هاوڵاتی

زریانی یاگی ڤێتنامی گرتۆتەوە و بەهۆیەوە هەزاران کەس بوونە قوربانی

ئاژانسی هەواڵی ڤێتنام ژمارەی زیانە گیانیی و ماددییەكانی زریانی “یاگی” لە باكووری وڵاتەکە بڵاوکردەوە و ڕایگەیاند، بەهۆی با و بارانی بەخوڕ و لافاوی چەند ڕۆژی ڕابردووەوە لە باكووری ڤێتنام و درووستبوونی زریانی “یاگی” 233 كەس گیانیان لەدەستدا و 823 كەسی دیكەش برینداربوون و 103 كەسیش بێسەروشوێن بوون.

لەم بارەیەشەوە دەزگاكانی فریاكەوتنی ڤێتنام بڵاوی كردەوە، لە 26 پارێزگا و شاردا ئاوی لافاو زیاتر لە 204 هەزار ماڵ و باڵەخانەی وێران كردووە و زیانی بە هێڵەكانی كارەبا و پەیوەندییەكان گەیاندووە.

ئەوەشخراوەتەڕوو، لافاوەكە زیاتر لە 263 هەزار هێكتار ڕووبەری كشتوكاڵی لەناوبردووە.

ئەوەشی ئاشکراکردووە، حكومەتی ڤێتنام هەموو هەوڵێك دەدات بۆ كەمكردنەوەی قەبارەی زیانەكان و زاڵبوون بەسەر دەرئەنجامەكانی بارانبارینی بەخوڕ و سەقامگیركردنی ژیانی دانیشتوانی ناوچە زیانلێكەوتووەكان.

جێگەی ئاماژەیە، ئەو لافاوانەی لە هەفتەی ڕابردووەوە باكووری ڤێتنامیان گرتووەتەوە، بە یەكێك لە گەورەترین لافاوەكان لە مێژووی ئەو وڵاتەدا دیاریی دەكرێت.