ڕاوێژکارێکى شەرع: پرۆسەی هەڵبژاردنەکان هیچ تانەیەکى لێ نەدراوە

  هاوڵاتی راوێژکاری باڵای سەربازیی عەلی خامنەیی، لەبارەی حزبەکانی رۆژهەڵاتی کوردستانەوە، هۆشداریی بە حکومەتی هەرێمی کوردستان دەدات و رایگه‌یاند :" نابێت هیچ چەکدارێکی" دژبەر لە "ناوچەکانی ژێر دەسەڵاتی ئەواندا هەبێت" کە بیەوێ ئاسایشی سنورەکان تێکبدات". ئەمڕۆ چوارشه‌ممه‌ 6ی تشرینی یه‌كه‌می 2021، یەحیا رەحیم سەفەوی، راوێژکاری باڵای سەربازیی رێبەری ئێران بە میدیای وڵاتەکەی رایگەیاندووە: "ئێران زۆر جار رایگەیاندووە کە نابێت هەرێمی کوردستان ببێتە شوێنی کۆبوونەوەی دژبەرانی شۆڕشی ئێران، تەنانەت پێش هێرشەکانی هێزی وشکانی سوپای پاسداران بۆ سەر ناوەندەکانی کۆبوونەوەی ئەو گرووپانە لە هەرێمی کوردستان، بە فەرمی راگەیێندرا کە نابێت لەم ناوچانەدا دژبەرانی کۆماری ئیسلامی هەبن". ساڵی 1995 سوپای پاسداران هێزێکی زۆر و تۆپخانەی هێنایە نزیک کۆیە و هێرشیکردە سەر بنکەکانی حیزبی دیموکرات، کە بە فڕینی فڕۆکەی هاوپەیمانان بەسەر هێزەکانی ئێراندا، کشایەوە.  لە چەند ساڵی رابردووشدا سوپای پاسداران زۆر جار بنکەکانی حزبەکانی رۆژهەڵاتی کوردستانی لە ناوچە سنوورییەکانی رۆژهەڵاتی کوردستان بۆردوومانکردووە. ئەمساڵیش هەڕەشەکان بەرپرسانی ئێران بۆ حیزبەکانی رۆژهەڵاتی کوردستان و گوشارەکانیان بۆ عێراق و حکومەتی هەرێمی کوردستان بۆ سنووردارکردنی جموجۆڵی ئەو حیزبانە چڕتر بووەتەوە. یەحیا رەحیم سەفەوی، کە 10 ساڵ فەرماندەی سوپای پاسدارانیش بووە، هۆشداری بە حزبەکانی رۆژهەڵاتی کوردستان داوە کە "لەهەر شوێنێکی سنوورەکانی ئێراندا بن و حکومەتەکانی ئەو ناوچەیە پەنایان بدەن و پێداویستی و چەکیان پێبدەن، بەرەنگاری گرووپە دژبەرەکان دەبنەوە". سەعید خەتیبزادە، وتەبێژی وەزارەتی دەرەوەیش رۆژی 04.10.2021 وتی: "ئارامگرتنی ستراتیژی" و هەڵسوکەوتی "ژیرانەی" ئێران "بەردەوام نابێت" و ئێران "تەحەمولی دەستدرێژی" بۆ سنوورەکانی نییە. رۆژی 12-9-2021یش عەلی شەمخانی، سکرتێری ئەنجوومەنی باڵای ئاسایشی نیشتمانیی ئێران لە کۆبوونەوە لەگەڵ مستەفا کازمی، سەرۆکوەزیرانی عێراق لە تاران، چالاکی حزبەکانی رۆژهەڵاتی کوردستانی بەجێگەی نیگەرانی لە قەڵەمدا و داوای "چەککردن و دەرکردنی بەپەلەی" ئەو حیزبانەی لە هەرێمی کوردستان کرد. رۆژی 6.9.2021 ناوەندی هاوکاریی حزبەکانی کوردستانی ئێران لە راگەیێندراوێکدا ئاماژەی بەوەکرد، ئەو شوێنانەی کە ئێران هەڕەشەی کردنە ئامانجیان دەکات، شوێنی ژیانی پەنابەرانی سیاسی و خەڵکی مەدەنین و سەتان ژن و منداڵی پەنابەر کە بەهۆی سیاسەتی سەرکوتکەرانەی دەسەڵاتی ئێران خاک و وڵاتی خۆیان جێهێشتووە، لێیان دەژین. ناوەندەکە ئەوەی خستووەتەڕوو، چالاکیی سیاسیی حیزبەکان و بوونی خەباتکارانی رۆژهەڵاتی کوردستان لە هەرێمی کوردستان بیانوویەکە "کۆماری ئیسلامی بۆ کاولکاری و دەستێوەردانی زیاتر دەیگرێت و دەیەوێت بە کەڵکوەرگرتن لە دۆخی ناوچەکە و دانبەخۆداگرتنی کۆمەڵگەی نێودەوڵەتی لە بەرامبەر تاران، قەیرانێکی دیکە بخولقێنێت. ئاماژەی بەوەش داوە کە ئەو هەڕەشانە کاریگەریی لەسەر چالاکییەکانی حیزبەکانی ئەندام لە ناوەندی هاوکاری نابێت کە لە حیزبی دیموکراتی کوردستان، حیزبی دیموکراتی کوردستانی ئێران، کۆمەڵەی زەحمەتکێشانی کوردستان و کۆمەڵەی شۆڕشگێڕیی زەحمەتکێشانی کوردستانی ئێران پێکهاتووە". ناوەندی هاوکاری داوا لە خەڵکی کوردستان و هێز و لایەنە سیاسییە کوردستانییەکان و کۆمەڵگەی نێودەوڵەتی، حکومەتی عێراق و حکومەتی هەرێمی کوردستان دەکات، سنوورێک بۆ زیادەڕۆییەکانی ئێران دابنێن و دژی ئەو هەڕەشەیە بوەستنەوە. مستەفا مەولوودی، جێگری سکرتێری گشتیی حزبی دیموکراتی کوردستان دەڵێت، ئەرکی هێزەکانی هاوپەیمانان، حکومەتی عێراق و هەرێمی کوردستانە کە بەرپەرچی هەڕەشەکەی ئێران بدەنەوە و رێگە نەدەن هێرش بکاتەسەر بارەگاکانی حزبەکانی رۆژهەڵاتی کوردستان. بە گوتەی مەولوودی، "نابەرپرسیاربوونی دەسەڵاتی ئێران لە بەرپرسیارێتیی ئەو لایەنانە بۆ پاراستنی گیانی ئەندامانی حزبەکانی رۆژهەڵاتی کوردستان کەم ناکاتەوە". حزبەکانی رۆژهەڵاتی کوردستان زیاتر لە دوو دەیەیە چالاکی چەکدارییان لە رۆژهەڵاتی کوردستان راگرتووە و دەڵێن، رەچاوی بەرژەوەندییەکانی حکومەتی هەرێمی کوردستان دەکەن و هێرش ناکەنە سەر هێزە سەربازییەکانی ئێران.

هاوڵاتی فڕۆکەخانەى نێودەوڵەتى سلێمانى رایگەیاند:" لە نێو فڕۆكەخانەی سلێمانی گروپێک كە بە نیازبوون بە بەڵگەنامەی ساختەوە بچنە وڵاتێكی ئەوروپیەوە دەستگیر کراون". ​ئەمڕۆ چوارشه‌ممه‌ 6ی تشرینی یه‌كه‌می 2021، لەراگەیەندراوێکدا فڕۆکەخانەى نێودەوڵەتى سلێمانى بڵاویکردەوە: " بنکەی نشینگەى فڕۆکەخانە بەھۆی شارەزایی و لێھاتویی ئەفسەر و کارمەندەکانیان و بە هاوکارى ئاسایشی فڕۆکەخانە، دوێنێ دوشەممە لە گەشتى سلێمانی- دۆسڵدۆف توانیان ڕێگرى بکەن لە ‏هەوڵێکى ساختەکارى گروپێکى گەشتیاران، لە چوارچێوەى جێبەجێکردنی کاروباری فڕۆکەخانە و کۆنتڕۆڵکردنی ‏سەفەری گەشتیاران بۆ دەرەوەی وڵات ". لە ڕاگەیاندراوەکەشدا هاتووە: "گروپەکە کە  ژمارەیان 25 گەشتیار بووە گواستراونەتەوە ‏بۆ بنکەى پۆلیسى فڕۆکەخانە و لە ئێستادا لە قۆناغی لێکۆڵینەوەدان و ‏چاوەڕوانی بڕیاری کۆتایی لای دادگا دەبێت". ئەوەشخراوەتەڕوو، لە بەڵگەکانیان دەرکەوت هەڵگرى جۆرێک لە دۆکیۆمێنتن کە هیچ بەڵگەیەکى ‏فەرمی نەبووە بۆ سەفەرکردن بۆ دەرەوەى وڵات".  

عەمار عەزیز پارتی بەسەرۆكایەتی جەعفەر ئیبراهیم ئیمنیكی لەگەڵ كاندیدانی پارتی  لەدهۆكەوە بەڕێدەكەون بۆ شەنگال، بەڵام بەشێك لە ئێزیدییەكان رێگرییان لە وەفدەكە كردو نەیانهێشت بچنە ناو شەنگال و گەڕانەوە دهۆك، دوای ئەم رووداوەش مەسرور بارزانی ئەوەی دووپاتكردەوە كە دەچنەوە خاكی شەنگال. ململانێكان و ناكۆكییەكانی پارتی دیموكراتی كوردستان و یەكینەكانی پاراستنی شەنگال (یەپەشە) دوای رووداوەكانی داگیركردنی شەنگال لەلایەن داعشەوە دروست بوو كە یەبەشە دەڵێن ئەوان رۆڵی سەرەكیان هەبووە لە رزگاركردنی خاك و خەڵكی ئێزیدیدا و پارتی لەشەنگالدا نەماوەتەوە. ئیدریس زۆزانی، لێپرسراوی بەشی راگەیاندن لە لقی 17ی پارتی لەشەنگال كە ئێستا لە دهۆك دەوام دەكەن بۆ هاوڵاتی ئاماژەی بەوەكرد كە رۆژی 2ی تشرینی یەكەم 2021 وەفدێكی باڵای پارتی كە پێكهاتبوون لە جەعفەر ئیبراهیم ئیمنیكی، بەرپرسی لقی 17ی پارتی لەگەڵ ژمارەیەك كادیرو لایەنگرانی پارتی و هەرسێ‌ كاندیدی بازنەی شەنگال لە دهۆكەوە بەڕێكەوتن بۆ قەزای شەنگال، ئامانج لەسەردانەكەیان ناساندنی كاندیدانی پارتی بوو لە شەنگال و بەشداریكردنی لەئاهەنگی جەماوەری پارتی لەقەزاكە.  ئیدریس زۆزانی پێشیوابوو ئەوەی ئەوان لەبەرامبەر وەفدەكەی پارتی كردوویانە  دژی بڕیارو رێنماییەكانی كۆمسیۆنی باڵای هەڵبژاردنەكانی عێراقە. وتیشی:»رێكاری یاسایی دەگرینە بەرو بە رەسمی كۆمسیۆنی باڵای سەربەخۆی هەڵبژاردنەكان ئاگاداردەكەینەوە  كە ئەوا رێگری لەحزبی پارتی كرا، بەداخەوە بەرپرسانی ئەمنی عێراق و نەینەواش نەیانتوانی رێگری لە پەكەكە بكەن تا وەفدەكەمان دەرباز ببێت، جارێ‌ ناتوانین بڵێین جارێكی تر هەوڵدەدەینەوە كە بچینە شەنگال یان نا». « وەفدەكە نەیویست شەڕو كوشتن دروست بێت و جارێكی تر خوێنی كورد  هەر بەدەستی براكەی بڕژێت، لەبەر بەرژەوەندی گشتی و دروست نەبوونی شەڕ گەڕاینەوە دهۆك، نابێت چەند لایەنێك شەنگال كۆنتروڵ بكەن و رێگا نەدەین هێز و لایەنەكانی تر بانگەشە بۆ خۆیان بكەن ، مافی خۆمانە لە هەموو عێراق بانگەشە بۆ كاندیدانی خۆمان بكەین « ئدریس زۆزانی وا دەڵێت. جێگری ئەنجومەنی خۆسەری دیموكرات لە شەنگال ئەوە دووپات دەكاتەوە كە دژی ئەوەن پارتی بگەڕێتەوە بۆ شەنگال. حەسۆ ئیبراهیم ، جێگری ئەنجومەنی خۆسەری دیموكرات لە شەنگال بەهاوڵاتی وت: « بە روون و ئاشكرایی دەڵێن رێگا نادەین پارتی بگەڕێتەوە شەنگال، نەك تەنها ئێمە دژی ئەوەین كە پارتی بگەڕێتەوە، بەڵكو تەواوی خەڵكی شەنگال رێگا نادەین  بگەڕێتەوە». هەروەها باسی لەوەشكرد ئەو رۆژەی وەفدەكەی پارتی هات خەڵكی شەنگال بە ژن و كچ و پیاو رژانە سەر شەقامەكان، وتیشی:»دەیا نجاری تر پارتی هەوڵبدات سەردانی شەنگال بكات بێسوودە، چونكە ئێمە قبوڵ ناكەین جارێكی تر پارتی بگەڕێتەوە «. حەسۆ ئیبراهیم وتیشی: « پارتی بەنیازی بانگەشە نەهاتبوو، بەڵكو دەیویست جارێكی تر بارەگای خۆی بكاتەوە، چونكە شاندەكە زیاتر لە 50 ئۆتۆمبێل بوون ، جگە لەمەش هێزێكی گەورەی لەگەڵ بووە، دەیانویست جارێكی تر ئیرادەی خۆیان لەسەر خەڵكی شەنگال بسەپێنن، ئێمەش ئەو شتە قبوڵ ناكەین، ئەگەر تەنها كاندیدەكانیان بێن و بۆخۆیان بانگەشە بكەن هیچ كێشەمان نیە و ئێمە بەرگرییان لێ‌دەكەین تا دەگەڕێنەوە ناوچەكانی خۆیان، هەر كەسێك دەستدرێژییان بكاتە سەر یان رەفتارێكی ناشیرینیان لەگەڵ بكات ئێمە لێی بەرپرسین «. لەبەرانبەردا فەرماندەی هێزی ئێزدیخان لە شەنگال پێیوابوو ئەو رێگرییەی بەرانبەر وەفدەكەی پارتی كراوە هەڵەیەكی گەورە بووە. حەیدەر شەشۆ، فەرماندەی هێزی ئێزدیخان لە شەنگال لەلێدوانێكدا بەهاوڵاتی وت «ئەو رێگرییەی بەرامبەر وەفدی پارتی كرا هەڵەیەكی زۆر گەورە بوو بەهەموو پێوەرێك دوورە لە بنەماكانی دیموكراتیەت و مرۆڤایەتی، مافی پارتییە لە شەنگال و هەموو عێراق بانگەشە بۆ كاندیدانی خۆی بكات». « ئەو هێزەی رێگری لە وەفدەكەی پارتی كرد یەبەشە بوون و خەڵكیان هاندا تا بچنە سەر شەقام، ئەمەش بۆ ئەوەی پەیامێك بگەیەننە هەموو لایەك و بڵێن سەیركەن ئەوە ئێمە نین رێگری لەپارتی دەكەین بەڵكو خەڵكی سڤیلە رێگا نادات جارێكی تر پارتی بگەڕێتەوە شەنگال «، حەیدەر شەشۆ وای وت

هاوڵاتی سەرۆكی هەرێمی كوردستان و جێگری سه‌رۆكی پارتی  له‌ بانگه‌شه‌ی حزبه‌كه‌یدا له‌ شاری سلێمانی رایگه‌یاند :"به‌رد ده‌گیرێته‌ به‌رزه‌كان.. خه‌ڵك هۆشیاره‌ و ئه‌و سه‌رده‌مه‌ به‌سه‌رچوو قسه‌ به‌ پارتی بڵێیت و ده‌نگ كۆبكه‌یته‌وه‌". دەڵێت:" پارتی سلێمانی لەبیر نەکردووە و ئەو دووانە پێکەوە سەردەکەون". ​ئەمڕۆ چوارشه‌ممه‌ 6ی تشرینی یه‌كه‌می 2021، نێچیرڤان بارزانی، جێگری سەرۆکی پارتی دیموکراتی کورستان لە سلێمانی بانگەشەی بۆ بەربژێرانی پارتەکەی کرد و رایگەیاند، "کوردستان نموونەی پێکەوەژیانە لەگەڵ پێکهاتەکان و ئایین و نەتەوەکانی تر، نابێت ئەو جیاکارییە لە نێوان خۆماندا بمێنێت و وەک کورد، وەک خەڵکی یەک شار و ناوچە دەبێت ئەو جیاکارییە لە ناو ئێمەدا بە هیچ شێوەیەک نەمێنێت." لە میانی قسەکانیدا جێگری سەرۆکی پارتی پەیامێکی بۆ لایەنە سیاسییەکان نارد و ئاماژەی بەوە دا، "بە هەموو لایەنە کوردستانییەکان دەڵێین، ئێستا کاتی گونجاوە بە یەک بەرنامە و ستراتیژیی هاوکارییەکی راستەقینە لەگەڵ عێراقییەکاندا دروستبکەین لە پێناو جێبەجێکردنی دەستووری عێراق و نەهێشتنی بێبەشکردنی کوردستان لە ماف و بەشەبودجەکەی لە عێراقدا". لە بەشێکی دیکەی قسەکانیدا، نێچیرڤان بارزانی وتی، "پارتی سلێمانی فەرامۆشنەکردووە، پارتی و سلێمانی پێکەوەبەستراون، پارتی و سلێمانی پێکەوە جوانن و بە دڵنیاییەوە پارتی و سلێمانی پێکەوە سەردەکەون". سەرۆكی هەرێمی كوردستان راشیگەیاند:" له‌ شۆڕشى گوڵاندا ده‌یان داستانى له‌م ناوچه‌یه‌ تۆماركراوه‌ و یه‌كه‌م گوله‌ى شۆڕشى گوڵان له‌ناوشارى سلێمانیه‌وه‌ ئاراسته‌ى دوژمن كراوه‌". نێچیرڤان بارزانی لە میانی پێشکەشکردنی وتارەکەی رایگەیاند: "کاتێک کەدێمە سلێمانی و سلێمانی دەبینم زۆر دڵخۆش دەبم، چونکە بەڕاستی سلێمانیم خۆشدەوێ، سلێمانی شاری دایکمە، شاری باپیر و خزمەکانمانە، سلێمانیم خۆشدەوێت چونکە شاری ئەدەب و کوردایەتی و شاری هونەر و رۆشنبیرییە، شاری هەڵمەت و قوربانییە. بۆیە ئەو مافەم پێبدەم کە من نیوە سلێمانیم و نیوەی خەڵکی شارەکەتانم". لە تەوەری قسەکانی جێگری سەرۆکی پارتی دیموکراتی کوردستان لەبارەی دۆخی باشوور و ناوەڕاستی عێراق بوو و رایگەیاند، "ئێستا لایەنە عێراقییەکان بۆ بەدەستهێنانی دەنگ دژایەتی کوردستان ناکەن، چونکە دوای خۆپێشاندانەکانی تشرین خەڵکی عێراق تێگەیشت کێشە و نەبوونی خزمەتگوزاری لە شارەکانی باشوور و ناوەڕاستی عێراق پەیوەندی بە پێشکەوتنی هەرێمی کوردستانەوە نییە، بەڵکو پەیوەندی بە خراپ بەڕێوەبردنی دەسەڵات هەیە لەلایەن ئەو حزبانەی کە دەسەڵاتیان لەو سنوورەدا هەیە، هەروەها لە هەرێمی کوردستانیش وایە. ئیتر ئەو سەردەمە بەسەرچوو کە هیچ لایەنێک بیەوێت بە هێرشکردن و پەلاماردانی پارتی لەو ناوچەیە دەنگ کۆبکاتەوە." لە سنووری سلێمانی ململانێیەکی تووند لە نێوان لایەنەکاندا هەیە بۆ بردنەوەی 18 کورسییەکەی ئەو پارێزگایە و پارتی دیموکراتی کوردستان، لە هەڵبژاردنی رابردوو کورسییەکی بردووەتەوەو چاوی لەوەیە لەم هەڵبژاردنەدا، زیاتر لە یەک کورسی بباتەوە. نێچیرڤان بارزانی پەیامێکی ئاراستەی خەڵکی پارزگاکانی سلێمانی و هەڵەبجە، ئیدارەی راپەڕین و گەرمیانی کرد و وتی: "پارتی بە ژمارەی دەنگەکان و کورسییەکانی لەو ناوچەیە تەماشای ئێوە ناکات، پارتی بە چاوی وەفاداری، دڵسۆزی و خەبات تەماشای ئێوە دەکات". بۆ ئەم هەڵبژاردنە کە بڕیارە لە 10-10-2021 بەڕێوەبچێت لە هەر بازنەیەک تەنیا یەک بەربژێری هەیە و چوار لە بەربژێرەکانی ژنن لە بازنەکانی یەک و دوو و سێ و چوار، بە هیوای ئەوەی کۆتای ژنان بەدەستبهێنێت. تەنیا لە بازنەی پێنج (گەرمیان) بەربژێری پارتی پیاوە. لە سلێمانی 1.4 ملیۆن کەس مافی دەنگدانیان هەیە و بەسەر پێنج بازنەدا دابەشکراوە، 63 بەربژێر رکابەری دەکەن کە 49 بەربژێریان سەر بە 10 حیزب و هاوپەیمانی سیاسین، لەگەڵ 14 بەربژێری سەربەخۆ.

  هاوڵاتی  وه‌زاره‌تی دارایی رایگەیاند:" سبەینێ‌ پێنجشەممە 7ی تشرینی یه‌كه‌می 2021، ئەم شوێنانە موچە وەردەگرن: سەرۆكایەتی هەرێم و پەرلەمان و ئەنجومەنی وەزیران و خانەنشینی شارستانی. هاوكات به‌پێی خشته‌كه‌ی وه‌زاره‌تی دارایی، ئەمڕۆ چوارشەممە 6ی تشرینی یه‌كه‌می 2021، ئەم وەزارەتانەی خواره‌وه‌ موچە وەردەگرن: شارەوانی و گەشتوگوزار و وەزارەتی كارەبا و وەزارەتی كارەبا و وەزارەتی كشتوكاڵ و وەزارەتی رۆشنبیری و وەزارەتی ئاوەدانكردنەوە و نیشتەجێكردن.  

  هاوڵاتی وتەبێژی حکومەتی تاڵیبان رایگەیاند:"لەگەڵ ئێراندا لەسەر کۆمەڵێک بابەت بۆ ئەنجامدانی ئاسانکاری ئاڵوگۆڕی بازرگانی لە دەروازە سنوورییەکان، گەیشتوونەتە رێککەوتن". ​ئەمڕۆ چوارشه‌ممه‌ 6ی تشرینی یه‌كه‌می 2021،  لە پێگەی خۆی لە تویتەر زەبیحوڵڵا موجاھید، وتەبێژی حکومەتی تاڵیبان بڵاویکردەوە، کە لەگەڵ ئێراندا لەسەر کۆمەڵێک بابەت بۆ ئەنجامدانی ئاسانکاری ئاڵوگۆڕی بازرگانی لە دەروازە سنوورییەکان، گەیشتوونەتە رێککەوتن. وتەبێژی حکومەتی تاڵیبان ئاماژەی بەوەشکردووە، رێککەوتننامەکە لە 16 بەند پێکھاتووە و ئامانج لێی کۆتاییھێنان بووە بە کۆسپەکانی بەردەم بواری بازرگانی. ئەوەش خراوەتەڕوو، رێککەوتننامەکە بەندەکانی تایبەت بە زیادکردنی کاتژمێرەکانی کارکردن لە دەروازەی سنووری ئیسلام قەلعە بۆ ھەشت کاتژمێر، فراوانکردنی رێگاکانی نێوان ئەفغانستان و ئێران، نوێکردنەوەی یاساکانی تایبەت بە گومرگ و لێکۆڵینەوە لە گرفتەکانی نێوان ھەردوو وڵاتی تیادایە. لەگەڵ ئەوەشدا، گفتوگۆکردن لەسەر پرسەکانی تایبەت بە سوتەمەنی، دابینکردنی خزمەتگوزاری تەندروستی و پشکنینی کۆرۆنا بۆ شۆفێرە ئەفغانییەکان، ئاسانکاری ھاتوچۆی ئۆتۆمبێل و فراوانکردنی خزمەتگوزارییەکانی تایبەت بە تەندروستی و گەشتوگوزار لە نێوان ھەردوو وڵاتدا، بەشێکی دیکەی رێککەوتنەکەی نێوان تاران و کابوڵ بوون. رۆژی 15ی ئابی ئەمساڵ، بزوتنەوەی تاڵیبان دەسەڵاتی گرتە دەست و کابوڵی پایتەختی ئەفغانستانی کۆنتڕۆڵکرد و کۆتایی بە حوکمی ئەشرەف غەنی هێنا. ئێران و ئەفغانستان 945 کیلۆمەتر سنووری ھاوبەشیان ھەیە و تیایدا دەروازە سنوورییەکانی ئیسلام قەلعە، ئەبو نەسڕ فەراھی و زەرەنج لەنێوانیاندا هەن.

هاوڵاتی سیروان ڤیان له‌ وتارێکدا رایگەیاند:" پێویستە تەڤگەری ئازادی و لایەنگرانی دیموکراسی لەو چوارچێوەیەدا لە هەڵبژاردنەکان نزیک ببنەوە، چونكە ئەگەر یەکێتی (یەنەکە) لە هەڵبژاردنەکاندا لاواز ببێت ئەو مەترسییە ڕوودەدات. هێڵی هاوکاریکەری داگیرکەران لە باشوور بەهێز دەکرێت، بەتایبەتی لە ناوچەکانی سۆران و سلێمانی. ئەمە بۆ تەڤگەری ئازادی و بزووتنەوەی گشتی کورد و هەموو گەلی کورد و پارچەکانی کوردستان باش نییە و زیانی دەبێت". سیروان ڤیان له‌ وتارێکدا که‌ تایبه‌ت بۆ ماڵپه‌رى "هاوڵاتى" ناردووه‌ به‌ناونیشانى(دەبێت تەڤگەری ئازادی بۆ ئەم هەڵبژاردنە چی بکات؟) ئاماژه‌ به‌وه‌ش ده‌دات که‌ " پێویستە تەڤگەری ئازادی و لایەنگرانی دیموکراسی لەو چوارچێوەیەدا لە هەڵبژاردنەکان نزیک ببنەوە. ئێستا گەورەترین و نزیکترین مەترسی ئەوەیە لەم هەڵبژاردنەدا هێڵی هاوکاریکەر بەهێز ببێت. پێویستە نزیکبوونەوە لە هەڵبژاردن بەپێی ئەو ڕاستییە و لەو چوارچێوەیەدا بێت. ئەگەر یەکێتیی نیشتمانیی کوردستان (یەنەکە) لە هەڵبژاردنەکاندا لاواز ببێت ئەو مەترسییە ڕوودەدات. هێڵی هاوکاریکەری داگیرکەران لە باشوور بەهێز دەکرێت، بەتایبەتی لە ناوچەکانی سۆران و سلێمانی. ئەمە بۆ تەڤگەری ئازادی و بزووتنەوەی گشتیی کورد و هەموو گەلی کورد و پارچەکانی کوردستان باش نییە و زیانی دەبێت. بۆ ئەوەی ئەمە روونەدات، پێویستە تەڤگەری ئازادی لە هەڵبژاردنەکاندا پشتگیری لە یەکێتی بکات". ده‌قى وتارى سیروان ڤیان: لە عێراق و کوردستان هەڵبژاردن بەڕێوە دەچێت. ئەو هەڵبژاردنە تەنها هەڵبژاردنێکی ئاسایی نییە، بەڵکو زۆر شت لە خۆ دەگرێت و نیشانەی زۆر شتە. راستە بەپێی سنوورەکانی سیستم بژاردەیەک دیاری دەکرێت و تیایدا نوێنەران و بەڕێوەبەران دەستنیشان دەکرێن، بەڵام ئەم هەڵبژاردنە ئەم سنوورانە تێدەپەڕێنێت و لە حکومەت و پەرلەمانتاران ئەنجامی زیاتر و ئەولاتر لەگەڵ خۆی دەهێنێت. لە هەموو هەڵبژاردنەکاندا بژاردە و هەڵوێست و داوای گەل یەکلاکەرەوەیە و سنوورەکانی سیستم تێدەپەڕێنێت. لەم هەڵبژاردنەشدا ئەم سنوورانە تێدەپەڕێندرێن، چونکە هەوڵەکان و گەڕان بۆ چارەسەرکردنی کێشەکانی کۆمەڵگە خۆی لە ناو سیستمی دەوڵەتدا نادۆزێتەوە و چارەسەریان ناکات، چونکە سیستمی دەوڵەت پشتبەستووە بە دەسەڵاتخوازی. ئەو کەس، یان لایەن و گروپانە، کە دەسەڵات دەگرنە دەست هەوڵ دەدەن دەسەڵات لە دەستی خۆیاندا بهێڵنەوە. لە رێگەى ئەو سیستمەوە و بەپێی ئەو سیستمە کۆمەڵگە بەڕێوەدەبەن. هەزاران ساڵە مرۆڤایەتى بەو شێوەیە لە ژێر دەست و چەتری سیستمی دەوڵەتدا ژیاوە و ئەو سیستمە تاوەکو ئێستاش بەردەوامیی هەیە. هەڵبژاردن لە ناو سیستمی دەوڵەتدا گوزارشت لە دیموکراسییەکی سنووردار دەکات، چونکە سیستمی دەوڵەت خۆی لە خۆیدا خۆبەڕێوەبەریی تیادا نییە. لە سەردەمی ئێمەدا هەڵبژاردن بە دامەزراندنی سیستمی کۆماری و نەتەوە – دەوڵەت سەریهەڵدا. چینی بۆرژوازی بە هۆی کێشەی دەسەڵاتداری و بە قازانج و بەرژەوەندیی خۆی هەڵبژاردنی خستووەتە ناو سیستمی دەوڵەتەوە. بەم شێوەیە لەگەڵ هەڵبژاردنەکاندا دەستە و گروپەکانی دەسەڵات، یان ئەوەى کام گرووپ و چین دەبنە دەسەڵات، دیاری دەکرێت. تەنانەت ئەگەر هەندێک جیاوازیش لەنێوانیاندا هەبێت، ئەوا هەڵبژاردن لەناو سیستمی دەوڵەتدا بە "دێموکراسی نوێنەرایەتیکردن" ناودەبرێت. واتە نوێنەرەکانمان حوکممان دەکەن و ئێمە بەڕێوەدەبەن. بۆ ژیانێکی ئازاد و دیموکراسی و یەکسان پێویستی بە حوکمڕانی و خۆبەڕێوەبەرییەکی ڕاستەوخۆ و دێموکراسییانە هەیە. ئەوەش بەڕێکخستن و جوڵاندنی کۆمەڵگایەک دەکرێت. هەڵبژاردن و دیاریکردنی ئیرادەی خۆت دەبێت بەم شێوەیە و لەم واتایەدا ببینیت. هەموو سیستم و سیاسەتێک گوزارشت لە عەقڵییەت و زهنیەتێک دەکات. مرۆڤ دەتوانێت بەو گوزارشتکردنە بڵێت پارادیگما. لە باشوور تەڤگەری ئازادی لەسەر بنەمای پارادایگمایەکی جیاواز دامەزراوە. تەڤگەری ئازادی ئەمە بە "پارادایگمای کۆمەڵایەتی" پێناسە دەکات. سەرەکیترین خەسڵەتی ئەم پارادایگمایە ڕێکخستنکردن و خۆبەڕێوەبردنی جەوهەرییە. پارادیگمایەک کە لەسەر بنەمای دەوڵەت و دەسەڵات دامەزراوە، ڕاستەوخۆ کۆمەڵگا بە رێکخستن ناکات و ئەو بەڕێوەبەرییەى، کە دروستی دەکات بەرژەوەندیی کۆمەڵگا بە بنەما ناگرێت. دەوڵەت بە پێی بەرژەوەندییەکانی دەوڵەت خۆی رێدەخات و کۆمەڵگا بەڕێوە دەبات. بێگومان گروپێک لە ناو کۆمەڵگا دێتە دەرەوە و دەسەڵاتی دەوڵەت دەگرێتە دەست. هەروەها لە بنەڕەتدا بەرژەوەندیی دەوڵەت هەر بەرژەوەندیی خودی ئەو کەس و گرووپانەیە، کە دەسەڵاتی دەوڵەتیان گرتووەتە دەست. ئەو دەستە و گرووپە دەسەڵاتدارانە لە مێژووی کۆنەوە تا ئەمڕۆ لە گۆڕێدان و هەن. لەگەڵ پەرەسەندن و پێشکەوتنی خەباتی کۆمەڵگا بۆ ئازادی و یەکسانی لە سەردەمی هاوچەرخدا سیستمی دەوڵەت لاواز بوو و لە بەرامبەردا دەسەڵاتی سروشتیی کۆمەڵگا لە ڕووی ئایدۆلۆژی و سیاسییەوە بەهێز بوو، بۆیە بەبێ رەزامەندیی کۆمەڵگا دەسەڵات و سیستمی دەوڵەت ناتوانێت وەک جاران دەسەڵاتێکی تاکلایەنە بەسەر کۆمەڵگادا بسەپێنێت و کۆمەڵگا بەڕێوەببات. لەبەر ئەوەش سیستمی دەوڵەتی پێوێستیی بە کۆمەڵگا هەیە، بەڵام بەم شێوەیە کێشەکانی کۆمەڵگا چارەسەر نابن، کۆمەڵگا ئازاد نابێت، کێشەکانی ئازادی و دێموکراسی بەردەوامییان دەبێت، چونکە سیستمی دەوڵەت لەو رێگەیەوە کێشەی شەرعییەتبوونی خۆی چارەسەر دەکات، بەڵام کێشەکانی کۆمەڵگا چارەسەر نابن و چارەسەریشیان ناکات. بۆ ئەوەی ئازادکردنی کۆمەڵگا، چارەسەرکردنی کێشەی ئازادی و دێموکراسی رووبدات پێویستە کۆمەڵگا خۆی ڕێکبخات و خۆبەڕێوەبەریی جەوهەری دابمەزرێنێت. مەبەست لە پارادیگمای کۆمەڵایەتی جێبەجێکردنی ئەو ئامانجەیە. تەڤگەری ئازادیش ئەمە بە گرنگ دەزانێت و بەم پێیە سیاسەتی خۆی دادەڕێژێت. واتە هەڵبژاردن خۆی بە تەنها شتێکی ستراتیژی نییە. تەڤگەری ئازادی ڕێکخستنێکی هەڵبژاردن نییە. تەڤگەری ئازادی ڕێکخستنێکی کۆمەڵایەتییە و سیستمی کۆمەڵایەتی بە بنەما دەگرێت. ئەگەر تەڤگەری ئازادی هەڵبژاردن بە ستراتیژی بزانێت و لەو چوارچێوەیەدا نزیک ببێتەوە ئەوا دەکەوێتە هەڵە و ناکۆکییەوە. بابەتە ستراتیژییەکە بۆ تەڤگەری ئازادی ئەوەیە، کە سیستمێکی جەوهەریی کۆمەڵگا دروست بکات. ئەوەش بە کۆمۆنە و ئەنجوومەن و هاوئاهەنگی سیاسی، واتە سیستمی کۆنفیدراڵ و شتی تر بەدی دێت. هەڵبژاردن و بابەتەکانی تر ئامڕازن بۆ ئەو ئامانجە. لە سیاسەتدا بەوە دەوترێت "تاکتیک". کەواتە، ئایا هەڵبژاردان هیچ گرنگییەکی بۆ ئیدارەی دەوڵەت نییە؟ بێگومان گرنگیی هەیە و زۆریش گرنگیی هەیە. هێزە کۆمەڵایەتییەکان وەک تەڤگەری ئازادی دەتوانن بە رێبازی راست ئەنجامێکی ستراتیژی پێکبهێنن. دەتوانن لە کوردستان کۆمەڵگا و هێزە نیشتمانپەروەرەکان و دیموکراتیکەکان بەهێز بکەن و هێزەکانی دژە کۆمەڵگا و هاوکارانی داگیرکەران و وابەستەکان و ملهوڕەکان (دەسپۆتیک) لاواز بکەن. لەم گێژاو و قەیرانە سیاسییەى ئێستادا ئەمە بابەتێکی زۆر گرنگە. ئەگەر تەڤگەری ئازادی و هێزە کۆمەڵایەتییەکانی دیکە بە رێبازی ڕاست و دروست لە هەڵبژاردن نزیک ببنەوە ئەوا دەتوانن ئەنجامێکی ستراتیژی بخوڵقێنن، بەڵام ئەگەر بە شێوەیەک نزیک ببنەوە و بڵێن، "با چەند پەرلەمانتارێکمان هەبێت" ناتوانن ئەنجامێکی باش بخوڵقێنن. بابەتەکە ئەوە نییە، کە چەند پەرلەمانتار هەبن و بڕۆن بۆ پەرلەمانی عێراق، ئەمە بە تەنها بێ مانایە. ئەگەر هێڵی هاوکاریکەری داگیرکەران لە ناوچەکانی سۆران و سلێمانی بەهێز بکرێت، ئەوا دەوڵەتی تورکیا لەو ناوچانەدا کاریگەریی خۆی دروست دەکات و هێڵی نیشتمانپەروەری لاواز دەبێت. لەو کاتەدا بوونی چەند پەرلەمانتارێک هیچ مانایەکی نابێت. ئەگەر ئەوە ڕووبدات راستەوخۆ کۆمەڵگا و هێزە کۆمەڵایەتییەکان لاواز دەبن. لەو کاتەدا هێڵی هاوکاریکەر کاریگەریی خۆی دروست دەکات و داگیرکاری بەهێز دەبێت. بە کورتی هێزی دوژمنی گەل و کۆمەڵگا، دوژمنی هەبوونی گەلی کورد کاریگەریی دەبێت و بەهێزتر دەبێت. ئەمەش لاوازبوونی لایەنە کۆمەڵایەتی و ئازادیخواز و نیشتمانپەروەرەکانی لێدەکەوێتەوە. پێویستە تەڤگەری ئازادی و لایەنگرانی دیموکراسی لەو چوارچێوەیەدا لە هەڵبژاردنەکان نزیک ببنەوە. ئێستا گەورەترین و نزیکترین مەترسی ئەوەیە لەم هەڵبژاردنەدا هێڵی هاوکاریکەر بەهێز ببێت. پێویستە نزیکبوونەوە لە هەڵبژاردن بەپێی ئەو ڕاستییە و لەو چوارچێوەیەدا بێت. ئەگەر یەکێتیی نیشتمانیی کوردستان (یەنەکە) لە هەڵبژاردنەکاندا لاواز ببێت ئەو مەترسییە ڕوودەدات. هێڵی هاوکاریکەری داگیرکەران لە باشوور بەهێز دەکرێت، بەتایبەتی لە ناوچەکانی سۆران و سلێمانی. ئەمە بۆ تەڤگەری ئازادی و بزووتنەوەی گشتیی کورد و هەموو گەلی کورد و پارچەکانی کوردستان باش نییە و زیانی دەبێت. بۆ ئەوەی ئەمە روونەدات، پێویستە تەڤگەری ئازادی لە هەڵبژاردنەکاندا پشتگیری لە یەکێتی بکات.

  هاوڵاتى وەزارەتی نەوتی عێراق رایگەیاند، لە ناوەڕاستی ئەم مانگەدا، نەوتی سپی لە پارێزگاکانی هەرێمی کوردستان دابەشدەکرێت. ​ئەمڕۆ چوارشه‌ممه‌ 6ی تشرینی یه‌كه‌می 2021، حسێن تاڵب جێگری بەڕێوەبەری کۆمپانیای دابەشکردنی بەرهەمە نەوتییەکانی سەر بە وەزارەتی نەوتی عێراق رایگەیاند، لە ناوەڕاستی ئەم مانگەدا بڕە نەوتی سپی پارێزگاکانی هەرێمی کوردستان دابەشدەکرێت و سەرەتای مانگی داهاتووش، بڕە نەوتی سپی پارێزگاکانی باشوور و ناوەڕاستی عێراق دابەشدەکرێت. ئەوەشی خستەڕوو، بڕی پێویستی نەوتی سپی ئامادەیە و لە رێگای کارتی تایبەتی دابەشکردنی نەوتەوە دابەشدەکرێت کە ماوەی چەند ساڵێکە بەکارهێنراوە. ئەمەش لەکاتێکدایە، پرۆسەی دابەشکردنی نەوتی سپی ماڵان لە هەرێمی کوردستاندا بەگوێرەی پێداویستی هاوڵاتییان نەبووە و ساڵی پاریش، لە هەندێک ناوچە دابەشکرا و لەهەندێک ناوچەی دیکەش دابەشنەکرا، سەرباری ئەوەی هاوڵاتیان گازەندەی گرانی نرخی نەوتەکەیان دەکرد.

هاوڵاتی رەحمان غەریب لە نوسنێكیدا بەناونیشانی ( نورەدینێك لەناو بانگەشەدا)  ئاماژە بەوە دەدات :" لە هەڵبژاردنەكانی پێشوودا، هەندێ گوتاری ئاگرین و باو، لە سەركردەی لایەنێكی هەڵبژاردنەوە بەس بوو بۆ جۆشدانی شەقامی بانگەشەكەران، بەڵام ئەوەی بانگەشەی ئەم هەڵبژاردنە لە هەڵبژاردنەكانی رابردوو جیا دەكاتەوە، ئەوەیە كە حەماسەت لە شەقامێكە، بانگەشەی لیستە ركابەرەكان لە شەقامێكی دیكە، تا هەنووكە هیچ كۆڵان و دوڕیانێك نەیگەیاندوون بەیەكتر. حەماسەتی نورەدینی یەكێتی لەناو بانگەشەدا، شەقامی بێدەنگی و بایكۆت و خۆڵەمێشی توشی سەرسورمانكرد".  ئەمڕۆ سێ شەممە، 5ی تشرینی یه‌كه‌می 2021، رەحمان غەریب لە نوسنێكیدا بەناونیشانی ( نورەدینێك لەناو بانگەشەدا) نوسیویەتی:"  لە هەڵبژاردنەكانی پێشوودا، هەندێ گوتاری ئاگرین و باو، لە سەركردەی لایەنێكی هەڵبژاردنەوە بەس بوو بۆ جۆشدانی شەقامی بانگەشەكەران، بەڵام ئەوەی بانگەشەی ئەم هەڵبژاردنە لە هەڵبژاردنەكانی رابردوو جیا دەكاتەوە، ئەوەیە كە حەماسەت لە شەقامێكە، بانگەشەی لیستە ركابەرەكان لە شەقامێكی دیكە، تا هەنووكە هیچ كۆڵان و دوڕیانێك نەیگەیاندوون بەیەكتر. حەماسەتی نورەدینی یەكێتی لەناو بانگەشەدا، شەقامی بێدەنگی و بایكۆت و خۆڵەمێشی توشی سەرسورمانكرد، ئەو پرسیارەی بێ وەڵام هێشتەوە كە ئاخۆ سەرچاوەی ئەو حەماسەتەی نوردەین لە كوێوە هەڵقوڵاوە و بۆ نەگوازراوەتەوە بۆ ئەودیوو؟ بۆ نورەدین گڕی بەردایە بانگەشەی یەكێتی؟ چاوەروانی نوردەین بوون یان كارەكتەرێكی تر؟ بۆ ئەمجارە نورەدین دەركەوت ؟ چونكە لە بانگەشەكانی تر حەماسەت لە شێوەی نورەدین شەقامەكان و بنكەی هەڵبژاردنەكانی جۆش دابوو، ئۆتۆمبێلی پر لە گەنجی بەحەماس دیمەنەكەیان پر كردبوو لە سەماو هەڵپەڕكێ، یەكێتیش نورەدینی زۆر بوو، ئەم نوەردەینە گەر لەوێ بوایە ئەوەنە دەرنەدەكەوت".   دەقی وتارەكەی رەحمان غەریب :... لە هەڵبژاردنەكانی پێشوودا، هەندێ گوتاری ئاگرین و باو، لە سەركردەی لایەنێكی هەڵبژاردنەوە بەس بوو بۆ جۆشدانی شەقامی بانگەشەكەران، بەڵام ئەوەی بانگەشەی ئەم هەڵبژاردنە لە هەڵبژاردنەكانی رابردوو جیا دەكاتەوە، ئەوەیە كە حەماسەت لە شەقامێكە، بانگەشەی لیستە ركابەرەكان لە شەقامێكی دیكە، تا هەنووكە هیچ كۆڵان و دوڕیانێك نەیگەیاندوون بەیەكتر. حەماسەتی نورەدینی یەكێتی لەناو بانگەشەدا، شەقامی بێدەنگی و بایكۆت و خۆڵەمێشی توشی سەرسورمانكرد، ئەو پرسیارەی بێ وەڵام هێشتەوە كە ئاخۆ سەرچاوەی ئەو حەماسەتەی نوردەین لە كوێوە هەڵقوڵاوە و بۆ نەگوازراوەتەوە بۆ ئەودیوو؟ بۆ نورەدین گڕی بەردایە بانگەشەی یەكێتی؟ چاوەروانی نوردەین بوون یان كارەكتەرێكی تر؟ بۆ ئەمجارە نورەدین دەركەوت ؟ چونكە لە بانگەشەكانی تر حەماسەت لە شێوەی نورەدین شەقامەكان و بنكەی هەڵبژاردنەكانی جۆش دابوو، ئۆتۆمبێلی پر لە گەنجی بەحەماس دیمەنەكەیان پر كردبوو لە سەماو هەڵپەڕكێ، یەكێتیش نورەدینی زۆر بوو، ئەم نوەردەینە گەر لەوێ بوایە ئەوەنە دەرنەدەكەوت. خۆم مەعجیبم بەم كارەكتەرە، دەنگی من بۆ حزبەكەی نورەدین نییە، بەڵام لەناو ئەو هەموو سەركردایەتی و بنكە فراوانەی (ی.ن.ك)، یان ئەوانەی چاوەروانن داروپەردووی ئەم هەڵبژادنە بەسەر نوردەیندا بروخێ، ئەم خوڵقاندنی ئەم حەماسەتە بۆ حزبەكەی گرنگە. چۆن دەنگدان مافە، دەنگنەدانی ئارەزوومەندانەیش هەر مافە، مەرجی كاریگەری هەردووكیان ئەوەیە بە هۆشیارییەوە پراكتیك بكرێن، چونكە دیموكراسییەت لە سنودقی كەللەسەرەوە دەست پێدەكات نەك سندوقی دەنگدان، جۆرج تەرابیشی وای ووت. جا بۆ ئەوەی دەرئەنجامی باشت دەستبكەوێت، ئەبێت پێشتر هاوڵاتییەكی هۆشیار بە پرەنسیپەكانی دیموكراسی پەروەردە بووبن، تا بریاری چوون و نەچوونی بۆ سەر سندوقی دەنگدان رەنگدانەوەی فەرهەنگی دیموكراسی بێت. بۆ نورەدین و هاورێكانی، ئەوانەشی لە شەقامی بایكۆتەوە بە سەرسوڕمانەوە تەماشایان كرد، بۆ هەموو لیستە ركابەرەكانی تریش كە چونەتە قۆناغی گەرمی بانگەشە( ئەوەی مەلا بەختیار بە قۆناغی داغی وەسفكرد) ئەو راستییە زۆر سادەیە بزانن: كەس ناتوانێت بە ناشیرینكردنی بەرامبەر نمونەكانی خۆی جوان بكات، ئەگەر لە بنچینەدا نمونەی جوانی پێشكەش نەكردبێت. ئینجا ئەبێت وا وێنای قۆناغی (داغ)ی بانگەشەی هەڵبژاردن بكەین كە مەبەست لێی "داغ"كردنی پرۆسەی دیموكراسی نییەو بانگەشە لە دروشمەوە بگوازینەوە بۆ واقیع، هاتوهاواری لیستە ركابەرەكان بگوازرێتەوە بۆ كردار، لە بەڵێنی رەنگاورەنگەوە ببێتە مەسەلەیەكی هەستپێكراو لە ژیانی هاوڵاتیان. پاشان دەنگدەر مەكەن بە دوژمنی یەكتر، چونكە لۆژیك ئامادەیی هەبێت دوای دەنگدان، لە بەغدا كۆدەبنەوە، رێكدەكەون لانی كەم لەسەر خاڵە هاوبەشەكانتان و نورەدینیش لە شارەزورەوە نەك بە یەكێتی و گۆڕان بە هەمووان دەڵێت: پێكەوە بەهێزترن.  

هاوڵاتى  ئەمینداری گشتی یەكگرتووی دەڵێت، "پرۆسەی هەڵبژاردن باشترین بەرهەمی عەقڵی مرۆڤەو تاكە بژاردەی مەشروع و شارستانی و گونجاوە بۆ دیاریكردنی نوێنەرانی خەڵك، نەكەن بەپاساوی گلەیی و بێ زاری بایكۆت بكەن". ئەمرۆ سێشەممە، 5ی تشرینی یەکەم. سەڵاحەدین محەمەد بەهائەدین پەیامێكی ڤیدیۆی بڵاوکردەوە وتیشی، "نەكەن بەپاساوی گلەیی و بێ زاری بایكۆت بكەن و لە داخی نادادی و ستەم و گەندەڵی و قۆرخكاری دەسەڵات، نەچن بۆ سەر سندوقی هەڵبژاردن، چونكە بەوە لە مافێكی یاسایی خۆتان مەحروم ئەكەن و لە ئەركێكی شەرعی خۆتان دوا ئەكەون و فرسەت بەكەسانی نەشارەزاو لێ نەهاتوو ئەدەن نوێنەرایەتیتان بكات". ئەمینداری گشتی یەكگرتووی ئیسلامی كوردستان ئاماژەی بەوەشکردووە، "یەكێك لەپیلانی گەندەڵكاران و خەڵكە نابەرپرسەكان ئەوەیە كە هەوڵ ئەدەن هاوڵاتیان بێ هیوا بكەن لەگۆڕانكاری   و دەیانەوێ مەئیوسیان بكەن لە چاكسازی و ناچار بكرێن بەڕازی بوون بە نادادی و واقعی چەقبەستوی سەقەت، هەڵبژاردن هەنگاوێكی بنەڕەتیە لەپرۆسەی گۆڕانكاری و چاكسازیدا و ئەمڕۆ بەدیلی نیە لە كۆمەڵگەی ئێمەدا". دەقی پەیامەكە: بسم الله الرحمن الرحیم جەماوەری خۆشەویست و شەرەفمەندی كوردستان سڵاوی خودای پەروەردگارتان لێ بێت.. وا هەڵمەتی هەڵبژاردنە چارەسەنوس سازەكەی ئەنجومەنی نوێنەرانی عێراق لە كۆتاییدایە.. هەڵبژاردنێكی بایەخدارو هەستیارەو لە هەلومەرجێكی هەستیاری ناوچەكە و عێراقدا ئەنجام ئەدرێت.. هەرێمی كوردستان زۆر لەجاران زیاتر پێویستی بەئامادەیی و حزورە لە بەغدا.. پێویستی بەناردنی كەسانێكی شارەزاو بوێر و دڵسۆزی گەل و نیشتیمانە.. كەسانی ڕابردوو پاك و جێگای متمانە نەك تەنیا گەندەڵ نەبن بەڵكو دەبێ ڕێگە بگرن لەگەندەڵكاری و لەبەغداوە چاودێری ماف و ئەركی هەرێم و ناوەند بكەن و داكۆكی لە پشكی مافە دەستورییەكانی گەلەكەمان بكەن،  ئێمە دەمانەوێ كەسانێك بنێرینە ئەو پۆست و پێگەیە بەهیچ نەخەڵەتێن و لەهیچ نەترسێن، قەومچیەتی درۆینە نەكەن و نیشتیمان نەفرۆشن و لەگەندەڵی نەگلابن و پابەندبن بەشناس و ئاینی گەلەكەیان و خەمەكانی هاوڵاتی دەنگدەری بازنەكەیان هەڵگرن و نوێنەرێكی دروست و وەكیلێكی ئەمین بن.. ئەبێ لەو كەسانە بن كە پابەند ئەبن بە بەڵێنەكانیانەوە و لەگەڵ خودا و خەڵقی خودا راست ئەكەن.. هاوڵاتیانی سەربڵند: + پرۆسەی هەڵبژاردن باشترین بەرهەمی عەقڵی مرۆڤەو تاكە بژاردەی مەشروع و شارستانی و گونجاوە بۆ دیاریكردنی نوێنەرانی خەڵك لەسەنتەری بڕیارو یاسادانان و ئیدارەی وڵاتدا.. بۆیە نەكەن بەپاساوی گلەیی و بێ زاری بایكۆت بكەن و لەداخی نادادی و ستەم و گەندەڵی و قۆرخكاری دەسەڵات،نەچن بۆ سەر سندوقی هەڵبژاردن، چونكە بەوە لە مافێكی یاسایی خۆتان مەحروم ئەكەن و لەئەركێكی شەرعی خۆتان دوا ئەكەون و فرسەت بەكەسانی نەشارەزاو لێ نەهاتوو ئەدەن نوێنەرایەتیتان بكات.. + یەكێك لەپیلانی گەندەڵكاران و خەڵكە نابەرپرسەكان ئەوەیە كە هەوڵ ئەدەن هاوڵاتیان بێ هیوا بكەن لە گۆڕانكاری   و دەیانەوێ   مەئیوسیان بكەن لەچاكسازی و ناچار بكرێن بەڕازی بوون بە نادادی و واقعی چەقبەستوی سەقەت، هەڵبژاردن هەنگاوێكی بنەڕەتیە لەپرۆسەی گۆڕانكاری و چاكسازیدا و ئەمڕۆ بەدیلی نیە لە كۆمەڵگەی ئێمەدا. دەنگدەرانی بەرێز ... + ڕاستە لەبانگەشەدا قسەو گوتاری جۆراوجۆر دەكرێ و موزایەدەی زۆر هەیە و هەرلایەنەش باسی جوانی خۆی ئەكات و ناشرینی بەرانبەرەكانی دەرئەخات.. بەڵام سەلامەتی بانگەشەی هەڵبژاردن و دوری لە توندوتیژی لە هەڵمەتی ئەم پرۆسەیەدا جێگای دڵخۆشیە و بایەخی خۆی هەیە. ڕكابەری و منافەسەی هەڵبژاردن سروشتیەو بەمانای ناحەزی و دوژمنایەتی نیە.. بەشەیتانكردنی یەكتر ڕەوشتێكی دواكەوتوەو سیاسەت نابێ خاڵی بكرێتەوە لەبەهاو ئەخلاق.. + ڕۆژی 8/10 دەنگدانی تایبەت و  10/10  دەنگدانی گشتی مەراسیمی نەخشاندنی مێژوویەكی نوێ یە.. دەبێ دەنگدەران بەئیرادەو بەهیمەت و ئارامیەوە بچنەسەر سندوقەكان و گشت چاودێرو بریكاری لایەنەكان و كارمەندەكانی كۆمسیۆن و سەرجەم هاوڵاتیان بەهاوكاری یەكتر پرۆسەكە بڕازێننەوە.. + ئێمەی یەكگرتووی ئیسلامی كوردستان هێزێكی مرۆیی و فیكری و ئەخلاقی و كۆمەڵایەتی كاریگەرو ڕەسەنی ئەم وڵاتەین.. بەقەناعەت و ئەدەبیاتی خۆمان لەسەنگەری خزمەت و خەباتداین، خۆمان بە بەختەوەر ئەزانین كە لەم پرۆسەیەدا بە پشتیوانی لەپۆلێك براو خوشكی شایان و شیاو بەشداریمان كردووە.. سەبارەت بەو شەش كاندیدە بەڕێزەی كە ئێمە پاڵپشتیان ئەكەین.. دڵنیایی ئەدەین بەجەماوەری كوردستان  لەسەر دڵسۆزی و تواناو بوێری و شایستەییان.. +  كاندیدەكانمان بەدیدو قەناعەتی ئێمە شایستەیی ئەم ئەركە گەورەیان هەیە.. تەمەن و ڕابردووی ئەم بەڕێزانە شایەتە لەسەر ئەوەی كەسانێكی دەست پاك و دڵسۆزو بوێرن.. ئەركی نوێنەرایەتی و وەكالەت ئەزانن و بەو پەڕی توانایانەوە داكۆكی لەمافی هاوڵاتیان ئەكەن..  خاوەنی بیروباوەڕن و داكۆكی لەئاین و شناسی گەلەكەیان و بەرگری لە مافە دەستوریەكانی هەرێمەكەیان ئەكەن.. بەدور لە هەڵاو چەواشەكاری مامەڵە لەگەڵ نوقسانی و ناشیرینیەكانی بەرانبەرەكانیان ئەكەن.. ڕێگری لە مونكەرو بەرگری لە مەعروف ئەكەن بە ئەدەبیات و ڕەوشتێكی شارستانی و مەشروع.. سەقامگیری ئەمنی و حوكمی ڕەشید و گەشەی ئابوری وڵات و دادگەری و خزمەتگوزاری و ئازادیەكان ئامانجیانەو هەرگیز لەگەڵ پشێوی نانەوەو تێكدان و گشتاندن نین و دژن بە گەندەڵی و پیس خۆری و نادادی.. حەرامخۆری و گەندەڵی بەنەخۆشی ئەزانن و قۆرغكاری ئیداری و ئابوری بە تاوان ئەناسن و پێشلكردنی مافی مرۆڤ و ئازادیەكان بەدەردێكی كوشندە ئەبینن، پەروەردەی مەدرەسەی یەكگرتوون و پەیڕەوی ڕەوتی ئیصلاح و چاكسازین.. بۆیە داواكارم لەئەندام ولایەنگرانی یەكگرتووی ئیسلامی كوردستان بەتایبەت و جەماوەری ئیسلامخوازو ئیصلاح خوازو دڵسۆزی گەل و وڵات بەتێكڕا ئەم هەڵبژاردنە ڕۆژی 10/10 بكەینە كەرنەڤاڵی بەرەو چاكسازی ڕاستەقینەو گۆڕانكاری ڕیشەیی و سەقامگیری سیاسی و ئابوری.. هیوادارم گشت هاوڵاتیان و دەنگدەرانی ئازیز بەگوڕو تینەوە بەرەو سندوقی هەڵبژاردن بڕۆن و دەنگ بەكەسانی شارەزاو بوێرو ئەمین بدەن.. شایەتی خۆتان بەئەمانەتەوە لەسەر كاندیدەكان بدەن و ویژدانتان ئاسودە بكەن.. خودای میهرەبان خەلًَك و خاكی نیشتیمان و وڵاتی عێراق و سەرجەم مرۆڤایەتی لەبەڵاو كێشەو گرفت و قەیران بپارێزێ.. والسلام علیكم ورحمە الله

  هاوڵاتی وەزارەتی تەندروستیی هەرێمی کوردستان ئاماری رۆژانەی تایبەت بە ڤایرۆسی کۆرۆنای بڵاوکردەوە و رایگەیاند، 1360 تووشبووی نوێی ڤایرۆسەکە دەستنیشانکراون و لەو ماوەدا 9 تووشبووی کۆرۆنا گیانیان لەدەستداوە، هاوکات 1504 تووشبووی پێشووش چاکبوونەتەوە. بەپێی ئامارەکەی وەزارەتی تەندروستی، لە 24 كاتژمێری رابردوودا حەوت هەزار و 416 پشکنین کراون، ئەنجامی پشکنینی 1504 کەس پۆزەتیڤ بوون.       

كاوە رەش لەنزیك سنوری نێوان بیلاڕوس و پۆڵەندا، رۆژنامەوانی ئەوروپای  تۆڕی بی،بی،سی، (نایك بەیكی) چاوی دەكەوێت بەژمارەیەك كۆچبەر، كە لەناو دارستانەكانی سەرسنوور گیریان خواردووەو رەوشی ژیانیان مەترسیدارە. شەوان پلەی سەرما دەگاتە ئاستی بەستن و تائێستا چوار كۆچبەر لەسەرمان لەوێ رەقبوونەتەوە. لەبەرامبەر سەرهەڵدانی كۆچی نایاسایی لەو سنورەدا، هەریەكە لەئەندامانی یەكێتی ئەوروپا، پۆڵەندا، لاتیڤیا و لیتوانیا، دۆخی فریاگوزاری لەناكاویان راگەیاندووە، بەهۆی هاتنی هەزاران كۆچبەر كەهەوڵ دەدەن لەبیلاڕوسەوە تێبپەڕن بۆ یەكێتی ئەوروپا. هاوكات یەكێتی ئەوروپا، ئەلێكساندەر لوكاشینكۆ، سەرۆكی بیلاڕوسیا، تۆمەتبار دەكات بەوەی كۆچبەران وەك چەك بەكاردێنێت، لەدژی وڵاتانی ئەوروپا، لەبەرامبەر كۆمەڵێك سزای ئابوریدا كە بەسەریدا سەپێندراوە. لەلایەكی دیكەشەوە وڵاتی پۆڵەندا، بەتەواوەتی رێگا بەچالاكوان و كارمەندانی رێكخراوە مرۆییەكان و رۆژنامەنووسان نادات بگەنە ناوچە سنوورییەكان و  رێگای لێ قەدەغەكردوون، بۆ هاوكاریی و بەئاگابوون لەڕەوشی كۆچبەرانی گیرخواردوو. رۆژنامەوانەكەی تۆڕی (بی، بی، سی) ژمارەیەك كۆچبەر دەدۆزێتەوە لەدارستانەكانی نێوان بیلاڕوس و پۆڵەندا، كەبەشێكیان خەڵكی نەیجیریاو عێراقن و لەسەرمان هەڵدەلەرزن. كۆچبەرەكان بە رۆژنامەوانەكەی دەڵێن سێ هەفتەیە لەلایەن پاسەوانانی سەرسنوری بیلاڕوس پۆڵەندا دێن و دەڕۆن، هیچ كامیان رێگایان پێنادەن بچنە ناو وڵاتەكەیانەوە. ئەوان دەڵێن; وەك تۆپی پێ، یاریمان پێدەكەن، سەربازانی بیلاڕوس، لێماندەدەن و دەماننێرنە سەرسنوری پۆڵەندا، دواتر  سەربازانی پۆڵەندا، دەمانگرن و بەلێدان دەماننێرنەوە سنوری بیلاڕوس. یەكێك لەكۆچبەرەكان دەڵێت:» شەوان لەنێوان كاتژمێر 8 بۆ 12 سەربازانی بیلاڕوس پێمان دەڵێن بەڕێبكەون بۆ سنوری پۆڵەندا  ئێستا سنوری كەسی لێ نیە، دەبێ بەژێر تەلبەندەكەدا خۆمان بەزەویدا بخشێنن و بپەڕینەوە ئەودیو سنور، بەڵام كاتێك سەربازانی پۆڵەندا دەمانگرن، دیسانەوە بەلێدان دەماننێرنەوە سنوری بیلاڕوس». رۆژنەمەوانەكەی بی،بی،سی ئەوەشی باسكردووە كە وەك دیارە ژمارەیەكی زۆر كۆچبەری لێرە دەبیندرێت، بەشێكیان رەوشیان خراپە، بۆیە داوای پزیشكیان كردووەو ئێستا چاوەڕێن كە سەربازەكان رێبدەن بگاتە لایان، چونكە بەشێكیان لەژێر رەوشێكی ترسناكی تەندروستیدان و لەسەرمان هەڵدەلەرزن. قەیرانی كۆچبەران لەناوەڕاستی ئەوروپادا، بۆتە جێگای نیگەرانی رێكخراوەكانی مافی مرۆڤ، بەوەی نازانن چی لەوێ دەگوزەرێت بەهۆی رێگانەدان بەڕێكخراوە مرۆییەكان و رۆژنەمەوانان، بۆ گەیشتنیان بەو ناوچانەی كۆچبەران گیریان لێ خواردووە. بەپێی ڤیدیۆیەك كەدەسەڵاتدارانی بیلاڕوس بڵاویانكردۆتەوە، نیشانی دەدات، كە لاشەی ژنێكی عێراقی لەسەرمان رەق بۆتەوە لەسەر سنوری نێوان بیلاڕوس و پۆڵەندا كەوتووە. كەهاوسەرەكەی دەردەكەوێت دەڵێت» سێ كەسی دیكەش هەر ئەو شەوە لێرە لەسەرمان رەق بوونەتەوەو گیانیان لەدەستداوە». هەر لەناو دارستانەكان گەنجێكی عێراقی تەمەن ،٢٠ساڵان بەناوی جەعفەر دەڵێت:»سێ رۆژە، بێ خواردن و خواردنەوەی دەژین، لەگەڵ ئەوەش بەهۆی سەرمای زۆرەوە، تووشی نەخۆشی هایپۆسێرمیا بووە». بۆ رێگری كردن لەكۆچبەران پەرلەمانی پۆڵەندا، دەنگی بە یاسایەك داوە كەڕێگا بەپۆلیس و سەربازانی وڵاتەكەی دەدات، كەدەتوانن رێ لەكۆچبەران بگرن و بیانگەڕێننەوە ئەودیو سنوری وڵاتەكەیان، سەرەڕای ئەوەی ئەو بڕیارە دژی یاسا نێودەوڵەتییەكانە دەربارەی كۆچبەران. ماتیوزس مۆڕاویكی، سەرۆك وەزیرانی پۆڵەندا، رایگەیاند:» هەڕەشەی جدیی و رێكخراو لەسەر سنوری وڵاتەكەمان هەیە، بۆیە بەدڵنیاییەوە رێ نادەین بۆشایی دروست بێت بۆ گوشارخستنە سەرمان بەناردنی كۆچبەران». وڵاتانی ئەوروپا بیلاڕوس تۆمەتبار دەكەن بەبنیادنانی قەیرانی كۆچبەران لەسەر سنورەكانی ئەوروپا. لەبەرامبەریشدا بیلاڕوس، سیاسەتی وڵاتانی خۆرئاوا بەبەرپرس دەزانێ لەو دۆخەی كۆچبەران. بەشێك لەكۆچبەران دەڵێن، ئەگەر بیلاڕوس دیپۆرتیان بكاتەوە ئاساییە، دەڵێن; لەوڵاتی خۆمان بمرین باشترە نەك لەناو ئەو دارستانەدا لەسەرمان رەق ببینەوە، بەڵام ئەوان بەڵگەنامەو پاسپۆرت و سیم كارتەكانیان لەلایەن سەربازانی بیلاڕوسەوە دەستی بەسەرداگیراوە، بەوتەی خۆیان ناتوانن پەیوەندی  بەكەسوكاریشیانەوە بكەن

شاناز حەسەن سەرەڕای بڵاوبوونەوەی كۆرۆنا لەناوەندەكانی خوێندن و تووشبوونی دەیان مامۆستاو خوێندكار بەپەتاكە، وەزارەتی تەندروستی و پەروەردە دەڵێن:» ئامادەنین وەرگرتنی ڤاكسین بكەینە ئیجباری بەسەر مامۆستایانەوە». بریكاری وەزارەتی پەروەردە رایگەیاند:» ناتوانین وەرگرتنی ڤاكسین بۆ مامۆستایان بكەینە ناچاری». سەیوان عەلی،  بریكاری وەزارەتی پەروەردە، لە لێدوانێكدا بەهاوڵاتى وت:» هەندێك كەس هەیە دەڵێت حەساسیەتی پێی هەیە یان نەخۆشەو یاخود نایەوێت وەریبگرێت، كە بەداخەوە تائێستاش ئەو ترس و دودڵییە هەرماوە لەوەرگرتنی ڤاكسین». ناوبراو پێشیوابوو وەزارەتەكەیان زۆر رێكاری پێویستیان گرتۆتەبەرو لەڕێگەی بەڕێوەبەرایەتی و نووسراوەوە ئاگاداریان كردوونەتەوە و هەوڵیانداوە مامۆستایان هەموویان بچن ڤاكسین وەربگرن، وتیشی:» بەڵام ناتوانین لەئەوە زیاتر بكەین و ناچاریان بكەین ڤاكسین وەربگرن». بریكاری وەزارەتی پەروەردە جەختی لەوەشكردەوە لەمەودوا هەموو مامۆستایان دەچن ڤاكسین وەردەگرن، چونكە پێویستە وابكرێت، ئەگەر نا حاڵەتەكانی تووشوبانی كۆرۆنا زۆر زیاتر دەبن. بریكاری وەزارەتی تەندروستی حكومەتی هەرێم دەڵێت دۆخی كۆرۆنا لەهەرێمی كوردستاندا لە رەنگی نارنجی تۆخدایە و ئاستەكە بەرزە، بۆیە داوا دەكات مامۆستایان ڤاكسین وەربگرن. رەهێڵ فەرەیدون، بریكاری وەزارەتی تەندروستی، لە لێدوانێكدا بە هاوڵاتى وت:» ناكرێت وەك وەزارەتی تەندروستی،  وەرگرتنی ڤاكسین بكەینە ناچاری چونكە ئەوە لەهیچ شوێنێك نەكراوەو ناكرێت». هەروەها ناوبراو ئەوەشی روونكردەوە لەئێستادا بەڕێنمایی وەزارەت ناردویانەتە بەڕێوەبەرایەتی پەروەردەكان ئەو مامۆستایانەی كە نایانەوێت ڤاكسین وەربگرن دەبێت هەموو هەفتەیەك پشكنینی پێویست بكەن واتە هەموو شەممەیەك پشكنینی تازەی كۆرۆنا بكەن بۆ دڵنیابوون لە تووشنەبوونیان، وتیشی:» هەر مامۆستایەك ڤاكسینی وەرنەگرتبێت و كارتی وەرگرتنی ڤاكسینی پێنەبێت دەبێت هەموو شەممەیەك پشكنینی تازەی كۆرۆنای پێبێت ئەنجا دەتوانێت وانە بڵێتەوە». لەبارەی دۆخی گشتی هەرێمی كوردستانەوە بۆ كۆرۆنا، بریكاری وەزارەتی تەندروستی ئەوەی دووپاتكردەوە كەدۆخەكە مەترسیدارە، وتی:»لە رەنگی نارنجی تۆخداین و ئاستەكە بەرزە،  بەداخەوە پێشبینیمان دەكرد ئەم شەپۆلە زۆر زووتر تێپەڕێت»

هاوڵاتی  هاوسه‌رۆكی یه‌كێتی رایگه‌یاند:" چیتر یەکێتی تاقم و گروپ نییە کە حزب بۆ بەرژەوەندی شەخسی و لێدان لە بەرژەوەندی گشتی بەکاربھێنرێت". ئەمڕۆ سێ شەممە، 5ی تشرینی یه‌كه‌می 2021، به‌ گوێره‌ی راگه‌یه‌ندراوێكی نوسینگه‌ی، بافڵ تاڵە‌بانی، هاوسەرۆکی یەکێتی لە دەباشان پێشوازی لە‌ ژمارەیەک کەسایەتی عەشیرەتی کۆکۆیی کرد. هه‌روه‌ك هاتووه‌: لە دیدارێکدا بافڵ تاڵەبانی، بەگرنگییەوە رۆڵی کەسایەتییەکانی کۆکۆیی لە کۆمەڵگەی کوردەواری بەرزنرخاند لە پاراستنی بەھا بەرزەکانی جوامێری و پێکەوەژیان و بەشداری کاریگەریان لە شۆڕش و خەباتی کوردایەتی، بەتایبەت لە شۆڕشی نوێدا کە ھەمیشە پشت و پەنای یەکێتی بوون و لە قۆناغە جیاجیاکاندا لە سەنگەری بەرگری بوون و بۆ ساتێکش پشتیان لە یەکێتی نەکرد، رایگەیاند "ئەمە جێگای ستایش و پێزانینمانە". پەیوەست بە گۆڕانکارییەکانی یەکێتی و رێکخراوەیی، بافڵ تاڵه‌بانی رایگه‌یاند: "بڕیارەکانی یەکێتی لە خزمەتی چاکەی گشتی و بوژاندنەوە و گەشەپێدانی یەکێتی و رێکخستنەوەی ئۆرگانەکانە و بەرنامەی یەکێتی کە بەرنامەی خزمەتە فراوانتری دەکەین و دەبێت یەکێتی، کە یەکێتی خەڵکە، ئەرکی خۆی کە خزمەتکردنە بەجێبگەیەنێت، چیتر یەکێتی تاقم و گروپ نییە کە حزب بۆ بەرژەوەندی شەخسی و لێدان لە بەرژەوەندی گشتی بەکاربھێنرێت". بافڵ تاڵەبانی ئاماژەی بۆ ئەوەشکرد، "چۆن لە رابردوودا خزمانی کۆکۆیی پشتیوان و ھاوکاری یەکێتی بوون، داوامان لێتان ئەوەیە بەھەمان شێوە لەم ھەڵبژاردنەشدا لەگەڵمان بن و متمانە ببەخشن بە کاندیدانی ھاوپەیمانی کوردستان تا زامنی بەھێزی پێگەی کورد لە بەغدا و مووچە و قوتی خەڵکی کوردستان بکەین".

هاوڵاتى سەرۆكی هەرێمی كوردستان و  جێگری سەرۆکی پارتی رایگەیاند:"هەرێمی کوردستان خواستی ئەوەی هەیە بەگوێرەی دەستور و بەرەچاوکردنی مافی هەموو پێکهاتەکان و دوور لە دەستبەسەرداگرتن و کودەتا چارەنوسی کەرکوک یەکلایی بکرێتەوە، هەروەها "کەرکوک وەک بەشێکی دانەبڕاوی هەرێمی کوردستان سەیر دەکەین  ئێمە نەوتمان ناوێت، شەڕی ئێمە لەسەر ناسنامەتانە". ئەمڕۆ سێ شەممە، 5ی تشرینی یه‌كه‌می 2021،  نێچیرڤان بارزانی بەشداری لە بانگەشەی کاندیدانی پارتی لەسنوری پارێزگای کەرکوک کرد  لەهەولێر بەڕێووەچوو و لەوتارێکدا باسی لەوەشکرد، ئەوانەی دژی جێبەجێکردنی مادەی 140ی دەستورن، دژی ئاشتی، دەستور، سەقامگیری و پێکەوەژیانن، لەکاتێکدا کورد "داوای نەوتی کەرکوک ناکات، بەڵکو داوای ئێمە ناسنامەی نیشتیمانیی کەرکوک دەکات". ئاماژەی بەوەشکرد، "دەیان ساڵە کەرکوکییەکان ماندوو دەکرێن، بۆیە ئێمە تائێستاش داوای جێبەجێکردنی مادەی  140ی دەستور دەکەین و کەرکوک وەک بەشێکی دانەبڕاوی هەرێمی کوردستان سەیر دەکەین". جێگری سەرۆکی پارتی  ئەوەشی خستەڕو، "نامانەوێت شەڕی نەتەوەیی لەکەرکوک بکەین و نامانەوێت مافی هیچ نەتەوەیەکیش پێشێل بکرێت، چونکە بارزانی نەمر بەکردەوە ئێمەی فێری خۆشەویستی کەرکوک کردووە و  کەرکوک هەمیشە بۆ پارتی یەکێک بووە لە داوا و بەها نیشتیمانییەکان ".