هاوڵاتی وه‌زیری كار و كاروباری كۆمه‌ڵایه‌تی ئه‌و لێدوانانه‌ ره‌ت ده‌كاته‌وه‌ كه‌ باس له‌ بردنی ژن له‌ چاكسازییه‌كان ده‌كات بۆ كاری له‌شفرۆشی و ده‌ڵێت: بڵاوبونه‌وه‌ی ئه‌م جۆره‌ لێدوانانه‌ زیانه‌ بۆ ئاشتی كۆمه‌ڵایه‌تیی. ئەمڕۆ شەممە13ـی کانوونی یەکەمی 2023، لە کۆنگرەیەکی رۆژنامەوانیدا لە سلێمانی، کوێستان محەممەد وەزیری کار و کاروباری کۆمەڵایەتی، وتی: "بەدواداچوون بۆ رەوشی سزادراوەکانی چاکسازی کراوە، ناهێڵین هیچ کەسێک تۆمەتیان بۆ دروست بکات، ئەمە کارێکە ئاشتی کۆمەڵایەتی تێكدەدات". وەزیری کار وتیشی، لە سایتێک زانیاری نادروست لەبارەی کەیسێک بڵاوکراوەتەوە، دەڵێت "ئەو سایتە سزای یاسایی توندی لەسەرە، کە دەبێتە هۆی تێکدانی ئاشتی کۆمەڵایەتی کۆمەڵگە، بەپێی یاسای سزادانی عێراقی، داوامان لە بەڕێوەبەرەکانمان کرد لەو کەسە و سایتە خۆش بن کە ئەو زانیارییانەیان بڵاوکردووەتەوە". كوێستان محه‌مه‌د ئاماژه‌ی بۆ ئه‌وه‌شكرد كه‌ تۆمه‌تبار ده‌كرێت به‌وه‌ی دژی ئازادی راده‌ربڕینه‌ و ده‌ڵێت: ئه‌مه‌ی كراوه‌ ئازادی راده‌ربڕین نییه‌ به‌ڵكو؛ ته‌شهیره‌ و تۆمه‌ته‌ و تێكدانی ئاشتی كۆمه‌ڵایه‌تییه‌ جه‌ختیش ده‌كاته‌وه‌ له‌وه‌ی گه‌ر ئه‌و قسه‌ و ته‌شهیرانه‌ ئاڕاسته‌ی خۆی بكرانایه‌ وه‌ڵامی نه‌ده‌بو، به‌ڵام به‌ وته‌ی خۆی ئه‌و به‌رپرسیاره‌ له‌ 263 سزادرا و گه‌ر كه‌رامه‌تیان نه‌پارێزێت ئه‌وا ناتوانێت وه‌زیریان بێت. هه‌روه‌ك باسی له‌ لێدوانه‌ كرد كه‌ له‌باره‌ی چاكسازییه‌كانه‌وه‌ بڵاوكرایه‌وه‌ و وتی: له‌ چاوپێكه‌وتنه‌كه‌دا باسی ساڵی 1999 ده‌كرێت و له‌و ساڵه‌دا چاكسازی بونی نه‌بوه‌، جگه‌ له‌وه‌ باس له‌ چاكسازی گه‌وران ده‌كات كه‌ ئه‌و به‌شه‌ ته‌نها تایبه‌ته‌ به‌ پیاو و ژنی تێدا نییه‌. ئەو وەزیرە وتیشی، "هەر کەسێک بیسەلمێنێت ژنێک یان کچێک لەچاکسازی ژنان لەسەردەمی دەسەڵاتی من، بۆ کاری بەدڕەوشتی‌و لەشفرۆشی برابێتە دەرەوە، من بەبەر چاوی ئێوەوە دەستلەکاردەکێشمەوە". هەروەها باسی لەوەشکرد، بەهۆی بڵاوبونەوەی ئەو تۆمەتانەوە فشارێکی زۆر لەسەر چاکسازی ژنانە لە لایەن سزادراوان و خێزانەکانیانەوە هاوکات کارمەندانی چاکسازی هەڕەشەی بایکۆت کردن و مان گرتن دەکەن.

هاوڵاتی پۆلیسی پارێزگای كەركوك زانیاری لەسەر هەوڵی تیرۆركردنی یەكێك لە كاندیدە دەرچووەكانی كەركوك  دەکات و دەڵێت راست نیە وئۆتۆمبێلەكە هی هاوڕێیەكى بووەو كەسیشی تیا نەبووە به‌گوێره‌ى ڕونکردنەوەیەکى فەرماندەیی پۆلیسی کەرکوک ئاماژه‌ به‌وه‌كراوه‌، لەهەندێک پێگەی سۆشیال میدیا هەواڵێک بڵاوکراوەتەوە کە هەوڵی تیرۆرکردنی یەکێک لەکاندیدە دەرچوەکانی ئەنجومەنی پارێزگای کەرکوک دراوە کە ئەو هەواڵە ڕاست نییە. ده‌شڵێت، "ئەو ئۆتۆمبێلەی گولەی بەرکەوتون، هی یەکێک لەهاوڕێکانی ئەو کاندیدەیەو کەسیش لەناو ئۆتۆمبێلەکە نەبوە". هاوکات داواش لە میدیاكان و تۆڕە كۆمەڵایەتییەكان دەكات خۆیان بە دوور بگرن لەو جۆرە هەواڵە ناڕاستانە. ئەم ڕونکردنەوەیه‌ى پۆلیسی کەرکوک دوای ئەوەدێت د. ئەحمەد کەرکوکی کاندیدی دەرچوی یەکێتی بۆ ئەنجومەنی پارێزگای کەرکوک، شه‌وى ڕابردوو ڕایگەیاندبوو، هەوڵی تیرۆرکردنى دراوە.

هاوڵاتی وه‌زاره‌تی به‌رگری توركیا رایگه‌یاند؛ ژماره‌ی سه‌ربازه‌ كوژراوه‌كانی سوپای توركیا له‌ هه‌رێمی كوردستان بۆ شه‌ش سه‌رباز به‌رزبوه‌ته‌وه‌. دوێنێ هه‌ینی، وه‌زاره‌تی به‌رگری توركیا كوژرانی سێ سه‌رباز و برینداربونی چوار سه‌ربازی دیكه‌ی سوپاكه‌ی له‌ هه‌رێمی كوردستان و له‌ ناوچه‌ی ئۆپه‌راسیۆنی چنگ-قوفڵ راگه‌یاند، بەرەبەیانی ئەمڕۆ شەممەش ، وەزارەتی بەرگریی تورکیا راگەیێندراوێکی دیکەی بڵاوکردەوە و رایگەیاند، سێ لە چوار سەربازە بریندارەکانیش گیانیان لەدەستداوە و بەمەش ژمارەی سەربازە کوژراوەکانی گەیشتە شەش سەرباز.   وەزارەتی بەرگریی تورکیا، وێنە و ناسنامەی سەربازە کوژراوەکانی بڵاوکردەوە کە بەمشێوەیەیە: رەمەزان گونای، محەممەد سەرینکان، ئیسماعیل یازیجی، چاغاتای ئەرەنئۆغڵو، یاسین کاراجا و ئێمرە تاشکین؛ هەروەها سەربازێکیش بریندارە و لە چاودێریی چڕی نەخۆشخانەی سەربازی لە ئەنقەرە چارەسەر وەردەگرێت.  

هاوڵاتی ئەنجومەنی ئاسایشی سەر بە نەتەوەیەکگرتوەکان دەستپێشەخری زیادکردنی هاوکارییە مرۆییەکانی غەززەی پەسەندکرد، هەروەها داوا دەکەن هەنگاوی بەپەلە بۆ هێورکردنەوەی دۆخ و هەڵوێستە جەنگییەکان لە کەرتی غەززە بگیرێتە بەر. ئەمڕۆهەینی، 22-12-2023، پانزە ئەندامەکەی ئەنجوومەنی ئاسایشی نەتەوە یەکگرتووەکان کۆبوونەوە و بە پەسندکردنی پڕۆژەیاسایەک، بڕیاردرا بۆ ناردنی هاوکاریی زیاتر بۆ غەززە. پڕۆژەیاساکە دەنگی 13 ئەندامی بەدەستهێنا، ئەمریکا و رووسیا دەنگیان بە پڕۆژەیاساکە نەدا، بەڵام ڤیتۆشیان نەکرد.  ئەنجومەنی ئاسایش داوا دەکات ھەنگاوی بەپەلە بنرێت بۆ گەرەنتیکردنی گەیشتنی ھاوکاریی مرۆیی بە شێوەیەکی سەلامەت و بەبێ گرفت بۆ کەرتی غەززە. ھەر بەپێی پڕۆژەبڕیارەکە ئەنجومەنی ئاسایش، داوا لە سکرتێری گشتیی رێکخراوەکە دەکات، رێکخەرێک بۆ کاروباری مرۆیی و ئاوەدانکردنەوە دابمەزرێت، لەپێناو پەلەکردن لە گەیاندنی ھاوکاریی مرۆیی بە مەدەنییەکانی کەرتی غەززە. بڕیاری ناردنی هاوکاریی زیاتر لەکاتێکدایە، رۆژی پێنجشەممە 21ـی کانوونی یەکەمی 2023، رێکخراوی پۆلێنەکانی قۆناخی ئاسایشی خۆراک راپۆرتێکی بڵاوکردەوە کە لەلایەن رێکخراوی نەتەوە یەکگرتووەکانەوە نێوەڕۆکەکەی پشڕاستکراوەتەوە و تێیدا هاتووە، لەو کاتەوەی جەنگی نێوان حەماس و ئیسرائیل دەستیپێکردووە، دۆخی مرۆیی کەرتەکە بەردەوام بەرەو خراپی دەچێت.  لە راپۆرتەکەدا هاتووە، "ئەو خۆراک، ئاو و پێداویستییە پزیشکیانەی لە میسرەوە دەگەیێندرێنە غەززە 10٪ـی پێداویستییەکانی کەرتەکە پڕدەکەنەوە". ئاماژە بەوەش کراوە، 577 هەزار کەس رووبەڕووی "قەیرانی برسێتی کارەساتبار" بوونەتەوە و بەدەست نەبوونی خۆراک و ئاوەوە دەناڵێنن.

هاوڵاتی بەرپرسێکی باڵای پارتی دیموکراتی کوردستان لە کەرکوک،  کەمال کەرکوکی بەرپرسی ئەنجومەنی سەرکردایەتی کەرکوک - گەرمیانی پارتی بە هۆکاری تێکدانی یەکڕیزی کورد و دروست نەبوونی یەک لیستی لەو پارێزگایە تۆمەتبار دەکات. فەهمی فایەق، کارگێڕی لقی کەرکوکی پارتی، بە دەنگی ئەمەریکای ڕاگەیاند، بەرپرسی لقی کەرکوکی پارتی و 10 کارگێڕ لق ئامادەبون بۆ یەک لیستی حزبە کوردییەکان و یەکێتیش نەرمی نواند، 13 حزبی کوردستانیش ئامادەیی خۆیان بۆ یەک لیستی نیشاندا، گەر لیستەکە یەکێتی و پارتی پێکەوە تێدا بێت. ئاماژەی بەوەشکرد، بەڵام کەمال کەرکوکی حەزی بە یەک لیستی نەبو، گوایە یەکێتی 16 ی ئۆکتۆبەری ئەنجامداوە و دەنگ ناهێنێت، بە هەڵە خوێندنەوەی بۆ ئەنجامی هەڵبژاردنی ئەنجومەنی پارێزگاکان کرد. فەهمی فایەق لە ئەنجامی دەنگەکانی کورد لە کەرکوک نیگەرانە و دەڵێت، "گەر کورد یەک لیستی هەبووایە، ڕەنگە 9 کورسیمان ببردایەتەوە. فرە لیستی و پەرتەوازەیی هەڵەیەکی گەورەبوو.هەڵەکەش لە کەمال کەرکوکی بوو، ئەگینا یەکێتی نەرمی نواند." فەهمی فایەق ئاماژەی بەوەشکرد، کەمال کەرکوکی دەبوایە لەگەڵ یەکێتی گفتوگۆی بکردایە و دواتر بیگوتایە لەبەر ئەم هۆکارانە ناچینە لیستێکەوە لەگەڵیان، نەک بە بێ گفتوگۆ و دانیشتن یەک لیستی ڕەتبکاتەوە. گوێرەی کارگێڕەکەی پارتی لە کەرکوک، مەکتەبی سیاسی پارتی ئێستا لیژنەیەکی پێکهێناوە بۆ لێکۆڵینەوە لە دەرەنجامەکان و وەرگرتنی سکاڵای"زۆری" کادیرانی. رۆژی 18-12-2023 هەڵبژاردنی ئەنجومەنی پارێزگاكانی عێراق بەڕێوەچوو، تێكڕای ژمارەی كورسییەكانی ئەنجوومەنی پارێزگاكان لەو 15 پارێزگایەی هەڵبژاردنی تێدا كرا 285 كورسییە؛ 75 كورسی كۆتای ژنن، 10 كۆتای پێكهاتەكانی كریستیان، كوردی شەبەك، كوردی ئێزدی، كوردی فەیلی و سائیبەی مەندایین.  

هاوڵاتی هێزەکانی سوریای دیموکرات “هه‌سه‌ده‌” ده‌ستگیركردنی تۆڕێکی سیخوڕییان له‌ شاری مه‌نبیج راگه‌یاند کە پێکهاتبوون لە چوار کەس و کاریان بۆ هەواڵگری تورکیا ده‌كرد. ئەمڕۆ هەینی “هه‌سه‌ده‌” لە راگه‌یه‌ندراوێكدا ئاماژه‌ی به‌وه‌كردووه‌، تۆڕێکی سیخوڕیان ده‌ستگیركردووه‌ کە پێکهاتبوون لە چوار کەس و کار بۆ هەواڵگری تورکیا كردووه‌ هه‌روه‌ها به‌شداربوونه‌ لە كرده‌ی بە ئامانجگرتنی ئەندامی سەرکردایەتی ئەنجومەنی سەربازی یه‌كینه‌كانی پاراستنی ژنان و هاوڕێکانی لە 15ی ئەیلول. ناوەندی میدیایی هه‌سه‌ده‌ ئه‌وه‌شی خستووه‌ته‌ڕووده‌ستگیركراوه‌كان دانیان بەوەدا ناوە کە بە شێوەیەکی ڕێکخراو و بە پشتبەستن بە ڕێنماییەکانی هەواڵگری تورکیا دەستیان له‌م كرده‌یه‌دا هه‌بووه‌ و دەشڵێت،  دواتر دانپێدانانی ئه‌م تۆڕه‌ سیخوڕه‌ لە ڤیدیۆیەکدا بڵاودەکاتەوە.

هاوڵاتی بەرێوەبەرایەتی ئاسایشی هەولێر رایگەیاند، لە ماوەی مانگێکدا 15 کەسیان بە تۆمەتی بازرگانیکردن بە ماددەی هۆشبەر دەستگیرکردوە، هەروەها لە کاتی دەستگیرکردنیان دەست بەسەر ماددەی هۆشبەری جۆراوجۆردا گیراوە. بەرێوەبەرایەتی ئاسایشی هەولێر ئەمڕۆ هەینی، لە راگەیەنراوێکدا بڵاویکردەوە، دوای ئەنجامدانی بەدواداچون  توانیان لەماوەی یەک مانگدا 15 کەس دەستگیر بکەن بەتۆمەتی بازرگانی کردن بە ماددە هۆشبەرەکان. دەشڵێت، لە کاتی دەستگیرکردنی ئەو کەسانە، دەستیان بەسەر بڕێک مادەی هۆشبەردا گرتووە لە جۆری کریستاڵ، هیرۆین، تلیاک، حەشیش و حەبی ترامادۆڵ. ئەوە جگە لە چەند پارچە چەکێکی بێ مۆڵەت و کەلوپەلی پێوانەکردن و کێشانی مادەی هۆشبەر. لە ڕوداوێکی هاوشێوەدا لە رۆژی 19ی ئەم مانگەش دەزگای ئاسایشی هەرێم رایگه‌یاند، بەڕێوەبەرایەتی نەهێشتنی ماددە هۆشبەرەکانی دەزگای ئاسایش بە فەرمانی دادوەری لێکۆڵینەوە، دوای روبەڕوبونەوە دو بازرگانی ماددەی هۆشبەر بە برینداری دەستگیركرد.

هاوڵاتی بەرێوەبەرایەتی پۆلیسی راپەڕین رایگەیاند، بەهۆی کێشەیەکی کۆمەڵایەتییەوە لە ناحیەی چوارقوڕنە شەڕ لە نێوان دو لایەندا دروستبوە و لە ئەنجامدا کەسێک کوژراوە و یەکێکی دیکە برینداربوە، دوای ئەوەی بریندارەکەش رەوانەی نەخۆشخانە دەکرێت، بەهۆی سەختی برینەکەیەوە گیانی لەدەستداوە. بەرێوەبەرایەتی پۆلیسی راپەڕین لە راگەیەنراوێکدا بڵاویکردەوە، دوانیوەڕۆی ئەمڕۆ هێزەکانمان لە بنکەی پۆلیسی بیتوێن لە ناحیەی چوارقوڕنە ئاگادار کرانەوە لە ڕوداوێکی تەقە کردن کە بەهۆی کێشەی کۆمەڵایەتیەوە لە نێوان دو لایەنەوە ڕویداوە و بەو هۆیە کەسێك دەست بەجێ گیانی لە دەست داوە. لە رووداوەکەدا، کەسێکی دیکەش بریندار بووە و دوای گەیاندنی بۆ نەخۆشخانە و وەرگرتنی چارەسەری پێویست، بەهۆی سەختیی برینەکەیەوە لە خۆشخانە گیانی لەدەستدا. ئەوەشخراوەتەڕو هەردوو کوژراوەکە هەریەکەیان لە لایەنێکی رووداوەکەوەن. دوای ئەنجامدانی پشکنینی توێکاری لە دادپزیشکی رانیە، تەرمەکان رادەستی کەسوکاریان کرانەوە و بەمەبەستی زانینی هۆکاری رووداوەکە لێکۆڵینەوە دەستی پێکردووە.

هاوڵاتی دەزگای ئاسایشی نیشتمانی عێراق رایگەیاند، دوای ئەوەی لە گرتە ڤیدیۆییەکدا دەرکەوت چەند کەسێک وێنەی کەسایەتی پەیوەندیدار بە حزبی بەعسیان لە بەردەم بارەگای پارێزگای کەرکوک بەرزکردوەتەوە، سەرجەمیان دەستگیرکران و دۆسیەکانیان رەوانەی دادگا کرا و بە 10 ساڵ زیندانی کردن سزا دران. دەزگای ئاسایشی نیشتمانیی عێراق لە ڕاگەیاندراوێکدا بڵاوی کردەوە، بە پشتبەستن بە یاسای قەدەغەکردنی چالاکی حزبی بەعسی ژمارە ٣٢ـی ساڵی ٢٠١٦، کە دەستگیرکردنی لایەنگران و ئەنجامدەرانی ئەو چالاکییانە دەگرێتەوە، لە پارێزگای کەرکوک ١٠ کەس دەستگیر کران. باس لەوەشکراوە، لەسەر ئەو دۆسییەیە دادگای تاوانەکانی کەرکووک سزای ١٠ ساڵ زیندانییکردنی بۆ ئەو ١٠ کەسە دەرکردووە، ئەوەش دوای ئەوەی ئاشکرابوو، کە ئەو تۆمەتبارانە تۆڕێکن و لە ڕێگەی سۆشیاڵ میدیاوە کاری بڵاوکردنەوەی چالاکی حزبی بەعسی قەدەغکراو دەکەن. دوای ئەوەی ئەوەی ئەنجامە بەراییەکانی هەڵبژاردنی پارێزگاکانی عێراق ئەنجامدرا و هاوڵاتییانی لایەنە جیاوازەکان بۆ ئاهەنگ گێڕان چوونە سەر شەقامەکان لە گرتەیەکی ڤیدیۆیدا کە لە تۆڕە کۆمەڵایەتییەکان بڵاوبۆوە ژمارەیەک لایەنگری سەدام حوسێن وێنەی بەرزدەکەنەوەو هۆتاف دەڵێن، ئەویش کاردانەوەی گەورەی بەدواداهات و هەرز و لیژنەیەکی لێکۆڵینەوەیان لەسەر دروستکرا و لەلایەن هێزەکانی ئاسایشی نیشتیمانیەوە دەستگیرکران.

هاوڵاتی  پرۆسەی جیاکردنەوەی دەنگدانی تایبەت لە کەرکوک کۆتایهات و دوای ژماردنی دەنگی زیاتر لە 100 سندوق، یەکێتی توانی زیاتر لە چوار هەزار دەنگ بەدەستبهێنیت. کەمێک لەمەوبەر پرۆسەی جیاکردنەوەی دەنگدانی تایبەت و ژماردنی دەنگەکان بەدەست لە کەرکوک کۆتایهات کە تێیدا ژماردن بۆ 112 سندوق ئەنجامدران. بەپێی ئەنجامە نافەرمییەکان، دەنگی لایەنەکان بەم شیوەیەیە دوای ژماردنی ئەو سندوقانە: یەکێتی: 4390 دەنگ پارتی: 1374 دەنگ نەوەی نوێ: 328 دەنگ هاوپەیمانی عەرەبی: 2247 دەنگ بەرەی تورکمانی: 1888 دەنگ ھاوپەیمانی کەرکوکنا: 998 دەنگ ھاوپەیمانی قیادە: 1083 دەنگ ھاوپەیمانی عروبە: 1153 دەنگ

هاوڵاتی  پرۆسەی جیاکردنەوەی دەنگدانی تایبەت لە دهۆک کۆتایی هات، پارتی پشکی شێری بەدەستهێنا و بەزیاتر لە سێ هەزار دەنگ لە پێش یەکێتییەوەیە. خالد عەباس، بەرپرسی لقی دهۆکی ئۆفیسی باڵای سەربەخۆی هەڵبژاردنەکان بە هاوڵاتی راگەیاند، "دوێنێ دەستمانکرد بە جیاکرنەوەی دەنگەکان بۆ 28 سندوق کە نزیکەی 10 هەزار دەنگ لەو سندوقانەدا هەبوون، دەوروبەری کاتژمێر 12ی پێش نیوەرۆی ئەمرۆ پرۆسەکە کۆتایی هات." خالد عەباس وتیشی، "پرۆسەکە بەشێوەیەکی زۆر رێک و پێک ئەنجامدراوە و هەموو دەرئەنجامەکان بەشەفافانە ئاشکراکراون و دواتر بۆ بەغدای دەنێرین." دوای جیاکردنەوەی دەنگەگان پارتی، پێنج هەزار و 758 دەنگی بەدەست هێنا و یەکێتی نیشتیمانی دوو هەزار و 424ی دەنگی کۆکردووتەوە.  

هاوڵاتی  جیاکردنەوەی دەنگەکانی دەنگدانی تایبەت بەردەوامە و لە دووەمی رۆژی ژماردنی دەنگەکانی پارێزگای کەرکوک بەدەست، تا ئیستا دەنگی 74 سندوقی دەنگدان جیاکراوەتەوە.  لەو 74 سندوقە دەنگی یەکێتی زۆرترینە و دواتریش، دەنگی پارتی دێت. تا ئێستا دەنگی جیاکراوەی 74 سندوقی دەنگدانی اتیبەت بەمجۆرەیە: یەكێتی: 2846 دەنگ پارتی: 1164 دەنگ هاوپەیمانی عەرەبی: 1100 دەنگ هاوپەیمانی عروبە: 750 دەنگ نەوەی نوێ: 145 دەنگ  

هاوڵاتی  بەرێوبەرایەتی کەشناسی هەرێم رایگەیاند، ئەمڕۆ زۆربەی کاتەکان لە ناوچەکانی هەرێمی کوردستان باران بارین بەردەوام دەبێت و سەبینێش ئاسمان هەوری باراناوی دەبێت و لە هەندێ ناوچە لێزمە باران دەبارێت.  کەشانسی هەرێم پێشیبینی کەشوهەوای بۆ ٤٨ کاتژمیری داهاتوو بڵاوکردەوە و دەڵێت، ئەمڕۆ هەیینی ئاسمان بە گشتی هەوری تەواو دەبێت و زۆربەی کاتەکان باران دەبارێت، "ەندێک کات لە ناوچەکانی ناوەراست و باشووری هەرێم باران بارین بە شێوەی نمە بارانی پچڕ پچڕ دەبێت. هەروەها لە ناوچە شاخاوییە سنووریەکان پێشبینی بەفر بارین دەکرێت." هاوکات کەشناسی هەرێم پێشبینی خۆی بۆ رۆژی شەممە خستووەتەڕوو و دەڵێت، ئاسمان لە زۆربەی کات هەوای باراناوی دەبێت و هەندێک جار لە سنوری پارێزگای دهۆک و ناوچە شاخاوییەکانی هەولێر لێزمە باران دروست دەبێت، لە ناوچە شاخاوییە بەرزەکانیش بەفر دەبارێت.

هاوڵاتی  پارتی یەکسانی و دیموکراسی گەلان (دەم پارتی) داوای لە لەیلا زانا کردووە خۆی کاندید بکات بۆ سەرۆکشارەوانی ئامەد و ئەستەنبوڵ بۆ ساڵی داهاتوو. میدیای ناوخۆی باکوری کوردستان بڵاویکردووەتەوە کە دەم پارتی پێشنیاری ئەوەی بۆ لەیلا زانا کردووە کە خۆی کاندید بکات بۆ هاوسەرۆکی شاری ئامەد یان سەرۆکشارەوانی ئەستەنبوڵ، بەڵام هێشتا لەیلا زانا وەڵامی داواکارییەکەی نەداوەتەوە.  بەپێی زانیارییەکان، بەرپرسانی دەم پارتی لە چەند رۆژی داهاتوودا لەگەڵ لەیلا زانا کۆدەبنەوە تاکو بزانن بڕیاری چی دەدات لەسەر پێشنیارەکە. بڕیارە هەڵبژاردنی شارەوانییەکانی تورکیا لە مانگی ئایاری 2024 بەڕێوەبچێت. لەیلا زانا گەورە سیاسەتمەداری کورد لە باکوری کوردستان لە ئێستادا هیچ پۆستێکی نییە و بەوە ناسراوە کە لە پەرلەمانی تورکیا بەرگری لە نەتەوەی کورد کردووە هەربۆیە لە پەرلەمانتاری دووخراوەتەوە.  لەساڵی 1991 لەللا زانا لەسەر لیستی پارتی سۆسیال دیموکراسی گەلان SHP لە  ئامەد بووە پەرلەمانتار و لەکاتی سوێندخواردندا بە کوردی سڵاوی کرد بۆیە رووبەروی رەخنەی توند بوویەوە. دواتر لە ساڵی 1994 بەهۆی وتارێکییەوە پارێزبەندی لێ سەندرایەوە و بەتۆمەتی ئەندامێتی و بانگەشەکردن بۆ پەکەکە بە 15 ساڵ زیندانی سزادرا، بەڵام دواتر بەهۆی فشاری دادگای باڵای مافەکانی مرۆڤی یەکێتی ئەوروپا دوای 10 ساڵ زیندانی ئازادکرا. لە ساڵی 2015، لەیلا زانا لەکاتی سوێندخواردنی وەک پەرلەمانتاری ناوچەی ئاگری لە پەرلەمانی تورکیا بە کوردی وتی، "بژی ئاشتی" و بەپێچەوانەی پرۆتۆکۆلی سوێندخواردنی پەرلەمانی تورکیا سوێندی یاسایی خوارد بۆیە لە پەرلەمانتاری دوورخرایەوە.  لەیلا زانا یەکەم ژنە پەرلەمانتاری کورد بوو لە پەرلەمانی تورکیا و دوای زیندانیکردنی لەساڵی 1994، خەڵاتی ساخارۆڤی بۆ ئاشتی پێبەخشرا بەڵام نەیتوانی خەڵاتەکەی وەربگرێت تا کاتی ئازادبوونی لەساڵی 2004.

هاوڵاتی  بنیامین ناتانیاهۆ، سەرۆکوەزیرانی ئیسرائیل وەڵامی حەماس دەداتەوە و دەڵێت، جەنگ بەردەوام دەبێت هەتا سەردەکەون و چەکدارانی حەماس "یان دەبێت خۆتان بەدەستەوە بدەن یان دەبێت بمرن." رۆژی پێنجشەممە 21ی کانونی یەکەمی 2023 تاهیر ئەلنونۆ، راوێژکاری سەرۆکی حەماس بە ئاژانسی رۆیتەرزی راگەیاند، حەماس "ئامادە نییە دانوستان لەسەر ئازادکردنی بارمتەی زیاتر بکات هەتا ئیسرائیل کردە دوژمنکارییەکانی نەوەستێنێت بۆ سەر غەززە و رێ بە هاوکاری زیاتری مرۆیی نەدات." راوێژکارەکەی سەرۆکی حەماس باسی لەوەش کردووە، کە "پرسی بارمتەکان دەبێت دوای ئەو دوو شتە باسیان لێوە بکرێت، ناتوانین دانوستان لەسەر شتانێک بکەین لەکاتێکدا ئیسرائیل لە کردە دوژمنکارییەکانی بەردەوامە، گفتوگۆکان دەبێت دوای راگرتنی شەڕ دەستپێبکەن." لە وەڵامی ئەمەدا، سەرۆکوەزیرانی ئیسرائیل گرتە ڤیدیۆیەکی لە تۆڕی کۆمەڵایەتی ئێکس بڵاوکردەوە کە تێیدا دەڵێت، "ئێمە جەنگ دەکەین تا سەرکەوتن، جەنگ ناوەستێنین هەتا هەموو ئامانجەکانی نەپێکێت کە ئەوانیش لەناوبردنی حەماس و گەڕانەوەی هەموو بارمتەکانە." بنامین ناتانیاهۆ وتیشی چەکدارانی حەماس هیچ چارەیەکی تریان نییە جگە لەوەی کە دەبێت "یان خۆتان بەدەستەوە بدەن یان بمرن، چیتر غەززە نابێتە هەڕەشە بۆ سەر ئیسرائیل." ئەمە لەکاتێکدایە کە رۆیتەرز بڵاویکردووتەوە کە ئیسماعیل هەنییە، سەرۆکی حەماس، سەردانی میسری کردووە بۆ دانوستان لەگەڵ نێوەندگیرانی میسری تا ئاگربەستێکی تر ئەنجام بدرێت.  هاوکات گۆڤاری پۆڵەتیکۆی ئەمریکی رایگەیاندووە کە ئەمریکا دەڵێت دانوستانی "زۆر جدی" لەسەر ئاگربەستێکی نوێ لە غەززە لەئانوساتدایە.