.jpeg)
هاوڵاتی گەریلاكانی ئازادیی هێلیكۆپتەرێكی سوپای داگیركەری توركیان لە ناوچەی زاپ-ی بادینان، خستە خوارەوە. بەپێی ئازانسی فورات، كاتژمێر 1:30 خولەكی شەوی ڕابردوو، گەریلاكانی ئازادیی كوردستان لە گۆڕەپانی شەهید شاهین لە ناوچەی زاپی بادینان، هێلیكۆپتەرێكی سوپای داگیركەری توركیان كردە ئامانج، لەكاتێكدا كە دەیویست سەرباز لە ناوچەكە دابگرێت. هەروەها ئەوەش روونكراوەتەوە كە هێلیكۆپتەرەكە لە گۆڕەپانی كونیشكای ناوچەی زاپ كەوتووەتە خوارەوە.
هاوڵاتى به‌رپرسێکى وه‌زاره‌تى ده‌ره‌وه‌ى ئه‌مریکا رایگه‌یاند، ئه‌و سزایانه‌ى حکومه‌تى وڵاته‌که‌یان دژى حکومه‌تى سوریا ده‌ریکردون، سزاکه وه‌به‌رهێنان و کارکردنى ئه‌و کۆمپانیانه له‌گه‌ڵ ئیداره‌ى خۆسه‌رى باکور و رۆژهه‌ڵاتى سوریا ناگرێته‌وه. ڤیکتۆریا نولاند، یاریده‌ده‌رى وه‌زیرى ده‌ره‌وه‌ى ئه‌مریکا به‌شدارى کۆبونه‌وه‌ى وزارى وڵاتانى ئه‌ندام له هاوپه‌یمانى نێوده‌وڵه‌تى دژى داعشى کرد که له مه‌غریب که دوێنێ چوارشه‌ممه به‌ڕێوه‌چو و باسى له‌وه‌کرد، واشنتن بڕیاریداوه مۆڵه‌ت بدات به‌سه‌رجه‌م ئه‌و کۆمپانیا بیانیانه‌ى که ده‌یانه‌وێت له‌گه‌ڵ ئیداره‌ى خۆسه‌رى باکور و رۆژهه‌ڵاتى سوریا کاربکه‌ن، به‌جۆرێک له سزاکانى ئه‌مریکا ئازاد ده‌کرێن. هه‌روه‌ها ئه‌وه‌ى خستۆته‌روو که ئه‌مریکا له‌چه‌ند رۆژى داهاتوودا بڕیاره‌که بڵاوده‌کاته‌وه و ئامانجى بڕیاره‌که‌ش گه‌شه‌پێدانى که‌رتى ئابورى ئه‌و ناوچانه‌یه که له‌ژێر ده‌سه‌ڵاتى ڕژێمى سوریادا نین و پێشتر به‌هۆى شه‌ڕى داعش روبه‌ڕوى زیان بونه‌ته‌وه. هێزه‌کانى سوریاى دیموکرات (هه‌سه‌ده) به سه‌ره‌کیترین هاوپه‌یمانى سه‌ربازى ئه‌مریکا و هاوپه‌یمانى نێوده‌وڵه‌تى دژى داعش له سوریا داده‌نرێن.
هاوڵاتى وته‌بێژى بزوتنه‌وه‌ى گۆڕان له‌باره‌ى کشانه‌وه له‌حکومه‌تى هه‌رێم هاته‌ده‌نگ‌و ده‌ڵێت:" نه‌کشاوینه‌ته‌وه له حکومه‌تى هه‌رێم". دلێر عه‌بدولخاق، وته‌بێژى بزوتنه‌وه‌ى گۆران له‌ڕاگه‌یه‌نراوێکدا ده‌ڵێت: "جارجار، پرسى کشانه‌وه‌ى بزوتنه‌وه‌ى گۆڕان له‌حکومه‌تى ھه‌رێم‌و حکومه‌تى خۆجێى ده‌بێته بابه‌تى میدیایی". هه‌روه‌ها ئه‌وه‌ش هاتووه، "له‌ڕێگه‌ى ئه‌م ڕونکردنه‌وه‌یه بڵاویده‌که‌ینه‌وه که بڕیارێکى له‌وشێویه نه‌دراوه‌و هه‌رکاتێک بزوتنه‌وه‌ى گۆڕان بڕیارى کشانه‌وه‌ى له‌حکومه‌تى هه‌رێم، یاخود حکومه‌تى خۆجێى دا؛ ئه‌وا به‌فه‌رمى ڕایده‌گه‌یه‌نێت‌و تیمى حکومه‌تى لێ ئاگادارده‌کاته‌وه".
هاوڵاتى گه‌ریلا له کانى ماسى و بامه‌رنێ و شیلادزێ گورزى توند له سوپاکه‌ى ئه‌ردۆغان ده‌دات و تانکێکیش تێکده‌شکێنن و هه‌په‌گه‌ش ئه‌وه‌ى ئاشکرا کردووه که"داگیرکه‌رانیش چه‌کى کیمیاوى به‌کارده‌هێنن". ناوه‌ندى راگه‌یاندن و چاپه‌مه‌نى هێزه‌کانى پاراستنى گه‌ل(هه‌په‌گه) سه‌باره‌ت به چالاکیى گه‌ریلاکان له به‌رامبه‌ر هێرشى داگیرکارى ڕاگه‌یه‌ندراوێکى بڵاوکرده‌وه و تیادا هاتووه": چالاکى هێزه‌کانمان له دژى سوپاى داگیرکه‌رى تورک به‌رده‌وامه سوپاى تورکى داگیرکه‌ر به به‌کارهێنانى چه‌کى کیمیایى هه‌موو شێوازه‌کانى شه‌ڕى پیس له دژى سه‌نگه‌ره‌کانى به‌رخۆدان جێبه‌جێ ده‌کات، به‌ڵام هێشتا ناتوانێت هیچ ئه‌نجامێک له دژى هێزه‌کانمان به‌ده‌ست بهێنێت". هه‌په‌گه له باره‌ى ئامارى چالاکیه‌کانى گه‌ریلا له هه‌ریمى ئاڤاشین ڕایگه‌یاند، له رۆژانى 9و 10ى ئه‌م مانگه‌دا، دوو داگیرکه‌ر سزادراون و دووانى دیکه‌ش بریندار بوون. هه‌روه‌ها گه‌ریلا له هه‌رێمى زاپ کردووه و ئه‌وه خراوه‌ته‌روو که له‌و دوو ڕۆژه‌دا گورزى کوشنده له داگیرکه‌ران دراوه و داگیرکه‌ریک سزادراوه و به هۆى ڕووبه‌ڕووبوونه‌وه‌ى به هێزى گه‌ریلاوه هه‌لیکۆپته‌ره‌کانى دوژمن ناچاربوون له ناوچه‌که بکشینه‌وه و له به‌رامبه‌ردا سوپاى داگیرکه‌ر چه‌کى کیمیایى به‌کارهێنا". هاوکات، له هه‌رێمى مه‌تیناسى هێزه‌کانیان له کانى ماسى داگیرکه‌رانیان کردووه‌ته ئامانج و به چه‌کى قورس لێینادراوه . یه‌په‌گه باسى ئه‌وه‌ش ده‌کات که “هێزه‌کانمان هێرشیان کرده سه‌ر بنکه‌ى سوپاى تورکى داگیرکه‌ر له هه‌رێمى بامه‌رنى باشوورى کوردستان له ئه‌نجامى لێدانى کاریگه‌رى هێزه‌کانمان تانکێک له بنکه‌که تێکشکێنرا وسێ داگیرکه‌ریش سزادران". " هێرشى به‌رفراوانى سوپاى تورکى داگیرکه‌ر بۆ سه‌ر هه‌رێمه‌کانى پاراستنى مه‌دیا به تۆپ و هه‌لیکۆپته‌ر و فڕۆکه‌ى جه‌نگى به‌رده‌وامه"، یه‌په‌گه وا ده‌ڵێن یه‌په‌گه هێماى بۆ ئه‌وه‌شکردووه که دیمه‌نى چالاکیى تیمه‌کانى یه‌که‌ى شه‌هید به‌دران گوندکره‌مۆ دژى باره‌گاى سیرێ-ى ده‌وڵه‌تى تورک له نزیک شیلادزێ بڵاوکرایه‌وه، که سێ سه‌ربازى تورکى تێدا کوژران و دوانى دیکه‌ش برینداربوون که ڕۆژى 9ى ئایار ئه‌نجامدرا.
عەمار عەزیز شارەزایەكی بواری سەربازی لەبارەی گیان لەدەستدانی گەشتیارێكی دانیماركی بۆ هاوڵاتی ئەوەی دووپاتكردەوە كە «توركیا بەم دواییە دەیان بنكەی سەربازییان لە بادینان و لەو ناوچانە داناوەو هەرچی درەخت هەبووە بڕیویانەتەوەو بۆ پاراستنی خۆیان و بنكەكانیان مینیان چاندووە»، پۆلیسی دهۆكیش سەرەرای ئەوەی لە راگەیەندراوەكەیاندا پەكەكەیان تۆمەتباركرد دەشڵێن:» جارێ لێكوڵینەوە لەسەر رووداوەكە كۆتایی نەهاتووەو هەندێكجار مانگێك پێوەی سەرقاڵ دەبین تا دەگەینە ئەنجامی كۆتایی». گیان لەدەستدانی گەشتیارێكی دانیماركی لە بادینان كاردانەوەی لێكەوتەوەو پۆلیسی دهۆك دەڵێت هێشتا لێكۆڵینەوەكان لەسەر ئەو رووداوە بەردەوامەو ناوەندی راگەیاندنی هێزەكانی پاراستنی گەل (هەپەگە) دەڵێن هیچ پەیوەندییەكیان بەو رووداوەوە نییەو پێویستی بە لێكۆڵینەوەیە. رۆژی پێنجشەممە 5ی ئایار دوو گەشتیاری دانیماركی بەمەبەستی گەشتكردن لەباكووری كوردستان و لە رێگەی دەروازەی سەر زێرەوە دەچنە هەرێمی كوردستان، لەسنوری گوندی باروخ سەر بە ناحیەی كانێ ماسێ لە رووداوێكی تەمومژاویدا كەسێكیان گیانلەدەستدەدات. (ه، د) چالاكوانێكە لە سنوری ناحیەی كانێ ماسێ لەلێدوانێكدا بە هاوڵاتی وت « ئەو شوێنەی ئەو دوو گەشتیارە كە یەكێکیان گیانیلەدەستدا نزیكەی كێلومەترێك دوورە لە بنكەیەكی سەربازی توركیا، لەكاتی رووداوەكە من لەوێ نەبووم، بەڵام هاورێیەكی خۆم لەنزیكەوە ئەو دوو گەشتیارەی بینیوە، بەتەلەفون قسەم لەگەڵ كردووە ئەو بە منی وت زۆر بەسەختی بریندارببوو بەشێوەیەك بۆ مرۆڤ نەیدەتوانی تەماشایان بكات، پێش رووداوەكە دەنگی تەقینەوەی هیچ بۆمبێكمان نەبیستووە رووداوەكە تەمومژاوییە». ئەو چالاكوانەیە وتیشی: « ئەو دوو گەشتیارە بە پاسكیل لە دەروازەی سەرزێڕ هاتوونەتە ناو سنوری قەزای ئامێدی، ئەو رێگایەی ئەوان هاتۆچوویان لەسەركردووە خەڵك هاتۆچۆی لەسەر ناكات». «گوندی باروخ لەمێژە چوڵكراوە، هیچ كەسێك لێی ناژیت، رێگای باروخ بۆ ئامێدی بەهۆی بەردەوامی بۆردومانكردنی توركیا و بوونی دەیان مین و مەترسی دروستبوونی شەڕ لەنێوان پەكەكەو توركیا هیچ كەسێك هاتۆچۆ لەسەر ئەو رێگایە ناكات «، ئەو چالاكوانە وای وت. شارەزایەكی بواری سەربازی «توركیا بەم دواییە دەیان بنكەی سەربازییان لە بادینان و لەو ناوچانە داناوەو هەرچی درەخت هەبووە بڕیویانەتەوەو بۆ پاراستنی خۆیان و بنكەكانیان مینیان چاندووە". سوپای توركیا لە نیسانی ساڵی 2021 تا ئێستا كە زیاتر لە ساڵێك دەكات دەیان بنكەی سەربازی نوێی لە ناوچەكانی بادینان و گوندەكانی سەر بەقەزای ئامێدی داناوەو ساڵی رابردوو هاوشێوەی ئەمساڵ ئۆپەراسیۆنی ئەنجامدا دژی پارتی كرێكارانی كوردستان (پەكەكە) و دواتر دەستی كرد بە بڕینەوەی درەختەكان و ئاودیوكردنیان بۆ باكوری كوردستان. شارەزایەكی بواری سەربازی كە نەیویست ناوی بهێندرێت، جەختی لەوەكردەوە كە «توركیا بەم دواییە دەیان بنكەی سەربازییان لە بادینان و لەو ناوچانە داناوەو هەرچی درەخت هەبووە بڕیویانەتەوەو بۆ پاراستنی خۆیان و بنكەكانیان مینیان چاندووە. هەروەها وتیشی:» لەبەشێك لە راگەیاندنەكان پەكەكە تۆمەتبار كرا، بەڵام پەكەكە ئیشی بە مین دانان نییەو شەڕی پارتیزانی دەكات وەك ئەوەی كاتی خۆی ئێمە لە شاخەكان دژی رژێمی بەعس دەمانكرد». ئازاد ئەدیب، موختاری گوندی هرورە لەلێدوانێكدا بە هاوڵاتی وت: « گوندی باروخ 3 بۆ 5 كێلومەتر دوورە لە ناوەندی ناحیەی كانێ ماسێ، 10 كێلومەتر لە گوندی هرورێ دوورە، ئەو رێگایەی ئەوان هاتۆچۆیان لەسەر كردووە زیاتر لەشەش ساڵە هیچ كەسێك هاتۆچۆی لەسەر ئەو رێگایە نەكردووە، رووداوەكە لە سنورەكەی ئێمە بووە». ئازاد حەبیب باسی لەوەشكرد كە ئەو شوێنەی هەردوو گەشتیارەكە تووشی رووداوەكە دەبن دەكەوێتە گوندی باروخێ لە سنوری ناحیەی كانێ ماسێ سەر بەقەزای ئامێدی، دووری نێوان گوندی باروخ و ئامێدی 27 كێلومەترە، ئەو رێگای ئەوان هاتۆچۆیان لەسەركردووە خوڵە قیرنەكراوەو پێشتر بڕیاری قێرتاوكردنی بۆ دەرچووە، بەڵام جێبەجێ نەكراوە. پەیامنێری هاوڵاتی بۆ وەرگرتنی زانیاری زیاتر لەسەر رووداوەكە پەیوەندی بە بەڕێوەبەری ناحیەی كانێ ماسێ دەكات بەڵام بەهۆی ئەوەی بابەتەكە پەیوەندی بەلایەنی ئەمنییەوە هەیە وتی:» ناتوانم هیچ لێدوانێك بدەم». شیراز سادق، بەرپرسی بەشی راگەیاندن لەدەروازەی سەرزێڕی لەلێدوانێكدا بە هاوڵاتی وت: « ئەو رۆژەی ئەو دوو گەشتیارە گەیشتوونەتە دەروازەی سەرزێڕی پشوو بوو، بەڵام كارمەندەكەمان پێشوازیان لێكردووە، وەكو پێویست رێنمایشیان پێداوە سەبارەت بە هاتۆچۆكردن لە سنوری قەزای ئامێدی، ئەو دوو گەشتیارە بە پاسكیل هاتۆچۆیان كردووە تا گەیشتوونەتە ئەو شوێنەی رووداوەكەی لێ دروستبووە «. لەمیدیاكانی دانیمارك باسی رووداوەكە كراوەو دەڵێن» دوو گەشتیاری وڵاتەكەیان لەباكوری عێراق لەناوچەی شەڕی توركیاو پەكەكە دا، یەكێكیان بە مین گیانی لەدەستداوە». رۆژی هەینی 6ی ئایار پۆلیسی دهۆك راگەیندراوێكیان بڵاوكردەوە لەسەر گیانلەدەستدانی گەشتیارێكی بیانی و تیایدا هاتووە، لەم چەند رۆژەی رابوردوو دوو گەشتیار بەپاسكیل و لەدەروازەی سەرزێڕو بە مەبەستی گەشتكردن هاتوونەتە هەرێمی كوردستان، بەڵام لەو كاتەی ویستوویانە بچنە ئامێدی، لە رێگەدا مینێك بەیەكێك لە گەشتیارەكاندا تەقیوەتەوەو بەو هۆیەوە گیانیلەدەستداوە. هەر لە روونكرنەوەكەدا هاتووە، ئەو كەسەی كە گیانی لدەستداوە ناوی ( تۆرۆبیۆن ) و تەمەنی 28 ساڵە، دوای لێكوڵینەوە لەسەر رووداوەكە دەركەوتووە كە « ئەو مینەی بەیەكێك لە گەشتیارەكاندا تەقیوەتەوە، لەلایەن پەكەكەوە دانراوە، داواش لەخەڵك و گەشتیارەكان دەكەین كە ئەوانەی دەیانەوێت گەشت بكەن نەچنە شوێنە گۆماناوییەكان «. هێمن سلێمان، وتەبێژی پۆلیسی دهۆك لەمبارەیەوە بە هاوڵاتی وت: « بەپێی لێكوڵینە سەرەتاییەكان تەنها یەك كەس بەهۆی مینێكی پەكەكە گیانی لەدەستداوە، هاوڕێكەی بریندار نەبووە، بەڵام نازانین هێشتا لە هەرێمی كوردستانە یان چووەتە وڵاتەكەی خۆی». هەروەها ئەوەشی روونكردەوە كە ئەو شوێنەی روداوەكەی لێ دروستبووە شوێنی شەڕ و ئاڵوزی نێوان پەكەكە و سوپای توركیایە، وتیشی:» جارێ لێكوڵینەوە لەسەر روداوەكە كۆتایی نەهاتووەو هەندێكجار مانگێك پێوە سەرقاڵ دەبین تا دەگەینە ئەنجامی كۆتایی لەسەر روداوەكە« ناوەندی راگەیاندنی هێزەكانی پاراستنی گەل لەسەر گیانلەدەستدانی دوو پاسكیلسوارە دانیماركییەكە هاتەدەنگ و رایگەیاند، هیچ پەیوەندییەكمان بەو رووداوەوە نییە. رۆژی 5ی ئایار، لە ئەنجامی تەقینەوەی مینێكی چێندراودا لە نزیك گوندی هرورێی شارەدێی كانێ ماسێ لە شارۆچكەی ئامێدی، دوو گەشتیاری دانیماركی گیانیان لەدەستدا، كە بە پاسكیل گەشتی ناوچەكەیان ئەنجامدابوو. ناوەندی راگەیاندنی هێزەكانی پاراستنی گەل – هەپەگە لەڕاگەیەندراوێكدا رەتیكردەوە، هیچ پەیوەندییەكیان بەڕووداوی گیانلەدەستدانی دوو پاسكیلسوارە دانیماركییەكەوە هەبووبێت. هەپەگە ئەوەشی خستووتەڕوو، ئەو ناوچەیەی ئەو رووداوە تێیدا روویداوە ئەوانی تێیدانییەو هێزەكانیشیان تێیدا ناگەڕێن و دەڵێن:» ئێمە مینی چێندراو بەكارناهێنین، ئەم رووداوە پێویستی بەلێكۆڵینەوە و بەدواداچوونە».
هاوڵاتی دادگای فیدراڵی لەسەر داوای پەرلەمانتارێكی بەسرە كە شكاتی كردبوو لەسەر ناردنی 200 ملیار دینار مانگانە بۆ هەرێم، ئەو دادگایە بڕیاریدا كە ناردنی ئەو بڕە پارەیە بۆ هەرێم یاساییە. پەرلەمانتارێكی عەرەب كە لەسەر پشكی پارێزگای بەسرەیە داوای لەسەر مستەفا كازمی سەرۆك وەزیرانی عێراق و عەلی عەللاوی، وەزیری دارایی عێراق تۆماركرد و داوای كرد دادگای فیدراڵی ئەو پرسە یەكلایبكاتەوە. ئەمڕۆ دادگای فیدراڵی بڕیاری دەركرد كە ناردنی ئەو بڕە پارەیە یاساییەو سكاڵای ئەو پەرلەمانتارەی رەتكردەوە. ئەوە لە كاتێكدایە كە هەر ئەو دادگایە رۆژی 15 ی شوباتی ئەمساڵ بڕیاری دەركرد كە یاسای نەوت و غازی هەرێم یاسایی نییەو دەبێت پرۆسەی فرۆشتنی نەوتی هەرێم رادەستی بەغدا بكرێت.
عەمار عەزیز بێریڤان ئەیوب دوای ساڵێك و حەوت مانگ لەزیندان ئازاد كراو دەڵێت:» خەونی منە گوزەرانی ناو زیندان بكەم بەكتێبێك و بڵاوی بكەمەوە، لەناو زیندان ژیانی خۆم نوسیووە، بەڵام كە ئازادكرام رێگەیان پێنەدام نووسینەكانم بهێنمە دەرەوە، بەڵام لەبیرمدا ماوەتەوە»و دەشڵێت:» لەو ماوەیەی كە لەزیندان بووم و یەك جارو بۆ ماوەی 10 خولەك منداڵەكانم بینیوە». ئەمرۆ 10ی ئایار، دادگای دووی هەولێر بڕیاری ئازادكردنی مەرجدار بۆ ژنە چالاكوان بێریڤان ئەیوبی دەركرد كە سزای دوو ساڵ زیندانیكردن بەسەردا سەپێندرابوو . دوای ئازادكردنی بێریڤان ئەیوب سەرەتا باس لەكاتی دەستگیركردنی خۆی كردو وتی « من و منداڵەكانم لە فامیلی موڵی هەولێر بووین، لەناكاوێداو لەپێش چاوی منداڵەكانم و خەڵك و لەشوێنێكی گشتی كەلەپچەكرام، دواتر منیان بردە زیندان، لەزیندانیش لەژوورێكی تاكەكەسی بووم بۆ ماوەی 15رۆژ لەو ژوورەدا بەتەنیا بووم و مامەڵەی دەزگا ئەمنیەكان لەگەڵ من باش نەبووەو رێگایان بەپارێزەركەم و منداڵەكانم نەدەدا بیانبینم، ئەوكات لەبارودوخێكی زۆر خراپدا بووم». هەروەها باسی لەوەشكرد دوای ئەوەی حوكمدراوە دەزگا ئەمنییەكان شێوازی مامەڵەیان گوڕیوەو بەشێوەیەكی باش مامەڵەیان لەگەڵ كردووە. بێریڤان ئەیوب، باس لەپەیوەندی خۆی و هاوسەرەكەی و منداڵەكانی دەكات و وتی:» لەسەر پرسی جیابوونەوەم لەگەڵ پیاوەكەم ناتوانم هیچ شتێك بڵێم، بەڵام بەتەواوی لێی جیابوومەتەوەو ناگەڕێمەوە لای، تەنیا ئەوە ماوە دەچمە دادگای دهۆك و منداڵەكانم بە رەسمی وەردەگرمەوە، ئەو كاتەی لەزیندان بووم تەنیا یەك جار منداڵەكانی خۆم بینیوە بۆماوەی 10 خولەك». چالاكوانەكەی بادینان ئەوەشی روونكردەوە كە لەناو زیندان زۆر شتی تایبەت لەسەر ژیانی خۆی نووسیوە، وتی:» رۆژانە سەرقاڵی نووسینەوەی چیرۆكی خۆم بووم لەناو زیندان و ئەو نەخۆشیانەی كە بینیومە، بەنیاز بووم ئەو نووسینانە هەمووی كۆبكەمەوە دواتر بیكەمە كتێبێك و بڵاوی بكەمەوە، بەڵام زۆر بەداخەوە كە ئەمڕۆ لەكاتی ئازادكردنم رێگەیان بەمن نەدا ئەو نووسینانە لەگەڵ خۆم ببەمەوەو وتیان نابێت هیچ شتێك لەگەڵ خۆت ببەیتە دەرەوە، شتەكان هەموو لەبیری مندا ماونەتەوە پشتیوان بەخوا جارێكی تر دەینووسمەوە». بێریڤان ئەیوب، تاكە ژنی چالاكوانی بادینانە لە 13/10/2020 دەستگیركراوە، دواتر بەتۆمەتی «هەوڵدان بۆ تێكدانی ئاسایشی هەرێمی كوردستان» و بەپێی ماددەی یەكی یاسای ژمارە 21ی ساڵی 2003 سزای دوو ساڵ زیندانیكردنی بەسەردا سەپێندرا، پاش تەواوكردنی نزیكەی ساڵێك و حەوت مانگ لەسزاكەی ئازاد دەكرێت. «راستە دەزگا ئەمنییەكان تۆمەتی ئەوەیان خستووتەوە پاڵ من كەپەیوەندیم لەگەڵ پەكەكە هەیە، ئەم قسانە هیچ راست نین، من كەسێكی سەربەخۆم و راستە پەكەكەش شەهیدو قوربانیان داوەو خەباتیان كردووە بۆ گەلی كورد ئەو تۆمەتانە دوورن لە راستیەوە كە پەیوەندیم لەگەڵ پەكەكەدا هەبێت»، بێریڤان وای وت. ئەو ژنە چالاكوانە ئەوەشی دووپاتكردەوە كە دەچێتەوە بۆ دهۆك و لەوێ دەبێت و لەدادگاش منداڵەكانی خۆی وەردەگرێتەوە» تەنیا چالاكوانێكی بادینانم داوای دادوەری و ماف و مووچەی فەرمانبەرانم كردووە و هیچی تر. هاوكات لەڕێگەی رۆژنامەی هاوڵاتییەوە سوپاسی هەموو دەزگا راگەیاندنەكان و رۆژنامەنووسان و تیمی پارێزەرانی بادینان و كوردانی تاراوگەو ناوخۆی هەرێمی كوردستانی كردو وتی:» قەرزاریانم».
هاوڵاتى سه‌رۆکى ده‌سته‌ى وه‌به‌رھێنان رایگه‌یاند، له چوار پارێزگا و چوار ئیداره‌ى سه‌ربه‌خۆ 20 هه‌زار یه‌که‌ى نیشته‌جێبوون دروستده‌کرێت و هه‌وڵ ده‌درێت ئاسانکارى ته‌واو بۆ پڕۆژه‌کان بکرێت و رۆتیناتى به‌رده‌م پڕۆژه‌که‌ش لاده‌برێت. ئه‌مڕۆ چوارشه‌ممه 11ى ئایارى 2022، محه‌مه‌د شوکری سه‌رۆکى ده‌سته‌ى وه‌به‌رھێنان له کۆنگره‌یه‌کى رۆژنامه‌وانیدا رایگه‌یاند:"سه‌رۆکى حکومه‌تى هه‌رێمى کوردستان ره‌زامه‌ندى ده‌ربڕیوه له‌سه‌ر دروستکردنى 20 هه‌زار یه‌که‌ى نیشته‌جێبون و هه‌فته‌ى ئاینده ده‌چێته قۆناغى جێبه‌جێکردن". هه‌روه‌ها راشیگه‌یاند:" له هه‌رێم هه‌شت شوێنى سه‌ره‌کیمان هه‌یه که پڕۆژه‌که ده‌یانگرێته‌وه، که چوار پارێزگا و چوار ئیداره‌ى سه‌ربه‌خۆن، به‌پێى پێوه‌رێکى تایبه‌ت یه‌که‌کان دابه‌ش ده‌کرێت به‌سه‌ر هاوڵاتیاندا به‌جۆرێک که پاره‌که‌ى و قیستى مانگانه‌ى گونجاو بێت له‌گه‌ڵ داهاتى که‌مده‌رامه‌ت و کرێچیان له هه‌رێمى کوردستان". سه‌رۆکى ده‌سته‌ى وه‌به‌رهێنان ئه‌وه‌شى خسته‌روو که هه‌موو ئاسانکاریه‌ک ده‌کات بۆ جێبه‌جێکردنى پڕۆژه‌که بۆ ئه‌وه‌ى سه‌رکه‌وتوو بێت و ئامانجه‌کانى بپێکێت و به‌جۆرێک زۆرترین خه‌ڵکى هه‌ژار سودمه‌ند بێت له پڕۆژه‌که و هه‌وڵ ده‌ده‌ن رۆتین له‌به‌رده‌م پڕۆژه‌که‌دا هه‌ڵبگرن و به زوترین کات ده‌ست ده‌که‌ن به پێدانى کارى مۆڵه‌ت. محه‌مه‌د شوکرى ئه‌وه‌شى روونکرده‌وه که تا ئێستا نرخى یه‌که‌کان و مانگانه‌که‌ى دیارینه‌کراوه، به‌ڵام "بێگومان به‌شێوه‌یه‌ک ده‌بێت که زۆربه‌ى هه‌ره زۆرى ئه‌و که‌سانه‌ى لێى سودمه‌ند ده‌بن بتوانن پاره‌که‌ى بده‌ن و به‌پێى داهاتى که‌سه‌کان ده‌بێت و پێده‌چێت له شارێک بۆ شارێکى دیکه جیاواز بێت". "پارێزگاکان و ئیداره سه‌ربه‌خۆکان پێویسته خه‌ڵکانى شایسته بۆ ئێمه دیاریبکه‌ن که کێیه شایسته‌ى وه‌رگرتنى یه‌که‌کانه، هه‌وڵ ده‌ده‌ین ئه‌م پڕۆژه وه‌ک هیچ پڕۆژه‌یه‌کى دیکه نه‌بێت و له‌ماوه‌یه‌کى کوردتدا هه‌وڵ ده‌ده‌ین ته‌واوى بکه‌ین"، سه‌رۆکى ده‌سته‌ى وه‌به‌رهێنان واى وت.
هاوڵاتى سه‌رۆکى حکومه‌تى هه‌رێمى کوردستان رایگه‌یاند :"ئه‌جێندانى حکومه‌ت وه‌ک خۆى جێبه‌جێناکرێت و له هه‌ندێک شوێن داهات به پێى پێویست ناگه‌ڕێته‌وه"، راشیگه‌یاند له‌باره‌ى مووچه‌وه له‌گه‌ڵ پارێزگاره‌کانى سلێمانى و هه‌ڵه‌بجه کۆده‌بمه‌وه". ئه‌مڕۆ چوارشه‌ممه 11ى ئایارى 2022، مه‌سرور بارزانى سه‌رۆکى حکومه‌تى هه‌رێمى کوردستان له کۆنفرانسێکى رۆژنامه‌وانیدا رایگه‌یاند:" به‌داخه‌وه ئه‌جێنداى حکومه‌ت وه‌ک پێویست جێبه‌جێناکرێت، له هه‌ندێک شوێن داهات وه‌ک خۆى ناگه‌ڕێته‌وه، بۆ ئه‌مه‌ش له‌سه‌ر پرسى داهات و موچه له‌گه‌ڵ پارێزگاره‌کانى سلێمانى و هه‌ڵه‌بجه کۆده‌بمه‌وه". هه‌روه‌ها راشیگه‌یاند:" ده‌سه‌ڵاتى پارێزگاره‌کانمان زیادکردوه، بۆ ئه‌وه‌ى بتوانین کاروباره‌کانى هاوڵاتیان به خێراتر و ئاسانتر جێبه‌جێبکرێن". له‌کۆتایى وتاره‌که‌شیدا ئه‌وه‌شى روونکرده‌وه که به‌مه‌به‌ستى که‌مکردنه‌وه‌ى قورسایى سه‌ر شانى که‌سانى هه‌ژار و که‌مده‌رامه‌ت، بڕیاریانداوه 20هه‌زار یه‌که‌ى نیشته‌جێبون دروست بکه‌ن، به قیستى درێژخایه‌ن و به نرخێکى که‌م بۆ ئه‌و که‌سانه، ئه‌مه‌ش دواین پرۆژه‌یان نابێت له‌و بواره‌دا.
لەیال ئەحمەد وتەبێژی بەنزینخانەكانی سلێمانی دەڵێت:» لەبەرئەوەی كارەكەمان سستییەكی تیابوەو بەنزینەكەمان بۆنەفرۆشراوەو بازاڕمان زۆر خاو بوو، نرخی بەنزینمان دابەزاند لەبەر ئەوەی بەهەرزان دەستمان كەوتبوو». بەهمەن شێخ قادر لەم چاوپێكەوتنەیدا لەگەڵ هاوڵاتى روونكردەوە لەسەر وەستاندنی دابەشكردنی بەنزینی 690 دینارییەكە دەدات و دەڵێت:» ئەوجۆرە بەنزینە دەگەڕێتەوە بۆ كێشەی تەكنیكی لە پاڵاوگەكە، چونكە ئەو بەنزیخانانەی كە پارەیان لە بانكەكان خەواندووە بۆ ئەوجۆرە بەنزینە هەر پارەكانیان لە بانكە و چاوەڕێن ئەو كێشەیەی لەوپاڵاوگەیە هەیە چارەسەربێت و بەنزینەكەیان بۆ بێت چونكە هێشتا بەكتابی ڕەسمی پێمان نەوتراوە كە ئیتر ئەوجۆرەبەنزینە نایەت». لەسلێمانی لەئێستادا نرخی یەك لیتر بەنزین لەجۆری نۆرماڵ بە 900 و موحەسەن بە 1025 و سوپەر بە هەزارو 1125 دینار دەفرۆشرێت. ژمارەی بەنزینخانەكان لە هەرێمی كوردستان نزیكەی هەزار بەنزینخانەیە كە 400 زیاتر دەكەوێتە پارێزكای سلێمانی و هەڵەبجە بەهەردووئیدارەی ڕاپەڕین و گەرمیان. بەهمەن شێخ قادر ئەوەی خستەروو كە لە سەرەتای شەڕی نێوان ڕوسیاو ئۆكراینا نەوتی جیهانی تا 130 دۆلار بەرز بوویەوە ،بەڵام ئەوەبوو وەستانێكی تێكەوت و وەكو بەنزینخانەكان بەرزبونەوەیان بینی بۆ بەنزینی نۆڕماڵ تا 1025 دینار بەرزبوویەوە بۆ لیترێك بەنزین، وتیشی:» هەموكات لەكاتی شەڕوقەیرانەكان ئەزمەیەك دروست دەبێت لە خۆراك وسوتەمەنی كە سوتەمەنیش یەكێك بوو لە سێكتەرەكان و شەرەكە كاریگەری لەسەری هەبووە». هەروەها باسی لەوەشكرد كە دابەزینی نرخی بەنزین چەند هۆكارێكی هەیە لەوانە هەفتەی رابردوو دابەزینی نرخی نەوت بوو بە 106 دۆلار بۆ هەر بەرمیلێك، « گرانی نرخی بەنزین بوو لەبەنزینخانەكان كە هاوڵاتى ان كەم سەردانیان ئەكردین لەكاتێكدا بەنزین زۆربوو بەڵام خواست لەسەری كەمبوو، لەبەرئەوەی كارەكەمان سستییەكی تیابوەو بەنزینەكەمان بۆ نەفرۆشراوەو بازاڕمان زۆر خاو بووە ئیمەش بەنزینەكەمان بە هەرزان دەستت كەوتوە ویستومانە بەو نرخ دابەزاندنە كارەكانمان بچێتەوە سەر ڕێچكەی خۆی و فڕۆشمان بەرزبێتەوە». هاوكات وتەبێژی بەنزینخانەكانی سلێمانی جەختی لەوەشكردەوە زۆربونی بەنزین هەبێت نرخەكەی زیاتر دادەبەزێنن، وتیشی:»ئێمە لەگەڵ حەق و كاتدا دەڕۆین ، پەیوەندی بەوەوە نییە كەسێك زۆرمان لێبكات تەنیا ئەوەیە بەنزینمان بە هەرزان دەست كەوتوەو ویستومانە فرۆشمان زیاد بكات هاوڵاتى ش پێی خۆشە نرخەكەی دابەزێت». «ئێمە دائیمە وتومانە كاتێک نرخی بەنزین دادەبەزێت پێش هەموو شتێك لە قازانجی ئێمەیە پاشان خەڵك، لەبەر ئەوەی فرۆشمان زیاد دەكات شۆفێرانیش كە دێنەلامان گلەیی ناكەن‌و دڵمان خۆش دەبێت لەكارەكەمان، چونكە پەیوەندیی راستەوخۆمان لەگەڵ خەڵك هەیە ئەگەر گرانبێت ناڕەزایەتی دروست دەبێت». حكومەتی عێراق زیاتر لەشەش مانگە، نزیكەی نیو ملیۆن لیتر بەنزینی هەناردەی هەرێمی كوردستان دەكرد و رۆژانە لەبەنزینخانەكان نۆرەی بۆ دەگیراو هەر لیترێك بە 690 دینار دابەشدەكرێت. بەهمەن شێخ مستەفا پێشیوابوو كە بەنزینی 690 دینارییەكە كە نزیكەی ساڵێكە بەردەوام هەیە «هەر ئێمەین و بەنزینخانەكانی ئێمەیە دابەشی دەكات و لەنزیكەی 90 بەنزینخانە دەفرۆشرێت، كەحكومەت ئەیهێنێت وئەیدات بە نەوت و كانزاكانی سلێمانی ئێمەش ئەیدەین بەو بەنزیخانانەی كەبۆ هاتوچۆی خەڵك و پاس و تەكسیەكان نزیكە ، هەرچەندە هەر گلەیشیان هەیە واتە گروپ و لایەنێكی ترنین هەر بەنزینخانەكانی خۆمانن وپاڵپشتێك بوە بۆگرانترنەبونی نرخی بەنزین». بەهمەن شێخ قادر باسی لەوەشكرد كە ڕۆژانە ئەو بەنزینی 690 دیناریە كە هاتۆتە هەرێمی كوردستان یەك ملیۆن و 80 هەزار لیتربووە كە نزیكەی 500 هەزار لیتری بۆ پارێزگای سلێمانی بووە بە ئیدارەی گەرمیان و هەڵەبجەوە ئەوەی دەمێنێتەوە بۆ پارێزگای هەولێرو دهۆك بووە. «بەنزینی 690 دینارییەكە لە هەولێر بەرهەمدەهێنرێت كە هی حكومەتی عێراقییە كە لەپاڵاوگەی كار گروپ بەرهەمدەهێندرێت كە ملیۆنێك و 80 هەزار لیترە ڕۆژانە بەسەر چوار پارێزگاكەدا دابەشكراوە، ئەوەی تر بەشێكی هەر لە خواروی عێراقەوە دێت هەر بەبازرگانی و بەشێكیشی لەتوركیاوە هاوردە دەكرێت»، وتەبێژی بەنزینخانەكانی سلێمانی وای وت. سەبارەت بە هۆكاری نەمان و وەستانی بەنزینی 690 دینارییەكە ئەوەی روونكردەوە كە وەستانی ئەوجۆرە بەنزینە دەگەڕێتەوە بۆ كێشەی تەكنیكی لەپاڵاوگەكەدا، چونكە ئەو بەنزیخانانەی كە پارەیان لە بانكەكان خەواندووە بۆ ئەوجۆرە بەنزینە هەر پارەكانیان لە بانكە و چاوەڕێن ئەو كێشەیەی لەوپاڵاوگەیە هەیە چارەسەربێت و بەنزینەكەیان بۆ بێت چونكە» هێشتا بەكتابی ڕەسمی پێمان نەوتراوە كە ئیتر ئەوجۆرەبەنزینە نایەت». بەهمەن شێخ قادر، هێمای بۆ ئەوەشكرد كە ئەو بەنزینەی لە بازیان بەرهەم دەهێنرێت بۆ هەرێمی كوردستان نییەو حكومەتی هەرێم نەوتی خاوی بۆ دابین ناكات ، بەڵام گرێبەستی لەگەڵ حكومەتی عێراق كردوە كەنەوتی خاوی بۆدابین دەكات و ئەو سوتەمەنییەی بەرهەمی دەهێنێت دەدرێت بەپارێزگای كەركوك و دەوروبەری. دەربارەی ئەوەی هەندێك لە بەنزینخانەكان 10 تا 25 دینار بۆ هەر لیترێك نرخیان كەمتر كردووەتەوە لەوەی راگەیەندراوە، وتەبێژی بەنزینخانەكان وتی:» بەردەوام دەڵێین باكوالێتیمان باشبێت و لەسەر نرخ دابەزاندن كوالێتیمان خراپ نەكەین ڕەنگە ئەو بەنزینخانانە فرۆشیان كەم بێت و هەوڵدەدەن بەشتێكی كەم سەرنجی خەڵك بەلای خۆیاندا ڕابكێشن».
هاوڵاتى وته‌بێژى حکومه‌تى هه‌رێم له راگه‌یاندراوێکدا زانیارى نوێى له‌باره‌ى موچه‌ى فه‌رمانبه‌رانى هه‌رێمه‌وه بڵاوکردووه‌ته‌وه و باس له چۆنێتى دابینکردنى موچه ده‌کات و رایگه‌یاند:" بۆ مووچه پێویستمان به ٦١٦ ملیۆن دۆلار هه‌یه". له روونکردنه‌وه‌یه‌کدا جوتیار عادل وته‌بێژى حکومه‌تى هه‌رێم رایگه‌یاند"به هۆى ئه‌وه‌ى چه‌ند رۆژێکه زانیارى نادروست له‌باره‌ى دابه‌شکردنى داهاته‌کانى پارێزگاکانه‌وه به‌ڵاوبووه‌ته‌وه به پێویستمان زانى روونکردنه‌وه له‌سه‌ر شێوازى دابه‌شکردنى ئه‌و داهاتانه بڵاوبکه‌ینه‌وه." هه‌روه‌ها ئاماژه‌ى به‌وه‌شکردووه، داهاتى هه‌رێمى کوردستان ٣٥٠ ملیۆن دۆلاره و داهاتى ناوخۆى هه‌رێمیش ١٢٨ ملیۆن دۆلاره و له به‌غداشه‌وه مانگانه ١٣٨ ملیۆن دۆلار ده‌گاته هه‌رێم. وته‌بێژى حکومه‌ت ده‌شڵێت، مانگانه بۆ دابینکردنى موچه‌ى فه‌رمانبه‌ران حکومه‌تى هه‌رێم پێویستى به ٦١٦ ملیۆن دۆلار هه‌یه. هه‌روه‌ها له روونکردنه‌وه‌که‌ى جوتیار عادلدا ئه‌وه خراوه‌ته‌ڕوو، له مانگى یه‌ک و دووى ٢٠٢٢ دا له به‌غداوه هیچ بڕه پاره‌یه‌ک نه‌هاتووه بۆ هه‌رێم و له داهاتى نه‌وت پاره‌ى موچه‌یان پڕکردووه‌ته‌وه. دوێنێ سێ شه‌ممه میدیاى فه‌رمى یه‌کێتى بڵاویکرده‌وه که کۆى داهاتى مانگى سێى ئه‌مساڵى هه‌رێمى کوردستان زیاتر له تریلیۆنێک و 100 ملیار دیناره و له‌و داهاته‌ش 34% بۆ سلێمانى نێردراوه. هاوکات، ئه‌وه‌شى خسته‌روو که له کۆى 800 ملیار دینارى داهاتى نه‌وت ته‌نها 279 ملیار دینار دراوه به‌سلێمانى و هه‌ڵه‌بجه و گه‌رمیان و راپه‌ڕین، هه‌روه‌ها له کۆى 300 ملیار دینار داهاتى نانه‌وتى هه‌رێم ته‌نها 100 ملیار دینارى دراوه به‌سلێمانى و هه‌ڵه‌بجه و گه‌رمیان و راپه‌ڕین.
هاوڵاتی پەرلەمانی عێراق كۆدەبێتەوە و برگەیەكی كارنامەی كۆبونەوەكەش تایبەتكراوە بە خوێندنەوەی یەكەم بۆ پڕۆژەیاسای بەتاوانناساندنی ئاساییكردنەوەی پەیوەندییەكان لەگەڵ ئیسرائیل. سەرۆكایەتی پەرلەمانی عێراق كارنامەی دانیشتنەكەی ئەمڕۆ چوارشەممەی بڵاوكردوەتەوە كە لە دوو برگە پێكهاتوە، لە برگەی یەكەمدا خوێندنەوە بۆ پڕۆژەیاسای بەتاوانناساندنی ئاساییكردنەوەی پەیوەندییەكان لەگەڵ ئیسرائیل دەكرێت. هەروەها ئەوەش هاتوە، برگەی دوەمی كۆبونەوەكەش تایبەتكراوە بە دیاریكردنی ئەندامانی لیژنە هەمیشەییەكانی پەرلەمان. 8ی ئەم مانگەش سەرۆك و جێگری یەكەم و دوەمی پەرلەمان كۆبونەوە بۆ گفتوگۆكردن لەسەر كارەكانی پەرلەمان، لەكۆبونەوەكەدا بڕیاردراوە بە گوێرەی مادەی 58ی دەستور، وەرزی یاسادانانی پەرلەمان بۆ ماوەی مانگێك درێژبكرێتەوە. ئاماژە بەوەشكرابو، كۆبونەوەكانی پەرلەمان رۆژانی 11-12ی ئایار دەستپێدەكەنەوە و رۆژی چوارشەممە پڕۆژەیاسای بەتاوانناساندنی ئاساییكردنەوەی پەیوەندییەكان لەگەڵ ئیسرائیل خوێندنەوەی یەكەمی بۆ دەكرێت.
هاوڵاتى ئه‌ندامێکى کۆمیته‌ى به‌ڕێوه‌به‌ریى په‌که‌که له‌باره‌ى هێرشى نوێى ده‌وڵه‌تى تورکه‌وه بۆ سه‌ر هه‌رێمى کوردستان ڕایگه‌یاند:" پلانى ده‌وڵه‌تى تورک له‌زاپ و ئاڤاشین پووچه‌ڵ بوویه‌وه و شکستیان هێناوه". دوران کاڵکان، ئه‌ندامى کۆمیته‌ى به‌ڕێوه‌به‌ریى په‌که‌که له به‌رنامه‌ى تایبه‌تى مه‌دیا خه‌به‌ر تیڤى دا وه‌ڵامى پرسیاره‌کانى له‌سه‌ر دۆخ و پێشهاته‌کانى هێرشى نوێى ده‌وڵه‌تى تورک بۆ سه‌ر باشورى کوردستان دایه‌وه. کاڵکان رایگه‌یاند:" ئه‌و هێرشه داگیرکه‌ر و قڕکه‌ر و فاشیستیه‌ى ئاکه‌په و مه‌هه‌په له ١٧ى نیساندا له‌سه‌ر زاپ و ئاڤاشین ده‌ستیان پێکردووه سێ هه‌فته‌یه به‌رده‌وامه، ئه‌و شه‌ڕه یه‌کێکه له شه‌ڕه هه‌ره قورس و گرانه مێژووییه‌کان، ده‌بێت هه‌ر که‌س له‌مه ئاگادار بێ". کاڵکان شکستى سوپاى ده‌وڵه‌تى تورکى له هێرشه‌کانى سه‌ر زاپ و ئاڤاشین ڕاگه‌یاند و وتی:" ئاکه‌په و مه‌هه‌په له‌ڕاستیدا تێکه‌وتوون، پیلانه‌که‌یان له‌زاپ و ئاڤاشین به‌به‌رخۆدانى گه‌ریلا پووچه‌ڵ بوویه‌وه، مرۆڤ ده‌توانێت بڵێت شکستیان هێناوه". هه‌روه‌ها راشیگه‌یاند:" ئه‌م شه‌ڕه شه‌ڕى هه‌ره گران و مه‌زنى ده‌وڵه‌تى تورکه، بۆ کوردانیش شه‌ڕێکى هه‌ره مه‌زنه، له شه‌ڕه‌کانى ڕابردوو زیاتر قورس و گران و مه‌زنه، له به‌رامبه‌ر به‌و هێرشانه‌ش گه‌ریلا به‌رخۆدانیه‌کى مه‌زن نیشان ده‌ده‌ن و قاره‌مانێتیى ده‌که‌ن و مێژوو ده‌نووسنه‌وه". ئه‌و ئه‌ندامه‌ى کۆمیته‌ى به‌ڕێوه‌به‌ریى په‌که‌که وجه‌ختى له‌وه‌کرده‌وه که "ئه‌و به‌خۆدانه‌ى گه‌ریلا به‌رخۆدانێکى هه‌ره مه‌زن و هه‌ره گرنگه له مێژووى کورد، زاپ و ئاڤاشین داهاتووى کوردان و چاره‌نووسیان ده‌ستنیشان ده‌کات، ده‌بێته وه‌ها تێبگه‌ن، له‌سه‌ر بنه‌ماى به‌رخۆدانى قاره‌مانێتیى گه‌ریلا فاشیزمى ئاکه‌په و مه‌هه‌په له زاپ و ئاڤاشین له گۆڕ ده‌نرێن". له‌باره‌ى ئه‌نجامى هێرشى ده‌وڵه‌تى تورک و به‌رخۆدانى گه‌ریلاوه زانیارى نوێ ئاشکرا ده‌کات و ده‌ڵێت:" ئێستاش هه‌فته‌ى سێیه‌م له شه‌ڕه‌که تێپه‌ڕده‌بێت، ژماره‌ى کوژراوه‌کانیان زیاتره له 400 بۆ 500 سه‌رباز، ده‌وڵه‌تى داگیرکه‌رى تورک نایه‌وێت ئه‌مه ببینێ و ده‌یشارێته‌وه".
عەمار عەزیز بێریڤان ئەیوب ژنە چالاكوانی بادینان كەمێك پێش ئێستا ئازاد کرا و بەتایبەت بۆ هاوڵاتی وتی:"ئەمڕۆ ئازادكرام لە دوای ساڵێك و حەوت مانگ لە زیندان، دەگەرێمەوە ناو كەسوكاری خۆم، زۆر دڵخۆشم". بەشدار حەسەن، پارێزەری دۆسیەكە لە لیدوانیکدا بە هاوڵاتی ی وت" ئەمڕۆ دادگای دووی هەولێر بریاری ئازادكردنی مەرجدار بۆ ژنە چالاكوان بێریڤان ئەیوب دەركرد كە سزای دو ساڵ زیندانینكردن بەسەردا سەپێندرابوو، بڕیارەكە لەلایەن دادگای كەتنی هەولێر دەرچوو" هاوکات، بێریڤان ئەیوب، ژنە چاڵاكوانی بادینان لە لیدوانیکی تایبەت بە هاوڵاتی وت" ئەمڕۆ ئازادكرام لە دوای ساڵێك حەوت مانگ لە زیندان، هەر ئەمڕۆ دەگەرێمەوە ناو كەسوكاری خۆم، زۆر دڵخۆشم كە دەگەرێمەوە ناو كەسوكاری خۆم" بێریڤان ئەیوب سوپاسی رۆژنامەی هاوڵاتی کرد و وتی:" زۆر سوپاس بۆ هاوڵاتی كە بەردەوام هەواڵ و بابەت لەسەر دۆسیەكەی من بڵاودەكردەوە". بێریڤان ئەیوب ماوەی زیاتر لە دوو ساڵە دەستگیركراوە بێبەشكراوە لە بینینی خێزان و پێنج منداڵەكەی، لەگەڵ ئەوەشدا بۆ ماوەی یەك ساڵ رێگەی پێنەدراوە پارێزەری بەرگریكاری هەبێت. هاوکات دوای ئازاد بوونی وینەیەکی تایبەتی بۆ هاوڵاتی نارد.
هاوڵاتی بەڕێوبەری گشتی بانكی ناوەندی هەرێم لە سلێمانی لەبارەی هۆكاری دواكەوتنی دابەشكردنی موچەی بەشێك لە فەرمانگەكان، رایگەیاند:" ئەو پارەیەی ئێستا لە هەولێرەوە رەوانەی سلێمانی كراوە، داهاتی نەوتە و بۆ مانگی نیسان موچەی پێ دابەشدەكرێت، ناتوانم لە پارەی مانگی چوار، موچەی مانگی سێ بدەم". عەبدولڕەحمان ساڵح بەڕێوبەری گشتی بانكی ناوەندی هەرێم لە سلێمانی، لە لێدوانێكی رۆژنامەوانیدا و لەبەردەم فەرمانبەران و مامۆستایانی ناڕازی زانكۆی سلێمانی كە تا ئێستا موچەی مانگی ئاداری ئەمساڵیان وەرنەگرتوە رایگەیاند: "دەرپرسن بۆچی دەست بەدابەشكردنی موچەی مانگی چوار كراوە، منیش وەكو ئێوە فەرمانبەرم و لەوەزارەتی دارایی و ئابوریەوە ئاگاداركراومەتەوە، ناتوانم لە پارەی مانگی چوار، موچەی مانگی سێ بدەم، ئەو پارەیەی بۆ مانگی چوار دابەشدەكرێت داهاتی نەوتە و لەهەولێرەوە بۆم رەوانەكراوە". هەروەها راشیگەیاند موچەی مانگی سێ دەبێت لەداهاتی ناوخۆ بدرێت كە رۆژانە لە فەرمانگەكان كۆدەكرێتەوە و دابەشدەكرێت بەسەر فەرمانبەران، "رۆژی یەكشەممەی رابردوو شەش ملیار، ئەمڕۆش نزیكەی دوو، ملیار دینار كۆكراوەتەوە و سەرجەمیان بەپێی ریزبەندیەكان دابەشدەكرێت، ئەم پارەیەی داهاتی ناوخۆ لە دەروازەكان و گومرگ و باج و رسومات و كارەبا و فەرمانگەكانی دیكە كۆدەكرێتەوە، ئەركی ئێمە دابەشكردنە". ماوەی چەند رۆژێكە بەشێك لە فەرمانبەرانی بەڕێوەبەرایەتیەكانی شارەوانی و گەشتوگوزار، داد، خوێندنی باڵا و توێژینەوەی زانستی خانەنشینی سەربازی لەئەنجامدانی خۆپیشاندان و گردبونەوەی ناڕازی بەردەوامن و داوادەكەن، بەزوترین كات موچەی مانگی ئازاری 2022یان پێبدرێت.
.png)
