تۆم باراک: بۆ چاودێریکردنی رێککەوتنی 10 ئادار سەردانی حەسەکەم کرد

هاوڵاتی گۆڤاری فۆربسی فەرەنسی چاوپێکەوتنێکی لەگەڵ عامر سوناع بەڕێوەبەری جێبەجێکاری کۆمپانیای ئاسیاسێڵدا ئەنجامداوە، لەبەر ئەوەی کەمێك پێش ئێستا خەڵاتی باشترین بەڕێوەبەری جێبەجێکاری لە کیشوەری ئاسیادا بەدەستهێنا. هەروەها لە چاوپێکەوتنەکەدا باس لە کێشە و بەربەستەکانی کەرتی پەیوەندیەکان لە عێراق کراوە، و باسیش لە هەوڵ و کارکردنی ئاسیاسێڵ کراوە لە  چۆنێتی سەرکەوتن بەسەر کێشەکانی کەرتی پەیوەندیەکان لە عێراقدا. 

سەركۆ جەمال كێشەی نەمان و كەمبوونەوەی دەرمان لەنەخۆشخانە گشتییەكانی سلێمانی بەردەوامیی هەیە، جێگری بەڕێوەبەری تەندروستی سلێمانی دەڵێت: «تاسەری مانگ چارەسەرنەكرێت كارەسات روودەدات». بەپێی بەدواداچوونەكانی  كە لەوەزارەتی تەندروستی دەستی كەوتووە، لە 18 ملیار دیناری بودجەی كڕینی دەرمان بۆ سلێمانی لەساڵی 2021 زیاتر لە 12 ملیاری لەلایەن حكومەتی هەرێمەوە خەرج نەكراوەو ئەوەش وای لەكۆمپانیاكان كردووە دەرمانی دیكە نەدەنە نەخۆشخانەكان. حكومەتی عێراق 30٪ی دەرمانی هەرێمی كوردستان دابین دەكات، ئەوی دیكە حكومەتی هەرێم لەڕێگەی تەندەرەوە داویەتی بەچەند كۆمپانیایەك و ئەوان بۆ وەزارەتی تەندروستی دابینی دەكەن. تەندەرەكە ساڵانەیە، ئەو دەرمانانەی كە بۆ نەخۆشییە درێژخایەنەكانن لەلایەن حكومەتی عێراقەوە بۆ هەر شارێك 30٪ دابین دەكرێت، بۆ نموونە دەرمانی نەخۆشییەكانی شەكرەو فشاری خوێن، بەڵام دەرمانی شێرپەنجە سندوقێكی خێرخوازی بۆ دابینكراوە و لەسەر بودجەی گشتی نییە. لەسلێمانی 37 كۆمپانیای دەرمان، بۆ سلێمانی و هەڵەبجەو ئیدارەكانی گەرمیان و راپەڕین دەرمان دەهێنن و لەڕێگەی وەزارەتی تەندروستی و بەڕێوەبەرایەتییەكانەوە گرێبەستیان لەگەڵدا كراوە. جێگری بەڕێوەبەری تەندروستی سلێمانی دەڵێت:» كێشەی كەمی دەرمان پەیوەندی بەوەزارەتی داراییەوە هەیە». هێرش سەید سەلیم، جێگری بەڕێوەبەری تەندروستی سلێمانی لەلێدوانێكدا بەهاوڵاتی وت : «كێشەكە لەوەزارەتی داراییەو بەڕێوەبەرێكی گشتی لەوێ كێشەكەی دروستكردووە كە پارەی كۆمپانیاكانی دەرمان دوادەكەوێت، بۆ چارەسەری كێشەكەش تاڕێنماییەكەی وەزارەتی دارایی نەگۆڕێت كە چەندین جار بەڵێندراوە، ئەم كێشانە بەردەوام دەبێت». هێرش سەید سەلیم، وتیشی: «بۆ ئایندە كێشەی گەورە دروستدەبێت، پێشتر لەهەفتەیەكدا حكومەت 20٪ی پارەی كۆمپانیاكانی دەرمانی دەدا، بەڵام ئێستا كردوویەتی بەمانگی جارێك و لەگەڵ دابەشكردنی مووچەدایە». هەروەها جێگری بەڕێوەبەری تەندروستی سلێمانی پێیوابوو كە تائێستا تەنیا تەندروستی سلێمانی دەنگی دێت و كێشەی هەیە، وتیشی:»دڵنیام تەندروستی هەولێرو دهۆكیش ئەو كێشەیەیان هەیە، بەڵام دیارە جیاوازی لەتەندەردا هەیەو خەڵكی دیكە بەهانایانەوە چووە». «كۆمپانیاكانی سلێمانی كە دەرمان دەهێنن كۆمپانیای گەورە نین، كۆمپانیاكانی هەولێر گەورەن، ئەوانیش كێشەی پارەیان نییە، گرنگ ئەوەیە دەرمانەكە ساغ بكەنەوە»، جێگری بەڕێوەبەری تەندروستی سلێمانی وای وت. هاوكات، جێگری بەڕێوەبەری تەندروستی سلێمانی ئەوەشی ئاشكراكرد كە هەتا 1/2/2022 كێشەكە چارەسەر نەكرێت كۆگاكانیش دەرمانی تێدا نامێنێت و دەرمانەكانیش دەرمانی رۆژانەن و كارەسات دروستدەكەن». سەرچاوەیەك لەنەخۆشخانەی شار لەسلێمانی كە پێی باش نەبوو ناوی بهێندرێت لەلێدوانێكدا بەهاوڵاتی وت: «ساڵێك دەبێت كێشەی كەمی دەرمانمان هەیەو ناچارین بەنەخۆش بڵێین لەدەرەوە دەرمان بكڕێت، چونكە زۆرێك لەدەرمانەكان نەماون و لەنەخۆشخانەكانی دیكەش بەهەمان شێوەیە». لەلایەكی دیكەوە، هەمزە رەزیكی وتەبێژی تەندروستی دهۆك ئەوەی خستەڕوو تائێستا هیچ كێشەیەكیان لەنەبوونی دەرمان نییە و پێشتریش ئەو كێشەیە دروست نەبووە. هاوكات بژار موسا، وتەبێژی تەندروستی هەولێر، رەتیكردەوە وەكو تەندروستی هەولێر تائێستا كێشەی نەمان و كەمی دەرمانیان هەبێت. لەدوایین لێدوانیدا، د.سەباح هەورامی بەڕێوەبەری گشتی تەندروستی سلێمانی رایگەیاند: بەهۆی ئەوەی ساڵی نوێ گرێبەستی نوێ لەگەڵ كۆمپانیاكان ئەنجامدەدەن حكومەتی هەرێم  وەك بەڵێنیان پێداون بابەتی نەختینەی دەرمان لەبەرچاوبگرن تاكۆمپانیاكان بتوانن دەرمانیان بۆ دابین بكەن.

مەزهەر كەریم كەسوكاری ئازادكراوانی خۆپیشاندانەكەی پیرەمەگرون ئەوە ئاشكرادەكەن كەدۆخی كوڕەكانیان نائارامەو دەترسن، بەڵام ئاسایشی سلێمانی سوورە لەسەر ئەوەی كە ئەوانە»تێكدەربوون». لەمانگی تشرینی دوەمی ساڵی رابردوو گردبوونەوەیەكی ناڕەزایی لەناحیەی پیرەمەگرون بەڕێوەچوو، دواتر چوونە سەر فەرمانگەكان و لەئەنجامدا كتێبخانەی پیرەمەگرون سوتێندرا. رۆژی چواری ئەم مانگە هێزەكانی ئاسایش چەند كەسێكی دەستگیر كردو پاش لێكۆڵینەوە جلوبەرگی پرتەقاڵییان لەبەركردن كە لەناو گیراوەكاندا مێردمنداڵ هەبوون، ئەمەش نیگەرانی كەسوكارو رای گشتی لێكەوتەوە لەسەر ئەو جۆرە لەماڵەكردن لەگەڵیاندا. دایكی یەكێك لەدەستگیركراوانی گردبوونەوەكەی  پیرەمەگرون  بەناوی ئایشە محەمەد لەلێدوانێكدا بەهاوڵاتی وت: « رۆژی چوارشەممەی رابردوو بەیانی زوو بوو كوڕە چواردە ساڵانەكەم خۆی گۆڕی‌و  لەماڵ چووە دەرەوە بۆ قوتابخانە، بەڵام هەر لەگەڵ گەشتبووە ناو ژووری خوێندنگە لەلایەن  هێزەكانی ئاسایشەوە دەستگیركراو رەوانەی بنكەی ئاسایشی پیرەمەگرون كرابوو».   هەروەها وتیشی:»وەك كوڕەكەم بۆی باس كردووم لەدوای دەستگیركردنی لەئۆتۆمبیلی تایبەت بەگیراوان رەوانەی ئاسایشی سلێمانی كراوەو لەپاش دوو رۆژ لەدەستگیركردنی وتەی لێوەرگیراوە تا جارێكی دیكە بەشداری خۆپیشاندان نەكات و پێیان وتووە ئەگەر ئەمجارە بەشداری خۆپیشاندان بكەیت شەش مانگ حوكمت دەدەین». دایکی ئەو كوڕە 14 ساڵە ئەوەشی دووپاتكردەوە كە لەئێستادا لەماڵەوەیە زۆر بەكەمی قسە دەكات، وتیشی:» ناوێرێت لەماڵ بچێتە دەرەوە كاتێك، دەچێتە تەوالێت دەرگای تەوالێتەكە داناخات دەڵێت (ئاگاتان لەمن بێت)، زۆر دەترسێت». ئایشە لەبارەی ترس‌و دڵەڕاوكێی كوڕەكەیەوە باسی لەوە كردو وتی:» هەفتە پێش دەستگیر كردنی شەوانە بەترسەوە دەخەوت كاتێك پێكەوە قسەمان دەكرد دەیوت ئەگەر دەستگیركراوەكان ناوی هەر كەسێك بڵێن ئاسایش دەستگیریان دەكات، منیش بەشداری خۆپشاندانەكانم كردووەو دەگیرێم». هەروەها پورە خەجێ‌  یەكێكی دیكەیە لەو ژنانەی پیرەمەگرون كوڕێكی لەلایەن ئاسایشەوە دەستگیركراوە، لەلێدوانێكدا بە وت:» ئاسایش منداڵ‌و پیرو بەتەمەن نازانێت هەرچی بەردەست بكەوێت دەستگیری دەكات، شەشی بەیانی بوو هەڵیانكوتایە سەرمان، كوڕەكەمیان دەستگیركرد لەناو جێگەی نووستن نەیانهێشت خۆی بگۆڕێت تراكسودێك‌و فانیلەیەكی عەلاگەی لەبەردابوو، هەر ئەوها بردیان‌و رۆیشتن». شارەزایەكی یاسایی دەڵێت:» پڕكردنەوەی بەڵێننامە شتێكی یاساییی نییە». پشتیوان حەمە رەزا، پارێزەر لەلێدوانێكدا بەهاوڵاتی وت:» بەپێی یاسا خۆپیشاندان مافی هەموو کەسێكەو رێگەی پێدراوە، پڕكردنەوەی هەر بەڵێننامەیەك یاخود شتێكی لەو شێوەیە بۆ بەشداری نەكردن لە خۆپیشاندان پوچەڵە». هەروەها وتیشی:»پڕكردنەوەی بەڵێننامە شتێكی یاسایی نییەو لەیاسادا شتی لەو شێوەیە بوونی نییە». بڕیاردەری لیژنەی كاروباری كۆمەڵایەتی و داكۆكی كردن لەمافی مرۆڤ لەپەرلەمانی كوردستان ئاشكرای دەكات كە دانپێدانان‌و بڵاوكردنەوەی وێنەی گیراوانی پیرەمەگرون بە جلوبەرگی تایبەتیەوە دوورە لەسڕی لێكۆڵینەوەو دژی بنەماكانی مافی مرۆڤە. بەدریە ئیسماعیل، بڕیاردەری لیژنەی كاروباری كۆمەڵایەتی و داكۆكی كردن لەمافی مرۆڤ  لەفراكسیۆنی كۆمەڵ لەلێدوانێكدا بۆ هاوڵاتی ئەوەی خستەڕوو كە دەستگیركردنی گیراوانی پیرەمەگرون بەپێی یاسایی ئسوڵی محاكماتی جەزائی ساڵی  1971 بەو شێوەیە دژی رێكارە دادییەكانە، بەپێی یاسا هەتا تاوان نەسەلمێنرێت بەتاوان هەژمار ناكرێت و بەبەریئی لەقەڵەم دەدرێت، ئەمەش چوارچێوەیەكی یاساییە. هەروەها وتیشی:» لەبارەی لەبەركردنی جلی پەرتەقاڵی بۆ تاوانباری مەترسیدارە نەك كۆمەڵێك گەنج كە دیار نیە كارەكەیان كردووە یان نا، ئێمەش لەگەڵ تێكدان‌و سووتاندنی شوێنی گشتی نین و لەگەڵ ئەو جۆرە لەماڵەی هێزە ئەمنیەكانیش نین». دوای سوتاندنی كتێبخانەی پیرەمەگرون لەلایەن چەند چالاكوانێكەوە هەڵمەتێك بۆ كۆكردنەوەی كتێب بۆ كتێبخانەكە ئەنجامدراوەو هەزاران كتێب كۆكرایەوەو برایەوە بۆ پیرمەگروون. ئاسایشی سلێمانی جەخت لەوە دەكاتەوە كەئەوان هەستاون بەكاری یاسایی خۆیان‌و ئەو كەسانەی دەستگیركراون «كاری تێكدەرانەیان ئەنجامداوەو دامودەزگای دەوڵەتیان سووتاندووە». موقەدەم یاسین سەمیع، وتەبێژی بەڕێوەبەرایەتی ئاسایشی پارێزگای سلێمانی لەلێدوانێكدا بەهاوڵاتی وت:» ئەو كەسانەی لەپیرەمەگرون دەستگیركراون كۆمەڵێك خەڵكی تێكدەربوون، ژمارەیان بەدیاریكراوی ناڵێین چەند كەس بوون، چونكە رەنگە پاشانیش دادوەر داوایان بكات». ناوبراو وتیشی:» ئەو كەسانە فەرمانگە خزمەتگوزاریەكانی ئەو سنورەیان سوتاندوە‌و بەفەرمانی دادوەر دەستگیركراون پاشان بەبارمتە ئازاد كراون، ئەم كارەش ئەوە نیە كەسێك یان دوو كەس كردبێتی، بەبەرنامە كراوە‌و حاڵەتێكی تێكدانە، دوورو نزیك پەیوەندی بەكەیسی خۆپیشاندانەوە نیە». « ئەم بابەتە مافی گشتییە‌و داواكاری گشتی لەسەری هاتووەتە سەرخەت ، خەڵك لەپیرەمەگرون داواكاری هەیە داوای خزمەتگوزاری دەكات، بەهەموو ناحیەی پیرەمەگرون چەند فەرمانگەیەكی خزمەتگوزاری تێدایە، خەڵێك دێت بەبەرنامە دەیسوتێنێت، بەبەرنامە ئەوەشیان لێدەستێنێتەوە، جا كەسوكاری گیراوەكان هەرچی دەڵێن ئەوە بابەتێكی دیكەیە»، وتەبێژی ئاسایشی سلێمانی وادەڵێت. لەبارەی ئەوەی گیراون جلوبەرگی پرتەقاڵیان لەبەركراوە، وتەبێژەكەی ئاسایش پێیوابوو كە ئەو جلوبەرگە پرتەقاڵیانە جلوبەرگی ستانداردی هەموو زیندانیەكانن، هەموو بەندینخانەیەك پێویستە جلوبەرگی تایبەتی هەبێت و بەندكراوەكان جلوبەرگی تایبەتیان لەبەردا بێت، ئەوانەی بەند دەكرێن دەبێت یەكپۆش بن، كەس لەگەڵ كەسی دیكە جیاوازی نەبێت لەناو زینداندا بەتایبەت بۆ پاكوتەمییزی ناو زیندان، كەبەپێی رێكخراوی نێودەوڵەتی ‌و ئەو رێكخراوانەی بەردەوام سەردانی زیندانیانی ئاسایش دەكەن، ئەو جۆرە لەجلوبەرگ رێگەپێدراوە ئاساییە.

عەمار عەزیز بەپێی وتەی نوێنەری زەردەشتیەكان لەوەزارەتی ئەوقاف و كاروباری ئاینی حكومەتی هەرێم ساڵانە زیاتر لەدوو هەزار موسوڵمان هەرێم دەبنە زەردەشتی و واز لەئاینی ئیسلام دەهێنن، پەیڕەوانی ئایینی زەردەشتی لەسنوری پارێزگای دهۆك دەڵێن:»هەندێك كەس لەناو كۆمەڵگا قسەی ناخۆش و بێڕێزی لەبەرامبەر ئێمە دەكەن». ئارام مەهدی ، یەكێك لە پەیڕەوانی زەردەشتییە لەپارێزگای دهۆك لەلێدوانێكدا بەهاوڵاتی  وت: « پەیڕەوانی زەردەشتی لەسنوری پارێزگای دهۆك ناتوانین بەئاشكرا زەردەشتی بوونی خۆمان رابگەینن، لەترسی كۆمەڵگەو دراوسێی و كەسە نزیكەكان، هەندێك كەس لەناو كۆمەڵگە قسەی ناخۆش و جنێوو بێڕێزی لەبەرامبەر ئێمە دەكەن». ناوبراو پێشیوابوو كە حكومەت و ئیدارەی پارێزگای دهۆك لەگەڵیان هاوكارن، بەڵام كێشەیان لەگەڵ بەشێك لەخەڵك هەیە بەتایبەتی كەسانی «توندڕەو». ئارام مەهدی وتیشی: «مرۆڤ ئازادە هەر ئاینێك بۆ خۆی هەڵبژێرێت، بەڵام بەداخەوە ئێمە ناتوانین سوود لەو ئازادییە وەربگرین، ئێمە دژی هیچ كەس و لایەنێك نین تەنیا دەمانەوێت وەكو ئایینەكانی تر بین «. لەبارەی تۆماركردنی سكاڵا لەدژی ئەو كەسانەی هەڕەشەیان لێكردووە ، ئارام وتی: « سكاڵام لەدژی هیچ كەسێك تۆمار نەكردووە، ئەوەش لەبەرئەوەی ئەگەر سكاڵا تۆماربكەم دەبێت شەوو رۆژ  لەدادگا بم، چونكە یەك و دوو نیە، دۆخەكەش ناگونجێت سكاڵا تۆمار بكەم«. لەئایینی زەردەشتیدا، هەر زەردەشتییەك دەتوانێت راستەوخۆ  پەیوەندی بەخودای دانا و بوون بەخش بكات، بێ ئەوەی لەشوێنی تایبەت بێت وەك ئاتەگشا یان هەر شوێنێكی تر بێت، چونكە بەپێی ئاینەكەیان مرۆڤ پێویستی بەنێوەندگیری نیە كاتێك بیەوێت پەیوەندی بەخوداوە بكات. نوێنەری زەردەشتییەكان لەوەزارەتی ئەوقاف و كاروباری ئاینی حكومەتی هەرێم ئەوە ئاشكرادەكات لەماوەی حەوت ساڵدا واتا لەساڵی 2015 تائێستا 15 هەزار موسوڵمان وازیان لەئاینی ئیسلام هێناوەو بوونەتە زەردەشتی.  ئاوات حوسامەدین، نوێنەری زەردشتییەكان لەوەزارەتی ئەوقاف و كاروباری ئایینی لەلێدوانێكدا بۆ  هاوڵاتی ئاماژەی بەوەكرد كە لەشاری دهۆك لە 2ی تەمموزی 2020 لقی رێكخراوی یەسنا-مان كردووەتەوە بۆ گەشەی فەلسەفەی زەردەشتی لەكوردستان ، واتە رێكخراوێكی رۆشنبیری زەردەشتییە بۆ بڵاوكردنەوەی هزری پێكەوەژیان  و یەكتر قبوڵكردن لەنێوان هەموو پێكهاتەكانی كوردستان. هەروەها وتیشی:»لەبەر هۆی ئەمنی نازانین ژمارەی زەردەشتیانی دهۆك چەندە، لەبەرئەوەی گیروگرفتی كۆمەڵایەتی و خێزانی دروستدەكات، هەر لەبەرئەمە خەڵك ئامادەنیە بەئاشكرا زەردەشتییەتی خۆی رابگەیەنێت، جگە لەوەش لەبەرئەوەی ئایینی زەردەشتی ئاینێكی تەبشیری نیەو بنەماكانی لەسەر ئاشتی و خۆشەویشتی و یەكتر قبوڵكردن و لێبوردەییە». ئاوات حوسامەدین ئەوەشی ئاشكرا كرد كە» بەفۆرم لەساڵی 2015وە تائێستا 15 هەزار كەسی موسوڵمان وازیان لەئاینی ئیسلام هێناوەو بوونەتە زەردەشتی و سەردان دەكەن و بەشدارن لەچالاكییە ئاینییەكاندا». هاوكات باسی لەوەشكرد كە لەگەڵ رێكخراوەكانی كۆمەڵگەی مەدەنی كار بۆ مافی پێكهاتەكانی ئایینی و نەتەوەییەكان دەكەن لەكوردستاندا، وتیشی:»رێكخراوی یەسنا لەدهۆك رێكخراوێكی رۆشنبیری زەردەشتی مەدەنیە، واتە رێكخراوێكی ئایینی نیە، جگە لەوەش ئەوەی كە زەردەشتی بیت دەتوانیت رێوڕەسمی ئایینی خۆی بكات و پێویستی بە ئاتاشگا نیە، چونكە زۆر ئاساییە كە 5 جار لە رۆژێكدا دەتوانێت روو لە رۆژ یان هەر رووناكیەك بكات كە سۆمبل و رەمزی هێمای پیرۆزی ئاهورا مازدا (خودا) یە». «لەسنوری پارێزگای دهۆك هەموو بێڕێزییەك بەرامبەر زەردەشتییەكان كراوە، هەروەها هێرشی توند لەسوشیاڵ میدیا بەزەردەشتییەكان كراوە، بەڵام ئێمە هیچ سكاڵایەكمان تۆمارنەكردووە تا دۆخی  ناوچەی بادینان تێكنەچێت»، نوێنەری زەردەشتییەكان لەوەزارەتی ئەوقاف و كاروباری ئاینی حكومەتی هەرێم وای وت. وتەبێژی پۆلیسی پارێزگای دهۆك دەڵێت كە ئاگادار نییە زەردەشتییەكان سكاڵایان تۆمار كردبێت لەسەرئەوەی هەڕەشەیان لەسەر بێت. هێمن سلێمان، وتەبێژی پۆلیسی پارێزگای دهۆك لەلێدوانێكدا بەهاوڵاتی وت: « هەموو پێكهاتەكانی ئایینی مافی ئەوەیان هەیە سكاڵا لەدژی ئەو كەسانە تۆماربكەن كە سوكایەتییان پێدەكرێت یان هەڕەشەیان لێدەكرێت». ناوبراو ئەوەشی روونكردەوە كە نازانێت زەردەشتییەكانی دهۆك تائێستا سكاڵایان تۆماركردووە یان نا. سەرۆكی یەكێتی زانایانی ئایینی دەڵێت:» ئێمە حەزناكەین هیچ كەسێك بێرێزی بەرامبەر زەردەشتییەكانی دهۆك بكات یان هێرش بكاتە سەر ئەمە دژی پێكەوە ژیانی ئایینی یە لە هەرێمی كوردستان». جیهاد دۆسكی، سەرۆكی یەكێتی زانایانی ئایینی لە دهۆك لەلێدوانێكدا بە هاوڵاتی وت « ئایینی ئیسلام خودی پێغەمبەرمان موحەمەد سڵاوی خوای لەسەر بێت رێزی لە هەموو ئایینەكان گرتووە بۆیە پێویستە ئێمەش رێزیان لێ بگرین « سەرۆكی یەكێتی زانایانی ئایینی لە دهۆك پێشیوابوو كە پەیوەندی باشیان لەگەڵ زەردەشتییەكانی دهۆك هەیەو تا ئێستا هیچ كێشەیەك لەنێوانیاندا روونەداوە. شارەزایەكی یاسایی لەبارەی گۆڕینی ئاین لەهەرێمی كوردستان روونكردەوە دەدات و دەڵێت:» ئەو كەسانەی ئاینی خۆیان دەگۆڕن دەتوانن ناسنامەكانیشیان بگۆڕن». عەبدولمەجید ئەحمەد، پارێزەر لە پارێزگای دهۆك لەلێدوانێكدا بە هاوڵاتی وت»هیچ دەقێكی یاسایی نیە كە ئەگەر كەسێك ئایینی خۆی بگۆرێت و دواتر سزا بدرێت، بە نموونە لە ئایینی ئیسلامەوە بگۆرێت بۆ زەردەشتی، ئەمە شتێكی شەخسیە». هەروەها وتیشی:» ئەوكەسەی ئایینەكەی خۆی دەگۆرێت مافی ئەوەی هەیە رەگەزنامەی خۆشی بگۆرێت، (الدیانە مسلم، بگورێت بۆ زەردەشتی، یان هەر ئاینێكی دیكە)، بۆ ئەوەش پێشتر داوایەك پێشكەش بە دادگا دەكات دوای ئەوە دادوەر بڕیار دەدات و لەفەرمانگەی رەگەزنامە مامەڵەكانی تەواو دەكرێن».

هاوڵاتی حکومه‌تى ئه‌ڵمانیا ئه‌رکى هێزه‌کانى عێراق ده‌گرێته‌ ئه‌ستۆ و بۆ ماوه‌ى نۆ مانگى دیکه‌ به‌رده‌وام ده‌بێت، سه‌رۆکى هه‌رێمیش پێشوازى له‌ بِیاره‌که‌یان ده‌کات و له‌ تویتێکدا رایگه‌یاند:" هیوا ده‌خوازم  پەرلەمانی ئەو وڵاتەش بڕیارەکەی حکومەت قبووڵ بکات". ئەمڕۆ چوارشەممە 12ی کانوونی دووەمی 2022، حکومەتی ئەڵمانیا رایگەیاند:  بڕیاری داوە ئەرکی هێزەکانی لە عێراق بۆ ماوەی نۆ مانگی دیکە درێژبکاتەوە و لە سووریاش کۆتایی بە ئۆپەراسیۆنەکانی دەهێنێت؛ بڕیارە تاوەکو کۆتایی مانگی تشرینی یەکەمی ئەمساڵ هێزەکانی ئەڵمانیا لە عێراق بمێننەوە. نێچیرڤان بارزانی، سەرۆکی هەرێمی کوردستان لە تویتێکدا پێشوازیی لە بڕیارەکەی حکومەتی ئەڵمانیا کردووە و هیوای خواستووە پەرلەمانی ئەو وڵاتەش بڕیارەکەی حکومەت قبووڵ بکات. سەرۆکی هەرێمی کوردستان ئاماژەی بەوە کردووە، "داعش هێشتا هەڕەشەیە بۆ ئاشتی و ئاسایشی نێودەوڵەتی و هەوڵی پێکەوەیی پێویستە بۆ رووبەڕووبوونەوە و ریشەکێشکردنی هەڕەشەی تیرۆر".

هاوڵاتی وتەبێژی حکومەتی هەرێم رایگەیاند: "لە چەند رۆژی رابردوودا دیوانی چاودێری عێراق سەردانی هەرێمی کرد و وردبینی بۆ داهاتەکانی هەرێم کرد و لە ماوەکانی داهاتوودا راپۆرتی خۆیان ئاڕاستەی ئێمە و بەغدا دەکەن." ئەمڕۆ چوارشەممە 12ی کانوونی دووەمی 2022، جوتیار عادل وتەبێژی حکومەتی هەرێم  لە كۆنگرەیەكی ڕۆژنامەوانیدا رایگەیاند، 200 ملیارەکەی بەغدا دوێنێ ئەنجومەنى وەزیرنى عێراق پەسەندی کردوە، هیوادارین لەماوەیەکى زوودا بگاتە هەرێمى کوردستان و لەبارەى دابەشکردنى نەوتى سپی بەسەر هاوڵاتیان وتیشی، ''تا ئێستا 64 ملیۆن لیتر دابەشکراوەو ئەوەى ماوە بۆ سنورى پارێزگای سلێمانى تەرخان دەکرێت لەناوچە شاخاوییەکان بە نرخى 55 هەزار دینار دەدرێت بە هاوڵاتیان.'' ئاماژەی بۆ ئەوەشکرد، ''هەنگاوی باش نراوە لە کۆکردنەوەى داهاتەکان، بەڵام خاوگەیشتنی 200 ملیارەکەى بەغدا وایکردوە موچەش خاو دابەش بکرێت، بەوتەى خۆشی هەر کات 200 ملیارەکە گەیشت ئەوا لە چەند رۆژێکدا مووچەى ئەو وەزارەتانەى ماون دابەش دەکرێت.'' له‌باره‌ی شه‌پۆلی نوێی كۆرۆنا و ئۆمیكرۆن، وته‌بێژی حكومه‌ت ئاماژه‌ی به‌وه‌كرد، "شه‌پۆلێكی نوێ گه‌یشتوه‌ته‌ ئه‌م ناوچه‌یه‌ و هه‌رێمی كوردستانیش ده‌گرێته‌وه‌، تاكه‌ چاره‌سه‌ر بۆ ئه‌م بابه‌ته‌ ئێمه‌ له‌ لیژنه‌ی باڵای روبه‌ڕوبونه‌وه‌ی كۆرۆنا بڕیارمان له‌سه‌ردا ئه‌ویش ده‌بێت فه‌رمانبه‌ران پابه‌ندی وه‌رگرتنی ڤاكسین بن.'' له‌باره‌ی ناڕه‌زایی خه‌ڵك له‌دژی پێوه‌ره‌كانی ئاو و كاره‌باوە وتەبێژی حکومەت وتی، "به‌داخه‌وه‌ چەند گروپێك هانی خه‌ڵكیانداوه‌ كه‌ ئه‌و پێوه‌رانه‌ لێبكه‌نه‌وه‌، ئه‌مه‌ كارێكی نایاساییه‌ و كارێکه‌ به‌جددی موتابه‌عه‌ی ده‌كه‌ین و لێپچێینه‌وه‌ له‌و كه‌سانه‌ ده‌كه‌ین و سزای یاساییان ده‌ده‌ین كه‌ ئه‌م جۆره‌ كارانه‌ ده‌كه‌ن كه‌ كاری تێكده‌رانه‌ن، ئه‌مه‌ له‌سه‌ر مه‌سه‌له‌ی ئاویش جێبه‌جێ ده‌كرێت كه‌ 80%ی ته‌واوبوه‌ و گرفت هه‌یه‌ به‌ڵام چاره‌سه‌ر ده‌كرێت". جوتیار عادل ئاماژەی بەوەشکردووە، "لە رووی سەربازیەوە لەلایەن بەغدا و هەولێرەوە هەماهەنگی هەیە و هیوادارین هەماهەنگییەکە لەسەر زەویش رەنگ بداتەوە."

هاوڵاتی وەزارەتی كار و كاروباری كۆمەڵایەتی حكومەتی هەرێم هەلی كار لە كۆمپانیاكانی كەرتی تایبەت بۆ گەجان ڕادەگەیەنێت و داوادەکات سەردانی  بەڕێوەبەرایەتیەكانی كار بکەن بۆ پڕکردنەوەی فۆرم یاخود لە ڕیگەی ئەم لینکێکەوە فۆرمەکە پربکەنەوە. ئەمڕۆ چوارشەممە 12ی کانوونی دووەمی 2022، وەزارەتی كار و كاروباری كۆمەڵایەتی حكومەتی هەرێم لە ڕاگەیەنراوێكدا بڵاویکردەووە، ئەو گەنجانەی كە ئارەزووی دامەزراندن دەكەن لە كۆمپانیاكان، وەزارەت و بەڕێوەبەرایەتی گشتی كارو دەستەبەری كۆمەڵایەتی ئەم هەلەیان بۆ دەڕەخسێنێت و دەتوانن بۆ ئەو مەبەستە سەردانی  بەڕێوەبەرایەتیەكانی كار بکەن بۆ پڕکردنەوەی فۆرم. ئەوەشخراوەتەڕوو، ''بۆ ئەوەی لەیەكێك لە كۆمپانیاكانی كەرتی تایبەت كار بكەن چ لەڕێگای سەردان كردن بۆ بەڕێوەبەرایەتیەكانی كار لە هەرێمی كوردستان یاخود سەردانی ئەم لینكەی خوارەوە بكەن.''

هاوڵاتی نوێنەری زەردەشتییەكان لەوەزارەتی ئەوقاف و كاروباری ئاینی حكومەتی هەرێم ئەوە ئاشكرادەكات، لەماوەی حەوت ساڵدا واتا لەساڵی 2015 تائێستا 15 هەزار موسوڵمان وازیان لەئاینی ئیسلام هێناوەو بوونەتە زەردەشتی. ئاوات حوسامەدین، نوێنەری زەردشتییەكان لەوەزارەتی ئەوقاف و كاروباری ئایینی لەلێدوانێكدا بۆ هاوڵاتی رایگەیاند:" لەشاری دهۆك لە 2ی تەمموزی 2020 لقی رێكخراوی یەسنا-مان كردووەتەوە بۆ گەشەی فەلسەفەی زەردەشتی لەكوردستان ، واتە رێكخراوێكی رۆشنبیری زەردەشتییە بۆ بڵاوكردنەوەی هزری پێكەوەژیان و یەكتر قبوڵكردن لەنێوان هەموو پێكهاتەكانی كوردستان". هەروەها وتیشی:"لەبەر هۆی ئەمنی نازانین ژمارەی زەردەشتیانی دهۆك چەندە، لەبەرئەوەی گیروگرفتی كۆمەڵایەتی و خێزانی دروستدەكات، هەر لەبەرئەمە خەڵك ئامادەنیە بەئاشكرا زەردەشتییەتی خۆی رابگەیەنێت، جگە لەوەش لەبەرئەوەی ئایینی زەردەشتی ئاینێكی تەبشیری نیەو بنەماكانی لەسەر ئاشتی و خۆشەویشتی و یەكتر قبوڵكردن و لێبوردەییە". ئاوات حوسامەدین ئەوەشی خستەڕوو: " بەفۆرم لەساڵی 2015وە تائێستا 15 هەزار كەسی موسوڵمان وازیان لەئاینی ئیسلام هێناوەو بوونەتە زەردەشتی و سەردان دەكەن و بەشدارن لەچالاكییە ئاینییەكاندا". ئەم وتانەی ئاوات حسامەدین لەراپۆرتێكی ژمارە 1951 ی رۆژنامەی هاوڵاتیدا بڵاوبووەتەوە، سبەینێ تەواوی ڕاپۆرتەكە لەماڵپەڕی هاوڵاتی دادەنرێت.

هاوڵاتی سەرۆكی دەستەی چاككردن و پاراستنی ژینگە ئاشكرایكرد ، لەساڵی 2010 تا ساڵی 2020 نزیكەی یەك ملیۆن دۆنم دارستان لەهەرێمی كوردستان لەناوچووە، هۆكاری سەرەكییش تۆپبارانەكانی توركیاو ئێرانە. عەبدولرەحمان سدیق سەرۆكی دەستەی چاككردن و پاراستنی ژینگە لەكۆنگرەیەكی رۆژنامەوانیدا ڕایگەیاند: بەنیازین دارستانی دەستكرد لەهەرێمی كوردستان دروست بكەین بۆ ئەوەش لەرێگەی چەند كۆمپانیایەكەوە دەست بە دروستكردنی بەشێوەی بچووك كراوە. وەك سەرۆكی دەستەی ژینگە باسی دەكات لەرێگەی وەزارەتی دەرەوەی عێراق بە توركیا و ئێرانیان وتووە كە كێشەی ئاو دروست نەكەن و دارستانەكان نەسوتێنن، دەشڵێت هەموو ئەو زیانەی توركیا و ئێران بە ژینگەی كوردستانیان گەیاندووە لەپاش 10 ساڵی تر كاریگەری لەسەر خۆشیان دەبێت.

هاوڵاتی حکومەتی هەرێمی کوردستان رایگەیاند:" تاوەکو ئێستا لە پارێزگاکانی هەولێر، سلێمانی، دهۆک و هەڵەبجە نزیکەی 63 ملیۆن لیتر نەوت دابەشکراوە و پرۆسەی دابەشکردنیش بەردەوامە".  بەپێی راگەیێنراوێکی حکومەتی هەرێمی کوردستان لە پارێزگاکانی هەولێر، سلێمانی، هەڵەبجە و دهۆک دابەشکردنی نەوتی سپی بەردەوامە کە بەمشێوەیەیە: پارێزگای هه‌ولێر پارێزگای هه‌ولێر پێویستیی به‌ 92 ملیۆن و 345 هەزار و 400 لیتر هه‌یه،‌ به‌ڵام تا رۆژی ٦ی کانوونی دووەمی 2022 بڕی 25 ملیۆن و 714 هەزار و 819 لیتر دابینکراوە و له‌و بڕه‌ش 23 ملیۆن و 690 هەزار و 800 لیتر به‌سه‌ر ناوچه‌ شاخاوییه‌كانی (چۆمان، رواندوز، سۆران، مێرگه‌سۆر، شه‌قڵاوه و كۆیە) دابه‌شكراوه‌ و هه‌روه‌ها بڕی ملیۆنێک و 534 هەزار و 600 لیتر به‌سه‌ر ده‌ورووبه‌ر (واتە خه‌بات و بنه‌سڵاوه‌) دابه‌شكراوه‌ و ( ٦٧,١٢٠,٠٠٠) 67 ملیۆن و 120 هەزار لیتر ماوه‌ كه‌ پێویسته‌ دابینبكرێت. پارێزگای سلێمانی و ھەڵەبجە حکومەتی هەرێمی کوردستان لەبارەی دابەشکردنی نەوت بەسەر هەردوو پارێزگای سلێمانی و هەڵەبجە دەڵێت، پارێزگای سلێمانی پێویستیی به‌ 91 ملیۆن و 749 لیتر هه‌یه‌، تاكو 6ی کانوونی دووەمی 2022، بڕی‌ 17 ملیپن و 172 هەزار و 985 لیتر دابینکراوە و له‌و بڕه‌ش 8 ملیۆن و 44 هەزار لیتر به‌سه‌ر ناوچه‌ شاخاوییه‌كانی پێنجوێن، قه‌ڵادزێ، هێرۆ، هه‌ڵشۆ، شارباژێڕ، قه‌ره‌داغ و دووكان دابه‌شكراوه و 6 ملیۆن و 826 هەزار لیتر له‌ سه‌نته‌ری شار دابه‌شكراوه‌ و ملیۆنێک و 852 هەزار لیتر له‌ ناوچه‌ شاخاوییه‌كانی هه‌ڵه‌بجەش‌ دابه‌شکراوه‌ . پارێزگای دهۆك سەبارەت بە پارێزگای دهۆک، حکومەتی هەرێمی کوردستان دەڵێت، بڕی پێویست بۆ پارێزگای دهۆک بریتییه‌ له‌ 53 ملیۆن و 829 هەزار و 600 لیتر، تاکو 6ی کانوونی دووەمی 2022 ، بڕی ملیۆن و 585 هەزار لیتر دابیکراوە و له‌و بڕه‌ش‌ 13 ملیۆن و 378 هەزار و 400 لیتر له‌ ناوچه‌ شاخاوییه‌كانی ئامێدی، زاخۆ، ئاكرێ، دهۆك و شێخان دابه‌شكراوه‌ و له‌ ده‌ورووبه‌ریش واتە (ئاكرێ، سێمێل، به‌رده‌ڕه‌ش و شێخان) بڕی 6 ملیۆن و 554 هەزار و 200 لیتر دابه‌شكراوه‌، هه‌روه‌ها بڕی 35 ملیۆن و 405 هەزار لیتر ماوه‌ دابین بكرێت. بەپێی خشتەی وەزارەتی سامانە سروشتییەکانی حکومەتی هەرێمی کوردستان هه‌ر خێزانێك 200 لیتری پێده‌درێت به‌ نرخی 55 هه‌زار دینار و کە ئەو بڕە نەوتەش لەلایەن حكومه‌تی هه‌رێمی كوردستانەوە دابیندەکرێت و نه‌وته‌كه‌ش له‌ به‌رزترین ئاستی كوالێتیدایه. ئەمە لە کاتێکدایە کە لە سنووری پارێزگای دهۆک ئێستا نرخی نەوتی سپی کە لەلایەن حکومەتی عێراقەوە دابینکراوە بە 90 هەزار دینار بە هاونیشتمانییان دەدرێت.

هاوڵاتی بەوتەی جێگری پارێزگاری هەولێر شەوی رابردوو نزیكەی 100 كەس لە یانەیەكی شەوانەی شارەكە دەستگیركراون، كە نزیكەی 73 كەسیان كچن و پەیوەندییان بە باندێكی لەشفرۆشییەوە هەبووە. هێمن قادر، جێگری پارێزگاری هەولێر لەلێدوانێكدا بە هاوڵاتی ڕاگەیاند: لەماوەی رابردودا ئێمە وەك پارێزگای هەولێر بڕیارێكماندا و چەند خاڵێكمان دیاریكرد، لەبڕیارەكەدا باسمان لەوەكردبوو ناكرێت یانەكانی شەوانە وەك پێویست مامەڵە نەكەن لەگەڵ ئەو مۆڵەتەی كە هەیانە، چونكە ئەگەر بەدەر لەو مۆڵەتە كاربكەن یان سەرپێچی بكەن لەڕووی تەندروستی، ئادابی گشتیی، ئەمنی و شارەوانییەوە رووبەڕوی رێكاری یاسایی دەبنەوە. جێگری پارێزگاری هەولێر ئاماژەی بەوەشكرد: ئەوەی شەوی رابردوو كراوە لەچوارچێوەی جێبەجێكردنی رێنماییەكان و بڕیارەكانی لیژنەی ئەمنیدا بووە لەسنوری پارێزگای هەولێر و بە بڕیاری پارێزگای هەولێرووە. هێمن قادر وتیشی: هەڵمەتەكە بەردەوام دەبێت و هەموو ئەو شوێنانە دەگرێتەوە كە پێچەوانەی بڕیارەكانی پارێزگای هەولێر، بەڕێوەبەرایەتییەكانی تەندروستی، رۆشنبیری، ئەمنی و هەمو شوێنە تایبەتمەندەكان مامەڵە دەكەن. جێگری پارێزگاری هەولێر دەشڵێت: هەر یانەیەكی شەوانە، هۆتێل و ریستۆرانتێك بەپێچەوانەی رێنماییەكان كاربكات، لێپرسینەوەی پێویستی لەگەڵدا دەگیرێتەبەر هەر لە داخستنی و غەرامەكردنی شوێنەكە تا وەرگرتنەوەی موڵەتەكەی.

هاوڵاتی سەندیکای رۆژنامەنوسانی کوردستان رایگەیاند:" لە ساڵی 2021دا 187 پێشێلکاری بەرامبەر رۆژنامەنوسان لەهەرێمی کوردستان و ناوچە کێشەلەسەرەکان تۆمارکراون، لەو ژمارەیەش زۆرترین پێشێلکاری بەرامبەر رۆژنامەنوسان لەهەولێر تۆمارکراون کە 33 حاڵەت بوە. سەندیکای رۆژنامەنوسانی کوردستان راپۆرتی ساڵای خۆی لەسەر پێشێلکاری بەرامبەر رۆژنامەنوسان بڵاوکردەوە و رایگەیاند، ساڵی رابردو 187 پێشێلکاری بەرامبەر رۆژنامەنوسان لەهەرێمی کوردستان و ناوچە کێشەلەسەرەکان تۆماکراوە کە بەم شێوەیە بوە دەستگیرکردن 17 حاڵەت، ڕێگەنەدان بە روماڵ 31 حاڵەت، هێرش و سوکایەتی 22  حاڵەت، لێدان 5 حاڵەت، هەڕەشە 2 حاڵەت و داخستنی نوسینگە و كەناڵیش 3 حاڵەت بوە. ئەوەش هاتوە، زۆرترین پێشێلکاری بەرامبەر رۆژنامەنوسان لەپارێزگای هەولێر تۆمارکراوە کە 33 حاڵەت بوە، کەمترینیش لە پارێزگای هەڵەبجە بوە کە یەک حاڵەت تۆمارکراوە. سەندیکای رۆژنامەنوسانی کوردستان دەڵێت، "سەرباری ئەوەی پێشێلکارییەکان بەردوامن، بەڵام هەست بەجۆرو بونی زیاتری پێشێلکاری دەکرێت کەهەندێک رۆژنامەنوس سکاڵای لەسەر تۆمارناکەن، وەیان لەبەر ئەوەی لەراپۆرتەکانی پێشوتر ئەوجۆرانە بە پێشێلکاری نەناسێنراون یاخود کورتی راپۆرتەکە وایکردوە زۆرتر نەچنە قوڵایی پێشێلکاریەکان. بۆیە ئومێد دەکەین ئەم راپۆرتە ببێتە هاندەرێک بۆ رۆژنامەنوسان تاکو چاوکراوەتربن لەو پێشێلکاریانەی بەرامبەریان دەکرێت"

هاوڵاتی وەزیری سامانە سرووشتییەکانی هەرێمی کوردستان ڕایگەیاند:" ئێستاش لەسەر بەڵێنەکەی خۆم سوورم، ئەستەمە دەرفەت بدەمە کەسێک دینارێک بێ حەق لە میزانییەی وەزارەت و پارەی ئەم خەڵکە بخوات". کەمال ئەترووشی، وەزیری سامانە سرووشتییەکانی هەرێمی کوردستان لە زاخۆ لە كۆنگرەیەكی ڕۆژنامەوانیدا رایگەیاند: "ئێمە هاتووین بۆ زاخۆ بۆ ئەوەی وەک وەزارەت هاوکاری ئەم شارە بکەین، زاخۆش ناوچەیەکە بۆ نەوت زۆر گرنگە. ئەو کۆمپانیایانەی لێرە لە بواری نەوت کار دەکەن پێویستە خزمەتگوزاری پێشکێشی زاخۆ بکەن." کەمال ئەترووشی لە بەشێکی دیکەی قسەکانیدا ئاماژەی بەوەدا کە ئامانجی ئەوان لەو سەردانە بۆ ئەوەبووە کە دەستی کار زیاتر بکەن و گەنجان دابمەزرێنن و خزمەتگوزاریش پێشکێشی شارەکە بکەن، راشیگەیاند "لە زاخۆ وەبەرهێنانێکی باش هەیە لە بواری نەوتدا، ئەمڕۆ بە پاڵپشتی جەنابی سەرۆکوەزیرانی هەرێمی کوردستان لێرەیەن و بڕیارمانداوە کە ئیدارەیەکی بەهێز لەبواری نەوت و کانزا لە زاخۆ بکەینەوە. ئێمەش وەک وەزارەتی سامانە سرووشتییەکان لە خزمەتی ئەو ئیدارەیەدا دەبین."  لەبارەی کۆمپانیای رووسنەفت لە زاخۆ، د. کەمال ئەترووشی وتی "رووسنەفت کۆمپانیایەکی گەورەیە و چەندین ساڵە گرێبەستی هەیە لەگەڵ سامانە سرووشتییەکان، لە چەند بلۆکێکدا کاری خۆی کردووە و نەوتی لە چەند کێڵگەیەک دەرهێناوە." لەبارەی کێشەی بەنزین لە زاخۆ کە لیتری بە 800 بۆ 850 دینار دەفرۆشرێت، وەزیری سامانە سرووشتییەکان رایگەیاند "رێککەوتنی ئێمە لەگەڵ حکومەتی عێراق ئەوەبوو کە مانگانە ملیۆنێک و 80 هەزار لیتر بەنزین بە کوالیتییەکی باش بنێرێت. ئێمە قەیرانێکی گەورەمان هەبوو و بەنزین لە وڵاتانی دراوسێ راگیرا. دوای ئەوەی چوومە بەغدا لەگەڵ وەزیری نەوتی عێراق قسەمان کرد کە مانگانە ئەو ملیۆن و 80 هەزار لیترە بنێرنە هەرێمی کوردستان، بەڵام وەک دیارە کێشەی تەکنیکی و کێشەی دیکە هەن کە ناردنی ئەو بڕەی بەنزین بەردەوام نەبوو، ئەو بڕە بەنزینەی عێراق دەینێرێت بە دڵنیاییەوە بەشی کوردستان ناکات، بەڵام ئەگەر بێت و بڕی ئەو بەنزینە لە عێراق زیاتر بێت و لە کوردستان رێژەی بەرهەمهێنان زیاتر بێت رەنگە دۆخەکە باشتر بێت." سەبارەت بە نەوتی زاخۆ کە رێژەیەکی زۆری نەوتی تێدایە کەمال ئەترووشی دەڵێت "بەڵێ پێویستە خزمەتی ئەو شارە بکرێت و ئەولەویەتیش بۆ زاخۆ دەبێت و ئەوە باوەڕی منە بۆ ئەم شارە. ئەگەر بێت و لێکتێگەیشتنێک هەبێت لەنێوان کۆمپانیای بەرهەمهێنان و ئیدارەی شارەکە دەبێت ئەولەویەت بۆ دامەزراندن و کارکردن و دامەزراندنی گەنجان بێت بۆ شارەکە." لەبارەی ئەو قسەیەی کە پێشتر وتبووی کە "هەر کەسێک لە وەزارەتەکەی ئەو گەندەڵی بکات 100 پارچەی دەکات" د. کەمال ئەترووشی دەڵێت "ئێستاش لەسەر بەڵێنەکەی خۆم سوورم، ئەستەمە دەرفەت بدەمە کەسێک دینارێک بێ حەق لە میزانییەی وەزارەت و پارەی ئەم خەڵکە بخوات. ئەوە 11 مانگە لەو وەزارەتەم، سیستەمێک لەنێو وەزارەت هەبوو، بەڵام کاتی دەوێت و لای منیش ئەوە هەیە و رەنگە هەموو کەسێک بزانێت کە هەرگیز نابێت گەندەڵی هەبێت. لەبەرئەوە تاوەکو ئەو سیستەمەی هەیە دەگۆڕێت کات و ستافێکی باشی دەوێت. بە چەند مانگێک ئەو کارە ناکرێت بەڵام شەو و رۆژ کاردەکەم بۆ باشترکردنی." دابەشکردنی نەوتی سپی بەسەر هاونیشتمانییاندا لە چەند شوێنێکی هەرێمی کوردستان بەردەوامە، وەزیری سامانە سرووشتییەکان گوتی " سەردانی ئەو ماڵانە دەکەم کە نەوتی سپیان بەسەردا دابەشنەکراوە، راستە درەنگ نەوتەکە هات و ئەوەش بە دەستی وەزارەتی بوو و لە دەستی وەزیری نەوتی عێراقدایە." ماوەی سێ رۆژە کەمال ئەترووشی وەزیری سامانە سرووشتییەکانی هەرێمی کوردستان لە سنووری پارێزگای دهۆکە، رۆژی سێشەممە بەردی بناخەی پرۆژەیەکی دانا و 7 پرۆژەیشی کردنەوە. هەروەها سەردانی ئەو شوێنانە دەکات کە نەوتی سپیان بۆ نەچووە. 

 هاوڵاتی کۆمپانیای دانەگازی ئیماراتی رایگەیاند:" ئاستی بەرهەمهێنانی گازی سرووشتی لە کێڵگەی کۆرمۆر بە رێژەی لە 50٪ زیادیکردووە". کۆمپانیای دانەگاز بە هاوبەشی "نەوتی هیلال" رایگەیاند، "ئاستی بەرهەمهێنانی رۆژانەی گازی سرووشتییان لە کێڵگەی کۆرمۆر لە چەمچەماڵ بە بەروارد بە ساڵی 2018 بە رێژەی لە 50٪ زیادکردووە". لە بەشێکی دیکەی راگەیێندراوەکەدا هاتووە، "ئاستی بەرهەمهێنانی رۆژانەی کێڵگەکە گەیشتووەتە 452 ملیۆن پێ سێجا لە کاتێکدا لە ساڵی 2018دا بەرهەمهێنانی رۆژانەیان لە کێڵگەکە 305 ملیۆن پێ سێجا بووە". دانەگاز راشیگەیاند، "پڕۆژەیەکی تایبەتمان هەیە بۆ فراوانکردنی بڕی گازی بەرهەمهێنراو لە کێڵگەی کۆرمۆر و پێشبینی دەکەین لە ساڵی 2023دا ئاستی بەرهەمهێنان بۆ 700 ملیۆن پێ سێجا بەرز بکەینەوە". بەرزکردنەوەی ئاستی بەرهەمهێنانی گاز لە کێڵگەی کۆرمۆر لە دوای ئەنجامدانی چەند پرۆسەیەکی باشترکردن لە میکانیزمی بەکاربردنی نێو کێڵگەکانەوە هات کە تایبەتن بە شێوازی چارەسەرکردنی گاز، لەوانەش پڕۆژەیەکی هەموارکردنەوە لە ساڵی 2020 و پڕۆژەی لابردنی گیروگرفتەکانی خنکان و پەنگخواردنەوە کە لە ساڵی 2018دا ئەنجامدرا. کۆمپانیاکانی دانەگاز و نەوتی هیلال لە بری هاوپەیمانێتیی "پیرل پیترۆلیۆم"، لە هەردوو کێڵگەی کۆرمۆر و چەمچەماڵ کار دەکەن و گازی پێویست بۆ بەرهەمهێنانی کارەبا لە هەرێمی کوردستان دابیندەکەن، هەروەها زیاتر لە 16 هەزار بەرمیل لە " پێکهاتە چڕکراوەکان" و رۆژانە هەزار تۆن لە گازی سرووشتی شل بەرهەمدەهێنن.

 هاوڵاتی ئەمڕۆ، ئەنجومەنی وەزیرانی هەرێمی کوردستان، کۆبوونەوەی هەفتانەی خۆی بە سەرۆکایەتی مەسرور بارزانی و قوباد تاڵەبانی ئەنجام دەدات.  کۆبوونەوەکە لەبارەی چەند پرسێکی جیاواز دەبێت و باس لە دوا هەنگاوەکانی هەماهانگی و هاوکاری نێوان حکومەتی عێراقی فیدراڵ و حکومەتی هەرێمی کوردستان لە پێکهێنانی هێزی هاوبەش و دابینکردنی پێداویستییەکانی پێشمەرگە. هەروەها تاوتوێی پرسی ئامادەکاری وەزارەتە پەیوەندیدارەکان سەبارەت بە بڕیارەکانی کۆبوونەوەی لیژنەی باڵای ڕووبەڕووبوونەوەی ڤایرۆسی کۆرنا و تۆمارکردنی پێنج حاڵەتی ئۆمیکڕۆن لە هەرێمی کوردستان، دەکرێت.  لە ڕاگەیاندنەکەدا هاتووە، بەشێکی کۆبوونەوەکەش سەبارەت بە دەرەنجامی کاری تیمی هاوبەشی هەردوو دیوانی چاودێری دارایی حکومەتی فیدراڵ و هەرێمی کوردستان دەبێت.  ئەوەشی خستەڕوو، لە کۆبوونەوەکەدا گفتوگۆ لەسەر چەند بابەتێکی دیکەی تایبەت بە ناوخۆی هەرێمی کوردستان دەکرێت.