عبدولرەحمان مهابادی

چاوخشانێک بەسەر پێوەرو پێوانەکانە لەمەڕ هێزە رەسەنەکانی بەرەی بەرهەڵستکاریدا! عەبدولڕەحمان گەورکی (مهابادی)، نووسەر و شرۆڤەکاری سیاسی لەهەموو شوێنێکی دنیادا، بۆ ئەوەی دیمەنی راستەقینەی موقاومەتێک بەدروستی هەڵبسەنگێنرێت، دەبێت ببینرێت کێ هێزی سەرەکیی موقاومەتە و ئامادەی مەیدانە! چ سنوورێکی هەیە بەرانبەر بەهێزی دەسەڵاتدارو لەگەڵ هێزەکانی کۆمەڵگا (چ سیاسی و چ کۆمەڵایەتی)؟ هەروەها گرنگە بزانین ئەم هێزە چۆن دەڕوانێتە کێشەکانی کۆمەڵگاو ناسنامەی چییە و خاوەن چ بەرنامە و پلانێکە؟ سیاسەت و ستراتیژی و نەخشەڕێگای چییە بۆ کۆمەڵگا؟ بۆ هەڵسەنگاندنێکی وردتر پێویستە بزانین خاوەن چ مێژوویەکە و پێکهاتەی ئەندام و کادرەکانی چییە؟ ئەمانە یەکەم پێوەرن کەیارمەتیمان دەدەن بۆ هەڵسەنگاندنی موقاومەت بەشێوەیەکی راست و دروست و واقیعیانە. بێگومان کاردانەوەکانی «هێزی دەسەڵاتدار» لەبەرامبەر ئەم «هێزە» دا دەکرێت بە پێوەرێک دابنرێت. چونکە ئەمە یەکێکە لە میتۆدە زانستییەکانی پێناسەکردنی هێزێک بە رێگەی دژبەرانییەوە! هێزی ناوەندیی موقاوەمەتی ئێران لەزمانی هێزی دەسەڵاتدارەوە! هەموومان شاهیدی ئەوە بووین کە ویلایەتی فەقیهی دەسەڵاتدار لەئێران، هەر لەسەرەتای دامەزراندنیەوە تا ئەمڕۆ هەمیشە (رێکخراوی موجاهیدینی خەلقی ئێران)ی بەهەڕەشەی سەرەکی خۆی دەزانێت و لەم راستەوە لە هیچ پیلانگێڕییەکی سەربازی و سیاسی و دەروونی و دێواندنی، لەناوخۆ و دەرەوەی ئێران دەرحەق بەو رێکخراوە سڵی نەکردۆتەوەو بۆ ئەمکارە بەملیار دۆڵاری خەرج کردووە بەئێستایشەوە، کە باسکردنی وردەکارییەکانی، بەسەدان کتێب و فیلم و... هەڵدەگرێت! هەروەها زۆر سروشتی و زانستی و لۆژیکی دەبێت ئەو دوو هێزە لەهەموو پرس و کێشە و بوارەکاندا، هەڵوێستی دژ بەیەکیان هەبێت. لە روانین بۆ سەر پرسەکان تا کردارو کردەوە بەرامبەر بەهەر کامەیان. لە سیاسەت و بەرنامەوە تاچۆنیەتی مامەڵەکردن لەگەڵ کۆمەڵگاو خەڵکدا.

دوو هێزی تەواو ناکۆک و ناتەبا و دژ بەیەک، کە مانەوەی یەکێکیان بەواتای فەوتانی ئەویتریان دێت!  هێڵی سووری موقاومەتی ئێران! «دوژمنی دوژمنی من دۆستی منە» بەپێی ئەم ئەزموونە مێژووییەی شۆڕشەکانی جیهان، هەموو ئەو هێزانەی دژ بەدیکتاتۆریی ولایەتی فەقیهی دەسەڵاتدارن لەئێران، پێکەوە چەندین (خاڵی هاوبەش)یان هەیە. کەواتە دەبێت خاڵە هاوبەشەکان بپارێزرێن. ئەمانە «سنوورێکی سووری بنەڕەتی»یش لەخۆی دەگرێت.

 هێڵی سووری نێوان هێزی دەسەڵاتدارو هێزە بەرهەڵستکارەکان. کەواتە ئەوە وەک ئەرکێکی خەباتکارانە دەکەوێتە سەر هێزەکانی بەرهەڵستکاری بەرانبەر بەهێزی دەسەڵاتدار کە ببنە بانگدەر و برەودەر و هاندەری ئەم هێڵە سوورە و بەردەوام سووربوونی زیاتر بکەن! شێوازی هەڵسوکەوتی راست و دروست لەگەڵ رووداوەکان!  ئێستا کاتێک سەیری مێژووی چەند دەیەی رابردووی موقاوەمەتی ئێران دەکەین، دەبینین کە ئەم موقاوەمەتە پێشوازیی کردووە لەهەموو هەنگاوێک بەرامبەر هێزی دەسەڵاتدار و لە هەموو کات و شوێنێکدا رێزی لێگرتوون تا ئەو رادەیەی هەندێک جار، تەنانەت بۆ هێزەکانی موقاوەمەت لە سەرەتادا، جێی پرسیار یان لێڵبوونن! هەر لەجیابوونەوەی یەکەم سەرۆککۆماری رژێمەوە تا جیابوونەوەی بەڕێز حوسێنعەلی مونتەزیری لە پۆستی جێگرەوەی خومەینی، لەهێرشی رژێم بۆ سەر لایەنە سیاسییەکانی کوردستانی ئێران تاهەڕەشەی هێرشکردن بۆ سەر لایەنە سیاسییەکانی کوردستانی عێراق لەلایەن حکومەتەکەی سەر بەویلایەتی فەقیهی ئاخوندی لەو وڵاتە لە نۆڤەمبەری 2012. لە دوورکەوتنەوەی رواڵەتیی بزوتنەوەی بەناو سەوز(!) لەخامنەئی تا هاتوهوشکردنە رواڵەتییەکانی کوڕی دیکتاتۆرە لەبارچووەکەی شا بەرانبەر بەڕژێمی ئێستای ئێران و... هتد.  لەگەڵ ئەمانەدا بووترێت کە هەر موقاوەمەتی ئێران بوو ئاڵاهەڵگرو پێشەنگ، لەئاشکراکردنی دەستتێوەردانەکانی رژێمی ئێران لەکاروباری وڵاتانی دوور و نزیک و هەروەها پرۆژە تیرۆریستی و ئەتۆمییەکانی ئەم رژێمەدا! رەسەنایەتی هێزەکان لەکوێوە دەستپێدەکات؟ لەڕوانگەی موقاوەمەتی ئێرانەوە ئەوەی (رەسەن) بێت «دوورکەوتنەوەی هێزەکانی بەرهەڵستکارە لەو رژێمەی دوژمنی سەرەکیی گەلانی ئێرانە»، نەک ئەو ناکۆکی و رەخنانەی کە لەناو موقاوەمەت و نێوان هێزەکانی بەرهەڵستکاریدا هەستی پێدەکرێت.

چون ئاسایی و سروشتین. موقاوەمەتی ئێران تەواو ئاگادارە لەو شتانە و بەگەشبینیەوە هەنگاوی بۆ ئەم قۆناغە هەڵگرتووە. هەربۆیە لە روانگەی موقاوەمەتی ئێرانەوە «رەسەنایەتی و گرنگی لە یەکگرتوویی هێزەکانی بەرەی گەل و بەرهەڵستکارەکاندایە». جا بۆیە لە روانگەی موقاوەمەتی ئێرانەوە، نزیکبوونەوە لەڕژێمی ئێران، واتای دوورکەوتنەوەیە لەبەرەی گەل و بەرژەوەندییەکانی خەڵک کەدەبێت بەرهەڵستی بکرێت ! کاریگەرییەکان!  ئەو هێزو لایەنانەی نەیاری ویلایەتی فەقیهن، چ بیانهەوێت یا نەیانهەوێت، دەورو چالاکییەکانی هێزی ناوەندی و سەرەکیی موقاوەمەت کاریگەرە بەسەریانەوە. هەر لەو چوارچێوەیەدا سەرباری ئەگەری هەبوونی ناکۆکی و رەخنەکان، هێزەکانی بەرهەڵستکار هاوبەش دەبن لەهەورازو نشێوی تایبەت بەهەنگاوەنانەکانی ئەو هێزەو هەر لەم رێڕەوەدایە کە تاقیدەکرێنەوە. ئەگەر هێزێک دوژمنایەتیکردنی هێزی سەرەکیی موقاوەمەت بگرێتە بەر، یاسامەند دەبێتە لاگری هێزی دەسەڵاتدار. واتا دوژمن ! لەبەرئەوەی هێزی سەرەکیی موقاوەمەت، هەرگیز لە بەرانبەر هێزی دەسەڵاتدار، هێزەکانی دیکە بە تەنیا جێناهێڵێت لە بەرەنگاربوونەوەی رژێمی دەسەڵاتداردا، ئومێد وایە هێزەکانی بەرەی موقاوەمەتیش، دەستپێشخەری لەخۆیان نیشان بدەن بۆ مانەوە لەبەرەی بەرهەڵستکاری و بەرژەوەندییەکانی گەل و دیوی راست و درووستی مێژووداو رێگەی پێچەوانە نەگرنە بەر. چون لاڕێیەو رێگا نییە. هەڵەیە و تەنها دەبێتە هۆی درێژکردنەوەی تەمەنی هێزی دەسەڵاتدارو بەئازارترکردنی چارەنووسی کۆمەڵگا.

کەواتە یەکەم وانە لەئەزموونەکانی رابردوو بریتییە لەپێویستیی یەکڕێزیی کردەیی و زیاترکردنی هاوکاری بۆ لاوازکردن و لێکترازانی (دوژمنی هاوبەش)! وریابوونێکی پێویست و گرنگ! لەتۆمارگەی مێژوودا هاتووە کە لەهەر بەرخۆدانێکدا، (هێزی دەسەڵاتدار) بەدوای شێواندنی هێڵە سوورەکان و لێکترازانی بەشەکانی موقاوەمەتەوەیە بۆ زەبر وەشاندن لەکیانی بەرهەڵستکاری و بەتایبەت زەبر وەشاندن لەهێزی سەرەکیی موقاوەمەت، کە جگە لەلێدانی جەستەیی و فیزیایی، دوورخستنەوەی هێزەکانە لە دەوری. هەر بۆیە دەبێت وریاییەکی بەردەوام هەبێت لە «دەمامک»، «درووشم» و «پیلانگێڕی»، کە هەندێک جار، بە (شتی بریقەدار) دەپێچرێتەوە و پێشکەشدەکرێت. کەم نین هێزی ساختەیی و رواڵەتی کە پاش ماوەیەک وەک گیای بەهاری، سەوز دەبن و بەخێرایی کاڵ دەبنەوە! چون دەستی هێزی دەسەڵاتداریان لەپشتە یاخود بێ رەگ و ریشەن لەناو کۆمەڵگادا.  دواوتە!  بەوتەی دوژمن و بەشێکی زۆر لەگەلانی جیهان، ئێستا (موقاومەتی خەڵکی ئێران) پێگەیەکی سەقامگیرو چەسپاوی هەیە لەگۆڕەپانی خەبات و تێکۆشان بەرانبەر بە رژێمی دەسەڵاتدار لەئێران و لێهاتوویی و کارامەیی ئەو هێزە، سەلمێندراوە وەک «تاکە بەدیلی دیموکراتی دژی ئەم رژێمە» و وەک راستییەکی حاشاهەڵنەگر. بەدیلێک کە بەسەرکەوتنی بەسەر رژێمی ویلایەتی فەقیهیدا، هەموو هێزە رەسەنەکانی کۆمەڵگا، بەهەر مەڕام و بیرو باوەڕو خواستێکەوە، سوودمەند دەبن لە دەستکەوتەکانی ئەم موقاوەمەتە.  بۆیە دەبێت بە رێزەوە سەیری ئەم هێزە سەرەکی و ناوەندییەی گۆڕەپانەکە بکەین و ئەو راستییەیش لەبەرچاو بگرین کە لەم بەرەیەدا، لایەنانی تر هەن جگە لە «ئێمە و مانان»! جا بۆیە لەبەر خۆشەویستیی گەل و نیشتمان و بۆ ئەوەی خەڵک لەچنگ ستەم و تاوانی رژێم رزگار بکەین و ئازادی و دادپەروەری لەجێی دابنێین، پێویستە هەموو شتێک لەڕووخاندنی ئەم رژێمەوە دەستپێبکەین و بەس!