عەبدوڵای مەلا نوری

بڕیارە سبەی ١٤ی ٣ی ٢٠٢٣ دانیشتوانی پارێزگای هەڵەبجەی شەهید، خۆپیشاندانی جەماوەری ئەنجام بدەن، بە مەبەستی دەربڕینی ناڕەزایی، دژ بە پەراوێزخستنی شارەکەیان.

هەروەک بڕیاریان داوە بایکۆتی مەراسیمی ١٦/٣ێش بکەن. هیوادارم ئەنجومەنی راوێژکاریەکەیان و خەڵکی سەربەرزی شارەکە، پلانیان هەبێ بۆ چالاکی و ناڕەزایەتی درێژمەودا، بۆ ئەم مەبەستەش دەکرێ کەڵک لە ئەزمونی دەربەندیخانیەکان و پێنجوێنیەکان وەربگرن. ئازیزانی هەڵەبجە، بۆ ئەوەی رێز لە قوربانیەکانیان بگیرێت، بۆ ئەوەی وەڵامی خواستەکانتان بدرێتەوە، بۆ ئەوەی بەهێزبن، دەبێ زۆرترین ژمارەی دانیشتوانی شارەکە بەشداربن لە خۆپیشاندان و چالاکیەکانی تریاندا.

بە مانایەکی تر، ئێوەی هەڵەبجەیی، ئەگەر سەربەخۆن یان سەربەهەر حیزبێکن، تکایە سبەی و تا ئەو کاتەی خواستەکانتان جێبەجێ دەکرێت، چەند هەنگاوێک لە ئینتیمای حیزبییەکەتان پاشەکشە بکەن و تەنهاو تەنها هەڵەبجەیی بون، قوربانی بون، پەراوێزخستنتان، بکەنە تاکە شوناسی خۆتان. خزمەتکردنی شارەکەتان کە بە حەق پەراوێزخراوە، بکەنە دروشمی سەرەکیتان.

گەر ئەمەتان کرد دڵنیابن دەسەڵات و تەنانەت موعارەزەش حسابتان بۆ دەکەن و دەگەن بە ئامانجەکانتان. ئێمەش بە هەمو شێوەیەک پشتیوانتانین… خوداش پشتوپەناتانبێت و سەرتان بخات…