گەڕی دووەمی جەنگ نزیکە

هاوڵاتی  سامان نادر، بەڕێوەبەری سەنتەری فریاکەوتنی خێرای سلێمانی راگه‌یاند، بریندارێکی تری  روداوی ئاگره‌كه‌ی ئەمڕۆی سلێمانی گیانی لەدەستدا و بووە دووەم کەس کە بەهۆی رووداوەکە گیان لەدەست بدات.  ماوەی 17 کاتژمیرە کارگەیەکی قیر لە عەربەت لە پارێزگای سلێمانی گڕیگرتووە و هێشتا ئاگرەکە کۆنترۆڵ نەکراوە. لەبارەی هۆکاری رووداوەکەوە، سەرچاوەیەک لە ناو کارگەکەوە بە هاوڵاتی وت، هۆکاری ئاگرەکە گڕگرتنی خەزانەکانی نێو کارگەکە بووە. پێشتر راگەیاندرا ئەو هاوڵاتییەی بووە یەکەم کەس لە رووداوەکە گیان لەدەست بدات ناوی مزەفەر نەبی شینۆیە و دانیشتووی ناوچەی کەڵەکی هەولێر بووە. موزەفەر لەسالی 1992 لەدایکبووە و خاوەنی چوار منداڵە. لە رووداوەکەدا دوو کەسی تریش برینداربوون کە برینی هەردووکیان سەختە.

هاوڵاتی  پێگەی هەواڵی ئەمیرکەبیر بڵاویکردووەتەوە، سەرۆکایەتی زانکۆی ئەمیرکەبیر لە تاران 100 کەس لە چالاکانی خوێندکاری ئەو زانکۆیەی دەرکردووە و لە مافی خوێندن بێبەری کراون. دوو هەفتە لەمەوبەر 50 خوێندکاری ئەو زانکۆیە بانگ کرابوونە بەشی ئەمنی زانکۆ و لێپرسینەوەیان لەگەڵ کراوەو هەڕەشەی دەرکردنیان لێکراوە. لە ساڵی رابردوودا و پاش دەستپێکی شۆڕشی ژن، ژیان، ئازادی و بەشداری چالاکانەی زانکۆ و خوێندکاران لەو شۆڕشەدا، سەدان مامۆستای زانکۆ و خوێندکار بە هۆی بەشداریکردنیان لە خۆپیشاندانەکان، یان پشتیوانیکردن لە خواستی خۆپیشاندەران لەسەر کار دەرکراون و بەشێکی زۆریان وڵاتیان بەجێ هێشتووە.

سەركۆ جەمال لەکاتێکدا هێشتا هەوڵی ئەوە دەدرێت دانانی کامێرای خاڵ بۆ خاڵ هەڵبوەشێتەوە بەڵام لە هەولێر کامێرای چاودێری زیاتر دادەنرێت و لە سلێمانیش لەسەر رێگایەکی تر داندراوە، بەڵام نەکەوتوونەتە کار. بەڕێوەبەری كامێراكان لەهاتوچۆی سلێمانی دەڵێت «تائێستا تەنها لەسەر رێگای سلێمانی دوكان كامێراكانی خاڵ بۆ خاڵ كاردەكەن، بەڵام لەسەر رێگای تاسڵوجە تاچەمچەماڵیش دانراوەو هێشتا دەستی بەكاركردن نەكردووە»، لەسلێمانی بەسستی كامێراكان دادەنرێن و تائێستا تەنها لەسەر رێگای دوكان سلێمانی كامێرای خاڵ بۆ خاڵ كاردەكەن. عەمید سەعدوڵا، بەڕێوەبەری كامێراكانی هاتوچۆ لەبەڕێوەبەرایەتی گشتی هاتوچۆی سلێمانی لەلێدوانێكدا بەهاوڵاتی وت:»تائێستا تەنها كامێراكانی رێگای سلێمانی دوکان (خاڵ بۆ خاڵ) كەوتوونەتە كارو لەهیچ شوێنێكی دیكە كامێراكان كارناكەن». عەمید سەعدوڵا وتیشی:»هۆكاری ئەوەی كەبۆچی تائێستا كامێراكان لەشوێنی دیكە نەكەوتوونەتەكار پەیوەندی بەكۆمپانیاكەوە هەیە، بەڵام لەئێستادا لەسەر رێگای تاسڵوجە تاچەمچەماڵیش ئامادەكاری بۆ خستنەكاری كامێراكانی (خاڵ بۆ خاڵ) كراوە بەڵام تائێستا نەكەوتوونەتەكار. فازڵ حاجی، وتەبێژی بەڕێوەبەرایەتی هاتوچۆی هەولێر رایدەگەیەنێت، شەوی شەممە 21-10-2023 ،  36 كامێرای خاڵ بۆ خاڵ دەستیان بەكاركردن كردووە. وتەبێژی بەڕێوەبەرایەتی هاتوچۆی هەولێر وتیشی: كامێرای خاڵ بۆ خاڵ پابەندت دەكات كە بەخێراییەكی سنووردار شۆفێری بكەی، چونكە كاتێك لەكامێرایەك تێدەپەڕی، لەپشتەوەی ئۆتۆمبێلیش كامێرایەكی دیكە سەرپێچی و خێراییەكان تۆماردەكات. فازڵ حاجی دەشڵێت: لەپێناو پاراستنی سەروماڵی هاووڵاتیان و دووربوون لەسزای یاسایی، پێویستە شۆفێران پابەندی خێرایی كامێرای خاڵ بۆ خاڵ بن، كە 110 كیلۆمەتر لەكاتژمێرێكدا دیاریكراوە. وتەبێژی هاتوچۆی هەولێر ئاماژەی بەوەشكرد، كامێرای خاڵ بۆ خاڵ بۆ گیرفانبڕینی هاووڵاتیان نییە، ئامانج لەدانانی، پاراستنی گیان و ماڵی هاووڵاتیانە. «دوای نووژەنكردنەوەو دروستكردنی چەندین رێگاوبانی تازە، بینرا هاووڵاتیان بەدروستی بەكاریناهێنن و رێژەی مردن و برینداربوون بەهۆی رووداوەكانی هاتووچۆ بەرزببوونەوە، بۆیە بیر لەوەكرایەوە كامێرای خاڵ بۆ خاڵ دابندرێت، لەو شوێنانەی كەكامێرای خاڵ بۆ خاڵ داندراوە، یەك رووداوی هاتووچۆ تۆمارنەكراوەو شوفێران لەئێستادا پابەندن بەخێرایی دیاریكراوی كامێرای خاڵ بۆ خاڵ.» فازڵ حاجی وادەڵێت. وتەبێژی هاتوچۆی هەولێر باسی  لەوەشكرد : درێژی رێگای شەقامی 120 مەتری شاری هەولێر 26 كلیۆمەترە، ئەگەر شوفێران بەخێرایی دیاریكراو ئۆتۆمبێل لێبخوڕن، 20 خولەكیان پێویستە، ئەگەر كەمتر لەو خێراییە (110 كیلۆمەتر لەكاتژمێرێكدا) شوفێر ئۆتۆمبێل لێبخوڕێت، بەسەرپێچی بۆی هەژمار ناكرێت، تەنیا لەو خێراییەی كە دیاریكراوە بەسەرپێچی هەژمار دەكرێت. پێشتریش فازڵ حاجی  رایگەیاندبوو، بەپێی سیستمەكە خێرایی ژمارەكان كە لەسەر تابلۆكان دیاریكراوەو لەسەرووی ئەو ژمارانەوە كامێراكان سەرپێچی تۆماردەكەن. ئاماژەی بەوەشكردبوو خێرایی رێگاكان دیاریكراوەو كامێراكانیش تیژڕۆیی سەرووی خێرایی دیاریكراو تۆماردەكەن. پێشتریش هێمن میرانی، بەڕێوەبەری گشتی دیوان لەوەزارەتی ناوخۆی حكومەتی هەرێمی كوردستان، رایگەیاندبوو، كامێرای خاڵ بۆ خاڵ تاساڵی 2030، رووداوو قوربانییەكانی هاتووچۆ بەڕێژەی 50% كەمدەكاتەوە. دوای بڵاوبوونەوەی هەواڵی دانانی كامێراكانی خاڵ بۆ خاڵ كەسەرەتا لەسلێمانییەوە دەستیپێكرد، ناڕەزایی زۆری بەدوای خۆیدا هێنا، داواكاری گشتی و ئەنجومەنی پارێزگای سلێمانی دانانی كامێراكانیان رەتكردەوە، بەڵام حكومەتی هەرێم گوێی بەناڕەزایەتی هاووڵاتیان و ئەنجومەنی پارێزگاو داواكاری گشتیش نەداو بەردەوامە لەدانانی ئەو كامێرایانە. بۆ كۆنترۆڵكردنی خێرایی ئۆتۆمبێل لەشەقامەكان، حكومەتی هەرێمی كوردستان گرێبەستێكی لەگەڵ كۆمپانیای ئێرلی فیوچەر بۆ دانانی نزیكەی 500 كامێرای تۆماركردنی تیژڕۆیی لەهەرێمی كوردستان كردووە، كە بەشێوەی پۆینت تو پۆینت كاردەكەن، بەڵام تائێستا لەسلێمانی سیستەمەكە بەخاوی دادەنرێت و لەهەولێریش بەخێرایی. عەلی حەمەساڵح پەرلەمانتاری خولی پێنجەمی پەرلەمانی كوردستان لەلێدوانێكدا بەهاوڵاتی وت: لەلێكۆڵینەوەی یاساییدان بزانین ئەوە پسپۆڕی دادگای فیدراڵییە، چونكە ئەگەر پسپۆڕی ئەوان نەبێت رەتدەكرێتەوە، دادگای فیدراڵی بۆ ئەو بابەتانەیە كەڕەهەندی دەستوری هەیە». وتیشی:»سەد لەسەد دڵنیا نەبین پسپۆڕی دادگای فیدراڵییە نایبەینە ئەوێ، بۆیە دەبێت پسپۆڕی دەزگا دادوەریەكانی هەرێمەو لەهەرێمیش وەك خۆتان دەزانن حزب باڵادەستە». ئەو پەرلەمانتارە دەشڵێت:»لەڕاستیدا كامێرای خاڵ بۆ خاڵ بەڕێككەوتنی هەریەك لە مەسرور بارزانی سەرۆكی حكومەتی هەرێم و قوباد تاڵەبانی جێگری سەرۆكی حكومەتی هەرێم كراوەو كۆمپانیاكە خاوەنداریەتی بۆ هەردووكیان دەگەڕێتەوە، بۆیە گوێ لەكەس ناگیرێ نە وەزارەتی ناوخۆ نە هیچ لایەنێكی دیكەو داواكاری گشتیش». ناڕەزایی هاووڵاتیان گەیشتە ئەوەی چەند جارێك كامێراكان لەسلێمانی تەقەیان لێكراو شكێندران، لەپیرەمەگرونیش خۆپیشاندان بەڕێوەچوو دژ بەدانانی ئەو كامێرایانە. تاڵب محەمەد یەكێك لەڕێكخەرانی خۆپیشاندانەكەی پیرەمەگرون، كە دژ بەدانانی كامێرای خاڵ بۆ خاڵ بەڕێوەچوو، لەلێدوانێكدا بەهاوڵاتی وت: تا ئەم خولەكە هیچ كەس وەڵامی داواكاری ئێمەی نەدایەوە كەگۆڕینی میكانیزمی كامێراكان بوو، نەك ئەوە بەڵكو بەنیازیشن هەموو كوردستان بكەن بەو كامێرایە. پێشتریش فیدراسیۆنی رێكخراوەكان سەبارەت بەدانانی ئەو كامێرایانە هاتووەتە سەرخەت و بەنیازن كەیسەكە بگوازنەوە بۆ دادگا، وەك خۆشیان ئاماژەیان پێدابوو قۆناغی باشی بڕیوەو  هەنگاوی داهاتووشیان ئەوەیە پشتیوانی هەموو ئەو هەوڵانە دەكەن كە بۆ دادپەروەری لەدانانی كامێراكانی خاڵ بۆ خاڵ دەبێت. دیلمان حەمەنادر سەرۆكی رێكخراوی ترافیك بۆ هاوڵاتی، ئەوەی خستەڕوو كەئەو كامێرایە واتە خاڵ بۆ خاڵ، سەرەتا لەئوستورالیاوە سەریهەڵداو تائێستا كامێراكە لەهەر شوێنێك دانرابێت لەپڕ نەبووەو لەشوێنی زۆر دانەنراوە، بەڵكو لەوڵاتان لەو رێگایانە دانراوە كەمەترسی رووداوی هاتوچۆی زۆربووەو قەرەباڵغ بووە. هەروەها وتیشی: ئەوەی لەكوردستان بەدیدەكرێت نیشانەی پرسیارەو بێگومان بازرگانی گەورە لەپشتیەوەیەتی، 60 ملیار دینار لەمانگێكدا داهاتی كۆمپانیاكەیە لەسلێمانی . دیلمان حەمەنادر دەشڵێت: مانگانە ئەگەر شۆفێریش نەچێت سەرپێچییەكە بدات حكومەت دەبێت ئەو قەرزە بدات بەكۆمپانیاكە كەئەمە دیارە بازرگانی گەورە لەپشتیەوەیەتی، لەهیچ وڵاتێكی دنیا شتی لەو شێوەیە نییە. «لەناو گرێبەستەكەدا وردەكاری هەیەو تەنانەت باسی شەقامی 100 مەتری و 60 مەتریش هاتووە كەهاتوچۆ دەڵێت لەناو شار دانانرێت، بەڵام مادام لەگرێبەستەكەدا هاتووە لەناو شاریش خاڵ بۆ خاڵ دادەنرێت، ئەگەر ئامانج سەلامەتی شۆفێرو هاوڵاتی بوایە دەبوو سەرەتا لەڕێگەی كەلار- سلێمانی دایانبنایە». سەرۆكی رێكخراوی ترافیك وادەڵێت. هاوڵاتی سەبارەت بەوردەكاری گرێبەستەكە پەیوەندی بەچەندین بەرپرسی هاتوچۆی هەرێم و وەزارەتی ناوخۆشەوە كرد، بەڵام نە ئامادەبوون وەڵامی پرسیارەكان لەبارەی وردەكاری گرێبەستەكەو ئاماری رۆژانەی سەرپێچی تۆماركراو بدەنەوەو خۆشیان بوارد لەوەڵامی ئەو پرسیارەی سەبارەت بەژمارەی كامێراكان لەسەرتاسەری هەرێم و گوژمەی گرێبەستەكە بەگشتی ئاڕاستەیان كران. بەڵام بەپێی زانیاریەكانی هاوڵاتی كە لەچەند سەرچاوەیەك وەریگرتوون، لەهەر چوار پارێزگاكەی هەرێم نزیكەی 900 كامێرای خاڵ بۆ خاڵ جێگیر دەكرێن، هاوكات سەدان ئۆتۆمبێل وەك خەڵات پێشكەش بەوەزارەتی ناوخۆ كراوە وەك شیرینی گرێبەستەكەی نێوان كۆمپانیای ئێرلی فیوچەر و وەزارەتی ناوخۆی هەرێم. رۆژی یەكشەممە 5-5-2023 رێبەر ئەحمەد، لەكۆنگرەیەكی رۆژنامەوانیدا سەبارەت بەڕەخنەكان لەخاڵ بۆ خاڵ، رایگەیاند: مەبەست لەدانانی كامێرای خاڵ بۆ خاڵ بۆ ئەوەیە كەپاراستنی سەلامەتی رێگاكان و هاووڵاتیانە ئەوەش بەكۆنتڕۆڵكردنی تیژڕەویە لەڕێگەی كامێراوە، ئەو كامێرایانەی پێشتر هەبوون كۆن بوون و لەگەڵ سەردەم نەدەگونجان.. «لەسەر بنەمای زۆری ژمارەی گیانلەدەستدان و برینداران و كەمئەندامانی رووداوەكانی هاتوچۆ، بڕیارماندا بەدانانی سیستمی كامێرای خاڵ بۆ خاڵ، ئەو پۆپۆلیستانەی كە وادەڵێن خەڵك زەرەرمەند دەبێت بیر لەسەلامەتی هاووڵاتیان لەسەر شەقامەكان ناكەنەوە، بۆیە حەق وایە ئەو كارە بۆ خەڵكی پسپۆڕ لێبگەڕێن و هەموو سیاسی و پەرلەمانتارو خەڵكی دوور لەواقعی هاتوچۆ باسی دەكەن، حكومەتی هەرێم پلانی ئەوەیە رووداوەكان كەمببنەوە بۆ گەیشتن بەو ئامانجە جێبەجێی دەكەین». وەزیری ناوخۆی هەرێم وای وت. كامێراكانی خاڵ بۆ خاڵ لە (11-4-2021)  گرێبەستەكەی ئەنجامدراوە لەنێوان وەزارەتی ناوخۆو كۆمپانیای ئێرلی فیوچەر، رۆژی دووشەممە 29ی ئایاری 2023، كامێراكانی خاڵ بۆ خاڵ لەڕێگای دوكان_تاسڵوجە لەپارێزگای سلێمانی كەوتنە كارو لەناوەڕاستی مانگی شوباتی ئەمساڵیش لەسەر شەقامی 120 مەتری هەولێر كامێراكان كەوتنەكار. بەپێی گرێبەستەكە تەنها لەپارێزگای سلێمانی و ئیدارە سەربەخۆكانی لەگەڵ پارێزگای هەڵەبجە 53 ملیارو 590 ملیۆن دیناری تێدەچێت و ماوەی پرۆژەكەش 500 رۆژە، گرێبەستەكەش بەپێی پاشكۆی (ه)ی رێنمایی ژمارە دووی گرێبەستە حكومیەكان كراوە كەساڵی 2016 دەرچووە، هەر بەپێی گرێبەستەكەش تا تەواوبوونی تێچووی پرۆژەكە 70٪ی داهاتی كامێراكان بەكاش دەدرێتە كۆمپانیاو گرێبەستەكەش بۆ 15 ساڵە.

نەخۆشخانەکانی غەززە ئەمڕۆ هۆشداری داخستنی سەرجەم بەشەکانی نەخۆشخانەکانیان دەدەن، ئەوەش دوابەدوای ئاگاداریەکی نەتەوەیەکگرتوەکان لەبارەی نەمانی سوتەمەنی.  شەوی ڕابردوو هەشت بارهەڵگری فریاگوزاری دیکە کە خۆراک و ئاو و دەرمانیان هەڵگرتبوو، لە میسرەوە چونە ناو غەززە، بەڵام دامەزراوەکانی فریاگوزاری دەڵێن، ڕۆژانە لانیکەم ١٠٠ بارهەڵگر پێویستە. نەخۆشخانەکانی غەززە ڕایانگەیاندووە ئەگەر سوتەمەنی تازەیان پێ نەگات، سەرجەم بەشەکانی نەخۆشخانەکانیان دادەخەن جگە لە بەشی فریاکەوتنی خێرا، نەتەوەیەکگرتوەکانیش ڕایگەیاند ئەگەر ئەمشەو سوتەمەنی و هاوکاری نوێ نەگات کارەکانیان ڕادەگرن. هاوکاتیش ئیسرائیل  گەیاندنی سووتەمەنی نوێ بۆ غەززە ڕادەگرێت، بەڵام حەماس تۆمەتبار دەکات بەوەی سەدان هەزار لیتری سووتەمەنی کۆکردۆتەوە. بەپێی ڕاگەیندراوەکانی وەزارەتی تەندروستی غەززە لەسەرەتای دەستپێکردنی جەنگی نێوان حەماس و ئیسرائیل زیاتر لە شەش هەزار کەس کوژراون.

هاوڵاتی  ئه‌نجومه‌نی وه‌زیرانی هه‌رێمی كوردستان كۆبوه‌وه‌ و رایگه‌یاند، ژمارەی مووجەخۆرانی هەرێم و بڕی مووچەکانیان پشتراستکراوەتەوە و ئەرکی حکومەتی فیدڕالە مووچەی فەرمانبەرانی هەرێم دابین بکات. ئەمڕۆ چورشەممە 25ی تشرینی یەکەمی 2023 ئه‌نجومه‌نی وه‌زیرانی هه‌رێمی كوردستان کۆبوویەوە بە سەرپەرشتی مەسرور بارزانی و بە ئامادەبونی قوباد تاڵەبانی، جێگری سەرۆک وەزیران به‌ڕێوه‌چوو کە تێیدا باسی له‌ ئەنجامی کۆبونەوەی هاوبەشی ڕۆژی 18ی ئه‌م مانگه‌ی لەنێوان لیژنەی دارایی ئەنجومەنی نوێنەران و شاندی حکومەتی هەرێم کرا. لە کۆبوونەوەکەدا، ئاماژە بەوەدرا، کە لە کۆبونەوەکەی لیژنەی دارایی ئەنجومەنی نوێنەران، شاندی هەرێم بە ڕاپۆرتێکی 30 لاپەڕەیی و بە ژمارە و داتای دروست، وەڵامی سەرجەم پرسیارەکانی تایبەت بە بودجەی هەرێمى دایەوە لەبارەی داهات وخەرجییەکان و نەوت و دەروازە سنورییەکان و پرۆسەی وردبینی هاوبەشی هەردو دیوانی چاودێریی دارایی فیدڕاڵی و هەرێم و میلاکیی گشتی و مووچە. ئەنجومەنی وەزیران، وەزارەتی دارایی و ئابوری و شاندی دانوستانکاری ڕاسپارد کە لە پەیوەندی بەردەوامدا بن لەگەڵ لیژنەی دارایی ئەنجومەنی نوێنەران و وەزارەتی دارایی حکومەتی فیدڕاڵ، بۆ بەرجەستەکردنی ئەو بنەمایانەی کە لە کۆبونەوەی ڕۆژی 18ی ئه‌م مانگه‌دا لیژنە دارایی هەمولایەک لەسەری کۆک بون، بەتایبەتیش جیاکردنەوەی تەرخانکراوەکانی موچەی هەرێم لە پێوەری خەرجیى ڕاستەقینە، هاوشێوەی ناوچەکانی دیکەی عێراقی فیدڕاڵ و هەموارکردنەوەی ماددەکانی پەیوەندیدار بەم بابەتە لە یاسای بودجە. له‌ راگه‌یه‌ندراوه‌كه‌دا هاتوه‌، ئەنجومەنی وەزیران وێرای پشتیوانی لە پڕۆسەی وردبینی هاوبەشی هەردو دیوانی چاودێریى دارایی دەکات، بە ئاڕاستەی خستنەڕوی ڕاستییەکان و دڵنیاکردنەوەی هەمو لایەک کە هەرێمی کوردستان، هەروەک هەمیشە شەفافانە، هەمو زانیاری و ژمارەکان دەخاتەڕو و هیچی نیە بیشارێتەوە و هیچ بیانوویەک بۆ حکومەتی فیدراڵ نەهێڵرێتەوە کە بەربەست دروست بکەن لە خەرجکردنی شایستەداراییەکانی هەرێم. لە راگەیاندراوەکەدا باس لەوە کراوە، "ئیتر ئەرکی حكومەتی فیدڕاڵ و بە تایبەتی وەزارەتی داراییە، هاوشێوەی ناوچەکانی دیکەی عێراق موچەی موچەخۆرانی هەرێمیش لەکاتی خۆی بنێرێت کە شایستەی قانونیی موچەخۆرانە".

سەرکۆ جەمال لەدوای ساڵی 2017 ەوە بۆ یەكەمجار بەشێوەیەكی كتوپڕ شەڕ لەنێوان پێشمەرگەو سوپای عێراق روویدا، بەدیاریكراویش لەبەرزاییەكانی قەرەچووغ لەنزیك مەخمور، كە بەهۆیەوە چەند پێشمەرگەو سەربازێك لەهەردوولا بوونە قوربانی، فەرماندەیەكی پێشمەرگەش هۆكاری شەڕەكە بۆ هاوڵاتی ئاشكرادەكات. شەڕی نێوان پێشمەرگەو سوپای عێراق، 22ی تشرینی دووەمی 2023 لەچیای قەرەچووخ لەنزیك كەمپی ئاوارەكانی مەخمور روویدا، تێیدا دوو پێشمەرگە شەهیدبوون و  هەشت پێشمەرگەی تریش برینداربوون، دوو كوژراویش لەسوپای عێراق بوونی هەیە، لەسەر چەند پێگەیەك لەچیای قەرەچووغ كەهەفتەیەك پێش شەڕەكە پارتی كرێكارانی كوردستان (پەكەكە) چۆڵكردنیانی راگەیاند. غازی فەیسەڵ، فەرماندەی هێزی خۆبەخشی سنوری چیای قەرەچووخ لەمەخموور لەسەر شەڕەكەی نێوان هێزەكانی 80ی وەزارەتی پێشمەرگە كە سەر بەپارتییە لەگەڵ سوپای عێراق بەهاوڵاتی وت: «كێشەكە لەسەر گرتنەوەی دوو خاڵی چاودێری بووەو كێشەیەكی گەورە نییە، هەردوولا پەشیمان بوونەتەوە لەسەر بابەتەكە.» دوای رووداوەكە لیوا یەحیا رەسوڵ، وتەبێژی فەرماندەیی گشتی هێزە چەكدارەكانی عێراق رایگەیاند: محەممەد شیاع سودانی، سەرۆكوەزیرانی عێراق بڕیاریدا بەپێكهێنانی لیژنەیەكی باڵای ئەمنی بۆ بەدواداچوون و هۆكاری ئەو رووداوەی  لەمەخمور روویدا لەنێوان هێزەكانی پێشمەرگە و سوپای عێراق. لەسەر بڕیاری لیژنەكە غازی فەیسەڵ وتی: «دواین سەردانی قاسم ئەعرەجی ڕاوێژكاری ئاسایشی نیشتیمانی عێراق بۆ هەولێر و كۆبوونەوەی لەگەڵ ڕێبەر ئەحمەد وەزیری ناوخۆی هەرێم بۆ ئەو مەبەستە بووە و سەردانی شوێنی شەڕەكەیان كردووە بەڵام هێشتا سوپای عێراق لەو شوێنانەن كە بۆی هاتوون و بڕیاری نوێ نەدراوە بەڵام دۆخی مەخمور جێگیرە و هیچ نائارامییەك نییە.» چەند رۆژێك لەمەوبەر فەرمانداری بڕیارگەی ناوەندی پاراستنی گەل (نەپەگە)، رایگەیاند  «هێزەكانمان لەكەمپی پەنابەرانی مەخمورو ئەو ناوچانە كشاندووەتەوە.» غازی فەیسەڵ دەڵێت «لەدوو ساڵی رابردوودا توركیا زۆر هێرشی كردووەتەسەر ئەو خاڵە چاودێرییانە بۆیە  پەكەكە داوای كردووە سوپای عێراق بیانپارێزێت و ئەو خاڵانە رادەستی ئەوان بكاتەوەو سوپای عێراقیش وتوویەتی كە رادەستی ئێمەی بكەنەوە دەتانپارێزین.» لەسەر هێرشەكە فەرماندەی هێزی خۆبەخشی قەرەچووخ ئەوەی ئاشكراكرد كە «هێزەكانی 80 ویستوویانە ئەو خاڵە چاودێرییانە بگرن». «گەریلا كیشەی هەیە لەگەڵ برادەرانی پارتی و حەزیان نەدەكرد پارتی ئەو خاڵە چاودێرییانە وەربگرێت و داوایان كرد سوپای عێراق دەوروپشتی كەمپەكە وەربگرێت، پارتی زنجیرە شاخی قەرەچووخ بەسنوری خۆی دەزانێت و هێزەكانی 80  ویستیان خۆیان دەستی بەسەردابگرن و حەزیان نەكردووە سوپای عێراقی لێبێت و نزیكیان بێت، بۆیە پارتی هەوڵیدا لەڕێگەی پەیوەندییەكانیەوە وەریبگرێت و نەیانتوانیوە بۆیە هێرشێكی لەناكاویان كردو ئەوە روویدا»، غازی فەیسەڵ وای وت. دوای دروستبوونی ئەو گرژییە لەنێوان هەردوولا، چەند ڤیدیۆیەك لەسۆشیال میدیا بڵاوبووەوە كە باس لەوە دەكرا هێزی حەشدی شەعبی بێت بەرەو مەخمور جووڵەیان پێكرابێت. غازی فەیسەڵ ئەوەی بۆ هاوڵاتی پشتڕاستكردەوە كەئێستا لیوایەكی حەشدی شەعبی هاتوونە نزیك مەخمورو جێگیركراون هەرچەندە چەندین ساڵە حەشدی شەعبی نەهاتووەتە ئەو ناوچەیە. بەپێی زانیاریەكانی هاوڵاتی، دوای ئەوەی گەریلاكانی پەكەكە لەكامپی مەخموورو چیای قەرەچووخ كشانەوە، لەماوەی ٤٨ كاتژمێردا شوێنەكەیان رادەستی فیرقەی ١٤ـی سوپای عێراق كردووە، بەڵام دواتر لەسەر ئەو شوێنانە شەڕ لەنێوان  هێزەكانی پێشمەرگەو هێزێكی سوپای عێراق روویدا، هەر بەپێی زانیاریەكان ئەو پێگانە بەسێ جار و لەسەرەتای مانگی ئەیلولی ئەمساڵەوە چۆڵكراون دواین كشانەوەش دوای 10 كاتژمێر سوپای عێراق و پێشمەرگە پێیان زانیوە». لە ١٩ـی تشرینی یەكەم فەرماندەی ناوەندیی هێزەكانی پاراستنی گەل-نەپەگە، لەڕاگەیاندراوێكدا كشانەوەی خۆی لەكامپی مەخموورو رادەستكردنی بەسوپای عێراق راگەیاند، بەمەبەستی ئەوەی هیچ بۆشاییەكی ئەمنی لەو ناوچەیە درووست نەبێت. چیای قەرچووغ دەكەوێتە پشت كامپی شەهید رۆستەم جودی (مەخموور)، كەتیایدا هێزەكانی پاراستنی گەل-هەپەگە لەساڵی ٢٠١٤ەوە   «بۆ بەرگرییكردن لەخەڵكی ناوچەكە لەهێرشی چەكدارانی داعش جێگیربوون» وەك سەرچاوەیەك لەپەكەكە بۆ هاوڵاتی ئاشكرایكرد «هەر هێزێك ئەو چیایە كۆنتڕۆڵ بكات، دەتوانێت دەسەڵاتی خۆی بەسەر دەشتی مەخموورو هەولێردا بسەپێنێت». وتیشی:» زیاتر لە نۆ ساڵە ئەم خاڵە ستراتیژییە لەلایەن گەریلاكانی هەپەگەوە پارێزراوە، لەكاتی هێرشی چەكدارانی داعش لەو ناوچەیە گەریلا هەرێمی كوردستان و هەولێری بەتایبەت پاراست، نەیانهێشت چەكدارانی داعش بچنە ناو هەولێرەوە، هەروەها چیای قەرەچووخ بەیەكێك لەناوچە دەوڵەمەندەكانی نەوت دادەنرێت، چونكە بیری نەوتی زۆری تێدایە».

هاوڵاتی  ئەنجومەنی زانکۆی سلێمانی بڕیاریدا بایکۆت بشکیندرێت و خوێندنی ساڵی نوێ لە رۆژی شەممەی هەفتەی داهاتوو دەستپێبکاتەوە. ئەنجومەنی زانکۆی سلێمانی راگەیاندراوێکی بڵاوکردەوە و دەڵێت لە کۆبونەوەی هەفتانەیدا بڕیاری ئەوە دراوە، "رۆژی شەممە (28ی 10ی 2023) وەک دەستپێکی پڕۆسەی خوێندنی ساڵی نوێی خوێندن" دیاریبکرێت ئەمەش "لە پێناو خەمخۆریمان بۆ ئایندەی خوێندکاران و هەڵنەسپاردنی ساڵی خوێندنی 2023 -2024 بەپێی پێوەرە زانستییەکانی بۆڵۆنیا پڕۆسێس، کە ئەم پرسە پەیوەندیدارە بە چارەنوسی زیاتر لە 23 هەزار خوێندکار و خێزانەکانیان." لە راگەیاندراوەکەدا باس لەوەش کراوە کە ئەنجومەن جەخت لە سەرجەم ماف و شایستە داراییەکانی مامۆستایان، فەرمانبەران و خوێندکاران دەکاتەوە، لە لایەکی دیكه‌وه‌ جەخت لە بەرپرسیارییەتی لایەنە پەیوەندیدارەکان بۆ چارەسەرکردنی گرفتە داراییەکانی بەردەم پڕۆسەی خوێندن لە زانکۆكه‌ دەکاتەوە. ئەنجومەنی زانکۆی سلێمانی داوا لە خوێندکاران دەکات "بەپێی خشتەی وانەی کۆلێژەکان و خشتەی دابەشکردنی بەشە ناوخۆییەکان سەردانی زانکۆ بکەنەوە." بەهۆی بایکۆتی مامۆستایانی وەزارەتی پەروەردە و خوێندنی باڵاوە، خوێنی ساڵی نوێ لە سنوری پارێزگای سلیمانی و هەڵەبجە و سنوری گەرمیان پەکیکەوتووە دوای ئەوەی کە مامۆستایان چەندین جار رەتیانکردووەتەوە کە ناچنەوە هۆڵەکانی خوێندن هەتا مووچەکانیان لەکاتی خۆیاندا پێندرێت. تا ئێستا مووچەی مانگی هەشتی ئەمساڵ دابەشنەکراوە.

هاوڵاتی  مەسرور بارزانی، سەرۆکی حکومەتی هەرێم رایگەیاند، دابنیکردنی مووچە لە ئەستۆی حکومەتی هەرێم نییە و دەبێت مامۆستایان رەخنەکانیان ئاراستەی بەغدا بکەن، دەشڵێت، "رێگە نادەین مافی هیچ مامۆستایەک بفەوتێت."  ئەمڕۆ چوارشەممە 25ی تشرینی یەکەمی 2023، مەسرور بارزانی لەکاتی مەراسیمی کردنەوەی باخچەیەکی ساوایان لە هەولێر باسی لە بایکۆتی مامۆستایان کرد و وتی، "من لێرە دەمەوێت پاڵپشتیی خۆم بۆ ئەو مامۆستایانە دەرببڕم و منیش دەنگی خۆم دەخەمە پاڵ دەنگی ئەوان کە پێویستە هەموو ماف و شایستە داراییەکانیان دابین بکرێت، بەڵام دەبێت رووی رەخنەکانمان لەو لایە بێت کە هۆکارە بۆ بڕینی مووچەکانیان یان دواخستنی مووچەکانیان؛ حکومەتی هەرێمی کوردستان هۆکار نییە و زۆر بە پەرۆشە بۆ ئەوەی بە زووترین کات مووچەکانیان بۆ دابین بکات."  لە سەرەتایی ساڵی نوێی خوێندنەوە مامۆستایانی پارێزگای سلێمانی وهەڵەبجە و سنوری گەرمیان بایکۆتی هۆڵەکانی خوێندنیان کردووە و داوا دەکەن مووچەکانیان لەکاتی خۆیدا دابین بکرێت کە تا ئیستا مووچەی مانگی هەشتیان وەرنەگرتووە.  لە پێنجشەممەی رابردوو ئالان حەمەسەعید، وەزیری پەروەردەی حکومەتی هەرێم رایگەیاند پێویستە بایکۆت بشکێندرێت و دەبێت خوێندن دەستپێبکاتەوە کە ئەم قسانەی وەزیری پەروەردە نارەزایەتییەکی گەورەی لێکەوتەوە و مامۆستایانی سلێمانی و هەڵەبجە و گەرمیان و چەند ناوچەیەکی تر خۆپیشاندانی بەرفراوانیان لەسەرەتایی ئەم هەفتەیەدا ئەنجامدا. مەسرور بارزانی لە وتارەکەیدا ئاماژەی بەوە کرد، "رێگە نادەین مافی هیچ مامۆستایەک بفەوتێت، هەموویان قەرەبوو دەکرێنەوە، پێش ماوەیەکیش گوتم ئەوەی قەرەبوو ناکرێتەوە، ئەم تەجروبەیەیە، ئەم تاقیکردنەوەیەیە، خوێندنی منداڵانە کە هیوادارم مامۆستا بەڕێزەکان بگەڕێنەوە بۆ قوتابخانەکان و لەگەڵ قوتابییە خۆشەویستەکان بەردەوام بن لە وانە گوتنەوە و پەروەردەکردنی قوتابییان لەسەر بنەمایەکی تەندروست."

دلێر عەبدوڵڵا كۆبوونەوەكەی نێوان بزووتنەوەی گۆڕان و پارتی دیموكراتی كوردستان بەپێشنیارو داواكاری بزووتنەوەی گۆڕان بووە، بەرپرسێكی پارتی بڵاویكردەوە كە لەهەوڵی ئەوەدان یەكێتی و لایەنەكانی تر پەلكێشی ناو رێكەوتنێكی سیاسی بكەن كەئامانج لێی یەكدەنگی كوردو پاراستنی قەوارەی هەرێمە، بەرپرسێكی یەكێتی نییشتمانی كوردستانیش پێی وایە كەئەوەی كراوە خواستی حزبەكەی ئەوانەو لەكۆنگرەی پێنجەمدا لەلایەن سەرۆكی حزبەكەیەوە قسەی لەسەر كراوە. رۆژی سێشەممە لەبارەگای مەكتەبی سیاسی پارتی دیموكراتی كوردستان لەپیرمام، كۆبوونەوەی هاوبەشی نێوان بزووتنەوەی گۆڕان و پارتی دیموكراتی كوردستان ئەنجامدرا. كەتێیدا جەخت لەسەر كۆكردنەوەی تواناكان بۆ پاراستنی قەوارەی هەرێم و پاڵپشتیكردنی حكومەتی هەرێم بۆ رێكەوتن لەگەڵ بەغدا كرایەوە. بەپێی راگەیەنراوی هاوبەشی نێوان بزووتنەوەی گۆڕان و پارتی، هەردوو حزب كۆكبوون لەسەر دانانی ستراتیژیەتی هاوبەشی نیشتمانی هێزو لایەنە سیاسییەكان بۆ هەڵگرتنی بەرپرسیاریەتی قۆناغەكە بەتایبەت ئەو مەترسییانەی روویان لەهەرێم كردووە. هاوڵاتی ئەوەی زانیوە كەكۆبوونەوەكە لەسەر داواكاری و پێشنیاری بزووتنەوەی گۆڕان ئەنجامدراوەو ئامانجی بزووتنەوەكە بۆ ئەوە بووە كەبەرەیەكی فراوان لەهێزو لایەنە سیاسییەكانی دروستبكرێت تا پێكەوە بەرپرسیارێتی قۆناغەكە هەڵبگرن، لەوبارەوە عیسمەت رەجەب ئەندامی سەركردایەتی پارتی دیموكراتی كوردستان بەهاوڵاتی وت «كۆبوونەوەكە لەسەر پێشنیاری برایانی بزووتنەوەی گۆڕان بووە، چونكە ئەوان بەدەر لەوە پرسی تر هەبووە كەویستوویانە قسەی لەسەربكەن، هەروەها برادەرانی گۆڕان لەحكومەتن و وەزیریان هەیەو بەشێكن لەدەسەڵات.» یەكێتی نیشتمانی كوردستان وەك هێزێكی هاوبەش و پێكهێنەری كابینەی نۆیەمی حكومەت، گەشبینە بەم كۆبوونەوەیەو پێیان وایە ئەوەی كەكراوە بەشێكە لەسیاسەتی یەكێتی نیشتمانی كوردستان، لەوبارەیەوە لەتیف نێروەیی ئەندامی سەركردایەتی یەكێتی نیشتمانی كوردستان بەهاوڵاتی وت «دەتوانین بڵێین ئەو كۆبوونەوەیەی نێوان پارتی و بزووتنەوەی گۆڕان جێبەجێكردنی بەشێكی سەرەكی سیاسیەتی فەرمی یەكێتی نیشتمانی كوردستانە كە لەكۆنگرەی پێنجەم سەرۆك بافڵ تاڵەبانی سەرۆكی یەكێتی هەمان پەیامی خستەڕوو بۆ هێزو لایەنە سیاسییەكانی تر، ئومێدەوارین بابەتی هەنگاونان بەرەو ئاشتەوایی سەرتاسەری لەنێوان هێزو لایەنە سیاسییەكانی هەرێمی كوردستان لەئایندەیەكی نزیكدا بكەوێتە بواری جێبەجێكردنەوە، چونكە ئەم قۆناغە وادەخوازێت كورد ناوماڵی خۆی رێكبخات و بەرژەوەندی باڵای نیشتمانی بخرێتە پێش بەرەژەوەندیە حزبییەكان.» بەپێی زانیارییەكانی هاوڵاتی، لەكۆبوونەوەكەدا چەند پرسێكی تر گفتوگۆی لەسەر كراوە، لەوانە پرسی یاسای نەوت و هەناردەكردنی نەوت بۆ دەرەوەی هەرێم، لەوبارەیەوە سەركردەكەی پارتی بەهاوڵاتی وت «بەشێكی تری كۆبوونەوەكە لەسەر وەزعی ئەمڕۆی هەرێم و حكومەت و مەسەلەی بودجە بووە كەحكومەتی ناوەند لەو رووەوە ئاستەنگی لەبەردەم هەرێم دروستكردووە،  هەروەها مەسەلەی قانونی نەوت كە لەم مانگەدا تەواو دەبێت بۆ ئەوەی جارێكی تر هەناردەی نەوتی هەرێم دەستپێبكاتەوە.» بزووتنەوەی گۆڕان رووبەڕووی رەخنەی بەشێك لەچاودێران بووەتەوەو بەوە تۆمەتبار دەكرێت كەهۆكاری مانەوەی دەسەڵاتی یەكێتی و پارتییە، لەوبارەیەوە عومەر عەلی چاودێری سیاسی بەهاوڵاتی وت «هاووڵاتیانی ناڕازی و بەشێك لەئۆپۆزسیۆن چاوەڕێی ئەوەبوون ئەمجارە گۆڕان پاشەكشە لەحكومەت بكات و بێتەوە بەرەی گەل، بەڵام ئەم كۆبوونەوەیە ئەوە دەسەلمێنێت كە گۆڕان توانای ئەوەی نییە جارێكی تر بێتەوە بەرەی خەڵك، وەستانەوە بە رووی مەترسییەكان بەكۆبوونەوەو راگەیەنراوی هاوبەش نابێت، دەبێت بە رێگەچارەیەكی سیاسی ئەوتۆ كە بتوانیت جەماوەری ناڕازیی دڵخۆش بكەیت و متمانەی بۆ بگەڕێنیتەوە، لەلایەكی ترەوە كۆتایی هێنان بەو دۆخە ناهەموارەی لەنێوان حكومەت و بەغدا هەیە.» بەپێی زانیارییەكانی هاوڵاتی، لەداهاتوویەكی نزیكدا كۆبوونەوەی هاوبەشی نێوان یەكێتی و پارتی بەڕێوەدەچێت و ئەو بەرەیە فراوان دەكرێت كە بۆ پاراستنی قەوارەی هەرێم و رووبەڕووبوونەوەی مەترسییەكان پێكهێنراوە، لەوبارەیەوە سەركردەكەی پارتی بەهاوڵاتی وت «پاش ئەوە، بەتایبەت بەكۆتایی هاتنی كۆنگرەی پێنجەمی یەكێتی، بەرنامەی یەكێتی وایە كەسەردانی ئێمەش بكەن و لەسەر وەزعی عام و هەرێم و بەغدا كۆبوونەوە بكەین و پێكەوە كاری هاوبەشمان هەبێت.» هاوڵاتی هەوڵی زۆریدا بۆ ئەوەی لێدوان و وتەی بزووتنەوەی گۆڕان وەربگرێت، بەڵام زۆرێك لەسەركردەكانی ئەو حزبە بەپاساوی جۆڕاوجۆر رەتیانكردەوە قسە لەسەر ئەو پرسە بكەن. كۆبوونەوەی هاوبەشی نێوان بزووتنەوەی گۆڕان و پارتی لەكاتێكدایە كە هەرێمی كوردستان نوقمی قەیران و گرفتی بەردەوام بووەو هاوڵاتیانی كوردستان گرفتاری چەندان كێشەو ئاریشەی دروستكراون، بەتایبەت دابین نەكردنی مووچەی فەرمانبەران و خراپی ئیدارەدانی هەرێم كە بووەتە مایەی بێزاری و توڕەیی هاوڵاتیان.

هاوڵاتی سەرۆکى حکومەتى هەرێم رایدەگەنێت؛ دەنگى خۆم دەخەمە پاڵ دەنگى مامۆستایان بۆ وەرگرتنى ماف و شایستە داراییەکانیان، دەشڵێت: موچە قەرەبو دەکرێتەوە، بەڵام خوێندن و پەروەردە قەرەبو ناکرێتەوە. مه‌سرور بارزانی له‌میانه‌ی كردنه‌وه‌ی قوتابخانه‌ و باخچه‌یه‌كی منداڵان له‌ شاری هه‌ولێر رایگه‌یاند، قوتابخانه‌ ته‌نها فێركردنی خوێندن نییه‌، به‌ڵكو په‌روه‌رده‌كردنیش كه‌ قوتابی دێته‌ قوتابخانه‌ ده‌بێت فێری ئه‌وه‌ بێت كه‌ دواتر چۆن له‌ ژیاندا مامه‌ڵه‌ له‌گه‌ڵ گرفته‌كانی رۆژگار بكات وتیشی ، دەزانم دۆخى ژیانى مامۆستایان بەهۆى موچەوە سەخت بووە، بەڵام سوپاسیان دەکەم کە بە لەخۆبردویى وانەدەڵێنەوە و بەردەوامن لە پەروەردە. مەسرور بارزانی لەبارەی ئەو مامۆستایانەی لە پارێزگاکانی سلێمانی، هەڵەبجە و ئیدارە سەربەخۆکانی راپەڕین و گەرمیان و پەروەردەی کۆیە بایکۆتیان راگەیاندووە، وتی، "ئەو مامۆستایانەی تاوەکو ئێستا نەیانتوانیوە بەردەوام بن لە خوێندن و داوای مافەکانی خۆیان دەکەن، پاڵپشتیی خۆمیان بۆ دەردەبڕم؛ دەنگی خۆم دەخەمە پاڵ دەنگی ئەوان. پێویستە هەموو ماف و شایستە داراییەکانیان دابین بکرێت". مەسرور بارزانی باسی لەوەشکرد ، هەندێ لایەن یارى بە هەستى مامۆستا دەکەن و هانیان دەدەن نەیەنەوە،  وتیشى،" موچە قەرەبو دەکرێتەوە، بەڵام پڕۆسەى خوێندن و وانەى قوتابیان و پەروەردە قەرەبو ناکرێتەوە". سەرۆکوەزیرانی هەرێمی کوردستان سەبارەت بە هۆکاری نەدانی موچەی مامۆستایان وتی، " با رووی رەخنەکانمان لەو لایەنە بێت کە هۆکارە بۆ بڕین یان دواخستنی مووچەکانیان. حکومەتی هەرێمی کوردستان هۆکار نییە، بەڵکو زۆر بە پەرۆشە بۆ ئەوەی بە زووترین کات مووچەکانیان بۆ دابین بکات. بەردەوامیش دەبین بۆ ئەوەی بەیەکەوە داوای مافی مامۆستایان، فەرمانبەران و هەموو خەڵکی کوردستان بکەین". 13ـی ئەیلوول، ساڵی نوێی خوێندن لە هەرێمی کوردستان دەستیپێکرد، بەڵام لە پارێزگاکانی سلێمانی و هەڵەبجە، ئیدارەکانی گەرمیان و راپەڕین و پەروەردەی کۆیە دەرگەی قوتابخانەکان بەهۆی بایکۆتی مامۆستایانەوە بە داخراوی ماوەتەوە. داواکاریی مامۆستایان بۆ کردنەوەی دەرگەی قوتابخانەکان دوو بەشە؛ وانەبێژان داوای دامەزراندن بەشێوەی گرێبەست دەکەن و داواکاریی مامۆستایانی میلاکیش مووچەی مانگەکانی ئاب و ئەیلوولە پێکەوە.  

هاوڵاتی سەرلەبەیانی ئەمڕۆ ئاگر لە کارگەیەکی قیر لە عەربەت کەوتەوە و بەهۆیەوە کەسێک گیانی لەدەستداوە و سێ کەس برینداربوون. لە ئێستاشدا ئاگرەکە بۆ تەواوی بەشەکانی کارگەکە تەشەنەی سەندووە. سامان نادر، بەڕێوەبەرى سەنتەرى فریاکەوتنى خێراى سلێمانى 122  رایگەیاند؛ ئاگر لە کارگەیەکى دروستکردنى قیر لەسەر رێگاى عەربەت-سلێمانى کەوتوەتەوە و بەهۆیەوە هاوڵاتییەک گیانى لەدەستداوە و سێ کەسی دیکە بریندار بوون کە ڕێژەی سوتاوییەکەیان زۆرە و باری تەندروستیان ناجێگیرە. لەبارەی هۆکاری رووداوەکەوە، سەرچاوەیەک لە ناو کارگەکەوە بە هاوڵاتی وت ، هۆکاری ئاگرەکە گڕگرتنی خەزانەکانی نێو کارگەکە بووە، وتیشی " یەکێک لەوانەی گیانی لەدەست داوە سایەق تەنکەر بووە" . هاوکات وتیشی، ئەو هاوڵاتییەی گیانی  لەدەستداوە خەڵکی شاری هەولێرە و شۆفێری تەنکەرەکان بووە، سەرلەبەیانی ئەمڕۆ ویستوویەتی سووتەمەنی ناو تەنکەرەکەیان بەتاڵ بکەن بەڵام لەکاتی بەتاڵکردنەکەدا ئاگرەکە کەوتووەتەوە. بەپێی وتەی سامان نادر بەڕێوەبەری فریاکەوتنی خێرای سلێمانی ، دوو بریندارەکەی دیکە لە ئێستادا لە نەخۆشخانەی شارن و دەگوازرێنەوە بۆ نەخۆشخانەی ئیمێرجێنسی. وتیشی، برینی بریندارەکان سەختە و دووکەڵێکی زۆریشیان هەڵمژیوە. ئەو دوو کەسەی کە برینداربوون خەڵکی سلێمانین و کارمەندی کۆمپانیاکە بوون.      

هاوڵاتی ئاژانسی هەواڵی ڕۆیتەرز بڵاویکردەوە ئەمشەو دووموشەك لەناو بنكەی ئاسمانی عەین ئەسەد كەوتووەتە خوارەوە. ڕۆیتەرز لە زاری دوو بەرپرسی ئەمنییەوە بڵاویکردەوە لە هێرشێکی دیکەدا دوبارە ئەمشەو دوو موشەک لەناو بنکەی ئاسمانی عەین ئەلئەسەدی عێراق کەوتونەتە خوارەوە و یەکێک لە سەرچاوەکان بەو ئاژانسەی ڕاگەیاندووە موشەکەکان قەبارە گورەبوون ونزیکەی 50 کیلۆمەتر لە باشوری خۆرهەڵاتی بنکەکەوە کەوتونەتە خوارەوە. ئەو هێرشە لەدوای پەیامەكەی محەمەد شیاع سودانی, فەرماندەی گشتی هێزە چەكدارەكانی عێراق دێت, كە هێزە ئەمنیەكانی راسپارد, ئەو كەسانە دەستیگربكەن, بنكە سەربازییەكان دەكەنە ئامانج, كە هێزەكانی ئەمریكای میوانداری كردووە. هاوکات دوای ئەوەشدێت کە هێزەکانی ئەمریکا بڕیاریدا  رێوشوێنی نوێ بگرێتەبەر بۆ پاراستنی ھێزەکانی لە رۆژھەڵاتی ناوەڕاست، یەکێک لە رێوشوێنەکان بریتییە لە کۆکردنەوەی زانیاری ھەواڵگریی لەرێگەی درۆن و کامێرای چاودێرییەوە و یەکێکی دیکە  لە رێوشوێنەکان بریتییە لە توندکردنەوەی رێوشوێنەکانی چونە ناو بنکە سەربازییەکان. لە دوای سەرهەڵدانی گرژییەکانی نێوان سوپای ئیسرائیل و هێزەکانی سەر بە بزوتنەوەی حەماس لە رۆژی 7ی مانگی (تشرینی یەکەم/10) گروپە چەکدارییەکانی عێراق چەندین هێرشی ئاسمانیان ئاڕاستەی بنکەی سەربازی هێزەکانی ئەمریکا کردوە.

هاوڵاتی محه‌مه‌د شیاع سودانی، سه‌رۆك وه‌زیرانی عێراق رایگه‌یاند، ناردنی 700 ملیار دیناره‌كه‌ بۆ پاره‌ی موچه‌ی فه‌رمانبه‌رانی هه‌رێمی كوردستان تا كۆتایی ئه‌مساڵ به‌رده‌وام و به‌م نزیكانه‌ گوژمه‌یه‌كی دیكه‌ ره‌وانه‌ی هه‌ولێر ده‌كرێت. محەمەد شیاع سوودانی سەرۆكوەزیرانی عێراق، لە كۆنفرانسێكی رۆژنامەوانیدا  رایگەیاند " هەر سێ 700 ملیار دینارەكە لە كاتی خۆی رەوانە دەكرێت و تا كۆتایی ئەمساڵ بەردەوام دەبێت، دوای سەری ساڵ لەگەڵ هەرێم حسابات دەكرێت، كە چەند پارەی بۆ ڕەوانە كراوە و پاشان كۆدەكرێتەوە".   دەشڵێت "بەپێی رێككەوتنمان لەگەڵ هەرێم دەبێت سێ ٧٠٠ ملیاری بۆ دابەشكردنی مووچە بنێرین و دواتر بەپێی یاسای بودجە پشكی هەرێم دەنێرین". سودانی باسی له‌وه‌شكرد، به‌م نزیكانه‌ شاندی حكومه‌تی فیدڕاڵی و حكومه‌تی هه‌رێم په‌یوه‌ست به‌ پرسی موچه‌ی فه‌رمانبه‌رانی هه‌رێم كۆده‌بنه‌وه‌ و له‌مانگی 12ی ئه‌مساڵیشدا پاكتاوی دارایی له‌ نێوان هه‌ردولادا ده‌كرێت.  

هاوڵاتی لە پەیوەندییەکی تەلەفونیدا دوێنێ وەزیری دەرەوە ئەمریکا داوای لە سەرۆکوەزیرانی عێراق دەکات  بەدوای ئەو كەسانەدا بگەڕێن كە بەرپرسن لە هێرش و هەڕەشەكان لە دژی هێزەكانی ئەمریكا و هاوپەیمانان لە عێراق و سزایان بدەن. هاوکات سوپای ئەمریکا رێوشوێنی نوێ دەگرێتەبەر بۆ پاراستنی ھێزەکانی. لە دوای سەرهەڵدانی گرژییەکانی نێوان سوپای ئیسرائیل و هێزەکانی سەر بە بزوتنەوەی حەماس لە رۆژی 7ی مانگی (تشرینی یەکەم/10) گروپە چەکدارییەکانی عێراق چەندین هێرشی ئاسمانیان ئاڕاستەی بنکەی سەربازی هێزەکانی ئەمریکا کردوە تەنها لە عێراق و هەرێم  حەوت جار هێرشی ئاسمانی کراوەتە سەر بنکەی هێزەکانی ئەمریکا. وەزارەتی دەرەوەی ئەمریكا ئاماژەی بەوەشكرد لەو پەیوەندییە تەلەفونییەدا، بلینكن لە ڕۆژی دووشەممەدا پێشوازی لە ئیدانەكردنی هێرشەكانی سەر هێزەكانی ئەمریكا لەلایەن بەغداوە كردووە. لەم پەیوەندەدا ئاژانسی هەواڵی ڕۆیتەرز بڵاویکردەوە  سوپای ئەمریکا رێوشوێنی نوێ دەگرێتەبەر بۆ پاراستنی ھێزەکانی لە رۆژھەڵاتی ناوەڕاست، یەکێک لە رێوشوێنەکان بریتییە لە کۆکردنەوەی زانیاری ھەواڵگریی لەرێگەی درۆن و کامێرای چاودێرییەوە. ئاژانسی رۆیتەرز رایگەیاند، رێوشوێنە نوێیەکان دوای زیادبوونی مەترسییەکان دێن لەبارەی ھێرشەکانی سەر ھێزەکانی ئەمریکا لە رۆژھەڵاتی ناوەڕاست، یەکێک لە رێوشوێنەکان بریتییە لە توندکردنەوەی رێوشوێنەکانی چونە ناو بنکە سەربازییەکان. ئاماژەی بۆ ئەوەشکرد، رێوشوێنێکی دیکە بریتییە لە کۆکردنەوەی زانیاری ھەواڵگریی لەرێگەی درۆن و کامێرای چاودێرییەوە.

هاوڵاتی له‌پارێزگاى هەڵەبجەو لەکاتی دەستگیرکردنیدا، تۆمەتبارێک چەند پۆلیسێک بەفیشەک برینداردەکات، ڕاگەیاندنی پۆلیسی پارێزگاكه‌ش زانیاریى زیاتر له‌وباره‌یه‌وه‌ ئاشكراده‌كات. بەشی ڕاگەیاندن‌و پەیوەندیه‌كانى پۆلیسی هەڵەبجە ئاشكرایكردوه‌، ئەمڕۆ سێ مەفرەزەی هاوبەشی بنکەی پۆلیسی هەڵەبجەو بنکەی پۆلیسی فریاکەوتن، هەوڵی دەستگیرکردنی تۆمەتبارێکیانداوه‌ كه‌ ته‌مه‌نى 38 ساڵه‌و دانیشتوی پارێزگای هەڵەبجەیه‌ لەگەڕەکی شێخ ئیسماعیل کە دوو فەرمانی دەستگیرکردنیشى هەبووە. بە گوێرەی ڕاگەیەندراوەکە لە کاتی دەستگیرکردنیدا رووبەڕووبونەوە رویداوەو  تۆمەتبارەکە بە چەکى جۆرى کڵاشینکۆف تەقەی لە پۆلیس کردووە و بەهۆیەوە دوو پۆلیس بە گولـلە بریندار بوون و تۆمەتبارەکە دواتر لەلایەن هێزەکانى پۆلیسەوە دەستگیرکرا و بە بڕیارى دادوەر بەندکراوە و دەست بەسەر چەکەکەشیدا گیراوە. سەبارەت بە هۆکاری دەستگیرکردنی ئەو تۆمەتبارە پۆلیسی هەڵەبجە ده‌ڵێت، "تۆمەتبار لەدادگای کەتنی هەڵەبجەو بەگوێره‌ى مادەی 229 له‌یاسای سزاکان‌و بهتۆمەتی خراپ بەکارهێنانی ئامێری پەیوەندیکردن لەدادگای لێکۆڵینەوەی  هەڵەبجە داواکرابوو، لەکاتی بەجێهێنانی ئەرکەکانی پۆلیس بۆ دەستگیرکردنی، لەلایەن داواكراوه‌وه‌ بەچەکی جۆری کڵاشینکۆف تەقە لەمەفرەزەکانی پۆلیس کراو به‌هۆیه‌وه‌ دوو کارمەندی هێزەکانی پۆلیس بەفیشەک برینداربون. بە گوێرەی ئامارە  ناڕەسمییەکان تەنها ئەمساڵ لە سەرەتای ساڵەوە تا مانگی حەوت  67 کەس لە هەرێمی کوردستان کوژراون؛ کە 55 کەسیان بە چەک بووە.