ئەمریکا: هەڕەشەکان لەسەر ئاسایش و سەروەری عێراق بەردەوامە

هاوڵاتی لەدوای جەژن کۆبوونەوەی ئەنجومەنی پارێزگای کەرکوک بەڕێوەدەچێت و ئامانج لە ئەنجامدانی کۆبوونەوەکە، چالاک کردنەوەی ئەنجومەنەکەیە. ئەمڕۆ چوارشەممە 19ی حوزەیرانی 2024، د. ئەحمەد کەرکوکی ئەندامی ئەنجومەنی پارێزگای کەرکوک رایگەیاند، لەدوای کۆتایی هاتنی جەژنی قوربان دەبێت یەکەم کۆبوونەوەی ئەنجومەنی پارێزگای کەرکوک ئەنجامبدرێت، بۆ ئەمەش رێکەوتنێکی سەرەتایی لەنێوان لایەنە سیاسییەکانی شارەکەدا کراوە. ئاماژەی بەوەشکردوە، کۆبوونەوەکە بۆ چالاک کردنەوەی ئەنجومەنەکەیە، لەدوای ئەوە لایەنە براوەکان 30 رۆژیان لەبەردەمدایە بۆ رێکەوتن لەبارەی یەکلاکردنەوەی پۆستە ئیدارییەکانی پارێزگاکە و پێکهێنانی حکومەتی خۆجێیەتی پارێزگای کەرکوک.  

هاوڵاتی ئەم 1000 خوێندنگەیە بەسەر سەرتاسەری عێراقدا دابەشدەبن، بە هاوبەشی لەنێوان چین و وەزارەتی پەروەردە دروستدەکرێن. ئەمڕۆ چوارشەممە 19ی حوزەیرانی 2024، وەزارەتی پەروەردەی عێراق رایگەیان، "تا کۆتایی ئەمساڵ 1000 خوێندگەی نوێ دروستدەکرێن و دەچنە خزمەتەوە بۆ ساڵی نوێی خوێندن و قەیرانی نەبوونی خوێندنگە چارەسەر دەبێت". لەم بارەیەوە کەریم سەید، وتەبێژی وەزارەتی پەروەردەی عێراق ئەوەی خستەڕوو، ئەم 1000 خوێندنگەیە بەسەر سەرتاسەری عێراقدا دابەشدەبن، بە هاوبەشی لەنێوان چین و وەزارەتی پەروەردە دروستدەکرێن. ئاماژەی بەوەشکرد، هەوڵەکان لەپێناو چارەسەرکردنی قەیرانی کەمی خوێندنگەکانن و کار لەسەر پڕۆژەی هەمەجۆر دەکرێت لەپێناو باشترکردنی سیستمی پەروەردە لە عێراق.

هاوڵاتی یەکەم کاروانی حاجیانی هەرێمی کوردستان لە رۆژی 22ی حوزەیرانی 2024، لە شاری مەککەی پیرۆزەوە بەرێ دەکەون. ئەمەڕۆ چوارشەممە 19ی حوزەیرانی 2024، بەرێوەبەرایەتی گشتی حەج و عومڕەی هەرێمی کوردستان رایگەیاند، لە ڕۆژی 22ی حوزەیران یەکەم کاروانی حاجیانی کوردستان دەگەڕێنەوە هەرێمی کوردستان و دواین کاروانیش لە 30 حوزەیران دەبێت. دەشڵێت، یەکەم کاروانی حاجیانی هەرێمی کوردستان لە رۆژی 22-6-2024 لە شاری مەککەی پیرۆزەوە بەرێ دەکەون. لە ڕاگەیەندراوەکەدا ئاماژە بەوەکراوە، یەکەم کاروانی حاجیانی کوردستان بەرێگەی ئاسمانی لە رۆژی 24ی حوزەیرانی 2024، لە رێگەی هەردوو فرۆکەخانەی نێودەوڵەتی هەولێر و سلێمانی دەگەنەوە هەرێمی کوردستان. ئەوەشخراوەتەڕوو، دواین کاروانی حاجیانی کوردستان لە رۆژی 30ی حوزەیرانی 2024 لە رێگەی هەردوو فرۆکەخانەی نێودەوڵەتی هەولێر و سلێمانی دەگەنەوە هەرێمی کوردستان و کۆتایی بە پرۆسەی حەجی ئەمساڵ دێت. بەرێوەبەرایەتی گشتی حەج و عومڕەی هەرێمی کوردستان لە ڕاگەیندراوەکەدا، داوا لە کەسوکاری حاجیان دەکات کە بە هیچ شێوەیەک سەردانی فرۆکەخانەکان نەکەن بە مەبەستی پێشوازیکردن لە حاجیان چونکە پاسی تایبەت بۆ گواستنەوەیان ئامادەکراوە و بۆ ئەوەی قەرەباڵغی لە فرۆکەخانەکان دروست نەبێت و هاوکاری دەزگا پەیوەندارەکانی حکوومەتی هەرێمی کوردستان بکەن تاوەکوو حاجیان بە سەلامەتی دەگەڕێنەوە ناو کەسوکارەکانیان.  

هاوڵاتی ئەمڕۆ چوارشەممە 19ی حوزەیارانی 2024، ئیبراهیم یوماکلی، وەزیری کشتوکاڵ و دارستانەکانی تورکیا رایگەیاند، دوو رۆژە ئاگر لە پارێزگای چاناککالێی تورکیا کەوتۆتەوە تا ئێستا کۆنتڕۆڵنەکراوە و 540 کارمەندی بەرگری شارستانی ڕەوانەی شوێنی ئاگرکەوتنەوەکە کراون بۆ کوژاندنەوەی. دەشڵێت، سەرەڕای هەوڵەکان ڕووبەری 575 هێکتار لە پووش و پەڵاش و دارستان سووتاوە و بەهۆیەوە هاتووچۆی گەرووی چاناککالێ ڕاگیراو. ئاماژەی بەوەشداوە، دانیشتووانی دوو گوند بۆ شوینێکی دیکە گواستراونەتەوە، ژمارەکەیان 530 کەسە و ئێستا لە میوانخانەی سەر بە وەزارەتی وەرزش و لاوان دەمێننەوە و هیچ حاڵەتێکی کێشەی تەندروستی یان برینداربوونیش نییە. ئەوەشی خستۆتەڕوو، سەرەڕای هەوڵەکان ڕووبەری 575 هێکتار لە پووش و پەڵاش و دارستان سووتاوە و بەهۆیەوە هاتووچۆی گەرووی چاناککالێ ڕاگیراو. باسی لەوەشکردووە، بەرگری شارستانیی تورکیا بە نۆ فڕۆکە، شەش هێلیکۆپتەر و 94 تیمی ئاگرکوژێنەرە کە 540 کارمەندی پێکهاتوون هەوڵی کوژاندنەوەی ئاگرەکە دەدەن. ئەمە دووەم ساڵە ئاگر لە ئاگر لە دارستانەکانی پارێزگای چاناککالێی باکووری رۆژئاوای تورکیا دەکەوێتەوە، مانگی ئابی ساڵی ڕابردوو بەهۆی سووتانی دارستانەکانی ئەو پارێزگایە تیمەکانی فریاکەوتن دانیشتووانی 10 گوندیان بەرەو ناوچە پارێزراوەکان ڕاگواست تا دوای کۆنترڵکردنی ئاگرەکە.

هاوڵاتی وتەبێژی وەزارەتی بەرگری ئەمریكا، بەردەوام دەبین لەكاركردن لەگەڵ عێراق و هاوبەشەكانمان لە ناوچەكەدا. ئەمڕۆ چوارشەممە 19ی حوزەیرانی 2024، جەنەڕاڵ پاتریك رایدەر, وتەبێژی وەزارەتی بەرگری ئەمریكا لە كۆنگرەیەكی رۆژنامەنووسیدا رایگەیاند، بوونی هێزەكانی پێشمەرگە لە چوارچێوەی هێزە چەكدارەكانی عێراق, بەشداریكردووە لە سنورداركردنی توانای رێكخراوی داعش بۆ ئەنجامدانی هێرشی تیرۆرستی. ئەوەشی خستۆتەڕوو، كاردەكەین لەگەڵ حكومەتی عێراق و هاوبەشەكانی ترمان لە ناوچەكە, بە هێزی پێشمەرگەشەوە, بۆ دەستنیشانكردنی ئەو هەڕەشانەی داعش دروستی دەكات و رێگەگرتن لەسەرهەڵدانەوەی. سەبارەت بەتواناکانی پێشمەرگە و ڕۆڵیان لە لاوازکردنی داعشدا ئاماژەی بەوەدا، بوونی هێزەكانی پێشمەرگە لە چوارچێوەی هێزە ئەمنیەكانی عێراق, چالاك بووە بۆ لاوازكردنی تواناكانی داعش, ئەوەش گوزارشت لە توانای چالاكی ئەو هێزانە دەكات كاتێك پێكەوە كاردەكەن. دەشڵێت، زامنی پێدوایستیەكانی هاوبەشەكانمان دەكەین بۆ ئەوەی رێكخراوی داعش جارێكی تر نەگەرشێتەوەو بەتەواوی لەناوببرێت.  

هاوڵاتی سەرۆک وەزیرانی عێراق، ژمارەی دانیشتووانی بەغداد هەشت ملیۆن كەسی تێپەڕاندووە و بەمەش فشار بۆسەر خزمەتگوزارییەکان دروستبووە. ئەمڕۆ چوارشەممە 19ی حوزەیرانی 2024، محەمەد شیاع سودانی سەرۆک وەزیرانی عێراق رایگەیاند، ژمارەی دانیشتووانی بەغداد هەشت ملیۆن كەسی تێپەڕاندووە، ئەوەش فشاری بۆ خزمەتگوزارییەكان دروستكردووە و پێویستە كەرتی خزمەتگوزاری لە شارەكەدا زیاتر گەشەی پێبدرێت. سودانی، لە كۆبوونەوەیەكدا لەگەڵ ژووری ئۆپراسیۆنەكانی بەغداد ئەوەی خستەڕوو، گرنگە كەرتی خزمەتگوزاری لە شاری بەغداد گەشەی زیاتری پێبدرێت بە جۆرێك لەگەڵ گەشەی دانیشتوانی شارەكە بگونجێت كە لەئێستادا 8 ملیۆن كەسی تێپەڕاندووە.  

هاوڵاتی كەشناسیی عێراق پێشبینیدەكات لە كۆتایی ئەم هەفتەیە، ئەو شەپۆلی گەرمایەی ناوچەکەی گرتووەتەوە بەرەو نزمبوونەوە بڕوات. ئەمڕۆ سێشەممە 18ی حوزەیرانی 2024، عامر جابری، بەڕێوەبەری راگەیاندنی دەستەی كەشناسی و بومەلەرزەزانی عێراق رایگه‌یاند، "ئەو شەپۆلی گەرمایەی عێراقی گرتووەتەوە پەیوەندیدارە بەو نزم پاڵەپەستۆ گەرمییە وەرزییەی كە لە باشوری رۆژهەڵاتی ئاسیاوە هاتوەو بەوەش بەرزترین پلەكانی گەرما لەنێوان 45 بۆ 51 پلەی گەرمیدان لە ناوچە جیاجیاكانی وڵات". ئاماژەی بەوەکرد، "لە كۆتایی ئەم هەفتەیەدا كاریگەی ئەو شەپۆلە گەرمایە  كەمببێتەوە"، هەروەها پێشبینی كردوە كە لە دو رۆژی داهاتودا پلەكانی گەرما لە بەغدا 50 پلەی سەدی بن. بەڕێوەبەری راگەیاندنی دەستەی كەشناسی و بومەلەرزەزانی عێراق ئەوەشی خستەڕوو، بەپێی پێشبینییەكانی كەشوهەوا چەند رۆژی داهاتو خۆڵبارینی تێدا نابێت.

هاوڵاتی پارێزەری نێرگز محەمەدی، براوەی خەڵاتی نۆبڵی ئاشتی 2023، و چالاکی مافی مرۆڤ کە لە ئێستادا لە زیندانەکانی کۆماری ئیسلامییە، رایگەیاند، سزایەکی نوێ بۆ ئەم چالاکەی مافی مرۆڤ بڕاوەتەوەو جگە لە سزایەک کە پێشتر بۆی بڕابووەوە، یەک ساڵیتر زیندان بە سزاکەی زیاد کرا. مستەفا نیلی، پارێزەری نێرگز محەمەدی رۆژی سێشەممە 18ی حوزەیران لە تۆڕی کۆمەڵایەتی ئێکس نووسیویەتی، "نێرگز محەمەدی، چالاکوانی مافی مرۆڤ بە تۆمەتی  چالاکی دژی دەسەڵاتلە لایەن لقی 29ی دادگای شۆڕشی تارانەوە یەک ساڵی دیکە سزاکەی زیادکرا". باسی لەوە کردووە، هۆکاری ئەوەی یەک ساڵ زیندان بە سزای ئەم چالاکی مافی مرۆڤ و براوەی خەڵاتی نۆبڵە زیاد کراوە ئەوەیە کە نێرگز محەمەدی باسی لە دەستدرێژی سێکسی بەرپرسانی زیندان کردووە بۆ سەر " دینا قاڵیباف" رۆژنامەنووسی دەستبەسەرکراو، هەروەها لە زیندانەوە داوای لە خەڵک کردبوو هەڵبژاردنی پەرلەمانی ئێران لە 1ی ئازاری 2024 بەڕێوەچوو بایکۆت بکەن. هەروەها نامەی بۆ پەرلەمانی سوید و نۆروێژ نووسیوە دەربارەی دۆخی مافی مرۆڤ لە ئێران. بەپێی وتەی پارێزەرەکەی، دانیشتنی دادگایی کردنی ئەم چالاکەی مافی مرۆڤ بە بێ ئامادەبوونی خۆی و پارێزەرەکەی رۆژی 8ی حوزەیران بەڕێوە چووەو 1 ساڵ زیندان بە سزاکەی زیاد کراوە. نێرگز محەمەدی لە سێ ساڵی رابردوودا شەش جار دادگایی کراوەو بە گشتی سزای 13 ساڵ و3مانگ زیندانی و 154 قەمچی و دوورخستنەوە و 4 مانگ خۆڵڕێژی و کەناسی لە سەرشەقامەکانی بەسەردا داسەپاوە. نێرگز محەمەدی بەهۆی ناڕەزایەتی دەربڕین و باسکردن لە دەستدرێژی سێکسی و ئەشکەنجەی زیندانییە سیاسییەکان لە لایەن بەرپرسانی زیندانەوە 4 جار دادگایی کراوە. نێرگز محەمەدی دوای دەستگیرکردنی دینا قاڵیباف لە نیسانی 2024 دا بە ناردنە دەرەوەی نامەیەکی دەنگی لە زیندانەوە وتبووی، "دینا قاڵیباف، رۆژنامەنووس، تۆزێ لەوەپێش بە جەستەی شین هەڵگڕاوەوە لە حاڵێکدا دەستدرێژی سێکسی کراوەتە سەری، هێنرایە بەشی ژنانی زیندانی ئێڤین".

هاوڵاتی هەڵبژاردنی سەرۆک کۆماری ئێران بۆ جێگرەوەی ئیبراهیم رەئیسی، سەرۆک کۆماری پێشووی ئێران کە 19ی ئایاری 2024 لە رووداوی کەوتنە خوارەوەی کۆپتەر گیانی لە دەستدا، چەند رۆژیتر و رۆژی 28ی حوزەیران بەڕێوەئەچێت. 80 کەس خۆیان بۆ ئەم هەڵبژاردنە ناونووس کردبوو، بەڵام لە کۆی ئەو 80 کەسە تەنها شەش کەس لە لایەن ئەنجومەنی پارێزەرانی کۆماری ئیسلامییەوە پەسەندکراون. ژمارەیەکی زۆر لە بەرپرسانی پێشتری کۆماری ئیسلامی لەوانە مەحموود ئەحمەدینژاد، سەرۆک کۆماری پێشتری ئێران پەسەند نەکران. لە ئێستادا باس لەوە ئەکرێت ئەم 6 کەسە پەیوەندی پتەویان لەگەڵ سوپای پاسداران هەیە و سوپای پاسداران دەیەوێت سەرۆک کۆماری داهاتووی ئێران دیاری بکات. لە بابەتەدا باس لە پەیوەندی هەرکام لە 6 پاڵێوراوی سەرۆک کۆماری ئەکرێت لەگەڵ سوپای پاسداران و جۆری پەیوەندییەکانیان، ئەوەی ئاشکرایە ئەم 6 کەسە کە ناویان هاتووە راستەوخۆ و ناڕاستەوخۆ پەیوەندیان لەگەڵ سوپای پاسداران هەیە. کەسانێکیان پەیوەندی راستەوخۆیان لەگەڵ سوپا هەبووەو خۆیان پێشتر ئەندامی سوپای پاسداران بوون. ئەوانیتریشیان ئەگەر خۆشیان ئەندامی سوپا نەبن، بەرپرسی کاروباری بانگەشەکردنیان، پاسدار بوە، وانەی بە پاسدارەکانی سوپا وتۆتەوە یان ئەوەیە لە دەسەڵاتی پێشتریدا جێگرەکەی پاسدار بووە.  هەرچەند رەمەزان شەریف، وتەبێژی سوپای پاسداران رایگەیاند، سوپای پاسداران دەست لە هەڵبژاردنی سەرۆککۆماری وەرنادات، بەڵام یەدوڵڵا جەوانی، جێگری سیاسی سوپا پاسداران لە سمینارێک لە ژێرناوی " سمیناری روونکردنەوەو لێکدانەوەی پرسەکانی هەڵبژاردن" بە ئاماژە بە هەڵبژاردنی سەرۆککۆمار وتی، "هەر کەس لەم هەڵىژاردنەدا براوە بێت، ئەنجامەکەی ئەکرێ 2 شت بێت؛ یەکەم ببێت بە هۆکاری بەرهەمهێنانی هێز، دووهەم هۆکارێک بێت بۆ دروستبوونی ئالنگاری"، سوپای پاسداران تەنها هێزێکی سەربازی نییە. سوپای پاسداران و بەسیج وەک بەشێک لە سوپا، لە راستیدا دەسەڵاتی باڵان لە ئێران". لەم راپۆرتەدا باس لە پەیوەندییەکانی هەر کام لە 6 پاڵێوراوەکان ئەکرێت لەگەڵ سوپای پاسداران. - محەممەدباقر قاڵیباف قاڵیباف کەسێکە هەر لە سەردەمی لاوێتییەوە تێکەڵ بە سوپای پاسداران بووە. لە تەمەنی 19 ساڵییەوەو ساڵی 1979 تا 2005 بە فەرمی لە سوپا بووە. ئەمیرعەلی حاجیزادە، یەکێک لەفەرماندە باڵاکانی سوپای پاسداران، ئازاری 2024، قاڵیبافی وەک یەکێک لە دامەزرێنەرانی شارە مووشەکییەکانی سوپاسداران ناوبرد و  وەک کەسێک کە بەردەوام لە هەوڵدایە و ماندوو نەناسە ناوی برد  و باسی لەوە کرد ئابووری وڵات پێویستی بە کەسی وەک قاڵیباف هەیە. قاڵیباف ساڵی 2005 وەک سەرۆکی شارەوانی تاران دیاریکرا، ماوەی 12 ساڵ سەرۆکی شارەوانی تاران بوو. لە سەردەمی ئەودا، سوپای پاسداران و بەتایبەت کۆمپانیای " هۆڵدینگ یاس" سەر بە سوپای پاسداران بەشداری راستەوخۆیان هەبوو لە چالاکییە ئابوورییەکانی شارەوانی تاران. تەنانەت ساڵی 2023، ئەو کاتەی سەرۆکی پەرلەمان بوو، سەرۆکی بانکی ناوەندی ئێرانی لە بەرژەوەندی سوپای پاسداران گۆڕی. - عەلیڕەزا زاکانی عەلیڕەزا زاکانی هاوشێوەی قالیباف، سەرۆکی شارەوانی تاران بووە. زاکانی 8ی ئابی 2021 وەک سەرۆکی شارەوانی تاران دیاری کرا. بەڵام جۆری پەیوەندی زاکانی لەگەڵ سوپای پاسداران جیاواز بووە لە جۆری پەیوەندی قاڵیباف. لە سەردەمی جەنگی ئێران-عێراق ئەندامی سوپای پاسداران بووەو بەشداری لە جەنگدا کردووەو بریندار بووە، لە سەردەمی ناڕەزایەتی خوێندکاران لە ساڵی 1999 ، کە ژمارەیەکی زۆر خوێندکار کوژران و بێسەروشوێن بوون، ئەندامی بەسیجی خوێندکاریبووەو بەشدار بووە لە سەرکەوتی خوێندکارەکان. ساڵی 2013، ئیسماعیل کەوسەری یەکێک لە فەرماندەکانی سوپای پاسداران پشتیوانی لە زاکانی کرد و وتی :" زاکانی لە سەردەمی ریفۆرمخوازەکاندا ( سەردەمی سەرۆککۆماری محەممەد خاتەمی) یەکێک بوو لە بەرپرسەکانی بەسیجی خوێندکاری و ئەرکی خۆی بە باشی جێبەجێکرد، ئێمەش پشتیوانیمان کرد لەبەر ئەوەی لە سەردەمی جەنگی 8 ساڵەی عێراق- ئێرانەوە ئەمانناسی. ساڵی 2021، ئەو کاتەی گومان هەبوو لەوەی زاکانی وەک سەرۆکی شارەوانی تاران هەڵبژێردرێت، ماڵپەڕی فارس نیوز، ماڵپەڕی فەرمی سوپای پاسداران، هێرشی کردە سەر رەخنەگرەکانی زاکانی و نووسی :" بە دڵنیاییەوە زاکانی ئەبێت بە سەرۆکی شارەوانی"، نیسانی 2022 زاکانی رایگەیاند ، 5 بنکەی لە تاران دامەرزاندووەو سوپا و بەسیج تێیدا چالاکن.  زاکانی، لوتفوڵڵا فرووزەندەی وەک بەرپرسی ناوەندی بانگەشەکردنی خۆی هەڵبژاردووە. فرووزەندە یەکێکە لە دامەزرێنەرانی کۆمەڵی " خۆبەخشانی شۆڕشی ئیسلامی" کە فەرماندە پێشترەکانی سوپای پاسداران تێیدا چالاکن و لە سەرەتای دەیەی 2000 لە سەرجەم هەڵبژاردنەکاندا دەورێکی گرینگیان هەبوو و بەتایبەت لە دیاریکردنی مەحموود ئەحمەدینژاد وەک سەرۆککۆمار لە ساڵی 2005. - سەعید جەلیلی سەعید جەلیلی بەوە ناسراوە کە کەسێکی توندڕەوەو لە بناژۆخوازە توندڕەوەکانە، بەڵام هاوشێوەی قاڵیباف یان زاکانی پەیوەندی راستەوخۆ و رێکخراوەیی لەگەڵ سوپای پاسداران نەبووە.  بەدەر لەمەش قسەیەک لە زاری قاسم سلێمانی فەرماندەی پێشتری سوپای پاسدارانەوە دەگێڕدرێتەوە کە وا دەرئەکەوێت قاسم سلێمانی شێوەی بەڕێوەبردنی سەعید جەلیلی بەلاوە پەسەند نەبووە. لەهەڵبژاردنی سەرۆککۆماری 2013، سەعید جەلیلی یەکێک بوو لەو کەسانەی پاڵێوراو بوو. موجتەبا زولنوور یەکێک لە فەرماندەکانی سوپای پاسداران لە زاری قاسم سلێمانییەوە گێڕابوویەوە کە وتوویەتی :" ئەگەر جەلیلی ببێت بە سەرۆککۆمار، من یەک رۆژ لە سوپای قودسدا نامێنمەوە." سلێمانی وتبووی ئەو دەیهەوێت هەموو شتەکان لە بەردەست خۆیەوە دەرچێت و ئاگاداری هەموو شتەکان بێت و چەکی بانکی چایچییەکانیش خۆی واژۆی بکات.  بە هەموو ئەمانەوە میدیاکانی سەر بە سوپای پاسداران پەیوەندییەکای باشیان لەگەڵ سەعید جەلیلی بووەو هەیە. ماڵپەڕەکانی فارس و تەسنیم، رۆژنامەی جەوان و کەناڵی تەلەفیزیۆنی "افق" کەناڵی سوپای پاسداران، لایەنگری لە جەلیلی ئەکەن. هەموو ئەم ماڵپەڕ و رۆژنامە و تەلەفیزیۆنانە سەر بە سوپای پاسدارانن.  موحسن مەنسووری، بەرپرسی ناوەندی بانگەشەی سەعید جەلیلی پەیوەندییەکی زۆر باشی لەگەڵ سوپای پاسداران هەیە. مەنسووری لە سەردەمی ئیبراهیم رەئیسی و بۆ ماوەی زیاتر لە 1 ساڵ، لە تشرینی یەکەمی 2021 ەوە تا تشرینی دووهەمی 2022 ، پارێزگاری تاران بوو و فەرماندەکانی سوپای پاسدارانی وەک بەرپرسەکانی پارێزگا دیاری ئەکرد. - پوورمحەممەدی مستەفا پوور محەممەدی لە دەیەی 1980 و هاوینی 1988 یەکێک بوو لەو کەسانەی بە "لێژنەی مەرگ" ناویان ئەبرا و لەو هاوینەدا زیاتر لە 15 هەزار کەس لە چالاکانی سیاسی لە زیندانەکانی ئێران لە سێدارە دران.  پوورمحەممەدی لە دەوری یەکەمی سەرۆککۆماری مەحموود ئەحمەدی نژاد، وەزیری ناوخۆی کۆماری ئیسلامی بوو. ئەو کاتە محەممەد باقر زولقەدری وەک جێگری خۆی لە وەزارەتی ناوخۆ دیاریکرد. محەممەد باقر زولقەدر لە ئێستادا کەسی دووهەمە لە ناو سوپای پاسداران و جێگری فەرماندەی باڵای سوپای پاسدارانە. - قازی زادە ئەمیر حسێن قازی زادە هاشمی، یەکێکیتر لە پاڵێوراوەکانی سەر بە باڵی بناژۆخوازە. لە 6 پاڵێوراوەکە تەنها "پزیشکیان" لە لایەن ڕیفۆرمخوازەکانەوە پشتیوانی ئەکرێت. ئەمیرحسێن قازی زادە پێشتر بەرپرسی " رێکخراوی شەهید و خۆبەخشەکان" بووە کەسەر بە سوپای پاسدارانە. بێگومان پەیوەندی باشی بووە لە گەڵ سوپای پاسداران. محەممەد رەزا میرشەمسی، بەرپرسی ناوەندی بانگەشەی قازی زادە، پێشتر جێگری  بەڕێوەبەری کاروباری سیاسی زانکۆی " ئیمام حسێن" بووە کە زانکۆیەکە سەر بە سوپای پاسداران.  - پزیشیکیان مەسعوود پزیشکیان، پاڵیوراوێکی ئازەرییە کە لە مەهاباد لە دایکبووە، باوکی پزیشکیان دوای رووخانی کۆماری کوردستان لە مەهاباد بووە بە بەرپرسی سەربازی شارەکە. پزیشکیان کوردییەکی زۆر باش ئەزانێت. بەڵام زۆر دژە کوردە و هەڵوێستەکانی وەک کەسێکی دژە کورد دەرکەوتووە.  پزیشکیان تەنها پاڵێوراوێکە لە لایەن باڵی ریفۆرمخوازەوە پشتیوانی ئەکرێت. پەیوەندی راستەوخۆی لەگەڵ سوپای پاسداران نەبووە. پزیشکیان بۆ ماوەی 5 دەورە نوێنەری پەرلەمان بووە. لە سەردەمێکدا کە سوپای پاسداران کەوتە لیستی گەمارۆکانی ئەمریکاوە، وەک هەموو نوێنەرەکانی پەرلەمان جلی سوپای کردە بەر و لە پەرلەمان ئامادە بوو. کانوونی یەکەمی 2022 لە کاتی وتاردانێکی لە زانکۆ تاران، لە وەڵامی خوێندکارێکدا کە رەخنەی گرتبوو بۆچی جلی سوپای لە بەر کردووە وتی :" ئێستەش جلی سوپا لەبەر ئەکەم، ئەگەر سوپا نەبوایە ئەم وڵاتە دابەش ئەبوو، وڵات نەدەما". پزیشکیان لە سەردەمی شەڕی 8 ساڵەی عێراق – ئێراندا لە بەرەی شەڕ بووەو جلی سوپای لەبەر بووە.

هاوڵاتی له‌ شارى به‌سره‌ له‌ باشوورى عێراق كرێكارێك چوار هاوڵاتی کوشتووە و پارچە پارچەی کردوون و فڕێی داون. ئەمڕۆ سێشەممە 18ی حوزەیرانی 2024، وەزارەتی ناوخۆی عێراق رایگەیاند، "پاش ئه‌وه‌ى جه‌سته‌ى پارچه‌ پارچه‌كراوى دوو كرێكار له‌نێو دوو زبڵدانى ناوچه‌كانى ئەلتوەیسە و دور ئەلنەفت دۆزرانه‌وه‌ پۆلیسى به‌سره‌ ده‌ستیانكرد به‌ پشكنین به‌مه‌به‌ستى لێكۆڵینه‌وه‌ له‌ تاوانه‌كه‌، پاشان توانرا به‌ڵكه‌ى تایبه‌ته‌ به‌ تاوانه‌كه‌ بدۆزرێته‌وه‌”. ئاماژە بەوەشکراوە، "پاش به‌دواداچوون ده‌ركه‌وتووه‌ته‌ كه‌ چوار كرێكار به‌هه‌مان شێوه‌ى یه‌كترى كوژراون و ته‌رمه‌كانیان فرێدراوه‌، كرێكاره‌كان هه‌رچواریان هه‌ڵگرى ره‌گه‌زنامه‌ى میسرین و له‌ پرۆژه‌یه‌كى بیناسازیدا كاريان كردووە، پێشتر كونسوڵخانه‌ى میسر له‌سه‌ر دیارنه‌مانیان زانیارى پێشكه‌ش به‌ پۆلیس كردووه‌”. ئەوەشخراوەتەڕوو، "تۆمەتبارەکە دەستگیرکراوە و دانى به‌وه‌دا ناوه‌ كه‌ ئەو چوار کەسەی کوشتووە و تەرمی ئەوانی پارچەپارچە کردووە و لە ناوچە جیاجیاکانی ناوەندی شاری بەسرە حه‌شاری داون".  

هاوڵاتی   وەزارەتی دەرەوەی ئەمەریكا، میلیشیای"ئەنساروڵای ئەوفیا"ی عێراقی و حەیدەر غەڕاوی ئەمینداری گشتی میلیشیاكەی خستە ناو لیستی تیرۆرەوە. ئەمڕۆ سێشەممە 18ی حوزەیرانی 2024، وەزارەتی دەرەوەی ئەمەریكا رایگەیاند، "بزووتنەوەی ئەنساروڵای ئەوفیای عێراقی, میلیشایەكی هاوپەیمانی ئێرانە و بەشێكە لە گروپی بەرهەڵستكارانی ئیسلامی لە عێراق". ئاماژەی بەوەشکردووە، "واشنتۆن پابەندە بە لاوازكردن و پەكخستنی توانای ئەو گروپانەی لەلایەن ئێرانەوە پشتیوانی دەكرێن بۆ ئەنجامدانی هێرشی تیرۆریستی بە بەكارهێنانی سەرجەم كەرەستە بەردەستەكان بۆ رووبەڕووبوونەوەی پشتیوانیكردنی ئێران لە تیرۆر".

هاوڵاتی بەهۆی کەوتنەوەی ئاگر لە نەخۆشخانەیەکی ناحکومی لە شاری رەشتی ئێران نۆ نەخۆش گیانیان لەدەستدا و ئەوانی دیکەش گواستراونەتەوە نەخۆشخانەکانی دیکەش. بەرەبەیانیی ئەمڕۆ سێشەممە 18ی حوزەیرانی 2024، ئاژانسی هەواڵی تەسنیمی ئێران بڵاویکردەوە و رایگەیاند، "بەرەبەیانی ئەمڕۆ ئاگر لە نەخۆشخانەی قائیمی ئەهلی لە رەشت کەوتەوە و تیمەکانی ئاگرکوژێنەوە و مانگی سووریش ئامادەی شوێنی ئاگرەکە بوون و توانیان ئاگرەکە کۆنترۆڵبکەن و نەخۆشخانەکە چۆڵبکەن". ئاماژە بەوەکراوە، "لە نەخۆشخانەکە 142 نەخۆش هەبوون کە 109 کەسیان لە بەشی ئاسایی و 33 کەسی دیکەیان لە بەشی چاودێریی چڕدابوون، لە ئەنجامی رووداوەکە نۆ نەخۆش گیانیان لەدەستداوە و نەخۆشەکانی دیکەش گواستراونەتەوە بۆ نەخۆشخانەکانی دیکە. ئەوەشخراوەتەڕوو، 26 تیمی ئۆپەراسیۆن لەگەڵ 75 فریاکەوتن لەگەڵ 26 ئۆتۆمبێل (11 ئەمبولانس، 3 کیتی فریاگوزاری، 12 ئۆتۆمبێلی فریاگوزاری) ڕەوانەی شوێنی رووداوەکە کراون.

هاوڵاتی بەرێوەبەرایەتی گشتیی حەج و عومرەی کوردستان، رێکكەوتنیان کردووە لەگەڵ کونسوڵی عێراق لەوڵاتی سعودیه، بۆ دۆزینەوە و سۆراغکردنی ئەو هاونیشتمانییانەی مردوون یاخود ونبوون لە وڵاتی سعودیە. ئەمڕۆ دووشەممە 17ی حوزەیرانی 2024، وەزارەتی ئەوقاف و كاروباری ئایینی هەرێمی كوردستان رایگەیاند، وەزارەتی ئەوقاف و کاروباری ئایینی لەرێگەی بەرێوەبەرایەتی گشتیی حەج و عومرەی کوردستان، رێکكەوتنیان کردووە لەگەڵ کونسوڵی عێراق لەوڵاتی سعودیه، بۆ دۆزینەوە و سۆراغکردنی ئەو هاونیشتمانییانەی مردوون یاخود ونبوون لە وڵاتی سعودیە. دەشڵێت، هەرکەسێک خزمێکی نزیکی یاخود کەسێکی مردووە یان ونبووە لە سعودیە، با پەیوەندی بکات بە بەڕێوەبەری حەج و عومرەی ناوچەکەی خۆی، بۆ سۆراغكردنیان. پێشتریش نەبەز ئیسماعیل، گوتەبێژی وەزارەتی ئەوقاف و کاروباری ئایینیی رایگەیاندبوو، تاوەکو دووەم رۆژی جەژنی قوربان، 10 حاجیی هەرێمی کوردستان لە مەککە گیانیانلەدەستداوە، تەنیا یەک حاجییان لە رێگەی بەڕێوەبەرایەتیی حەج و عومرەوە چووەتە سعودیە و ئەوانەی دیکە بە ڤیزای گەشتیاریی یاخود یەکساڵی چوونەتە ئەو وڵاتە. هاوكات، رۆژگار جەعفەر، بەپرسی راگەیاندنی شاندی حاجییانی هەرێمی کوردستان لە سعودیە ئەوەی خستۆتەڕوو، سێیەم رۆژی جەژن مەراسیمەکانی فەریزەی حەج کۆتاییان دێت و لە دوای 20ـی ئەم مانگەوە، یەکەم کاروانی حاجییان لە رێگەی وشکانییەوە دەست بەگەڕانەوە بۆ ھەرێمی كوردستان دەكەن .

هاوڵاتی ئەمڕۆ دووشەممە 17ی حوزەیرانی 2024، ئاژانسە هەواڵییەکانی ئێران رایانگەیاند، ئایەتوڵا عەلی خامنەیی، رێبەری باڵای شۆڕشی ئیسلامی ئێران، وەکو رێزگرتنێک لە بۆنەکانی جەژنی قوربان و غەدیر، بڕیاری لێخۆشبوونی بۆ زیاتر لە 2600 زیندانیی لە وڵاتەکەیدا دەرکردووە. بەگوێرەی بڕیارێکی رێبەری باڵای شۆڕشی ئیسلامی ئێران، کە ئاژانسی  میهری ئێران بەشێکی لێ بڵاوکردووەتەوە، بڕیاری لێخۆشبوونەکە 2650 زیندانیی لێی سوودمەند دەبن، کە تاوانی جۆراو جۆریان لە ساڵانی رابردوودا ئەنجامداوە و لە زیندانەکانی ئێراندان. دەشڵێت، بڕیارەکەی رێبەری باڵای شۆڕشی ئیسلامی ئێران لە وەڵامی داخوازیی نامەیەکی موحسینی ئێژەیی، سەرۆکی دەزگای دادی ئێران بووە کە لەماوەی رابردوودا داوایکردبوو بڕیاری لێبووردن، کەمکردنەوەی ماوەی سزا و گۆڕین و سوککرندی سزا بۆ ژمارەیەکی زۆری زیندانیان دەربچێت. لەلایەن شوێنکەوتووانی ئاینزای شیعە، ئەمڕۆ یەکەم رۆژی جەژنی قوربانە و بڕیارە 17 رۆژی دیکە جەژنی ئەلغەدیر لەلایەن شیعە مەزهەبەکانەوە بەڕێوەبچێت، کە یەکێکە لە رۆژە پیرۆزەکان و لە سەرجەم دامودەزگا فەرمییەکان پشووی فەرمییە.

هاوڵاتی ئەمڕۆ دووشەممە 17ی حوزەیرانی 2024، ئاری هەرسین, بەرپرسی لقی چواری پارتی دیموكراتی كوردستان رایگەیاند، دژی هەڵبژاردن نەبووین بەڵكو دژی پیلانگێڕی بووین. دەشڵێت، ھەوڵی ئێمە لە ڕابردوو دژی ھەڵبژاردن نەبوو، بەپێچەوانەوە دژی ئەو پیلانگێڕیە بوو، ھۆکارەکانمان دیاری کردبوو، وتمان بەو شێوەیە بەشداری ھەڵبژاردن ناکەین. ئەوەشی خستۆتەڕوو، بەو سیاسەتە حەکیمانەیەی سەرۆک لەسەر بنەمای خۆ نەچەماندن, چەندین جار ئەمەی بەرجەستە کردووە لە ژیانی سیاسی و پێشمەرگایەتی خۆیدا و سەرکەوتنی بەدەستھێناوە. باسی لەوەشکرد، زۆر کەس گرەوی لەسەر ئەوە کردبوو ئەگەر پارتی بەشداری ھەڵبژاردن نەکات ھیچ لە بابەتەکە ناگۆڕێ و ھەڵبژاردن ھەر دەکرێت، دواجار سەلمێنرا کە پارتی وەکو گەورەترین پارتی سیاسی لە کوردستان ژمارەیە و بەبێ پارتی ھیچ ناکرێ و ئەو ئەنجامەی دەستکەوت سەرکەوتنێکی گەورەبوو، پشکی شێری ئەو سەرکەوتنەش بەر جەنابی سەرۆک بارزانی دەکەوێت. ئاماژەی بەوەشکرد، دادگای فیدڕاڵی بە حیساباتی خۆیدا چوویەوە و چووە ناو گۆڕانکارییەکان و دەبینین ئێستا چاوەڕێی سەرۆکی ھەرێمی کوردستان دەکرێت بۆ دیاری کردنی وادەی نوێی ھەڵبژاردن.