شوان ئەحمەد

یەک چارەکە سەدەی ڕەبەقە، ئەم پێڕە لەڕۆشنبیرانی کورد (مەریوان وریا، ئاراس فەتاح، ڕێبین هەردی) کەمن لای خۆمەوە ماوەیەکە بە(ڕۆشنبیرانی ڕوداوە کتوپڕەکان) ناودێرم کردوون، خەریکی کەمپەین و بەیاننامە دەرکردن و واژۆ کۆکردنەوەو هەڵوێست نواندنن، لەسەر یەک بەیەکی ئەو ڕوداوە جۆراو جۆرانەی ، لەباکورو باشورو ڕۆژهەڵات و ڕۆژئاوای کوردستان ڕوو دەدەن.

لەهەر بەیاننامەیەکیشدا(کەدواهەمینیان بەیاننامەیەکە بۆ ڕای گشتیی جیهانیی) و لەپای لەشکرکێشییە چاوەڕوانکراوەکەی ئەردۆگان و سوپاکەیەتی بۆ سەر ڕۆژئاوای کوردستان، دێن و ناوی خۆیان (بەپیتی درشت) وەک سەر تۆپ و پێشەواو دەمڕاستی نوسەران و ڕۆشنبیرانی کورد لەسەری سەرەوەی بەیاننامەکاندا تۆمار دەکەن و لەدامێن و خواروی خوارەوەشدا (سەت ناوێک کەلەباشترین حاڵەتدا وەک کۆمبارس و عەریزە نوسی مۆدێرن و ئینشانوسی بێ فیکر و قوڵایی لەلایەن ئەوانەوە سەیر دەکرێن)، لەڕۆژنامەنووس وئەکتیڤیست و چاودێری سیاسی و چالاکی کۆمەڵگەی مەدەنی و هونەرمەند و کۆمەڵێک نازناوی عەنتیکەی دیکەدا، ڕیزدەکەن و دەوری خۆیانی پێ قەڵەباڵغ دەکەن.

ئەمەش ناو دەنێن هەڵوێست نواندن و تۆماری نیشتمان پەروەری و هەست بەپرسیارێتی کردن و پاشان کڵێشەی بەیاننامەیەکی دووبارەو حازر بەدەست و سواو کەکەس گوێی لێناگرێت و تاسنوری بەردەڕەش و زەڕەیان بڕدەکات ، بەزمانێکی شیعریی دادەڕێژن.

سەیر لەوەدایە ئەم پێڕە بێ ماندو بوون و بەردەوام ، بۆ هەموو ڕووداوێک لەسەر پێن، بۆ هەموو بۆنەیەک بەیاننامەو بۆ هەموو دەمەقاڵێیەک کەمپەین و واژۆیان حازرو ئامادەیە.

(هەر لەجەدوای ئابوری فەریزەی حەجەوە، بۆ خەتەنەکردنی ژنان. هەر لەشەڕی ناوخۆوە ، بۆ هوهاکێشان لەکچانی مەدەنی پۆش. هەر لەڕیفراندۆمەوە ، بۆ دیاردەی فرە ژنی . هەر لەبێکاری و هەژارییەوە، بۆ کێشەو گرفتەکانی سەندیکاو ڕێکخراوەکان. هەر لەبەسەر چوونی مادەی ١٤٠ ، بۆ نزمی ئاستی فیلم و دراما کوردیەکان. هەر لەنەبوونی هێزی ئۆپۆزسیۆنی ڕاستەقینەوە، بۆ سوڵتانیزم و دیکتاتۆریەت و کورسیەکەی سەرۆکی هەرێم. هەر لەماکیاژکردنێکی بێ تامی ڕوخساری ئاک پارتی و مۆدێلی ئۆردوگان و یەکگرتووی ئیسلامی و ڕابیتەو محەمەد خاتەمییەوە، بۆ جانتاکەی ئاشتی هەورامی و تەزویری هەڵبژاردنەکان. هەر لەسیستمی خوێندنی سویدیەوە لەکوردستان ، بۆ تراژیدیای بەرهەم ساڵح وەک سەرەک وەزیرانێکی بێ دەستەڵاتی حکومەتی هەرێم.

ەر لەکوڕەکانی نەوشیروان مستەفاو بنەماڵەی تاڵەبانی و بنەماڵەی بارزانییەوە، بۆ ژنهێنانەوە شەرم ئاوەرەکەی مەلا عەبدوللەتیفی سەلەفی و چارەسەرکردنی نەخۆش و دەردەدارانی ئەم هەرێمە، بەمیزی حوشترەکەی مەلا عەلی کەڵەک. هەر لەسوریالیزمەکەی فەرهاد پیرباڵەوە، بۆ باڵا پۆشی خانمان و مانگی ڕەمەزان. هەر لەباڵباڵێنی نێوان حیزبەکان ، بۆ نەخۆشکەوتنی تاڵەبانی و خۆ سوتاندنی ژنان و پرسی ژێندەر. هەر لەحەڤدەی شوبات و سەرای ئازادییەوە ، بۆ دیاردەی بەرخۆری لەکۆمەڵگەی کوردی و خوتبەی مەلا توڕەکانی ڕۆژانی هەینی. هەر لەسازش و نەرمی نواندنی گۆڕان و عومەری سەید عەلی بۆ پارتی ، تاسوتاندنی کەناڵی ئێن ئاڕ تی و هاتنە دەرەوەی کاوە محەمەد لەیەکیەتی و پەسەندانی ڕیفراندۆم و بەڵێ کردن بۆ سەر بەخۆی و تەقەکردن لەشاسوار عەبدولواحید و............... هتد).

ئەم برادەرانە بێ ئەوەی ئێستێک بکەن و چرکە ساتێک بسرەوێن و بێدەنگ بن و بزانن چییان وتووەو چی دەڵێن، وەک (گروپی ڕۆشنبیرانی خاوەن هەڵوێستی کورد زوبان)، بەڕاست و چەپدا واژۆ دەبەخشنەوەو بەییانامە دەردەکەن و کوشتەی کەمپەین و گردبوونەوەن .

ئاخر هەر ئەمانە بوون(خۆ ئەرشیفی نوسینەکانیان لەهاوڵاتی و ئاوێنەدا بەردەستە)، ئەردۆگان و ئەکەپەو خاتەمی وڕیفۆرمیستەکانی جمهوری ئیسلامی و یەکگرتوو و عەلی قەرەداغیان، لێکردبووین بەنمونەی جوانی و پاکی و خوداناسی ڕاستەقینەو هیومانیست و لێبوردەی و ئیسلامی مۆدێرن و پێرفێکت و ئیدیاڵ.

ئەمانە ڕۆژێک بزوتنەوەی گۆڕان و ئۆپۆزسیۆنی پەرلەمانیمان لێدەکەن بەفریشتەو فریاد ڕەس و کلیلی چارەسەری تەواوی کێشەکان، کەچی ڕۆژێکی دی لێمانیان دەکەن بەهەلپەرست و سازشکار و ترسنۆک و برا بەشی دەسەڵات.

تاوێک ئۆردۆگانمان وەک مۆدێلێکی ناوازەی ئیسلامی لەناوچەکەدا نیشان دەدەن و گۆرانی بەباڵای ئاک پارتی و ڕیفۆرمە موعجیزە ئاساکانی خاتەمیدا دەڵێن ، کەچی دەمێکی تر نەفرەتیان لێدەکەن و وەک نمونەی بەدی و فاشستی و دڕندەیی و دیکتاتۆری باسیان دەکەن.
دواجار دەڵێم : ( خودایە کارێک بکە ئەمانە تۆزێک بێدەنگ بن، ڕۆژێک بێت و بەیانامەیەک ببینین و ناو و واژۆی ئەمانەی لەسەر نەبێت. ئیلاهی کەمپەینێک ساز بدرێت و قسەکەرانی ئەوەڵ و ئاخیری ئەمانە نەبن. باری تەعالا وابکەیت ئەمانە بەو سەخاوەتەی خۆیانەوە ، ئەو هەموو ئیمزا جوانە مەسرەف نەکەن).

ئاخر خۆ هێشتا دنیا زۆری ماوەو بیرێکی بەیانیتان بێت.