هاوڵاتی لەسەر داوای ئەندامێکی ئەنجومەنی نوێنەرانی عێراق 19 کەناڵی لەشفرۆشی لە تێلیگرام داخران کە خەڵکی هەرێمی کوردستان و عێراقی تێدا بووە. ئەمڕۆ هەینی 28ی حوزەیرانی 2024، سۆران عومەر، ئەندامی ئەنجومەنی نوێنەرانی عێراق بڵاویکردەوە، لەسەر داواکارییەکی ئەو ئەندام پەرلەمانە کە ئاڕاستەی وەزیری پەیوەندیی عێراقی کردووە 19 کەناڵی لەشفرۆشی لە تێلیگرام داخران کە لە عێراق و هەرێمی کوردستان سەرچاوەی لەشفرۆشی بوون. وەک ئەو ئەندام پەرلەمانی ئاماژەی پێکردووە، لەو کەناڵانە وێنەی هەزاران ژنی شارەکانی کورد و عەرەبی تێدابوو بەکاردەهێنران بۆ بانگەشەی لەشفرۆشی.
هاوڵاتی بەهۆی بۆردومانی تورکیاوە گوندێک لە سنوری ئامێدی چۆڵکرا و ئاگر لە گوندێکی تریش کەوتەوە، ھێزێکی زۆری سوپای تورکیاش لە ناوچەکە بڵاوەیانپێکراوە. دوانیوەڕۆی ئەمڕۆ هەینی، 28ی حوزەیرانی 2024، جارێکی دیکە فڕۆکە جەنگییەکانی سوپای تورکیا، زنجیرە چیای مەتینایان لە سنوور ئامێدی بۆردومانکرد و بەھۆیەوە، بناری چیای گوندی دەرگەلێ چۆڵکرا و ئاگر لە گوندی نھێلێیش کەوتەوە. لە چوارچێوەی لەشکرکێشییەکانی تورکیا بۆ سەر ئامێدی، ھێزێکی زۆری سوپای تورکیا لە سنووری زنجیرە چیای مەتینا بڵاوەیپێکراوە. جێگای ئاماژەیە، ئەو گوندەی چۆڵکراوە، چوار خێزانی تێدابووە و لەئێستادا روویان لە گوندەکانی دیکەی ناوچەکە کردووە.
هاوڵاتی ئەمڕۆ هەینی 28ی حوزەیرانی 2024، لە قەزای كۆیە باوكێک بە هەڵە بە ئۆتۆمبێلەکەی بەسەر کچە سێ ساڵانەکەی دا دەڕوات، بەهۆیەوە کچەکە گیان لە دەست دەدات. جێگای ئاماژەیە، روەداوەکە لە گەڕەکی شەوگێڕی سەنتەری قەزای کۆیە روویداوە. لە کاتێکدا باوکەکە بە ئۆتۆمبێلەکەی گەڕاوەتەوە دواوە و ئاگاداری ئەوە نەبووە، کە کچەکەی لە دواوەی ئۆتۆمبێلەکەیەتی. لەم بارەیەوە هاوکار عەلی گوتەبێژی تەندروستی كۆیە، ئەمڕۆ هەینی بە تۆڕی میدیایی رووداوی راگەیاندووە، "منداڵەكە تاوەكو گەیێندراوەتە نەخۆشخانە گیانی لەدەستداوە". كچەکە ناوی بریا سۆران باوەدینە و تەمەنی سێ ساڵە، تەرمەكەی براوەتە پزیشكیی دادی كۆیە.
هاوڵاتی لەسەر سکاڵاکەی وەزیری کۆچ و کۆچبەرانی عێراق، کە لە دژی هەرێم تۆماری کردووە یەکشەممەی داهاتوو دادگەی فیدراڵی بڕیار دەدات. یەکشەممەى داهاتوو 30ى حوزەیران دادگاى فيدراڵیى عێراق دانیشتنێکى دیکە لەبارەى ئەو سکاڵایەوە دەکات کە ئیڤان فایەق، وەزیرى کۆچ و کۆچبەران تۆماریکردووە، لەسەر هەریەکە لە سەرۆکی هەرێمى کوردستان و سەرۆکوەزیران و وەزیری ناوخۆ. ئیڤان فایەق، داوایکردووە سکاڵا لێکراوان پەیوەست بکرێن بە داخستنى کەمپى ئاوارەکان و پێکهێنانى لیژنەیەک لە نێوان بەغدا و هەولێر بۆ جێبەجێکردنى بڕیارى ژمارە 24007ى ئەنجوومەنى وەزیرانى عێراق لە بارەى داخستنى کەمپى ئاوارەکان. لەم بارەیەشەوە، عەلى جیهانگیر، وتەبێژى وەزارەتى کۆچ و کۆچبەران رایگەیاند، دوو بڕیارى ئەنجوومەنى وەزیرانى عێراق هەن بۆ داخستنى کەمپەکان، یەکەمیان 30ى حوزەیرانى دیاریکردبوو، بەڵام بڕیارى دواتر کە تایبەت بوو بە میکانیزمى داخستنیان وادەکەى بۆ 30ى تەممووز درێژکردەوە. سەبارەت بە یەکلایکردنەوەی بڕیارەکەی دادگەی فیدراڵی وتەبێژى وەزارەتى کۆچ و کۆچبەران، دەڵێت، بەگوێرەى ئەوەى پێمانگەیشتووە، ئەو دانیشتنەى دادگەى فیدراڵى لە 30ى حوەزیران یەکلاکەرەوە دەبێت بۆ دۆسیەکە.
هاوڵاتی به‌ڕێوه‌به‌رایه‌تی كه‌شناسی سه‌ر به وه‌زاره‌تی گواستنه‌وه‌ی هه‌رێم رایگه‌یاند كه ئه‌مڕۆ و سبه‌ینێ ئاسمان ساماڵ ده‌بێت له‌گه‌ڵ بوونی تۆزێكی سووك، پله‌كانی گه‌رما به‌رزتر ده‌بێته‌وه. ئەمڕۆ هەینی 28ی حوزەیرانی 2024، بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان کەشوهەوای 48 کاتژمێری داهاتووی بڵاوکردەوە و ئاماژە بەوە دەکات، ئەمڕۆ پلەکانی گەرمی بەرزدەبنەوە. لەبارەی کەشوهەوای ئەمڕۆوە کەشناسیی هەرێم دەڵێت، ''ئاسمان ساماڵ دەبێت لەگەڵ بوونی تۆزێکی کەم بەڵام لە باشووری هەرێم رێژەی تۆزەکە زیاتر دەبێت، هاوکات پلەکانی گەرمی بە شێوەیەکی گشتی کەمێک بەرزتر دەبنەوە بەڕێژەی یەک بۆ دوو پلە بەراورد بە تۆمارکراوەکانی دوێنێ''. سەبارەت بە کەشوهەوای سبەینێ ئاماژەی بەوە کردووە، ''ئاسمان ساماڵ دەبێت لەگەڵ بەردەوام بوونی تۆزێکی کەم بە گشتی لە شارەکانی هەرێم و پلەکانی گەرمیش نزیک دەبنەوە بەراورد بە تۆمارکراوەکانی ئەمڕۆ''. راشیگه‌یاند كه به‌رزترین پله‌كانی گه‌رمای پێشبینیكراو به پله‌ی سیلیزی به‌مشێوه‌یه ده‌بێت: هه‌ولێر : 43 سلێمانی : 40 دهۆك : 39 كه‌ركوك : 44 هه‌ڵه‌بجه : 40 زاخۆ : 40 سۆران : 40 حاجی ئۆمه‌ران : 26 گه‌رمیان : 46
هاوڵاتی سایتی شەفافیەت، داهاتی یەك هەفتەی سلێمانی لە رۆژی 22ی حوزیرانی 2024 تا 28ی حوزەیرانی 2024، بڕی 16 ملیار و 668 ملیۆن و 540 هەزار و 670 دینار بووە. ئەمڕۆ هەینی، 28ی حوزەیرانی 2024، سایتی شەفافیەت بۆ چاودێری و رێكخستنی داهاتە نانەوتییەكانی سلێمانی و هەڵەبجە و هەردوو ئیدارەی راپەڕین و گەرمیان داهاتی یەك هەفتەی راگەیاند، بەشێوەیەك بڕی 16 ملیار و 668 ملیۆن و 540 هەزار و 670 دینار بووە. ئاماژەی بەوەشکردوە، كە 91%ی داهاتەکە بەشێوەی نەختینەیە و 9%ی داهاتەکە بەشێوەی چەکە.
هاوڵاتی وەزیری تەندروستیی حکومەتی هەرێمی کوردستان رایگەیاند، تاوەکو ئێستا دوو حاڵەتی پشتڕاستکراوەی تای خوێنبەربوونیان تۆمارکردووە و یەکێک لە تووشبووەکانیش گیانی لەدەستداوە. ئەمڕۆ هەینی 28ی حوزەیرانی 2024، سامان بەرزنجى وەزیرى تەندروستیى حکومەتى هەرێمى کوردستان رایگەیاند، لە سەرەتاى دەستپێکردنى وەرزى گەرما، زیاتر چاودێری حاڵەتەکانی تای خوێنبەربوون دەکەن. ئەوەشی خستۆتەڕوو، تاوەکو ئێستاش تەنیا دوو حاڵەتى پشتڕاستکراوەیان هەبووە و یەکێکیان گیانیلەدەستداوە. دەشڵێت، بەراورد بە پارێزگاکانى عێراق ژمارەی تووشبووان لە هەرێمى کوردستان زۆر کەمە، لە عێراق ژمارەى تووشبوون و مردن یەکجار زۆرە.
هاوڵاتی وەزارەتی نەوتی عێراق رایدەگەیەنێت، لە مانگى ئایارى رابردوودا وەزارەتى نەوت زیاتر لە 104 ملیۆن بەرمیل نەوتى لە کێڵگەکانى ناوەڕاست و باشوورەوە هەناردە کردووە. ئەمڕۆ پێنجشەممە 27ی حوزەیرانی 2024، وەزارەتی نەوتی عێراق لە راگەیێندراوێکدا ئامارى هەناردەى نەوتى بۆ مانگى ئایارى رابردووى بڵاوکردەوە، لەو مانگەدا 104 ملیۆن و 130 هەزار و 292 بەرمیل نەوت هەناردە کراوە لە کێڵگەکانى ناوەڕاست و باشووری عێراق. بەپێی راگەیێندراوەکەدا وەزارەتی نەوتی عێراق بێت، لە مانگی ئایاردا نەوت لە کێڵگەى گەیارەى موسڵ و کێڵگەکانى کەرکوکەوە هەناردە نەکراوە، بەڵام لە مانگەکانی رابردوودا لەو کێڵگانەوە نەوت هەناردە دەکرا. لە مانگى نیسانى ئەمساڵدا، عێراق 100 ملیۆن و 921 هەزار و 250 بەرمیل نەوتى هەناردە کردووە زیاتر لە یەک ملیۆن بەرمیلی لە کێڵگەى گەیارە و 448 هەزار و 606 بەرمیلى لە کەرکوکەوە هەناردە کراوە.
هاوڵاتی لە نزیک گوندی شاخۆرانی سنووری پارێزگای هەولێر ئێوارەی ئەمڕۆ دەستڕێژی گولـلە لە تاکسییەک کرا و کەسێک کوژرا و کەسێکی دیکەش برینداربوو. بەپێی زانیارییەکانی هاوڵاتی ئێوارەی ئەمڕۆ پێنجشەممە، 27ی حوزەیرانی 2024، لە نزیک گوندی شاخۆرانی سنووری پارێزگای هەولێر دەستڕێژی گولـلە لە ئۆتۆمبێلێکی جۆری تاکسی کراوە شۆفێرەکە کوژراوە و ژنێکیش بریندارە کە سەرنشینی تاکسییەکە بووە و گواستراوەتەوە بۆ نەخۆشخانە. تائێستا هێزە ئەمنییەکانی شاری هەولێر هیچ زانیارییەکیان لەبارەی رووداوەکەوە بڵاونەکردووەتەوە، هاوڵاتی بۆ زانیاری زیاتر چەندجارێک پەیوەندیی بە وتەبێژی پۆلیسی هەولێرەوە کرد، بەڵام پەیوەندییەکەی بەردەست نەبوو.
پۆلیسی سلێمانی: کەسێکمان دەستگیرکرد کە ویستوویەتی ماست و شیرەمەنی ماوەبەسەرچوو بە هاووڵاتیان بفرۆشێت
هاوڵاتی بەڕێوەبەرایەتیی پۆلیسی سلێمانی دەستگیرکردنی تۆمەتبارێکی راگەیاند بە تۆمەتی ئەوەی ویستوویەتی ماست و شیرەمەنی ماوەبەسەرچوو بە هاووڵاتیان بفرۆشێت. ئەمشەو 27ی حوزەیرانی 2024، بەڕێوەبەرایەتیی پۆلیسی سلێمانی رایگەیاند، "لەلایەن لیژنە هاوبەشەكانی قایمقامییەتی قەزای سەیدسادق و بەهاوكاری بنكەی پۆلیسی سەیدسادقی سەر بە بەشی پۆلیسی سەیدسادق تۆمەتبارێك دەستگیركرا و دەستگیرا بەسەر بڕی زیاتر لە سێ هەزار و 500 سەتـڵ ماست و سێ تۆن شیر و زیاتر لە 300 كیلۆگـرام بەرهـەمی شیرەمـەنی ماوە بەسەرچوو خراپبوودا لەناو كارگەیەکی دروستكردنی ماسـتدا لە گونـدی كانی پانكە كە تۆمەتبار ئامادەی كردبوو بەمەبەستی فرۆشتن و ساغكردنەوەی لەناو بازاڕەكاندا". پۆلسی سلێمانی دەڵێت، لەئێستادا تۆمەتبار هـ، س، ف لەدایكبووی 1989 بە بڕیاری دادوەر و بەپێی مادەی 240 لە یاسای سزادانی عێراقی راگیراوە.
هاوڵاتی بەڕێوەبەرایەتیی ئاسایشی رۆژئاوای سلێمانی دەستگیرکردنی 11 تۆمەتباری راگەیاند، بە تۆمەتی گزیکردن لەڕێگەی بیستۆکەوە ئەمڕۆ پێنجشەممە 27ی حوزەیرانی 2024، بەڕێوەبەرایەتیی ئاسایشی سلێمانی لە راگەیێندراوێکدا ئاشکرایکرد، دوای بەدواداچوون و کۆکردنەوەی زانیاری لە سنووری قەزای چەمچەماڵ رۆژی 26ی حوزەیرانی 2024 توانرا 11 تۆمەتبار لەسەر فەرمانی دادوەری لێکۆڵینەوەی ئاسایش دەستگیربکەن. وەک لە راگەیێندراوەکەدا هاتووە، تۆمەتباران بەشێوەی ئۆنلاین ئامێری گزیکردنیان کڕیوە و ویستویانە بۆ تاقیکردنەوەکانی پۆلی 12ی ئامادەیی بەکاریبهێنن، سەرجەمیان لەلایەن هێزەکانی ئاسایش دەستگیرکران. ئاسایشی سلێمانی ئەوەشی خستووەتەڕوو، لەئێستادا تۆمەتباران بەپێی مادەی 240 لە یاسای سزادانی عیراقی راگیراون و لێکۆڵینەوە لە دۆسییەکانیان بەردەوامە.
هاوڵاتی وەزیری بازرگانیی حکومەتی هەرێمی کوردستان رایدەگەیەنێت، تاوەکو ئێستا زیاتر لە 250 هەزار تۆن گەنمی جوتیارانی هەرێمی کوردستان وەرگیراوە. ئەمڕۆ پێنجشەممە 27ی حوزەیرانی 2024، کەمال موسلیم، وەزیری بازرگانی و پیشەسازیی هەرێمی کوردستان لە کۆنفرانسێکی رۆژنامەوانیدا لەبارەی پرۆسەی وەرگرتنی گەنمی جوتیارانەوە رایگەیاند، "تائێستا پرۆسەکە بەردەوامە و بە باشی بەڕێوەدەچێت". بەپێی وتەی وەزیری بازرگانیی هەرێمی کوردستان بێت، 700 هەزار تۆن وەکو پشکی هەرێمی کوردستان بۆ وەرگرتنی گەنمی جووتیاران دیاریکراوە، تاوەکو دوێنێ زیاتر لە 250 هەزار تۆن گەنم لە جوتیاران وەرگیراوە و ئاماژەی بەوەکرد، ''هێشتا ماوەیەکی زۆر ماوە، بۆیە ئەو بڕەی کە بۆمان دیاریکراوە، هەمووی وەردەگرین". لە 6ی حوزەیرانی 2024، لە ناوچەکانی هەرێمی کوردستان پرۆسەی گەنمی جوتیاران دەستیپێکردووە و ماوەی 45 رۆژ بەردەوام دەبێت، بۆ هەر تۆنێک گەنم حکومەتی عێراق 850 هەزار دینار دەداتە جوتیاران.
هاوڵاتی نرخی کارەباى مۆلیدەی پرۆژەکانی نیشتەجێبوون بۆ مانگی حوزەیران دیاریکرا، بریتییە لە 254 دینار بۆ هەر کیلۆواتێک کە بەراورد بە مانگی رابردوو زیادی کردووە. ئەمڕۆ پێنجشەممە، 27ی حوزەیرانی 2024، بەڕێوەبەرایەتیی گشتی کارەبای سلێمانی رایگەیاند، لیژنەی باڵای دیاریکردنی نرخی کارەباى کۆمەڵگەکانی نیشتەجێبوون (ستییەکان) کۆبوونەوەیەکی سازکرد و تیایدا نرخی کیلۆواتی کارەبای موەلیدەی بۆ مانگی حوزەیران دیاریکرد، کە بریتییە لە 254 دینار بۆ هەر کیلۆواتێک. دەشڵێت، بەگوێرەی نرخی گازوایل لە بازاڕ و ئەو توێژینەوەیەی بۆ خەرجی مۆلیدەی ستییەکان ئامادەکراوە، نرخی یەک کیلۆوات بۆ کاتژمێرێک کارەباى موەلیدەى پرۆژەکانی نیشتەجێبوون بۆ مانگی حوزەیران بریتییە لە 254 دینار. ئاماژەی بەوەشکرد، مانگى ئایار نرخى کیلۆواتێک کارەباى مۆلیدەی پرۆژەکانی نیشتەجێبوون 250 دینار بووە. جەختی لەوەشکردەوە، پێویستە سەرجەم پرۆژەکانی نیشتەجێبوونی سنووری پارێزگای سلێمانی پابەندبن بە نرخەکەوە، بە پێچەوانەوە ئەگەر زیاتر لەو نرخە وەربگرن رووبەڕووی رێکاری یاسایی دەکرێنەوە.
هاوڵاتی له وه‌زاره‌تی دارایی و ئابووری هه‌رێم لیستی مووچه‌ی مانگی شه‌شی فه‌رمانبه‌ران و مووچه‌خۆران ئاماده‌كراو ئه‌مڕۆ ره‌وانه‌ی به‌غدا ده‌كرێت. ئەمڕۆ پێنجشەممە، 27ی حوزەیرانی 2024، سەرچاوەیەک لە وەزارەتی دارایی و ئابووری هه‌رێم رایگەیاند، لیستی مووچەی مانگی شەشی فەرمانبەران و مووچه‌خۆرانی هەرێم ئامادەکراوە و هەر ئەمڕۆ رەوانەی بەغدا دەکرێت. دەشڵێت، لیسته‌كه به هه‌ردوو شێوازی كاغه‌زی و سیدی ئاماده‌كراوه و واژووی له‌سه‌ر كراوه بۆ ئه‌وه‌ی ره‌وانه‌ی به‌غدا بكرێت.
هاوڵاتی تەڤگەری ئازادی، پەیامێک ئاراستەی لایەنە سیاسیەکان دەکات و کۆمەڵگە لە زەنگێکی مەترسیدار ئاگادار دەکاتەوە و دەڵێت، پێویستە کوردستانییان و گەلانی عێراق، لەبەرامبەر ئەو داگیرکارییەی سوپای تورکیا بۆ سەر خاکی باشوری کوردستان، بێدەنگ نەبن. ئاماژەی بەوەشکردووە، "ھاتنەناوەوەی سەدان تانک و زرێپۆش و ھەزاران سەربازی سوپای تورکیا، بەبیانوی ھەبوونی گەریلاکانی پارتی کرێکارانی کوردستان، لە رۆژانی 22 و 23 حوزەیران بۆ ناو خاکی ھەرێمی کورستان و عێراق، لە سنوری پارێزگای دھۆک، پێشھاتێکی مەترسییدارە و لە ناوەڕۆکدا پیلانێکە بۆ داگیرکاریی و دەستبەسەرداگرتنی خاکی باشوری کوردستان بەشێوەیەکی ھەمیشەیی". دەقی پەیامەکەی تەڤگەری ئازادی: تەڤگەری ئازادیی لایەنە سیاسییەكان و كۆمەڵگە لە زەنگێكی مەترسییدار ئاگادار دەكاتەوە پەرلەمانتاران، سەۆکی کۆمار و سەرۆکی ئەنجومەنی وەزیرانی عێراقی فیدراڵ، لەبەردەم تاقی کردنەوەیەکی گەورەدان، چۆن وەڵامی ئەو داگیرکاریی و دەست درێژەیەی سوپای تورکیا ئەدەنەوە؟ پێویستە کوردستانییان و گەلانی عێراق، لەبەرامبەر ئەو داگیرکارییەی سوپای تورکیا بۆ سەر خاکی باشوری کوردستان، بێدەنگ نەبن و خاوەن ھەڵوێستی نیشتمانیی و ئەخلاقیی بن. لەمێژووی گەلانی عێراقدا، نەبووە داگیرکاریی قبوڵ بکرێت، ھاتنەناوەوەی سەدان تانک و زرێپۆش و ھەزاران سەربازی سوپای تورکیا، بەبیانوی ھەبوونی گەریلاکانی پارتی کرێکارانی کوردستان، لە رۆژانی 22 و 23 حوزەیران بۆ ناو خاکی ھەرێمی کورستان و عێراق، لە سنوری پارێزگای دھۆک، پێشھاتێکی مەترسییدارە و لە ناوەڕۆکدا پیلانێکە بۆ داگیرکاریی و دەستبەسەرداگرتنی خاکی باشوری کوردستان بەشێوەیەکی ھەمیشەیی. ھێزە سیاسییە نیشتمانییەکان و گەلانی عێراق، دەبێت ئەو بێ ھەڵوێستییەی حکومەتی فیدراڵ و ھاوکارییەکانی «پارتی-بنەماڵەی بارزانیی» بۆ سوپای داگیرکەر رەتبکەنەوە و شەرمەزاری بکەن. ئەوەی رووئەدات، پێشێلکارییەکی تەواوی یاسا نێودەوڵەتییەکان و پێشێلکردنی سەروەریی خاکی عێراقە و ژیان و ئاسایشی ھاووڵاتییانی بەتەواوی خستووەتە ژێر ھەڕەشەو مەترسییەوە، پەرلەمانتارانی عێراق دەبێت خاوەنداریی لەو سوێند خواردن و بەڵێنە بکەن کە خوێندویانە داویانە بەگەلی عراق، چۆن و بەچ شێوەیەک بەرگریی لەخاک و سەروەریی وڵاتەکەیان و ھاووڵاتییانیان دەکەن؟ سەرۆکایەتیی کۆمار و سەرۆک وەزیرانی عێراق و بەرپرسانی دیکەی حکومەتی عێراق، لەبەردەم تاقیکردنەوەیەکی گەورەدان، چۆن وەڵامی ئەو دەستدرێژییە ئاشکرایەی دەوڵەتی تورکیا ئەدەنەوە، ئەو داگیرکارییەی سوپای تورک ھیچ پاساوێک ھەڵناگرێت. ئەوەی بەرەوروی ئەو داگیرکارییە وەستاوەتەوە و بەرگریی دەکات، ھێزی پاراستنی گەلانە، ھەر ئەو گەریلایانە بوون فریای شەنگال و ئێزدییەکان کەوتن و لە کۆمەڵکوژیی و لەناوبردنی یەکجاریی رزگاریانکردن. نابێت حکومەت و گەلانی عێراق، ئەو رۆژانەیان لە بیر بچێتەوە، کە حکومەتەکەی ئەردۆغان و تیرۆریستەکان و ھێزە وابەستەکانی بۆ پارچەکردنی خاک و گەلانی عێراق، ھاوکار و پشتیوانیی داعشیان دەکرد، بەسەدان ھەزار ھاووڵاتیی لەھەموو نەتەوە و پێکھاتەکانی گەلانی عێراقی کردنە قوربانیی؛ موسڵ و ئەنبارو نیوەی شار و شارۆچکەو خاکی عێراقیان پێ خاپورکرد. لە جیاتی ئەوەی حکومەتی فیدراڵ لە رێگەی رێوشوێنە یاساییە نێودەوڵەتییەکان، داوای یاسایی لەسەر دەوڵەتی تورکیا و ھاوکارەکانی و داعش تۆمار بکات، کە بەسەدان بەڵگە سەلمێنراوە، بە پێچەوانەوە بەو بێدەنگیی و بێ ھەڵوێستییەی دەبێتە بەشێک لەو وێرانیی و داگیرکارییە لەسەر خاکی خۆی! ئێمە وەک تەڤگەری ئازادیی کۆمەڵگەی کوردستان، وەک ئەرکێکی نیشتمانیی و ئەخلاقیی، وێڕای شەرمەزارکردنی بێ ھەڵوێستیی حکومەتی عێراق و ھاوکارییەکانی پارتی بۆ سوپای تورکیا، بە ئەرکی ئەخلاقیی و مێژوویی خۆمانی دەزانیین، لە ھەموو ئاستێکدا کار بۆ بەرەنگاربونەوەی ئەو داگیرکارییە بکەین. لەسەر ئەو بنەمایە، بانگەواز لە تەواوی ئەو لایەنانەدەکەین کە ناخوازن لەژێر سێبەر و رەحمەتی سوپای داگیرکەراندا بژین، دەبێت خاوەنداریی لە سەروەریی و شکۆی گەل بکەین و بەیەک ریز لەگەڵ گەلەکەمان بوەستین و داگیرکاریی و خیانەت تێک بشکێنیین. گەلی ئێمە بە کورد و عەرەب و تەواوی پێکھاتەکانیەوە، لەبەرامبەر داگیرکاریی و پێشێلکردنی سەروەرییە نیشتمانییەکانیی، ھەرگیز لایەن و ھێز و حکومەتێک پەسند ناکات کە بێھەڵوێست بێت. تەڤگەری ئازادیی کۆمەڵگەی کوردستان 27/6/2024
