داستان بەرزان        

لە مێژووردا ڕووینەداوە وڵاتان لە هەر لاوە سوپا بێننە سەر زێدمان و ئێمە وەها لێی نەبان بین! هەر نەبێت هاوارێکمان لێوە هەستاوە، ئەمە ئەگەر قەڵغانی گوللە سنگی کچان نەبووبێت لە هەڵمەتا!      

ئەو لەشکرکێشییەی ئەمڕۆ دەیبینین وڵاتی تورکیا دەیکات، کە هەم دراوسێ و هەم داگیرکەرە، لە کۆنەوە تاکو ئەمڕۆ درێژەی هەیە بۆ سەر وارمان، لە کاتێکدا کاردانەوەی توندی سەربازیمان نییە، ئایا هەر نەبێت شایەنی هاوار و دەنگهەڵبڕین نییە؟ ئەگەر وەک پێویست توانای بەرەنگاریمان نییە، با هەر نەبێت ولاتانی جیهانی لە بەرابەردا بێنینە سەر هێڵ.

ئەی بۆچی تەنیا لێرە و لەوێ ورتەیەک، نووزەیەک زیاتر لە بارەیەوە نابیستین؟ هەر نەبێت بۆ هاوار ناکەین تانک و تۆپ و تەیارە دەرمان ناکەن لەم شارە؟ مەگەر ئەم تانک و تۆپ و تەیارانەی ئەمڕۆهەر ئەوانەی جاران نین؟ داگیرکار هەر هەمان ئەوەی جاران نییە؟ کەم خوێنمان بەدەستیان ڕژاوە؟ کەم بەدەستی ئەوان لە جیهاندا دەستکاری هاوکێشە چارەنووسسازەکانمان کراوە؟    

بۆ بێدەنگین؟ بۆ بێهەڵوێستین؟ ئایا مێژوو ئەم بێدەنگییەمان وەک سەرشۆڕی بۆ تۆمار ناکات؟ ڕۆڵەکانی داهاتوومان چۆن ئەم ئێستایەمان دەبینن و لێمان خۆش دەبن؟ وەک دەڵێن: مێژوو ڕەحمی بە کێ کردووە؟    

بۆ ئێمەیەکی کوردی داگیرکراو هەرگیز بێدەنگی لە پای ئەم ساتەوەختانەدا چ نەبووە لە سەرشۆڕی و خیانەت و خۆبەدەستەدان زیاتر، بۆیە لە بیرمان بێت ناکرێت بوار بدەین ئاسمانی شاخ و کێوەکانمان ببنە لانکەی فڕۆکەکانی وڵاتانی دراوسێ، شەقامەکانمان ببنە ڕێگای تانک و هێزی وڵاتانی بێگانە، بۆ بەزاندنی سنوورەکانمان!    

گەلۆ دەنگ هەڵبڕن، ئێمە ڕۆڵەی میدیا و کەیخوسرەوین، ئێمە بە درێژایی مێژوو هێمای ڕەنج و تێکۆشان بووین لە ناوچەکەدا، ئێمـە وڵاتی دێرینی یەکەمین مرۆڤەکان و یەکەمین شارستانیەت و یەکەمین هەوڵەکانی کشتووکاڵ و یەکەمین هاوارە دێرینەکانی مرۆڤین...    

ئێـمە هەمان ئەو گەلەین کە نەسوپای ئینگلیز نە هێزی فارس نە ئۆردوی عوسمانی و نە لەشکری عەرەب نەیانتوانی بمانتوێننەوە، ئێـمە خاوەن گەڵێک سیاسەتڤانی مەزنین لە مێژوودا.

ئێـمە هەرگیز چاولێکنانێین و نامرین و نامرین..    

ئێمە جیهان شاهیدی قارەمانی و ئازایەتیمانن، با ڕێگا نەدەین تورکیای دراوسێ و هاوکات داگیرکار بەبێ گوێدانە هیچ پرەنسیپێک سنوورمان ببرێت، ئاخر سنوورەکان بەهای ئێمەن، خاک قییەم و بەهای هەر نەتەوەیەکە، با ڕێگا نەدرێت، با نەهێڵین! با نەخەوین یان با خۆمان نەکەین بە نووستوو!