نەتەوەیی بكەن، چونكە ئەوان بەتەواوەتی نەیاندەتوانی لەئاسۆی زانستی كۆمەڵایەتی و زانستی سیاسییەوە باسی تێروتەسەلی بیری نەتەوەیی بكەن، هەڵسەنگاندنی قۆناغەكەو مێژووی ژێردەستەیی كوردو تێهەڵچوونی جۆرەكانی خەبات بۆ خەڵك لێكبدەنەوە، بەداخەوە لەو كاتەوە تائێستا نەتوانرا چوارچێوەیەكی هزری و زانستانە بۆ بیری نەتەوەیی كورد دابڕێژرێ‌. هیچ گومانێك نییە نەبوونی بیروباوەڕ وەك بنەماو دەستووری بیركردنەوە، بووە هۆی لێكترازانی ریزەكانی حزب، شۆڕش و خەڵك بەگشتی، لەوەشەوە بووە هۆكاری ئەوەی حزب ببێتە كۆكردنەوەی وەلای حزبی و دەسەڵات نەك وەلاو پابەندبوون بۆ نەتەوە و بۆ خاك، دواتر یەك لەدوای یەك هەر كارەسات و هەر كارەسات.

بەهەر حاڵ، هەرچۆنێك بوو، ئەندام بوونم لەپارتی تاهەرەسی شۆڕشی ئەیلولی خایاند، مارتی 1974 تا نیسانی 1975، كە زانكۆم بەجێهێشت و چوومە شۆڕش، بارەگا، كارو ژیانمان لەنێوان ناوپردان و ئازادی ـ بەرامبەر زینیۆی شێخی، تۆزێك پێش حاجی هۆمەران بووین، ئەگەرچی هەمیشە بەشەوو رۆژ مەترسی فرۆكەمان لەسەر بوو، بەڵام وەك دەڵێن بەو لاوێتییەش كونمان لەجگەردا نەبوو، كەسێك چاوەڕوانی ئەو چارەنووسە دڵتەزێنەی هەرەس نەبوو. ئەستەمە بەچاوی خۆت شكۆی شۆڕش ببینی و دواتر بەتێشكانی زەبرو ئازارت بەر بكەوێ‌، بۆیە لەو كاتەوە تائێستا، لەگەڵ ئەوەشدا كە بێ‌ ئەندازە حەز و ئارەزووم بۆ حیزبایەتی هەبوو، ئێستاش هەیە، حیزبایەتییەك بۆ خەڵك و بۆ خاك، حزبایەتییەك بۆ پێشەوەچوون، حزبایەتییەكی دەستەبژێر، حزبایەتییەك بۆ بەرژەوەندی نەتەوە نەك بە پێچەوانەی ئەوانە، بەڵام لێی تۆرام، تۆرانێك كە لەبارودۆخی ئێستای كۆمەڵگەی كوردەواریدا گەڕانەوە بۆ حزبایەتی بۆ من ئەستەم بێ‌، لەبەرئەوە عەقڵم وا هاتەوە كەحزبایەتی تامی نەما، ئیدی بۆ من پێشمەرگایەتیش بۆنی جارانی لێبڕا. نەبوونی ڕێبازی كوردایەتی وەك خۆی بە سادەیی و سروشتی نەما، لێنەگەڕان نە بەمنداڵی تێر یاری بكەین، نە بەگەورەیی بەقەدەر ویست و توانای خۆمان خزمەت بكەین.... باوەڕناكەم قەدەر بەو شێوەیەی هەین لەچارەی نووسیبێتین، ئەوە خۆمانین مۆری ئەم رۆژەمان لەناوچەوانی خۆمان داوە.