بەرمیلێك نەوتی هەرێم بە 65 دۆلار فرۆشراوە

 هاوڵاتى به‌ڕێوه‌به‌رایه‌تى كاره‌باى سلێمانى رایگەیاند:"ئەو هاوبەشانەی کارەبا کە پارەی کارەبایان لە کاتی خۆیدا نەداوە بۆ دواجار به‌نوسراوی فه‌رمی ئاگاداركراون، "ئەگەر پارەکان نەدەن کارەباکانیان دەبڕدرێت". ئەمڕۆ دووشه‌ممه‌ 4ی تشرینی یه‌كه‌می 2021، به‌ڕێوه‌به‌رایه‌تى كاره‌باى سلێمانى رایگەیاند: "له‌سه‌ر جه‌ختكردنه‌وه‌ی سه‌رۆكایه‌تی ئه‌نجومه‌نی وه‌زیران و وه‌زاره‌تی كاره‌با بۆ كۆكردنه‌وه‌ی داهاتی كاره‌با له‌كاتی خۆیدا، له‌گه‌ڵ ئه‌وه‌ی هاوبه‌شێكی زۆری كاره‌با پابه‌نده‌ به‌پێدانی پاره‌ی كاره‌با، به‌پێى ئه‌و پسوڵانه‌ بۆیان ده‌چێته‌وه‌ له‌كاتى خۆیدا، به‌ڵام كۆمه‌ڵێک هاوبه‌شی بازرگانی و پیشه‌سازی دوای گه‌ڕاندنه‌وه‌ی پسوڵه‌ی كاره‌با و پێدانی ئاگاداری پابه‌ند نابن." به‌ڕێوه‌به‌رایه‌تى كاره‌باى سلێمانى ئاماژەی بەوەشکردووە، "پاش ئه‌وه‌ی بۆ دواجار به‌نوسراوی فه‌رمی ئاگاداركراون، كه‌ ئه‌گه‌ر قه‌رزه‌كانیان پاكتاونه‌كه‌ن به‌پێی رێنماییه‌كانی وه‌زاره‌تی كاره‌با و حكومه‌تی هه‌رێم كاره‌باكانیان ده‌بڕدرێت تا ئه‌وكاته‌ی قه‌رزه‌كانیان پاكتاو ده‌كه‌ن." بەڕێوەبەرایەتیەكە  باسی لەوەشکردووە، "حكومه‌تى هه‌رێم بۆ دابینكردنی مووچه‌ی مانگانه‌ له‌كاتی خۆیدا، پێویسته‌ ئه‌و خه‌رجیانه‌ی كردوویه‌تی جارێكی دیكه‌ له‌ رێگه‌ی داهاته‌وه‌ پاره‌كانی كۆبكاته‌وه ‌و به‌شێك له‌و داهاته‌ جارێكی دیكه‌ به‌كاردێته‌وه‌ بۆ هاوڵاتیان له رێگه‌ی چاكسازیكردن له ‌تۆڕه‌كانی كاره‌با."    

 هاوڵاتى پارێزەری تایبەتی هاوسەرۆکی پێشوی هەدەپە  ڕایگه‌یاند:"ئازادبونی دەمیرتاش‌و هاوڕێکانی نزیکە". ئەمڕۆ دووشه‌ممه‌ 4ی تشرینی یه‌كه‌می 2021، ڕەمەزان دەمیر پارێزەری تایبەتی سەڵاحەدین دەمیرتاشی هاوسەرۆکی پێشوی هەدەپە کە لەنۆڤەمبەری ساڵی 2016وە لەزیندانی ئەدرنەدا زیندانیکراوە، سەبارەت بەکۆتاییهاتنی ئەو ماوەیەی لەلایەن لیژنەی وزاریی ئەنجومەنی ئەوروپاوە درابوو بەتورکیا بۆ ئازادکردنی دەمیرتاش کە ڕۆژی 30ی سێپتەمبەری ڕابردوو بوو، ڕونکردنەوەیداوە. دەمیر لەبەشێکی لێدوانەکەیدا دەڵێت:"تورکیا ناتوانێت تاسەر بەرەنگاری بڕیارەکانی دادگای مافەکانی مرۆڤی ئەوروپا ببێتەوە، لەبەرئەوەی تورکیا لەو بابه‌تەدا گەیشتۆتە کۆتایی ڕێگاکە". پارێزەرەكەی وتویەتی:"جیهان ئێستا هەموو شتێک دەبینێت‌و دەزانێت لەبارەی دەمیرتاشەوە چی دەگوزەرێت، ئەو ئاگاییەش دەستەبەری ئازادکردنی سەڵاحەدین دەمیرتاش دەکات، لەماوەیەکی نزیکدا ئەوو هاوڕێکانی ئازاد دەکرێن". لیژنەی وزاریی ئەنجومەنی ئەوروپا کە چاودێریی جێبەجێکردنی بڕیارەکانی دادگای مافی مرۆڤی ئەوروپا دەکات وتویەتی:"زیندانیکردنی 4 ساڵ‌و 8 مانگی دەمیرتاش بەتۆمەتی بانگەشەکردن بۆ تیرۆر ئامانج لێی تەنها هێشتنەوەیەتی لەزیندان‌و ڕێگریکردنییەتی بۆئەوەی بەشداری هەڵبژاردنەکان نەکات". سه‌ڵاحه‌دین ده‌میرتاش ھاوسەرۆكی پێشوی ھەدەپە له‌4ى 11ى 2016 لەگەڵ ژمارەیەك لەسەركردەو پەرلەمانتارانی پارتی دیموكراتی گەلان (هه‌ده‌په‌) به‌تۆمه‌تی ھاوكاریكردن‌و بانگەشەكردن بۆ پەكەكە، لەلایەن حكومەتی توركیا ده‌ستگیركران.  

   هاوڵاتى وتەبێژی حکومەتی هەرێمی کوردستان ڕایگه‌یاند:" 200 ملیار دینارەکە لە بەغداوە گەیشتووەتە هەرێمی کوردستان". ئەنجوومەنی وەزیرانی عێراق بە سەرۆکایەتی مستەفا کازمی رۆژی 23-09-2021 کۆبووەوە و بڕیاریدا 200 ملیار دینارەکەی هەرێمی کوردستان بۆ سێیەم مانگی لەسەریەک رەوانەی هەولێر بکات. پێشتریش جووتیار عادل، وتەبێژی حکومەتی هەرێمی کوردستان رایگەیاندبوو، ئەگەر لە بەغداوە 200 ملیار دینارەکەی هەرێمی کوردستان بگات، مووچەی مانگی 9 بەبێ لێبڕین بەسەر فەرمانبەر و خانەنشینان دابەشدەکرێت. ئەوەش لە کاتێکدایە، نزیکەی 10 رۆژە حکومەتی هەرێمی کوردستان بەبێ لێبڕینی مووچە دەستی بە دابەشکردنی مووچە کردووە. لە کۆتایی مانگی ئادار پرۆژە یاسای بودجە لە پەرلەمانی عێراق پەسندکرا. بەپێی یاساکە حکومەتی هەرێمی کوردستان و عێراق رێککەوتبوون لەسەر ئەوەی کە هەرێمی کوردستان رۆژانە داهاتی 250 هەزار بەرمیل نەوت و نیوەی داهاتی دەروازە سنوورییەکان رادەستی بەغدا بکات، عێراقیش لە بەرامبەردا مووچە و شایستە داراییەکانی هەرێمی کوردستان بنێرێت. لە هەرێمی کوردستاندا یەک ملیۆن و 251 هەزار و 451 مووچە خۆر هەن، کە 751 هەزار و 805 کەسیان فەرمانبەری سەربازی و شارستانین؛ 242 هەزار و 269 کەسیان خانەنشینن. حکومەت بۆ پێدانی مووچە بێ لێبڕین مانگانە 895 ملیار دیناری پێویستە، کە ساڵانە 10 تریلیۆن و 740 ملیار دینار دەکات.

   هاوڵاتى سەرۆكی حكومەتی هەرێمی كوردستان لە سەردانێكیدا بۆ عەنكاوە بڕیاریدا ناحیەكە بكرێت بە قەزا. ​ئەمڕۆ دووشه‌ممه‌ 4ی تشرینی یه‌كه‌می 2021، مەسرور بارزانی، لەوتارێكدا لە عەنكاوە رایگەیاند: "وەزیری ناوخۆ و پارێزگار و ئەنجومەنی پارێزگای هەولێر رادەسپێرین، بۆ ئەوەی ناحیەی عەنكاوە بكرێت بە قەزا، تا خزمەتی زیاتری دانیشتوانەكەی بكرێت". سەرۆكی حكومەتی هەرێمی كوردستان  وتیشی: "خۆم بە خۆشحاڵ دەزانم كە جارێكی دیكە سەردانی شارۆچكەی عەنكاوەمان كرد، كە بووەتە ناوەندێكی گرنگ بۆ پێكەوەژیانی ئایینی و كۆمەڵایەتی و شوێنی ئاشتەوایی، هەروەها بووەتە ناوەندێك زۆر لەو خوشك و برا كریستیانانەی كە لە ناوچە و شوێنەكانی دیكەی عیراق لەبەر هەر هۆكارێك نەیتوانیوە لەوێ بمێننەوە روویان كردووەتە ئێرە و لێرە نیشتەجێبوون. مەسرور بارزانی، ئاماژەی بەوەكرد:" شارۆچكەی عەنكاوە یەكێكە لەو شارۆچكانەی كە دەبینین رۆژ بە رۆژ پێشڤەچوونێكی زیاتر بەخۆیەوە دەبینێت و گەورەتر دەبێت، ئێمەش بەناوی حكومەتەوە هاتووین و من لێرەوە پێتان رابگەیەنم كە جەنابی وەزیر و جەنابی پارێزگار و ئەنجومەنی پارێزگای هەولێر رادەسپێرین، بۆ ئەوەی ناحیەی عەنكاوە بكرێت بە قەزا، تا بتوانرێ خزمەتێكی زیاتری دانیشتوانی بكرێت، هیوادارم هەمووتان سەركەوتووبن، ئەوەی لە دەستی ئێمەش بێت یارمەتیتان دەدەین، بەڵام ئەمە بێگومان بەرپرسیاریەتی زیاتریش دەخاتە ئەستۆی بەرپرسانی ئەم قەزایە كە دەبێ لە هەموو رووێكەوە هەوڵی ئەوە بدەن، كە خزمەتی دانیشتوانی ئەم قەزایە و هەولێر و كوردستان بە گشتی بكەن."

 هاوڵاتى ڕێبه‌رى ڕه‌وتى سه‌در ڕایگه‌یاند:" ده‌بنه‌ هێزى یه‌كه‌م له‌ په‌رله‌مانى عێراق و كارنامه‌یه‌كى نوێیان داناوه‌  جێبه‌جێى ده‌كه‌ن". ئەمڕۆ یەکشه‌ممه‌ 3ی تشرینی یەکەم 2021،  موقته‌دا سه‌در ڕێبه‌رى ڕه‌وتى سه‌در ڕایگه‌یاند:" له‌ هه‌ڵبژاردنى پێشوه‌خته‌ى په‌رله‌مانى عێراق ده‌بنه‌ هێزى یه‌كه‌م له‌ناو په‌رله‌مان و زۆرترین كورسى په‌رله‌مانى به‌ده‌ست ده‌هێنن". سه‌در ئه‌وه‌شى خستۆته‌ڕوو:" عێراق پێویستى به‌ ئه‌قڵ و لۆژیكه‌ بۆ پاراستنى ئاشتى و ڕوبه‌ڕوبونه‌وه‌ى گه‌نده‌ڵى جێبه‌جێكردنى چاكسازى به‌ڵام پێویستى به‌هێزیشه‌ بۆ ڕوبه‌ڕوبونه‌وه‌ى ئه‌مریكاو ئیسرائیل و دوژمنه‌كانى ووڵات". له‌هه‌ڵبژاردنى ڕابردووى په‌رله‌مانى عێراق ڕه‌وته‌كه‌ى سه‌درو حزبى شیوعی و هه‌ندێك كاندیدى سه‌ربه‌خۆ پێكه‌وه‌ توانیان 54 كورسى به‌ده‌ست بهێنن و به‌هۆى پشتیوانى خۆپیشاندانه‌كانى ڕابردووى عێراق ڕه‌وتى سه‌در به‌هیوایه‌ ڕێژه‌ى كورسیه‌كانى زیاد بكات و به‌ 100 كاندید بۆ هه‌ڵبژاردنى 10 ئۆكتۆبه‌ر به‌شداره‌.

هاوڵاتی وەزارەتی دارایی ئاوبری حكومەتی هەرێم رایگەیاند:"سبەینێ‌ زۆرترین وەزارەت و دەستە موچە وەردەگرن". ​ئەمڕۆ دووشه‌ممه‌ 4ی تشرینی یه‌كه‌می 2021، وەزارەتی دارایی ئاوبری حكومەتی هەرێم  لیستی موچەی ئەم هەفتەیەی راگەیاندو بڵاویكردەوە، بەو پێپە سبەینی هەر یەك لە :" وەزارەتی كاروباری كۆمەڵایەتی و داد و  سامانە سروشتیەكان و وەزارەتی ئەوقاف و كاروباری ئاینی و وەزارەتی پلان دانان و پیشەسازی و بازرگانی و گواستنەوە و گەیاندن و وەزارەتی خوێندنی باڵا  و موچەی خاوەن پێداویستی تایبەت و ئەنجومەنی دادوەری و دیوانی چاودێری دارایی و دەستەی مافی مرۆڤ و ناوچەكانی دەرەوەی هەرێم و دەستەی ژینگە و دەستەی وەبەرهێنان و دەستەی دەستپاكی و كۆمسیۆنی هەڵبژاردن و دەزگای مین دابەشدەكرێت". بەگوێرەی ئەو خشتەیە بێت كە دارایی بڵاویكردووەتەوە، ئەمڕۆ دووشەممە مووچەی (ئەنجوومەنی ئاسایش، خانەنشینی پێشمەرگە و دەزگای ئاسایش) دابەشدەكرێت.  

  هاوڵاتى عه‌بدوڵای كوێخا موباره‌ك، سه‌ركرده‌ی پارتی له‌ چه‌مچه‌ماڵ داوا له‌ خه‌ڵكی كه‌ركوك ده‌كات ده‌نگ به‌ كاندیدانی حزبه‌كه‌ی له‌و شاره‌ بده‌ن كه‌له‌ هه‌ردوو بازنه‌ی هه‌ڵبژاردنی یه‌ك و دوون. ئەمڕۆ یەکشه‌ممه‌ 3ی تشرینی یەکەم 2021، عه‌بدوڵای كوێخا موباره‌ك له‌ لاپه‌ڕه‌ی خۆی له‌ فه‌یسبوك بڵاویكردووه‌ته‌وه‌: "ئەمڕۆ لە کەرکوکی دڵی کوردستان لە گوندی چیمەنی گەورە (چیمەنی شەھیدان) لەگەڵ پۆلێک گەنجی خۆشەویست و پڕ لە ئازایەتی کە بۆ لەمەودوا وەک برا و گیان فیدایانە لەگەڵمان دەبن و درێژە بە خەبات و تێکۆشان دەدەن لە سەر ڕێبازی بارزانی نەمر و ڕیزەکانی پارتی دیموکراتی کوردستان". ئه‌وه‌شی نووسیوه‌: "سەردانمان بۆ  ئۆفیسی ھەردوو کاندیدانی پارتیمان لە شاری کەرکوک مامۆستا نەجوا حەمید کاکەیی کاندیدی ژمارە 52 لە بازنەی دوو، دکتۆر شاخەوان عەبدوڵا کاندیدی ژمارە 30 لە بازنەی یه‌ك راشیگەیاندووە:" پشتیوانی خۆمان بۆیان دەربڕی و داواش لە خەڵکی کەرکوکی نیشتیمان پەروەر و شاری کوردایەتی دەکەین بەوپەڕی تواناوە پشتیوانی ئەو دوو کاندیدە شایستەیە بکەن و دەنگیان پێ بدەن".  

هاوڵاتى به‌گوێره‌ى ئامارى 24 كاتژمێرى ڕابردوى وه‌زاره‌تى ته‌ندروستى ژماره‌ى توشبوانى كۆرۆنا له‌هه‌رێم گه‌یشتۆته‌ هه‌زارو 532 كه‌س‌و ئه‌و ژماره‌یه‌ش سێ هێنده‌ى ڕۆژى پێشوه‌، له‌كاتێكدا دوێنێ 438 كه‌س له‌هه‌رێمى كوردستان توشى كۆرۆنا ببون. وه‌زاره‌تى ته‌ندروستى حك ومه‌تى هه‌رێم ئاشكراشیكردوه‌، له‌24 كاتژمێرى ڕابردودا 13 كه‌س گیانیان له‌ده‌ستداوه‌، به‌ڵام دوێنێ 19 كه‌س به‌هۆى كۆرۆناوه‌ گیانیان له‌ده‌ستدابوو.

هاوڵاتى مستەفا کازمی رایگەیاند:" بە هۆشیاری، نیشتمانپەروەری و پێداگری گەنجەكانمان لەسەر دروستكردنی ئایندە، هەڵبژاردن دەبێتە زەماوەندێكی نیشتمانی". مستەفا کازمی لە هەژماری فەرمی خۆی لەتویتەر پەیامێکی بڵاوکردەوە و رایگەیاند، "بە هۆشیاری، نیشتمانپەروەری و پێداگری گەنجەكانمان لەسەر دروستكردنی ئایندە، هەڵبژاردن دەبێتە زەماوەندێكی نیشتمانی.". سەرۆک وەزیرانی عێراق ئەوەشی خستوەتەڕو، "وادەمان 10ی تشرینی یەكەمە بۆ گۆڕانكاری". وتیشی، "بۆ پاراستنی یەکپارچەیی و ڕێڕەو و سەروەریی عێراق و ئەو کەسەی کە نوێنەرایەتی ڕۆحی نیشتمانپەروەری عێراقی دەکات و بەرواری 10ی  ئۆکتۆبەری ئێمەیە بۆ ئەوەی گۆڕان دروست بکات".   مستەفا کازمی ئاماژەی بەوەشكردوە، "ئەوانە هەڵبژێرن كە یەكێتی و سەروەری عێراق دەپارێزن، ئەوانە هەڵبژێرن كە نوێنەرایەتی گیانی نیشتمانپەروەری عێراق دەكەن".  

هاوڵاتى پارتی دیموکراتی گەلان (هەدەپە) بە بۆنەی ساڵیادی کۆچی دوایی مام جەلال تاڵەبانی، پەیامێکی بڵاوکردەوە و تیایدا رایگەیاند: ئەمڕۆ ئەو لە دڵی ئێمەدایە و هێزمان پێ دەدات. ئەمڕۆ یەکشه‌ممه‌ 3ی تشرینی یەکەم 2021، هەدەپە لە پەیامەکەیدا کە بە بۆنەی کۆچی دوایی مام جەلال، سکرتێری پێشووی یەکێتی و سەرۆک کۆماری پێشووتری عێراق  لە هەژماری فەرمی خۆی لە تویتەر بڵاویکردووەتەوە دەشڵێت:چوار ساڵ بەسەر کۆچی دوایی پێشەوای کورد و تێکۆشەری ئازادی گەلی کوردستان مام جەلال تاڵەبانی تێپەڕی، ئەو ئەمڕۆ لە دڵی ئێمەدایە هێز دەداتە تێکۆشانی یازادی ئێمە. ئاماژەی بەوەشکردووە، ئەوان سکرتێری پێشویی یەکێتی بە ڕێزداری بەبیردەهێننەوە، مام جەلال بە یەکێک لە دۆستەکانی جوڵانەوەی کورد لە باکوری کوردستان ناسراوە و ئەمڕۆش کەجەکە پەیامێکی بۆ ساڵیادەکە بڵاو کردەوە و بە گرنگیەوە باسی لە دۆستایەتی رێبەری گەلی کورد و مامجەلال کردبوو.

هاوڵاتى وتەبێژی حکومەتی هەرێمی کوردستان رایگەیاند:" تاوەکو ئێستا 200 ملیارەکەی بەغدا نەگەیشتووەتە هەرێمی کوردستان ." ئەمڕۆ یەکشه‌ممه‌ 3ی تشرینی یەکەم 2021، فەرمانگەی میدیا و زانیاری هەڵمەتێکی بۆ پەرەدان بە تواناکانی ئافرەتان و برەودان بە چیرۆکە سەرکەوتووەکان رێکخست، وتەبێژی حکومەتی هەرێمی کوردستان، بەرپرسی فەرمانگەی پەیوەندییەکانی دەرەوە و ژمارەیەک کۆنسوڵ بەشداربوون.  د. جووتیار عادل، وتەبێژی حکومەتی هەرێمی کوردستان لە کۆنگرەیەکی رۆژنامەوانیدا لە هەولێر رایگەیاند:" "ئەم 200 ملیارە لە ئەنجوومەنی وەزیرانی عێراق دەنگی لەسەر دراوە، بەڵام تاوەکو ئێستا 200 ملیارە نەهاتووە و ئومێدەوارین تاوەکو پێنجشەممە بێت." چەند رۆژێکە لە چەند شوێنێکی پارێزگاکانی هەولێر و دهۆک نرخی بووتڵێک غاز بووەتە 12 هەزار دینار وتی "لەگەڵ لایەنی پەیوەندیدار و کۆمپانیاکانی بەرهمهێنانی غاز و بریکارەکان قسەمان کردووە. پێشبینی دەکرێت لە ماوەیەکی زۆر کورتدا نرخەکەی بگەڕێتەوە دۆخی پێشتر." وتەبێژی حکومەتی هەرێمی کوردستان دەشڵێت "کێشەی غاز نەماوە و بەمزووانە بە تەواوەتی چارەسەر دەکرێت." بڕیارە ئەمساڵ بەرمیلێک نەوتی سپی بەسەر هاونیشتمانییاندا دابەشبکرێت، جووتیار عادل وتی "تاوەکو ئێستا دیارنییە نرخەکەی چەندە، بەڵام دیاریکراو دەبێت و نەوتە سپییەکەش بۆ خەڵکی هەژار و کەمدەرامەت دەبێت و لە عێراق دەیکڕینەوە و لە ناوچە شاخاوییەکانەوە دەست بە دابەشکردنی دەکەین." بەوتەی جووتیار عادل، بڕیارە لە دوو رۆژی داهاتوودا وەزیری سامانە سرووشتییەکانی هەرێمی کوردستان و وەزیری نەوتی عێراق کۆببنەوە "رێککەوتن لەسەر بڕی نەوتەکە دەکرێت و دواتر دەست بە دابەشکردنی دەکرێت."

 هاوڵاتى لە چوارەمین ساڵیادی ماڵئاوایی مام جەلال بافڵ تاڵەبانی هاوسەرۆکی یەکێتی پەیامێکی بڵاوکردەوە و رایگەیاند، "خۆمان ئامادەکردووە و لە بەردەم سەرپێخستنی خەونی تۆ و کاک نەوشیروان داین و دەمانەوێت ئەو سیاسەتە حەکیمانەی ئێوە بکەینە سەرمەشقی خەباتی نوێمان".  بافڵ تاڵەبانی ئەمڕۆ یەک شەممە 3ی تشرینی یەکەم لە پەیامێکدا رایگەیاند، "لە چوارەمین ساڵڕۆژی ماڵئاوایی تۆدا یەکێتیمان لە ھەڵدێران پاراست و ژیانی سیاسی و حیزبایەتیمان ئاسایی کردەوە، ھەر بڕیارێک درابێت و لەداھاتوشدا دەدرێت لە خزمەتی چاکەی گشتی و یەکێتی و کوردستانەکەت دەبێت و ئەمانەتی تۆ لە بەرامبەر خوێنی شەھیدان و تێکۆشەرانی یەکێتی دەپارێزین، دەیبوژێنینەوە، رێکیدەخەینەوە". ئاماژەی بەوەشکردوە، "ئەرکی ئێمەیە بەرنامەکەت تەواوبکەین و یەکێتی ناو یەکێتی بپارێزین، ئەم یادە بەدەرفەت دەزانم تا جارێکی تر دڵنیات بکەمەوە و ویژدانم ئاسودەبکەم، دوای پشوودرێژی و دانبەخۆداگرتنێکی زۆر دواجار بە ھاوکاری دڵسۆزانی رێگاکەت و تێکۆشەران و شوێنکەوتوانی، یەکێتیمان لە ھەڵدێران پاراست و ژیانی سیاسی و حیزبایەتیمان ئاسایی کردەوە، ھەر بڕیارێک درابێت و لەداھاتووشدا دەدرێت لە خزمەتی چاکەی گشتی و یەکێتی و کوردستانەکەت دەبێت".  باسیلەوەشکردووە، "راستە رێگری ھەبو بەڵام لەم کاروانەدا تەنھا نەبوین و تەنھا نین، پێکەوە ھەمومان تێکۆشەران، پێشمەرگەی دێرین، کەمئەندامانی سەنگەر، زیندانیانی سیاسی، کەسوکاری شەھیدان، ھەڤاڵان و کادران یەکێتیمان پاراست و لەخەمی یەکێتیدا بوین، وەک سەردەمی رابەرایەتی تۆ ئێستا یەکێتی و یەکێتییەکان ئازاو ئازادن کار بۆ ژیانێکی باشتر و کوردستانێکی ئاوەدانتر دەکەن". بافل تاڵەبانی هاوسەرۆکی یەکێتی و هاوکات کوڕی مام جەلال ئەوەشیخستۆتەڕوو، ''لەم قۆناغی خەباتی نوێیەشدا یەکێتییەکەمان و گۆڕانەکەی کاک نەوشیروان دوا ئاواتی ئێوە و ویستی کۆمەڵانی خەڵکیان بەجێگەیاند و پێکەوە بەرەو سەرکەوتن ھەنگاودەنێن و لە ھاوپەیمانیەتییەکەدا لە بەردەم وەفاداری خەڵک و کێشە بنچینەییەکانی ھەرێم و پارسەنگی ھێز و مافە دەستورییەکانمان راوەستاوین، ھاوپەیمانی کوردستان وەفادار دەبێت و کار بۆ ژیانێکی باشتر و پاراستنی قەوارەی ھەرێم دەکات، خۆمان ئامادەکردوە و لە بەردەم سەرپێخستنی خەونی تۆ و کاک نەوشیروان داین و دەمانەوێت ئەو سیاسەتە حەکیمانەی ئێوە بکەینە سەرمەشقی خەباتی نوێمان". دەقی پەیامەکەی بافڵ تاڵەبانی: لە چوارەمین ساڵڕۆژی ماڵئاوایی تۆدا بەشکۆوە رادەمێنم و تاوێک لە خەباتی رابەر و رۆشنکەرەوەی بیری کوردایەتی و بڵێسەی شۆڕشی نوێ، پشوودەدەم و بەدەم گەشبینی، ھیوا و ئومێدەوە بۆ ئاسۆیەکی روونتر ھەنگاودەنێم. ھەنگاوی وەفاداری دەنێين و بەشوێن دونیابینی و سیاسەتی حەکیمانەی مام ڕێدەکەين و ئەمانەتی تۆ لە بەرامبەر خوێنی شەھیدان و تێکۆشەرانی یەکێتی دەپارێزین، دەیبوژێنینەوە، رێکیدەخەینەوە. وەفادار بۆ یەکێتی و مێژووی پڕسەروەری مام ئەرکی ئێمەيە بەرنامەکەت تەواوبکەين و یەکێتی ناو یەکێتی بپارێزين. ئەم یادە بەدەرفەت دەزانم تا جارێکی تر دڵنیات بکەمەوە و ویژدانم ئاسوودەبکەم، دوای پشوودرێژی و دانبەخۆداگرتنێکی زۆر دواجار بە ھاوکاری دڵسۆزانی رێگاکەت و تێکۆشەران و شوێنکەوتوانی، یەکێتیمان لەھەڵدێران پاراست و ژیانی سیاسی و حزبایەتیمان ئاسایی کردەوە، ھەر بڕیارێک درابێت و لەداھاتووشدا دەدرێت لە خزمەتی چاکەی گشتی و یەکێتی و کوردستانەکەت دەبێت. راستە رێگری ھەبوو بەڵام لەم کاروانەدا تەنھا نەبووین و تەنھا نین، پێکەوە ھەموومان تێکۆشەران، پێشمەرگەی دێرین، کەمئەندامانی سەنگەر، زیندانیانی سیاسی، کەسوکاری شەھیدان، ھەڤاڵان و کادران یەکێتیمان پاراست و لەخەمی یەکێتیدا بووین، وەک سەردەمی رابەرایەتی تۆ ئێستا یەکێتی و یەکێتییەکان ئازاو ئازادن کار بۆ ژیانێکی باشتر و کوردستانێکی ئاوەدانتر دەکەن. لەم قۆناغی خەباتی نوێیەشدا یەکێتییەکەمان و گۆڕانەکەی کاک نەوشيروان دوا ئاواتی ئێوە و ویستی کۆمەڵانی خەڵکیان بەجێگەیاند و پێکەوە بەرەو سەرکەوتن ھەنگاودەنێن و لە ھاوپەیمانیەتييەکەدا لە بەردەم وەفاداری خەڵک و کێشە بنچینەییەکانی ھەرێم و پارسەنگی ھێز و مافە دەستوورییەکانمان راوەستاوین. ھاوپەیمانی کوردستان وەفادار دەبێت و کار بۆ ژیانێکی باشتر و پاراستنی قەوارەی ھەرێم دەکات. خۆمان ئامادەکردووە و لە بەردەم سەرپێخستنی خەونی تۆ و کاک نەوشیروان داین و دەمانەوێت ئەو سیاسەتە حەکیمانەی ئێوە بکەینە سەرمەشقی خەباتی نوێمان. کەرکوک و کەرکوکییەکان، خانەقینییەکان، شەنگال، مەخمور و ئازیزانمان لە ناوچە دابڕێندراوەکان لەبەرامبەر بەڵێنی سەرۆک مام جەلال و خەمی کوردستانی بوونی ئێوە وەفادارین و لەئاست بەرپرسیارێتی پەیمانی مام دەبین و قودسی کوردستان قوڵایی ستراتیژی خەباتمان دەبێت و بەگیانمان دەیپارێزین، بۆ ھەمیشە لەگەڵتانین و شارەکەی خۆمان جێنەھێشتووە و جێی ناھێڵین، وەفا و وەسێتی باوکمانە و دەیپارێزین.... بۆ تۆی باوکیش بیرت دەکەم، زۆرجار لەبەرامبەر مەزنیت، رابەرایەتی و پێشەواییت، داکۆکیت لەمافە گشتییەکان و ئازادی رادەربڕین و تەبایی و یەکڕیزی گەلی کورد، خەمت بۆ نیشتمانێک کە رەنگدانەوەی ھەموو بۆچوونە جیاوازەکان بێت، رادەمێنم و بەڵێن بە رۆحت دەدەم کە ئەم بەرپرسیارێتییە بە ئەمانەتەوە بەجێ بگەیەنم و مەشخەڵی شۆڕشی نوێ و یەکێتییەکەت بڵێسەدارتر بکەم. ئارامی بۆ ڕۆ‌حی مەزنت و رێگات رۆشن و یەکێتییەکەت ئاوەدانتر باوکە گیان. کوڕی خۆت بافڵ

هاوڵاتى نوری مالکی، سەرۆک وەزیرانی پێشووتری عێراق و سەرۆکی هاوپەیمانی دەوڵەتی یاسا رایگەیاند:" سەدام لە دۆسیە گەورەکاندا دادگایی نەکرا تەنیا لە یەک دۆسیەدا نەبێت، ئەی کوا دادگاییکردن لەسەر بەکارهێنانی چەکی کیمیایی و ئاوارەکردنی کوردەکان و شەهیدکردنی 22 هەزار کەس لە گەنجەکانیان، بۆیە دەڵێم هەمووان بێبەش بوون لە دادگاییکردنی سەدام لە تەواوی ئەم دۆسیانە". ئەمڕۆ یەکشه‌ممه‌ 3ی تشرینی یەکەم 2021، نوری مالکی، سەرۆک وەزیرانی پێشووتری عێراق و سەرۆکی هاوپەیمانی دەوڵەتی یاسا لە چاوپێکەوتنێک لەگەڵ کەناڵی ئەلحەدەس رایگەیاند:" هیچ کام لەو تاوانبارانە، ئەو دادگاییە دادپەروەرانەیە نەکران وەک ئەوەی نیشانی جیهان دران". وتیشی "من لە زیندان سەردانی سەدام حسێنم نەکرد و ئامادەی دادگایی کردنەکەی و لەسێدارەدانەکەشی نەبووم، بەڵام گەر لەسێدارە نەدرایە باشتر بوو، هەرچەندە ئەوە بڕیارێک بوو دەبوو جێبەجێ بکرایە". نوری مالکی باسی لەوەشکرد، سەدام لە دۆسیە گەورەکاندا دادگایی نەکرا تەنیا لە یەک دۆسیەدا نەبێت، ئەی کوا دادگاییکردن لەسەر بەکارهێنانی چەکی کیمیایی و ئاوارەکردنی کوردەکان و شەهیدکردنی 22 هەزار کەس لە گەنجەکانیان، بۆیە دەڵێم هەمووان بێبەش بوون لە دادگاییکردنی سەدام لە تەواوی ئەم دۆسیانە. بەیانی رۆژی 30ی کانوونی یەکەمی ساڵی 2006 کە هاوکات بوو لەگەڵ یەکەم رۆژی جەژنی قوربان، سەدام حسێن سەرۆکی پێشووتری عێراق لەسێدارەدرا.

  هاوڵاتى مەلا بەختیار رایگەیاند: " نامەوێ‌ روحت ئازار بدەم. بەڵام ناشتوانم بیشارمەوە كە یەكێتیەكەی جەنابت، دوورە لەو فەلسەفەیەی نەخشاندوتە، دڵنیابە، ئەگەر بەزوترین كات، پاك نەكرێتەوە لە پیلانگێڕان، لە هەلپەرستان، لە دز و درۆزنەكان، لە پلەو پایە خوازان، لەخۆفرۆشان بەم و بەو دەوڵەت، بەدڵنیاییەوە، یەكێتی دوا ساڵانی سیاسەت بەسەر دەبات ئەمڕۆ یەکشه‌ممه‌ 3ی تشرینی یەکەم 2021،  مەلا بەختیار، لە پەیامێکدا بۆ چوارەم ساڵیادی مام جەلال تاڵەبانی، دەڵێت، "نامەوێ‌ روحت ئازار بدەم. بەڵام ناشتوانم بیشارمەوە كە یەكێتیەكەی جەنابت، دوورە لەو فەلسەفەیەی نەخشاندوتە، دڵنیابە، ئەگەر بەزوترین كات، پاك نەكرێتەوە لە پیلانگێڕان، لە هەلپەرستان، لە دز و درۆزنەكان، لە پلەو پایە خوازان، لەخۆفرۆشان بەم و بەو دەوڵەت، بەدڵنیاییەوە، یەكێتی دوا ساڵانی سیاسەت بەسەر دەبات!" دەقی پەیامەکە   یادی دوا كۆچی مام جەلال و مام ناسی ئەمڕۆ چوارەمین ساڵڕۆژی كۆچی دوایی سەرۆك مام جەلالە. كۆچێك، تەنها سەرۆكێكی لـێ‌ نەسەندین. بەڵكو لە دوای خۆی لە رێبازەكەی و شكۆمەندیەكەی و دەرونە فراوانەكەشی بێبەشی كردین. هەرگیز ئەو چركە ساتەم بیرناچێتەوە كە یەكەمین جار لە (20/7/1977) لە گوندی (ماسی رۆ)ی هەكاری پێشوازیم لێكرد. نە لەشكری لەگەڵ بوو، نە تاقە چەكێكی قورس. تەنها خۆی و گۆچانەكەی و كێوێك لە ورەی بەرزی هێنابوەوە. لەم پەخشان ئامێزەدا نامەوێ‌ لاپەڕەكانی مێژووی ئەم كەڵە رابەرە هەڵبدەمەوە، تەنها دەمەوێ‌ بڵێم: مام ناسی لە ناو یەكێتیدا، وەكو فەلسەفەی سیاسی و تاكتیكی سیاسی و دوربینی سیاسی كەمن. كەمن ئەوانەی هاوخەباتی رۆژگاری سەختی مام جەلال بون و دەزانن ئەم رابەرە، لە كاتی تەنگانەدا، لەكاتی شەڕدا، لەكاتی نەبونی و برسێتیدا، لەكاتی گیرفان بەتاڵی و خواردنی بژی و مەمریدا، لە هەورازی سەخت و لێژگەی هەزار بەهەزاردا. لە كڕێوەی زستان و قرچەی هاویندا.. لە سەركەوتن و شكستدا، لە گریان و پێكەنیندا، لە هەڵچون و ئارامیدا، لە دانوستان و ئازایەتی بێوێنە بەرامبەر سەدام و كۆماری ئیسلامی و توركیاو لایەنە سیاسیەكاندا.. لەكاتی بۆردومان و فڕكان فڕكانی فڕۆكەدا.. بەڵێ‌ كەمن ئەوانەی مام جەلال ناس بن. مام جەلال ناسی، بەلاف لێدان نییە. بە بەرزكردنەوەی وێنەكانی و فرمێسكی هەلپەرستی هەڵڕشتن نییە. بەدەست بەسەرداگرتنی پێگەو پایەكەیشی نییە. مام جەلال ناسی، قوڵبونەوەیە لە فەلسەفەی سیاسی و تێگەیشتن لە چۆنیەتی باوەڕبون بە ئازادی و دیموكراسی. لە دەربەست بوونە بە رەنجدەران. لە ناسینی مام جەلال، لەكاتی ململانێكان و بیرە جیاوازەكان.. لە گەرمەی، رەخنەگرتن و بەرپەرچدانەوەی بۆچونەكاندا. لەقبوڵنەكردنی خودی مام جەلالیشدا. ئەوانەی هاتونەتە سەر حازری.. یان ئەوانەی پێشمەرگە و كادری ماندووی شاخ بون و لەدوای راپەڕینیش دووربون لە وردەكاری سیاسەتی مام جەلال، ناكرێ‌ میراتگری فەلسەفەی مام جەلال بن. بەڵكو ناشتوانن حیزبەكەی مام جەلالیش بپارێزن. چونكە ئاستی تێگەیشتنی ستراتیژییان و شارەزاییان لە فەلسفەو فەلسەفەی سیاسی و فەلسەفەی رەخنەی سیاسی، نزمترە لە تێگەیشتنەكانی مام جەلال. ئەمانە سەكۆی ئازادی دروستكراوی مام جەلال لە پاركی ئازادیدا دەبینن، بەڵام شانازیش دەكەن لەسەر رەخنە خەڵك سزا بدەن. چونكە باڵای زۆربەیان كورتترە لە كێلی بەرزی مامی رابەر!! مام! نامەوێ‌ روحت ئازار بدەم. بەڵام ناشتوانم بیشارمەوە كە یەكێتیەكەی جەنابت، دوورە لەو فەلسەفەیەی نەخشاندوتە، دڵنیابە، ئەگەر بەزوترین كات، پاك نەكرێتەوە لە پیلانگێڕان، لە هەلپەرستان، لە دز و درۆزنەكان، لە پلەو پایە خوازان، لەخۆفرۆشان بەم و بەو دەوڵەت، بەدڵنیاییەوە، یەكێتی دوا ساڵانی سیاسەت بەسەر دەبات! مام! بنوو.. ئاسودە بنوو.. جەنابت هەتا چویتە مەزاری رۆح شادی، درێغیت نەكرد.. شانازیەكانت زۆرترن لە كەموكوڕیەكانت. بنوو.. ئاسودە بنوو.. مێژوو تۆماری كردووە، چ جوامێرێك و چ شۆڕشگێڕێك و چ دیموكراتخوازێك بووی.. ئەوانە تاوانبارن كە ئەو مێژووە دەزانن و بەپێڵاوی ئاسنین، پێشێلی دەكەن. بنوو.. تاڵەبانی.. رابەری نەمر.. بنوو.. رۆژگار رۆژی بەدواوەیە.. پیلانگێڕی ریسوایی دێنێ‌.. هەلپەرستی شەرمەزاری بەرهەمدێنێ‌.. مشەخۆری سەرشۆڕی هەتا هەتایی دەكاتە مۆری رەشی ناوچاوانی.. ئەوانەی لایان داوە لە رێبازی مام جەلال و لە دیموكراسی و لە رەخنەی ئازاد.

هاوڵاتى  بەڕێوەبەرایەتی ئاماری سلێمانی رایگەیاند: "  لە ساڵی 2021دا کەمبووەتەوە بۆ 16%، واتە لەئێستادا 74.2%ی خەڵکی خاوەنی خانووی خۆیانن، پارێزگارى سلێمانیش دەڵێت"مەبەست لەم ئامارانە خستنەڕووی ئاستی خزمەتگوزاریی و پڕۆژەو دەرفەتی کارکردن و باروگوزەرانی هاووڵاتیان و سەرمایەگوزاریی و وەبەرهێنان و گەشەکردنی جۆریی و چەندیی پارێزگاکەیە. ئەمڕۆ یەکشه‌ممه‌ 3ی تشرینی یەکەم 2021، بەڕێوەبەرایەتی ئاماری سلێمانی بڵاویکردووەتەوە، لە ساڵی 1991دا ڕێژەی کرێچی لە پارێزگاکە 56% بووە، بەڵام لە ساڵی 2021دا کەمبووەتەوە بۆ 16%، واتە لەئێستادا 74.2%ی خەڵکی خاوەنی خانووی خۆیانن، پارێزگارى سلێمانیش دەڵێت"مەبەست لەم ئامارانە خستنەڕووی ئاستی خزمەتگوزاریی و پڕۆژەو دەرفەتی کارکردن و باروگوزەرانی هاووڵاتیان و سەرمایەگوزاریی و وەبەرهێنان و گەشەکردنی جۆریی و چەندیی پارێزگاکەیە".  لە راگەیەنراوێکدا پارێزگای سلێمانی بە هەماهەنگیی لەگەڵ بەڕێوەبەرایەتی ئاماری سلێمانی و فەرمانگا پەیوەندیدارەکان بە پشتبەستن بە ئامارو کێوماڵە بەردەوامەکانی نەتەوە یەکگرتووەکان و وەزارەتەکانی پلاندانان لە حکومەتی ئیتحادیی و حکومەتی هەرێمی کوردستاندا، لێکۆڵینەوەیەکی ئاماریی بەراوردکاریی لەنێوان ساڵانی (1991 بۆ 2021)، واتە ماوەی (30) ساڵی ڕابردوودا کردووەو تەواوی سێکتەرە جیاجیاکانی تێدا ئاماژە پێکراوە.   هەڤاڵ ئەبوبەکر، پارێزگاری سلێمانی ڕایگەیاند،مەبەست لەم ئامارانە خستنەڕووی ئاستی خزمەتگوزاریی و پڕۆژەو دەرفەتی کارکردن و باروگوزەرانی هاووڵاتیان و سەرمایەگوزاریی و وەبەرهێنان و گەشەکردنی جۆریی و چەندیی پارێزگاکەیە، کە لە زۆربەی سێکتەرە گرنگ و هەستیارەکاندا توانیویەتی ئاستی یەکەم لەسەر ئاستی عیراق و هەرێمی کوردستان بەدەستبهێنێت."   پارێزگاری سلێمانى روونیکردەوە، ئەم ئامارە ڕاستەقینانە هاندەریان بن بۆ خزمەتی زیاترو بوژاندنەوەو پەرەپێدانی زۆرتر بەجۆرێک لە ئاست خواست و هەوڵ و داخوازیی و قوربانیدانی بەردەوامی ئەم پارێزگا شکۆدارەدا بێت، بەتایبەتیی کەلە چوار ساڵی ڕابردودا لەگەڵ ئەوەی لە ناو قوڵایی هەموو قەیرانەکاندابووین؛ بەڵام توانیومانە بە پشتیوانیی هەموو لایەک ئاڵنگارییەکان بۆ دەرفەتی گەشەکردن بگۆڕین و سلێمانی لە زۆر بواردا بخەینە سەر نەخشەی نێودەوڵەتیی. پارێزگای سلێمانی لەڕووی دانیشتوان و خێزان و کاروباری کۆمەڵایەتی:   تێكڕای خەرجی مانگێکی خێزان (١,١٢٣,٠٠٠) دینار، و تێكڕای خەرجی مانگێکی تاكەکەس (٢٣٤,٠٠٠) دینار، و تێكڕای داهاتی مانگێکی خێزان (٨٤٢,٤٠٠) دینار، و تێكڕای داهاتی مانگێکی تاكەکەس (١٨٧,٢٠٠) دینارە   ژمارەی ڕەگەزی مێ بەرامبەر (١٠٠) ڕەگەزی نێر (١٠٢,٨) مێیە.   تاوانی گەورە و مامناوەند و بچوك (٣٥٠٩٣)، بەندكراوان لە نەوجەوان و پیاو و ژنان (١٢٩٦) بەندکراو.   ژمارەی كوڕان لە خانەی نەوجەوانان (١٧)، ژمارەی كچان لە خانەی نەوجەوانان (٩).   ژمارەی خێزانەکان بەپێی خەمڵاندنی بەڕێوەبەرایەتی ئاماری سلێمانی (٢٠٢١)، لە (١٩٩١) ١٤٩,١٢٤ خێزان و لە (٢٠٢١) ٥٧٨,٦٧٣ خێزانە.   ژمارەی دانیشتوان بەپێی خەمڵاندنی بەڕێوەبەرایەتیی ئاماری سلێمانی (٢٠٢١)، لە (١٩٩١) ٩٥١,٧٢٣ کەس و لە (٢٠٢١) ٢,٥٤٦,١٦٢ کەسە.   قەبارەی خێزان/ ژمارەی كەسەکان لە خێزانێکدا، لە (١٩٩١) ٩,٨ کەس و لە (٢٠٢١) ٤,٤ کەسە.   ڕێژەی ئەوانەی بەخێو دەكرێن لە (٢٠٢١): ٣٩٪ هاوسەرگیریی لە (٢٠٢١): ١٣,٨٣٦ جیابوونەوە (تەڵاق) لە (٢٠٢١): ٤,٠٨٥ خاوەن خانوو: لە (١٩٩١) ٤٦٪ و لە (٢٠٢١) ٧٤,٢٪ كرێچی: لە (١٩٩١) ٥٦٪ و لە (٢٠٢١) ١٦٪   سوودمەند لە مووچەی چاودێری خێزان: لە (١٩٩١) ژمارەیەكی كەم و لە (٢٠٢١) ٢٦,٩٨١   سوودمەند لە مووچەی كەمئەندامان: لە (١٩٩١) ژمارەیەكی كەم و لە (٢٠٢١) ١٨,١٣٧   گەشەی دانیشتووانی ساڵانە لە (٢٠٢١): ٢,٤٪   چڕیی دانیشتوان (ژمارەی كەس لە یەک كیلۆمەتر دووجادا) لە (٢٠٢١): ١٠٨