هاوڵاتی چوار لەو کەسانەی بە تۆمەتی هێرشکردنە سەر کێڵگەی گازی کۆرمۆر لە هەرێمی کوردستان دەستگیرکرابوون، بە بڕیاری دادگایەکی بەغدا ئازادکران. بەپێی بەڵگەنامەیەک کە دوێنێ سێشەممە 23ی تەموزی 2024 لە دادگای تاوانەکانی ناوەندیی سەر بە سەرۆکایەتیی دادگای تێهەڵچوونەوەی رەسافەی بەغدا دەرچووە، دادگاکە بڕیاری ئازادکردنی چوار کەسی دەرکرد کە تۆمەتبارن بە هێرشەکردنە سەر کێڵگەی گازی کۆرمۆر لە قەزای چەمچەماڵی سەر بە پارێزگای سلێمانی. ئەو کەسانەی ئازادکراون لە هێزەکانی حەشدی شەعبین و لەو هێزەدا بەرپرسیاریێتییان هەیە، نیشتەجێی پارێزگاکانی کەرکوک و سەڵاحەدینن، ئەوانەی ئازادکراون پێکدێن لە: - موحسین سەلمان مەجید حەسەن - عەلی جەعفەر مستەفا شەهبار - محەممەد هاشم کازم ئیبراهیم - عەباس جاسم محەممەد عەلی دادگا ئاماژە بەوەدەدات، بەهۆی نەبوونی بەڵگەی پێویست، ئەو تۆمەتانەی بەپێی یاسای بەرەنگاربوونەوەی تیرۆری ژمارە 13ی ساڵی 2005 دراوەتە پاڵ ئەو چوار کەسە، هەڵدەوەشێتەوە و ئازاد دەکرێن. جێگەی ئاماژەیە، ئەمساڵ چەند جارێک هێرشکرایە سەر کێڵگەی کۆرمۆر، هێرشەکان بە مووشەک و درۆن بوون، لەوانە هێرشەکانی 25ی کانوونی دووەم و 26ی نیسان، ئەو کەسانەی دەستگیرکراوبوون و ئازادکراون، بەهۆی هێرشەکەی 26ی نیسانی ئەمساڵ بووە، کەگیانلەدەستدانی چوار کارمەندی کێڵگەکەی لێکەوتەوە.
هاوڵاتی زانیاری ورد لەسەر ئۆپەراسیۆنەکانی هێزەکانی پاراستنی گەل و هێرشەکانی سوپای داگیرکەری تورکیا بەم شێوەیەی خوارەوەیە: ١. ناوچەی مەتینا: ڕۆژی ٢٣/٧ کاتژمێر٢:٣٠ی دوای نیوەڕۆ، هێزەکانی پاراستنی گەل لە گۆڕەپانی بەرخۆدان جموجۆڵەکانی سوپای داگیرکەری تورکیایان لە کۆلکا کردە ئامانج و بە چەکی نیمچە ئۆتۆماتیکی جموجۆڵەکەیان ڕاگرت. ڕۆژی ٢٣/٧ کاتژمێر ١٠:٣٠ی شەو، هێزەکانی پاراستنی گەل دەستوەردانیان لە جموجۆڵی کۆپتەرە هێرشبەرەکانی تورکیادا کرد لە گۆڕەپانی بەرخۆدان لە شیلازێ و هەلیکۆپتەرەکانیان ناچارکرد بۆ پشتەوەی بەئامانجکردنەکە هەڵبێن. ٢. ناوچەی شەهید دەلیل، ڕۆژئاوای زاب: رۆژی ٢٢/٧ کاتژمێر٩:٠٠ ی بەیانی، هێزەکانی پاراستنی گەل بە چەکی قورس سوپای داگیرکەریان لە گۆڕەپانی بەرخۆدانی گردی جودی کردە ئامانج. لە ٢٣/٧ کاتژمێر ١:١٠ خولەکی پاشنیوەڕۆ، شەڕڤانانی هێزەکانی پاراستنی گەل لە یەکینەکانی ژنانی ئازاد، دوای چاودێریکردنی جوڵەی سەربازانی داگیرکەر، بۆ ئاشکراکردنی ناوچەکەیان لە ڕێگەی تاکتیکی قەناس بەدەستەکانەوە، پەردەیەکی سەربازانی داگیرکەریان کردە ئامانج و سەربازێکی داگیرکەریان لەناو برد. لە ٢٣/٧ کاتژمێر٢:٠٠ی پاشنیوەڕۆ، چەکدارانی یەکینەکانی ژنانی ئازاد دوای چاودێریکردنی جموجوڵەکانی سەربازانی داگیرکەر، لە ڕێگەی تاکتیکی قەناس بەدەستەکانەوە، سەربازێکی داگیرکەریان کردە ئامانج. لە ٢٢/٧ کاتژمێر ٧:٤٨ خولەکی ئێوارە، هێزەکانی پاراستنی گەل بە بەکارهێنانی تاکتیکی مینچاندن، سوپای داگیرکەری تورکیایان لە گۆڕەپانی بەرخۆدانی گردی ئامێدی کردە ئامانج. ڕۆژی ٢٣/٧، کاتژمێر ٠٤:٤٥، قەناس بەدەستەکانی هێزەکانی پاراستنی گەل لە گۆڕەپانی بەرخۆدانی گردی ئامێدی سوپای داگیرکەریان کردە ئامانج و لە ئەنجامدا سەربازێکی داگیرکەر کوژرا. ڕۆژی ٢٣/٧ کاتژمێر ٩:٤٥ خولەکی شەو، هێزەکانی پاراستنی گەل لە گۆڕەپانی بەرخۆدانی گردی بەهار دەستوەردانیان لە جموجۆڵی هەلیکۆپتەرەکانی داگیرکەردا کرد. دوای بە ئامانجگرتنیان ناچاربوون لە ناوچەکە دوور بکەونەوە. ٣. ناوچەی کاری: ڕۆژی 23/٧ کاتژمێر ١٠:٠٠ ی شەو، هێزەکانی پاراستنی گەل لە گۆڕەپانی حەفتاباخ دەستوەردانیان لە جموجۆڵی هەلیکۆپتەرەکانی سوپای داگیرکەردا کرد. ٤. سەبارەت بە هێرشەکانی سوپای داگیرکەری تورکیا بە بۆمبی قەدەغەکراو: ڕۆژی ٢٢/٧ سوپای داگیرکەری تورکیا تونێلەکانی بەرخۆدانی لە گردی ئامێدی بە بۆمبی قەدەغەکراو بۆردومان کرد. ٥. سەبارەت بە هێرشەکانی سوپای داگیرکەری تورکیا: لە ڕۆژانی ٢٢ و ٢٣/٧، فڕۆکە جەنگییەکانی سوپای داگیرکەری تورکیا ٦ جار هێرشی ئاسمانیان کردە سەر ناوچەکانی شەهید شەریف، لۆلان، سەنینە و بەربەزنە لە خاکورکە. لە دەشتا کافیا، زینکڵ و کانی سارکییش لە کاری ٤ جار هێرشیان کرد، لە گردی بەهاریش لە ناوچەی شەهید دەلیل جارێک هێرشیان کرد، لە لیفجی و گردی هیواش لە قەندیل ٤ جار هێرشیان کرد و لە ناوچەی بیشیلیش لە مەتینا جارێک هێرشیان کرد، کە کۆی گشتی دەکاتە ١٦ هێرشی ئاسمانی. ئەم هەڵمەتانە بووە هۆی ئاگرکەوتنەوە لە زۆربەی ناوچەکان، کە تا ئێستاش بەردەوامە. لە ڕۆژانی ٢٢ و ۲۳/٧، هەلیکۆپتەرە هێرشبەرەکانی سوپای داگیرکەری تورکیا ناوچەکانی دەشتا کاڤیا و حەفتاباخیان لە کاری، ناوچەکانی شەهید شەریف و شەهید کەریم لە خاکورکە، ناوچەی سێری مەتینا لە مەتینا و گردی بەهاریان لە ناوچەی شەهید دەلیل، لە ڕۆژئاوای زاب بۆردومان کرد. ٢٤/٧/ ٢٠٢٤ ناوەندی ڕاگەیاندنی هێزەکانی پاراستنی گەل
هاوڵاتی لاهوور شێخ جەنگى لە کۆبوونەوەى لەگەڵ لیو جیون کونسوڵی گشتی کۆماری میللی چین لە هەرێمی کوردستان راگەیاند، دەمانەوێت گۆڕانکاری و چاکسازی گەورە لە دەسەڵات و حکومڕانی ئەنجامبدەین، کە پێشتر نەتوانراوە بکرێت. ئەمرۆ چوارشەممە 24ی تەموزی 2024، لاهوور شێخ جەنگی پێشوازییکرد لە لیو جیون، کونسوڵی گشتی کۆماری میللی چین لە هەرێمی کوردستان، لە دیدارێکدا بیرورایان ئاڵوگۆڕکرد دەربارەی دۆخی سیاسی عێراق و هەرێمی کوردستان. لە کۆبوونەوەکە جەختکرایەوە، لەسەر پێویستی چارەسەرکردنی کێشەکانی نێوان هەولێر و بەغدا لەپێناو دابینکردنی ژیانێکی شایستە بۆ هاوڵاتیان. هەروەها باس لە، لە هەڵبژاردنی خولی شەشەمی پارلەمانی کوردستانکرد و گرنگی ئەنجامدانی هەڵبژاردنمان دووپاتکردەوە لە وادەی دیاریکراودا. ئاماژەیان بۆ ئەو پرۆژە و پلانانەکرد کە وەک بەرەی گەل ئامادەمانکردووە کە دەمانەوێت بیکەینە بەرنامەی لیستەکەمان بۆ ئەوەی لە رێگەیەوە گۆڕانکاری و چاکسازی گەورە لە دەسەڵات و حکومڕانی ئەنجام بدەین کە پێشتر نەتوانراوە بکرێت. لە کۆتایی دیدارەکەدا گرنگی پەرەپێدانی پەیوەندییەکانی نێوان چین و هەرێمی کوردستانمان لە بوارەکانی کەلتوری بازرگانی و ئابوری و تەواوی بوارەکانیتر دووپاتکردەوە.
هاوڵاتی/ سازگار ئەحمەد وەزارەتی تەندروستیی حکومەتی هەرێمی کوردستان ن بەکارهێنانی کیسەی نایلۆن لە سەمونخانەکان، نانەواخانەکان و چێشتخانەکان قەدەغەدەکات. د.سەرکار سورچی، وتەبێژی وەزارەتی تەندروستیی حکومەتی هەرێمی کوردستان بە هاوڵاتی رایگەیاند، "بەپێی بڕیارێکی وەزارەتی تەندروستیی حکومەتی هەرێمی کوردستان بەکارهێنانی کیسەی نایلۆن لە سەمونخانەکان، نانەواخانەکان و چێشتخانەکان قەدەغەکراوە، بڕیارەکە بەو جۆرەیە لەمەودوا لە جیاتی کیسەی نایلۆن دەبێت کیسەی کاغەز بەکاربهێنرێت". ئاماژەی بەوەشکرد، "ئەمەش لەبەر ئەوەی لە رووی زانستییەوە کیسەی نایلۆن زیانبەخشە بۆ تەندروستی مرۆڤ و دەکرێت ببێتە هۆی سەرچاوەیەک بۆ توشبوونی مرۆڤ بە شێرپەنجە". جێی ئاماژەپێدانە، لەبەر ئەم هۆکارانە لە ئێستادا لە جیهان کیسەی کاغەز وەک و جێگرەوەیەک لە جیاتی کیسەی نایلۆن بەکاردەهێنرێت .
هاوڵاتی پەخشان عەزیزی، ڕۆژنامەنووس، چالاکوان و بەندکراوی سیاسیی کورد لە بەندیخانەی ئێڤێن کە لەم دواییانەدا لە مافی پەیوەندیی تەلەفۆنی و چاوپێکەوتن لەگەڵ خێزانەکەی بێبەش کرابوو، سزای سێدارەی بەسەردا سەپێندرا. ئەمڕۆ چوارشەممە 24ی تەموزی 2024، رێکخراوی مافی مرۆڤی هەنگاو بڵاویکردەوە، پەخشان عەزیزی، ڕۆژنامەنووس، چالاکوان و بەندکراوی سیاسیی کورد کە خەڵکی شاری مەهابادە و نزیکەی ساڵێکە دەستبەسەرە، لەلایەن دادگای شۆڕشی ئیسلامیی تارانەوە بە تۆمەتی “بەغی” لە ڕێگەی ئەندامێتی لە پارتی ژیانی ئازادی کوردستان- پژاک، سزای لەسێدارەدانی بەسەردا سەپێندرا. سەپاندنی سزای سێدارە بەسەر پەخشان عەزیزی لە کاتێکدایە کە ناوبراو ماوەی چەند مانگی سەرەتایی دەستبەسەرکرانەکەی لە مافی دەستڕاگەیشتن بە پارێزەر و چاوپێکەوتن لەگەڵ بنەماڵەکەی بێبەش بووە و دادگاییکردنی دۆسیەکەی لە پرۆسەیەکی ناڕوون و نادادپەروەرانەدا بەڕێوەچووە. پەخشان عەزیزی، ساڵی ڕابردوو، لە شارۆچکەی خەرازیی شاری تاران لەلایەن هێزەکانی وەزارەتی ئیتلاعاتی کۆماری ئیسلامیی ئێرانەوە دەستبەسەر کرا.
.jpg)
هاوڵاتی وەزارەتی سەرچاوە ئاوییەکانی عێراق دەڵێت، تەنها لە سنووری كەركوك 531 حەوزی ماسى، کە مەترسیبوون لە سەر ڕووبارەکان و 171 حەوزی ماسی دیكەش، مەترسیبوون لەسەر ئاوی ژێر زەوی پڕكرانەوە. ئەمڕۆ چورشەممە، 24ی تەمووزی 2024، وەزارەتی سەرچاوە ئاوییەكانی عێراق لە بارەی ئەنجامدانی هەڵمەتی لابردنی زیادەڕۆیی لەسەر ڕووبارەكان و پڕكردنەوەی سەدان حەوزی ماسی نایاسای لە كەركوك، ڕاگەیاندراوێكی بڵاوكردەوە. سەرچاوە ئاوییەکانی عێراق دەڵێت، لە سەرەتایی دەستپێكردنی هەڵمەتی لابردنی زیادەڕۆییەكانی سەر ڕووبارەكانەوە تا ئێستا، تەنها لە سنووری كەركووك 531 حەوزی ماسى، کە مەترسیبوون لە سەر ڕووبارەکان پڕكرانەوە، هەروەها 171 حەوزی ماسی دیكەش، مەترسیبوون لەسەر ئاوی ژێر زەوی پڕكرانەوە. ئەوەش خراوەتەروو، هەماهەنگییەكی ئاست بەرز لەگەڵ هێزە ئەمنییەكان هەیە بە مەبەستى پاڵپشتیكردن لە تیمەكانی لابردنی پێشێلكارییەكان. ئەو لیژنەیەی، كە ئەركی لابردنی سەرپێچییەكانی پارێزگای كەركوكى لە ئەستۆیە بەردەوامە لە كارەكانی پڕكردنەوە و لابردنی زیادەڕۆییەكانی سەر ئاوی ژێر زەوی. جێگای ئاماژەیە، لە دوای گۆڕانی كەشو هەوا و گرتنەوەی پشكی ئاوی عێراق لەلایەن دەوڵەتی د توركیاوە، حكومەتی عێراق بۆ دەربازبوون لە مەترسییەكان، دەستیكرد بە لابردنی ئەو سەرپێچیانەی كە لەسەر ڕووبارەكان درووستكراون، هەڵمەتەكە نزیكەی دوو ساڵە بەردەوامە.
(1).jpg)
هاوڵاتی میدیاكانی توركیا بڵاویان كردەوە، لەچوارچێوەی كاروانی هاوكارییە سەربازییەكانی ئەمریكا لە لە پارێزگای حەسەكە لە ڕۆژئاوای كوردستان، كە لە ژێر كۆنتڕۆڵی هێزەكانی سوریای دیموكرات (هەسەدە)دایە، سیستەمی بەرگریی ئاسمانی ڕەوانەی بنكەی سەربازی خۆی كردووە. میدیاكانی توركیا سەبارەت بە ناردنی هاوكاری سەربازی و سیستەمی بەرگریی ئاسمانی بۆ ڕۆژئاوای كوردستان، زانیاری بڵاو دەكەنەوە. میدیاكان ئاماژەیان بەوە كردووە، لەچوارچێوەی كاروانی هاوكارییە سەربازییەكانی ئەمریكا لە لە پارێزگای حەسەكە لە ڕۆژئاوای كوردستان، سیستەمی بەرگریی ئاسمانی ڕەوانەی بنكەی سەربازی خۆی كردووە، ناو بە ناو مەزڵوم عەبدی فەرماندەی گشتی هێزەكانی هەسەدە لەو بنكەیەكەدا دەمێنێتەوە. ئەوەش خراوەتەڕوو، هاوكارییە سەربازییەكە لە عێراقەوە ڕەوانەی ڕۆژئاوای كوردستان كراوە و لە 40 ئۆتۆمبێل پێك هاتووە كە زرێپۆشی جۆری Bradleyیشیان لەنێودا بووە، هەروەها كاروانە سەربازییەكە چەك و تەقەمەنی، كابینە و سیستەمی بەرگریی ئاسمانیی جۆری Avenger ی لەخۆ گرتووە. ئاماژە بەوەشكراوە، چوار جۆرە لەو سیستەمەی بەرگریی ئاسمانی ڕەوانەی ئەو بنكە سەربازییە كراون، ئەم جۆرە سیستەمانە ئامانجەكەیان لە دوری 443 كیلۆمەتر دەپێكێت، زیاتر لە دژی دۆرن، ئەو فڕۆكانەی نزم دەفڕن و هەلیكۆپتەر بەكار دەهێندرێت. میدیاكانی توركیا بانگەشەی ئەوە دەكەن، سیستەمەكە بۆ هەسەدە ڕەوانە كراوە، پێشتریش باس لەوە دەكرا كە گوایە سیستەمی بەرگریی ئاسمانی بۆ هەسەدە ڕەوانە كراوە، بەڵام هیچ لێدوانێكی فەرمی لە لایەن ئەمریكاوە لەسەر ئەو بابەتە نەدرا. ڕەوانەكردنی ئەو هاوكارییانە لە كاتێكدایە، هێرشە درۆنییەكانی توركیا بۆ سەر ڕۆژئاوای كوردستان تا ئێستا بەردەوامە و ژمارەیەك لە بەرپرسانی هەسەدە كوژراون، هەر لەماوە پێشتریش توركیا هەوڵی دا لە ڕێگای هێرشێكی درۆنییەوە لە فڕۆكەخانەی سلێمانی مەزڵوم كۆبانێ بكوژێت.
(1).jpg)
هاوڵاتی كۆمیسیۆنی باڵای سەربەخۆی هەڵبژاردنەكانی عێراق بڵاوی كردەوە، دەرگای پێشكەشكردنی داواكاری و ناو تۆماركردن بۆ تیمەكانی چاودێری نێودەوڵەتی بۆ هەڵبژاردنی پەرلەمانی هەرێمی كوردستان کرایەوە. ئەمڕۆ چوارشەممە، 24ی تەمووزی 2024، كۆمسیۆنی باڵای سەربەخۆی هەڵبژاردنەكانی عێراق رایگەیاند، دەرگای پێشكەشكردنی داواكاری و ناو تۆماركردن بۆ تیمەكانی چاودێری نێودەوڵەتی بۆ هەڵبژاردنى پەرلەمانی هەرێمی كوردستان كراوەتەوە، هەر لایەنێكی نێودەوڵەتی ئارەزووی چاودێریكردنی هەڵبژاردنی پەرلەمانی هەرێمی کوردستانی هەیە دەتوانێت ناوی خۆی تۆمار بكات. دەشڵێت، داواكار دەتوانێت سەردانی نووسینگەی دەستەی هەرێم لە هەولێر بكات یاخود لە رێگای ماڵپەری كۆمسیۆنەوە فۆرم و تەواوی پێداویستییەكان وەربگرێت. جێگەی ئاماژەیە، سەرۆکایەتی هەرێمی كوردستان، ڕۆژی 20ی تشرینی یەكەمی 2024ی بۆ ئەنجامدانی هەڵبژاردنی خولی شەشەمی پەرلەمانی هەرێمی كوردستان دیاریکردووە و هەروەها هەڵبژاردنەكە لەلایەن كۆمسیۆنی باڵای سەربەخۆی هەڵبژاردنەكانی عێراقەوە بەڕێوەدەبرێت. پێشتریش جومانە غەلای وتەبێژی كۆمیسیۆنی باڵای سەربەخۆی هەڵبژاردنەكانی عێراق ڕایگەیاند، لە ئەنجامدا 13 پارتی سیاسی، دوو هاوپەیمانی، 124 كاندیدای تاكەكەسیی كە 19یان لە پێكهاتەی مەسیحین و 20یشیان توركمانن، تۆمار كراون.
.jpg)
هاڵاتی بڕیارە سبەینێ پێنج شەممە، فەرمانبەرانی کارەبای سلێمانی بەهۆی پێنەدانی مووچەکانیان بایکۆتی دەوام بکەن. به‌هۆى وه‌رنه‌گرتنى موچه‌كانیان، فه‌رمانبه‌رانى كاره‌باى سلێمانى بڕیاریانداوه سبه‌ینێ بایكۆتى ده‌وام بكه‌ن، سه‌رچاوه‌یه‌كیش له‌وه‌زاره‌تى كاره‌با ڕایده‌گه‌یه‌نێت، تائێستا هیچ هه‌واڵێكى دڵخۆشكه‌ر له‌باره‌ى موچه‌كانیانه‌وه نییه. سەرچاوەیەک لە کارەبای سلێمانی ڕایگەیاندووە، وا نزیك ده‌بێتە‌وه له‌دوو مانگ، فەرمانبەرانی کارەبای سلێمانی مووچه‌مان وه‌رنه‌گرتوه، ئه‌و هه‌وڵانه‌شى بۆ چاره‌سه‌رى موچه دراون، هیچ ئه‌نجامێكیان نییه، بۆیه بڕیارمانداوه سبه‌ینێ بایكۆتى ده‌وام بكه‌ین. لەم بارەیەوە، سیروان محه‌مه‌د وته‌بێژى به‌ڕێوه‌به‌رایه‌تى كاره‌باى سلێمانى ڕایگه‌یاند، ئه‌وه‌نده‌ى ئێمه وه‌كو كاره‌با بزانین، لیژنه‌یه‌ك له‌به‌غداوه هاتوه‌ته هه‌رێم‌و وردبینى له‌لیستى موچه‌ى وه‌زاره‌تى كاره‌بادا كراو دواتر لیسته‌كان برانه‌وه به‌غدا، ئیتر ئێمه هیچ زانیاریه‌كى دیكه‌مان نییه، هه‌ر زانیارییه‌كى نوێ هه‌بێت لاى وه‌زاره‌تى داراییه. سەرچاوە، شارپرێس
(1).jpg)
هاوڵاتی ئەمڕۆ چوارشەممە، 24ی تەمووزی 2024، سامان نادر بەرپرسى سەنتەرى فریاکەوتنى سلێمانى ڕیگەیاند، لە ڕووداوێکى هاتوچۆدا کەسێک گیانیلەدەستدا وچوار کەسی دیکەش برینداربوون. سامان نادر، دەشڵێت، ڕووداوەکە لەسەر رێگاى سلێمانى-عەربەت روویداوە. ئاماژەی بەوەشکرد، تیمەکانمان گەیشتوونەتە شوێنی ڕووداوەکە بۆ گواستنەوەی تەرمەکە و بریندارەکان. بە پێی زانیارییەکان،رووداوەکە لەنێوان تەکسییەک و ئۆتۆمبێلێکی تایبەتدا بووە.
هاوڵاتی دوای ئەوەی دادگای فیدراڵی بڕیاریدا حکومەتی هەرێمی کوردستان داهاتی نەوتی و نانەوتی ڕادەستی بەغدا بکات، ئەمڕۆ حکومەتی هەرێم باجی لەسەر چەند چەند کار و پیشەیەکی هاوڵاتیان لابرد. حکومەتی هەرێمی کوردستان نوسراوێکی فەرمی سەبارەت بە‌لێخۆشبوون لە باجی سەر چەند چەند کار و پیشەیەکی هاوڵاتیان بڵاوکردووەتەوە. لە نوسراوەکەدا هاتووە، بەفەرمانی مەسرور بارزانی، سەرۆکی حکومەتی هەرێمی کوردستان و بە لەبەرچاوگرتنی دۆخی دارایی هاوڵاتییان و پیشەوەران له هەرێمی کوردستان، بڕیاردرا بە ڕاگرتنی وەرگرتنی باج لەسەر چێشتخانە و هۆتێلەکان، نەخۆشخانە تایبەتییەکان و سەمونخانە و نانەواخانەکان و زەوییە بەتاڵەکان. ئەم بڕیارەی حکومەتی هەرێم لەکاتێکدایە، کە پێشتر دادگای فیدراڵی بڕیاریدابوو هەولێر سەرجەم داهاتی نەوتی و نانەوتی ڕادەستی بەغدا بکات، لە سەرەتادا هەرێم ڕازی نەبوو بەپێدانی ئەو داهاتانە بە بەغدا، بۆیە چەند جارێک کێشە بۆ مووچەخۆرانی هەرێم درووست بوو و موچەکانیان دواکەوت. دوای چەند سەردانێکی شاندی هەرێم بۆ بەغدا و کۆبوونەوەیان لەگەڵ وەزارەتی دارایی عێراق و بەرپرسانی حکومەتی عێراق، لە کۆتاییدا حکومەتی هەرێم ناچارکرا سەرجەم داهاتەکانی ڕادەستی بەغدا بکات، لەبەرامبەر پێدانی مووچەی فەرمانبەرانی هەرێمدا.
هاوڵاتی ناوەندی تۆماری بەڵگەی پێشێلکاری لە ڕاپۆرتێکدا دەڵێت: دەوڵەتی تورکیا لەگەڵ خۆیدا سەدان داعشی هێناوەتە ناو خاکی باشووری کوردستان و لە سنووری پارێزگای دهۆک جێگیری کردوون. ئەمڕۆ سێشەممە، 23ی تەمووزی 2024، ناوەندی تۆماری بەڵگەی پێشێلکاریی باکوور و ڕۆژهەڵاتی سووریا، لە ڕاپۆرتێکیدا ڕایگەیاند ، کە دەوڵەتی تورکیا لەگەڵ خۆیدا سەدان داعشی هێناوەتە ناو خاکی باشووری کوردستان و لە سنووری پارێزگای دهۆک جێگیری کردوون و ئەو داعشانە لەلایەن سوپای تورکیاوە لە ڕۆژئاوای کوردستان و سووریا لە کامپی تایبەتی سەربازیی مەشق و ڕاهێنانیان پێ دەکرێت و ڕەوانەی باشووری کوردستان دەکرێن. لە ڕاپۆرتەکەی ناوەندی تۆماری بەڵگەشدا هاتووە، دەوڵەتی تورکیا ئەو داعشە سوورییانەی کە لە ناوچە داگیرکراوەکانی ڕۆژئاوای کوردستان کۆی کردوونەتەوە، لەبەرامبەر بەڵێنی پارە و پێدانی چەک و هاوکاریی، ڕازی کردوون بۆ ڕەوانەکردنیان بۆ باشووری کوردستان و بەکارهێنانیان لە داگیرکردنی باشووری کوردستاندا. لە ڕاپۆرتەکەدا لەبارەی ژمارە و ناسنامەی ئەو داعشانەوە ئەوە خراوەتەڕوو، زیاتر لە 300 داعشن و لە ناوچەی بەرواری باڵا و سنووری پارێزگای دهۆک لە باشووری کوردستان، لەناو بارەگا سەربازییەکانی دەوڵەتی تورکیادا جێگیر کراون.
هاوڵاتی سەرۆكی لیستی بەرەی گەل، كار و چالاكییەكانی بۆ بەشداریكردن لە هەڵبژاردنی خولی شەشەمی پەرلەمانی كوردستان چردەكاتەوە. لاهور شێخ جەنگی دەستی بە جووڵە سیاسیەكانی كردووە بە هەردوو ئاڕاستەی ناوخۆیی و دەرەكی، هاوڵاتی زانیویەتی كە هەفتەی رابردوو لاهور شێخ جەنگی سەردانی ویلایەتە یەكگرتووەكانی ئەمریكا و بەریتانیای كردووە و لە نزیكەوە چەند بەرپرس و كاربەدەستێکی ئەو دوو وڵاتەی بینیوە. لەناوخۆی كوردستانیش كەوتۆتە جووڵە و خەڵك بینین. هەروەها هاوڵاتی ئەوەشی زانیوە كە بەرەی گەل بڕیاری داوە لەسەر ئاستی هەرچوار پارێزگاكەی كوردستان هەڵمەتێكی هەڵبژاردنی فراوان دەستپێبكەن. لەو چوارچێوەیەشدا دوێنێ لەشاری هەولێر بەشێكی زۆری هەوادار و خەڵكی ئاسایی ئەو شارەی بینیوە.
هاوڵاتی نوسراوێك كه له مانگی ئایاری ئه‌مساڵدا له ئەمینداریێتیی گشتیی ئەنجومەنی وەزیرانی عێراق ده‌رچووه، داوا لە فەرمانگەکان دەکات لە نوسراوەکانیاندا پارتی کرێکارانی کوردستان (پەکەکە) وەک رێکخراوی قەدەغەکراو ناوبهێنن. له‌سه‌ر ئه‌و بنه‌مایه‌ش نوسراوێكی دیكه له 14ی تەمموزی 2024 به واژووی فەلاح عەبودی، بەڕێوەبەری گشتیی فەرمانگەی کاروباری کارگێڕی لە ئەمینداریێتیی گشتیی په‌رله‌مانی عێراق ده‌رچووه و تیایدا ناوه‌رۆكی بریاره‌كه‌ی حكومه‌تی عێراقی ئاراسته‌ی سه‌رۆكایه‌تیی په‌رله‌مان و داموده‌زگاكانی سه‌ربه په‌رله‌مان و نوسینگه‌ی راوێژكاره‌ن كردوه و له‌سه‌ر نوسراوه "گرنگیی پێ بدرێت". ناوه‌رۆكی نوسراوه‌كه ده‌ڵێت: لە سەر بنەمای نوسراوێکی فەرمانگەی کاروباری ئەنجومەنی وەزیران و لیژنەکان لە ئەمینداریێتی گشتیی ئەنجومەنی وەزیران، کە لە 28ی ئایاری 2024 دەرچووە، سەرۆک وەزیران و فەرماندەی گشتیی هێزە چەکدارەکان، فەرمانی داوە کاتێک لە نوسراوەکاندا ناوی پەکەکە دەهێنرێت بنوسن "پارتی کرێکارانی کوردستانی قەدەغەکراو. ئەمە لەکاتێکدایە، لەماوەی ڕابردوودا ڕەجەب تەیب ئەردۆغان سەرککۆماری تورکیا هاتە بەغدا و لەگەڵ محەمەد شیاع سوودانی سەرۆک وەزیرانی عێراق کۆبوویەوە، هەردوولا نزیکە 25 یاداشتنامەی لەیەکتێگەیشتیان واژۆکرد، هەروەها تورکیا داوای لە عێراق کرد، پەکەکە وەک ڕێکخراوێکی تیرۆرستی بناسێنێت.
هاوڵاتی/ سازگار ئەحمەد شارەزایەکی کەشناسی لەبارەی گۆڕانکارییەکانی کەشوهەوا و دابەزینی پلەی گەرما لە ناوچەکانی هەرێمی کوردستان زانیاری دەخاتەڕوو. ئەمڕۆ سێشەممە 23ی تەموزی 2024، شاڵاو هیدایەت، شارەزای کەشناسی بە هاوڵاتی راگەیاند، "سەڕەرای ئەوەی پلەی گەرما ئەمرۆ سێشەممە و سبەی چوارشەممەش بەبەرزی دەمێنەوە لە زۆربەی ناوچەکان ئەویش بەهۆی مانەوەی تۆپەڵە هەوای گەرمی هاتووی باکووری ئەفریقی، بەڵام لە کۆتایی هەفتە و بەولاوە تا ناوەڕاستی هەفتەی داهاتوو بەهۆی کشانەوەی تۆپەڵە هەوای خەماسینی باکووری ئەفەریقیاوە و کاریگەری بارستەهەوایەکی لاوازی فێنکی باکووری تورکیاوە پلەی گەرما لە پێنجشەممەی ئەم هەفتەیەوە تا ناوەڕاستی هەفتەی داهاتوو بەڕێژەی 2 تا 3 پلەی سیلیزی نزم دەبێتەوە لەسەرجەم ناوچەکان". بەپێی پێشبینییەکانی ئەو کەشناسە بێت، ئەگەر گۆڕانکاریی گەورە ڕوونەدات و تێکنەچێت لە نزیک کۆتایی مانگ و بەتایبەتی لە 29ی تەموزی ئەم مانگەو بەولاوەو بۆ ماوەیەک بەهۆی هاتنە خوارەوە تەوژمە هەوایەکی تری فێنک لە ڕووسیاوە و کارتێکردنی بۆ سەر ناوچەکانی هەرێمی کوردستان پلەکانی گەرما بەڕێژەی 3 تا 4 پلەی سیلیزی تر دادەبەزن ئەمەش وادەکات پلەکانی گەرما بۆ ماوەی چەند ڕۆژێک لە ئاستێکی خوار ئاسایی ساڵانە و تا ئاسایی ساڵانەی خۆیدا بێت، کەشێکی فێنکتر دێتە ئاراوە، هەروەها لە ئەمڕۆ دوانیوەڕۆو بەولاوە و بەتایبەت رۆژانی داهاتوو بای شەماڵ باڵادەست دەبێت بەخێرایی 15 تا 25 کیلۆمەتر لە کاتژمێرێکدا.
