هاوڵاتی - هێزەکانی هاوپەیمانان هاوكاری داراییان خستە سەر هەژماری وەزارەتی پێشمەرگە. - سبەی هاوكاری دارایی هاوپەیمانان دابەش دەکرێت. هێزەکانی هاوپەیمانان هاوكاری داراییان خستە سەر هەژماری وەزارەتی پێشمەرگە بۆ مانگی تشرینی یەكەم. وەزارەتی پێشمەرگە لە ڕاگەیەندراوێكدا بڵاویكردەوە هاوپەیمانان هاوكاری داراییان خستوەتە سەر هەژماری وەزارەتی پێشمەرگە بۆ مانگی (تشرینی یەكەم)، ڕێکارە دارایی و ژمێریارییەکانی ئەنجام داون سبەی ئەو هاوكارییە دابەش دەکرێت. رونیشیكردەوە دوای ئەوەی هاوکاری هێزەکانی هاوپەیمانان بۆ هێزی پێشمەرگە خرایە سەر هەژماری وەزارەتی پێشمەرگە، بەڕێوەبەرایەتی گشتی بودجە و بەرنامەکان (ژمێریاری سەربازی)، ڕێکارە دارایی و ژمێریارییەکانی ئەنجام داون وسبەی پێنج شەممە 7ی (تشرینی دووەم) ، هاوکاری بۆ مانگی (تشرینی یەكەم) دابەش دەکرێت. نزیکەی 50 هەزار پێشمەرگە مانگانە سودمەند دەبێت لە هاوکاری دارایی هاوپەیمانان و بڕیارە ئەو هاوكارییە تاوەکو سەرەتای ساڵی داهاتو بەردەوام بێت.
هاوڵاتی - لە خولی ئه‌ستێره‌كانی عێراق یانەی نەورۆز بەرامبەر یانەی گەرمە یاری دەكات - یاریەكە لە یاریگای نێودەوڵەتی نەورۆز لە سلێمانی بەڕێوەدەچێت. سبەینێ رۆژی چوارشەممە 6/11/2024 كاتژمێر دووی پاشنیوەڕۆ لە خولی ئه‌ستێره‌كانی عێراق، یانەی نەورۆز بەرامبەر یانەی گەرمە یاری دەكات. یاریەكە لە یاریگای نێودەوڵەتی نەورۆز لە سلێمانی بە ئامادەبوونی لاهور شێخ جەنگی سەرۆكی بەرەی گەل بەڕێوەدەچێت. شایانی باسە یاریگای نێودەوڵەتی نەورۆز لەسەر ئەركی لاهوڕ شێخ جەنگی سەرۆكی بەری گەل و سەرۆكی یانەی نەورۆز درووستكراوە بەپێی ستانداردە نێودەوڵەتیەكان.
هاوڵاتی كۆمه‌ڵی دادگه‌ريى - بایكۆتكردنی په‌رله‌مان بڕیاری كۆتایی كۆمه‌ڵی دادگه‌ری-یه. - ئه‌م هه‌ڵبژاردنه دیزاین كراوه و ئه‌وه‌ی به‌ده‌ستهاتووه مافی خۆمان نییه كۆمه‌ڵی دادگه‌ری رایگەیاند هەرچەندە پارتی نیگەرانی دەربڕیوە لە كشانەوەمان لە پەرلەمانی هەرێمی كوردستان، بەڵام ئێمە سوورین لەسەر بڕیارەكەمان. محه‌مه‌د حه‌كیم وته‌بێژی كۆمه‌ڵی دادگه‌ریی كوردستان تایبەت بە هاوڵاتی راگەیاند پارتی شاندێكی باڵای ناردووە بۆ لای عەلی باپیر سەرۆكی كۆمەڵی دادگەری و نیگەرانی خۆیان دەربڕیوە لە بڕیاری كشانەوەمان لە پەرلەمانی هەرێم. وتيشى: سه‌رۆكی كۆمه‌ڵ بۆی روونكردوونه‌ته‌وه كه ساخته‌كاریمان لێكراوه و ئه‌م هه‌ڵبژاردنه دیزاین كراوه و ئه‌وه‌ی به‌ده‌ستهاتووه مافی خۆمان نییه، به‌ڵگه‌یه‌كی زۆر هه‌یه و تانه‌مان له ئه‌نجامه‌كان داوه و ئه‌مه‌ش یه‌كه‌مجار نییه بۆیه ناچاربووین ئه‌م هه‌ڵوێسته وه‌ربگرین و بایكۆتی په‌رله‌مان بكه‌ین. ئاشكراشیكرد كه سه‌رۆكی كۆمه‌ڵ به وه‌فده‌كه‌ی پارتی راگه‌یاندووه بایكۆتكردنی په‌رله‌مان بڕیاری كۆتایی كۆمه‌ڵی دادگه‌ری-یه و سوورن لەسەر بڕیارەكەیان. كۆمه‌ڵی دادگه‌ریی كه له هه‌ڵبژاردنی خولی شه‌شه‌می په‌رله‌مانی كوردستان سێ كورسی به‌ده‌ستهێناوه، بڕیاریداوه به‌شداری په‌رله‌مانی نوێ نه‌كات و بكشێته‌وه.
هاوڵاتی -هەفتەیەک مۆڵەت به مامۆستاى کوردی کەرکووک دراوه بۆ پڕکردنەوەی فۆرمى هەژماری من. - نزیکەی 1500 مامۆستا و فەرمانبەر فۆرمی هەژماری من یان پڕنەکردووەتەوە. - ئەگەر پڕی نەكەنەوە خۆیان بەرپرسیار دەبن لەوەی کێشە بۆ مووچەکانیان دروست بکرێت. بەڕێوەبەرایەتی بەشی خوێندنی کوردی لە کەرکووک رایگەیاند هەفتەیەک مۆڵەت به مامۆستا و فەرمانبەرى بەڕێوەبەرایەتییەکەیان دراوه بۆ پڕکردنەوەی فۆرمى هەژماری من. کامەران عەلی بەڕێوەبەری بەشی خوێندنی کوردی لە کەرکووک لە لێدوانێكی رۆژنامەوانیدا رایگەیاند نزیکەی 1500 مامۆستا و فەرمانبەر لە بەڕێوەبەرایەتییەکەیان ماون کە هێشتا فۆرمی هەژماری من یان پڕنەکردووەتەوە و هەفتەیەک مۆڵەتیان پێدراوە بۆ پڕکردنەوەی فۆرمەکە. وتيشى: ئەو مامۆستا و فەرمانبەرانەی کە فۆرمی هەژماری من یان پڕنەکردووەتەوە ئاگادارمان کردوونەتەوە کە لە ماوەی هەفتەیەکدا فۆرمی هەژماری من پڕبکەنەوە، ئەگەرنا دواتر خۆیان بەرپرسیار دەبن لەوەی کە لە وەزارەتی داراییەوە کێشە بۆ مووچەکانیان دروست بکرێت. رونیشیكردەوە نزیکەی 3000 مامۆستا و فەرمانبەر لە بەڕێوەبەرایەتیی خوێندنی کوردی لە کەرکووک بە دوو قۆناخ فۆڕمی هەژماری من یان بۆ وەرگرتنی کارتی (تی بی ئای) پڕکردووەتەوە و نزیکەی 1500 مامۆستا و فەرمانبەر ماون کە ئەو فۆرمانە پڕبکەنەوە. لە دوای هەڵبژاردنی خولی شەشەمی پەرلەمانی هەرێمی كوردستان، كێشە لەسەر هەژماری من لە نێوان پارتی و یەكێتی درووستبوە و یەكێتی داوای هەڵوەشاندنەوەی دەكات و پارتیش بە بەشێك لە تەوتینی موچەی فەرمانبەرانی هەرێم ناوی دەبات، لەكاتێكدا زۆربەی لایەنەكان پێیان وایە هەژماری من ناچێتە بواری تەوتینەوە.
هاوڵاتی - كه‌شه‌كه جێگیر ده‌بێت و ئاسمان بۆ ساماڵ و په‌ڵه هه‌ور ده‌گۆڕێت. - پله‌كانی گه‌رما به‌رز ده‌بنه‌وه. به‌ڕێوه‌به‌رایه‌تی گشتی كه‌شناسی و بومه‌له‌رزه‌زانی هه‌رێم پێشبینیكرد كەش و هەوای هەرێمی كوردستان ئاسایی ببێتەوە. به‌ڕێوه‌به‌رایه‌تیەكە له‌ڕاگه‌یه‌ندراوێكدا بڵاویكرده‌وه ئه‌مڕۆ سێشه‌ممه ئاسمان نیمچه هه‌ور و ته‌م ده‌بێت تا كاته‌كانی نیوه‌ڕۆ، له‌گه‌ڵ ئه‌گه‌ری نمه بارانێكی كه‌م له‌سه‌ر هه‌ندێك ناوچه شاخاوییه به‌رزه‌كان، له دوای نیوه‌ڕۆ كه‌شه‌كه جێگیر ده‌بێت و ئاسمان بۆ ساماڵ و په‌ڵه هه‌ور ده‌گۆڕێت، له‌گه‌ڵ ئه‌گه‌ری دوباره دروستبونه‌وه‌ی ته‌م له هه‌ندێك ناوچه‌دا، پله‌كانی گه‌رما به‌رز ده‌بنه‌وه به‌ڕێژه‌ی 1-2 پله به‌راورد به تۆماركراوه‌كانی دوێنێ. ئاماژه‌ی به‌وه‌شكردوه، سبه‌ی چوارشه‌ممه ئاسمان ساماڵ و په‌ڵه هه‌ور ده‌بێت ، له‌گه‌ڵ دروست بونی ته‌م له‌كاته‌كانی به‌یانی زودا، پله‌كانی گه‌رما كه‌مێك به‌رزتر ده‌بنه‌وه به‌راورد به تۆماركراوه‌كانی ئه‌مڕۆ. رونیشیكردەوە به‌رزترین پله‌كانی گه‌رمای پێشبینیكراو به پله‌ی سیلیزی ، له هه‌ولێر 22 پله، سلێمانی 19 پله، دهۆك 22 پله، كه‌ركوك 23 پله، هه‌ڵه‌بجه 21 پله، زاخۆ 22 پله، حاجی ئۆمه‌ران 13 پله، سۆران 20 پله، گه‌رمیان 25 پله‌ی سیلیزی.
عیماد جەمیل - تائێستا بڕیاری كۆتایی لەسەر دەرئەنجامی هەڵبژاردنی خولی شەشەمی پەرلەمانی هەرێمی كوردستان نەدراوە. - دوا بڕیار بۆ دەرئەنجامی هەڵبژاردنەكانی هەرێم لای دەستەی دادوەریە. - دەستەی دادوەری تایبەت بە هەڵبژاردنەكان بە تانەكاندا دەچێتەوە و یەكلایی دەكاتەوە. كۆمسیۆنی باڵای سەربەخۆی هەڵبژاردنەكانی عێراق رایگەیاند دوا بڕیار بۆ دەرئەنجامی هەڵبژاردنەكانی هەرێم لای دەستەی دادوەریە. عیماد جەمیل سەرۆكی تیمی راگەیاندنی كۆمسیۆنی باڵای سەربەخۆی هەڵبژاردنەكانی عیراق تایبەت بە هاوڵاتی راگەیاند تائێستا بڕیاری كۆتایی لەسەر دەرئەنجامی هەڵبژاردنی خولی شەشەمی پەرلەمانی هەرێمی كوردستان نەدراوە. وتيشى: دوای ئەوەی دەستەی دادوەری تایبەت بە هەڵبژاردنەكان بە تانەكاندا دەچێتەوە و یەكلایی دەكاتەوە، دواجار كۆمسیۆنی هەڵبژاردنەكان دەرئەنجامی كۆتایی پەسەند دەكات. هەڵبژاردنەكانی خولی شەشەمی پەرلەمانی هەرێمی كوردستان لە 18 و 20ی تشرینی یەكەمی 2024 لەلایەن كۆمسیۆنی باڵای سەربەخۆی هەڵبژاردنەكانی عێراقەوە رێكخراو و حەوت لایانی سیاسی تانەیان لێداوە و ئاشكرایان كردووە كە خروقات و ساختەكاریەكی زۆری تیادا كراوە و داوای هەڵوەشاندنەوەی هەڵبژاردنەكان دەكەن.
هاوڵاتی -چەند پاسەوانێکی ئەفسەرێكی یەکێتی هێرش دەكەنە سەر رۆژنامەنووسێك و بەسەختی برینداری دەكەن. - پاسەوانەكان بە چەقۆ و دەمانچە هێرشيان كردووەتە سەر رۆژنامەنووسەكە و بە سەختی برینداریان كردووە. - لەگەڵ جێگری سەرۆکی حکومەت لەسەر هێڵین تا ئیجرائات بەرامبەر ئەو ئەفسەرە بکرێت. چەند پاسەوانێکی ئەفسەرێكی یەکێتی هێرشیان كردە سەر رۆژنامەنووسێك و بەسەختی برینداریان كرد. دەزگای میدیایی بوار لە بەیاننامەیەكدا بڵاویكردەوە، دوای ئەوەی وریا عەبدولخالق ڕۆژنامەنوسی دەزگای میدیایی بوارو هەرێمی کوردستان لە سایتی بوار هەواڵێکی لەسەر ڕێگری ئەفسەرێکی یەکێتی نیشتیمانی بڵاوکردەوە کە بووەتە هۆی ڕێگری لە جێبەجێکردنی پڕۆژەیەکی خزمەتگوزاری لە گوندی قەشقەی سەر بەناحیەی قادر کەرەمی قەزای چەمچەماڵ، چەند پاسەوانێکی ئەو ئەفسەرەی یەکێتی بەشێوەیەکی دڕندانە پەلەماری ڕۆژنامەنوسەكەیان داوە و بە سەختی برینداریان كردووە. رونیكردەوە پاسەوانەكان بە چەقۆ و دەمانچە هێرشيان كردووەتە سەر رۆژنامەنووسەكە و بە سەختی برینداریان كردووە و لەگەڵ لایەنە پەیوەندیدارەکان و جێگری سەرۆکی حکومەت لەسەر هێڵین تا ئیجرائات بەرامبەر ئەو ئەفسەرە بکرێت وژیان و سەلامەتی ڕۆژنامەنوس وریا عەبدولخالق دەخەینە ئەستۆی لایەنە پەیوەندیدارەکان و ئەو ئەفسەرەی ئەو تاوانەی ئەنجامداوە ئەندامی یەکێتی نیتشیمانی کوردستانە و ناوی تەحسین تەها محەمەدە و بە پلەی عەقید لە فیرقەی دووی هێزەکانی پێشمەرگە دەوام دەکات. داواشيان لە نەتەوە یەکگرتووەکان و ڕێکخراوە جیهانییەکانی تایبەت بە ئازادی ڕادەربرین و ڕێکخراو و سەندیکاکانی تایبەت بە داکۆکیکردن لە مافی ڕۆژنامەنوسان و کونسوڵ و نێردەی وڵاتانی جیهانی كرد لە هەرێمی کوردستان کە هاوکارمان بن لە بە سزاگەیاندنی ئەو تاوانبارانەی کە ناو و ناسنامەیان ئاشکرایەو پێشلکردنێکی ئاشکرای یاسا بەرکارەکانی هەرێمی کوردستانیان کردووەو هەوڵی تیرۆرکردنی ڕۆژنامەنوسێکی کوردستانیان داوە.
هاوڵاتی - بەرەی گەل و چەند لایەنێكی دیكە داوای هەڵوەشاندنەوەی ئەنجامی هەڵبژاردنی پەرلەمان دەكەن. - لەو هەڵبژاردنەدا ساختەكاری كراوە و ئەوەی هەیە تەعبیر نیە لە دەنگی دەنگدەرانی هەرێمی كوردستان - تانەیان لە ئەنجامەكانی هەڵبژاردن داوە و تەواوی بەڵگەكانیان خستوەتەڕو. - هەماهەنگی نێوان ئەو لایەنانە بەردەوام دەبێت و هەڵوێستی هاوبەشیان دەبێت. بەرەی گەل و چەند لایەنێكی سیاسی دیكە داوایانكرد ئه‌نجامی هه‌ڵبژاردنی په‌رله‌مانى هەرێمی كوردستان هه‌ڵبوه‌شێنرێته‌وه. بەرەی گەل و یەکگرتو و ڕەوتی هەڵوێست و کۆمەڵ و بزوتنەوەی گۆڕان و بزوتنەوەی پەیوەندی ئیسلامی و بزوتنەوەی ئیسلامی لەسەر ئاستی مەکتەبی هەڵبژاردن لە بارەگای ئەنجومەنی باڵای کۆمەڵی دادگەریی کوردستان كۆبونه‌وه و داوایانكرد ئه‌نجامی هه‌ڵبژاردنی په‌رله‌مان هه‌ڵبوه‌شێنرێته‌وه. نوێنەری ئەو لایەنانە لە كۆنگرەیەكی ڕۆژنامەوانیدا لە شاری سلێمانی ڕایانگەیاند، ئێمە هاوڕابوین لەسەر ئەوەی ساختەكاری كراوە و هەریەك لە لایەنەكان لە ئۆفیسەكانی كۆمسیۆنى باڵای سەربەخۆی هەڵبژاردنەكان تانەی خۆیان پێشەكەش كردوە لە هەولێر و سلێمانی. دووپاتیانكردەوە لەو هەڵبژاردنەدا ساختەكاری كراوە و ئەوەی هەیە تەعبیر نیە لە دەنگی دەنگدەرانی هەرێمی كوردستان و ئیرادەی دەنگدەر دیار نیە بە ئەنجامەكانی دەنگدانەوە. رونیانكردەوە تانەیان لە ئەنجامەكانی هەڵبژاردن داوە و تەواوی بەڵگەكانیان خستوەتەڕو، چاوەڕوانی بڕیاری دادگای باڵای هەڵبژاردن بە جددیەوە بەداوی تانەكانی ئەواندا بڕوات و ڕێڕەوی ئاسایی و ياساییان بۆ وەربگرێت. ئەوەشیان خستەڕو، هەماهەنگی نێوان ئەو لایەنانە بەردەوام دەبێت و بۆ سەرجەم پرسەكانی بواری هەڵبژاردن و هەرپرسێكی دیكەی پەیوەنديدار كە دێتەپێشەوە دادەنیشن و هەڵوێستی هاوبەشیان دەبێت.
هاوڵاتی لاهور شێخ جەنگی: - تێپەڕبوونی هەڵبژاردنەکان بەو هەموو ساختەکارییەوە پرسیاری جدی لەسەر مەشروعییەتی پرۆسەی سیاسی دروست دەکات. - ساختەکارییەكان گوزارشتە لە شکستی حوکمڕانیی و ترسی حزبەکانی دەسەڵات لە سەنگی راستەقینەی خۆیان. - پێویستە تانەی لایەنە سیاسییە بەشداربوەکانی ئەم هەڵبژاردنە لەبەرچاو بگیرێ. لاهور شێخ جەنگی سەرۆكی بەرەی گەل و عەلی باپیر سەرۆكی كۆمەڵی دادگەری رایانگەیاند ئەو ساختەکاریی و دیزاینەی بۆ هەڵبژاردنەکانی ٢٠ ی ئۆکتۆبەر کراوە گوزارشتە لە شکستی حوکمڕانیی. لاهۆر شێخ جەنگی لە ڕاگەیەندراوێكدا بڵاویكردەوە، ئەمڕۆ لە بارەگای بەرەی گەل لە شاری هەولێر، پێشوازیمانکرد لە مامۆستا عەلی باپیر سەرۆکی کۆمەڵی دادگەری و وەفدی یاوەری ولە دیدارێکی دۆستانەدا، پێکەوە بیروڕامان ئاڵوگۆڕکرد سەبارەت بە ئەنجامەکانی هەڵبژاردنی ٢٠ ی ئۆکتۆبەر و ئەو ساختەکارییە بەرفراوانەی ئەنجامدراوە و تەئکیدمان لە هەماهەنگی نێوان کۆمەڵی دادگەری و بەرەی گەل کردەوە. وتيشى: هەردولا هاوڕا بووین لەسەر ئەوەی کە پێویستە تانەی لایەنە سیاسییە بەشداربوەکانی ئەم هەڵبژاردنە لەبەرچاو بگیرێ، جەختیشمان کردەوە لەسەر ئەو ڕاستییەی کە تێپەڕبوونی هەڵبژاردنەکانی ٢٠ ی ئۆکتۆبەر بەو هەموو ساختەکارییەوە پرسیاری جدی لەسەر کۆمسیۆنی هەڵبژاردنەکان و شەرعییەت و مەشروعییەتی پرۆسەی سیاسی دروست دەکات و متمانەی خەڵک بە دامەزراوە نیشتیمانییەکان هێندەی تر لاواز دەکات. رونیكردەوە لەو دیدارەدا لەگەڵ کۆمەڵی دادگەری، جارێکی تر ئەو راستییەمان دوپاتکردەوە کە ئەو ساختەکاریی و دیزاینەی بۆ هەڵبژاردنەکانی ٢٠ ی ئۆکتۆبەر کراوە گوزارشتە لە شکستی حوکمڕانیی و ترسی حزبەکانی دەسەڵات لە سەنگی راستەقینەی خۆیان هەر بۆیە لە هەموو هەڵبژاردنێکدا و هەر جارە و بە مۆدێل و رێکارێک پەنا بۆ ساختەکردنی ئیرادەی هاوڵاتیانی هەرێمی کوردستان دەبەن.
مونا قەهوەچی - ئەو رۆڵەی بە توركمانەكان دراوە لە هەرێمی كوردستان لە ئاستی چاوەڕوانكراودا نييه. - داوا دەكەین دوو پۆستمان پێبدرێت لە كابینەی داهاتوویی حكومەتی هەرێمی كوردستان. پارتی چاکسازیی تورکمان رایگەیاند ئەو رۆڵەی بە توركمانەكان دراوە لە هەرێمی كوردستان لە ئاستی چاوەڕوانكراودا نييه. مونا قەهوەچی جێگری سەرۆکی پارتی چاکسازیی تورکمان تایبەت بە هاوڵاتی راگەیاند ئەو پێگە و رۆڵەی بە توركمانەكان دراوە لە هەرێمی كوردستان لە ئاستی چاوەڕوانیماندا نەبووە و وەك پێویست نەبووە. داوايشيكرد دوو پۆستی خزمەتگوزاری لە كابینەی داهاتووی حكومەتی هەرێمی كوردستان بدرێت بە پارتی چاكسازی توركمان تاكو بتوانن خزمەتگوزاری پێویست پێشكەش بە هاوڵاتیان بكەن. وتيشى: بەمافی خۆمانی دەزانین كە یاریدە دەرێكیشمان لە سەرۆكایەتی هەرێمی كوردستان هەبێت و نوێنەرایەتی توركمانەكان بكەین.
هاوڵاتی - دابارین لەزۆربەی ناوچەکانی هەرێمى كوردستان به‌رده‌وام دەبێت. - پلەکانی گەرما نزمدەبنەوە وخێرایی با لەسەر خۆ- مامناوەند دەبێت به‌ڕێوه‌به‌رایه‌تی كه‌شناسی و بومه‌له‌رزه‌زانی هه‌رێمی كوردستان پێشبینیكرد دابارین بەشێوەی نمەباران لەزۆربەی ناوچەکانی هەرێمى كوردستان به‌رده‌وام بێت. بەڕێوەبەرایەتیەكە بڵاویكرده‌وه، ئه‌مڕۆ دووشه‌ممه ئاسمان نیمچە هەور بۆ هەوری تەواو دەبێت بەتایبەتی لەناوچە شاخاوییەکان، لەکاتەکانی دواینیوەڕۆ دابارین بەشێوەی نمەباران لەزۆربەی ناوچەکانی هەرێم دەبارێت هەندێکات بۆ تاوەباران و بروسکە دەگۆڕێت کاریگەری لەناوچە شاخاوییەکان زیاتر دەبێت، لەکاتەکانی ئێوارە کاریگەری بەلاوازی دەمێنێتەوە بەشێوەی نمەبارانی کەمی پچڕپچڕ لەناوچە شاخاوییەکان. رونیكردەوە، پلەکانی گەرما نزمدەبێتەوە بە (2-3) پلە بەراورد به تۆمارکراوەکانى دوێنێ، خێرایی با لەسەر خۆ- مامناوەند دەبێت و له نێوان 10 بۆ 20 كیلۆمه‌تردا ده‌بێت، ئاڕاسته‌ی با باكوری خۆرئاوا دەبێت، مەوداى بینین لەنێوان 8 بۆ 9 کیلۆمه‌تر دەبێت، بەڵام لە کات و شوێنی دابارین لە نێوان 5 بۆ 7 کیلۆمه‌تر دەبێت. باسی له‌وه‌شكرد، سبەی سێشەممە ئاسمان لەنێوان هەور و نیمچە هەور دەبێت، لەگەڵ نمەبارانی کەم کەم لەناوچە جیاجیاکانی هەرێم، پاشان بۆ کاتەکانی ئێوارە کاریگەری لاواز دەبێت بەرەو ناوچە شاخاوییە سنوریەکانی رۆژهەڵاتی هەرێم، پلەکانی گەرما نزیک دەبێتەوە بەراورد بە تۆمارکراوەکانى ئەمڕۆ.
هاوڵاتی - قەیوم بۆ گەورە شارەوانییه‌كانی مێردین و ئێلیهـ و خەلەفەتی لە باکوری کوردستان دانرا. - هێزە ئەمنییەکان لە شاری مێردین بەردەم بینای گەورەشارەوانیی شارەکەیان گەمارۆدا. - فەرمانی وەزارەتی ناوخۆى توركيا لەبارەی دانانی قەیوم گەیاندراوەتە ئەحمەد تورک هاوسەرۆکی گەورەشارەوانیی مێردین. وەزارەتی ناوخۆی تورکیا قەیومی بۆ گەورە شارەوانییه‌كانی مێردین و شارەوانیی ئێلیهـ و شارەوانیی خەلەفەتی لە روهای باکوری کوردستان دانا. میدیای فه‌رمی توركیا بڵاویكرده‌وه، به‌بڕیاری وەزارەتی ناوخۆی تورکیا، قەیوم بۆ گەورە شارەوانییه‌كانی مێردین و شارەوانیی ئێلیهـ و شارەوانیی خەلەفەتی لە روهای باکوری کوردستان دانراون. بەگوێرەی زانیارییەکان، بەیانیی ئەمڕۆ (دووشەممە، چواری تشرینی دووەم) هێزە ئەمنییەکان لە شاری مێردین بەردەم بینای گەورەشارەوانیی شارەکەیان گەمارۆدا و فەرمانی وەزارەتی ناوخۆیان لەبارەی دانانی قەیووم گەیاندووەتە ئەحمەد تورک، هاوسەرۆکی گەورەشارەوانیی مێردین. بە بڕیاری وەزارەتی ناوخۆی تورکیا، تونجای ئاککۆیون، پارێزگاری مێردین لە شوێنی ئەحمەد تورک، هاوسەرۆکی گەورەشارەوانیی مێردین دانرا. ئەحمەد تورک، لە هەژماری خۆی لە سۆشیاڵمیدیا رایگەیاند، "هەرگیز کۆڵ نادەین و لە خەبات بۆ دیموکراسی و ئاشتی و ئازادی، هەنگاو بۆ دواوە نانێین. ئێمە رێگە بە دەستبەسەرداگرتنی ئیرادەی گەل نادەین." پارێزگای مێردین دوای بڕیاری دانانی قەیووم، ئەنجامدانی هەموو جۆرە چالاکییەکی وەک خۆپیشاندان، رێپێوان، لێدوانی رۆژنامەڤانی، گردبوونه‌وه، خێوه‌تهه‌ڵدان و سه‌كۆدانانی بۆ ماوی 10 رۆژ قەدەخە کرد. لەلایەکی دیکەوە، بەیانی ئەمڕۆ قەیووم بۆ شارەوانیی ئێلیهـیش دانراوە. فەرمانی وەزارەتی ناوخۆ لەبارەی دانانی قەیووم گەیێندراوەتە گوڵستان سۆنووک، هاوسەرۆکی شارەوانی و لە شوێنی ئەو ئەکرەم جانئاڵپ، پارێزگاری ئێلیهـ بە قەیووم دانراوە. لە پارێزگای رووها، قەیووم بۆ شارەوانیی شارۆچکەی خەلفەتی دانرا و لە شوێنی محەممەد قەرەیڵان، هاوسەرۆکی شارەوانی خەلفەتی، هاکان باشئۆغڵو، قایمقامی خەلفەتی دانرا. ئەم سێ شارەوانییەی قەیوومیان لەسەر دانراوە، سەر بە پارتی یەکسانی و دیموکراسی گەلان (دەم پارتی)ـن.
هاوڵاتی - بانكی بازرگانی عێراق واژۆكردنی گرێبه‌ستێك له‌گه‌ڵ هه‌ژماری من بۆ ته‌وتینی موچه‌ی فه‌رمانبه‌رانی هه‌رێم ڕاده‌گه‌یه‌نێت. - گرێبەستەكە به‌گوێره‌ی بڕیاره‌كانی دادگای باڵای فیدڕاڵی و له‌سه‌ر بنه‌مای ڕێنماییه‌كانی سه‌رۆك وه‌زیرانی عێراقه. بانكی بازرگانی عێراق (TBI) واژۆكردنی گرێبه‌ستێك له‌گه‌ڵ پڕۆژه‌یه‌كی (هه‌ژماری من) بۆ (ته‌وتین)ی موچه‌ی فه‌رمانبه‌رانی هه‌رێمی كوردستان ڕاده‌گه‌یه‌نێت و به‌پێی گرێبه‌سته‌كه‌ش، ئه‌و گرێبه‌سته له‌چوارچێوه‌ی جێبه‌جێكردنی بڕیاری دادگای فیدڕاڵیه بۆ ته‌وتینی موچه. بانكی بازرگانی عێراق له‌ڕاگه‌یه‌ندراوێكدا بڵاویكرده‌وه، گرێبه‌ستێكیان واژۆكردوه له‌گه‌ڵ پرۆژه‌ی هه‌ژماری من بۆ ته‌وتینی موچه‌ی فه‌رمانبه‌رانی هه‌رێمی كوردستان له نێوان بانكه‌كه‌یان و حكومه‌تی هه‌رێمی كوردستان. ئاماژه‌ی به‌وه‌شكردوه، ئه‌و گرێبه‌سته به‌گوێره‌ی بڕیاره‌كانی دادگای باڵای فیدڕاڵی و له‌سه‌ر بنه‌مای ڕێنماییه‌كانی محه‌مه‌د شیاع سودانی سه‌رۆك وه‌زیرانی عێراقه بۆ پێویستی به‌شداریكردنی بانكی بازرگانی عێراقی له پڕۆسه‌ی ته‌وتینی موچه‌ی فه‌رمانبه‌رانی هه‌رێمی كوردستانی عێراق. لەلایان خۆیەوە فه‌رمانگه‌ی میدیا و زانیاری حكومه‌تی هه‌رێم بڵاویكردۆته‌وه، بانکی بارزگانیی عێراق گرێبەستی بەشداریی لەگەڵ پرۆژەی "هەژماری من" کرد و بە فەرمی گرێبەستیان لەگەڵ پرۆژەی هەژماری من کردوە تاکو لە پرۆژەکەدا بەشدار بن، کە تایبەتە پرۆسەی تەوتینی موچەی موچەخۆرانی هەرێمی کوردستان.
هاوڵاتی وه‌زاره‌تی ناوخۆ - هه‌ركه‌سێك سیمكارت به‌بێ تۆماركردن به‌ناوی كڕیار بفرۆشێت به‌مانای هاوبه‌شیكردنه له‌تاوان. - سه‌رپێچیكار به‌رامبه‌ر هه‌ر سیمكارتێكی ده‌ست به‌سه‌رداگیراو بڕی سێ ملیۆن دینار سزا ده‌درێت. - سزای ژماره‌یه‌ك فرۆشگا درا و داخران و به‌دواداچونی رۆژانه‌ش به‌رده‌وامه. وه‌زاره‌تی ناوخۆی حكومه‌تی هه‌رێمی كوردستان رایگەیاند هه‌ركه‌سێك سیمكارت به‌بێ تۆماركردن به‌ناوی كڕیار بفرۆشێت، به‌مانای هاوبه‌شیكردنه له‌تاوان و جگه له‌وه‌ش سزای گه‌وره‌ی دارایی ده‌كرێت. وه‌زاره‌تی ناوخۆ له‌ڕاگه‌یه‌ندراوێكدا بڵاویكرده‌وه، دوای كۆبونه‌وه یەكی هاوبه‌شی نێوان وه‌زاره‌تی ناوخۆ، وه‌زاره‌تی گواستنه‌وه و گه‌یاندن و حه‌وت كۆمپانیای مۆبایل و ئینته‌رنێت، به‌مه‌به‌ستی خێراكردنی رێوشوێنه‌كانی كۆنترۆڵكردنی فرۆشتنی سیمكارت له ده‌ره‌وه‌ی رێوشوێنی یاسایی تۆماركردن، لیژنه تایبه‌تمه‌نده‌كان له پارێزگا و ئیداره سه‌ربه‌خۆكان راسپێردران كه رێكاری یاسایی به‌رامبه‌ر هه‌ر فرۆشگایه‌ك بگرنه به‌ر كه سیمكارت ده‌فرۆشن بێ پرۆسه‌ی تۆماركردنی یاسایی، له‌مباره‌یه‌وه سزای ژماره‌یه‌ك فرۆشگا درا و داخران و به‌دواداچونی رۆژانه‌ش به‌رده‌وامه. ئاماژه‌ی به‌وه‌شكردوه، ئاگاداری هاوڵاتیان و فرۆشگا و بریكاری كۆمپانیاكانی مۆبایل و ئینته‌رنێت ده‌كه‌ین كه فرۆشتنی سیمكارت له بازاڕ بێ تۆماركردن، ده‌رگاكردنه‌وه و ده‌رفه‌ت دروستكردنه بۆ تاوانكاران تا به‌و سیمكارتانه تاوان ئه‌نجام بده‌ن و هه‌وڵ بده‌ن خۆیان له یاسا بشارنه‌وه، ئه‌مه‌ش به‌شداریكردنه له تاوان و وه‌زاره‌تی ناوخۆ رێكاری یاسایی ده‌گرێته‌به‌ر بۆ پاراستنی هاوڵاتیان. وه‌زاره‌تی ناوخۆ دووپاتیكردەوە ئاگادارتان ده‌كه‌ین كه رێوشوێنی یاسایی توند له‌به‌رامبه‌ر هه‌ر كه‌س و فرۆشگا و بریكارێك ده‌گیرێته‌به‌ر كه سیمكارت له بازاڕ بفرۆشێ و تۆماریان نه‌كات به ناوی كڕیار. رونیشیكردۆته‌وه، به گوێره‌ی بڕگه‌ی دوه‌م له مادده‌ی شه‌ش له رێنمایی وه‌زاره‌تی ناوخۆ ژماره (8) ی ساڵی (2021) ی هه‌مواركراو، سه‌رپێچیكار به‌رامبه‌ر هه‌ر سیمكارتێكی ده‌ست به‌سه‌رداگیراو بڕی سێ ملیۆن دینار سزا ده‌درێت، بریكارانی سه‌ره‌كی و لاوه‌كی فرۆشتنی سیمكارت پێویسته به زوترینكات خۆیان له وه‌زاره‌تی ناوخۆ/ به‌رێوه‌به‌رایه‌تی گشتی دیوان/ به‌رێوه‌به‌رایه‌تی كۆمپانیا ئه‌منییه‌كان و مۆڵه‌تپێدان تۆمار بكه‌ن. جه‌ختیشیكردۆته‌وه، تا پرۆسه‌ی تۆماركردن ته‌واو ده‌بێت، پێویسته بریكاره‌كان سیمكارت به گوێره‌ی سیستمی تۆماركردن بفرۆشن، به پێچه‌وانه‌وه فرۆشگاكانیان داده‌خرێت، به گوێره‌ی رێنمایی ئاماژه‌بۆكراوی سه‌ره‌وه پێبژاردنی دارایی ده‌درێن، هه‌روه‌ها كۆمپانیاكان مۆڵه‌تی بریكاردارێتیان لێ وه‌رده‌گرنه‌وه.
فێنك ئەحمەد فێنك ئەحمەد: - بەرەی گەل داوای كردوە تاكو وردبینی لەو ساختەكاریانە نەكرێت كە ئەنجامدراون كۆبونەوەی پەرلەمانی كوردستان نەكرێت. - ئامێرەكانی دەنگدان ژمارەیەكی زۆری دەنگدەرانی نەخوێندۆتەوە. - كۆمسیۆنی هەڵبژاردنەكانی عێراق هیچ زانیاریەكیان لەبارەی سۆفت وێری ئامێرەكەوە نیە. فێنك ئەحمەد سەرپەرشتیاری دامەزراوەی هەڵبژاردنی بەرەی گەل رایگەیاند ساختەكاریەكی زۆرمان ئاشكرا كردووە لە كۆی پرۆسەی هەڵبژاردنی خولی شەشەمی پەرلەمانی هەرێمی كوردستان. سەرپەرشتیاری دامەزراوەی هەڵبژاردنی بەرەی گەل لە لێدوانێكدا بۆ هاوڵاتی ئاشكرا كرد ئەوان دوو تانەیان لە هەڵبژاردنەكان داوە و داوایان كردوە تاكو وردبینی لەو ساختەكاریانە نەكرێت كە ئەنجامدراون، كۆبونەوەی پەرلەمانی كوردستان نەكرێت. وتيشى: تانەیان لە كۆی پرۆسەی هەڵبژاردنەكە داوە و ئامێرەكانی دەنگدان ژمارەیەكی زۆری دەنگدەرانی نەخوێندۆتەوە، سەرەڕای ئەوەی كۆمسیۆنی سەربەخۆی هەڵبژاردنەكانی عێراق هیچ زانیاریەكیان لەبارەی سۆفت وێری ئامێرەكەوە نیە. دووپاتیشیكردەوە، تانەمان لە ئەنجامی هەڵبژاردن داوە و بەردەوام دەبین لە ئاشکراکردنی ئەو ساختەکارییەی لەدەنگی دەنگدەرانی هەرێمی کوردستاندا کراوە و بەلگەیەکی زۆرمان هەیە، کە ئامێری دەنگدان دەنگێکی زۆری پوچەڵ کردووەتەوە.
