شاناز حەسەن

بەیانی ئەمڕۆ هەینی، لە شەقامی 30 مەتریی هەولێر هۆتێلێک بەناوی هۆتێل فەرید دەسووتێت و بەهۆیەوە دوو ژن گیانیان لەدەستداوە. 

ئەمڕۆ هه‌ینی 17ی ئه‌یلوولی 2021،  سەركەوت كاڕەش، وتەبێژی بەرگری شارستانی هەولێر بە هاوڵاتی وت:"  دوو ژنی سوری لە روداوەكەدا خنكاون و گیانیان لەدەستداوە و تەنیا پاسپۆرتەكەیان بەجێماوە، بۆیە پۆلیس لەو ڕێگەیەوە سەرقاڵی لێكۆڵینەوەیە لە تەواو وردەكاری روداوەكە و هۆكاری ئاگرەكە بۆ وا زوو بەو شێوە خێرایە تەشەنەی كردووە".

وتەبێژی بەرگری شارستانی هەولێر، ئاماژەی بۆ ئەوەكرد لە ڕوداوی ئاگرەكەوتنەوەكەدا دوكانێكیش لەبەشی پێشەوەی هۆتێلەكە بوە سوتاوە و  یەك ئوتۆمبێل و ماتۆرسكیلێك سوتاوە و  زتی:"زیانەكان تائێستا هەژمار نەكراون ئەمانە تەنیا زانیاری سەرەتاین".

سەركەوت كاڕەش ئەوەشی رونكردەوە ئەو ئوتۆمبێلەی سوتاوە لەجۆری كیا بووە.

ناوبراو وتیشی:" لەسەرەتای رووداوەکە تیمەکانی بەرگریی شارستانی گەیشتوونەتە بەردەم هۆتێلەکە و توانیویانە ئاگرەکە کۆنترۆڵبکەن و رێگە نەدەن ئاگرەلە تەشەنە بستێنێت بۆ نهۆمەکانی دیکە و هۆتێلەکە بە تەواوی بسووتێت".

سەركەوت كاڕەش جەختی لەوەشكردەوە بە 6 تیمی بەرگری شارستانی هەوڵی ڕزگاركردنی ئەو كەسانە دراوە كەلە ناو هۆتێلەكەدا بون.

ئەو شوێنەی کە ئاگرەکەی لێکەوتووەتەوە نهۆمی خوارەوەی هۆتێلەکە بووە و وەک شوێنێکیش بووە بۆ هەڵگرتنی کەلوپەل و کەرەستەی رەنگکردی خانوو. 

هۆتێل فەرید، لە شەقامی 30 مەتری هەولێرە، یەکێکە لە هۆتێلە کۆنەکانی هەولێر.