هاوڵاتی

نووسینگەی کۆمیسیۆنی باڵای مافەکانی مرۆڤی سەر بە نەتەوە یەکگرتووەکان رایگەیاند کە زۆرێک لەو سووریانەی لە شەڕ هەڵاتوون لەگەڵ گەڕانەوەیان بۆ سوریا ڕووبەڕووی پێشێلکاریی گەورەی مافی مرۆڤ دەبنەوە.

 بەپێی ئامارەکانی UNHCR زیاتر لە 5.5 ملیۆن پەنابەری تۆمارکراو لە وڵاتانی دراوسێی سوریا یان وڵاتانی دیکەی رۆژهەڵاتی ناوەڕاست و باکوری ئەفریقا.

بەپێی ڕاپۆرتێکی نووسینگەی کۆمیسیۆنی باڵای مافەکانی مرۆڤی سەر بە نەتەوە یەکگرتووەکان، پێشێلکارییەکان بریتین لە دەستبەسەرکردن، ئەشکەنجەدان، مامەڵەی خراپ، توندوتیژی سێکسی، بێسەروشوێنکردن و ڕفاندن ,هەروەها خەڵک دووچاری دەستبەسەرداگرتنی پارە و موڵک و ماڵیان دەبنەوە و لە ناسنامە و بەڵگەنامەی دیکە بێبەش دەکرێن.

هەر لەم بارەیەوە ڤۆڵکەر تورک، کۆمیساری باڵای مافەکانی مرۆڤی سەر نەتەوە یەکگرتووەکان رایگەیاندووە,  دۆخی ئەم گەڕاوانە پرسیاری ورد لەبارەی پابەندبوونی وڵاتان بە ڕێکارە یاساییە پێویستەکان دەوروژێنێت و دەبێت مافی پەنابەران و پەناخوازان ڕێزی لێ بگیرێت و گەڕانەوەش دەبێت خۆبەخشانە بێت.