بافڵ تاڵەبانی: یەکێتی بەردەوام لە هەوڵدا دەبێت بۆ ئاسایی کردنەوەی دۆخی شنگال

ئەمڕۆ یەکشەممە 12ی تشرینی یەکەمی 2025، سەرۆک مەسعود بارزانی، سەرۆکی پارتی دیموکراتی کوردستان لە کەرنەڤاڵی ناساندنی بەربژێرانی پارتی بۆ هەڵبژاردنی پەرلەمانی عێراق لە هەولێر وتارێکی پێشکەش کرد. سەرۆک مەسعود بارزانی رایگەیاند، "بە پێویستی دەزانم هەندێک بگەڕێمەوە بۆ مێژوو، دەوڵەتی عێراق کە دامەزرا دوای جەنگی جیهانیی یەکەم، لەسەر ئەو بنەمایە دامەزرا کە کورد و عەرەب هاوبەشن لەم وڵاتەدا، ئەمەش دوای ئەوە هات، دوای ئەوەی پەیماننامەی لۆزان و ڕێککەوتنی سیڤەر تێکچوو، تەنیا مافی بڕیاردان لە چارەنووسی خۆیان کە ئایا لەگەڵ عێراق بن یاخود لەگەڵ تورکیا بن، تەنیا بە باشووری کوردستان درا، ئەوانی دیکە دابەش کران هەروەک هەموو ناوچەکە دابەش کران، ئەو کاتە کوردی باشوور دەنگیان دا کە لەگەڵ دەوڵەتی عێراق بن، بەڵام بە مەرجێک کە هاوبەش بن لە حوکمدا، بەڵام بە داخەوە ئێمە نەوەک هەر نەبووینە شەریک، مافی هاووڵاتیشیمان نەبوو، دوای ئەوە مافی ژیانیشمان نەما، شەراکەتی ئێمە بووە ئەنفال، کیمیاباران و وێرانکردنی دێهاتمان، زۆر لەوە بە داختر دوای 2003، نانی ماڵ و منداڵی ئەو ئەنفالکراوان و کیمابارانکراوانەیان بڕی، لەبری ئەوەی قەرەبووی ئەو قوربانییانە بدەن". سەرۆک بارزانی ئومێدەوارە ئەم هەڵبژاردنە دەرفەتێکی دیکە بۆ هەموو عێراق بێنێتە پێش و ئیتر ئەو هەڵانەی کە کراون دووبارە نەبنەوە. راشیگەیاند، "سەرەڕای هەموو ئەو زوڵم و زۆردارییەی کە لە خەڵکی کوردستان کرا، بەڵام مەردانە سەربەرزانە لە مەیدان وەستان و خۆیان نەچەماند و بەرگرییەکی مەردانەیان لە ماف و هەوڵی خۆیان کرد، لە هەر دەرفەتێک کە بۆ ئاشتی هاتبێتە پێش لە دەستیان نەداوە، لە ساڵەکانی 1963، 1964، 1966، 1970، 1990، لە هەموو ئەم مێژووانە گفتوگۆ کراوە بۆ ئاشتی، بەڵام لە ئەنجامدا بە داخەوە دووبارە شەڕ دەستیپێکردەوە، چونکە بڕوایان بە ماف و پێکەوە ژیان و دیموکراتی نەبوو، دروشمی شۆڕشی ئەیلوول (دیموکراتی بۆ عێراق، ئۆتۆنۆمی بۆ کوردستان) بوو ئەو کات، ئەو سەردەمە تەشخیسی پارتی زۆر ڕاست و دروست بووە، ئەگەر دیموکراتی لە عێراق نەبێ، نە کورد و نە عەرەب و نە تورکمان و نە هیچ دین و مەزهەبێک و ناتوانێت بە مافی خۆی شاد بێت". سەرۆک بارزانی وتی، "ساڵی 2003 دەرفەتی زێڕین بوو، بەعس رووخا و ئێمە بە نیەتێکی پاک چووینە بەغدا بۆ ئەوەی عێراقێکی نوێ دامەزرێنین لەسەر بنەمای هاوبەشی، هاوسەنگی و سازان؛ بە هەموو توانایەکمان هەوڵماندا تا ئەو عێراقە دروست ببێت، تا گەیشتە ئەوەی ساڵی 2005 دەستوور بنوسرێتەوە و کەس بەقەد ئێمە ماندوو نەبوو پێوەی، ئێمە ئەوکات وتمان دەستوور هەموو داوای ئێمە جێبەجێ ناکات، بەڵام تا ئاستێکی زۆر باشە و مافەکانمان دەستەبەر دەکات، لایەنی ئەرێنی زۆر لە نەرێنی باشترە، ئەگەر دەستوور جێبەجێ بکرایە، زۆر گرفتی نێوان ئێمە و بەغدا ڕوویان نەدەدا، بەڵام بەداخەوە پێوەی پابەند نەبوون". وتیشی، "هەرچەندە ئەو یاسایەی هەڵبژاردنی پێدەکرێت نا یەکسانە و سنووردار کراوە، لەبەر ئەوە ئومێدەوارین ئەم یاسایە لە داهاتوودا بگۆڕدرێت، دەمەوێ بۆ ئەو کەسانەی لە بەغدا دژی هەرێمی کوردستان بوون و کێبڕکێیان دەکرد کە ئایا کێ زیاتر ئەزێتی کورد دەدات، بەبیریان دەهێنمەوە کە چەند بڕگەیەک هەیە لە دەستوور با بیخوێننەوە ئەوکات دەزانن کە هەرێم چەند غەدری لێکراوە". ئەوەشی خستەڕوو، "مادەی یەکەمی دەستوور دەڵێت، عێراق دەوڵەتێکی فیدراڵییە نەک مەرکەزی، دەوڵەتی مەرکەزی دوای 2003 نەما بەگوێرەی رێککەوتنەکان، هەر رەفتارێکیش مەرکەزی بێت نادەستوورییە". سەرۆک بارزانی باسی لەوەکرد، "مادەی سێ دەڵێت، عێراق وڵاتێکی فرە نەتەوە، ئایین و مەزهەبن، واتای ئەوەیە کە بەیەک پێکهاتە عێراق بەڕێوە ناچێت و دەبێت هەمووی هاوبەش بن". داواشی لە بەربژێران و لایەنگرانی پارتی کرد، هەڵبژاردنێکی زۆر هێمن بەڕێوەببەن، تەنانەت ئەگەر وێنەیەکی ئێوەش دڕێندرا، ئێوە ئەو کارە مەکەن، بەرگری لە ستەملێکراو بکەن و دوور بن لە موزایدە هەر لە وتەکانیدا سەرۆک بارزانی داوای لە هەموو خەڵکی کوردستان کرد بچنە سەر سندووقەکانی دەنگدان و دەشڵێت. "ئامۆژگاریی من بۆ ئەوانەی پیلانگێڕی دژی پارتی دەکەن، بەخۆیان بچنەوە، پارتی بە ئێوە ناشکێت و هەرێمـی کوردستان بە هاوپەیمانیی ئێوە ناشکێت". لە کۆتایی وتەکانیشیدا سەرۆک بارزانی جەختی لەوەکردەوە، "دەمانەوێت هەموو کێشەکان چارەسەر بکرێن و چارەسەری کێشەکان لە گەڕانەوەدایە بۆ دەستوور".

ئەمڕۆ یەکشەممە 12ی تشرینی یەکەمی 2025، سەرۆک مەسعود بارزانی، سەرۆکی پارتی دیموکراتی کوردستان لە کەرنەڤاڵی ناساندنی بەربژێرانی پارتی بۆ هەڵبژاردنی پەرلەمانی عێراق لە هەولێر وتارێکی پێشکەش کرد. سەرۆک مەسعود بارزانی رایگەیاند، "هەموو پرۆسەیەکی هەڵبژاردنێک گرنگە و هەر هەڵبژاردنێکیش لە هەلومەرجێکی جیاوازدا دەبێت". ئاماژەی بەوەکرد، "خۆشحاڵم بەربژێری عەرەب و تورکمان لە لیستی پارتیدا هەن، ئامۆژگاریتان دەکەم یەک دەستبن، چونکە بەربژێرانی پارتی نوێنەری هەموو پارێزگایەکی عێراقن". سەرۆک مەسعود بارزانی وتی، "دەوڵەتی عێراق لەسەر بنچینەی هاوبەشی کورد و عەرەب دامەزرا، بەڵام ئێمە نەک نەبووینە هاوبەش مافی هاوڵاتیبوونیشمان نەبوو، بۆیە پێویستە نە ئێمە و نەئەوان هەڵەکان دووبارە نەکەینەوە". وتیشی، "هیچ کاتێک دەرفەتی ئاشتیمان لەدەستنەداوە و هیچ دەستپێشخەرییەکی عێراقمان بۆ ئاشتی رەتنەکردووەتەوە". سەرۆک بارزانی باسی لە دەستووری عێراق کرد و ئاماژەی بەوەدا، "دەستووری عێراق باشە، بەڵام بێ کەموکوڕی نییە، هەروەها عێراق پابەند نییە بە دەستوور، ئەگەر کار بە دەستوور بکرایە زۆر کێشە لە عێراق روویان نەدەدا". جەختی لەوەشکردەوە، "یاسای هەڵبژاردن دادپەروەرانە نییە و دەبێت بۆ هەڵبژاردنی داهاتوو بگۆڕدرێت". راشیگەیاند، "بەپێی دەستوور سیستمی مەرکەزی لە عێراقدا نەماوە، هەروەها عێراق خۆی لە جێبەجێکردنی مادەی 140 دەدزێتەوە، بەڵام گلەیش لە نوێنەرانی کورد دەکەم لە بە‌غدا کە مادەی 140یان ئیهمال کردووە و هەوڵێیان نەداوە بۆ جێبەجێکردنی". سەرۆک بارزانی دەڵێت، "زۆر باسی بابەتی نەوت و غاز دەکرێت، ئێمە زیاتر لە هەفتەیەک گفتوگۆمان کردووە لەسەر ئەم بابەتە، مادەی 111 باس لەوەدەکات، نەوت و غاز موڵکی هەموو گەلی عێراقە لە هەموو پارێزگا و هەرێمەکان، ئێمە هیچ خیلافمان لەسەر ئەم مادەیە نییە، هەروەها مادەی 112ش دەڵێت، بە رێککەوتن یاخود بە یەکەوە داهاتی نەوت و بەرهەمەکانی بۆ هەموو خەڵک دەبێت، رێککەوتین بەیەکەوە بێت و هەرێم پێشێلکاری نەکردووە". باسی لەوەشکرد، "مادەی 115 و 121 کە باسی مافی خەڵکی هەرێمی کوردستان دەکات، بەڵام جێبەجێ نەکراون"، وەک مەسعود بارزانی تیشیکی خستەسەر، "ئەو دادگا فیدراڵییەی ئێستا هەیە، ئەو دادگایە نییە لە دەستووردا هاتووە". داواشی لە بەربژێران و لایەنگرانی پارتی کرد، هەڵبژاردنێکی زۆر هێمن بەڕێوەببەن، تەنانەت ئەگەر وێنەیەکی ئێوەش دڕێندرا، ئێوە ئەو کارە مەکەن، بەرگری لە ستەملێکراو بکەن و دوور بن لە موزایدە هەر لە وتەکانیدا سەرۆک بارزانی داوای لە هەموو خەڵکی کوردستان کرد بچنە سەر سندووقەکانی دەنگدان و دەشڵێت. "ئامۆژگاریی من بۆ ئەوانەی پیلانگێڕی دژی پارتی دەکەن، بەخۆیان بچنەوە، پارتی بە ئێوە ناشکێت و هەرێمـی کوردستان بە هاوپەیمانیی ئێوە ناشکێت". لە کۆتایی وتەکانیشیدا سەرۆک مەسعود بارزانی جەختی لەوەکردەوە، "دەمانەوێت هەموو کێشەکان چارەسەر بکرێن و چارەسەری کێشەکان لە گەڕانەوەدایە بۆ دەستوور".

ئەمڕۆ یەکشەممە 12ی تشرینی یەکەمی 2025، بە ئامادەبوونی مەسرور بارزانی، سەرۆکی حکومەتی هەرێمی کوردستان رێوڕەسمی دانانی بەردی بناغەی پەیمانگەی ئەزهەر و ئاهەنگی دەرچووانی پەیمانگەی پێشنوێژ و وتاربێژانی هەولێر بەڕێوەچوو. مەسرور بارزانی لە مەراسیمەکەدا وتارێکی پێشکەشکرد و رایگەیاند، "مامۆستایانی ئاینی ڕۆلێکی گرنگیان لە بزووتنەوەی رزگاریخوازی گەلی کوردستاندا گێڕاوە، هەروەها لە پێشخستنی زمان و ئەدەب و رۆشنبیری کوردیدا رۆلێکی کارایان هەبووە". ئاماژەی بەوەکرد، "مامۆستایانی ئایینی رۆلێکی دیار و بەرچاویان لە بەرگریکردن لە مافە رەواکانی گەلی کوردستان و پرسە نیشتیمانییەکان و گەشەپێدانی هزری میانەڕەوی لە بەیەکەوەژیانی ئایینی لەهەرێمی کوردستاندا هەبووە". مەسرور بارزانی وتی، "بینییومانە مامۆستایان هاوشانی پێشمەرگە لەبەرانبەر ستەمکاران وەستاونەتەوە". وتیشی، "ئێمە بەوەوە جوانین كە رووی راستەقینەی ئیسلام چییە ئەوە ببینین، مامۆستایانی ئایینی دەبێت وابكەن خەڵك ئیسلامیان خۆشبووێت نەك لێی بترسن".

ئەمڕۆ یەکشەممە 12ی تشرینی یەکەمی 2025، مەسرور بارزانی، سەرۆکی حکومەتی هەرێمی کوردستان کەنیسەی "ئووم ئەلنوور" لە شارۆچکەی عەنکاوە کردەوە و وتارێکی پێشکەشکرد. مەسرر بارزانی لەمیانەی وتارەکەیدا رایگەیاند، "ئەم کەنیسەیە دیارییەکی حکومەتی هەرێمی کوردستانە بۆ ئەو خوشک و برایانەی کە وەک بیستم بەشێکی زۆریان ئاوارەی دەشتی نەینەوان، کە بەهۆی ناسەقامگیریی ناوچەکە هەر لێرە ماونەتەوە و سوود لەم کەنیسەیە وەردەگرن و خواپەرستی تێیدا دەکەن". ئاماژەی بەوەکرد، "حکومەتی هەرێمی کوردستان بەردەوام دەبێت لە هەوڵەکانی خۆی بۆ کۆتاییهێنان بەم بارودۆخە سەپێنراوەی دەشتی نەینەوا و بۆ دروستکردنی کەشێکی ئارام و سەقامگیر بۆ ئەوەی خوشک و براکانمان بتوانن بەسەربەرزی و بائارەزووی خۆیان بگەڕێنەوە ماڵەکانیان و کەنیسەکانیان". مەسرور بارزانی وتی، "حکومەتی هەرێمی کوردستان گرنگی دەدات بە هەموو ئایینەکان و قوڵکردنەوەی بەیەکەوە ژیانی ئاشتیانە و ئازادی ئایینی لە هەرێمی کوردستان، حکومەتی هەرێم بەردەوام دەبێت لەسەرخستنی پەیامی ئاشتیی و پێکەوەژیان لەسەرتاسەری رۆژهەڵاتی ناوەڕاست".

لە هەرێمی کوردستان 29 هەزار خانەنشینی نوێ چاوەڕوانی وەرگرتنی پاداشتی کۆتایی خزمەتن، بڕیاریشە ئەم هەفتەیە شاندێکی وەزارەتی دارایی بۆ هەمان مەبەست سەردانی بەغداد بکات. لە سەرەتای ئەمساڵەوە بەهۆی یەکخستنی تەمەنی خانەنشینی لەگەڵ عێراق، زیاتر لە 27 هەزار فەرمانبەر لە هەرێمی کوردستان خانەنشین بوون، لەگەڵ تەواوبوونی مامەڵەی دوو هەزار کەسی دیکە لەم مانگەدا، کۆی گشتیی ژمارەکە دەگاتە 29 هەزار خانەنشین. بەپێی یاساکە ئەو خانەنشینانەی 25 ساڵ خزمەتیان هەیە، شایستەی وەرگرتنی پاداشتی کۆتایی خزمەتن (ئیکرامیە) کە بریتییە لە 12 مووچەی تەواو. بەڕێوەبەرایەتیی گشتیی خانەنشینی هەرێمی کوردستان رایگەیاند، "لە چەند رۆژی داهاتوو شاندێکی بەڕێوەبەرایەتییەکە لەگەڵ شاندی وەزارەتی دارایی هەرێم سەردانی بەغدا دەکەن، لیستی ئەو خانەنشینانە لەگەڵ خۆیاندا دەبەن کە لە مانگی تشرینی یەکەمدا دۆسیەکانیان تەواودەبێت و پاداشتی 12 مووچەکە دەیانگرێتەوە". ئەمەش دوای ئەوەدێت، لیستی ئەو خانەنشینانەی لە سەرەتای ئەمساڵەوە تاوەکو کۆتایی مانگی ئەیلول خانەنشین دەبن و پاداشتی 12 مووچەکە دەیانگرێتەوە، رەوانەی وەزارەتی دارایی عێراق کراوە، بەڵام خەرجنەکراوە.

سەرۆکوەزیرانی کوردستان کەنیسەی ئوم ئەلنووری لە عەنکاوە دەکاتەوە. ئەم کەنیسەیە لەسەر ئەرکی حکومەتی هەرێمی کوردستان دروستکراوە. ئەمڕۆ یەکشەممە،12ـی ئۆکتۆبەری 2025، مەسرور بارزانی، سەرۆکی حکوومەتی هەرێمی کوردستان کەنیسەی "ئووم ئەلنوور" لە شارۆچکەی  عەنکاوە دەکاتەوە،  کەنیسەى ئوم ئەلنوور لەسەر ڕووبەری شەش هەزار مەتر و گوژمەی پڕۆژەکە، بە چوار ملیار و 290 ملیۆن دینار لە عەنکاوە دروستکراوە. شوێنی هەزار کەس لەناو کەنیسەکەدا دەبێتەوە. بە گوتەی مەترانی کاتدرائی، کردنەوەی ئەو کەنیسەیە زۆر گرنگە بۆ کریستیانەکانی هەرێمی کوردستان و ناوچەکە. چەندین ئاینزای جیاواز لە هەرێمی کوردستان  بەبێ کێشە دەژین، ئەمەش سیمایەکی گەش و دیاری بەخشیووە بە پێکەوەژیان لە کوردستان. دوای هاتنی چەکدارانی داعش لە 2014 هەزاران مەسیحی ئاوارەی هەرێمی کوردستان بوون، بەشێکیان نەگەڕانەوە و بڕیاریاندا لێرە بژین. خالید جەمال، بەڕێوەبەری گشتیی کاروباری مەسیحییەکان لە وەزارەتی ئەوقاف و کاروباری ئاینی بە ئاڤا میدیای وت، کەنیسەی ئوم ئەلنوور لەسەر ئەرکی حکومەتی هەرێمی کوردستان لە ساڵی 2012 دەستکرا بوو بە دروستکردنی، بەڵام بەهۆی قەیرانی دارایی کارکردن لە کەنیسەکە وەستا بوو. مەسرور بارزانی، سەرۆکوەزیرانی کوردستان فەرمانی کرد کەنیسەکە تەواو بکرێت. بەڕێوەبەری گشتیی کاروباری مەسیحییەکان دەشڵێت: ڕووبەری کەنیسەی ئوم ئەلنوور نزیکەی پێنج هەزار مەتر دووجایە، جێگای زیاتر لە هەزار کەس دەبێتەوە. بۆ ئاوارە سریانییە ئەرسۆدۆکسەکان دروستکراوە. شارۆچکەی عەنکاوە تاکە شارۆچکەی هەرێمی کوردستانە کە ھیچ شارەدێ و گوندێکی نییە و کەوتووەتە ناو ناوەندی هەولێرەوە، بە بڕیاری حکوومەتی ھەرێمی کوردستان لە ساڵی 2014دا بووە شارۆچکە. زۆرینەی دانیشتووانی ئەم شارۆچکەیە کلدان و ئاشووریین، کە زۆربەیان پەیوەستن بە کڵێسای کاسۆلیکی کلدانی. لە هەرێمی کوردستان 151 کەنیسە، 76 مەزار، 10 دێری مەسیحییەکان هەیە.

فەرماندەی گشتی هێزەکانی سوریای دیموکرات، جەختى کردەوە، واشنتۆن پێشنیازی پێکهێنانی هێزێکی هاوبەشی لە نێوان هێزەکانی سوریای دیموکرات و دیمەشق کرد بۆ روبەڕوبونەوەی داعش. لە چاوپێكەوتنێكدا لەگەڵ كەناڵی روناهی، مەزڵوم عەبدی، فەرماندەی گشتی هێزەکانی سوریای دیموکرات،  وتى: کشانەوە لە پارێزگاکانی رەقەو دەیرەزور لە ئاردانییە،  ئەو دیدارانەی لەگەڵ سەرۆکی سوریا لە دیمەشق ئەنجامدراون تیشکیان خستۆتە سەر پێویستی گەیشتن بە چارەسەرێكی سوری-سوری. هەروەها باسى لەوەکردوە کە هەوڵەکان بەردەوامن بۆ ئەوەی مافەکانی کورد بخرێنە نێو دەستوری سوریا، بەم نزیکانەش شاندی کوردی سەردانی دیمەشق دەکاتـ  بەوتەى ئەو واشنتۆن پێشنیازی پێکهێنانی هێزێکی هاوبەشی لە نێوان هێزەکانی سوریای دیموکرات و دیمەشق کرد بۆ روبەڕوبونەوەی داعش. هەر لەو چاوپێکەوتنەدا، مەزڵوم عەبدی هێماى بۆ ئەوەشکردوە کە کەناڵەکانی پەیوەندی لەگەڵ تورکیا هێشتا كراوەیە، ئەنكەرە دەتوانێت پاڵپشتی رێککەوتنی ئێستا لەگەڵ دیمەشق بکات ئەگەر بیەوێت جێبەجێی بکات. دەشڵێت: دۆسیەی گەڕەکەکانی شێخ مەقسودو ئەشرەفیە ئەولەویەتێکی ستراتیژییەو واشنتۆن و هاوپەیمانی نێودەوڵەتيش بایەخ بەم پرسە دەدەن، لەگەڵ پێویستی جێبەجێکردنی رێککەوتنی حەلەب. هاوکات باس لەوەدەکات کە پێشنیارەکەی ئەمریکا قبوڵکراوە، ئامانجیش ئەوەیە شەڕی دژی رێکخراوەکە ببێتە جەنگێکی نیشتمانی گشتگیر، لەگەڵ جەختکردنەوە لەسەر گەڕانەوەی ئاوارەکان بۆ ناوچەکانی خۆیان. فەرماندەى گشتى هەسەدە داوای لە خەڵکی عەفرین و سەرێکانیە (راس العین) و گرێ‌ سپی (تەل ابیض) کرد خۆیان بۆ گەڕانەوەیەكی سەلامەت ئامادە بکەن. وتیشى: لەگەڵ حكومەتی دیمەشق لێکتێگەیشتنی ئەمنی و سەربازیمان کردووە. ئەوەشى خستەڕوو هێزەکانی ئاسایشی ناوخۆ لە چوارچێوەی وەزارەتی ناوخۆ ئاوێتە دەكرێن و نوێنەرانیان لە لیژنەی سەربازیدا دەبێت كە بەرەو دیمەشق دەڕوات.  وتیشى: ئەگەری بەشداریکردنی دیمەشق هەیە بەم نزیکانە لە شەڕی دژی داعش، بەشداریکردنی لەم بابەتەدا یەکێکە لە مەرجەکانی هەڵگرتنی سزاکان، لێکتێگەیشتن هەیە بۆ ئەوەی بڕگەکانی رێککەوتنی 10ی ئازار بخرێتە ناو دەستورەوە. باسى لەوەشکرد لە کۆبونەوەکەی ئەم دواییەی دیمەشق لەگەڵ وەزیری بەرگری و سەرۆکی دەزگای هەواڵگری رێککەوتن كرا لەسەر ئاگربەستێکی گشتگیرو بەردەوامبونی گفتوگۆی ئاست بەرز. وتیشى: سازان كراوە لەسەر بنەمای نا ناوەندێتی سەرەڕای ناکۆکی لەسەر لێکدانەوەی زاراوەكان.  عەبدى وتى: بەم نزیكانە شاندەکانی ئیدارەی خۆسەر سەردانی ژمارەیەک لە شارەكانی سوریا دەكات،  سەردانەکەی باراک و کوپەر، جەخت لە بەردەوامی هاوکارییەکانی نێوان واشنتۆن و باکور و رۆژهەڵاتی سوریا دەکاتەوە.  لەبەشێکى دیکەى قسەکانیدا دەڵێت: لە کۆبونەوەکانی داهاتوودا باس لە هەموارکردنەوەی دەستوری سوریا دەکرێت،  هەماهەنگی زارەکی كراوە سەبارەت بە یەکخستنی هێزەکانی سوریای دیموکرات لە سوپای سوریادا، دیمەشق خواستی خۆی دەربڕیوە بۆ سودمەندبون لە شارەزاییە سەربازییەکەی. وتیشى: کۆبونەوەی حەسەکە باسی لە هەڵگرتنی سزای یاسای قەیسەر و بەشداری دیمەشق لە شەڕی دژی تیرۆر کردووە.

سەرۆکی یەکێتیی نیشتمانیی کوردستان داوا لە سودانی دەکات دابەشکردنی مووچە خێراتر بکرێت و تاوەکو کاتی بەشکردنی مووچە لە هەرێمی کوردستان لەگەڵ عێراق یەکبخرێت. ئەمڕۆ شەممە 11ی تشرینی یەکەمی 2025، بافڵ تاڵەبانی، سەرۆکی یەکێتیی نیشتمانیی کوردستان، لەگەڵ محەمەد شیاع سودانی، سەرۆک وەزیرانی عیراق لە بەغدا کۆبووەوە، لە کۆبوونەوەکەدا تاوتوێی دوایین پێشهات و رووداوەکانی عیراق و ناوچەکە کرا. جێبەجێکردنی رێککەوتنی نەوتیی هەرێمی کوردستان و عێراق و لابردنی سەرجەم ئاستەنگەکان لە بەردەم ئەو رێککەوتنەدا خرانە بەر باس، بافڵ تاڵەبانی داوای لە سەرۆک وەزیرانی عێراق کرد رێکارەکانی ناردنی مووچە خێراتر بکرێن تاوەکو کاتی دابەشکردنی مووچە لە هەرێمی کوردستان لەگەڵ عێراق یەکبخرێت. سەبارەت بە پرۆسەی سیاسیی عێراق، سەرۆک وەزیران و سەرۆکی یەکێتیی نیشتمانیی کوردستان باسیان لە هەڵبژاردنی داهاتووی ئەنجومەنی نوێنەرانی عێراق کرد و جەختیان لە گرنگیی بەرێوەچوونی هەڵبژاردنێکی پاک و بێگەرد کردەوە. لە بەشێکی دیکەی کۆبوونەوەکەدا، بافڵ تاڵەبانی سوپاسی محەمەد شیاع سودانی کرد بۆ بڕیاری گۆڕینی ناوی فڕۆکەخانەی نێودەوڵەتیی سلێمانی بۆ "فڕۆکەخانەی نێودەوڵەتیی جەلال تاڵەبانی". خزمەتکردنی کەسوکاری شەهیدان لە هەرێمی کوردستان و عیراق تەوەرێکی دیکەی کۆبوونەوەکە بوو. بافڵ تاڵەبانی رایگەیاند، "سەرۆک وەزیرانی عیراق خۆی کوڕی شەهیدە، بۆیە گرنگیی تایبەتی بە کەسوکاری شەهیدان داوە و ئەوەش شایەنی پێزانینە".

ئەحمەد تورک لە کۆنفرانسێکدا لە مێردین قسەی کرد و ڕایگەیاند کە ڕۆژئاوا هێڵی سوورە بۆ کورد و بۆ تورکیا باشترە کوردان بە دراوسێی خۆی پەسەند بکات نەک هەتەشە. لە مێردین، دەستپێشخەریی یەکێتی دیموکراتیک، "کۆنفرانسی پێکەوە ژیانی گەلان، بیروباوەڕەکان و دیموکراتیکی میزۆپۆتامیا" بەرێوە برد. خەڵکێکی زۆر لە ئایین و گەلە جیاوازەکانەوە بەشدارییان لە کۆنفرانسەکەدا کرد. لە کۆنفرانسەکەدا جەخت لەسەر داوای چارەسەری دیموکراتیک و پێکەوە ژیانی گەلان کرایەوە. گوڵجان کاچماز سەیگیت، هاووتەبێژی دەستپێشخەری یەکێتی دیموکراتیک لە سەرەتای کۆنفرانسەکەدا قسەی کرد و ڕایگەیاند؛ بانگەوازی ڕێبەر ئاپۆ بۆ ئاشتی و کۆمەڵگەی دیموکراتیک مۆدێلێکی نوێی ژیانە بۆسەرجەم گەلانی ڕۆژهەڵاتی ناوەڕاست. سایگیت وتی: "بە کۆمەڵگەی دیموکراتیک، ژیانێکی نوێ بنیات دەنێین."  هەروەها محەمەد کاماچ، هاووتەبێژی دیکە، ئاماژەی بەوەدا کە گەلانی ناوچەکە بە درێژایی مێژوو بەهۆی ناسنامەیانەوە ڕووبەڕووی گوشارەکان بوونەتەوە و ڕایگەیاند: "ئێمە بەرگری لە پێکەوەژیان دەکەین، ئەم دەستپێشخەرییە فراوانتر دەبێت و دەبێتە کۆنگرەیەکی نەتەوەیی." ئەحمەد تورک، هاوسەرۆکی شارەوانی شاری گەورەی مێردین کە لە پۆستەکەی دوورخرایەوە و لە شوێنیدا قەیوم دانرا، ڕایگەیاند، سیاسەتی دیموکراتیک بەهێزتر دەبێت و وتی: "گەیشتن بە کۆمارێکی دیموکراتیک بە هەوڵی هاوبەشی گەلان دەکرێت." ئەحمەد تورک جەختی لەوە شکردەوە کە پێویستە لایەنە سیاسییەکان و کۆمەڵگەی مەدەنی بۆ داهاتووی گەلی کوردستان، پێکەوە هەنگاو بنێن. هەروەها تورک ئاماژەی بە پێشهاتەکانی سووریا کرد و وەبیری هێنایەوە کە کورد بۆ دەستەبەرکردنی ئاسایش و ئەمنیەتی خۆی پەنای بۆ چەک برد و وتی: "ئێستا داوا لە کورد دەکرێت چەکەکانیان دابنێن. بەتایبەت تورکیا. کەواتە، کێ لێرە ئاسایش و ئەمنیەت دابین دەکات؟ هەتەشە هیچ پۆلیسێکی نییە، هیچ سوپایەکی نییە. هەتەشە لەوێ هیچ دەسەڵاتێکی نییە لە ڕاستیدا. کەواتە کێ ئاسایش و ئارامی بۆ کورد دابین دەکات؟ جگە لەوە لەبری ئەوەی هەتەشە دراوسێی تورکیا بێت، با کورد بێت، ئایا جیهان کۆتایی دێت؟" ئەحمەد تورک بە جەخت کردنەوە لەوەی کە ڕۆژئاوا هێڵی سوورە بۆ کورد وتی: "ئەمڕۆ لە سەروبەندی دەرفەتێکی مێژوویین، ئەگەر نەمانتوانی هەڵسەنگاندن بۆ ئەم دەرفەتە مێژووییە بکەین، ڕۆژانی تاریک بۆ داهاتووی منداڵەکانمان بەجێدەهێڵین، لەم بارەیەوە بانگەوازی لە هەموو لایەک دەکەم، پێویست ناکات کەس خۆی تووشی سەرلێشێواوی بکات، تەنها بەسە دەستی کوردان بگرن و لە گەڵیان بکەونە پەیوەندییەوە." کۆنفرانسەکە بە پانێڵ و پێشکەشکردنەکانی نوێنەری گەلە جیاوازەکان بەردەوامە.

سەرۆکی یەکێتی کۆمپانیاکانی فڕۆکەوانی و گەشتیاری، لابردنی ئابڵوقەی تورکیا بەسەر ئاسمانی سلێمانی کاریگەری تەواو لە شارەکە دروست دەکات و دەبێتە بوژانەوەی ئابوری . عەتا ئەنوەر سەرۆکی یەکێتی کۆمپانیاکانی فڕۆکەوانی و گەشتیاری لە میانی بەشداریکردنی لە بەرنامەی دەنگی گۆڕاندا رایگەیاند، کردنەوەی ئاسمانی تورکیا بە ڕوی گەشتە ئاسمانییەکانی فڕۆکەخانەی سلێمانی کاریگەری لەسەر شارەکە دروست دەکات لە ڕوی گەستیارییەوەو دەشبێتە بوژانەوەی ئابوری ، دەشڵێت، ماوەی سێ هەفتە بۆ چوار هەفتەی پێویستە تابتوانرێت گەشتەکان دەستپێبکرێت  ئاماژەی بەوەشکردوە، بەهۆی ڕاگرتنی گەشتەکان  کۆمپانیاکان زەرەرو زیانێکی زۆریان بەرکەتوە بەڵام نەبۆتە هۆی داخستنی دەربارەی ژمارەی کۆمپانیا و نوسینگە ، سەرۆکی یەکێتی کۆمپانیاکانی فڕۆکەوانی و گەشتیاری دەلێت، لە سلێمانی ودەوروبەری 200 کۆمپانیا ونوسینگەو بریکاری گەشتیاری  بە پێی ئەو سیستەمانەی هەیە بۆ وڵاتی تورکیا  کە کاردەکەن ، نزیکەی 70 کۆمپانیا کاری تەواویان تەنها لەسەر تورکیا بوە لەبارەی ڤیزاش ئاماژەی بەوەشکردوە ، وڵاتی تورکیا ڤیزای پێویستە لە تەمەن 15 ساڵ تاوەکو 50 ساڵ و لە ئێستادا وەرگرتنی ڤیزا بەراورد بە ساڵانی رابردو  زۆر باشترە و ڕەفزبونەوەی ڤیزا کەمترە .

بەگوێرەى میدیاکانى یەکێتى، بڕیارە دوانیوەڕۆی ئەمڕۆ شەممە، 11-10-2025، بافڵ جەلال تاڵەبانی، سەرۆکی یەکێتیی نیشتمانیی کوردستان، سەردانی بەغداد بکات و لەگەڵ محەممەد شیاع سوودانی، سەرۆکوەزیرانی عێراق و ژمارەیەک بەرپرسی باڵا کۆببێتەوە، بە مەبەستی تاوتوێکردنی پرسی مووچە و جێبەجێکردنی رێککەوتنی نەوتی. سەرۆکی یەکێتیی نیشتمانیی کوردستان دەگاتە بەغداد و راستەوخۆ لەگەڵ محەممەد شیاع سوودانی، سەرۆکوەزیرانی عێراق کۆدەبێتەوە بۆ گفتوگۆکردن لەسەر کۆمەڵێک پرسی گرنگی نێوان هەولێر و بەغداد. بەپێی زانیارییەکان، ئامانجێکی سەرەکیی سەردانەکەی بافڵ جەلال تاڵەبانی، کە بە ئەندازیاری رێککەوتنی نەوتیی نێوان هەولێر و بەغداد دادەنرێت، بریتییە لە چاودێریکردنی جێبەجێکردنی رێککەوتنەکە و لابردنی سەرجەم ئاستەنگەکان لە بەردەمیدا، بە ئامانجی زیاتر لێک نزیککردنەوەی هەردوو حکومەت. هەر بەپێی زانیارییەکان، سەرۆکی یەکێتی لە کۆبوونەوەیدا لەگەڵ سوودانی، داوای ناردنی بەپەلەی مووچەی مووچەخۆرانی هەرێمی کوردستان دەکات. هەروەها داوا دەکات کە پرۆسەی دابەشکردنی مووچە رێکبخرێتەوە، بە جۆرێک کە مووچەخۆرانی هەرێم و عێراق پێکەوە و لە یەک کاتدا مووچەکانیان وەربگرن. جگە لە سەرۆکوەزیرانی عێراق، بڕیارە لەم سەردانەیدا بافڵ جەلال تاڵەبانی چاوی بە ژمارەیەک بەرپرسی باڵای حیزبی و حکومیی دیکە لە بەغداد بکەوێت.

مەزڵوم عەبدی فەرماندەی گشتی هێزەکانی سوریای دیموکرات رایگەیاند: بەمنزیکانە لیژنەیەکی سەربازیمان سەردانی دیمەشق دەکات، گفتوگۆ لەسەر گرێدانی هەسەدە بە هێزەکانی سوریا دەکەین. لە یادی 10 ساڵەی دامەزراندنی هێزەکانی سوریای دیموکرات، یەکینەکانی بەرەنگاربوونەوەی تیرۆر(YAT)  نمایشێکی سەربازییان ئەنجامدا و تیایدا مەزڵوم عەبدی باسی گرنگی خەباتی هەسەدەی کرد و جەختی لەسەر پاراستنی گەل و نیشتمان کردەوە.  مەزڵوم عەبدی رایگەیاند: هێزەکانمان رۆڵێکی کارا دەگێڕن لە چوارچێوەی سوپا بۆ روبەڕوبونەوەی نیرۆر لە سەرتاسەری وڵات و دەبنە سەرچاوە هێز بۆ سوپا. لە 10ـین ساڵیادی دامەزراندنی هەسەدە کە دەکاتە 10ی 10، مەزڵووم عەبدی پەیامێکی بڵاوکردەوە و پابەندبوونی خۆی بۆ بوون بە بەشێک لە سوپای سووریا و بەرگریکردن لە ناوچەکە دژی تیرۆریستان دووپات کردەوە.    ڕۆژی سێشەممەی ڕابردوو، مورهەف ئەبو قەسرە، وەزیری بەرگریی سووریا، ئاگربەستی دەستبەجێی بەدرێژایی هەموو هێڵەکانی پێشەوە لەگەڵ هەسەدە لە ناوچەکانی باکوور و باکووری ڕۆژهەڵاتی سووریا ڕاگەیاند، ئەوەش دوای دیداری مەزڵووم عەبدی لەگەڵ ئەحمەد شەرع، سەرۆککۆماری سووریا و ئەبو قەسرە لە دیمەشق.

 بورهان رشید گوڵە، سەرۆکی تیمی پارێزەرانی بەرگری لە لاهور جەنگی و هاورێکانی، ڕایدەگەیەنێت  بەمەبەستی دانانی  پارێزەرو بەرگریکردن لێیان،  داوامان کردووە ناوی سەرجەم راگیراوانی کارەساتی لالەزارمان پێ بدرێت، تاکو ئێستا وەڵاممان نەدراوەتەوە. هاوکات ئەو پارێزە ئەوەش دەخاتەڕوو کاتێکیش دەچینە لای لاهور شێخ جەنگی لە زیندان چەند پارێزەربین ئەوەندە ئەفسەر دێنە ژوورە لەگەڵمان و  بە ڤیدیۆ کۆى سەردانەکەمان تۆمار دەکرێ.  بورهان رشید گوڵە کەسوکاری زیندانیان ئاگادار دەکاتەوە  کە ئەوان  لەم انتهاکە یاسایی یە، دیسکی مافی مرۆڤی نەتەوە یەکگرتوەکان لە عێراق و هەولێرو کونسولخانەی وڵاتانی رۆژئاوا لەم کارە ئاگادار دەکەینەوە، هەرگیز کۆڵ نادەن هەروەها دەشڵێت: داوا لە کەسوکاری سەربەرزیشیان دەکەین لە ناوی سیانی و ناونیشانیان،  ئاگادارمان بکەنەوە دڵنیاییشیان پێ دەدەین کە لە هەوڵەکانی ئازادکردنیان بەردەوام دەبین. دەقی راگەیەندراوەکە: بۆ ڕای گشتی هەرێمی کوردستان. -ڕێکخراوەکانی مافی مرۆڤ و دەزگاکانی ڕاگەیاندن. -نێردەی وڵاتان و پارتە سیاسی و کەسایەتییە ئازادیخوازەکان . بابەت: ڕونکردنەوە.  من (بورهان ڕەشید گوڵە) کە پارێزەری کەیسی بەڕێز (لاهور شێخ جەنگی و هاوڕێکانی)م ، سەبارەت بە ڕاگیراوانی کارەساتی لالەزار و بەمەبەستی دانانی  پارێزەرو بەرگریکردن لێیان، ماوەی چەند رۆژیکە داوامان کردووە ناوی سەرجەم راگیراوانی کارەساتی لالەزارمان پێ بدرێت، تاکو ئێستا وەڵاممان نەدراوەتەوە.  ئەوەی لێرەدا جێگای سەرنجە دەستەی سەربەخۆی مافەکانی مرۆڤیش لە هەرێمی کوردستان، زۆر لە مێژە هەمان داوای کردوە،  بەڵام  ناوەکان بەوانیش نەدراوە.   لێرەدا کەسوکاریان ئاگادار دەکەینەوە،   کە ئێمە لەم انتهاکە یاسایی یە، دیسکی مافی مرۆڤی نەتەوە یەکگرتوەکان لە عێراق و هەولێرو کونسولخانەی وڵاتانی رۆژئاوا لەم کارە ئاگادار دەکەینەوە، هەرگیز کۆڵ نادەین و فشارەکان زیاد دەکەین بۆ ئازادکردنی سەرجەم راگیراوان.  داوا لە کەسوکاری سەربەرزیشیان دەکەین لە ناوی سیانی و ناونیشانیان،  ئاگادارمان بکەنەوە دڵنیاییشیان پێ دەدەین کە لە هەوڵەکانی ئازادکردنیان بەردەوام دەبین.  بورهان رشید گوڵە  سەرۆکی تیمی پارێزەرانی بەرگری لە لاهور جەنگی و هاورێکانی. سەرۆکی لیستی بەرەی گەلەکەمان.  لە پارێزگای سلیمانی بۆ هەلبژاردنەکانی پەرلەمانی عێراق.

ئەندامی شاندی ئیمراڵی پەروین بوڵدان ڕایگەیاند چاوەڕندەکرێت لە هەفتەکانی داهاتوودا شاندێک کە لە پێنج کەس پێكدێت سەردانی ئیمراڵی بکات، ئاماژەی بەوەشدا ڕێبەر ئاپۆ چاوەڕیی ئەوەیە کۆمیسیۆن دەستبەجێ بچێتە لاى ئەوو هاوکاری لە خێراکردنی پرۆسەکە بکات. پەیوەست بە ئێستای پرۆسەکە پەروین بوڵدان ئەندامی شاندی ئیمراڵیی دەم پارتی بەشداری بەرنامەی 'گوندەم'ـی مەدیا خەبەر تیڤی بوو. بوڵدان دەربارەی دیدارەکەی ٣ـی تشرینی یەکەم کە لەگەڵ عەبدوڵا ئۆجەلان ئەنجام درا زانیاری خستەڕوو. پەروین بوڵدان گوتی: "وەک شاندەکە سەردانی ئیمراڵیمان کرد. بەڕێز ئۆجالان چالاک، بە مۆراڵ و بە خۆ باوەڕبوو. دیدارێکی درێژ و بەرهەمدارمان ئەنجام دا. ئۆجالانێکی تەندرووست، بە بڕیار و بە جۆشمان بینین." بوڵدان ڕایگەیاند لەگەڵ زیندانیانی دیکەی ئیمراڵییدا دیدارێکی کورتیان پێکهێناوە و ئەمەی گوت: "هەڤاڵ حامیلی یەڵدر نەشتەرگەرییەکی بچووکی تێپەڕکردبوو، بەڵام کاتێکی هاتنی ئێمەی بیست  بەشداری دیدارەکە بوو. تەندرووستی زیندانییەکانی دیکەش باش بوو. لە هەلومەرجی بەڕێز ئۆجالاندا هێشتا هیچ گۆڕانکارییەک ڕووی نەداوە." بوڵدان لە هەڵسەنگاندنی بۆ پرۆسەکە ئەمەی گوت: "ئەو بانگەشانەی کە دەڵێن پرۆسەکە پەکی کەوتووە دوورن لە ڕاستییەوە. هەرچەندە لەسەرخۆیش بێت، بەڵام پرۆسەکە بەردەوامە. باشترکردنی هەلومەرجی کارکردنی بەڕێز ئۆجالان زۆر گرنگە. کاتێک هەلومەرجەکە گۆڕا دەتوانێت ڕاستەوخۆ بەشدری پرۆسەی ئاشتی ببێت." 'دەبێت هەردوولا بە خێرایی پێکەوە هەنگاو بنێت' بوڵدان باسی لەوەکرد ڕێبەر ئاپۆ لە کۆتا دیداردا گوتی پرۆسەکە لە قۆناغێکی یەکلاکەرەوەدایە و ئەمەی گوت: "بەڕێز ئۆجالان گوتی پێویستە پێکەوە هەنگاوی گرنگ بگیرێتەبەر، بە گرنگی تیشکی خستەسەر بابەتەکە. هۆشداریشیدا لەوەی گەر پێکەوە هەنگاوەکان نەگیرێتەبەر، ئەوا گرووپ و لایەنە دژەکانی پرۆسەکە بەهێزتر دەبن، هەموو کاتێک ئەم هۆشدارییە ئەدات. هەڵسەنگاندنی ئەوانەی کە دەیانەوێت پرۆسەکە تێکبدەن و ڕێگری بۆ درووستکەن و تا ئاستی کودەتاش دەکرێت بڕوات. دەمەوێت بڵێم نابێت پرۆسەکە دوابخرێت، پێویستە پێکەوە هەنگاوی خێرا بنرێت و ئاوا خاو بەڕێوەچوونی پرۆسەکە جێگەی 'مەترسییە'. لە دیدارەکاندا هەمیشە جەخت لەسەر ئەمە کراوەتەوە. شێوازی کارکردنی کۆمیسیۆن ڕەخنە دەکەین. هەمووکات دەڵێین دەبێت هەنگاوی پێویستی یاسایی بنرێت و گرنگە بۆ هەموارکردنەوەی یاساییش راوەستە بکات. پێویستە هەستیارییەکانی پرۆسەکە تێپەڕ بکرێت. ڕەنگە بە لەبەرچاوگرتنی هەموو ئەم هەستیارایانە پرۆسەکە بە هێواشی بڕوات، بەڵام دەبێت هەم لە هەلومەرجی بەڕێز ئۆجالاند گۆڕانکاری بکرێت و هەمیش پرۆسەی کۆمیسیۆن خێراتر ببێت و کارەکانی بە کۆتا بهێنێت. هاوکات کەوتووینەتە قۆناغێکەوە کە دەبێت چوارچێوەی یاسایی داڕێژرێت. بێگومان کۆمەڵگەیش لە نزیکەوە ئەم گۆڕاکاریانە دەبینی. لە لایەکەوە بێباوەڕەییەک بە پرسەکە هەیە و لە لایەکی دیکەشەوە بەشێک لە کۆمەڵگە هەن ڕەنخەی توند دەکەن. دەیڵێمەوە دەبێت هەردوو لایەن پێکەوە هەنگاوی خێرا بنێنن." "پێویستە کۆمیسیۆن بچێتە ئیمراڵی" پەروین بوڵدان ڕایگەیاند، ئەو کۆمیسیۆنەی کە لە چوارچێوەی پرۆسەکەدا لە پەرلەمان دامەزرا، بەرەو کۆتایی قۆناغی گوێگرتن دەچێت و لەوانەیە هەفتەی داهاتوو بە گوێگرتن لە ژنان و گەنجان، ئەم قۆناغە بە تەواویی کۆتایی پێ بێت. بوڵدان ئاشکرای کرد، کە کۆمیسیۆن لە بەردەوامییدا جارێکی تر گوێ لە وەزیری دەرەوە و سەرۆکی میت ئیبراهیم کاڵن دەگرێت و وتی: "دوای ئەوە باس لەوە دەکرێت، کە قۆناغی گوێگرتن کۆتایی دێت. هیوادارین دواتر کۆمیسیۆن بچێتە ئیمراڵی و دیدار لەگەڵ بەڕێز ئۆجالاندا بکات. لەو بارەیەوە بەڕێز ئۆجالانیش خاوەن هیوایەکی گەورەیە. لە دوایین دیدارماندا جارێکی تر بۆچوونەکانی لەسەر کۆمیسیۆن و ئەرکەکانی و چوونی بۆ ئیمراڵی خستەڕوو. ئاماژەی بەوە کرد، کە ئەو کۆمیسیۆنەی لە پەرلەمان دامەزراوە زۆر گرنگە. لە چەند دیداری ڕابردوودا ئەمەی بە شێوەیەکی بەردەوام باسکرد. ئەو لە نزیکەوە چاودێریی کارەکانی کۆمیسیۆن دەکات. لە هەموو دیدارێکدا، بەتایبەت لە شاندەکەی ئێمەوە، زانیاری لە بارەیەوە وەردەگرێت. لە کۆتا دیداردا ڕایگەیاند، کە ئەو ئاگادارە کە کات زوو تێدەپەڕێت و وتی، 'پێویستە کۆمیسیۆن بێتە ئیمراڵی.' بەڕێز ئۆجالان داوای ئەوە دەکات، کە ڕیتمی پرۆسەی ئاشتی و چارەسەری خێرا بکرێت. ڕایگەیاند، کە چوونی کۆمیسیۆن بۆ ئیمراڵی دەتوانێ ئەم ڕیتمە خێرا بکات. پێویستە کۆمیسیۆن دوای گوێگرتنەکان دیدار لەگەڵ بەڕێز ئۆجالاندا بکات، بەڕێز ئۆجالانیش چاوەڕێی ئەوەیە. تاوەکو ئێستا بەروارێکی ڕوون بوونی نییە. هیوادارین کە دوای یەک بۆ دوو هەفتەی تر، دوای کۆتاییهاتنی گوێگرتنەکان، شاندە پێنج کەسییەکەی ناو کۆمیسیۆن بچێتە ئیمراڵی." "پلان وایە شاندێکی پێنج کەسی بچێت" پەروین بوڵدان دەربارەی ئەندامانی کۆمیسیۆن کە چاوەڕوان دەکرێت بچنە ئیمراڵی هەڵسەنگاندنی کرد و وتی: "پلان وایە کە شاندێکی پێنج کەسی، کە لە نوێنەرانی پارتە خاوەن گرووپەکان پێک دێت بچێت. ئەو زانیارییانەی کە پێمان دراوە ئەوەیە. لە پەرلەمان ئەو پارتانەش هەن، کە گرووپیان نییە، ئەوانیش لە کۆمیسیۆندا بەشدارن. بەڵام ئەوەی کە داوا بکرێت لەو کەسانە ئاخۆ بچن یان نا، زانیارییەکی تەواو بوونی نییە. بەڵام لەبەرئەوەی نوێنەرانی پێنج پارتی سیاسی هەن، کە گرووپیان هەیە، بێگومان لە هەر یەک لەوان کەسێک دەچێت. ئەوەی کە ئاخۆ ئەوانەی گرووپیان هەیە بچن یان نا، دەمەوێت ڕایبگەیەنم کە هیچ شتێکی ئاشکرا لەم بارەیەوە بوونی نییە. ئەگەری چوونی بەڕێز نوعمان کورتولموش بۆ دوورگەکە بوونی نییە. شتێکی وەها باس نەکراوە. بەڕێز ئۆجالانیش باسی لەوە نەکرد. تەنها پلانی ئەوە هەیە، کە شاندە پێنج کەسییەکە، کە لە ئەندامانی کۆمیسیۆن پێکدێت، بچێت."  

به‌رپرسی مه‌كته‌بی رێكخستنی كه‌ركووك - گه‌رمیانی پارتی ده‌ڵێ، پێشبینی ده‌كه‌ین ده‌نگی پارتی له‌ كه‌ركووك زیاد بێت و ئاماژه‌ی بۆ ئه‌وەش كرد كه‌ سبه‌ی کەرنەڤاڵێکی گەورەی جەماوەریی ئەنجام دەدەین بۆ ناساندنی کاندیدەکانمان لە سنووری کەرکووک، ئەمەش دەبێتە دەستپێکی کەرنەڤاڵ و ئاهەنگە گەورەکانی پارتی بۆ ئەم هەڵبژاردنە. هیوا ئه‌حمه‌د مسته‌فا، ئه‌ندامی مه‌كته‌بی سیاسی و به‌رپرسی مه‌كته‌بی ڕێكخستنی كه‌ركووك - گه‌رمیانی پارتی، تایبه‌ت به‌ چۆنیه‌تی به‌ڕێوه‌چوونی هه‌ڵمه‌تی بانگه‌شه‌ی هه‌ڵبژاردن له‌ سنووری بازنه‌ی كه‌ركووك و تایبه‌تریش بانگه‌شه‌ی پارتی له‌و سنووره‌، بۆ ماڵپه‌ڕی فه‌رمیی پارتی دیموكراتی كوردستان گوتی، "بانگه‌شه‌ی هه‌ڵبژاردن له‌ سنووری كه‌ركووك به‌ شێوه‌یه‌كی هێمن به‌ڕێوه‌ ده‌چێت، به‌ڵام چه‌ند ڕۆژێكه‌ گرووپێک كه‌ به‌داخه‌وه‌ جلوبه‌رگی كوردییان له‌به‌ره‌ و ناشزانین كوردن یان نا، له‌ چه‌ند گرته‌یه‌كی ڤیدیۆیی ده‌رده‌كه‌ون وێنه‌ی كاندیدانی پارتیمان ده‌شێوێنن، ئه‌وه‌ بۆ ئێمه‌ جێگه‌ی نیگه‌رانییه‌، ئه‌گه‌ر به‌رده‌وامی هه‌بێت ناچارین سكاڵا تۆمار ده‌كه‌ین. به‌رپرسی مه‌كته‌بی رێكخستنی كه‌ركووك - گه‌رمیانی پارتی ده‌شڵێت، ئێمه‌ 24 كاندیدمان له‌ بازنه‌ی كه‌ركووك هەیە، کە پێكهاتوون له‌ 11 ئافره‌ت و 13 پیاو، پێشبینی ده‌كه‌ین به‌راورد به‌ هه‌ڵبژاردنه‌كانی ڕابردوو، ده‌نگی پارتی له‌ سنووری كه‌ركووك زیاد بكات. هیوا ئه‌حمه‌د مسته‌فا ئاماژه‌ی بۆ ئه‌وەش كرد، ڕۆژانه‌ ده‌چینه‌ ناو خه‌ڵك و كاندید و ئۆرگانه‌كانی پارتیمان سه‌ردانی هاووڵاتیان ده‌كه‌ین له‌ هه‌موو ناوچه‌كانی سنووری پارێزگای كه‌ركووك، پارتی زۆر قوربانیی به‌خشیوه‌ له‌ پێناو كوردستانیبوونی كه‌ركووك و هه‌موو ناوچه‌ كوردستانییه‌كانی دیكه‌، خه‌ڵكیش هه‌ڵوێست و داكۆكیی پارتی له‌به‌رچاوه‌ له‌باره‌ی كه‌ركووك و ئه‌و نه‌هامه‌تیانه‌ی به‌سه‌ر خه‌ڵكی كه‌ركووكدا هاتوون. په‌یوه‌ست به‌ ئه‌نجامدانی کەرنەڤاڵیه‌ جەماوەریه‌كه‌ی سبه‌یش، هیوا ئەحمەد مستەفا گوتی، "سبه‌ی شەممە لە گەڕەکی شۆریجەی شاری کەرکووک کەرنەڤاڵێکی گەورەی جەماوەریی ئەنجام دەدەین بۆ ناساندنی کاندیدەکانمان لە سنووری کەرکووک بۆ هەڵبژاردنی پەرلەمانی عێراق، ئەمەش دەبێتە دەستپێکی کەرنەڤاڵ و ئاهەنگە گەورەکانی پارتی بۆ ئەم هەڵبژاردنە.