شوان عەباس بەدری

بێگومان گەر بە وردی لەو قەیرانانەی کە بەرۆکی حکومەتی هەرێمی کوردستانی گرتووە بروانین و جیا لە خوێندنەوەی سیاسی ئەوا خوێندنەوەیەکی دەروونناسیانەیان بۆ بکەین ئەوا بۆمان روون دەبێتەوە کە زۆربەی قەیرانەکانی ئێستا ، لە دەرئەنجامی کەلەرەقی و روانینە کورتبینەکانی بەرپەرسە باڵاکانی ناو سیاسەتی کوردییەوە هاتوونەتە ئاراوە ، بە واتایەکی تر زۆرجار سیاسییەکانی هەرێمی کوردستان لە ئەنجامی عەقڵێکی خێڵەکی ووشک و بەرژەوەندییە بەرتەسکە حزبایەتییەکانی خۆیان بە بێگوێدانە ئەو دەرئەنجامە مەترسیدارانەی کە رەنگە لە داهاتوودا هەم یەخەی خۆیان و حکومەتەکەیان و هەم یەخەی دانیشتوانی هەریمی کوردستان بگرێت، هەنگاوی هەڵەیان هەڵهێناوەو دوابەدوای دروست بوونی قەیرانیش هەڵەیان بە هەڵە پەردەپۆش کردووە .

لە ئێستادا گەر بروانینە سنووری جوگرافیایی هەرێمی کوردستان ، ئەوا دەبینین سنوورێکە کە تا بینا قاقای لە ناو چەندین قەیرانی قووڵ و مەترسیداردا نوقم بووە ، هەر لە بێزاری خەڵک لەبەرامبەر بەرپرسان و کاربەدەستانی هەرێمەکەوە بگرە تا دەگاتە هێرش و بوردوومانەکانی وڵاتانی چواردەور و ملیشیا شیعەکانی سەر بە ئێران و هەڵوەشاندنەوەی تەبایی کۆمەڵگە و خێزان و چەندین قەیرانی هەمەجۆری دیکە.

هەرچەندە لە ئێستادا بەلای خەڵکی هەرێمی کوردستانەوە کێشەی مووچە و پێنەدانی مووچە و بەبارمتە گرتنی مووچە لەلایەن پارتێکی سیاسی هەرێمی کوردستانەوە بە بیانووی نەناردنی برە پارەی تەواوی مووچەی فەرمانبەرانی هەرێمی کوردستان لە لەلایەن بەغدادەوە بۆتە باس و خواسی سەرەکی سەر شاشەی تەلەفزیۆنەکان و سۆشیال میدیا و هەموو کونج و بناوانێکی ناو شەقامی کوردی و گەورە و بچووکی بە خۆیەوە مەشغوڵ کردووە ، بەڵام لە ئەساسدا ئەم بابەتە تەنها بابەتە رووکەشەکەی قەیرانەکەیە و گەر پشت پەردەکانی رووداوەکان بخوێنینەوە زۆر بە ئاسانی قەیرانە هەرە مەترسیدارەکەی ناو جوگرافیا بچووکەکەی هەرێمی کوردستانمان بۆ ئاشکرا دەبێت کە لەیەک کاتدا هەم  خۆی لە شەریکە بەشی گشت پارتە سیاسییەکان دەبینێتەوە پێکەوە، وە لە هەمان کاتیشدا هەوڵی سرینەوەی جەماوەری و قورسایی سیاسی هەندێک پارتی سیاسی ناو مەیدانی حوکمرانی و دەسەڵاتە و جۆرە سادۆمازۆخییەکی پێوەدیارە.

بە واتایەکی دیکە سیاسەتی کوردی لە ئێستادا سیاسەتێکی سادۆمازۆخییە و لەلایەک بەرپرسان لەسەر شاشەی تەلەفزیۆنەکان وای وێنا دەکەن کە هەموو هەوڵێکی خۆیان لە پێناوی باشترکردنی ژیانی خەڵک و چارەسەری قەیرانەکانی هەرێم خستۆتەگەڕ و لە هەمانکاتیشدا بە قامچییەک پشتی خەڵکیان بە خەمساردی و خەمی ئەوەی تەنها قسەی خۆیان بچەسپێنن و پێشهات و چارەسەرەکان تەنها بەو جۆرە بێت کە ئەمان ئارەزووی دەکەن شەقار شەقار کردووە و بە بەرنامەیەکی تۆکمە کۆمەڵگەی کوردییان کردووە بە کۆمەڵگەیەکی تا سەر ئێسقان مازۆخی.

بە واتایەکی تر خەڵک وەک کۆمەڵە کۆیلەیەکی مازۆخی بێدەسەڵات لە ژێر ئازاری قامچی دەسەڵاتدار و خاوەنەکانیان پشتی خۆیان چەمانۆتەوە و سوژدەی تەسلیم بوونیان بردووە و تەنها ماوە ماوە لەملاولەولا وەک نارەزایەتییەک بایکۆتێک رادەگەیەنن یان لە بەرژەوەندی لایەنێکی سیاسی لە دژی لایەنەکەی تر بۆ ماوەیەک شۆیەکی هەمە رەنگ ئەنجام دەدەن و دوای ئەوەش هەریەکەو دەچێتەوە بۆ ماڵی خۆی .

گەر وابڕوات و خەڵک هەر بەم جۆرە مازۆخییە بەردەوام بێت لە  تەسلیم بوونی، رەنگە  ماوەیەکی دیکە بەرپرسان ماوتسی تۆنگ ئاسا بۆ ئارامکردنەوەی سادییەتە سیاسییەکەی خۆیان شۆڕشێکی فەرهەنگی و ئابووری (جیا لە ئابووری سەربەخۆ ) ڕابگەیەنن و کارەساتی جەرگبڕتر و گەورەتر بەسەر خەڵکە چەپڵەلێدەر و سەرچۆپی گرەکە بهێنن !

هەرچەندە ئەم بابەتی سیاسەتی سادۆمازوخییە لە زۆربەی وڵاتانی جیهاندا لە قۆناغێک لە قۆناغە سیاسی و هەستیارەکاندا بە شێوەی جیاجیا دەرکەوتووە و باشترین نموونە بۆ ئەم بابەتەش سیاسەتە نەخوێنراو و کەلەرەقییەکانی جەمال عەبدولناسری دووەمین سەرۆک کۆماری میسرە کە لەسەردەمەکەیدا ووڵاتەکەی بەرەو داڕمانێکی تەواو برد و  خەڵک و سوپا و ئابووری و جوگرافیای میسری لەناو ئاگردانێکی وادا سووتاند کە تا ئێستا دەرئەنجامەکانی ئەو سیاسەتە هەڵە و سادییەتە سیاسییەی ماوەتەوە و دوای خۆیشی ئەنوەر ساداتی جێگرەوەی بە رێگەی جۆراوجۆر هەموو هەوڵی خۆی خستە گەڕ بۆ سرینەوەی پاشماوە سیاسییە ماڵوێرانکەرەکانی جەمال عەبدول ناسر، بەڵام نە تەنها نەیتوانی بەتەواوی ئەو پاشماوانە بسرێتەوە بەڵکو خۆیشی بە جۆرێ لە جۆرەکان کەوتە ناو ئەو ئاگردانەوە و دواجاریش سەری خوارد  .
لە کۆتاییشدا بێگومان گەر بەرپرسانی ئێمەش ئەم بەرگە سادۆمازۆخییەی بەریان دانەکەنن و بەرگی چاکسازییەکی راستەقینە و بە دوور لە هەموو بەرژەوەندییەکی تەسک لەبەر نەکەن ، ئەوا ئایندەی هەرێمەکەمان زۆر لە ئێستا خراپتر و ناروونتر دەبێت و هەمووشمان دەزانین ئەمەریکا و وڵاتانی رۆژئاوا تا سەر دۆست و پشتیوانی هیچ ووڵات و لایەن و کەسێک نین و نابن و دواجار ئەوەی کە تیا دەچێت و دەفەوتێت تەنها خەڵکە هەژار و کەمدەرامەت و مووچەخۆرەکەیە!