عەبدولرەحمان گەوركی

بەبارمتەگرتن لەلایەن هەر رەوت و لایەنێکەوە بەکار بهێندرێت جووڵە و کارێکی ناشیرین و ناشایستە. بەتایبەت ئەگەر لەلایەن حکومەتێکەوە ئەنجام بدرێت تاوانە و بەپێی جۆرو کات و رەهەندەکانی، ئاستی تاوانەکە دیاری دەکرێت .

رژێمی ئێران، نموونەی کۆنکرێتی ئەمجۆرە حکومەتانەیە لەپێنج دەیەی رابردوو و خراپترینیانە لەجۆری خۆیدا. چونکە تێکەڵاوی تاوانەکانی تری ئەم دەسەڵاتەیە، لەوانە کوشتن و لەسێدارەدان و تیرۆرکردن و بۆمبارانەوە بۆردومانکردن و هتد! رژێمی ئێران بەبارمتەگرتنی هاووڵاتییانی وڵاتانی تر، دەستی بەحوکمڕانی کردو بەدرێژایی دەسەڵات، نەک تەنها هەرگیز خۆی لەم تاکتیکە تاوانکارییە دوورنەخستۆتەوەو رۆژانە رەهەندی خراپتری بۆ زیاد کردووە، بەڵکو بەدرۆ(!)و لەژێر ناوی بەرگریکردن لەئێران و ئیسلام و خەڵک، دەستی داوەتە ئەم کارەو دامودەزگا پەیوەندیدارەکانی لەدەرەوەی وڵات و بەتایبەت باڵیۆزخانەکانی خۆی راسپاردووە بۆ پێشخستنی ئەمجۆرە تاوانانە. 

سازان لەگەڵ بانکەوانی تیرۆر لەجیهاندا!  لەماوەی ٤٤ ساڵی رابردوودا بەردەوام نموونەگەلێکی لەمجۆرە تاوانانە بووین کە لەلایەن رژێمی ئێرانەوە ئەنجام دراوە و بەداخەوە دەوڵەتانی رۆژئاوا بەسیاسەتی «سازشتکاری» مامەڵەیان لەگەڵدا کردووە. هەر لەبەر ئەم هۆکارەشە کەڕژێمی تێرۆریستی ئێران توانیویەتی بەشێوازی جۆراوجۆر، ئەم لیڤەرە بەکاربهێنێت بۆ گەیشتن بەئامانجەکانی. بەتایبەت لەڕووبەڕووبوونەوەی ئاڵنگاری و قەیرانەکان و لەسەرووی هەمووشیانەوە لەڕووبەڕووبوونەوەی تاکە ئاڵتەرناتیڤی دیموکراتی، واتا (ئەنجومەنی نیشتمانی موقاوەمەتی ئێران). دوایین هەنگاویشی بریتی بوو لەڕێککەوتنی لەگەڵ حکومەتی بەلژیکا، بۆ رزگارکردن و گەڕاندنەوەی تیرۆریستانی رژێمی ئێران بۆ لای خۆی. حکومەتی بەلژیکا بە پەسندکردنی پرۆژەیاسای ئاڵوگۆڕکردنی زیندانیانی نێوان هەردوو وڵات، یاریکردن لەسەر زەمینی رژێمی ئێرانی هەڵبژاردووە کەئەمەش زۆر مەترسیدارە! پێویستە بگوترێ یەکەم بەرهەمی ئەم رێککەوتنە ناشایستە، گواستنەوەی دیپلۆماتکار - تێرۆریست (ئەسەدوڵڵا ئەسەدی)یە لەزیندانی بەلژیکاوە بۆ ئێرانی ژێر دەسەڵاتی رژێمی تیرۆریستان. واتە هەر ئەو شوێنەی کە لەساڵی 2018 بەرەو بۆمبارانەوە لەکۆبوونەوەی ساڵانەی موقاوەمەتی ئێران لەپاریس بەڕێکرابوو بەرەو ئەوروپا تا لەژێر پەردەی دیپلۆماتێکدا ئەم کردە تیرۆریستییە ئەنجامبدات کە هەڵبەت دواتر دەستبەسەر کرا!  ئەم پیلانە گەورە تیرۆریستییە، تەنها چەند کاتژمێر بەر لەدەستپێکی کۆبوونەوەی ساڵانەی موقاوەمەتی ئێران لەلایەن پۆلیسەوە کەشف کرا، لەم کۆبوونەوەیەدا سەدان کەسایەتیی بەرجەستەی جیهان، لەپێنج کیشوەرەوە ئامادەی ببوون، لەنێویاندا خاتوو مریەم رەجەوی، سەرۆکی هەڵبژێردراوی موقاوەمەتی ئێران. دواتر دیپلۆماتکار - تیرۆریست (ئەسەدوڵڵا ئەسەدی) و تیمێکی تیرۆریستی چوار کەسی دەستگیرکران و لەپرۆسەیەکی دادوەریدا، سزای (20) ساڵ زیندانی بەسەردا سەپێندرا. سزای هاوشێوەش بۆ ئەندامانی تیمەکە دەرچوو. 

بارمتەگرتن، لیڤەرێک بۆ بەرەوپێشبردنی تیرۆر!  ڕژێمی ئێران لەماوەی چوار دەیەی دەسەڵاتداریدا. هاوکات لەگەڵ گرتن و ئەشکەنجەدان، لەسێدارەدان و کوشتن، تیرۆرو بۆردومان و جۆرەها پێشێلکاریی گەورەی مافی مرۆڤ بەرانبەر بە خەڵکی ئێران، بارمتەگرتنی خەڵکانی وڵاتانی تر و بەتایبەتی خەڵکانی خاوەن دوو رەگەزنامە، بەشێک بووە لەبەرنامەی نەگۆڕو ئەندازیاریکراوی، بۆ پێشخستنی ئامانجە تیرۆریستی و مەزنخوازییەکانی کە بە رێگەی جۆراوجۆری فێڵکردن و پیلانگێڕییەوە، راکێشی ناو ئێرانی کردوون و لەوێش، دوای درووستکردنی فایلی ساختەو هەنگاوی بەرایی و گونجاو لەگەڵ ئامانج و کێشەو قەیرانەکانیدا، گرتوونی و بۆ پێشخستنی ئامانجی تیرۆریستیی، یان مەبەستی سیاسی و ئابووریی، بەکاری هێناون کە بەپێی بەڵگەنامەکان، لەچەندین حاڵەتدا، «دانپێدانانی زۆرەملێ»ی لێ وەرگرتوون بۆ ئەوەی شەرعیەت بدات بەکردەی بارمتەگرتنەکەی،.  لەکەس شاراوە نییە کە وەلی فەقیهی دەسەڵاتداری ئێران، هەمیشە «لیڤەری بارمتەگرتنی»ی لەکاروباری دیپلۆماسیدا بۆ مانەوەی رژێمەکەی بەکارهێناوە. عەلی خامنەیی بەهۆی سیاسەتی لاوازی دەوڵەتانی رۆژئاوا، لەمەڕ نەگرتنەبەری سیاسەتێکی بڕەڕی توند بەرامبەر بەدیپلۆماسیی بە بارمتەگرتن، توانیویەتی قازانجگەلێکی زۆر بکات و بەم شێوەیە، داواکارییەکانی بەسەر دەوڵەتاندا بسەپێنێت! هەڵوێستی سازشتکارانەی دەوڵەتانی رۆژئاوا بەرانبەر بە داخوازییەکانی رژێمی بارمتەگری دەسەڵاتدار لە ئێران، نەک هەر نەیتوانیوە کۆنترۆڵی تیرۆرو فراوانخوازی رژێمی ئێران بکات، بەڵکوو رۆژانە شاهیدی تەشەنەکردن و پەرەسەندنی تیرۆرو بن ئاژۆخوازیی ئەم رژێمەین کە ئەمەش وەک (پەڵەیەکی رەش) بەناوچاوانی کۆمەڵگەی نێودەوڵەتییە دیارە! ئازارێکی هاوبەش بەرانبەر بەسیاسەتی سازان لەگەڵ رژێمی ئێران!  رژێمی ئێران توانیویەتی بەڕێگای باڵیۆزخانەکانییەوە (بیخوێننەوە جاسوسخانەو شوێنی سیخوڕیکردن و خانەی تیرۆر) و لەژێر پەردەی کاری دیپلۆماسیدا، مەودای بارمتەگرتنەکانی لەجیهان زیاتر بکات! مارك دوبۆویتز (MarkDubowitz)، سەرۆکی جێبەجێكاری دامەزراوەی بیركردنەوەی بەرگری لە دیموكراسیەكان، پێیوایە ئێران لەناو قەیرانەكان و ململانێی لەگەڵ رۆژئاوادا، بەبارمتەگیراوەکان وەكو موزایەدە بەكاردەهێنێت: «بەدڵنیاییەوە کۆماری ئیسلامی ئێران خەڵكان بە بارمتە دەگرێت و چل ساڵە ئەمکارە دەکات و ئەم کارەی کردووە بەکەرەستەی شەڕ. خەڵکی بێتاوان دەستگیر دەکات. ئەم رژێمە بەتۆمەتی ساختە و جۆراوجۆر، خەڵکانێکی خاوەن دوو رەگەزنامە یان خەڵکانی وڵاتانی بیانی دەستبەسەر دەکات و بێ لێپرسینەوە و دادگاییکردنی دادپەروەرانە و ئاشکراو، بێ رەچاوکردنی مافەکانی مرۆڤ و لەگەرماوگەرمی ململانێکانیدا لەگەڵ وڵاتانی جیهان، کەسانە وەک (کۆپۆنی مشتومڕو موزایەدەکردن) دژ بەوڵاتانی رۆژئاوا بەکاردەهێنێت. تۆقاندن و دروستکردنی ترس لەکورتخایەندا، بیانییەکان لەئێران دوور دەخاتەوە، بەڵام لەدرێژخایەندا تەنها باس لەترس و دڵەڕاوکێی کۆماری ئیسلامی دەکات بەرانبەر بە خەڵکەکەی خۆی و لەکۆتاییدا خەڵک سەردەکەوێت». ئاڵاهەڵگری بەرەنگاربوونەوەی بەبارمتەگرتن و تیرۆری رژێمی ئێران! تا ئەوکاتەی سیاسەتی سازان و سات و سەودا بەسەر دەوڵەتانی رۆژئاوادا زاڵ بێت، هەڵوێستی دەوڵەتان لەئاست سیاسەتی بەبارمتەگرتن ناگۆڕدرێت. ئەم راستییە زۆر جار سەلمێندراوە. هاوکات لەگەڵ ئەم راستییەش پێویستە ئاماژە بەوە بکرێت کە قوربانییە سەرەکییەکانی سیاسەتی نەرم ونیانی دەوڵەتانی رۆژئاوا لەگەڵ رژێمی دژەمرۆی ئێران، خەڵک و موقاوەمەتی ئێران بوون. هەر لەبەر ئەم هۆکارەیە کە موقاوەمەتی ئێران وەک (ئاڵاهەڵگری سەرەکی بۆ ئاشکراکردن و لەقاودانی سات و سەودای لەمجۆرە)، هەمیشە بۆ پاراستنی بەرژەوەندییەکانی خەڵکی ئێران کاری کردووە و لەگۆڕەپانەکەدا باجەکەی داوە.

لەم دواییانەدا مایکل فرایلیش، ئەندامی پەرلەمانی فیدراڵی بەلژیکا لەوتارێکدا روو لەموقاوەمەتی ئێران وتی: ئێمە بەتەنیا ناتوانین رێگری لەپەسەندکردنی پڕۆژە یاساکە لەپەرلەمانی وڵاتەکەماندا بگرین. هەربۆیە پێویستمان بە یارمەتی و هەڵمەتی ئێوەیە”

ئاشکرایە کەچارەنووسی هەر وڵاتێک لەلایەن خەڵکی ئەو وڵاتەو نوێنەرە هەڵبژێردراوەکانی و لە نیهایەتدا حکومەتی ئەو وڵاتە بڕیاری لەسەر دەدرێت. بەڵام تائەو جێگەیەی پەیوەندی بەخەڵک و موقاوەمەتی ئێرانەوە هەیە، پێویستە پیلانی موزایەدەکردن و سات و سەودا لەسەر حیسابی بەرژەوەندییەکانی خەڵکی ئێران ئاشکراو ریسوا بکرێت و رای گشتی جیهانی لێ ئاگادار بکرێتەوە و لەدژی هانبدرێن! ویژدانی مرۆڤایەتی هاوچەرخ! ئێستا هەموومان شاهیدی ئەوەین کە چۆن ویژدانی بەئاگاو بێداری خەڵکی بەلژیکا و وڵاتانی تری جیهان بەم ڕێککەوتنە بێشەرمانەیە وروژێندراوەو وەک نموونە لەبەلژیکا، بەسەرۆک وەزیرانی ئەم وڵاتە دەڵێن «تۆ له‌ هه‌موو جیهاندا ناوبانگ و ئابڕووی وڵاتەکەمانت بردووە!». نابێت گومان لەوەدا هەبێت کە لە ئایندەیەکی نزیکدا حکومەتی ئەم وڵاتە ناچار دەبێت باجی ئەو کارە ناشیرینە بدات. هەروەک چۆن ئەندامێکی پەرلەمانی بەلژیکا پەسەندکردنی ئەم پرۆژەیاسایە لەلیژنەی پەیوەندییەکانی دەرەوە پەرلەمانی بە «رۆژێکی ڕەش بۆ بەلژیکا» ناوبرد و وتی: «دەبێت حکومەتی (بەلژیکا) شەرم بکات» و پرسیاری لەو کەسانەی دەنگی (ئەرێنی)یان داوە بە پرۆژە یاساکە کرد کە «ئایا دەتوانن لەئاوێنەدا سەیری خۆیان بکەن؟» .

کەوایە ئەوەی دەکرێ وەک دەستکەوتێکی گەورە بەرجەستە بکرێت ئەوەیە کە نە رای گشتی جیهان، نە دیمەنی سیاسی و یاسایی و رۆژنامەوانی، مامەڵەیەکی وەها بێشەرمانەیان پێ قبووڵ ناکرێت. هەر بۆیە دادگای پێداچوونەوی برۆکسێل رێگەی بەگواستنەوەی دیپلۆماتکار – تیرۆریست (ئەسەدوڵڵا ئەسەدی)، بۆ ئێران نەداوە و داوای لەسەرۆک وەزیران و وەزیری کاروباری دەرەوەو وەزیری دادی بەلژیکا کردووە ئامادەی کۆبوونەوەی دادگا بن!