هاوڵاتی ئەمڕۆ چوارشەممە، ٢٣ی تشرینی یەکەمی ٢٠٢٤، لە سێ بڕیاری جیادا ئەنجومەنی كۆمسیارانی كۆمیسیۆنی هەڵبژاردن جوڵانەوەی نەوەی نوێ و دوو كاندیدی بە پێبژاردن سزادا. ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكان بڕیاریدا بە غەرامەكردنی (ڕامی نوری سیاوش) كاندیدی كۆتای كریستیان لە سنووری پارێزگای هەولێر بە بڕی یەك ملیۆن دینار، بەهۆی سەرپێچیكردن لە یاسا و رێنماییەكانی كۆمیسیۆن. هاوکات لە بڕیارێكی دیكەیدا سزای غەرامەی بە بڕی یەك ملیۆن دینار بەسەر (باخان ئازاد عەبدولڕەحمان)ی كاندیدی پارتی لە سنووری سلێمانی بەهەمان هۆكاری سەرەوە سەپاند. لە بڕیارێكی دیكەدا سەرەڕای سزادانی "نەوەی نوێ" بە غەرامە بە بڕی پێنج ملیۆن دینار بەهۆی پێشێلكردنی رێنمایی ڕاگرتنی بانگەشەی هەڵبژاردن، داواش لە وەزارەتی ڕۆشنبیری هەرێمی کوردستان دەكات ڕێوشوێنی پێویست بەرامبەر كەناڵی "ئێن ئاڕ تی"ی سەر جوڵانەوەكە بەهەمان هۆكار بگرێتەبەر.
هاوڵاتی ئەمڕۆ دووشەممە، ٢١ی تشرینی یەکەمی ٢٠٢٤، ئالینا رۆمانۆسكی باڵیۆزی ئەمریكا لە عێراق لەپەیامێكدا داوای لە لایەنەكانی هەرێمی كوردستان كرد كە بەبێ هیچ دواكەوتنێك پشتیوانی لە گواستنەوەی ئاشتییانەی دەسەڵات و پێكهێنانی حكومەتی نوێ بكەن. ئالینا رۆمانۆسكی لە پەیامەکەیدا دەڵێت، ئەمریكا پیرۆزبایی لە هاوڵاتییانی هەرێمی كوردستانی عێراق و سەرجەم هێزە سیاسییەكان دەكات بەبۆنەی تەواوكردنی سەركەوتووانەی هەڵبژاردنەكانی پەرلەمانی هەرێم، كارمەندانی نوێنەرایەتیی ئەمریكاش لە عێراق لە ماوەی دوو رۆژدا چاودێریی پڕۆسەی هەڵبژاردنەكانی لە ناوەندە جیاوازەكانی دەنگدان كرد. ئەوەشی خستۆتەڕوو، وڵاتەكەی دەستخۆشی لە هاوڵاتییانی هەرێمی كوردستانی عێراق دەكات بۆ پابەندبوونیان بە دیموكراسی و پێكهێنانی حكومەتی نوێ رێگا بە هەرێمی كوردستان دەدات دامەزراوە دیموكراسییەكانی بەهێزبكات.
هاوڵاتی نێچیرڤان بارزانی سەرۆکی هەرێمی کوردستان لە ڕاگەندراوێکدا ڕایگەیاند، گه‌لى كوردستان به په‌رۆشه‌وه چاوه‌ڕێی ئه‌وه‌يه دوای په‌سه‌ندکردنی ئه‌نجامه‌کان، لايه‌نه سياسييه‌كان به زووترين كات حكومه‌ت پێكبهێنن، حكومه‌تێك كه بتوانێت سه‌قامگيريى پته‌وتر و ئابوورييه‌كى به‌هێز بهێنێته ئاراوه. دەقی پەیامەکەی نێچیرڤان بارزانی: ڕاگەیەنراوێک لە سەرۆکی هەرێمی کوردستانەوە هاووڵاتييانى خۆشه‌ويست، به‌ڕێزان لايه‌نه سياسييه‌كان و پێكهاته‌كانى كوردستان، به‌بۆنه‌ى كۆتاييهاتن و سه‌ركه‌وتنى هه‌ڵبژاردنى په‌رله‌مانى كوردستانه‌وه، به گه‌رمى پيرۆزبايى له ته‌واوى گه‌لى كوردستان به هه‌موو پێكهاته‌كانييه‌وه ده‌كه‌م. هه‌ڵبژاردن و پرۆسه‌ى ده‌نگدان، هه‌ڵنانى هه‌نگاوێكى گرنگ بوو له به‌هێزكردنى ڕه‌وتی ديموكراسيى گه‌لى كوردستاندا. هاوكاريى هه‌موو لايه‌ك بۆ سه‌رخستن و به‌ڕێوه‌چوونى بێ كێشه‌ى پرۆسه‌كه، مايه‌ى شانازى و پێزانينه. له‌م سه‌ركه‌وتنه‌دا، گه‌لى كوردستان براوه‌يه. هه‌ڵبژاردن نوێكردنه‌وه‌ى ڕه‌وايه‌تيى دامه‌زراوه‌كانى هه‌رێمى كوردستان و گه‌ياندنى ئازادانه‌ى بير و ده‌نگتان بوو، بۆ دياريكردنى نوێنه‌ره‌كانتان له په‌رله‌مان. ئه‌وه‌ى له گيانى كێبڕكێى ئاشتييانه و ڕێژه‌ى به‌شداريى فراوانى هاووڵاتييان له بانگه‌شه و پرۆسه‌ى ده‌نگداندا بينرا، ئه‌وه ده‌سه‌لمێنێت كه گه‌لى كوردستان مكوڕه له‌سه‌ر ئه‌وه‌ى بنه‌ماكانى ديموكراسى و مافى خۆى بۆ بڕياردان له چاره‌نووس و داهاتووى خۆى، به‌هێز بكات و نيشانه‌ى زيندوويى و پێگه‌يشتنى زياترى كولتوورى ديموكراسيى گه‌لى كوردستانه. زۆر سوپاس بۆ هاووڵاتييانى كوردستان، هه‌روه‌ها بۆ هه‌وڵ و كۆششى هێزه ئه‌منييه‌كان، كۆمسيۆنى باڵاى سه‌ربه‌خۆى هه‌ڵبژاردنه‌كان، حكوومه‌ت و لايه‌نه په‌يوه‌نديداره‌كانى عێراق، يوونامى و ته‌واوى ئه‌و لايه‌نانه‌ى له به‌ڕێوه‌بردن و سه‌رخستنى ئه‌م پرۆسه‌يه‌دا، به‌شدار بوون. پابه‌ندى و هاوكاريى هه‌موو لايه‌كتان، كليلى ئه‌م سه‌ركه‌وتنه بوو. ده‌ستخۆشى و پێزانينمان ئاراسته‌ى هه‌مووان ده‌كه‌ين. ئه‌نجامدانى هه‌ڵبژاردن به شێوه‌يه‌كى ئارام و شارستانييانه، سه‌ركه‌وتنێكى گه‌وره‌يه كه جيهان به ڕێزه‌وه سه‌يرى ده‌كات، به‌ڵام ئه‌وه‌ى ئه‌م سه‌ركه‌وتنه ته‌واو ده‌كات و گه‌لى كوردستان به په‌رۆشه‌وه چاوه‌ڕێيه‌تى، ئه‌وه‌يه دوای په‌سه‌ندکردنی ئه‌نجامه‌کان، لايه‌نه سياسييه‌كان به زووترين كات حكوومه‌ت پێكبهێنن. حكوومه‌تێك كه بتوانێت سه‌قامگيريى پته‌وتر و ئابوورييه‌كى به‌هێز بهێنێته ئاراوه و بره‌وى زياتر به مافه‌كان بدات، پێويستييه‌كى له‌پێشينه‌ى قۆناغ و ئاڵنگارييه‌كانى ئێستا و بنياتنانى داهاتووى هاوبه‌شمانه، ئه‌وه‌ش به گيانى پێكه‌وه‌يى و ته‌بايى و هاريكاريى هه‌موو لايه‌نه سياسييه‌كان و پێكهاته‌كان ده‌كرێت. سڵاو و دروود له گيانى پاكى شه‌هيدان. هيواى سه‌ركه‌وتن بۆ هه‌موو لايه‌ك ده‌خوازم. نێچيرڤان بارزانى سه‌رۆكى هه‌رێمى كوردستان 2024/10/21
هاوڵاتی مەسعود بارزانی، سەرۆکی پارتی دیموکراتی کوردستان بەبۆنەی سەرکەوتنی هەڵبژاردنی خولی شەشەمی پەرلەمانی کوردستان پەیامێکی بڵاو کردەوە و ڕایگەیاند، هیوادارم ئەو هەڵبژاردنە و ئەنجامەكانی هیوایەكی نوێ و قۆناغێكی تازە بەدی بهێنێت كە لە بەرژەوەندیی هەموو خەڵكی كوردستاندا بێت. دەقی پەیامەکەی مەسعود بارزانی: بەناوی خودای بەخشندە و میهرەبان شوكر بۆ خودای مەزن پڕۆسەی هەڵبژاردنی خولی شەشەمی پەرلەمانی كوردستان بە سەركەوتوویی كۆتایی هات و خەڵكی كوردستان توانیان لە كەشێكی ئازاددا دەنگی خۆیان بدەن. بە دڵنیاییەوە سەركەوتنی ئەم پڕۆسەیە سەركەوتنی گەلی كوردستانە بە هەموو پێكهاتە و لایەنە سیاسییەكانیەوە. بەم بۆنەوە سوپاس و پیرۆزبایی خۆم ئاراستەی گەلی كوردستان و جەماوەر و ئەندام و لایەنگرانی پارتی دیموكراتی كوردستان و هەروەها سەرجەم لایەنە سیاسیەكان دەكەم. لێرەدا بە پێویستی دەزانم دەستخۆشی لە كۆمیسیۆنی هەڵبژاردنەكانی عێراق و کوردستان و هەموو لایەنە پەیوەندیدارەكان و هێزە ئەمنیەكان بکەم كە پێكەوە یارمەتیدەر بوون بۆ ئەوەی پڕۆسەی هەڵبژاردن لە هەرێمی كوردستان بە سەركەوتوویی ئەنجام بدرێت. هیوادارم ئەو هەڵبژاردنە و ئەنجامەكانی هیوایەكی نوێ و قۆناغێكی تازە بەدی بهێنێت كە لە بەرژەوەندیی هەموو خەڵكی كوردستاندا بێت. مسعود بارزانی 20ی ئۆكتۆبەری 2024
هاوڵاتی ئەمڕۆ هەینی ١٨ی تشرینی یەکەمی ٢٠٢٤، جومانە غەلای گوتەبێژی کۆمیسیۆنی هەڵبژاردنەکانی عێراق ڕایگەیاند، نوێنەری حیزبەکان لە سەرجەم ناوەند و بنکەکاندا هەن و دەتوانن سکاڵا لەسەر هەر پێشێلکارییەک تۆماربکەن، هەرکەسێکیش هۆکاری دروستبوونی پێشێلکاری بێت سزای یاسایی دەدرێت. دەشڵێت، هەمیشە لە هەڵبژاردنەکان وێنە و ڤیدیۆی کۆن لە سۆشیاڵ میدیا بڵاودەکرێنەوە بۆ دروستکردنی گوومان و کێشە و گرفت لە پڕۆسەکەدا، ئێمە لە ڕێگەی کامێراکانەوە کە لە بنکە و ناوەندەکاندا دامانناون، پێداچوونەوە بەو شوێنانە دەکەین، کە پێشێلکارییان تێداکراوە و تەماشای دیمەنەکان دەکرێتەوە، هۆشداری تووند دەدەینە دەنگدەر و کارمەندانی بنکەکان کەوا هەرکەسێک لەو پێشێلکارییانەدا بەشداربووبێت یان هۆکار بووبێت بۆ ڕوودانی، ڕێکاری یاسای تووندی بەرامبەر دەگیرێتەبەر و دەدرێتە دادگەی پەیوەندیدار بەو بابەتە.
هاوڵاتی هۆگر چەتۆ، رێکخەری تۆڕی شەمس بۆ چاودێری هەڵبژاردنەکان، ئاشکرایکرد هەندێک تێبینی هەبوو لەسەر بەڕێوەچوونی پرۆسەی دەنگدانی تایبەت، کە نەدەکرا مۆبایل ببرێتە ژوورەوە تاوەکو خەڵک ناچار نەکرێت رەسمی دەنگەکەی بگرێت، بەڵام لە بەشێک لە بنکەکان مۆبایل برایە ژوورەوە، هەروەها بەپێی رێنماییەکان نابێت لە نزیک بنکەکانی دەنگدان ریکلام بکرێت، وەک بینیمان لە نزیک بەشێک لە بنکەکان کارتی دەنگدان دابەش دەکرا. دەشڵێت، بۆ دەنگدانی ئەمڕۆ کە تایبەت بوو کۆمیسیۆن لە هەر وێستگەیەک ٣٠٠ کەسی داناوە و لە دەنگدانی گشتی بۆ هەر وێستگەیەک ٤٥٠ کەس دانراوە، هەروەها ڕێژەی دەنگدان لە تایبەتدا بەرزە، بەڵام لە دەنگدانی گشتی ناگاتە لە ٥٠٪ ، بۆیە ئەو کێشانەی ئەمڕۆ ڕوویاندا لە دەنگدانی گشتییدا ئەگەری ڕوودانیان کەمە. جێگەی ئاماژەیە، بەیانی ئەمڕۆ هەینی ١٨ی تشرینی یەکەمی ٢٠٢٤، کاتژمێر ٧، پرۆسەی دەنگدانی تایبەت بۆ هەڵبژاردنی خولی شەشەمی پەرلەمانی کوردستان دەستیپێکرد و کاتژمێر ٦ی ئێوارە کۆتای دێت.
هاوڵاتی ئەمڕۆ چوارشەممە، ١٦ی تشرینی یەکەمی ٢٠٢٤، سەرچاوەیەک لەوەزارەتى ناوخۆى هەرێمى کوردستان ئاشکرایکرد، لیژنەى باڵاى ئەمنیی هەڵبژاردنەکانى خولى شەشەمى پەرلەمانى کوردستان بڕیاریدا هاتوچۆ لە دەروازە سنوورییەکان و فڕۆکەخانەکان ئاسایی دەبێت لە ڕۆژی دەنگداندا. وتیشی: هاتوچۆ لەنێوان پارێزگاکانى هەرێمى کوردستان و پارێزگاکانى ترى عێراق بەردەوام دەبێت. هاوکات لەبارەى هاتوچۆى گەشتیارى و جوڵەى بازرگانی، دەروازەى نێودەوڵەتى حاجى ئۆمەران، ڕاگەیندراوێکی بڵاوکردەوە و باسیلەوەکرد، ڕۆژانی هەڵبژاردن هاتوچۆی گەشتیاری و جوڵەی بازرگانی لە هەموو دەروازەکان و هەروەها لە دەروازەی نێودەوڵەتی حاجی ئۆمەرانیش لە نێوان ئێران و هەرێمی کوردستان ئاسایی و بەردەوام دەبێت. جێگەی ئاماژەیە، بریارە رۆژى هەینى ١٨ تشرینى یەکەمی ٢٠٢٤، دەنگدانى تایبەت و ڕۆژى ٢٠ی تشرینى یەکەمی ٢٠٢٤ دەنگدانى گشتی بۆ خولى شەشەمى پەرلەمانى کوردستان ئەنجامبدرێت.
هاوڵاتی ئەمڕۆ چوارشەممە، ١٦ی تشرینی یەکەمی ٢٠٢٤، نەبەرد عومەر، بەڕێوەبەرى دەستەى هەڵبژاردنەکانى هەرێمى کوردستان ئاشکرایکرد، ڕۆژى ١٥ی تشرینى یەکەم دواى تەواوبوونى وادەى دابەشکردنى کارتى دەنگدان، ئەو کارتانەى لە ئۆفێسەکانى هەولێر، سلێمانى و دهۆک ماوەتەوە وەریانگرتووەتەوە کەژمارەیان ٩٧ هەزار و ٥٠٠ کارت بووە. ئەوەشی خستۆتەڕوو، لەو ژمارەیە نزیکەى ٢٢ هەزار کارت لە هەولێر، ٦٥ هەزار کارت لە سلێمانى و هەروەها ١٠ هەزار و ٥٠٠ کارتیان لە دهۆک وەرگرتووەتەوە. نەبەرد عومەر باسیلەوەشکرد، سەرجەم کارتەکان لە بنکەکان وەرگیراونەتەوە و گەڕێندراونەتەوە بۆ ئۆفێسەکانى هەولێر، سلێمانى و دهۆک لەوێشەوە گەڕێندراونەتەوە بۆ بەغدا و لە ئێستادا هیچ کارتێک لە هەرێمى کوردستان نەماوە. هاوکات، ڕۆژى ١٥ی تشرینى یەکەمى ٢٠٢٤، دوا ڕۆژبوو بۆ وەرگرتنەوەى کارتى دەنگدان بۆ هەڵبژاردنى خولى شەشەمى پەرلەمانى کوردستان، کۆمیسیۆنى هەڵبژاردنەکانیش جەخت لەوەدەکاتەوە کە هەرکەسێک کارتى دەنگدانى نەبێت مافى بەشداریکردنى لە هەڵبژاردن نابێت. جێگەی ئاماژەیە، بڕیارە ڕۆژى ١٨ی تشرینى یەکەمی ٢٠٢٤، هەڵبژاردنى تایبەت و ٢٠ی تشرینى یەکەمیش هەڵبژاردنى گشتى لە هەرێمى کوردستان بەڕێوەبچێت.
هاوڵاتی ئەمڕۆ یەکشەممە، ١٣ی تشرینی یەکەمی ٢٠٢٤، بەختیار غەریب، بەرپرسی دامەزراوەی ڕاگەیاندنی هاوپەیمانی نیشتمانی، لە ڕوونکردنەوەیەکدا ڕایگەیاند، هێرشێکی ڕێکخراو بۆسەر هاوپەیمانی نیشتمانی و لیستی162 ،چەند ڕۆژێکه لەلایەن یەکێتی نیشتمانی کوردستان دەستیپێکردوە، لەم بارەیەوە ڕوونکردنەوەیەکی بڵاوکردۆتەوە. دەقی ڕوونکردنەوەی بەرپرسی دامەزراوەی ڕاگەیاندنی هاوپەیمانی نیشتمانی: ڕونکرنەوەیەک لە بەرپرسی دامەزراوەی ڕاگەیاندنی هاوپەیمانیی نیشتمانی بەداخەوە لەڕۆژەکانی کۆتایی بانگەشەی هەڵبژاردن، حزبەدەسەڵاتدارەکانی هەرێم ،لەترسی دۆڕان و تۆڵەی هاوڵاتیان ، دەستیانداوەتە کارێکی ناشرین دور لە یاساو ڕێکارەکانی بانگەشەی هەڵبژاردنی دروست. لەوسەرووبەندەدا ، هێرشێکی ڕێکخراو بۆسەر هاوپەیمانی نیشتمانی و لیستی162ی ،چەند ڕۆژێکه لەلایەن یەکێتی نیشتمانی کوردستان دەستیپێکردوە. ئەویش بەبەکارهێانی ، چەند کاندیدێکی هاوپەیمانی ، کەله 24ی9 ، بەهۆکاری جیاواز دورخراونەتەوە و لەڕیزەکانی هاوپەیمانی دەرکراون. ئەم کەسانە هیواو ئومێدیان بۆ دەرچون لە هەڵبژاردن نیه، بۆیە لەڕێی خۆفرۆشتن بە یەکێتی ، دەیانەوێت ، شتێک قازانج بکەن. بۆبەرچاو ڕونی ڕای گشتی ، ئەمانە تەنها چەندکەسێکی دیاریکراون ، لە سلێمانی ، هێنیانە سەر شاشەی تەلەفزیۆن ، کۆمەڵێک قسەی دور ڕاستیان پێکردن ، هەر ئەمانە ئێستا براونەتە هەولێر و هەمان شانۆگەرییان ، پێ دوباره کردونەتەوە ، ئەوەی جێی سەرنجە و ڕوی ڕاستی ئەمانەو درۆکانیان دەسەلمێنێت ، لەکۆنگرە ڕۆژنامەوانیەکانیان ، تەنها کەناڵەکانی یەکێتی ئامادەن. بەداخەوە، لە دەقەکانی کۆتای بانگەشە، چەند کاندیدێک بەم شێوه ناشرینە خۆیان دەفرۆشن و یەکێتیش یارییان پێ دەکات لە پارێزگایەکەوە بۆ پارێزگایەکی تر ، دەیان بات. کەسانی دوڕو و خائین ساردمان ناکاتەوە، لیستی هاوپەیمانیی نیشتمانی ژماره 162 ،بەردەوامە لەبانگەشەی هەڵبژاردن و چاوەڕێی متمانەی هاوڵاتیان و چونه سەکۆی پەرلەمانە بۆ خزمەتی ڕاستەقینە بەخەڵک. بەختیار غەریب بەرپرسی دامەزراوەی ڕاگەیاندنی هاوپەیمانی نیشتمانی 13ی10ی202417:03
هاوڵاتی ئەنجومەنی پاڵپشتی لیستی بەرەی گەل لە دەرەوەی وڵات (تاراوگە)، بەیاننامەیەکیان بڵاوکردەوە و ڕایانگەیاند، ئێمە پێمان وایە بەرەی گەل بە رابەرایەتی لاهور شێخ جەنگی، ئەو هێزەیە کە دەتوانێ سنورێک بۆ ئەو دوو حزبە نا بەرپرسەی هەرێمی کوردستان دابنێ و ئەرکێکی لەوجۆرە کە سەختە ئاسان نییە، تەنهاو تەنها بە بەرەی گەل دەکرێ. ئەوەشیان خستۆتەڕوو، ئێمە وەك بەشێک لە (لێپرسراوو ئەندامانی ڕێكخستنەكان و ڕێكخراوەدیمكراتیەكان و ڕایەڵەكانی كەسوكاری سەربەرزی شەهیدان، پێشمەرگە دێرینەكان، ڕێكخستنە دێرینەكان، كەمئەندامانی سەنگەر، زیندانیانی سیاسی، ژنانی شاخ و توێژی گەنجانی هەرێمی كوردستان لە تاراوگە) خۆمان بە بەرپرسیار دەزانین بەرابەر بەم دۆخە نالەبارەی كە سی و دوو ساڵە دەسەڵاتدارانی هەرێمی كوردستان بەسەر خەڵكی هەریمیاندا هێناوە لە كاتیكدا ئێمە وەك خەباتگێڕانی ڕۆژگارە سەخت و تاریكەكانی گەلەكەمان خۆمان بە خاوەنی ئەو مافە دەزانین کە چیتر رێگە نەدەین خەبات و خوێنی ئێمە و هەموو خەباتگێرانی گەلەکەمان زیاتر بە لاڕیدا ببرێ و مەبەستمانە سنورێک بۆ ئەو بەدکاریانەی حزبەکانی دەسەڵات ، پارتی و هاوپەیمانەکەی کە یەکێتییە، دابنرێ. ئاشکراشیانکردووە، ئێمە لەم وێستگە گرنگەی گەلەكەماندا كە لە باشوری كوردستان هاتوەتە ئاراوە و لە ڕۆژی ٢٠ی ئۆكتۆبەری ٢٠٢٤ هەڵبژاردنی خولی شەشەمی پەرلەمانی کوردستان ئەنجامدەدرێت، دەرفەتی گەورە لەبەردەم خۆمان و گەلەکەماندا دەبینین . ئەنجومەنی پاڵپشتی لیستی بەرەی گەل لە دەرەوەی وڵات (تاراوگە)، دەشڵێن، هەر بۆیە وەك بەشێكی گرنگ و بەرچاوی كوردانی تاراوگە بە ئەركی سەرشانی خۆمانی دەزانین كە دەنگمان بخەینە پاڵ دەنگی بەرەی گەل و سەرۆكی لیستی بەرەی گەل كاك لاهور شێخ جەنگی، وە داوا لە سەرجەم خوشك و برایانمان دەكەین كە دانیشتوی تاراوگەن خۆیان و كەسوكاریان لە باشوری كوردستان ئاگادار بكەنەوە كە بەجۆش و خرۆشەوە بەشداری هەڵبژاردنی پەرلەمانی کوردستان بكەن و دەنگ بەلیستی ١٦٩ی بەرەگ و كاندیدەكانی بدەن بە ئامانجی گۆڕانكاری ڕیشەیی لە حوكمڕانی داهاتووی هەرێمی كوردستاندا.
دکتۆر هەڤاڵ ئەبوبەکر، پارێزگاری سلێمانی لە ڕوونکردنەوەیەکدا دەڵێت، "بێبەریبوونی خۆمان لە هەردوو ماڵەکەی بزوتنەوەی گۆڕان رادەگەیەنین و لە ئەمڕۆوە؛ وەک کەسێکی تەکنۆکرات و بێلایەن لە ئەرکەکانی خۆمان بەردەوام دەبین، تا ئەو کاتەی بەخشینەکەمان پەسند دەکرێت، یان رێکارێکی یاسایی و کارگێڕیی دەگیرێتەبەر بۆ دەستاودەستی پۆستەکەمان لەگەڵ هەر پاڵێوراوێکی تردا." دەقی ڕوونکردنەوەکەی هەڤاڵ ئەبوبەکر ڕونکردنەوەیەکی پێویست ئێمە؛ بە بژاردەو بڕیاری ڕەوانشاد نەوشیروان مستەفا ڕێکخەری گشتیی بزوتنەوەی گۆڕان و، بە هەڵبژاردن و بەدەنگی زۆرینەی ڕەهای خەڵک و بزوتنەوەی گۆڕان و بڕیاری جڤاتی نیشتمانیی بزوتنەوەی گۆڕان و ڕێککەوتنی بزوتنەوەی گۆڕان و یەکێتیی نیشتمانیی کوردستان و دەنگی هەموو فراکسیۆنەکانی ئەنجومەنی پارێزگای سلێمانی و بە پەسەندێتیی وەزارەتی ناوخۆو سەرۆکایەتیی ئەنجومەنی وەزیران و بە مەرسومی هەرێمیی سەرۆکی هەرێمی کوردستان؛ لە ٤ ی کانونی یەکەمی ٢٠١٧ دا؛ وەک پارێزگاری سلێمانی دەستبەکاربووم، لە پێناوی خزمەت نەک دەسکەوتدا، دڵسۆزانە حکومەتێکی خۆجێی هاووڵاتیی سەنتەریی خزمەتگوزارمان لەسەر بنەمای یاساسەروەریی و دور لە حیزبایەتیی و دور لە جیاکاریی و لایەنداریی؛ بەپشتیوانیی هەمووان بنیاتناوە، بۆیەکەمجار لە مێژووی کورددا لە ئەنجامی هەڵبژاردنەکاندا بەشداریی و ئاڵوگۆڕی ئاشتیانەی حکومەتە خۆجێیەکانمان؛ بەرجەستە کردووە، بەرەنگاری هەموو ئاڵنگارییەکان بوینەتەوەو گۆڕیومانن بۆ دەرفەتی گەشەکردن و بوژاندنەوەو سەقامگیریی، سێ مانگ پێش تەواوبوونی ماوەی چوارساڵی خزمەتکردنمان لەم پۆستەدا، لە ٩ی ئەیلولی ٢٠٢١دا؛ بەفەرمیی داوای بەخشینمان لە پۆستەکەم کردووە، لەگەڵ ئەوەی بەپێی یاسا دەبێت تا هەڵبژاردنی نوێی ئەنجومەنی پارێزگاو هەڵبژاردنی پارێزگارێکی نوێ؛ بەردەوامبین، بۆ جاری دووەم هەمان داواکاریی فەرمیمان لە ڕۆژی ٢٢ی شوباتی ٢٠٢٢دا؛ پێشکەش بە بەڕێزان وەزیری ناوخۆو سەرۆک و جێگری سەرۆکوەزیرانی هەرێمی کوردستان و هەر سێ لایەنە سیاسییە پێکهێنەرەکەی حکومەتی هەرێمی کوردستان کردووەو تا ئەمڕۆ؛ پەسەندنەکراوە. ئێمە حوکمڕانیمان لە ململانێی سیاسیی دورخستۆتەوەو پابەندیی دەستورو یاساو ڕێساو ڕێنماییەکان بووین و دەبین. لەم دۆخەی ئێستادا، کە بەداخێکی سەختەوە؛ ناکۆکیی و دووبەرەکیی و بێمتمانەییەکی زۆرو قوڵ کەوتۆتە ناو بزوتنەوەی گۆڕانەوەو بەسەر دوو ماڵی لێکترازاودا؛ دابەشبوون، ئێمە خۆمان لەو دۆخە بەدورگرت و هەموو هەوڵێکی کۆکردنەوەو یەکخستنەوەو ڕێکخستنەوەو قبوڵکردنی یەکترو کاراکردنەوەی پەیکەری ڕێکخراوەیی و ناوەندەکانی بڕیاردانمان دا، بەڵام نەگەشتینە ئەنجام. لە ئێستاشدا نابینە بەشێک لەم ململانێ و کێشمەکێشەی گۆڕانی لە ئامانج و ستراتیژو دەستور و پاکێچ و بەرپرسیارێتییەکەی دورخستۆتەوە. بۆیە: یەکەم: بۆ جاری سێیەم و کۆتایی؛ داوا لە حکومەتی هەرێمی کوردستان دەکەین بەخشینمان لە پۆستی پارێزگاری سلێمانی پەسەند بکات. دووەم: بێبەریبوونی خۆمان لە هەردوو ماڵەکەی بزوتنەوەی گۆڕان ڕادەگەیەنین و لە ئەمڕۆوە؛ وەک کەسێکی تەکنۆکرات و بێلایەن لە ئەرکەکانی خۆمان بەردەوام دەبین، تا ئەو کاتەی بەخشینەکەمان پەسەند دەکرێت، یان ڕێکارێکی یاسایی و کارگێڕیی دەگیرێتەبەر بۆ دەستاودەستی پۆستەکەمان لەگەڵ هەر پاڵێوراوێکی تردا. سێیەم: نابین بەبەشێک لەم دابەشبوونەو بەهەمان ڕۆح و گیانی گۆڕانخوازییەوە؛ لە هەر کات و شوێنێکدا؛ خزمەت دەکەین، وەک هەمیشە داکۆکیکارو خزمەتکاری هەموو هاونیشتمانیان دەبین بەبێ جیاوازیی.
هاوڵاتی کۆمیسیۆنی هەڵبژاردنەکان داوا لەلایەنەکان دەکات، پابەند بن بە ڕێساکانی هەڵبژاردن و مەرج و بنەماکانی پەیڕەوی هەڵمەتەکانی هەڵبژاردن، پشتیوانیان بکەن لەسەر خستنی هەڵبژاردنی پەرلەمانی کوردستان. کۆمیسیۆنی باڵای سەربەخۆی هەڵبژاردنەکانی عێراق ڕایگەیاند: زۆربەی بڕگەکانی خشتەی زەمەنیی هەڵبژاردنی پەرلەمانی کوردستانیان تەواوکردوە، داوا لە حزبە سیاسییەکان، هاوپەیمانییەکان و پاڵێوراوانی بەشدار لە پڕۆسەی هەڵبژاردن دەکەن پاڵپشتی کارەکانی کۆمسیۆن بکەن و بەشداربن لە سەرکەوتنی هەڵبژاردنەکان. ئاماژەی بەوەشکردوە، هیوادارن لایەنەکان دوربن لەهاندان بۆ توندوتیژی، ڕقوکینە و زیانگەیاندن بەیەکتر، داواش دەکات ڕێگا یاساییەکان بگیرێنەبەر و دورکەوتنەوە لە کار و کاردانەوە و بەشداربن لە هەوڵەکانی کۆمیسیۆن بۆ ئەنجامدانی هەڵبژاردنێکی ئازاد و دادپەروەر و بێگەرد کە جێگەی متمانەی هەموان بێت. دوپاتیشی دەکاتەوە، کۆمسیۆن بەشێوەیەکی پیشەیی کاردەکات و ئامانجی بەدیهێنانی دادپەروەریی هەڵبژاردن و پاراستنی دەنگی
هاوڵاتی یاریدەدەری سەرۆکی زانکۆی سلێمانی بۆ کاروباری خوێندکاران ڕایگەیاند، ٢٢ـی ئەم مانگە ساڵی نوێی خوێندنی ٢٠٢٤- ٢٠٢٥ لە زانکۆی سلێمانی دەستپێدەکات و خوێندکاران دەتوانن دەستبکەن بە مامەڵەکردنی بۆ وەرگرتنی بەشە ناوخۆیی. د.سیروان حەمەساڵەح یاریدەدەری سەرۆکی زانکۆی سلێمانی بۆ کاروباری خوێندکاران سەبارەت بە دەستپێکی ساڵی نوێی خوێندن بەم شێوەیە زانیاریی خستەڕوو. یاریدەدەری سەرۆکی زانکۆی سلێمانی ڕایگەیاند، بەپێی بڕیاری ئەنجوومەنی زانکۆ لە ٢٢ـی ئەم مانگە دەستپێکی ساڵی نوێی خوێندنە لە زانکۆکەمان و لەو ڕۆژەوە خوێندکاران دەتوانن دەستبکەن بە مامەڵەکردن بۆ وەرگرتنی بەشە ناوخۆیی. وتیشی: ماوەیەکی کەمە ئەنجوومەنی وەزیران ڕەزامەندی لەسەر تێچووی بەشە ناوخۆییەکان کە بڕەکەی ٧٠٠ ملیۆن دینارە داوە، هەر بەم هۆیەشەوە دەستپێکردنی ساڵی نوێی خوێندن دواکەوتووە.
هاوڵاتی ئەنجومەنی کۆمیسیاران لە کۆمیسیۆنی باڵای سەربەخۆی هەڵبژاردنەکانی عێراق ئەمشەو ڕاگەیەنراوێكی بڵاوکردەوە و ڕایگەیاند، داوا لە کاندیدان و لایەنە سیاسییەکانی هەرێمی کوردستان دەكەین، لە وتاری ڕق و کینە و توندوتیژی دووربکەونەوە، دەشڵێت، هەر ڕەخنەیەکیان هەیە لە یەکتر با پەنا ببەنە بەر سکاڵا. لە بەشێکی ڕاگەیندراوەکەی کۆمیسیۆندا هاتووە، توانیویانە بەسەرکەوتویی خشتەی کاتی هەڵبژاردنی پەرلەمانی هەرێمی کوردستان تەواو بکەن، داواش لە لایەنە سیاسییەکان، هاوپەیمانیێتی و كاندیدەكان دەکات، پابەند بن بە پەیڕەو و سیستمی هەڵبژاردن کە بۆ ڕێکخستنی بانگەشە دەرکراوە. کۆمیسیۆن جەختیشی کردوە، پێویستە لیست و كاندیدەكان تا ڕۆژی دەنگدان و ڕاگەیاندنی ئەنجامەکان، دوووربکەونەوە لە وتاری توندوتیژ، ڕق و کینە، سوکایەتیکردن و زیانگەیاندن بە كاندیدەكانی دیکە و ڕکابەرەکانیان. وتیشی: ئەگەر كاندیدەكان، لایەنەکان و هاوپەیمانیێتییەکان هەر تێبینی و ڕەخنەیەکیان هەیە، پێویستە پەنا ببەنە بەر ڕێكارە یاساییەکان لە تۆمارکردنی سکاڵا و تانەدان، نەوەک ئەو ڕێگایانەی کاردانەوە درووست دەکەن لەنێوان ڕکابەرەکاندا و تەماشاكاردنی سکاڵاکانیش بەوپەڕی سەربەخۆیییەوە دەبێت.
هاوڵاتی ئەمڕۆ چوارشەممە، ٩ی تشرینی یەکەمی ٢٠٢٤، عیماد جەمیل، سەرۆکى تیمى ڕۆژنامەوانى کۆمیسیۆنى باڵاى سەربەخۆى ھەڵبژاردنەکانى عێراق ڕایگەیاند، ماوەى دەنگدان بۆ هەڵبژاردنى پەرلەمانى کوردستان درێژ ناکرێتەوە و لەکاتی دیاریکراوی خۆی کە کاتژمێر٦ی ئێوارەیە کۆتای دێت و سندووقەکان دادەخرێن. دەشڵێت، چونکە ئامێرەکانى دەنگدان کاتژمێر ٦ دەوەستن، لە هەر دۆخێکیشدا بێت ماوەکە درێژناکرێتەوە. جێگەی ئاماژەیە، ڕۆژی ٢٠ی ئەم مانگە دەنگدانى گشتیى هەڵبژاردنى پەرلەمانى کوردستان بەڕێوەدەچێت، کاتژمێر ٧ی بەیانى دەنگدان دەستپێدەکات و کاتژمێر ٦ی ئێوارە کۆتایی دێت، کە دەکاتە ١١ کاتژمێر.
