شاسوار عەبدولواحید، لاهوور شێخ جەنگی و ئارام قادر ناتوانن دەنگ بدەن

هاوڵاتی لیژنەی دیوانی چاودێریی دارایی عێراق دوای سەردانەکەی بۆ هەرێمی کوردستان و وردبینی لە لیستی ناو و مووچەدا، چەند تێبینییەکی داوەتە هەرێمی کوردستان. بەپێی زانیارییەکان لیژنەکە رایگەیاندووە "کێشەی مووچە بەیەکجاری چارەسەر دەکرێت". لە 8ی تەممووز، لیژنەیەکی دیوانی چاودێریی دارایی عێراق بۆ وردبینی لە ناو و لیستی مووچەی مووچەخۆران (سەربازی و مەدەنی) سەردانی هەرێمی کوردستانی کرد، بەپێی زانیارییەکانی تۆڕی میدیایی رووداو، لیژنەکە بە هەرێمی کوردستانیان راگەیاندووە، "کێشەیەکی ئەوتۆ نەماوە و بەمزووانە کێشەی مووچە بەیەکجاری چارەسەر دەبێت". لەبارەی کێشەی مووچەی سەربازیشەوە، لیژنەکە بە هەرێمی کوردستانی راگەیاندووە، پێشمەرگەی لیواکانی بەرگری و فریاکەوتن و نەوت و گاز بخرێنە سەر وەزارەتی ناوخۆی هەرێمی کوردستان و یەکەکانی 70 و 80ش بخرێنە سەر وەزارەتی پێشمەرگە. سەرەتای ئەم هەفتەیە، دیوانی چاودێریی دارایی عێراق و هەرێمی کوردستان وردبینییان لە لیستی مووچەی وەزارەتی کارەبا و پەرلەمانی کوردستان تەواوکرد و "هیچ کێشەیەک لە لیستی میلاکات و مووچەی ئەو دوو دامەزراوەیەدا نەبووە".  

هاوڵاتی هێزەکانی پاراستنی گەل - هەپەگە رایدەگەیەنێت، هێزەکانیان داگیرکەری زاب و خاکورکیان کردە ئامانج، هەروەها چوار ئۆتۆمبێلی سەربازییان تێکشکاند. ئەمڕۆ پێنجشەممە 18ی تەموزی 2024، ناوەندی راگەیاندن و چاپەمەنی هێزەکانی پاراستنی گەل - هەپەگە رایگەیاند، "گەریلاکانی ئازادیی کوردستان زنجیرەیەک چالاکییان لە ناوچەکانی خاکورک و هەرێمی شەهید دەلیلی رۆژئاوای زاب دژ بە سوپای تورکیا ئەنجامدا". ئاماژە بەوەکراوە، "رۆژی 15ی تەموزی 2024، لە دوو قۆڵەوە لە ناوچەی سەرکەلی دوو کاروانی سوپای تورکیایان کردە ئامانج، لەو چالاکییەدا دوو زرێپۆشی جۆری کیربی کرانە ئامانج و دوو بارهەڵگری سەربازی تورکیاش تێکشکێندران، بەڵام ژمارەی ئەو سەربازانەی تورکیا دیارنین کە کوژراون". هەر بەپێی راگەیەندراوەکەی هەپەگە بێت، "دوێنێ 17ی تەموز هێزەکانی گەریلا دوو چالاکیان لە هەرێمی شەهید دەلیل لە رۆژئاوای زاب دژ بە سوپای تورکیا ئەنجامدا، گورزی تووندیان لێوەشاندون، هەروەها لە رۆژانی 14 و 17ی تەموز هێزەکانی گەریلا دوو چالاکییان لە ناوچەی خواکورک ئەنجامداوە بەرپەرچی ئەو هێلیکۆپەتەریان داوەتەوە کە هەوڵیانداوە بنکەی سەربازی لە ناوچەکە دابمەزرێنن". لە راگەیەندراوەکەدا هەپەگە ئاماژەی بەو هێرشانە کردووە کە لە رۆژەکانی 17 و 18ی تەموز ئەنجامیان داوە، لە رۆژی 17ی ئەم مانگە تورکیا مەیدانەکانی شەهید شەریف و کۆلێت لە ناوچەی خاکورک سێ جار، گۆڕەپانی دێرش لە ناوچەی کاری جارێک، گۆڕەپانی بەرخۆدان لە گردی بەهار و گردی ئامدە لە ناوچەی شەهید دەلیل لە رۆژئاوای زاب بوون دوو جار بۆردوومان کراوە، بە گشتی شەش جار تورکیا بۆردوومانی ئەو ناوچانەی کردووە". ئەوەش هاتووە، "لە رۆژی 18ی مانگ تورکیا گۆڕەپانی بەرخۆدانی لە گردی بەهار لە ناوچەی شەهید دەلیل لە رۆژئاوای زاب بە فڕۆکە بۆردوومان کردووە، بەهۆی بۆردوومانەکەوە ئاگر لە ناوچەکە کەوتەوە".

هاوڵاتی فەرماندەیی هێزەکانی پاسەوانی سنوور، دەستگیرکردنی هەشت کەسی راگەیاند کە هەوڵی دەربازبوونیان لە ناوچە سنوورییەکانی پارێزگای دهۆک دەدا. ئەمڕۆ پێنجشەممە 18ی تەموزی 2024، فەرماندەیی هێزەکانی پاسەوانی سنوور لە راگەیەندراوێکدا دەستگیرکردنی هەشت کەسی راگەیاند لەلایەن هێزەکانیان لە سنووری پارێزگای دهۆک، کە هەوڵیانداوە بەشێوەیەکی نایاسایی دەربازی سنوور بن. ئەوەشخراوەتەڕوو، "ئەو هەشت کەسەی دەستگیر کراون شەش کەسیان هاووڵاتی بیانین و دوو کەسی دیکەیان رەگەزنامەی عێراقییان هەیە". فەرماندەیی هێزەکانی پاسەوانی سنوور روونیکردووەتەوە، "پەڕاوی لێکۆڵینەوە بۆ دەستگیرکراوەکان کراوەتەوە و ڕێککاری یاسایی پێویست بەرامبەریان گیراوەتەبەر".

هاوڵاتی/ سازگار ئەحمەد حکومەتی هەرێمی کوردستان بە بیانووی کورتهێنان لەو پارەی کە بەغدا ناردوویەتی تەنها مووچەی یەک مانگی بەشێک لە هێزە ئەمنییەکانی دابەشکرد، هەروەها بەشێک لە هێزە ئەمنییەکانیش مووچەکانیان لێی بڕاوە. بەپێی ئەو زانیاریانەی هاوڵاتی وەریگرتووە، ئەمڕۆ پێنجشەممە 18ی تەموزی 2024 بەپێی ئەو خشتەی وەزارەتی دارایی و ئابووریی هەرێمی کوردستان بڵاویکردبووەوە مووچەی دیوانی وەزارەتی پێشمەرگە و یەکەکانی 70 و 80 و لیوا هاوبەشەکان مووچەی هەردوو مانگی چوار و پێنجیان وەرگرت، بەڵام لە دابەشکردنی مووچەدا کێشە هەبوو بەشێک لە هێزەکانی 70 و خانەنشینانی پێشمەرگە تەنها مووچەی مانگی پێنجیان پێدراوە. هەروەها بەپێی زانیارییەکانی هاوڵاتی کە لە چەند سەرچاوەیەکی تایبەت وەریگرتووە، کارمەندانی بەرگریی فریاکەوتن بڕی 100 هەزار و یەکەی پاسەوانی بڕی 60 هەزار دینار لە مووچەکانیان بڕاوە. سەرچاوەیەکی تایبەتیش کە نەیویست ناوێ ئاشکرابکرێت لە هێزەکانی 80 بە هاولاتی راگەیاند، "ئەمڕۆ مووچەمان وەرنەگرتووە و لەکاتێکدا بەپێی لیستەکەی وەزارەتی دارایی بوایە دەبوو ئەمڕۆ مووچەی یەکەی 80 دابەشبکرێت". وەزارەتی دارایی و ئابووریی حکومەتی هەرێمی کوردستان بە بیانووی ئەوەی بڕی 26 ملیار و 790 ملیۆن دینار کورتهێنان لە مووچەی هێزە ئەمنییەکان و پێشمەرگە هەیە کێشەی لە دابەشکردنی مووچەی بەشێک لە هێزە ئەمنییەکان دروستکردووە، چونکە بەغدا دوای وردبینی لە لیستی مووچەی ‌هێزە ئەمنییەکان بەغدا مووچەی هێزەکانی رۆژ و حسێن یەزدان پەنا و هێزە بیانییەکانی بڕی.

هاوڵاتی بەهۆی ئەو کەموکورتی و کەمتەرخەمیانەی لە پڕۆژەیەکەدا هەبوون و بەهۆیەوە کرێکارێک گیانی لەدەستدا، وەزارەتی کار و کاروباری کۆمەڵایەتی بڕیاریدا کارکردن لە پرۆژەکەدا رابگیرێت. ئەمڕۆ پێنج شەممە، 18ی تەمووزی 2024، عوسمان زیندانی سەرۆکی سەندیکای کرێکارانی بیناسازی رایگەیاند، بەهۆی کەمتەرخەمی و نەبوونی مەرجەکانی سەلامەتی تێیدا، کارکردن لەو پرۆژەیەدا راگیرا کە سەرەتای ئەم هەفتەیە کرێکارێک لێیکەوتەخوارەوە و گیانیلەدەستدا. عوسمان زیندانی دەشڵێت، دوای رووداوەکە سەرەتا سەرپەرشتیارانی پرۆژەکە رێگەیان نەدا بچینە شوێنی رووداوەکە، بۆیە دوای ئاگادارکردنەوەی لایەنە پەیوەندیدارەکان لەگەڵ پشکنەرێکی وەزارەتی کار سەردانی شوێنەکەمان کرد، بۆمان دەرکەوت سەرجەم ئاسەوارەکانی رووداوەکەیان نەهێشتووە. سەرۆکی سەندیکای کرێکارانی بیناسازی ئەوەشی ئاشکرا کرد، بەهۆی ئەو کەموکورتیانەی لە شوێنی کارەکەدا هەیە لەگەڵ ئەو کەمتەرخەمیانەی کراوە، وەزارەتی کار و کاروباری کۆمەڵایەتی بڕیاریدا کارکردن لە پرۆژەکەدا رابگیرێت. دەشڵێت، لەگەڵ کەسوکاری قوربانییەکە قسەم کردووە، ئەوان بە نیازن لە دادگا داوای یاسایی تۆماربکەن و داوای مافی کوڕەکەیان بکەن کە بەهۆی کەمتەرخەمی خاوەن پرۆژەکەوە گیانیلەدەستداوە. جێگەی ئاماژەیە، شەممەی رابردوو گۆران ئەکرەم کە کرێکاری بیناسازی بوو، لە کاتی کارکردن لە پرۆژەیەکی نیشتەجێبوون لە سلێمانی لە نهۆمی 40 کەوتەخوارەوە و گیانیلەدەستدا.

مەهران رەمەزان هاوڵاتی، سلێمانی سێ هاوڵاتی لە لایەن تورکیا لە رۆژئاوای کوردستان رفێنران و هۆکاری رفاندنی دوویانیان بۆ کردنەوەی ئاگری نەورۆز دەگەڕێتەوە. ئەمڕۆ پێنج شەممە، 18ی تەمووزی 2024، میدیاکانی رۆژئاوای کوردستان بڵاویانکردەوە، لە 12ی ئەم مانگە دوو گەنج لە گوندی خەلالکا لەلایەن تورکیا رفێنراون و بەڵام دوای وەرگرتنی پارە لە بەرامبەریان ئازادیان کردن و ئێوارەی دوێنێ دووبارە رفێنرانەوە، لەگەڵ ئەوەشدا هاوڵاتییەکی تریش کە تەمەنی 40 ساڵە لە لایەن تورکیاوە رفێنراوەو تا ئێستا بێ سەروشوێنە. بە پێی ئەو زانیارییانەی میدیاکان باسی لێوەدەکەن، سەڵاح رەشید کۆربلوی تەمەن 20 ساڵە و محەمەد خەلیل حاج قەنبەری تەمەن 24 ساڵە لە گوندی خەلالکا لە ناوچەی بلبل و محەمەد حەسەن سیدۆی تەمەن 40 ساڵان لە شاری موباتای سەر بە کانتۆنی عەفرین لە لایەن تورکیاوە رفێنراون. دەشڵێن، هۆکاری رفاندنی ئەو دوو گەنجە بەهۆی کردنەوەی ئاگرى نەورۆزەوە بووە هەرچەندە کە زیاتر لە سێ مانگی بەسەردا رۆیشتووە، بەڵام هۆکاری رفاندنی هاوڵاتییە تەمەن 40 ساڵانەکە تاوەکو ئێستا نازانرێت.

هاوڵاتی نەوزاد شێخ کامیل دەڵێت، هەتا ئێستا 620 هەزار تۆن گەنمی جوتیارانمان وەرگرتوو، کە دەکاتە 90% ئەو پشکەی بەغدا بۆ بۆ هەرێمی کوردستانی دیاری کردووە. ئەمڕۆ پێنجشەممە، 18ی تەمووزی 2024، نەوزاد شێخ کامیل بەڕێوەبەری گشتی بازرگانی لە وەزارەتی بازرگانی و پیشەسازی حکومەتی هەرێمی کوردستان رایگەیاند، تا ئێستا 620 هەزار تۆن گەنمی جوتیارانمان وەرگرتووە، کە دەکاتە لە 90%ی ئەو پشکەی بەغدا بۆ هەرێمی کوردستانی دیاریکردووە. دەشڵێت، رۆژى 20ی ئەم مانگە کۆتا وادەی وەرگرتنی گەنمی جوتیارانی هەرێمە، ئەو بڕەی کە ماوەتەوە تا ئەو کاتە وەری دەگرین. جێگای ئاماژەیە، ماوەی 40 رۆژ دیاریکرابوو بۆ وەرگرتنی 700 هەزار تۆن گەنمی جوتیارانی هەرێم، بەپێی بڕیاری بەغداش دەبێت بۆ هەر تۆنێکی گەنم 850 هەزار دینار بدرێتە جوتیارانی هەرێم.

هاوڵاتی ئامادەکردنی لیستی مووچەی مانگی تەمووزی مووچەخۆرانی هەرێم لە کۆتاییداو رەوانەی بەغدا دەکرێت. ئەمڕۆ پێنجشەممە، 18ی تەمووزی 2024، سەرچاوەیەک لە وەزارەتی دارایی و ئابووری حکومەتی هەرێمی کوردستان رایگەیاند، ئامادەکردنی لیستی مووچەی مانگی حەوت لە کۆتاییدایەوە و رەوانەی بەغدا دەکرێت. دەشڵێت، لە کۆتایی ئامادەکارییەکانی لیستی موچەی مانگی حەوتدان، وردبینی بۆ لیستی موچەخۆران تەواو بووە و بەشیوەی ئەلیکترۆنی ئەمادەیە. ئەوەشی خستۆتەڕوو، ئەگەر هیچ گرفتێکی تەکنیکی دروستنەبێت، بەشیوەی چاپکراویش ئەمڕۆ تەواو دەبیت و رەوانەی بەغدای دەکەین. سەرچاوە، کەناڵ8

مەهران رەمەزان هاوڵاتی، سلێمانی لە 15ی حوزەیران بۆ 15ی تەمووزی ئەمساڵ بەهۆی هێرش و داگیرکارییەکانی دەوڵەتی تورکیا بۆسەر هەرێمی کوردستان، چەندین زیان بەر هاوڵاتییان و سروشتی هەرێمی کوردستان کەوتووە. ئەمڕۆ پێنجشەممە، 18ی تەمووزی 2024، دامەزراوەی میدیای درەو ، زیانە مەدەنییەکانی ئۆپەراسیۆنە نوێیەکەی تورکیای بۆ سەر هەرێمی کوردستان لە 15ی حوزەیران 2024 بۆ 15ی تەمووزی 2024، بڵاوکردەوە و تێدا چەندین ئاماری زیانگەیاندن بە هاوڵاتییان و سروشتی هەرێمی کوردستانی خستۆتەڕوو. بە پێی بەدواداچوونەکانی دەزگای میدیای درەو، لەماوەی یەک مانگدا 9 گوند بەتەواوەتی چۆڵکراون و 184 خێزانیش ئاوەرەبوون و 19 خانووی هاوڵاتییانی مەدەنی رووخێنراون. دەشڵێت، 68 هەزار دۆنم زەوی کشتوکاڵی و دارستان سووتاون. باسی لەوەشکردووە، هێرشەکانی سووپای تورکیا بۆسەر ناوچەکانی هەرێم بۆتە هۆکار لە کارکەوتنی کارەبای گوندی بەری گاری و میسکا و هەروەها کاریگەری خستنەسەر هێڵەکانی پەیوەندی زیاتر لە 110 گوند. درەو ئەوەشی ئاشکرا کردووە، بەهۆی بوردوومانەکانی تورکیا 1 کەنیسە و 1 کارگەی راشیی و 1 ئۆتۆمبێل و 2 سەرچاوەی ئاو وێران بوون. باسی لەوەشکردووە، کە بەهۆی بۆردوومانەکان یەک هاوڵاتی مەدەنی برینداربووە. جێگەی ئاماژەیە، زیاتر لە مانگێکە هێزەکانی سوپای تورکیا هاتوونەتە ناو خاکی هەرێمی کوردستان و بەتایبەتیش سنووری پارێزگای دهۆک و رۆژانەش بە بەردەوامی بۆردوومانی ناوچەکانی ئەم سنوورە دەکات و بۆتە هۆکاری تێکدانی ئارامی گۆمەڵگە و کاریگەی کردۆتە سەر ژیانی ئاسایی هاوڵاتییانی ناوچەکە. بە پێی زانیارییەکان هەر ئەمڕۆ بەهۆی بۆردوومانی سوپای تورکیا بۆسەر شارەدێی شیلادزێ لە سنووری قەزای ئامێدی هاوڵاتییەکی مەدەنی کوژراوە و کەسێکیش برینداربووە.

هاوڵاتی هێزەکانی 70 لەبارەی پێدانی لیستی مووچەکانیان بە بەغدا راگەیەندراوێکیان بڵاوکردەوە و رایانگەیاند، ئەگەر عێراق راستەوخۆ لیستی مووچەمان لێوەر بگرێت ئامادەکاری تەواومان کردووە و تەسلیمی دەکەین. ئەمڕۆ سێشەممە 17ی تەموزی 2024، هێزەکانی 70 رایگەیاند، "خەرجکردنی مووچەی مانگەکانی ئایار و حوزەیرانی هێزە ئەمنییەکان و پێشمەرگە، وەک شایستەیەکی دارایی مانگانە و بەرامبەر  ئەرکەکانیان لە پاراستنی  هەرێمی کوردستان و بەرەنگاربوونەوەی هەڕەشەی تیرۆر لە عێراق مایەی خۆشحاڵییە و دەبێتە مایەی هاندانی زیاتریان بۆ راپەڕاندنی ئەرکەکانیان لە خزمەت کردنی ووڵاتدا هیوادارین لە مەودوا هیچ  ئاستەنگێک نەیەتە رێی ئەم پرۆسەیە لە نێوان هەردوو وەزارەتی دارایی هەرێم و عێراق". ئاماژە بەوەکراوە، "بەم بۆنەیەوە ئێمە لە فەرماندەی هێزەکانی ٧٠ی پێشمەرگەی کوردستان  بە هەموو لایەکی ڕادەگەیەنین لەناو هێزەکانی فەرماندەیمان هیچ ناوێک بوونی نییە کە هەڵگری رەگەزنامەی وڵاتێکی تر بێت جگە لە رەگەزنامەی عیراقی و یەک ناویش نییە کە وجودی ماددی و فیزیکی نەبێت، واتە ناوی وەهمی بێت بەتایبەت دوای ئەوەی تۆماری بایۆمەتریان بۆ ئەنجام دراوە". ئەوەش هاتووە، "بۆیە روون و رەوان رایدەگەیەنین کە بۆ مووچەی ئەم مانگی تەموزە ئێمە ئامادەیی تەواومان هەیە کە لیستی تەواوی ناوی پێشمەرگەکانمان بە زانیاری و بەڵگەنامەی داواکراوی پێویستیەوە پێشکەش بکەین و چیتر ئامادە نین مووچە و قوتی بنەماڵەکانیان بکرێتە بارمتەی ناروونی زانیاری و داتا گەلێک کە پەیوەندی بە هێزەکانمانەوە نییە". ئەوەشخراوەتەڕوو، "تەنانەت ئەگەر وەزارەتی دارایی فیدراڵ راستەوخۆ لیستەکانمان لێوەربگرێت ئێمە ئامادەکاری تەواومان کردووە و گومانمان لە راستی و دروستی زانیاری و داتاکانمان نییە".

هاوڵاتی دەزگای ئاسایش هەرێمی کوردستان دەستگیرکردن و هەڵوەشاندنەوەی گروپێکی مەترسیداری تاوانی ئەلیکترۆنی راگەیاند، کە زیاتر لە 250 کەسیان کردووەتە ئامانج لە تۆڕی کۆمەڵایەتی فەیسبووک. ئەمڕۆ چوارشەممە 17ی تەموزی 2024، دەزگای ئاسایشی هەرێمی کوردستان رایگەیاند، "دوای کۆکردنەوەی زانیاری ورد و دەستنیشانکردنی شوێنی تۆمەتبار لەلایەن تیمە تەکنیکییەکانی بەڕێوەبەرایەتی ئاسایشی سلێمانی توانیان ئەندامێکی سەرەکی باندەکە دەستگیربکەن، ئەم باندە داواکراون لەلایەن دەزگا ئەمنییەکانی هەرێمی کوردستان و پۆلیسی نێودەوڵەتی (ئینتەرپول)ەوە". ئاماژە بەوەکراوە، "لەسەر سکاڵای ژمارەیەکی زۆر لە قوربانیانی ئەم باندە کەبەشێوەی گروپ کاریان کردووە لە دەرەوەی وڵات، بوونەتەهۆی هەڕەشە و مەترسی بۆ سەر ژیانی 250 کەس". ئەوەش ئاشکراکراوە، "بە فەرمانی دادوەری لێکۆڵینەوەی ئاسایش، توانرا ئەندامی سەرەکی باندەکە بەناوی (پ،ئ،ح) بە ئامانج بگرن و لە وڵاتی تورکیاوە بە پلانێکی تۆکمە بەناونیشانی رێکخستنی ژوانێک بیگەڕێننەوە شاری سلێمانی و دەستبەجێ دەستگیری بکەن".

هاوڵاتی هێزەکانی پاراستنی گەل - هەپەگە وردەکاری ژمارەیەک چالاکی هێزەکانی گەریلای کوردستانی بڵاوکردەوە کە دژی سوپای تورکیا ئەنجامیان داوە، ئەو زیانانەیان ئاشکراکرد کە بەر سوپای تورکیا کەوتون، هەروەها ئاماری ئەو هێرشانەشی خستەڕوو کە تورکیا بۆسەر هێزەکانیان ئەنجامیان داوە. ئەمڕۆ چوارشەممە 17ی تەموزی 2024، ناوەندی راگەیاندنی هێزەکانی پاراستنی گەل - هەپەگە ئەنجامی ژمارەیەک چالاکی هێزەکانی گەریلای کوردستانی بڵاوکردەوە، رایگەیاند، "لە 15ی تەموز کاتژمێر 2:34 دوانیوەڕۆ هێزەکانمان لە ناوچەی شەهید دەلیل، رۆژئاوای زاپ سوپای تورکیایان کردە ئامانج لە کاتێکدا لە هەوڵی دانانی یەکێک لە سیستەمی کامێرای چاودێری لە گۆڕەپانی بەرخۆدان لە گردی بەهار بوو، ئەمەش بووە هۆی وەستاندنی جوڵەی سوپای تورکیا". ئاماژە بەوەکراوە، "رۆژی 16ی تەموز، کاتژمێر 1:35 خولەکی شەو هێزەکانمان رێگرییان لە هەلیکۆپتەرەکانی سوپای تورکیا کرد کە هەوڵیان دەدا لەسەر گردی نەورۆز لە گۆڕەپانی بەرخۆدان لە گردی بەهار بنیشنەوە، هەروەها هەلیکۆپتەرێکی “سکۆرسکی” دوای ئەوەی بەر باڵەکەی کەوت و کەوتە خوارەوە، لە ئەو ناوچەیەی کە هەوڵی نیشتنەوەی دەدا تێیدا ئەفسەرێک بەناوی مستەفا بە پلەی نەقیب و دوو فڕۆکەوان بە پلەی نەقیب و دوو تەکنیکار و حەوت سەربازی تورکیا کە لەناو ئەم هێلیکۆپتەرەدا بوون بریندار بوون". هەپەگە وتی، "لە 17ی تەموز، کاتژمێر 12:45ی خولەکی شەو و 2:00 بەرەبەیان هێزەکانمان لە یەکەکانی ژنانی ئازاد - ستار (یەژا-ستار) رێگرییان لەو هەلیکۆپتەرانە کرد کە لە ئاسمانی گۆڕەپانی بەرخۆدان لە گردی بەهاردا دەسوڕانەوە، هەروەها رۆژی 16ی تەموز کاتژمێر 7:40 خولەکی ئێوارە فڕۆکەیەکی بێفڕۆکەوانی سوپای تورکیا لە گۆڕەپانی بەرخۆدانی گردی ئێف ئێم خرایە خوارەوە". ئەوەش ئاشکرا کراوە، "رۆژی 17ی تەموز کاتژمێر 1:30ی خولەکی شەو هێزەکانمان لە گۆڕەپانی بەرخۆدان لە گردی ئێف ئێم ئۆپەراسیۆنێکی چۆنایەتییان ئەنجامدا لە ئۆپەراسیۆنەکەدا یەک ئامێری بلاجکتۆر و یەکێک لە سیستەمی کامێرای چاودێری و چەند تەقەمەنییەک کە سەر بە تورکیا بوو دەستیان بەسەردا گیرا، هەروەها ڕۆژی 15ی تەموز کاتژمێر 4:35 خولەکی دوانیوەڕۆ هێزەکانمان بە چەکی نیمچە ئۆتۆماتیکی داگیرکەرانیان لە گۆڕەپانی بەرخۆدان لە گردی ئامدە کردە ئامانج و پێگەیەکی سوپای تورکیایان کردە ئامانج". ئاماژە بەوەشکراوە، "لە 16ی تەموز کاتژمێر 1:15 خولەکی دوانیوەڕۆ و 5:45 خولەکی دوانیوەڕۆ هێزەکانمان لە یەکینەکانی ژنانی ئازاد - ستار بە چەکی قورس داگیرکەرانیان لە گۆڕەپانی بەرخۆدان لە گردی ئامدیە کردە ئامانج و پێگەیەکی سوپای داگیرکەریان تێکشکاند، هەروەها لە 16ی تەموز کاتژمێر 6:40 خولەکی ئێوارە هێزەکانمان لە یەکەکانی ژنانی ئازاد - ستار بە چەکی نیمچە ئۆتۆماتیکی داگیرکەرانیان لە گۆڕەپانی بەرخۆدان لە گردی جودی کردە ئامانج". هەپەگە وتیشی، "رۆژی 16ی تەموز، کاتژمێر 12:30 خولەکی شەو هێزەکانمان رێگرییان لە کۆپتەرەکانی سوپای تورکیا کرد کە لە ئاسمانی گۆڕەپانی بەرخۆدان لە بێشێلی دەسوڕانەوە و ئەمەش بووە هۆی ئەوەی کە کۆپتەرەکەی تورکیا ناچاربن ناوچەکە بەجێبهێڵن". هەر بەپێی راگەیەندراوەکە بێت، "رۆژی 16ی تەموز تونێلەکانمان لە گۆڕەپانی بەرخۆدانی گردی ئێف ئێم شەش جار بە تەقەمەنی قەدەغەکراو بۆردوومان کران، هەروەها لە ڕۆژانی 15 و 16ی تەموزدا 12 جار هێرش کرایە سەر گۆڕەپانەکانی شەهید شەریف، گردی شەهید هەیمان، لولان، کولیت، سێنین، و گردی شەهید هاوار لە دەڤەری خاکورک، هەروەها گۆڕەپانەکانی کاریی زەنکێل و دەشتی کافیا لە ناوچەی کاری سێ جار، و گۆڕەپانی بەرخۆدان لە گردی بەهار لە ناوچەی شەهید سێ جار، و گۆڕەپانی بەرخۆدان لە چیلاز لە ناوچەی متینا دوو جار، بە گشتی 20 جار بۆردومان کراوە لەلایەن فڕۆکە جەنگییەکانەوە". ئەوەش هاتووە، "لە ڕۆژانی 15 و 16 و 17ی تەموزدا مەیدانی بەرخۆدان لە گردی بەهار لە ناوچەی شەهید دەلیل لە رۆژئاوای زاب و گۆڕەپانی بەرخۆدان لە سری متینا لە ناوچەی متینا لە لایەن تورکیاوە بۆردوومانکران".

هاوڵاتی/ سازگار ئەحمەد دوانیوەڕۆی ئەمڕۆ لە گەلی عەلی بەگ لە سنووری ئیدارەی سۆران کەسێک خنکا کە خەڵکی کفریە و بە مەبەستی گەشت هاتوونەتە ناوچەکە. ئەمڕۆ چوارشەممە 17ی تەموزی 2024، رەوند هاودیانی، وتەبێژی بەرگریی سۆران بە هاوڵاتی راگەیاند، "دوانیوەڕۆی ئەمڕۆ هاوڵاتییەک کە خەڵکی قەزای کفریە بە مەبەستی گەشت لەگەڵ چوار هاوڕێی سەردانی ناوچەکەیان کردبوو لە گەلی عەلی بەگ خنکا". ئاماژەی بەوەشکرد، "ئەو کەسەی خنکاوە ناوی (زیاد عەبدولقادر)ە و تەمەنی 49 ساڵە بە ڕەگەز تورکمانە و دانیشتووی شاری هەولێرە لەکاتی مەلەکردندا خنکاوە و تیمەکان سەرقاڵی دۆزینەوەی تەرمەکەین".

هاوڵاتی بەڕێوەبەرێتى خۆسەرى باکوور و رۆژهەڵاتى سووریا بڕیاری لێبوردنی گشتی دەرکرد، بەگوێرەی بڕیارەکەش لێبوردن ئەوانە ناگرێتەوە کە بە تاوانی تیرۆر و کوشتن سزادراون. ئەمڕۆ چوارشەممە، 17ی تەمووزی 2024، بەڕێوەبەرێتى خۆسەرى باکوور و رۆژهەڵاتى سووریا بڕیارى لێبووردنى گشتى دەرکرد و بەگوێرەى بڕیارەکە "لێبووردنە گشتییەکەى بەڕێوەبەرێتى خۆسەر تۆمەتبارانى دۆسیەى تیرۆر و تاوانەکانى دیکەش دەگرێتەوە بەمەرجێک سووری بن". لە بڕیارەکەدا هاتووە، بڕیارەکە ئەو زیندانییانە دەگرێتەوە کە نیوەى سزاى زیندانییەکەیان بەسەربردووە". ئاماژە بەوەش کراوە "ئەو کەسانەى سزاى زیندانیی هەتاهەتاییان هەبووە سزاکەیان دەگۆڕێت بۆ 15 ساڵ بەندکردن". ئەوەشخراوەتەڕوو، هەموو ئەو زیندانییانەى نەخۆشیی درێژخایەن و چارەسەرنەکراویان هەیە ئازاد دەکرێن". بەگوێرەى بڕیارەکەى بەڕێوەبەرێتى خۆسەر"هەر زیندانییەک تەمەنى 75 ساڵ یان زیاتر بێت ئازاد دەکرێت". جەختیشکراوەتەوە "لێبووردنەکە بەرپرسانى رێکخراوە تیرۆریستییەکان و چەکدارانى تیرۆر ناگرێتەوە".

مەهران رەمەزان هاوڵاتی، سلێمانی شەش تۆمەتبار كە كوردیشی تێدایە، بەشێک بوون لە تۆڕێکی بازرگانیکردن بە مرۆڤەوە كە بنکەکەیان لە شاری تیسایدی بەریتانیا بوون و بەشێوەیەكی نایاسایی لە ئوتۆمبێل و بارهەڵگرەكاندا، چەندین كۆچبەریان بۆ بەریتانیا گواستووەتەوە لە لایەن دادگایەکی بەریتانیا سزا دران. دادگایەكی شاری نیوکاسڵ لە بەریتانیا شەش كەسی بە تۆمەتی قاچاخچێتی و گواستنەوەی نایاسایی سەدان کۆچبەری کوردی هەرێمی كوردستان بۆ بەریتانیا سزا دا، بەڵام ئاماژە بە جۆری سزاكە نەدراوە. لەم بارەیەوە، ئاژانسی نیشتمانی تاوان لە بەریتانیا رایگەیاند، شەش تۆمەتبارەکە كە كوردیشی تێدایە بە ناوەكانی محەممەد زادە، پارێز عەبدوڵڵا، خالید مەحموود، بێستون ساڵح و گۆربرێت سینگ و ماریك سوشانیچ، بەشێک بوون لە تۆڕێکی بازرگانیکردن بە مرۆڤەوە كە بنکەکەیان لە شاری تیسایدی بەریتانیا بوو، پێشتر لەساڵی 2017 لەبەرامبەر وەرگرتنی 5 هەزار تا 10 هەزار پاوەند چەندین كەسیان بە قاچاخ بۆ بەریتانیا گواستووەتەوە. ئەوەشی خستۆتەڕوو، تاوانباران بەشێوەیەكی نایاسایی لە ئوتۆمبێل و بارهەڵگرەكاندا، چەندین كۆچبەریان بۆ بەریتانیا گواستووەتەوە. پێشتریش ئاژانسی نیشتیمانی تاوان، لەساڵی 2018 بڵاوی كردبووەوە، لە ئۆپەراسیۆنێکی گەورەی دژی تۆڕێکی گومانلێکراوی تاوان، 21 گومانلێکراو کە بە رەگەز کوردن و تۆمەتبارن بە گواستنەوەی نایاسایی سەدان کوردی باشووری كوردستان لە بەریتانیا دەستگیر كراون.