ڕاپۆرتێک لەسەر مەراسیمى سمبولیکى لەناوبردنى چەکى گەریلا بڵاوکرایەوە 

  رێبەری زیندانیکراوی پارتی کرێکارانی کورستان (پەکەکە) لەبارەی پرۆسەی چارەسەرییەوە دەڵێت، ''تاوەکو کۆتایی لەگەڵ ئەم پرۆسەیە دەبم. بەهیوام و لەپێناویشیدا کار دەکەم''.   ئێوارەی رۆژی دووشەممە 31ـی ئاداری 2025، محەممەد ئۆجەلان (برای عەبدوڵڵا ئۆجەلان) و عومەر ئۆجەلان (برازای عەبدوڵڵا ئۆجەلان و پەرلەمانتاری دەم پارتی لە بازنەی رووها) بە بۆنەی جەژنی رەمەزان، بۆ دیداری عەبدوڵڵا ئۆجەلان، رێبەری 26 ساڵ زیندانیکراوی پەکەکە، سەردانی گرتووخانەی دوورگەی ئیمراڵییان کرد.   پەرلەمانتاری دەم پارتی رۆژی چوارشەممە، 9ـی نیسانی 2025 لە هەڤپەیڤینێکدا سەبارەت بە نێوەڕۆکی ئەم سەردانە گوتی، ''بە بەڕێز ئۆجەلانمان گوت، خەڵک متمانەی تەواوی بە ئێوەیە و پاڵپشتی لە بانگەوازەکەتان دەکات. باوەڕیان بە ئێوە و بۆچوونەکانتان هەیە. بەڵام ئەوان بەهۆی پرۆسەکانی پێشوو، بە گومان و دوودڵن''.   بە گوتەی برازاکەی، ئۆجەلان لە وەڵامی ئەمەدا گوتوویەتی، ''خەڵک مافی خۆیەتی بەم جۆرە بیربکاتەوە. بەڵام من پێداگرم لەوەی تاوەکو کۆتایی لەگەڵ ئەم پرۆسەیەدا دەبم، بەهیوام و لە پێناویشیدا کار دەکەم''.   ئۆجەلان لە 27ـی شوباتی ئەم ساڵ لە بانگەوازێکدا بۆ پارتی کرێکارانی کوردستان گوتی، کۆنگرە ببەستن، خۆیان هەڵبوەشێننەوە و چەکەکانیان دابنێن. دوو رۆژ دواتر، پەکەکە رایگەیاند، بەو مەرجەی ئۆجەلان بەشداری لە کۆنگرەکە بکات، پابەندی بانگەوازەکە دەبن.   پەرلەمانتاری دەم پارتی لەبارەی بانگەوازەکە دەڵێت، ''بە بەڕێز ئۆجەلانمان گوت، نەتەوە یەکگرتووەکان، ئەڵمانیا، ئەمریکا، رووسیا و چین، پاڵپشتی و پێشوازییان لە بانگەوازی ئاشتی و کۆمەڵگەی دیموکرات کرد. ئەویش بۆچوونەکانی خۆی لەمبارەیەوە دەربڕی''.   ئۆجەلان دەربارەی بەڕێوەچوونی ئاهەنگەکانی نەورۆزی ئەم ساڵ لە رۆژئاوا و رۆژهەڵاتی کوردستان پرسیاری کردووە، پەرلەمانتارەکەی دەم پارتی دەڵێت، ''پێمان گوت، لە ئاهەنگەکانی نەورۆزدا خەڵک پاڵپشتی لە پرۆسەکە و بانگەوازەکەی ئێوە کرد. لە رۆژئاڤا و رۆژهەڵاتیش ئاهەنگەکان زۆر بەباشی بەڕێوەچوون''.   لە مانگی ئاداری ئەم ساڵ، لە پارێزگاکانى لازقییە و تەڕتووس کە دوو پارێزگەى کەناراویی زۆرینە عەلەویى سووریان، پێکدادان لەنێوان ھێزە ئەمنییەکانى دەسەڵاتى نوێى سووریا و چەند گرووپێکی چەکداری دیکەى روویدا کە گوایە سەر بە سوپاى پێشووى رژێمى بەشار ئەسەد بوون.   بەگوێرەی روانگەی سووری بۆ مافەکانی مرۆڤ کە چاودێری دۆخی سووریا دەکات و بارەگەکەی لە لەندەنە، 973 سڤیل و 250 چەکداری عەلەوی، هەروەها 230 کەس لە هێزە ئەمنییەکانی دەسەڵاتی سووریا کوژراون.   بە گوتەی پەرلەمانتاری دەم پارتی، ئۆجەلان ''رەخنە''ی لە شێوازی حکومڕانیی حکومەتی ئێستای سووریا گرتووە، هەروەها لەبارەی گرژییەکانی نێوان دەسەڵاتی سووریا و گرووپە چەکدارەکان لە مانگی رابردوو، گوتوویەتی، ''ئەو کۆمەڵکوژییەی بەسەرعەلەوییەکان کرا، قبووڵی ناکەین و بە دروستی نازانین. دەبێت مافی نوسەری وعەلەوی و درووزییەکان بپارێزرێت. ئەوانیش دەتوانن هاوشێوەی ئەو سیستمانەی کورد پێکیهێناون، پێکبهێنن. دەتوانن پەیوەندی لەگەڵ یەکدی دروست بکەن''.   رێبەری زیندانیکراوی پەکەکە لەبارەی دەم پارتی رەخنە و پێشنیازی هەبووە، گوتوویەتی، ''ئێوە هەوڵنادەن، دەبێت زیاتر خۆتان ماندوو بکەن، دەبێت ماڵ بە ماڵ، شەقام بە شەقام بگەڕێن و بەڕێکخراوەیی بن. من لە منداڵییەوە بەمشێوەیە کار دەکەم؛ ئێمە گرووپی نوێژخوێنانمان هەبوو، گرووپی خوێنکارانی قوتابخانەمان هەبوو''.

ئەنجوومەنی نوێنەرانی عێراق سبەی کۆدەبێتەوە و لە کارنامەی دانیشتنەکەشدا تاوتوێی داواکاری پەروەردەکاران دەکرێت، کە بۆ ماوەی چەند رۆژێکە خۆپیشاندانی فراوان ئەنجامدەدەن. نوسینگەی راگەیاندنی ئەنجوومەنی نوێنەران لە راگەیەندراوێکدا بڵاویکردەوە سبەی پێنجشەممە 10ـی نیسانی 2025، کاتژمێر 1ـی پاشنیوەڕۆ دانیشتنێکی تایبەتی ئەنجوومەنەکە بۆ تاوتوێکردنی داواکاریی پەروەردەکاران (مامۆستایان و فەرمانبەران)، بەڕێوەدەچێت.  لەکارنامەی دانیشتنەکەدا، پرۆژەیاسای بە پارێزگابوونی هەڵەبجە بوونی نییە و دژی ئەو هەنگاوەش دارا سێکانیانی، ئەندامی فراکسیۆنی یەکگرتوو لە ئەنجوومەنی نوێنەران گوتی، "فراکسیۆنە کوردییەکان بڕیاریانداوە بایکۆتی دانیشتنەکانی ئەنجوومەنی نوێنەران بکەن، تاوەکو ئەو کاتەی ئەو پرۆژەیاسایە دەچێتە کارنامەی دانیشتنەکانەوە". ماوەی چەند رۆژێکە لە ژمارەیەک پارێزگای عێراق، مامۆستایان و فەرمانبەران خۆپیشاندان دەکەن و داوای باشترکردنی گوزەران و رێککردنەوەی پێدانی مووچەکانیان دەکەن. هاوکات رۆژی سێشەممە 8ـی نیسان ئەنجوومەنی وەزیرانی عێراق ژمارەیەک بڕیاری پەیوەست بە مامۆستایان و فەرمانبەران دەرکرد، لەنێویاندا، پێدانی سەرەمووچە و پلەبەرزکردنەوە لەبری دەوامی خۆبەخشی.

  خاكی سوریا بەمدواییە جموجوڵی نیگەرانكەر بەخۆوە دەبینێت، كە ئاماژەن بۆ گەڕانەوەی ڕێكخراوی داعش، دوای ساڵانێك لە پاشەكشە. ڕۆژنامەی نیویۆرك تایمز بڵاویكردەوە: بەپێی هەڵسەنگاندنی نێودەوڵەتی و ئەمەریكیەكان، دووبارە داعش دەستی بە چالاكی كردووەتەوە، كە خۆی دەبینێتەوە لە چەند هێرشێك و بە چەكداركردنی ژمارەیەك لە خەڵكی سوریا، ئەمەش ترسی زیادكردووە لە دووبارە سەرهەڵدانەوەی نائارامیی وڵاتەكە، لەكاتێكدا زیاتر لە دەیەیەكە بەهۆی جەنگ و ململانێوە دەناڵێنێت. ئەمەریكا لە هەنگاوێكی پێشوەختەدا، پێش ڕووخانی ڕژێمەكەی ئەسەد، بوونی سەربازیی خۆی لە سوریا بۆ دوو هێندە زیادكردووە، ئێستا نزیكەی دوو هەزار سەربازی لە سوریا هەیە، دوای ڕووخانی ڕژێمەكەی ئەسەدیش چەندین هێرشی ئاسمانیی كردەسەر بارەگاكانی داعش لە بیابانی سوریا، بەڵام چاودێران پێیان وایە ئەم هێرشانە بەس نین بۆ مامەڵەكردن لەگەڵ ڕەگی تیرۆر، چونكە هێشتا داعش خاوەنی گەنجینەیەكی ستراتیژییە، ئەویش بوونی هەزاران ئەندامی توندڕەوی دەستبەسەركراوە لە زیندانەكانی باكوری ڕۆژهەڵاتی سوریا. بەپێی ڕاپۆرتەكان، داعش هەوڵدەدات نزیكەی نۆ بۆ 10 هەزار ئەندام و لایەنگری خۆی لە زیندانەكانی سوریا ئازاد بكات، لەگەڵ نزیكەی 40 هەزار كەس لە خێزانەكانیان لە كامپەكان، ئەمەش دەبێتە پاڵپشتییەكی مەعنەوی و بانگەشەیەكی گەورە بۆ ڕێكخراوەكە و ڕێكخستنەوەی ڕیزەكانی. لەوبارەیەوە، كۆلین كلارك، سەرۆكی بەشی توێژینەوە لە كۆمەڵەی "سوفان" دەڵێت "ئەو زیندانانە كۆگایەكی مرۆیین كە دەتوانێت دووبارە ڕێكخراوەكە بەشێوەیەكی توندتر ڕێكبخاتەوە". بەپێی ڕاپۆرتێكی هەواڵگری ئەمەریكا كە بەمدواییە خراوەتەبەردەم كۆنگرێس، داعش هەلی ڕووخانی ڕژێمەكەی ئەسەد و ڕووداوەكانی دوای ڕووخانی ئەو ڕژێمەشی قۆستووەتەوە بۆ ئەنجامدانی هێرش لەپێناو ئازادكردنی ئەندامەكانی و دووبارە ڕێكخستنەوەی توانا سەربازیی و لۆجیستییەكانی. ئەو گروپانەی دوای ڕووخانی ڕژێمەكەی ئەسەد هاتوونەتەسەر دەسەڵات ناتوانن بۆشایی ئەمنیی پڕبكەنەوە لەلایەكی دیكەوە ترس هەیە كە ئەو گروپانەی دوای ڕووخانی ڕژێمەكەی ئەسەد هاتوونەتەسەر دەسەڵات لە سوریا بتوانن بۆشایی ئەمنیی پڕبكەنەوە، هەرچەندە هەواڵگری ئەمەریكا دەڵێت چەند هەوڵێكی داعش لە دیمەشق شكستیپێهێندراوە، بەڵام ڕووداوە تائیفییەكانی ئەمدواییەی سوریا دەریدەخات كە دەسەڵاتدارانی ئێستای سوریا توانای كۆنترۆڵكردنی دۆخی ئەمنییان نییە. لەچوارچێوەی ئەو دیمەنە ئاڵۆزەدا، ڕاپۆرتەكان دەریدەخەن، ئەو ڕێكخراوە توندڕەوە كە ڕەگەكەی دەگەڕێتەوە بۆ قاعیدەی عێراق، ئێستا تەنها مەترسییەكی ڕابردوو نییە، تەنها لەساڵی 2024 دا بەرپرسیارێتی لە ئەنجامدانی 294 هێرش لە سوریا ڕاگەیاندووە، بەڵام ساڵی پێشووتر تەنها 121 هێرشی ئەنجامداوە، بەڵام لیژنەی چاودێری نێودەوڵەتی ژمارەكەی بە 400 هێرش خەمڵاندووە، ئەمەش ئاماژەیە بۆ هەڵكشانێكی مەترسیدار لە ناوچەكە. دوودڵی هەیە كە سیناریۆ خوێناوییەكانی ڕابردوو دووبارە ببێتەوە، بەتایبەت كە لە ڕابردوودا بەهەمانشێوەی ئێستا دۆخی ئاڵۆزی سوریای قۆستەوە بۆ ڕاگەیاندنی دەوڵەتەكەی و داگیركردنی خاكێكی بەرفراوان لە سوریا و عێراق، دواتریش چەندین كۆمەڵكوژی ئاشكرای ئەنجامدا. لەباكوری رۆژهەڵاتی سوریا، كە لەلایەن هێزەكانی سوریای دیموكراتەوە بەڕێوەدەبرێت، زیندانەكانی داعش و كامپەكان لە ڕێوشوێنێكی ئەمنیی تونددان، بەڵام هێرشی گروپەكانی سەر بە توركیا لەماوەی ڕابردوودا كە ئێستاش ناوبەناو بەردەوامە، فشارێكی زۆری بۆ دۆخی زیندانەكان دروستكردووە.

  تۆڕی هاوپەیمانی 19 ، سلێمانی: دەستگیركردنی چالاكوانی قەزای پێنجوێن، رێبین عومەرو هەڵكوتانە سەر چالاكوانی قەزاكە كە نیازیان بوو گردبوونەوەیەك رێكبخەن، پێچەوانەی یاسای رێكخستنی خۆپیشاندانەوە و داوا دەكات دەستبەجێ ئازاد بكرێت و راوەدوونانی چالاكوانان رابگرن.  بەهۆی بانگەشەكردنیان بۆ گردبوەنەوەیەكی هاوسۆزی بۆ غەزە، پاش نیوەڕۆی ئەمرۆ، لە گەرەكی مامۆستایانی قەزای پێنجوێن هێزێكی ئەمنی رێبین عومەر، مامۆستاو ئەندامی دەستەی خۆپیشاندان بۆ مافەكانی خەڵكی پێنجوێنی دەستگیركرد و چونەتە سەر ماڵی دوو چالاكوانی تریش بە مەبەستی دەستگیركردنیان بەڵام لەماڵەوە نەبوون.  ئەنەس ئەمین خوارەحم، یەك لە رێكخەرانی گربونەوەكەیە بە تۆڕی 19ی راگەیاند، ماوەی هەفتەیەكە دوایان لە ئیداری شارەكە كردوە گردبونەوەیەكی هاوسۆزی بۆ هاوڵاتیانی مەدەنی شاری غەزە رێكبخەن، دوێنێ لە ئیدارەی قەزاكە رەزامەندیمان وەرگرت، كە ئەمڕۆ 9ی نیسان 2025، ئەنجامیبدەین، ووتی" بەڵام پێیان راگەیاندین كە رەزامەندی ئاسایش و پارێزگای سلێمانیشی دەوێ بوەستن" بە بێ ئەوەی گردبونەوەكە رێبكبخرێت، هێزە ئەمنییەكان چوونەتە گەرەكی مامۆستایان ( رێبین عومەر)یان دەستگیركرد، پاشان بۆ هەمان مەبەست چونەتە سەر ماڵی (هۆشیار نامق) و (میران كەمال)، بەڵام لە ماڵەوە نەبوون.  بە پێی یاسای خۆپیشاندان، ژمارە(11)ی سالی 2010، سەرۆكی یەكەی كارگێڕی مافی مۆڵەتدانی خۆپیشاندانی هەیە، هەریەك لەنێو یەكەی كارگێڕی خۆیدا. رێكخەران ئەمەیان كردوە نەك بەر لە  (48) كاتژمێر بەڵكو بەر لە هەفتەیەك و پاشان یەكەی كارگێڕی كە قائیمقامییەتی پێنحوێنە، رەزامەندی پیشان داوە، ئیتر ئەم دەستگیركردنە بۆ؟ تۆڕی هاوپەیمانی 19 رایدەگەیەنێت خۆپیشاندان مافێكی دەستوورییەو بەپێی یاسای هەرێمی كوردستانیش رێكخراوە، هەر رێكارێك پێچەوانەی ئەم یاسایە بگیرێتە بەر جیگای سەركۆنەكردنە. دەستگیركردنی چالاكوانی قەزای پێنجوێن (رێبین عومەر) و هەڵكوتانە سەر ماڵی چالاكوانانی قەزاكە كە بەنیازبوون گردبوونەوەیەك رێكبخەن، پێچەوانەی یاسای رێكخستنی خۆپیشاندانە و داوا دەكەین دەستبەجێ ئازاد بكرێن و راوەدوونانی چالاكوان رابگرن.  تۆڕی 19 كۆمەڵێك رێكخراو داكۆكیكارانی مافی مرۆڤ دایانمەزراندوە، سەنتەری میترۆ سەرپەرشتی دەكات، داكۆكی لە پرنیسپەكانی جاڕنامەی گەردوونی مافی مرۆڤ و بەڵگەنامە نێودەوڵتەییەكانی تری تایبەت بە ماف و ئازادییەكان دەكات، بە تایبەتیش بەندی 19ی جاڕنامەكە.

  ناوەندی ڕاگەیاندن و چاپەمەنیی هێزەکانی پاراستنی گەل-هەپەگە، سەبارەت بە هێرشەکانی سوپای داگیرکەری تورک بە گازی کیمیایی و بۆمبی فۆسفۆر لە ئاسمان و زەمینەوە، ڕاگەیاندراوێکی بڵاوکردەوە. لە ڕاگەیاندراوەکەیدا ئاماژەی بەوەکردووە، ٧ و ٨ـی نیسان، لە هەرێمی شەهید دەلیلی ڕۆژئاوای زاپ، جارێک بە تەقەمەنی قەدەغەکراو، دوو جار بە درۆنی بۆمبڕێژکرا، جارێک بە گازی کیمیایی و دوو جاریش بە بۆمبی فۆسفۆر بۆردوومانکراون. هەپەگە ڕاشیگەیاند، ٥، ٦ و ٧ـی نیسان لە هەرێمی خواکورک، هەرێمی گارە، هەرێمی مەتینا، هەرێمی شەهید دەلیلی ڕۆژئاوای زاپ، بە گشتی ٢٥ جار بە فڕۆکەی جەنگی بۆردوومان کران. لە بەردەوامیدا هاتووە، لە نێوان ڕۆژەکانی ٥ بۆ ٩ـی نیسان لە هەرێمی خواکوڕک، هەرێمی گارە، هەرێمی مەتینا، هەرێمی شەهید دەلیلی ڕۆژئاوای زاپ؛ بە گشتی ٨١٨ جار بە چەکی قورس، تۆپ و هاوەن تۆپباران کراون. لە کۆتاییشدا هاتووە، ٧ـی نیسان لە هەرێمی مەتینا بە چەکی نیوئۆتۆماتیکی دەستێوەردان کرا لە جوڵەی داگیرکەران، کە ڕوویان لە تونێلەکانی گۆڕەپانی بەرخۆدانی شێلادزێ کردبوو.

سەرچاوەیەکی ئاگادار وتى، تیمەكانی هەژماری من دەگەڕێنەوە نێو بانكەكانی پارێزگای سلێمانی و دەوروبەری و لەڕێی فۆڕمی دەستییەوە دەستدەكەنەوە بە تۆماركردنی مووچەخۆری نوێ. بەگوتەی سەرچاوەکە، تیمەكان لەگەڵ دابەشكردنی مووچەی مانگی چوار لەنێو بانكەكان دەبن و ئەوانەی دەیانەوێت لەڕێی هەژماری منەوە مووچە وەربگرن دەتوانن فۆڕم پڕبكەنەوە. هاوکات، سەرچاوەیەک لە تیمی هەژماری من ڕاگەیاند، تیمەکانیان پێانگوتوون ئەو فۆڕمە ئەلیكترۆنییەی ماوەیەک پێش ئێستا کاراکرا كاریگەری زۆری نەبووە لەسەر تۆماری مووچەخۆری نوێ لە سلێمانی، چونکە بۆ مووچەی مانگی سێ لەكۆی 313 هەزار کەس کە لەڕێی هەژماری منەوە مووچەیان وەرگرتووە 23 هەزاریان لە سلێمانی بوون و رێژەكەش بۆ مووچەی مانگی چوار زیاتر دەبێت. لەکاتی بانگەشەی هەڵبژاردنی خولی شەشەمی پەرلەمانی کوردستان بەبڕیاری بەرپرسانی یەکێتی لە سلێمانی تیمەکانی هەژماری من لەو بانکانەی کاریان تێدا دەکرد دوورخرانەوە و بانگەشەی ئەوەیان دەکرد کە لەبری هەژماری من تەوتینی مووچە دەکەن، بەڵام تەنها فۆڕمێکیان دابەشکرد و هیچ ئەنجامێکی نەبوو و دواتر پشتگیری خۆیان بۆ هەژماری من دووپاتکردەوە.

وەزارەتی ناوخۆی هەرێم چەند بڕیارێکی تایبەت بە ماتۆڕسکیلەکان دەرکرد و رایگەیاندووە، هاتوچۆی پارێزگاکانمان راسپاردووە دەست بەسەر هەر ماتۆڕسکیلێکدا بگرن کە بە دەنگەکانیان خەڵک بێزار دەکەن. بەپێى ڕاگەیەندراوەکە، ڕێکەوتن کراوە لەگەڵ کۆمپانیاکانی گەیاندنی خواردن کە دەست بکەن بە تۆمارکردنی ماتۆرسکیلەکانیان لە بەرێوەبەرایەتییەکانی هاتوچۆ و هێنانی ماتۆری بێدەنگ و کارەبایی بۆ کەمکردنەوەی ژاوەژاو کە بوونەتە هۆی بێزارکردنی هاووڵاتیان.  لەبەشێکیدا هاتوە: داوا دەکەین کە دایک و باوکان چاودێری منداڵەکانیان بکەن و ڕێگا نەدەن کەس بە ماتۆری تۆمارنەکراو لەسەر شەقامەکان نمایش بکات و ژیانی خۆی و خەڵکی دیکە بخاتە مەترسی. دەقی راگەیەنراوەکە: لێژنەی باڵای پەرەپێدانی هاتوچۆ ژمارەیەک بابەتی گرنگ تاوتوێ دەکات لە دیوانی وەزارەتی ناوخۆ، رۆژی سێ شەممە ڕێکەوتی ٨ی نیسانی ٢٠٢٥، بە سەرپەرشتی هێمن میرانی بەڕێوەبەری گشتی دیوان و ئامادەبوونی لیوا دیدار عومەر قادر بەڕێوەبەری گشتی هاتوچۆی هەرێمی کوردستان بە وەکالەت و بەڕێوەبەری هاتوچۆکانی پارێزگا و ئیدارە سەربەخۆکان و بەڕێوەبەرانی بەشی مۆڵەت و سەرپەرشتیارانی هۆبەکانی مۆڵەتی شوفێری، کۆبوونەوەیەک بۆ تاوتوێکردنی ژمارەیەک بابەتی گرنگ و پەیوەست بە سەلامەتی هاووڵاتیان تاوتوێکرا. بابەتی یەکەم تایبەت بوو بە جێبەجێکردنی یاسا و ڕێنماییەکانی هاتوچۆ و سەلامەتی رێگاوبان بەسەر هەموو شوفێران و لێپرسینەوەی یاسایی لەگەڵ ئەوانەی سەرکێشی دەکەن و پابەندی پاراستنی مافەکانی بەکارهێنەرانی شەقام نابن. هەروەها گفتوگۆ بەتایبەت لەسەر بابەتی هەبوونی ماتۆرسکیل لە سەرشەقامەکان و بەکارهێنانی بۆ گەیاندنی خواردن کرا. باس لەوە کرا کە ڕێکەوتن کراوە لەگەڵ کۆمپانیاکانی گەیاندنی خواردن کە دەست بکەن بە تۆمارکردنی ماتۆرسکیلەکانیان لە بەرێوەبەرایەتییەکانی هاتوچۆ و هێنانی ماتۆری بێدەنگ و کارەبایی بۆ کەمکردنەوەی ژاوەژاو کە بوونەتە هۆی بێزارکردنی هاووڵاتیان.  بەڕێوەبەرانی هاتوچۆی پارێزگا و ئیدارەکان راسپێردران کە دەست بگرن بەسەر هەر ماتۆرسکیلێک کە دەستکاری دەنگی کردووە و خەڵک هەراسان دەکات، هەروەها ئەو ماتۆرسوارانەی لەسەر شەقامەکان نمایش دەکەن و سەرکێشی دەکەن، هەر ماتۆرسکیلێک تۆمارکراو نەبێت و تابلۆی نەبێت، دەستی بەسەردا دەگیرێت.  کۆبوونەوە داوای لە هاووڵاتیانی ئازیز کرد کە هەماهەنگ بن و هاوکاری حکومەت بن لە کۆنترۆڵکردنی دیاردەی ماتۆرسکیلی بێ سەرەتا و ئەو مەترسیانەی دروستی دەکەن لە ڕێی تۆمارکردنی ماتۆرەکانیان و بەکارنەهێنانی ماتۆری بێ سەرەتا. داوا دەکەین کە دایک و باوکان چاودێری منداڵەکانیان بکەن و ڕێگا نەدەن کەس بە ماتۆری تۆمارنەکراو لەسەر شەقامەکان نمایش بکات و ژیانی خۆی و خەڵکی دیکە بخاتە مەترسی. ئەو جۆرە دیاردانە بە توندی مامەڵەی یاساییان لەگەڵ دەکرێت و دەست بەسەر ماتۆرەکانیان دەگیرێت.  هەروەها کۆبوونەوە جەختی لە جێبەجێکردنی رێکەوتنی نێوان وەزارەت و کۆمپانیاکانی گەیاندنی خواردن کردەوە کە پێویستە پابەند بن بەو ماوەیەی بۆیان دیارکراوە لە تۆمارکردنی ماتۆرەکانیان و هێنانی ماتۆری کارەبایی، بە پێچەوانەوە دەست دەگیرێ بەسەر ماتۆری تۆمار نەکراو و بێ تابلۆ. کۆبوونەوە جارێکی دیکە ئاگاداری کۆمپانیاکانی گەیاندنی خواردن دەکاتەوە کە پێویستە ماتۆرسوارەکانیان پابەند بن بە لێخوڕینی سەلامەت و خێرایی ڕێگەپێدراو. هەر ماتۆرسوارێک لە خێرایی رێگاپێدراو زیاتر شوفێری بکات و لە کامێراکان تۆمار بکرێت، کۆمپانیای گەیاندنی خواردن ناچار دەکرێت سزای دارایی بدات. تەوەرێکی دیکەی کۆبوونەوە باس کردن بوو لە دەستکەوتەکانی کامێراکانی تۆمارکردنی تیژڕۆیی کە بوونەتەوە هۆی کەمبوونەوەی رووداوەکانی هاتوچۆ و مردن و بریندار بوون. وەزارەت پابەندی خۆی بە دامەزراندنی کامێراکان لە هەموو کوردستان کردەوە و پرۆسەکە لە شار و شارۆچکەکان بەردەوامە. بۆ ئەم مەبەستە داوا کرا هاووڵاتیانی خۆشەویست لە پێناوی سەلامەتی خۆیان و کەسوکاریان، پابەند بن بە لێخوڕینی سەلامەت و سەرپێچی و سەرکێشی نەکەن و لە خێرایی ڕێگە پێدراو شوفێری بکەن. تەوەری دیکە تایبەت بوو بە سیستەمی نوێی راهێنان و پەروەردەکردنی شوفێر کە چۆتە بواری جێبەجێکردن.بەمەبەستی ئامادەکردنی شوفێرێکی سەلامەت، پێویست وایە هەموو پێشکەشکارێک بۆ دەرهێنانی مۆڵەتی شوفێری یەکەمجار، بەشداری لە خولەکانی فێربوونی شوفێری بکات بە شێوەی تیۆری و پراکتیکی بۆ ئەوەی کە دەبێتە خاوەن مۆڵەتی شوفێری و دەچێتە سەر شەقام، ببێتە شوفێرێکی خاوەن زانیاری یاسایی و بەئاگا و هۆشیار.  بەم جۆرە شوفێر دەتوانێت باشتر خۆی لە کارەسات بپارێزێ و رێز لە مافەکانی خۆی و بەکارهێنەرانی دیکەی شەقام بگرێت. کۆبوونەوە بەڕێوەبەرانی هاتوچۆی ڕاسپارد کە دەست بکەن بە دابەشکردنی فۆرم بۆ پێشکەشکارانی مۆڵەت و لە هەر شوێنێک پێداویستی بۆ دەستپێکردنی سیستمەکە هەیە، بە پەلە پێداویستییەکان دابین بکرێن. کۆبوونەوە سیستمی نوێی پەروەردەکردنی شوفێری بە دەستکەوتێکی گرنگ زانی و لێژنەکانی چاودێری پرۆسەکەی راسپارد کە هاوکار بن و چاودێری جێبەجێکردنی پرۆژەکە بکەن وەکو ئەوەی پلانی بۆ داندراوە و لە هەردوو ڕێنمایی ژمارە ١١ و ١٢ی ساڵی ٢٠٢٤ی وەزارەتی ناوخۆ باس کراوە.  

لەکاتی بەشداریکردنی لە 17ـەمین پێشانگەی نێودەوڵەتیی هەولێر بۆ کتێب مەسعود بارزانی، سەرۆكی پارتی دیموكراتی كوردستان وتارێکی پێشکەش کرد. باسی لە بارودۆخی عێراق و ناوچەکە، پەیوەندییەکانی هەولێر و بەغدا و پێکهێنانی کابینەی دەیەمی حکوومەتی هەرێمی کوردستانی کرد.  مەسعود بارزانی، سەرۆكی پارتی وتی: داوا لە هەموو لایەنەكان دەكەم بەشداری لە حكومەتدا بكەن، تائێستا هەنگاوی باشنراوە، بەڵام پێویستە پارتی و یەكێتی  پەلەبكەن و هەرچی زووە حكومەت پێكبهێنرێت. هەروەها ئەوەشى خستەڕوو قەیرانی گەورە لەناوچەكەو جیهان رویداوەو، رەنگە قەیرانی گەورەتریش بەڕێوەبێت، تا ئاستێكی باش كێشەكانی نێوان هەرێم و بەغداد چارەسەركراون، بەڵام هێشتا زۆری ماوە. دەقی وتارەکەى  بارزانی لە 17ـەمین پێشانگەی نێودەوڵەتی هەولێر بۆ کتێب: بە ناوی خوای گەورە و مێهرەبان مێوانە بەڕێزەکان، ئامادەبووانی بەڕێز، هەمووتان زۆر بەخێربێن. زۆر خۆشحاڵین بە هاتنتان و ئومێدەوارم وەختێکی خۆش ببەنە سەر لە هەولێر. زۆر سوپاستان دەکەین بۆ هاتنتان. ئەمڕۆ جارێکی تر دەبینین لە هەولێری پایتەختی هەرێمی کوردستان، 17ـەمین پێشانگەی کتێب دەکرێتەوە و ئەمە بووە بە نەریتێک کە جێگەی خۆشحاڵیمانە و بەم بۆنەیەوە دەستخۆشی لە فەخری کەریم دەکەم، هەروەها سوپاس و پێزانینم بۆ دەزگای (المدی) و بۆ هەموو ئەو بەڕێزانەی کە ئەرکیان کێشا و ماندووبوون لە جێبەجێکردنی ئەم بەرنامە ڕێکوپێکە. ساڵ بە ساڵ دەبینین کە پێشانگەی کتێب بەرەوپێشچوونێکی زۆر بەخۆیەوە دەبینێت و هەر ساڵێک باشتر لە ساڵی پێشتر. ئینشائەڵلا ئەم کارە هەر بەردەوام بێت و هەر لە خۆشیدا بتانبینین.  هەرچەند دونیا بەرەوپێش بچێت، تەکنەلۆجیا بەرەوپێش بچێت، ئەو فەرموودەی شاعیری گەورەی عەرەب موتەنەبی، ئەو حەقیقەتە بە زیندوویی دەهێڵێتەوە کە دەڵێت "وخير جليس في الزمان كتاب" قیمەتی کتێب و ئەهەمییەتی کتێب بە هیچ شتێک لاناچێت، بەردەوام دەبێت و هەر بە زیندوویی دەمێنێتەوە. بە دەرفەتی دەزانم باسی چەند بابەتێک بکەم ئەمڕۆ. یەکەم داکۆکی دەکەینەوە لەسەر پابەندبوونمان بەو فەرهەنگەی کە شانازی پێوە دەکەین، فەرهەنگی پێکەوەژیان، یەکتری قبووڵکردن، ئازادی بیروڕا، ئازادی دین، ئازادی مەزهەب. ئەمانە بنەمایەکن کە بە هیچ شێوەیەک موساهەمەیان لەسەر ناکرێت. با هەموو کەسێکیش ئەمە باش بزانێت.  هەروەها دێمە سەر وەزعی ناوخۆی هەرێم. تەبیعی، وەزعی هەرێم بەدەر نییە لە وەزعی ناوچەکە بە گشتی، بەڵام لە ئۆکتۆبەری ساڵی ڕابردوو هەڵبژاردن بوو لە هەرێمی کوردستان کە زۆر کەس و زۆر لایەن وایان دەزانی، هەڵبژاردن ناکرێت، یان ئەگەر هەڵبژاردن کرا، گرفتی گەورە ڕوو دەدات،  موشکیلەی گەورە ڕوو دەدات. هەڵبژاردن کرا و بە شاهیدی نەتەوە یەکگرتووەکان و هەموو ئەو ڕێکخراوانەی کە هاتبوون، هەڵبژاردنێکی بێ گەرد بوو. هیچ هەڵبژاردنێک لەوانەیە لە دونیادا نەبێت، بێ کەموکورتی، بەڵام موقارەنەتەن بە هەڵبژاردنەکانی پێشوو، هەڵبژاردنێکی زۆر زۆر باش بوو و ئەنجامەکانیشی دەرکەوت. ئێمە ئێستەش پێمان خۆشە هەموو ئەوانەی کە کورسییان بەدەست هێناوە، هەر کەسەو بەپێی قەوارەی خۆی، هەموو پێکەوە حکوومەتێک، کابینەیەک دروست بکەین. کوردستان موڵکی هەموومانە و هەمووشمان برای یەکترین، هەموومان کەسی یەکترین. جوان نییە یەکتری بشکێنین، با ئۆپۆزیسیۆن هەبێت، بەڵام ئۆپۆزیسیۆن بۆ ئەوە بێت، ڕێگەی باشتر پیشانی کابینەت بدات، پیشانی حکوومەت و پەرلەمان بدات. با لاپەڕەیەکی تازە بکرێتەوە، لێرەدا جارێکی تر داوا لە هەموو لایەنەکان دەکەم بەشدار بن، بەڵام مەسئولییەتی هەرە گەورە دەکەوێتە سەر شانی پارتی و یەكێتی. تا ئێستە هەنگاوی باشیان ناوە، بەڵام هێشتا ماوە. دەبێت هەرچی زووتر ئیشەکان تەواو بکەن و کابینەکە دروست بکرێت، چونکە وەکوو دەبینین، دەوروبەری ئێمە و لە دونیا هەمووی، قەیرانی گەورە ڕووی داوە و ڕەنگە قەیرانی گەورەش بە ڕێگەوەبن. بۆیە تەنها مەرجی سەرکەوتنی کورد، یەکگرتنی کوردە، کورد و کودستانی. بۆ ئەم مەبەستەش، هەرچی لە تواناماندابێت، دەیکەین. تەوسییەی منیش بۆ هەموو لایەنەکان بە تایبەت بۆ پارتی و یەکێتی، پەلە بکەن لە دروستکردنی کابینەی حکوومەتی هەرێمی کوردستان.  بە نیسبەت هەرێم و بەغدا و وەزعی عێراق بە گشتی، تا حەددێکی باش هەندێک مەشاکل و گیروگرفت چارەسەرکراون بەینی بەغدا و هەولێر، بەڵام هێشتا زۆری ماوە. هەر وەزعی عێراق بە گشتی لە دوای ڕووخانی ڕژێمی بەعس لە ساڵی 2003، عێراقی تازە لەسەر سێ بنەمای ئەساسی دامەزرا؛ هاوبەشی، هاوسەنگی و سازان. یەعنی شەراکەت، تەوازن و تەوافق. بەداخەوە ئیلتیزامی پێ نەکرا. هەروەها لە ساڵی 2005، دەستوورێک نووسراوە بۆ عێراق، کە کورد ڕۆڵێکی سەرەکی بینی لەوەدا و سەدا 85ـی خەڵكی عێراق دەنگی پێ دا. ئەگەر ئیلتیزام بەو دەستوورە کرابا، زۆرێک لەو گرفتانەی کە خەڵكی عێراق بە گشتی و پەیوەندیی هەولێر و بەغدا، ڕەنگە ئەو گرفتانە ڕوویان نەدابا.  ئێستەش چارەسەریی بنەڕەتی، گەڕانەوەیە بۆ ئەو سێ بنەمایە و ئیلتیزامکردن بە دەستوور. بۆ ئەو مەبەستەش هەرچی بە ئێمە بکرێت، ئێمە ئامادەین. دەبێت هەموو ئەو هێزانە، چ لە هەرێم، چ لە بەغدا، جورئەتی ئەوەیان هەبێت، دان بە هەڵەکاندا بنێن و دیسان لاپەڕەیەکی تازە بکەنەوە بۆ ئەوەی عێراقیش تووشی گرفتی گەورەتر نەبێت. هەروەکوو دەبینین لە دەوروبەرمان گرفتی زۆر گەورە هەیە، شەڕی گەورە بەڕێوەیە، شەڕی گەورە ڕووی داوە. ئێمە ئومێدەوارین هەرچی زووتر، ئەو شەڕانە کۆتایی پێ بێت و ئێش و ئازاری ئەو خەڵکە تەواو بێت، چ لە فەڵەستین، چ لە لوبنان، چ لە هەر مەنتیقەیەکی تر. بەڵام لە هەموو گرنگتر ئەوەیە کە دەبێت ئەوانەی ئێستا کار بەدەستن لە بەغدا بە هەموو توانایەک هەوڵ بدەن، عێراق لە تێکەڵاوی ئەو شەڕانە نەبێت. لە کۆتاییدا داوای سەرکەوتن هەم بۆ خەڵکی کوردستان، هەم بۆ خەڵکی عێراق و هەموو گەلانی ناوچەکە دەکەم. تەمەنای بەختەوەریان بۆ دەکەم. تەمەنای ئاشتی و سەلامەتییان بۆ دەکەم. ئێوەش جارێکی دیکە زۆر بەخێربێن سەرچاوان و سوپاستان دەکەین بۆ هاتنتان و هەر لە خۆشیدا بن.  زۆر سوپاس.

بڕیارە سبەی شاندی ئەمریکا و روسیا لە ئیستەنبوڵ چاویان بەیەک بکەوێت و گفتوگۆ لەسەر چالاکیی باڵیۆزخانەکانیان بکەن، بەڵام بابەتی ئۆکراین لە بەرنامەی کاری کۆبوونەوەکەیاندا نییە. تامی بروس گوتەبێژی وەزارەتی دەرەوەی ئەمریکا بە رۆژنامەنووسانی راگەیاند، رۆژی 10ـی ئەم مانگە شاندی ئەمریکا و روسیا بۆ جاری دووەم لە ئیستەنبوڵ کۆدەبنەوە، هیچ دۆسیەیەکی سیاسی و ئەمنی و دۆسیەی ئۆکراینیش لە بەرنامەی کاری کۆبوونەوەی دوو شاندەکەدا نین. بەگوێرەی قسەکانی تامی بروس، سەرنجی کۆبوونەوەکە تەنها لەسەر کاری باڵیۆزخانەکانی روسیا و ئەمریکایە، نەوەک ئاسایکردنەوەی تەواوەتی پەیوەندییە دووقۆڵییەکانیان، چونکە ئەوەیان روونادات هەتا ئاشتی نەگەڕێتەوە بۆ نێوان روسیا و ئۆکراین.

  لە کۆبونەوەی ئەمڕۆیدا، حکومەتی عێراق بڕیاریدا رۆژی (11/11/2025) هەڵبژاردنی ئەنجومەنی نوێنەرانی عێراق بەڕێوەبچێت. نوسینگەی راگەیاندنی سەرۆکوەزیرانی عێراق بڵاویکردەوە، ئه نجومه نی وه زیران ئه مڕۆچوارشەممە بڕیاریدا بە دیاریکردنی رۆژی (11/11/2025) وەک رۆژی هەڵبژاردنی پەرلەمانی عێراق. دیاریکردنی وادەی ئەنجامدانی هەڵبژاردن لەکاتێکدایە، لە چەند رۆژی رابردو، بەشێک لە سەرکردە شیعەکانی عێراق هۆشدارییاندا لە دابەشکردنی وڵاتەکە، ئەگەر بێتو هەڵبژاردەکان دوابخرێن. پێشتر كۆمسیۆنی باڵای هەڵبژاردنەكانی عێراق رایگەیاند، ئەگەر پێش 25.11.2025 هەڵبژاردن نەكرێت، دوای ئەو رێكەوتە ناتوانن هەڵبژاردن بەڕێوەببەن.

  ڕۆژنامەی تایمزی بەریتانی ئاشکرایکردوە، سوپای پاسدارانی ئێران بۆیەکەمجار موشەکی دورمەودای (روکار بەروی زەوی)، بۆ ملیشیاکانی لایەنگری لە عێراق گواستوەتەوە. بەپێی راپۆرتێکی رۆژنامەکە، پرۆسەی گواستنەوەی موشەکەکان هەفتەی رابردو بە هەماهەنگی راستەوخۆی هێزی ئاسمان سوپای پاسدارانی ئێران ئەنجامدراوە، ئەوەش پەرەسندنێکی مەترسیدارە و بۆ زیادبونی گرژییەکانی نێوان ئەمەریکا و ئێران. نوسیویشییەتی: ئێران نەک هەر موشەکی بالیستی کورت مەودوای گواستوەتەوە، بەڵکو چەندین جۆری نوێی موشەکی دورمەودوای گەیاندوەتەوە گروپە چەکدارە هاوپەیمانەکانی کە پێشتر ئەو موشەکانەیان نەبوە، بەوەش دەرفەتیان دەبێت شوێنە دورەکان و تەنانەت ئەوروپاش بکەنە ئامانج. رۆژنامەکە لەزاری سەرچاوەیەکی هەواڵگری ناوچەکەوە بڵاویکردوەتەوە، ئەم هەنگاوە رەنگدانەوەی مانۆڕێکی نائومێدانەی ئێرانە کە مەترسی لەسەر سەقامگیری عێراق و ناوچەکە دروستدەکات، تاران هەوڵدەدات نەخشەی دەسەڵات لەرێگەی بریکارە چەکدارەکانی لە ناوچەکە دوبارە دابڕێژێتەوە. ئەم پێشهاتە دوای ئەوە دێت پێشتر ئاژانسی رۆیتەرز بڵاویکردەوە، بەشێک لە میلیشیاکانی سەر بە ئێران ئامادەیی خۆیان دەربڕیوە بۆ داماڵینی چەک لە پێناو دوکەوتنەوە لە ڕووبەڕوبونەوەی ڕاستەوخۆی سەربازی لەگەڵ هێزەکانی ئەمریکا، بەڵام گواستنەوەی ئەو چەکە پێشکەوتووانە پێچەوانەی ئەم لێدوانانە و گومان دەخاتە سەر مەبەستی ئێران. رۆژنامەی تایمزی بەریتانی باسی لەوەشکردوە، ئەمە یەکەمجارە تاران ئەم جۆرە موشەکە پێشکەوتوانە بگەیەنێتە میلیشیاکانی لە عێراق، ئەم پێشهاتە دەتوانێ ئاڵۆزییەکانی ناوچەکە زیاتر بکات.

  22 ساڵ بەسەر رووخانی رژێمی بەعس تێدەپەڕێت بەڵام شوێنپەجەی تاوانەکانیی بەسەر گەلی کوردستاندا ماوە، رژێمی بەعس چەندین تاوانی وەک ئەنفال و کیمابارانکردن و وێرانکردنی گوندو ئاواییەکانی دژ بە گەلی کوردستان ئەنجامدا. لەدوای 2003ەوە، وێڕای ئەوەی دادگای باڵای تاوانەکان و پەرلەمانی عێراق تاوانەکانی رژێمی لەناوچوویان بە جینۆساید ناساند، بەڵام تاوەکو ئێستا خەڵک و هەرێمی کوردستان قەرەبووی زیانەکانیان نەکراونەتەوە. 22 ساڵە رژێمی بەعس رووخاوە،  بەڵام جێپه‌نجه‌ی تاوانەکانی بەعس لە یادەوەری گەلی کوردستانیان و لە جوگرافیای هەرێمی کوردستاندا هەر ماوە، 36 ساڵ بەر لە ئێستا رژێمی بەعس چەندین تاوانی وەک شاڵاوەکانی ئەنفال و کیمیابارانکردنی ‌‌هەڵەبجە و بێسەروشوێنکردنی بارزانییەکان ئەنجامدا، وێڕای ئەوەی دادگای باڵای تاوانەکان و، پەرلەمانی عێراق لە دەیەی رابردوودا تاوانەکانیان وەکو جینۆساید ناساند بەڵام تاوەکو ئێستا حکومەتە یەک لەدوای یەکەکانی عێراق قەرەبووی کەسوکاری قوربانیان و زیانەکانی هەرێمی کوردستانیان نەکردووەتەوە. 22 ساڵ لەمەوبەر، بتى دیکتاتۆرییەتى رژێمى پێشووى بەعس لە عێراق، رووخا. رژێمێک هەموو جۆرە سەرکوتکارییەکى دژى گەلانى عێراق تاقى کردەوە، هەر لە ئەنفال و کیمیاباران، تا زیندان و ئەشکەنجە. مێژووەکە دەگەڕێتەوە بۆ 19.3.2003، کاتێک پڕۆسەى ئازادى بە ڕابەرایەتى ئەمەریکا و وڵاتانى هاوپەیمان بۆسەر عێراق دەستیپێکرد، دواتر بە رووخانى رژێمى بەعس لە 9.4.2023 کۆتایى هات و لە رۆژێکى وەک ئەمڕۆدا پەیکەرەکە کەوت. 22 ساڵە بەعس لە عێراق رووخاوە، لەگەڵ ئەوەشدا میرات و کاریگەرییەکانی هێشتا لە دیمەنی هاوچەرخی عێراقدا دیارە، ئەوەش چ لە رێگەى ئەو کاولکارییەى ئەنجامیداوە، یان ئەو تاوانە جۆراوجۆرانەى کردوونى، رەنگە کراسى رەشى ژنێکى گەرمیانى باشترین نمونەى ئەو دیمەنەبێت کە پێمان بڵێت، بەعسى چى ئەنجامداوە. لەدوای 22 ساڵ لە رزگارکردنی عێراق لەژێر دەستی رژێمی پێشوی سەدام حسێن، ململانێ سیاسییەکانى ئێستا و بونی ژمارەیەکی زۆر هێز و ملیشیا چەکدارەکان، یەکلاکردنەوەی ناکۆکییەکانی وڵاتان، گەندەڵی دارایی و ئیداری و چەندان گرفتی دیکە، عێراقی دەردەدارکردوە. لە نوێترین ریزبەندى وڵاتانى جیهان لەرووى شەفافى و گەندەڵییەوە کە رێکخراوى شەفافیەتى نێودەوڵەتى بۆ ساڵى 2024 بڵاویکردووەتەوە، عێراق ریزبەندى 140ـەمینى گرتووە لە نێو ئەو 180 وڵاتەى لە راپۆرتەکەدا هاتوون، واتا تەنیا 39 وڵات لە عێراق وەزعیشان باشترە.

  ڕوانگەی سوری بۆ مافەکانى مرۆڤ، ڕایدەگەیەنێت هاوپەیمانی نێودەوڵەتی 20 بارهەڵگری چەک و تەقەمەنی و سوتەمەنی ڕەوانەی ڕۆژائاواى کوردستان دەکات. بەپێى ئەو زانیاریانەى ڕوانگەی سوری بڵاویکردوەتەوە لەدوو ڕۆژى ڕابردوودا ئەو چەک و تەقەمەنى و پێداویستییانە لە هەرێمی کوردستانەوە ڕەوانەی بنکەی سەربازی قەسرەکی دەوروبەری حەسەکەی رۆژاڤای کوردستان کراوە. بنکەی سەربازی قەسرەک بە ئامێری چاودێری و موشەکی دژە فڕۆکە و کامێرای حەراری بەهێز کراوە. هێزەکانی هاوپەیمانی نێودەوڵەتی بەردەوامن لە بەهێزکردن و ئامادەیی زیاترى سەربازیی خۆیان لە سوریا لە ڕێگەی زنجیرەیەک جموجۆڵی لۆجستی و سەربازییەوە.  لە ٣١ی ئازار تا ٦ی نیسان، هێزەکانی ئەمریکا هێزی بەهێزی بەرفراوانیان هێنایە ناو بنکە سەربازییەکانیان لە ناوچە جۆربەجۆرەکانی ڕۆژئاواى کوردستان، لەوانە حەسەکە و دێرەزۆر.  لەماوەی هەفتەیەکی سەرەتای ئەم مانگەدا هاوپەیمانان 82 بارهەڵگر و چوار فڕۆکەی بارهەڵگری پڕ چەک و تەقەمەنیان رەوانەی رۆژاڤا کردوە کە لەڕێگەی فڕۆکەکانەوە چەکی پێشکەوتوو رەوانە کراوە و زۆرینەی بارهەڵگرەکانیش لە هەرێمی کوردستان و عێراقەوە رەوانەی رۆژاڤا کرابوون. هەروەها هێزەکانی هاوپەیمانی نێودەوڵەتی شانبەشانی هێزەکانی سوریای دیموکرات مەشقی سەربازی پێشکەوتوویان ئەنجامدا و ئامانجیان بەرزکردنەوەی سەقامگیری ئەمنی و کۆنترۆڵکردنی ناوچەکە بوو لە بەرامبەر هەڕەشە جۆراوجۆرەکاندا.

  سوپای پاسدارانی ئێران رایگەیاند، گرووپێکی داعشیان لە پارێزگای سنەی رۆژهەڵاتی کوردستان دەستگیرکردووە، ئامانجیان ئەنجامدانی کاری تیرۆرستی بووە لە رێوڕەسمەکانی نەورۆزدا. قەرارگەی حەمزەی سوپای پاسداران لە راگەیەندراوێکدا بەبێ ئەوەی ژمارەی ئەندامانی گرووپە دەستگیرکراوەکە ئاشکرا بکات رایگەیاندووە، "گرووپەکە سەرجەمیان خەڵکی بیانی بوون و لەلایەن داعشەوە مەشق و راهێنانیان پێکراوە" دەشڵێت، گرووپەکە مەبەستیان بووە لەکاتی ئاهەنگەکانی نەورۆز لە پارێزگای سنە هێرشی خۆکوژی ئەنجامبدەن، بەڵام پێش ئەوەی بتوانن هیچ کارێک بکەن، لە ئۆپراسیۆنێکدا دەستگیرکراون و لە گەڵیشیاندا، دەست بەسەر ژمارەیەک پشتێنی خۆکوژی و چەک و نارنجۆکدا گیراوە. سوپای پاسدارانی ئێران راشیگەیاندووە، "ئەو گرووپە تیرۆریستییانە کە لەلایەن وڵاتانی بیانییەوە پاڵپشتی دەکرێن، ئامانجیان تێکدانی ئاسایش و دووبەرەکی خستنە نێوان مەزهەب و پێکهاتەکانی ناو ئێرانە". ئەوە لەکاتێکدایە، ئەمساڵ بە ئاهەنگی فراوانی جەماوەری لە سنە و شار و شارۆچکەکانی دیکەی رۆژهەڵاتی کوردستان پێشوازی لە نەورۆز و سەری ساڵی کوردی کرا.

  سەرۆکی هەرێمی کوردستان رایگەیاند، بەهۆی پشووەکانی جەژنەوە گفتوگۆی پێکهێنانی حکومەت دواکەوتن، بەڵام دەڵێت: "گفتوگۆی جیددی لەنێوان پارتی و یەکێتی هەیە بۆ پێکهێنانی حکومەت."   نێچیرڤان بارزانی، سەرۆکی هەرێمی کوردستان، کە بە سەردانێک لە ئیماراتە، رۆژی سێشەممە 08-04-2025 لەبارەی پێکهێنانی کابینەی دەیەمی حکومەتی هەرێمی کوردستان رایگەیاند: "گفتۆیەکی جدیی لەنێوان ئێمە و یەکێتی هەیە. ئێمە لەسەر رێچکەیەکی دروست بۆ پێکهێنانی حکومەت دەڕۆین."   سەرۆکی هەرێمی کوردستان ئەو دەنگۆیانەی رەتکردنەوە کە پێکهێنانی حکومەت بۆ دوای هەڵبژاردنی پەرلەمانی عێراق دوابخرێت و گوتی، "گفتوگۆی ئێمە بۆ ئەوەیە بەزووترین کات حکومەت پێکبهێندرێت، هیچ نییەتێک نە لەلایەن ئێمە نە لەلایەن یەکێتییەوە بۆ دواخستنی پێکهێنانی حکومەت نییە."   دوایین جار لە 18-3-2025، شاندی دانوستاندنکاری پارتی و یەکێتی لە هەولێر کۆبوونەوە، ئەوکات راگەیێندراوێکی هاوبەشیان بڵاوکردەوە، کە تێیدا هاتبوو کۆبوونەوەکەیان "ئەرێنی" بووە. بڕیارە لە کۆبوونەوەکانی داهاتوویان باسی دابەشکردنی پۆستەکان بکەن.   سەردانەکەی نێچیرڤان بارزانی بۆ ئیمارات هاوکاتە لەگەڵ بەڕێوەچوونی لووتکەی وەبەرهێنان لەو وڵاتە، کە شاندێکی حکومەتی هەرێمی کوردستان بەشدارە و سەرۆکی هەرێمی کوردستان سەردانی کردن.   نێچیرڤان بارزانی رایگەیاند: "ئەو پێشکەوتنانەی هەرێمی کوردستان بەدەست نەدەهاتن، ئەگەر کەرتی تایبەت لەگەڵ حکومەت نەبووایە. دەمانەوێ شایەتی ئەوە بین، کە وەربەهێنەری ناوخۆ زیاتر وەبەرهێنان بکەن، لە دەرەرەش وا بکەین وەبەرهێنەری زیاتر روو لە هەرێمی کوردستان بکەن."   سەرۆکی هەرێمی کوردستان باسی وەبەرهێنانی ئیماراتی کرد لە هەرێمی کوردستان و، گوتی "ئیمارات زۆر بە جیددی هەوڵدەدات رێگەی وەبەرهێنانی لە هەرێمی کوردستان هەبێت، هەوڵدەدەن نێردەی تایبەتی وەبەرهێنان بۆ هەرێمی کو ردستان بنێرن. ئەمەش هەنگاوێکی گەورەیە بۆ وەبەرهێنان لە هەرێمی کوردستان."   نێچیرڤان بارزانی ئاماژەی بەوەدا قەبارەی بازرگانیی نێوان عێراق و هەرێمی کوردستان 30 ملیار دۆلارە، کە بەشێکی لەگەڵ هەرێمی کوردستانە. گوتیشی، ئامانجی ئێمە ئەوەیە وەبەرهێنەری زیاتری ئیماراتی روو لە هەرێمی کوردستان بکەن.   بەپێی ئامارەکانی دەستەی وەبەرهێنان لە 1-8-2006ـەوە تاوەکو 7 تشرینی دووەمی پار، 1,304 پڕۆژە لە هەرێمی کوردستان مۆڵەتیان پێدراوە، کە سەرمایەکەیان 70 ملیار و 870 ملیۆن و 942 هەزار و 995 دۆلار بووە.   سەبارەت بە دۆخی ناوچەکە نێچیرڤان بارزانی رایگەیاند، بە‌غدا بە تایبەتی سەرۆکوەزیران هەموو ئیشێکی کردووە کە نەیانهێشتووە عێراق بکەوێتە نێو ئەو گێژاوە. گوتیشی: "عێراق خۆی کێشەی زۆرە، بە هیچ شێوەیەک نابێت پەلکێش بکرێت بۆ ناو کێشە. سیاسەتی عێراق ئەوەیە کە نەهێڵن ئەو ئاگرە بگاتە عێراق."   هەروەها لەبارەی دەستپێنەکردنەوەی هەناردەی نەوتی هەرێمی کوردستان بە بۆری بۆ تورکیا، نێچیرڤان بارزانی گوتی، هۆکاری دەستپێنەکردنەوەکە "تەکنیکییە".   لە ئاداری 2023ـەوە، هەناردەی 400 هەزار بەرمیل نەوتی رۆژانەی هەرێمی کوردستان و 75 هەزاری دیکەی کەرکووک لە رێگەی بۆرییەکەوە وەستا، ئەوەش دوای بڕیارێکی دادگەیەکی نێوبژیوانیی نێودەوڵەتی لە پاریس لەبەرژەوەندیی حکومەتی فیدراڵیی عێراق.