هاوڵاتی بەوتەی جێگری پارێزگاری هەولێر شەوی رابردوو نزیكەی 100 كەس لە یانەیەكی شەوانەی شارەكە دەستگیركراون، كە نزیكەی 73 كەسیان كچن و پەیوەندییان بە باندێكی لەشفرۆشییەوە هەبووە. هێمن قادر، جێگری پارێزگاری هەولێر لەلێدوانێكدا بە هاوڵاتی ڕاگەیاند: لەماوەی رابردودا ئێمە وەك پارێزگای هەولێر بڕیارێكماندا و چەند خاڵێكمان دیاریكرد، لەبڕیارەكەدا باسمان لەوەكردبوو ناكرێت یانەكانی شەوانە وەك پێویست مامەڵە نەكەن لەگەڵ ئەو مۆڵەتەی كە هەیانە، چونكە ئەگەر بەدەر لەو مۆڵەتە كاربكەن یان سەرپێچی بكەن لەڕووی تەندروستی، ئادابی گشتیی، ئەمنی و شارەوانییەوە رووبەڕوی رێكاری یاسایی دەبنەوە. جێگری پارێزگاری هەولێر ئاماژەی بەوەشكرد: ئەوەی شەوی رابردوو كراوە لەچوارچێوەی جێبەجێكردنی رێنماییەكان و بڕیارەكانی لیژنەی ئەمنیدا بووە لەسنوری پارێزگای هەولێر و بە بڕیاری پارێزگای هەولێرووە. هێمن قادر وتیشی: هەڵمەتەكە بەردەوام دەبێت و هەموو ئەو شوێنانە دەگرێتەوە كە پێچەوانەی بڕیارەكانی پارێزگای هەولێر، بەڕێوەبەرایەتییەكانی تەندروستی، رۆشنبیری، ئەمنی و هەمو شوێنە تایبەتمەندەكان مامەڵە دەكەن. جێگری پارێزگاری هەولێر دەشڵێت: هەر یانەیەكی شەوانە، هۆتێل و ریستۆرانتێك بەپێچەوانەی رێنماییەكان كاربكات، لێپرسینەوەی پێویستی لەگەڵدا دەگیرێتەبەر هەر لە داخستنی و غەرامەكردنی شوێنەكە تا وەرگرتنەوەی موڵەتەكەی.
هاوڵاتی سەندیکای رۆژنامەنوسانی کوردستان رایگەیاند:" لە ساڵی 2021دا 187 پێشێلکاری بەرامبەر رۆژنامەنوسان لەهەرێمی کوردستان و ناوچە کێشەلەسەرەکان تۆمارکراون، لەو ژمارەیەش زۆرترین پێشێلکاری بەرامبەر رۆژنامەنوسان لەهەولێر تۆمارکراون کە 33 حاڵەت بوە. سەندیکای رۆژنامەنوسانی کوردستان راپۆرتی ساڵای خۆی لەسەر پێشێلکاری بەرامبەر رۆژنامەنوسان بڵاوکردەوە و رایگەیاند، ساڵی رابردو 187 پێشێلکاری بەرامبەر رۆژنامەنوسان لەهەرێمی کوردستان و ناوچە کێشەلەسەرەکان تۆماکراوە کە بەم شێوەیە بوە دەستگیرکردن 17 حاڵەت، ڕێگەنەدان بە روماڵ 31 حاڵەت، هێرش و سوکایەتی 22 حاڵەت، لێدان 5 حاڵەت، هەڕەشە 2 حاڵەت و داخستنی نوسینگە و كەناڵیش 3 حاڵەت بوە. ئەوەش هاتوە، زۆرترین پێشێلکاری بەرامبەر رۆژنامەنوسان لەپارێزگای هەولێر تۆمارکراوە کە 33 حاڵەت بوە، کەمترینیش لە پارێزگای هەڵەبجە بوە کە یەک حاڵەت تۆمارکراوە. سەندیکای رۆژنامەنوسانی کوردستان دەڵێت، "سەرباری ئەوەی پێشێلکارییەکان بەردوامن، بەڵام هەست بەجۆرو بونی زیاتری پێشێلکاری دەکرێت کەهەندێک رۆژنامەنوس سکاڵای لەسەر تۆمارناکەن، وەیان لەبەر ئەوەی لەراپۆرتەکانی پێشوتر ئەوجۆرانە بە پێشێلکاری نەناسێنراون یاخود کورتی راپۆرتەکە وایکردوە زۆرتر نەچنە قوڵایی پێشێلکاریەکان. بۆیە ئومێد دەکەین ئەم راپۆرتە ببێتە هاندەرێک بۆ رۆژنامەنوسان تاکو چاوکراوەتربن لەو پێشێلکاریانەی بەرامبەریان دەکرێت"
هاوڵاتی وەزیری سامانە سرووشتییەکانی هەرێمی کوردستان ڕایگەیاند:" ئێستاش لەسەر بەڵێنەکەی خۆم سوورم، ئەستەمە دەرفەت بدەمە کەسێک دینارێک بێ حەق لە میزانییەی وەزارەت و پارەی ئەم خەڵکە بخوات". کەمال ئەترووشی، وەزیری سامانە سرووشتییەکانی هەرێمی کوردستان لە زاخۆ لە كۆنگرەیەكی ڕۆژنامەوانیدا رایگەیاند: "ئێمە هاتووین بۆ زاخۆ بۆ ئەوەی وەک وەزارەت هاوکاری ئەم شارە بکەین، زاخۆش ناوچەیەکە بۆ نەوت زۆر گرنگە. ئەو کۆمپانیایانەی لێرە لە بواری نەوت کار دەکەن پێویستە خزمەتگوزاری پێشکێشی زاخۆ بکەن." کەمال ئەترووشی لە بەشێکی دیکەی قسەکانیدا ئاماژەی بەوەدا کە ئامانجی ئەوان لەو سەردانە بۆ ئەوەبووە کە دەستی کار زیاتر بکەن و گەنجان دابمەزرێنن و خزمەتگوزاریش پێشکێشی شارەکە بکەن، راشیگەیاند "لە زاخۆ وەبەرهێنانێکی باش هەیە لە بواری نەوتدا، ئەمڕۆ بە پاڵپشتی جەنابی سەرۆکوەزیرانی هەرێمی کوردستان لێرەیەن و بڕیارمانداوە کە ئیدارەیەکی بەهێز لەبواری نەوت و کانزا لە زاخۆ بکەینەوە. ئێمەش وەک وەزارەتی سامانە سرووشتییەکان لە خزمەتی ئەو ئیدارەیەدا دەبین." لەبارەی کۆمپانیای رووسنەفت لە زاخۆ، د. کەمال ئەترووشی وتی "رووسنەفت کۆمپانیایەکی گەورەیە و چەندین ساڵە گرێبەستی هەیە لەگەڵ سامانە سرووشتییەکان، لە چەند بلۆکێکدا کاری خۆی کردووە و نەوتی لە چەند کێڵگەیەک دەرهێناوە." لەبارەی کێشەی بەنزین لە زاخۆ کە لیتری بە 800 بۆ 850 دینار دەفرۆشرێت، وەزیری سامانە سرووشتییەکان رایگەیاند "رێککەوتنی ئێمە لەگەڵ حکومەتی عێراق ئەوەبوو کە مانگانە ملیۆنێک و 80 هەزار لیتر بەنزین بە کوالیتییەکی باش بنێرێت. ئێمە قەیرانێکی گەورەمان هەبوو و بەنزین لە وڵاتانی دراوسێ راگیرا. دوای ئەوەی چوومە بەغدا لەگەڵ وەزیری نەوتی عێراق قسەمان کرد کە مانگانە ئەو ملیۆن و 80 هەزار لیترە بنێرنە هەرێمی کوردستان، بەڵام وەک دیارە کێشەی تەکنیکی و کێشەی دیکە هەن کە ناردنی ئەو بڕەی بەنزین بەردەوام نەبوو، ئەو بڕە بەنزینەی عێراق دەینێرێت بە دڵنیاییەوە بەشی کوردستان ناکات، بەڵام ئەگەر بێت و بڕی ئەو بەنزینە لە عێراق زیاتر بێت و لە کوردستان رێژەی بەرهەمهێنان زیاتر بێت رەنگە دۆخەکە باشتر بێت." سەبارەت بە نەوتی زاخۆ کە رێژەیەکی زۆری نەوتی تێدایە کەمال ئەترووشی دەڵێت "بەڵێ پێویستە خزمەتی ئەو شارە بکرێت و ئەولەویەتیش بۆ زاخۆ دەبێت و ئەوە باوەڕی منە بۆ ئەم شارە. ئەگەر بێت و لێکتێگەیشتنێک هەبێت لەنێوان کۆمپانیای بەرهەمهێنان و ئیدارەی شارەکە دەبێت ئەولەویەت بۆ دامەزراندن و کارکردن و دامەزراندنی گەنجان بێت بۆ شارەکە." لەبارەی ئەو قسەیەی کە پێشتر وتبووی کە "هەر کەسێک لە وەزارەتەکەی ئەو گەندەڵی بکات 100 پارچەی دەکات" د. کەمال ئەترووشی دەڵێت "ئێستاش لەسەر بەڵێنەکەی خۆم سوورم، ئەستەمە دەرفەت بدەمە کەسێک دینارێک بێ حەق لە میزانییەی وەزارەت و پارەی ئەم خەڵکە بخوات. ئەوە 11 مانگە لەو وەزارەتەم، سیستەمێک لەنێو وەزارەت هەبوو، بەڵام کاتی دەوێت و لای منیش ئەوە هەیە و رەنگە هەموو کەسێک بزانێت کە هەرگیز نابێت گەندەڵی هەبێت. لەبەرئەوە تاوەکو ئەو سیستەمەی هەیە دەگۆڕێت کات و ستافێکی باشی دەوێت. بە چەند مانگێک ئەو کارە ناکرێت بەڵام شەو و رۆژ کاردەکەم بۆ باشترکردنی." دابەشکردنی نەوتی سپی بەسەر هاونیشتمانییاندا لە چەند شوێنێکی هەرێمی کوردستان بەردەوامە، وەزیری سامانە سرووشتییەکان گوتی " سەردانی ئەو ماڵانە دەکەم کە نەوتی سپیان بەسەردا دابەشنەکراوە، راستە درەنگ نەوتەکە هات و ئەوەش بە دەستی وەزارەتی بوو و لە دەستی وەزیری نەوتی عێراقدایە." ماوەی سێ رۆژە کەمال ئەترووشی وەزیری سامانە سرووشتییەکانی هەرێمی کوردستان لە سنووری پارێزگای دهۆکە، رۆژی سێشەممە بەردی بناخەی پرۆژەیەکی دانا و 7 پرۆژەیشی کردنەوە. هەروەها سەردانی ئەو شوێنانە دەکات کە نەوتی سپیان بۆ نەچووە.
هاوڵاتی کۆمپانیای دانەگازی ئیماراتی رایگەیاند:" ئاستی بەرهەمهێنانی گازی سرووشتی لە کێڵگەی کۆرمۆر بە رێژەی لە 50٪ زیادیکردووە". کۆمپانیای دانەگاز بە هاوبەشی "نەوتی هیلال" رایگەیاند، "ئاستی بەرهەمهێنانی رۆژانەی گازی سرووشتییان لە کێڵگەی کۆرمۆر لە چەمچەماڵ بە بەروارد بە ساڵی 2018 بە رێژەی لە 50٪ زیادکردووە". لە بەشێکی دیکەی راگەیێندراوەکەدا هاتووە، "ئاستی بەرهەمهێنانی رۆژانەی کێڵگەکە گەیشتووەتە 452 ملیۆن پێ سێجا لە کاتێکدا لە ساڵی 2018دا بەرهەمهێنانی رۆژانەیان لە کێڵگەکە 305 ملیۆن پێ سێجا بووە". دانەگاز راشیگەیاند، "پڕۆژەیەکی تایبەتمان هەیە بۆ فراوانکردنی بڕی گازی بەرهەمهێنراو لە کێڵگەی کۆرمۆر و پێشبینی دەکەین لە ساڵی 2023دا ئاستی بەرهەمهێنان بۆ 700 ملیۆن پێ سێجا بەرز بکەینەوە". بەرزکردنەوەی ئاستی بەرهەمهێنانی گاز لە کێڵگەی کۆرمۆر لە دوای ئەنجامدانی چەند پرۆسەیەکی باشترکردن لە میکانیزمی بەکاربردنی نێو کێڵگەکانەوە هات کە تایبەتن بە شێوازی چارەسەرکردنی گاز، لەوانەش پڕۆژەیەکی هەموارکردنەوە لە ساڵی 2020 و پڕۆژەی لابردنی گیروگرفتەکانی خنکان و پەنگخواردنەوە کە لە ساڵی 2018دا ئەنجامدرا. کۆمپانیاکانی دانەگاز و نەوتی هیلال لە بری هاوپەیمانێتیی "پیرل پیترۆلیۆم"، لە هەردوو کێڵگەی کۆرمۆر و چەمچەماڵ کار دەکەن و گازی پێویست بۆ بەرهەمهێنانی کارەبا لە هەرێمی کوردستان دابیندەکەن، هەروەها زیاتر لە 16 هەزار بەرمیل لە " پێکهاتە چڕکراوەکان" و رۆژانە هەزار تۆن لە گازی سرووشتی شل بەرهەمدەهێنن.
هاوڵاتی ئەمڕۆ، ئەنجومەنی وەزیرانی هەرێمی کوردستان، کۆبوونەوەی هەفتانەی خۆی بە سەرۆکایەتی مەسرور بارزانی و قوباد تاڵەبانی ئەنجام دەدات. کۆبوونەوەکە لەبارەی چەند پرسێکی جیاواز دەبێت و باس لە دوا هەنگاوەکانی هەماهانگی و هاوکاری نێوان حکومەتی عێراقی فیدراڵ و حکومەتی هەرێمی کوردستان لە پێکهێنانی هێزی هاوبەش و دابینکردنی پێداویستییەکانی پێشمەرگە. هەروەها تاوتوێی پرسی ئامادەکاری وەزارەتە پەیوەندیدارەکان سەبارەت بە بڕیارەکانی کۆبوونەوەی لیژنەی باڵای ڕووبەڕووبوونەوەی ڤایرۆسی کۆرنا و تۆمارکردنی پێنج حاڵەتی ئۆمیکڕۆن لە هەرێمی کوردستان، دەکرێت. لە ڕاگەیاندنەکەدا هاتووە، بەشێکی کۆبوونەوەکەش سەبارەت بە دەرەنجامی کاری تیمی هاوبەشی هەردوو دیوانی چاودێری دارایی حکومەتی فیدراڵ و هەرێمی کوردستان دەبێت. ئەوەشی خستەڕوو، لە کۆبوونەوەکەدا گفتوگۆ لەسەر چەند بابەتێکی دیکەی تایبەت بە ناوخۆی هەرێمی کوردستان دەکرێت.
عەزیزعەمار ژنانی کۆبانێ کە سەر بە ئاسایشی رۆژئاوای کوردستانن کچێکی ئێزدیدی لە دەستی داعش رزگاردەکەن و رادەستی خانی ئێزیدی لە رۆژئاوا دەکەن. خدر دێرو ، چاڵاکوانی ئێزیدی لەشاری دهۆک بە هاوڵاتی ی وت"ئەمڕۆ ژنانی کۆبانێ کە سەر بە ئاسایشی رۆژئاوای کوردستانن، کچێکی ئێزدیدی بەناوی رۆزا ئەمین بەرەکات، تەمەن 19ساڵ لە ژێر دەستی داعش رزگاردەکەن و رادەستی خانی ئێزیدی لە رۆژئاوا دەکەن". خدر دێرو وتیشی"ئەمە دەبێتە یەکەم کچ کەلە ساڵی 2022 لە ژێر دەستی داعش رزگارکرابێت". بەپێی زانیاریەکان دوای رۆژێکی تر لەرۆژئاواوە رەوانەی هەرێمی کوردستان وکەس وکاری دەکرێتەوە، هێشتا نازانرێت خەڵکی چ ناوچەیەکی شەنگالە. ئه‌مه‌ش له‌کاتێکدایه تاوەکۆ ئێستا زیاتر لە 3هەزار و 500کچ و ژنی ئێزیدی لە ژێر داعش رزگارکراون، زیاتر لە 2هەزار کەسی ترهێشتا چارەنوسیان دیارنیە
هاوڵاتی 59 دادوەر و داواکاری گشتی لە بەردەم سەرۆکی ئەنجوومەنی دادوەری هەرێمی کوردستان سوێندی یاساییان خوارد كه 29 ئافره‌ت هه‌ن كه 19یان وه‌ك دادوه‌ر و 10ی دیكه‌شیان وه‌ك ئه‌ندامی داواكاری گشتی له دادگەكانی تێهه‌ڵچوونه‌وه‌ی پارێزگاكانی هه‌رێمی كوردستان ده‌ستبه‌كار ده‌بن. وەزارەتی دادی حکومەتی هەرێمی کوردستان لە راگەیێندراوێکدا ئاماژەی بەوە کردووە، دادوه‌ر و داواکارانی گشتی، لە بەردەم دادوەر عەبدولجەبار عەزیز حەسەن، سه‌رۆكی ئه‌نجوومه‌نی دادوه‌ری هه‌رێمی كوردستان سوێندی یاساییان خواردووە. دوای بڕیاری ئه‌نجوومه‌نی دادوه‌ری ژماره (71 له 1/12/2021) پاڵپشت به فه‌رمانی هه‌رێمی ژماره (272)ی ساڵی 2021 و بەپێی نووسراوی سه‌رۆكایه‌تیی هه‌رێمی كوردستان/ دیوان ژماره (د-1099 له 5/9/2021) و به‌دیكردنی گشت مه‌رجه‌كانی یاسایی، ئه‌نجوومه‌نی دادوه‌ری بڕیاری دابوو به دامه‌زراندنی 47 دادوه‌ر بۆ دادگەكانی تێهەڵچوونه‌وه‌ی هه‌ولێر، سلێمانی، دهۆك و كه‌ركووك-گه‌رمیان و ئه‌مڕۆ سێشەممە 11-01-2022 رێوڕه‌سمی سوێندخواردنیان به‌ڕێوه‌چوو. وەزارەتی داد ئاماژەی بەوەکردووە، له رێوڕه‌سمه‌كه‌دا جێگرانی سه‌رۆكی ئه‌نجوومه‌نی دادوه‌ری، ئه‌ندامانی دادگەی پێداچوونه‌وه، سه‌رۆكی دادگەكانی تێهه‌ڵچوونه‌وه‌ی هه‌ولێر، سلێمانی، دهۆك و كه‌ركووك- گه‌رمیان، سه‌رۆكی داواكاری گشتی، بریكاری وه‌زاره‌تی داد و بەڕێوه‌به‌ری په‌یمانگه‌ی دادوه‌ری ئاماده‌بوون. لەوبارەوە ئەنجوومەنی دادوەریی هەرێمی کوردستان ئاماژەی بەوەکردووە، له‌نێو دادوه‌ر و ئه‌ندامانی داواكاری گشتی، 29 ئافره‌ت هه‌ن كه 19یان وه‌ك دادوه‌ر و 10ی دیكه‌شیان وه‌ك ئه‌ندامی داواكاری گشتی له دادگەكانی تێهه‌ڵچوونه‌وه‌ی پارێزگاكانی هه‌رێمی كوردستان ده‌ستبه‌كار ده‌بن. ده‌ستبه‌كاربوونی دادوه‌ر و داواكارانی گشتیش دوای ته‌واوكردنی خولی سێیه‌می په‌یمانگه‌ی دادوه‌رییه كه به‌پێی پێویستی ناوچه جیاجیاكانی هه‌رێمی كوردستان به دادوه‌ر و ئه‌ندامی داواكاری گشتیی دابه‌شكراون، به شێوه‌یه‌ك دادگەی تێهه‌ڵچوونه‌وه‌ی هه‌ولێر 12 دادوه‌ر، دادگەی تێهه‌ڵچوونه‌وه‌ی سلێمانی 17 دادوه‌ر، دادگەی تێهه‌ڵچوونه‌وه‌ی دهۆك 9 دادوه‌ر و دادگەی تێهه‌ڵچوونه‌وه‌ی كه‌ركووك-گه‌رمیان 9 دادوه‌رن. هه‌روه‌ها دابه‌شكردنی ئه‌ندامانی داواكاریش گشتیش كه ژماره‌یان 12 ئه‌ندامی داواكاری گشتییه، له رێگه‌ی سه‌رۆكایه‌تیی داواكاری گشتیی هه‌رێمی کوردستان ده‌بێت.
مەسعود بارزانی سەرۆكی پارتی دیموكراتی كوردستان، لەپەیامێكدا ڕایگەیاند، تەنیا لێدوانی وتەبێژی فەرمی حزبەكەی ڕای پارتییە، ئەویش دوای وتەیەكی فازڵ میرانی سكرتێری مەكتەبی سیاسی پارتی دێت كە وتی كۆبونەوەی پەرلەمانی عێراق كاریگەری لەسەر پەیوەندی یەكێتی و پارتی دەبێت. مەسعود بارزانی سەرۆكی پارتی دیموكراتی كوردستان پەیامێكی بڵاوكردەوە و رایگەیاند: "هەر جۆرە لێدوان و بۆچوونێكی لابەلا و لەژێر هەر ناو و نیشانێك بێت، پەیوەندی بە سیاسەتی پارتییەوە نییە، دەشڵێت، تەنیا لێدوانی وتەبێژی پارتی گوزارشت لە سیاسەت و هەڵوێستی فەرمیی حزبەكە دەكات". مەسعود بارزانی لەپەیامەكەیدا ئەوەشی خستەڕوو:" لەماوەی رابردوودا لە راگەیاندن و تۆڕە كۆمەڵایەتییەكان هەندێ لێدوان و بۆچوون بڵاوكراونەتەوە كە زۆرجار وەك هەڵوێست و رای پارتی دیموكراتی كوردستان لێكدانەوەی بۆ كراوە". هەر لە پەیامەكەی مەسعود بارزانیدا هاتووە: "لێرەدا بە گشت لایەك رادەگەیەنین كە هەر جۆرە لێدوان و بۆچوونێكی لابەلا و لەژێر هەر ناو و نیشانێك بێت، پەیوەندی بە سیاسەتی پارتییەوە نییە ، با وەك رای فەرمیی پارتی دیموكراتی كوردستان هەژمار نەكرێت، تەنیا، لێدوانی وتەبێژی فەرمیی پارتی دیموكراتی كوردستان تەعبیر لە سیاسەت و هەڵوێستی فەرمیی پارتی دیموكراتی كوردستان دەكات". وتەكانی سەرۆكی پارتی لەكاتێكدایە دوێنێ فازڵ میرانی، سكرتێری مەكتەبی سیاسی پارتی دیموكراتی كوردستان، دوێنێ رایگەیاند: "ئەو جیاوازی و ناكۆكییەی لەنیوان یەكێتی و پارتی لە بەغداد روویدا بۆ ماوەیەكی كاتی كاریگەری خراپی لەسەر پەیوەندیەكانی هەردوولا دەبێت و وتیشی سیاسەت بەجۆرێكە كە تا هەمیشە لایەنی بەرامبەر هاوڕێت نابێت". مازڵ میرانی وتیشی: "هیوادارم ئەم ناكۆكییە لە بەغداد روویدا لەنێوان یەكێتی و پارتی بۆ هەمیشە نەبێت و ماوەیەكی درێژ نەخایەنێت." دوای ئەوەی پارتی رێككەوتنی لەگەڵ رەوتی سەدر و سونییەكان ئەنجامدا و كاندیدی پارتی بۆ جێگری سەرۆكی پەرلەمان هەڵبژێردرا، یەكێتی ناڕەزایی خۆی لە پرۆسەكە نیشاندا، لەدواین كۆبوونەوەی مەكتەبی سیاسیی یەكێتیشدا وەك رێزان شێخ دلێر راوێژكاری مەكتەبی سیاسی یەكێتی ئاشكرایكردووە ئەوەیان یەكلا كردووەتەوە كە بەرهەم ساڵح كاندیدی یەكێتی دەبێت بۆ پۆستی سەرۆك كۆماری عێراق. پێشتریش هۆشیار زێباری، ئەندامی مەكتەبی سیاسی پارتی دیموكراتی كوردستان، لە بەغداوە بە میدیای پارتی ڕاگەیاندبوو: "دوای دانیشتنی یەكەمی پەرلەمان شتی تریش ماوە، دەبێت هاوكار بین ئاگامان لە یەكتر بێت، پابەندبین و مەغرور نەبین و لەگەڵ لایەنە كوردستانییەكانیش هاوكار و هەماهەنگ بین".
هاوڵاتی چەند مانگێك لەمەوبەر وەزیری سامانە سروشتیەكانی حكومەتی هەرێم وتی خۆی ماڵ بە ماڵ دەگەڕێت و دڵنیا دەبێتەوە لەوەی هاوڵاتیان نەوتیان بەسەردا دابەش كراوە و ناگاتە وەرزی سەرما دەبێت هەموو هاوڵاتیان نەوت وەربگرن. بەڵام دوای نزیكەی دوومانگ لەدەركەوتنەوەی لەو بەڵێنەی پەشیمان بوویەوە كە وتی ماڵ بەماڵ دەگەڕێت تا دڵنیا بێت نەوتیان بەسەردا دابەش كراوە، دوێنێ وەزیری سامانە سروشتیەكانی حكومەتی هەرێم ئەمجارەیان وتی دواكەوتنی دابەشكردنی نەوت لەدەستی ئەواندا نییە. ئەمڕۆش وەزیری سامانە سرووشتییەكانی حكومەتی هەرێمی كوردستان لەمیانی سەردانێكیدا بۆ پارێزگای دهۆك رایگەیاند: ئەو نەوتەی ئێستا لە سنووری پارێزگای دهۆك بە 90 هەزار دینار دابەشدەكرێت لە بەغداوە هاتووە و ئێمە پێشتر 100 ملیۆن لیترمان بەسەر هاوڵاتیان دابەشكردووە. وتیشی: ئەو نەوتەی حكومەتی هەرێمی كوردستان دابەشی دەكات بە 55هەزار دینارە، بە فەرمانی جەنابی سەرۆكوەزیران چوومە بەغدا، ئەمەش بۆ ئەوەی نەوت بەسەر هەموو هاووڵاتیان دابەشبكەین، ئەوەی ئەمڕۆش بە 90 هەزار لە هەرێمی كوردستان دەفرۆشرێت لە هەموو عێراق بە هەمان نرخ دەفرۆشرێت و ئەوە بەغدا دابینی كردووە. وتەكانی وەزیری سامانە سروشتیەكان لەكاتێكدایە، پێشتر هەر ئەو وەزیرە ڕایگەیاند: نەوتی سپی بە 55 هەزار بەسەر هەموو هاوڵاتیاندا دابەش دەكەین، بەڵام سەرەڕای ئەوەی نەوتەكە چەند مانگێكە بە سستی دابەش دەكرێت لەكۆتایشدا نرخی زیادیكرد. حكومەتی هەرێمی كوردستان، رۆژانە زیاتر لە 400 هەزار بەرمیل نەوت دەفرۆشێت و غاز و كارەباش بۆ بەشێك لە شارەكانی ناوەڕاست و خوارووی عێراق دەنێرێت، بەڵام دوای چەندین ساڵ نەیتوانیوە قەیرانی سوتەمەنی و كارەبا چارەسەر بكات. بەهۆی سستی دابەشكردنی نەوتی سپی بەسەر ماڵاندا،لە 23/12/2021 لەیەك خێزان لەگوندی قوبكێی ئاكرێ دایكێك و چوار منداڵی بەهۆی ئەوەی نەوتیان نەبوو گیانیان لەدەستدا، ئەوان بەخەڵوز كە كردبوویانە تەنەكەوە ویستبوویان خۆیان گەرم بكەنەوە بەڵام غازی خەڵوزەكە كۆتایی بە ژیانیان هێنا.
هاوڵاتی ئه‌ندامی ئه‌نجومه‌نی باڵای سیاسی و به‌رژه‌وه‌ندی یه‌كێتی رایگەیاند:" نازانن ئەم خانەقینە، ئەم گەرمیانە، ئەم پێشمەرگە و شۆڕشگێڕێتییە، چۆن دڵۆپ دڵۆپ بەئارەق، هەویرەكەیمان شێلاوە دڵۆپ دڵۆپیش بەخوێن، تەلاری ئەم شۆڕشەمان بونیاد ناوە". مەلا بەختیار له‌میانی وتارێكدا له چله‌ی ماڵئاوایی مامۆستا موحسین عەلی ئەكبەر، لە شاری خانەقین رایگه‌یاند، "ئاسانە مرۆڤ، قسە لەسەر كەسایەتییەك بكات، نرخی خۆی لەژیاندا نەزانێ، زۆریشن لەوانەی كە نرخی خۆیان لەژیاندا نازانن و رۆژانە لەو نرخەیان بە بەلاش دەفرۆشن، بەڵام ئێجگار گرانە، قسە لەسەر كەسایەتییەك بكەیت، لە منداڵییەوە، تا دوا چركە، نرخ و ژیانی خۆی، كەسوكارو شارەكەیی و باوەڕەكەیشی زانیبێت‌و وەكو گەوهەر و مرواریش ئەو نرخە بپارێزێ، كۆی بكەیتەوەو لەكەسایەتی خۆشتدا بەرجەستەی بكەیت! كە مامۆستا موحسین یەكێكە لەوانە". ئه‌ندامی ئه‌نجومه‌نی باڵای سیاسی و به‌رژه‌وه‌ندی یه‌كێتی ئاماژه‌ی به‌وه‌شكردوه، "مامۆستا موحسین، دەریایەك بو لەو مروارییە جوانانەی وەفا، پڕ لەمروارییە جوانەكانی جوامێری، راستگۆیی، پاكی، تێكۆشان، شیعر، هونەر، زمانەكان، خۆشنوسی، وێنە، كۆڵنەدان‌و ئەو پەڕی دڵسۆزیش بۆ كوردستان و بەوەفا بۆ خانەقین، ئەم مروارییانە لەناو دەریای مامۆستا موحسین-دا بون". مەلا بەختیار باسی له‌وه‌شكرد، "كێشەی مامۆستا، هەرگیز ئەوەنەبوە تێبكۆشێ، تێكۆشاوە، قەتیش ئەوەنەبوە كۆڵنەدا، كۆڵی نەداوە، هەرگیزیش ئەوە نەبوە بە بەردەوامی خۆی پەروەردە بكات، خۆی پەروەردە كردوە، بەڵكو كێشەی مامۆستا موحسین ئەوەبو، نەیدەتوانی باسی خۆی بكات، شەرمی دەكرد لەئاست خزمەت‌و تێكۆشاندا، خۆی لەبیربێ، ئەوەندەی گەلەكەی، هاوسەنگەرەكانی، كوردستان، كوردایەتی لەبیر بو، ئەوەندەی بیری لە شەهیدەكان و كاروانی شەهیدانی كوردستان دەكردەوە، هەمیشە خۆی لەبیر دەچوه‌وە، هەربۆیە هیچ كەس نەیبیستووە، رۆژێك مامۆستا موحسین، باسی بەسەرهاتێكی خۆی، شەڕو ئازایەتییەكانی خۆی بكات، هیچ كەس نەیبیستوە، رۆژێك لە رۆژان، خودی خۆی زاڵبكات بەسەر پرسە رەواكەی، كوردستانەكەی، خانەقینەكەی‌و حزبەكەیدا".
هاوڵاتی وەزیری سامانە سرووشتییەکانی هەرێمی کوردستان رایگەیاند:" ئەو نەوتەی ئێستا لە سنووری پارێزگای دهۆک بە 90 هەزار دینار دابەشدەکرێت لە بەغداوە هاتووە و دەشڵێت "ئێمە پێشتر 100 ملیۆن لیترمان بەسەر هاونیشتمانییان دابەشکردووە و ئەوەی ماوەتەوە لەلایەن بەغداوە بۆ هاونیشتمانییان هاتووە." رۆژی سێشەممە 1-11-2022 د. کەمال ئەترووشی، وەزیری سامانە سرووشتییەکانی هەرێمی کوردستان سەردانی پارێزگای دهۆکی کرد و بەردی بناخەی پرۆژەیەکی دانا و 7 پرۆژەی کردەوە. وەزیری سامانە سرووشتییەکانی هەرێمی کوردستان وتی "هاتنی من بۆ ئەم ناوچەیە یەکەم سەردانە، دەمەوێت چەندین شت بەیەکەوە بکەم و دڵنیابم کە خەڵکی ئێمە نەوتی سپی وەرگرتووە، هەروەها دەزانن کە قەیرانی نەوتی سپی و بەنزین قەیرانێکی زەحمەتە و بە هەموو توانایەکەوە ئامادەین چارەسەری بکەین، بەڵام ئێمەش لە دۆخێکداین. ئەو نەوتەی کە دابەشکراوە لە زاخۆ و ئامێدی و وەک بەڵێنیشم داوە دەبێت بەزووترین کات نەوتی سپی بگەیێنمە ئەم گوندانەی کە ماون. بۆیە من هاتم ئەو گوندانەم بینی و بە دادپەروەریش نەوتەکە دابەشکراوە." لە بەشێکی دیکەی قسەکانیدا ئاماژەی بەوەدا "کۆمپانیای نەوتمان هەیە لە شێخان و ئەترووش و سەرسنگ کاردەکەن، من هاتم سەردانی ئەوانم کرد تاوەکو بزانم کە کێشەی بەرهەمهێنان چییە و چۆن وابکەین کە بەرهەمهێنان زیاتر بکەین." سەبارەت بە نرخی نەوتی سپی کە هەر بەرمیلێک بە 90 هەزار دینار دەفرۆشرێت، وەزیری سامانە سرووشتییەکانی هەرێمی کوردستان گوتی "ئەو نەوتەی حکومەتی هەرێمی کوردستان دابەشی دەکات بە 55 هەزار دینارە، بە فەرمانی جەنابی سەرۆکوەزیران چوومە بەغدا، ئەمەش بۆ ئەوەی نەوت بەسەر هەموو هاووڵاتیان دابەشبکەین، ئەوەی ئەمڕۆش بە 90 هەزار لە هەرێمی کوردستان دەفرۆشرێت لە هەموو عێراق بە هەمان نرخ دەفرۆشرێت و ئەوە بەغدا دابینی کردووە. ئێمەش پێشتر 100 ملیۆن لیترمان بەسەر هاونیشتمانییان دابەشکرد، بەڵام ئەوەی حکومەتی عێراقیش ناردی یارمەتییەکی باش بوو، بۆیە ئەمڕۆ ئەوەی ماوەتەوە لە بەغدا هێناومانە و ئەوان بەو نرخە دەیفرۆشن بە هاووڵاتیان." کەمال ئەترووشی، وەزیری سامانە سرووشتییەکانی هەرێمی کوردستان لە کۆنگرە رۆژنامەوانییەکەدا رایگەیاند "ئەو پرۆژانەی دەکرێت بە هەوڵ و ماندووبوونی جەنابی سەرۆکوەزیرانە، بۆیە لەم پرۆژانەشد وەزارەتی سامانە سرووشتییەکان بەشداریی تێدا کردووە." وەزیری سامانە سرووشتییەکان ئاماژەی بەوەدا کە "کۆمپانیایەکی ئەمریکی HKN لە چەمانکێ کار لەسەر دەرهێنانی نەوت دەکات و تاوەکو ئێستا کارێکی زۆرباشیان لەم ناوچەیەدا کردووە، بۆیە ئەم ناوچەیە ناوچەیەکی گرنگە و پرۆژەکانی ئێمەش بە بێ پاڵپشتی ئیدارەی دهۆک سەرکەوتوو نابن." وەزیری سامانە سرووشتییەکان لە بەشێکی دیکەی قسەکانیدا رایگەیاند "ئەو پرۆژانەی ئەمڕۆ کردمانەوە پرۆژەی سەرەکین، ئەو رێگەیە 25 کیلۆمەترییە بۆ نێوان گوندەکان و بۆ هاتووچۆ و خزمەتگوزاری زۆر گرنگە. هەروەها پرۆژەی کردنەوەی قوتابخانەیەکی سەرەتای ئەوەش گرنگە. بەشی ئایتی و تاقیگەیەی باش لەنێو قوتابخانەکەدا هەیە. هەروەها پارکێکمان لە ناوچەکەدا کردووەتەوە و ئەمەش یەکێکی دیکەیە لە پرۆژە گرنگەکان." هەر سەبارەت بە پرۆژەکان کە ئەمڕۆ کراوەتەوە دەشڵێت "پرۆژەیەکی ئاومان گەیاندووەتە ناوچەکە و بۆ هەموو ماڵێک ئاوی پاک دەڕوات، ئەمەش شتێکی زۆر گرنگە. هەروەها بابەتی کار بۆ گەنجان یەکێکی دیکەیە لە کارەکانمان و ئەو کۆمپانیایەی ئێمەش کاریان بۆ 450 کەس رەخساندووە."
هاوڵاتی عه‌لى حه‌مه‌ساڵح ئه‌ندامى په‌رله‌مانى كوردستان له‌لایه‌ن وه‌به‌رهێنه‌رێكى هه‌رێم سكاڵاى له‌سه‌ر تۆمارده‌كرێت و داواى ده‌یان ملیۆن دۆلارى لێده‌كرێت. عه‌لى حه‌مه‌ساڵح ئه‌ندامى په‌رله‌مانى كوردستان ڕایگه‌یاند:" شارى زه‌یتونه كه تۆمه‌تباریان كردوه به هۆكارى لافاوه‌كه‌ى هه‌ولێر سكاڵایان له‌سه‌ر تۆماركردوه‌و داواى قه‌ره‌بوو ده‌كه‌ن. وتیشى، له سكاڵاكه‌دا داواى 37ملیۆن دۆلار كه ده‌كاته 3700 ده‌فته‌ر دۆلار ده‌كه‌ن. له‌كاتى لافاوه‌كه‌ى هه‌ولێر عه‌لى حه‌مه‌ساڵح ئه‌ندامى په‌رله‌مانى كوردستان چه‌ند جارێك ڕایگه‌یاند، به‌شێ:ى هۆكارى دروستبونى لافاوه‌كه‌ى هه‌ولێر به‌هۆى ئه‌وه‌بوه وه‌به‌رهێنه‌رى پرۆژه‌ى شارى زه‌یتونه ڕێڕه‌وى ئاوه‌كه‌ى گۆڕیوه.
ئارا ئیبراهیم حاكم رزگار حەمە ئەمین، یەكێك لە دادوەرانی دادگایكردنی سەدام حوسێن بۆ هاوڵاتی ئاشكرای دەكات كە بیرۆكەی هەیە خۆی بۆ پۆستی سەرۆك كۆمار كاندید بكات. حاكم رزگار حەمە ئەمین، دادوەری داگای پێداچونەوەی هەرێم لەلێدوانێككدا بەهاوڵاتی وت:" فكرەم هەیە خۆم بۆ پۆستی سەرۆك كۆماری عێراق كاندید بكەم". ناوبراو لەبارەی پێشكەش كردنی سی ڤی خۆیەوە، وتیشی:" جارێ هێشتا سیڤیم پێشكەش نەكردووەن بزانن لە چەند رۆژی ئایندە فكرەكەم چی لێ دەكەم". ئەمە لەكاتێكدایە كە یەكێتی نیشتمانی كوردستان بریاری ئەوەی داوە كە بەرهەم ساڵح بۆ خولێكی دیكە بكاتەوە كاندید بۆ پۆستی سەرۆك كۆمار.
هاوڵاتی نیوەرۆی ئەمڕۆ سێشەممە نرخی نەوت بەشێوەیەكی بەرچاو بەرزبونەوەی تۆماركردو بەرمیلێك نەوتی برێنت گەیشتە 82 دۆلارو 11 سەنت. نرخی یەك بەرمیل نەوتی خاوی برێنت ە 82 دۆلارو 11 سەنت مامەڵەی پێوە دەكرێت. هەروەها نرخی نەوتی تەكساس 79 دۆلارو 57 سەنت مامەڵەی پێوە دەكرێت.
هاوڵاتی بەڕێوەبەرایەتی گشتی كەشناسی و بوومەلەرزەزانی هەرێمی كوردستان كەشوهەوای ئەمڕۆ و سبەینێی بڵاوكردەوە و ئاماژە بە بارینی بەفر دەكات. بەپێی پێشبینییەكانی بەڕێوەبەرایەتی گشتی كەشناسی و بوومەلەرزەزانی هەرێمی كوردستان، ئەمڕۆ سێشەممە 11ی كانونی دووەمی 2022ئاسمان هەورو بارانبارین دەبێت، لەگەڵ بەفربارین لە شاخەكان و ناوچە سنوریەكان، دوای نیوەرۆ بەفرزیاتر دەباریت. هەروەها رۆژی چوارشەممە 12 كانونی دووەمی 2022 ئاسمان هەور دەبێت بە درێژایی كاتەكان، لەگەڵ نمەباران لە كاتی جیاجیادا.
.jpg)
