یەکەم بارە نەوتی هەرێم فرۆشرا

هاوڵاتى ‌ده‌سه‌ڵاتى باڵاى دادوه‌رى عێراق رایگه‌یاند:" سزاى سێجار له‌سێداره‌دان تا مردنى بۆ بکوژى خێزانه‌ کورده‌که‌ى به‌غدا ده‌رکرد" که‌ مانگى (ئه‌یلول/9)ى ساڵى رابردو له‌ شوقه‌که‌یاندا له‌ به‌غدا کوژرابوون. ئه‌مڕۆ دووشه‌ممه‌ 14ى حوزه‌یرانى 2021، ئه‌نجومه‌نى باڵاى دادوه‌رى عێراق له‌راگه‌یه‌ندراوێکدا بڵاویکرده‌وه‌، دادگاى تاوانه‌کانى که‌رخ/به‌غدا سزاى له‌سێداره‌دانى بۆ سێجار به‌سه‌ر تاوانبارى سه‌ره‌کى کوژرانى شیلان داراى چالاکوان و دایک و باوکیدا سه‌پاندوه‌.  ئاماژه‌ به‌وه‌ کراوه‌ که‌ تاوانباره‌که‌ پاش ئه‌وه‌ى که‌ شیلان و باوک و دایکى کوشتوه‌ له‌ناوچه‌ى مه‌نسورى به‌غدا، کرده‌وه‌ى دزیکردنى ئه‌نجامداوه‌ و ماڵ و موڵکى ئه‌و خێزانه‌ى دزیووه‌. به‌پێى بڕیاره‌که‌ى دادگا، به‌پێى مادده‌ى 1/1/406 له‌یاساى سزادانى عێراقى ژماره‌ 11ى و به‌فه‌رمانى ئه‌نجومه‌نى وه‌زیران ژماره‌ 3/یه‌که‌م/4ى ساڵى 2004 سزاى سێ جار له‌سێداره‌دان به‌سه‌ر تاوانباره‌که‌ جێبه‌جێده‌کرێت. بڵاوبونه‌وه‌ى هه‌واڵى کوژرانى دارا ره‌ئوف و عالیه‌ مه‌جیدى هاوسه‌رى و شیلانى کچه‌ تاقانه‌یان له‌تۆڕه‌ کۆمه‌ڵایه‌تیه‌کان و شه‌قامى عێراقى و هه‌رێمى کوردستان ده‌نگدانه‌وه‌ى زۆرى لێکه‌وته‌وه‌، که‌ رۆژى 16ى ئه‌یلولى 2020 له‌ باڵه‌خانه‌که‌یان له‌ گه‌ڕه‌کى مه‌نسوڕى به‌غدا به‌چه‌قۆ کوژران، بۆ رۆژى دواتریش، تاوانبارى سه‌ره‌کى روداوه‌که‌ له‌ شارى هه‌ولێر ده‌ستگیرکرا و راده‌ستى هێزه‌ ئه‌منیه‌کانى به‌غدا کرایه‌وه‌. دارا ره‌ئوف و عالیه‌ مه‌جیدى هاوسه‌رى و شیلانى کچه‌ تاقانه‌یان موڵک و ماڵه‌که‌یان له‌به‌غدا فرۆشتبوو، به‌نیازبون به‌یه‌کجارى بگه‌ڕێنه‌وه‌ سلێمانى و نیشته‌جێبن.  

هاوڵاتى بڕیاره‌ کۆتایى ئه‌م هه‌فته‌یه‌ هونه‌رمه‌ندانى سلێمانى گردبوونه‌وه‌یه‌کى ناڕه‌زایى دژى له‌شکرکێشییه‌کانى تورکیا بۆسه‌ر خاکى هه‌رێم ئه‌نجام بده‌ن، ئه‌مه‌ش دواى بانگه‌وازه‌که‌ى موراد قه‌ره‌یلان یه‌کێک له‌ به‌رێوه‌به‌رانى پارتى کرێکارانى کوردستان(په‌که‌که‌).  موراد قه‌ره‌یلان، ئه‌ندامى کۆماجڤاکێن کوردستان(که‌جه‌که‌) و یه‌کێک له‌ به‌رێوه‌به‌رانى پارتى کرێکارانى کوردستان(په‌که‌که‌) هه‌فته‌ى رابردوو له‌چاوپێکه‌وتنێکى ته‌له‌فزیۆنیدا بانگه‌وازى سه‌رجه‌م لایه‌نه‌ سیاسییه‌کان و به‌تایبه‌ت هونه‌رمه‌ندانى کرد که‌ له‌شکرکێشى تورکیاو هێرشه‌کان سه‌رکۆنه‌ بکه‌ن. ئه‌مڕۆ دووشه‌ممه‌ 14ى حوزه‌یرانى 2021، ژماره‌یه‌ک له‌هونه‌رمه‌ندانى سلێمانى له‌ کۆنگره‌یه‌کى رۆژنامه‌وانیدا رایانگه‌یاند" وه‌ک هونه‌رمه‌ندانى کوردستان دژى هه‌ر هێرشى داگیرکارى ده‌وه‌ستینه‌وه‌ که‌ ده‌کرێته‌سه‌ر هه‌رێمى کوردستان و دژى هه‌ر لایه‌نێکین که‌ ده‌بێته‌ هۆى شه‌ڕى نێوان کورد به‌ کورد". هونه‌رمه‌ندانى سلێمانى ئاماژه‌یان به‌وه‌شکرد، بانگه‌واز ده‌که‌نن که‌ هاوڵاتیان و هونه‌رمه‌ندان و چین و توێژه‌کان ڕۆژى پێنجشه‌ممه‌ 17ى حوزه‌یران له‌گه‌ڵیاندا به‌شدارى رێپێوانێکى هێمنانه‌ى بێ ئاژاوه‌ بکه‌ن و تاپێکه‌وه‌ دژى داگیرکارییه‌کانى ده‌وڵه‌تى تورکیا بۆ سه‌ر خاکى هه‌رێمى کوردستان بوه‌ستنه‌وه‌. بریاره‌ گربونه‌وه‌که‌ کاتژمێر پێنجى سه‌رله‌ئێواره‌ى رۆژى پێنجشه‌ممه‌ له‌به‌رده‌م باخى گشتى بۆ سه‌هۆڵه‌که‌ى سلێمانى ئه‌نجام بدرێت.  

 هاوڵاتى بەڕێوەبەرایەتی ئاسایشی سلێمانی رایگەیاند، لە دوو پرۆسەی هێزەکانی بەڕێوبەرایەتی ئاسایشی سلێمانیدا توانیویانە دەستبەسەر بڕی 207 کیلۆگرام مادەی هۆشبەربگرن و سێ کەسیش کە یەکێکیان مامۆستایە بە تۆمەتی بازرگانیکردن بە مادەهۆشبەرەکان دەستگیرکران.  ئەمڕۆ دووشەممە، بەڕێوەبەرایەتی ئاسایشی سلێمانی تۆمارێکی ڤیدیۆیی بڵاوکردەوە و تیایدا باسی لەوەکرد، لەهەڵمەتێكی بەرفراوانی هێزەكانی بەڕێوەبەرایەتی ئاسایشی سلێمانی بۆ یەكەمجار لەهەرێمی كوردستان لە دوو پرۆسەی جیاوازدا دەست بەسەر بڕی 207 كیلۆ مادەی هۆشبەر لەجۆری هێرۆین و تلێاك گیرا.   بەگوێرەی تۆمارەڤیدیۆیەکەش، ئەو سێ کەسە خەڵکی پاڕێزگای دهۆکن و بەتۆمەتی بازرگانیکردن بە ماددە هۆشبەرەکان دەستگیرکراون و یەکێکیشیان مامۆستایە. دەستگیرکراوەکان پێکهاتوون لە (م، ح، ح) لەدایکبووی ١٩٧٨ە و خەڵکی شاری دهۆکە و دانیشتووی هۆڵندایە و خاوەنی کۆمپانیای گواستنەوەی کەلوپەلە، (ع، ح، ع) لەدایکبووی ١٩٨٤ دانیشتووی دهۆک و مامۆستایە و کاری ژمێریاریی و گەیەنەریی کردووە و (م، ح، ح) لەدایکبووی ١٩٨٦و خەڵکی شاری دهۆکە و کرێکاری کۆمپانیایەکی گواستنەوەی کەلوپەل بووە.

ئارا ئیبراهیم ئەندامێكی بەڕێوەبەری كۆمیتەی پارتی كرێكارانی كوردستان (پەكەكە) دەڵێت:» ئێستا لەنێوان ئێمەو پارتی پەیوەندی هەیەو هەندێك دۆست نێوەنگیری دەكەن شەڕ روونەدات»، دەشڵێت:» داگیركەری تورك گیریخواردووە بەرانبەر بەرخۆدانی گەریلا». ‌موراد قەرەیلان ئەندامی كۆمیتەی بەڕێوەبەری پەكەكە بەشداری لەبەرنامەیەكی تایبەتی تەلەڤزیۆنی ستێرك تی ڤیدا و شیكردنەوەی بۆ رووداوەكانی مەتیناو هەوڵەكانی سوپای تورك بۆ داگیركاری راگەیاند. موراد قەرەیلان ئاماژەی بەوەكرد لەئێستادا دۆزی ئازادی گەلی كورد لەسەردەمێكی زۆر گرنگدا تێدەپەڕێت، لەسەر تێكۆشانی ئازادی گەلی كورد پلانی دوژمن و نەیارەكان هەیە وەك دەزانرێت لەباكوری كوردستان رێبەر ئاپۆ لەساڵی 2013دا ئاگربەستێكی راگەیاندو دوو ساڵ بەردەوام بوو، بەڵام دەوڵەتی تورك بینی كە ئاگربەستەكە لە رۆژهەڵاتی ناوەڕاستدا دەستی گەلی كورد بەهێز دەكات و وادەكات كورد لەهەرێمەكەدا ببێتە هێزێك. بۆ ئەوەش لەگەڵ ئەوەی چاوپێكەوتنەكان گەیشتنە ئەنجامێك و پەیامی هاوبەش بڵاوكرانەوە، بەڵام ئەردۆغان قبوڵی نەكردو لەگەڵ پارتە توندڕەوەكانی وەك باخچەلی و دۆغو پەرینچەك كەدوژمنی گەلی كوردن، هاوپەیمانی بەست و لەبەرانبەر تەڤگەرەكەیان هێرشێكی گشتگیری دەستپێكرد. موراد قەرەیلان باسی لەوەشكرد لەسەر باشوری كوردستانیش داگیركەری دەیەوێت هەنگاو بەهەنگاو خاك داگیربكات. دوای داگیركردنی حەفتانین و بەشێك لەخواكوڕك وەك دەزانرێت لە (23 – 24)ی نیسانی ئەمساڵدا هێرشێك لەبەرانبەر هەرێمەكانی مەتینا، زاپ و ئاڤاشین دروست بوو. ئەمڕۆ (50) رۆژی لەدوای خۆی بەجێهێشت. ئەو ئەندامەی كۆمیتەی بەڕێوەبەری پەكەكە پێشیوابوو لەسەردەمێكی بەم شێوەیەشدا كەهێرشی فراوان لەبەرانبەریان ئەنجامدەدرێت، ئایا چۆن هێرش دەكەنەسەر پێشمەرگە؟ وتیشی:»ئایا ئەمە دەچێتە عەقڵەوە؟ بۆچی بەدەستی خۆمان بەرەیەكی دیكەی شەڕ لەبەرانبەری خۆمان بكەینەوە؟ هەر كەسێك كە كەمێك ژیر بێت و لەشەڕێكی بەم شێوەیەدا بێت، لەشەڕی مان و نەماندا بێت، چۆن بەرەی دووەمی شەڕ لەدژی خۆی بكاتەوە؟ هەم لەشوێنێكی وەك مەتینا!». موراد قەرەیلان ئەوە دووپاتدەكاتەوە كە « پلانیان هەیە كە ئیلاو بیلا پێشمەرگە لەبەرانبەر گەریلا بۆ شەڕ بەكاربهێنن، ئێمەش هیچ فەرمانێكمان نەداوە كە لەدژی پێشمەرگە شەڕ بكرێت و تەڤگەرەكەمان بەهیچ شێوەیەك بڕیارێكی بەم شێوەیەی نەداوە. ئێمە شەڕی كورد و كورد لەم سەردەمەدا وەك كارەسات دەبینین، وەك گەورەترین هەڵە دەبینین». ئەندامی كۆمیتەی بەڕێوەبەری پەكەكە هێمای بۆ ئەوەشكرد لەسەر ئەم بناغەیە پێویستە باش لە رووداوەكەی مەتینا تێبگەن كاتژمێر چواری سەرلەبەیانی لەدوو لاوە، بەهەموو ئامێرێكی شەڕو بە ئۆتۆمبێڵی زرێپۆش، خۆیان بۆ شەڕ ئامادە كردو هاتنە ناو هەرێمەكانی گەریلا، بە راستی هیچ واتایەكی نییە، ئەو هەرێمانە هەرێمی سەربازین و (25) ساڵە پێشمەرگە نەچووەتە ئەو هەرێمانەو هەرێمێكە لەژێر كۆنتڕۆڵی گەریلادایە.  موراد قەرەیلان ویشی:»بێ ئەوەی ئاگادارییەك بدەن هەڵیانكوتایە سەر هەرێمەكە، ئایا سەد ئۆتۆمبێڵی سەربازیی زرێپۆش راستە؟ دەڵێن، (ئێمە لەوێ سەروەرین، بۆ ئەوەی لەگردێك بچین بۆ گردێكی دیكە، یان بچینە شوێنێكی پێویست، فەرمان لەكەس وەرناگرین. ئێمە لێرەین و ئێمە سەروەرین)، قەرەیلان وتی:»سەر سەری من، باشە تۆ سەروەری. كاكی خۆم پێنج كیلۆمەتر نزیكی لەوێ شەڕ هەیە، ئێستا بچۆ لایەكەوە، بۆچی هاوكاری توركیا دەكەی؟، تو سەروەربە باشە. دۆخێكی نائاسایی هەیە، وا دەیبینی لەبەرانبەر دوكەڵ هەیە، زەویەكان دەسووتێن و فڕۆكە دەگەڕێت، تۆپ كاردەكات و تۆش هاتوویت و لەپشتەوە دەستت بەجووڵە كردووە. ئەمە تاچ رادەیەك دۆخێكی مرۆڤییە، ئەمە تا چ رادەیەك یاساییەو تاچ رادەیەك كوردپەروەرییە؟». بەرێوەبەری كۆنسەی پەكەكە وتی:»ئێستا لەنێوان ئێمەو پارتی پەیوەندی هەیە، هەندێك دۆست نێوەنگیری دەكەن. لەم رۆژەدا كەئێمە لەسەدەی (21)داین، هەموو مرۆڤێك كێشەكانی بەگفتوگۆ و دیالۆگ چارەسەر دەكەن، باشە، ئێمەی كورد بۆچی بەدیالۆگ كێشەكانمان چارەسەر ناكەین، بۆچی دەیانەوێت بەسەربازیی بیكەن، بەبێدەنگی، سەربازو لەناكاودا هێرش دەكەن، بۆچی، هۆكار چییە و ئەمە لەخزمەتی كێدایە؟». «ئێستا لەباكوری مەتینا لەهێڵی كێستێ و گردی زەندورا، هەرێمی زاپ لەقەڵای بەدەوێ، لەئاڤاشین لەدۆڵی ماران و لەگردی مەرڤانۆس داگیركەری تورك گیریخواردووەو ناتوانێت پێشبكەوێت، ئەو بەرخۆدانەی ئەمڕۆ لەگردی زەندورا و مەرڤانۆس دەكرێت، بۆ هەموو كوردێك جێگەی شانازیی و شادومانیە. بە راستی كوڕ‌ و كچە كوردەكان بەشێوازێكی نوێ، ئەمە (47) رۆژە لەبەرانبەر داگیركەری تورك بەرخۆدان دەكەن و رێگەنادەن داگیركەری تورك پێشڕەوی بكات...فڕۆكە، تۆپ هەموو جۆرە گازی ژەهراوی بەكاردەهێنن، بەڵام داگیركەری ناتوانێت بەرخۆدانی گەریلا بشكێنێت. لەبەرانبەر گەریلا گیری خواردووە». قەرەیلان ئاماژە بەكارێكی مەترسیدار دەكات كە سوپای تورك «خائینان» لە دژی گەریلا بەكاردەهێنن، وتی:»بۆ ئەوەی بتوانن گردی زەندورا بگرن، كورد بەكاردەهێنن، لەنێو جاشەكانی سێگركێدا كوردی خائین هەیە، دەیانەوێت ئەوان بخەنە تونێلەكانی شەڕ لە زەندورا، بەڵام ناتوانن. كورد دەخەنە پیش خۆیان و دەیانەوێت بەدەستی كورد ئەم بەرخۆدانە بشكێ. قەریلان پێشیوابوو كە «ئێمە بمانەوێت و نەمانەوێت، ئەو بڕیارو دەستوەردانەی پارتی لەسەر چیای مەتینا، بۆ توركیا دەبێتە پشتگیری و بۆ بەرخۆدانی گەریلا لەگردی زەندورا تێكبچێت، هەوڵدانێكە، ئەوان دەتوانن بڵێن وانییە، بەڵام بمانەوێ و نەمانەوێ تەڵەكە بەم شێوەیەیە، راستەوخۆ یان ناڕاستەوخۆ ئەو رۆڵە دەبینن». موراد قەرەیلان نهێنییەك ئاشكرا دەكات و دەڵێت:» بەڕاستی شتێكی شاراوە بوو، تا ئێستا من دەمگوت ئەگەر كاك مەسعود ببینم، ئەو شتەی پێڕادەگەیەنم، یان بەرپرسانی پارتی ببینم پێیان دەڵێم، بەڵام ئێستا بۆ رای گشتی كورد ئاشكرای دەكەم، بەر لەچەند مانگێك لە رێگەی هەندێك دۆست، دەوڵەتی تورك هەتا تەیب ئەردۆغان خۆی، داوای لەئێمە كردبوو كە (لەناو توركیا واتە باكوری كوردستان ئێوە ئاگربەست رابگەیەنن، ئێوە لەبەشەكانی دیكەی كوردستان هەرچیەك دەكەن، ئێمە سەرقاڵی نابین)، واتە لەگەڵ ئێمەدا ئاگربەست رابگەیەنن، ئەوەتە شەڕتان لەگەڵ پارتی هەیە، بڕۆن لەگەڵ ئەوان شەڕ بكەن. ئەمە یاری دوژمنە. پێویستە لەبەرانبەر ئەم یارییەی دوژمن هوشیار بین». موراد قەرەیلان ئاماژەی بە ئامانجەكانی پارتی بۆ مەتینا كردو باسی لەوەكرد لەسەر مەتینا دۆڵ و كەندێكی زۆر گرنگ هەیە، كە مەتینا دەكات بە دوو بەشەوە. هێزەكانی پارتی دیموكراتی كوردستان (پارتی) لەوێ جێگیر بوون. لەوێ لەحەوت شوێن و خاڵدا خۆیان جێگیركردووە، «هێزەكانی ئێمەش لەو شوێنانەوە نزیكن، ئەمڕۆ زانیارییان پێدام، كە بەرەو ئێمە رێگا دروستدەكەن. نێوانمان (200) بۆ (300) مەترە». ئێمە (40) ساڵە لێرەین، بۆ تا ئێستا ئەوەتان نەدەوت، بابەتی دووەم ئەوەیە، لەئاگربەستی 2013دا، كە رۆڵی كاك مەسعودیشی تێدا بوو، بەڕەزامەندیی ئەوان و بەقبوڵكردن و پەسەندكردنی هەمووان ئێمە گەریلاكانمان لەباكوورەوە كشاندەوە بۆ باشووری كوردستان، ئەو كاتە هەموویان ئەوەیان قبوڵ بوو   قەرەیلان دەشڵێت:» هێزەكانمان لێمان دەپرسن و دەڵێن، (ئێمە چی بكەین؟) ئێمەش وتمان، ‹هەڤاڵان ئێستا راوەستن. یانی بڵێیت كارێك بكەن، كە رێگاكە بهێنن تاشوێنەكەی ئێوە؟› یانی بابەتێكی هەستیاری لەو جۆرە لەگۆڕێدایە، لەوێ سەنگەری شەڕ دروست دەكەن، حەفارە و شۆفڵ و زرێپۆشیان هێناوە، لەهەمان كاتدا بەرەو كامپەكانی هەڤاڵانمان دەڕۆن». هاوكات موراد قەرەیلان وتیشی: »ئێمە (40) ساڵە لێرەین، بۆ تا ئێستا ئەوەتان نەدەوت، بابەتی دووەم ئەوەیە، لەئاگربەستی 2013دا، كە رۆڵی كاك مەسعودیشی تێدا بوو، بەڕەزامەندیی ئەوان و بەقبوڵكردن و پەسەندكردنی هەمووان ئێمە گەریلاكانمان لەباكوورەوە كشاندەوە بۆ باشووری كوردستان، ئەو كاتە هەموویان ئەوەیان قبوڵ بوو، دوای ئەوە دەوڵەتی تورك پرۆسەی ئاشتیی تێكداو خواستی بەشەڕ كۆتایی بە ئێمە بهێنێت، لە باكوورو باشوور لەهەموو شوێنێكدا هێرشی كردە سەرمان». بەڕێوەبەری پەكەكە وتیشی:»ئێستا لەمەتینا دۆخێكی مەترسیدار هەیە، هەموو ساتێك ئەگەری ئەوە هەیە لەنێوان ئێمە و پارتیدا شەڕ رووبدات، من بۆ ئەوە بانگەوازم هەیە و لەپێش هەمووانەوە داوا لەكۆنگرەی نەتەوەیی كوردستان (كەنەكە) دەكەم، داوا لەهەموو حزبە سیاسییەكانی هەر چوار پارچەی كوردستان دەكەم، بەڕاستی ئێستا دۆخێكی جددی هەیە ئێمە نامانەوێت شەڕی كوشتنی خوشك و برا رووبدات، بەڵام خۆیان خستووەتە ناو شەڕەكەی ئێمە». «داوا دەكەم بەرپرسانی پەدەكەو یەنەكە، گۆڕان، یەكگرتوو، كۆمەڵ، زەحمەتكێشان، سۆسیالیست، حزبی شیوعی، هەموو رۆشنبیران، هونەرمەندان، رێكخراوە مەدەنییەكان لەبەرامبەر ئەوەدا هەڵوێستیان هەبێت و بڕۆن بۆ ئەوێ،  رەنگە مرۆڤ نەتوانێت بڕوات بۆ ئاڤاشین و زاپ و هەندێك شوێنی تر، چونكە رۆیشتن بۆ ئەو شوێنانە زەحمەتە، بەڵام رێگای مەتینا كراوەیەو رێگاكە دێت تا ناوەند، هەر كەس بیەوێت دەتوانێت بێت و سەیر بكات تابزانێت كێ مافدارە و كێ مافدار نییە. دەستی خۆتان بخەنەسەر رووداوەكە، ئێمە هەرگیز لەدژی سەروەریی حكومەتی هەرێمی كوردستان نین». «هەموو تەمەنی خۆمم بۆ كوردستان تەرخانكردووە، هەموو هەڤاڵانی تریشمان تەمەنی خۆیان بۆ كوردستان تەرخانكردووە، من ئەو تەمەنەشی ماومە تادوا هەناسە بۆ كوردستانی تەرخان دەكەم، دڵم دەسوتێت و ئاگر دەگرێت. حزبەكەمان نایەوێت، سەرۆكایەتیمان نایەوێت جارێكیتر شەڕی كوردو كورد رووبدات». «لەسەر شاخی زەندوراو لەهەموو شاخەكاندا سەربازانی تورك ورەیان رووخاوە، ماندو شەكەت بوون، باری دەروونییان تێكچووە، هیچ ورەیان بە بەرەوە نەماوە و بۆ ئەوەش هەموو دوو رۆژ جارێك هەموو سەربازەكان ئاڵوگۆڕدەكەن، ئێمە دوژمنمان چەقاندووەو بە بنبەستمان گەیاندووە، بەڵام ئەو دوژمنە دڕندەیەو بەسەرماندا دێت. ئەگەر ئێوە هاوكاریمان ناكەن، بۆ رێگریمان لێدەكەن و گرفتمان بۆ دروستدەكەن و دێنە سەر رێگامان»، قەرەیلان وای وت. لەبارەی وردەكاری رووداوەكەی مەتینا موراد قەرەیلان جەخت لەوە دەكاتەوە كە بەپێی راپۆرتی فەرمیی هەڤاڵانیان لەوێ و بەپێی ئەو رووداوەی روویداوەو بەپێی شتە بەرچاوەكان وادیارە رووداوەكە بەمشێوەیە روویدابێت؛ «ئەو هێزە لەلای باكوورەوە یانی لەلای كانی ماسییەوە قۆڵێكی دەستی جموجوڵ كردو قۆڵێكی تریشی لەلای ئامێدییەوە دەستی بەجموجوڵ كرد، ئەو قۆڵەی لە كانی ماسییەوە دێت، هەڤاڵان لەسەر رێگە بۆ ئەوەی رایانبگرن و نەڕوات، بۆ هۆشیاركردنەوەو ئاگاداركردنەوەیان گولـلەیان تەقاندووە، بەڵام راناوەستن و تێدەپەڕن. لەوێ بەدواوە ئەو ئۆتۆمبێلە زرێپۆشە دەتەقێتەوە. موراد قەرەیلان ئەوە دووپاتدەكاتەوە كە لێكۆڵینەوەیان لەسەر كردو جارێكیتر پرسیاریان لەسەری كرد هەڤاڵانیان هیچ چەكێكی وەك مووشەك، كە ئەو ئۆتۆمبێلە بتەقێنێتەوە و پارچەی بكات و مرۆڤی تیادا بكوژێت، بەكارنەهێناوە، هەڤاڵانی ئەوێش سەریان سوڕماوە، ئەو رووداوە چۆن روویداوە، بەڵام لەو كاتەدا پێنج بۆ شەش فڕۆكەی چاودێری بەئاسمانی ئەو ناوچەیەوە بوون، وتیشی:»ئێمە لەو ئۆتۆمبێلەمان نەداوە، بەڵام ئەوان (پارتی) ئێستا دەڵێن، (پەكەكە خۆی دانی بەوەدا ناوە، كەتەقەی كردووە)، ئێمە بەچەكی كەسی تەقەمان كردووە نەك تەقەیەك، كە زرێپۆشێك تێكبشكێنێت، جگە لەوەش ئەو مرۆڤانە بەپارچەی بۆمب یان بەهۆی تەقینەوەكەوە زیانیان بەرنەكەوتووە، بەڵكو ئەوەندەی ئێمە بەدوایدا چوون، ئەو كەسانە سووتاون. لەبەر ئەوەشە دیارە بەرامبەریان مووشەك، یان رۆكێتی ئاگرین بەكارهاتووە». ئەو ئەندامەی بەرێوەبەرێتی پارتی كرێكارانی كوردستان داوا دەكات كە دەستەیەك لەهەردوو لایەن پێكبهێنرێت، یان دەستەیەكی سەربەخۆ بێت و لەڕووی تەكنیكییەوە لێكۆڵینەوەی لەسەر بكات، وتی» لەپێناو ئەو مرۆڤانەدا، كە گیانیان لەدەستداوە دەبێت مرۆڤ ئەو لێكۆڵینەوەیە بكات. من ئەوە دەڵێم، كە ئەو كەسانە بێتاوانن». هەروەها قەرەیلان جەختی لەوەشكردەوە كە» ئێمە ئەوەشمان بۆ روون بووەتەوە، كە زۆرێك لەو كەسانە نازانن دەیانبەن بۆ كوێ، بێگومان ئەوانە مرۆڤی بێتاوانن، كە ژیانی خۆیان لەدەستداوەو شەهیدن، من سەرەخۆشی لەبنەماڵەكانیان، لەكەسوكارەكانیان دەكەم، بۆ هەموو بریندارەكان هیوای چاكبوونەوە دەخوازم، ئەو رووداوە ئێمەی غەمگین كرد، بەڕاستی ئەوە شتێكە، كەهیچ كەسێك خوازیاری نەبوو، ئێمە نامانەوێت لە نێوانماندا شەڕێك رووبدات. ئەو رووداوە بەو شێوەیە پێكهات، لەبەرئەوەش ئێمە دەمانەوێت لێكۆڵینەوەی لەسەر بكرێت».  

  هاوڵاتى بەشێک لەكارمەندانی نەخۆشخانەی هیوا لەشاری سلێمانی گردبونەوە و دەڵێن، ماوەی زیاتر لە شەش مانگە ئەو کارمەندانەی کە دەوامی زیادەیان کردوە پارەیان خەرج نەکراوە، بەڕێوەبەری نەخۆشخانەکەش رایگەیاند، بەبێ گەڕانەوە بۆ ئەوان و بەبێ راوێژ لەگەڵ هیچ پزیشکێکی بڕیاری کەمکردنەوەی پارەی نەخۆشخانە شێرپەنجەییەکان دراوە.  یاد نەقشبەندی، بەڕێوەبەری نەخۆشخانەی هیوا ئەمڕۆ لە کۆنگرەیەکی رۆژنامەوانیدا رایگەیاند، "ئەو پارەیەی کە دانراوە بۆ سەنتەرە شێرپەنجەییەکانی سنوری پارێزگای سلێمانی بەهیچ شێوازێک ناتوانرێت خزمەتگوزاری تەندروستی شێرپەنجە بەردەوام ببێت، هیوادارن بچن سەیری قاوشەکان بکەن بەتایبەتی بەشی منداڵان کە ئەو پزیشکانەی لەوێن هەشت پزیشک بون رۆژانە هەمو رۆژێک لە 8:00ەوە بۆ 5:00ەوە دەوامیان کردوە، لەدوای ئەوە هەرچیەک روبدات بەڕاستی کارەساتە و قورسە، نەخۆش هەیە زیاتر لە سێ ساڵە خزمەتی دەکەین ئێستا ناتوانین بەو بڕە پارە کەمەی تەرخانکراوە خزمەتیان بکەین".  ئاماژەی بەوەشکرد، بەبێ گەڕانەوە بۆ ئەوان و بەبێ راوێژ لەگەڵ هیچ پزیشکێکی بڕیاری کەمکردنەوەی پارەی نەخۆشخانە شێرپەنجەییەکان دراوە و "بەداخەوە سەنتەر هەیە لە سنوری هەرێمی کوردستان سیستمی کۆمپیوتەری تێدا نیە و نەخۆش بە وەرەقە دەبینرێت کارمەندی ئایتی بۆ دانراوە".  بەڕێوەبەری نەخۆشخانەی هیوا باسی لەوەشکرد، "داواکارم لە وەزیری تەندروستی کە لەسەرەتاوە خەمخۆری ئەم بابەتە بوە و هیوادارم لەسەر ئەم بابەتە سوربێت و ئەو نوسراوەی کە بۆ ئەنجومەنی وەزیرانی بەرزکردوەتەوە لە 24-5-2021دا هەمان میلاک بگەڕێتەوە تاوەکو بتوانین خزمەت بە توشبوانی شێرپەنجە بکەین".  لەبارەی بونی کێشەی دەرمان، یاد نەقشبەندی وتی، "ئەو بابەتە لە ئێستادا هەنگاوی باشی بڕیوە و لەگەڵ کۆمپانیاکان قسە کراوە و بەڵێندراوە کە ئەوان هاوکاربن لە دابینکردنی ئەو دەرمانانەی کە ئێمە پێویستمان پێیەتی، بەڵام گرنگترین سەرچاوە لە کەرتی تەندروستیدا سەرچاوەی مرۆییە و کە پزیشک و کارمەند بونی نەبو، ئەگەر نەخۆشخانەی هیوا پڕبێت لە دەرمانیش نەخۆش ناتوانێت سود لە دەنکە حەپێک وەربگرێت".  ئەوەشی خستەڕو، "ئەم گرفتە تەنها لە نەخۆشخانەی هیوا نیە بەڵکو بەشی فریاکەوتنی نەخۆشخانەی شاریش دەگرێتەوە چونکە میلاکی ئەوانیش لە 45 میلاک کە داواکراوە تەنها 14 میلاکیان بۆ کراوە، کە ئەوەش خزمەتگوزاری کەمدەکاتەوە لەکاتێکدا زۆربەی حاڵەتە کتوپڕەکان لەسنوری پارێزگای سلێمانی و هەڵەبجە و دەوروبەری لەسەر نەخۆشخانەی شارە".

شاناز حەسەن رێواز فایەق سەرۆكی پەرلەمان و لیژنەی ناوخۆ شەفاعەتیان گەیاندە ئاسایشی هەولێر تاكەسوكاری سزادراوانی بادینان، لەزیندان چاویان پێیان بكەوێت، هاوسەری شێروان شێروانیش دەڵێت:» دوێنێ یەكشەممە سەردانیان كردوون و توانیومانە (10) خولەك بیانبینین». ئەیهان سەعید، نوێنەری زیندانیان لەلێدوانێكدا بەهاوڵاتی وت:»رۆژی پێنجشەممەی هەفتەی رابردوو سەرۆكی پەرلەمانی كوردستان و لیژنەی ناوخۆ لەگەڵ ئاسایشی هەولێر گفتوگۆیان كردووەو مۆڵەتیان بۆ وەرگرتین دوێنێ یەكشەممە سەردانی كەسوكارمان بكەین». ناوبراو ئاماژەی بەوەشكرد لەئێستادا ئومێدیان زۆرە تانە لێدانەوەی دادگای پێداچوونەوە كە بە بڕیارەكەدا بچێتەوە، چونكە» بەڵگەكان زۆر جیاوازن و كارمان بۆیان كردووە». نوێنەری زیندانییان جەختی لەوەشكردەوە لەئێستادا دەیانەوێت سزاكە هەڵبوەشێنرێتەوە، نایانەوێت تاهەتایە لەسەریان بمێنێت. هاوسەری رۆژنامەنووس شێروان شێروانی لەلێدوانێكدا بۆ ‌هاوڵاتی ئاماژەی بەوەكرد دوای چەندین مانگ دوێنێ یەكشەممە توانییان بۆ ماوەی (10) خولەك بچینە لایان. روگەش جەباری هاوسەری رۆژنامەنوس شێروان شێروانی، وتیشی:» شێروان تەنیا وتی تۆ ئومێدت لەدەست مەدەو ئاگاداری منداڵەكان بەو ئێمەش چاوەڕێی ئەم تانە لێدانەی ئەمجارەین». ئەمە دووەم جارە تانە لەبڕیارەكەی دادگای پێداچوونەوە بدرێت و پارێزەرانی زیندانیان ئاماژە بەوەدەدەن گەشبینن ئەمجارە ئەنجامی هەبێت و سزاكە هەڵبوەشێنرێتەوە. بەشدار حەسەن پارێزەری سزادراوانی بادینان لەلێدوانێكدا بەهاوڵاتی وت:»ئێمە راستكردنەوەی بڕیاری پێداچوونەوەكەمان داوەو چاوەڕوانی ئەوەین، چونكە بڕیارەكەی دادگای پێداچوونەوە لەگەڵ سزاكە ئەرزو ئاسمانی فەرقەو جیاوازە، بەڵگەكان یەكناگرنەوە، بۆیە پێویستە كاری لەسەربكرێت و چاوەڕێی ئەوەین». ئەم پارێزەرە جەختی لەوەشكردەوە، دۆسیەكانیان بەوردی خوێندۆتەوەو فشارەكان زۆرن لەئێستادا بۆیە ئومێدیان زۆرە ئەنجامی هەبێت. نیاز عەبدوڵڵا، رۆژنامەنوس پێیوابوو بەدەر لەم كەیسانە كەیسی تریشیان هەیە كە»لەلایەن هێزی دەمامگدارەوە فڕێندراون و بێسەروشوێن كراون، بۆیە بەتەواوی پێچەوانەی یاسایەو بڕیارەكان تەنیا حزبی و سیاسین و دورن لەبڕیارێكی دادپەروەریانە».

هاوڵاتى  به‌هۆی ته‌قینه‌وه‌ی نارنجۆكێكه‌وه‌ له‌ گه‌ڕه‌كی شاره‌وانی هه‌ڵه‌بجه‌، گه‌نجێك گیانی له‌ ده‌ستدا، بەڕێوەبەرایەتی ئاسایشی شارەزووریش رایدەگەیەنێت کە رووداوەکە خۆکوژی بووە. ئەمڕۆ دووشەممە 14-06-2021 به‌ڕێوه‌به‌رایه‌تی ئاسایشی شاره‌زوور له‌ راگه‌یاندراوێكدا رایگه‌یاند: سه‌باره‌ت به‌و رووداوه‌ی سه‌رله‌به‌یانی ئه‌مڕۆ كه‌ له‌ پارێكێكی گه‌ڕه‌كی شاره‌وانی هه‌ڵه‌بجه‌ روویداوه‌، گه‌نجێكی له‌دایكبووی ساڵی (1992) كاتژمێر نۆی سه‌رله‌به‌یانی رۆیشتوه‌ته‌ پاركه‌كه‌ و دووباخه‌وانی لێبوه‌ دوای  سڵاو كردن له‌ باخه‌وانه‌كان و دووركه‌وتنه‌وه‌ لێیان به‌ماوه‌یه‌كی كه‌م ده‌نگێك بیستراوه‌. ئاسایشی شاره‌زوور ئاماژه‌ی به‌وه‌شداوه‌: "دوای ئاگادار بوون و گه‌شتنی هێزه‌كانمان به‌ شوێنی رووداوه‌كه‌ له‌ لێكۆڵینه‌وه‌ سه‌ره‌تایبه‌كاندا ده‌ركه‌وتوه‌ كه‌ كه‌سێكه‌ به‌ناوی  (رێكان ته‌حسین فه‌تاح) كۆتایی به‌ژیانی خۆی هێناوه‌، رووداوه‌كه‌‌ رووداوێكی خۆكوژی بووه‌ و له‌ رێگه‌ی نارنجۆكێكی ده‌نگیه‌وه‌ بووه‌، لێكۆڵینه‌وه‌ی زیاتر به‌رده‌وامه‌". 

هاوڵاتی. دهۆك لەسەرەتای  ئۆپراسیۆنی سەربازیی توركیا كە لەمانگی نیسانەوە دەستیپێكردووە بۆ سەر ناحیەی كانێ‌ ماسی یەك گوند چوڵكرا، بەڵام لەئێستادا ژمارەیان زیاد بووە بۆ پێنج گوندو (10) هەزار دۆنم زەویش سووتان . تاكە گوندی سنوری ناحیەی كانێ ماسی كەئێستا رۆژانە دەوروبەرەكەی بۆردوومان دەكرێت (گوندی هرورە) كە تائێستا چۆڵنەكراوە، سەڕەرای بەركەوتنی زیانێكی زۆر بەر دانیشتوانەكەی و برینداربوونی هاونیشتیمانیەكی هرور. شڤان هروری، خەڵكی گوندی هرور لەلێدوانێكدا بۆ هاوڵاتی،  ئاماژەی بەوەكرد رۆژانە لەدەوروبەری گوندی هرور بۆردومان دەكرێت، هەندێكجار بۆردوومانەكە تەنها یەك كێلومەتر لەدەوروبەری گوندەكە دوورە، زیانێكی زۆر بە هاونیشتیمانیان كەوتووە، وەك سووتانی سەدان دۆنم زەوی. شڤان هروری وتیشی:» پێش هەفتەیەك سوپای توركیا چەند توپێكی لەدەوروبەری گوندی هرور دا كە ئەوكات زۆر نزیكبوون لەمەڕو  ماڵاتەكان، ئەوانەی خاوەنی مەڕەكانن دەیفرۆشن لەترسی بۆردومانەكان ئێستا تەنها پێنج خێزان لەكۆی (50) سەرۆك خێزان لە گوندی هرۆر مەڕ بەخێودەكەن، بەڵام ئامادەنین بۆ هیچ كەس و لایەنێك چۆڵی بكەین». بەڕێوەبەری ناحەی كانی ماسی ئەوە دووپاتدەكاتەوە كە سەربەست سەبری، بەڕێوەبەری ناحیەی كانێ ماسی لەلێدوانێكدا بەهاوڵاتی وت: « دۆخی ناوچەكە كەمێك گۆڕانكاری بەسەردا هاتووە، بەڵام بۆردوومان و شەڕی پەكەكەو توركیا هەر بەردەوامە». ناوبراو باسی لەوەشكرد تائێستا پێنج گوند لەسنوری ناحیەكە بەهۆی شەڕی توركیاو پەكەكە چوڵكراون، زیاتر لە (10) هەزار دۆنم زەوی سووتاون»بەداخەوە دوو كەسیش لەسنوری ناحیەكە برینداربوون». هەفتەی رابردوو وەفدێك كەپێكهاتبوون لەئەندامانی پەرلەمانی عێراق و كۆمەڵێك لەپەرلەمانتارانی كوردستانی سەردانی قەزای ئامێدی و زاخۆیان كرد، ئامانج لەسەردانەكەیان نووسینەوەی راپۆرتێكی وردە لەسەر دوایین پێشهاتەكانی ناوچەكەو زیانەكانی بۆردومانەكانی توركیا. لەبارەی داواكاری بەرپرسانی ناوچەكە بۆ وەفدەكەی عێراق و پەرلەمانی كوردستان، سەربەست سەبری وتی: «ئێمە زۆر بەڕوون و ئاشكرا بەوەفدەكەی پەرلەمانی عێراقمان وت پێویستە سەرۆك كۆماری عێراق بەپێی ماددەكانی (67) و (114) كەتایبەتن بەسەروەری عێراق و پاراستنی سنورەكان دەستەڵاتی خۆی بەكاربێنێت تاچیتر ناوچەكە بۆردوومان نەكرێت، نووسینی راپۆرت و بەدواداچوون بێت هیچ سوودی نیە، دەبێت شتێك بەكردەوە بكرێت، چونكە ناوچەكە وردە وردە چۆڵ دەبێت «.  

شاناز حەسەن یاریدەدەری سەرۆكی حكومەت بۆ كاروباری دارایی و وەبەرهێنان و ئەنجومەنی راژە پەردەی لەسەر نهێنییەكی دارایی كابینەی نۆیەم ئاشكراكرد كەبڕی دانەوەی قەرزەكان مانگانە (253) ملیۆن دۆلارو بەدینار (379) ملیارو (500) ملیۆن دینار دەكات. بڕیارە ئەمڕۆ دووشەممە دانیشتنێكی تایبەت لەپەرلەمانی كوردستان لەسەر لێبڕینی مووچەی فەرمانبەرانی هەرێم بێت و پەرلەمانتارانیش دەڵێن:» دارایی هەرێم لەبارودۆخێكی باشدایە كاتی ئەوە هاتووە لێبڕین لەمووچە نەمێنێت». دانیشتنی پێشتری پەرلەمانی كوردستان لەلایەن پەرلەمانتارانەوە واژۆ كۆكرایەوە بۆ ئەوەی لەدانیشتنی داهاتوودا حكومەت بانگ بكرێتە پەرلەمان و هۆكارەكانی لێبڕینی موچە روونبكاتەوە. رۆژی شەممە رێباز حەملان، یاریدەدەری سەرۆكی حكومەت بۆ دارایی و وەبەرهێنان و ئەنجومەنی راژە رایگەیاند:»حكومەتی هەرێم مانگانە بری (253) ملیۆن دۆلار قەرز دەداتەوە». رێباز حەملان راشیگەیاند:»ئەگەر بەغدا پارەش بنێرێت ناتوانین بڵێین سەدا سەد لێبڕینی موچە كۆتایی پێدێت»، چونكە بەپێی داهاتی بەردەستی خۆیان و پارەكەی بەغدا بڕیار لەسەر موچە دەدەین بێ لێبڕین دابەش بكرێت. هەروەها راشیگەیاند:» نەوتمان فرۆشتووە تەواوی داهاتەكەی بۆ موچە نییەو دەبێت قەرزی لێبدەینەوە، چونكە مانگانە (253) ملیۆن دۆلار قەرز دەدەینەوە». بەپێی وتەكانی رێباز حەملان بێت، حكومەتی هەرێم مانگانە (253) ملیۆن دۆلار قەرز دەداتەوە، واتا بەدینار دەكاتە (379) ملیارو (500) ملیۆن دینار. لەئێستادا حكومەتی هەرێم بەلێبڕینی لەسەدا 21% مووچە مانگانە (700) ملیار دینار خەرج دەكات، واتا حكومەتی هەرێم لەئێستادا مانگانە ترلیۆنێك و (79) ملیار دینار زیاتری لەبەردەستدایە بێجگە لەو خەرجییانەی بۆ وەزارەتەكان تەرخان دەكرێت، دەتوانێت دانەوەی قەرزەكان كەمبكاتەوەو لێبڕین نەهێڵێت تا پشكی هەرێم لەبەغداوە دێت. پێشتر مەسرور بارزانی لەناو پەرلەمانی كوردستان ئاشكرای كرد كەحكومەتەكەی (28) ملیار دۆلار قەرزارە، بەڵام هیچ وردەكارییەكی لەسەر قەرزەكانی كابینەی نۆیەمی حكومەتی هەرێم ئاشكرا نەكرد. رێباز حەملان ئەوەی خستەڕوو هەموو بڕیارەكان بەلێبڕینی موچەشەوە پارتی و یەكێتی و گۆڕان بەهاوبەشی دەیدەن لەناو ئەنجومەنی وەزیراندا، وتیشی:»ئەوەی لەپەرلەمان دەوترێت و باس دەكرێت لەناو ئەنجومەنی وەزیراندا بوونی نییە». ماوەی هەشت مانگانە حكومەتی هەرێم بەلێبڕینی لەسەدا 21% موچە دابەشدەكات، سەرەڕای زیادبوونی داهاتە ناوخۆییەكان بەرزبوونەوەی نرخی نەوت بۆ سەروو (70) دۆلار بۆ هەر بەرمیلێك. سەرۆكی فراكسیۆنی یەكێتی دەڵێت:» دەبێت وەزیرە تایبەتمەندەكان بێنە پەرلەمان و گفتوگۆ لەسەر لێبڕینی موچە بكرێت، چونكە دۆخی دارایی هەرێم باشە». زیاد جەبار، سەرۆكی فراكسیۆنی یەكێتی لەپەرلەمان لەلێدوانێكدا بۆ هاوڵاتی وتی:» دارایی هەرێم لەبارودۆخێكی باشدایە، بۆیە كاتی ئەوە هاتووە كە لێبڕینەكە نەمێنێت». سەرۆكی فراكسیۆنی یەكێتی ئاماژەی بۆ ئەوەشكرد ئێستا كاتی ئەوە هاتووە لێبڕینی موچە كۆتایی پێبهێنرێت» دەبێت دانیشتنی پەرلەمان بكرێت لەسەر لێبڕینی موچە». ئەندامێكی فراكسیۆنی گۆڕان ئەوە دەخاتەڕوو بەدەنگی زۆرینەی پەرلەمان داوای بانگهێشتی وەزیرەكان كراوە. جەلال محەمەد، ئەندامی فراكسیۆنی گۆڕان لەپەرلەمانی كوردستان، بەهاوڵاتی وت:» بەدەنگی زۆرینەی پەرلەمان داواكراوە حكومەت ئامادەی دانیشتنەكە بێت، بەڵام تائێستا دیار نیە ئامادە دەبێت یان نا». پەرلەمانتارێكی پارتی داوا دەكات وەزیری دارایی وەڵامی ئەوەیان بداتەوە كەداهاتی سلێمانی بۆچی ناگەڕێتەوە بۆ خەزێنەی حكومەت. رێبوار عەبدولڕەحیم، ئەندامی فراكسیۆنی پارتی لەپەرلەمانی كوردستان لەلێدوانێكدا بەهاوڵاتی وت:»  ئێمە داوامان كردووە لەسەر لێبڕینی موچە حكومەت بێت روونكردەوە بدات، كەحكومەت ناتوانێت بێ لیبڕین موچە بدات پەیوەندی بەچییەوە هەیە روونكردنەوەمان پێبدەن». هەروەها ئاماژەی بەوەشكرد حكومەت و وەزیری دارایی وەڵامی ئەو پرسیارەیان بدەنەوە كە «داهاتی سلێمانی بۆچی وەك پێویست ناگەڕێتەوە بۆ خەزێنەی حكومەتی هەرێم». هاوكات رێبوار عەبدولڕەحیم ئەوەی دووپاتكردەوە كەهەموو پەرلەمانتاران دەیانەوێت لێبڕینی موچە كۆتایی بێت و وتی:» دوای هەڵسەنگاندنی رەوشی دارایی قسە لەسەر هەڵگرتنی لێبڕینی موچە دەكەین، ئێستا پێویستە هۆكارەكانی بزانین و چارەسەری بكەین». لەكاتێكدا پێشتر چەند جارێك حكومەت و وەزیرە پەیوەندیدارەكان چوونەتە پەرلەمان، بۆیە هەندێك لەپەرلەمانتاران پێیان وایە هاتنی حكومەت بۆ دانیشتنەكانی پەرلەمان هیچ كاریگەری نابێت و پێویستە پەرلەمان خۆی بڕیار بدات. ئەندامێكی كۆمەڵی دادگەری لەپەرلەمانی كوردستان دەڵێت هاتنی حكومەت بۆ پەرلەمان هیچ لەبابەتە ناگۆڕێت تەنیا پێویستە پەرلەمان خۆی بڕیاری كۆتایی لەسەر بدات. رووپاك ئەحمەد لەلێدوانێكدا بەهاوڵاتی وت:» بابەتەكە نایاساییەو حكومەت هیچ رێگەچارەیەكی بنبڕی و وەڵامێكی قەناعەت پێكەری پێنەبووە، بۆیە ئێستا تەنیا پێویستی بەبڕیاری پەرلەمانە بۆ هەڵگرتنی لێبڕینەكە ئەوە ئەركی سەرەكی خۆیەتی». ئەو پەرلەمانتارەی كۆمەڵ ئەوەشی روونكردەوە كەبڕیارە ئەمڕۆ دووشەممە دانیشتنی پەرلەمان لەسەر لێبڕینی مووچە بكرێت.

  هاوڵاتى بەهۆی خەرجنەکردنی مووچەکانیانەوە پزیشکان و کارمەندانی نەخۆشانەی هیوا له‌ سلێمانی مان گرتنیان راگه‌یاند. کارماندەکان ئاماژە به‌وه‌ ده‌ده‌ن، بەڕێوەبەر و بەشی کارگێڕی نەخۆشخانەکە هیچ کەمتەرخییەکیان نییە، بەردەوام هەفتانە بەڕێوەن بۆ هەولێر، بەڵام حکومەت هیچ وەڵامیان ناداتەوە، نەخۆشخانەکەمان لۆدێکی زۆری لەهەموو عيراق و هەرێمەوە لەسەرە. پزیشکان و کارمەندانی نەخۆشانەی هیوا  شەش مانگ و 14 رۆژه‌ هیچ پاداشتێکیان وەرنەگرتووە .

سازدانی: عەمار عەزیز بەرپرسی ئۆپەراسیۆنەكانی پارتی لەپارێزگای دهۆك دەڵێت:» توركیا تەنها 11 كیلۆمەتر هاتووەتە ناوخاكی هەرێم، هیچ رێككەوتنێك لەنێوان پارتی و توركیادا نیە». بابەكر زێباری، بەرپرسی ئۆپەراسیۆنەكانی پارتی لەدهۆك و سوپاسالاری پێشووی عێراق لەم چاوپێكەوتنەیدا لەگەڵ هاوڵاتى دەشڵێت:»  مەسعود بارزانی و سەرۆكی هەرێم لەگەڵ شەڕی كورد لەگەڵ كورد نین و پەكەكەش كوردە». مەسعود بارزانی و سەرۆكی هەرێم لەگەڵ شەڕی كورد لەگەڵ كورد نین و پەكەكەش كوردە   هەروەها زێباری ئەوەش دەخاتەڕوو كە:» حەقە ئەو شتانەی توركیا دەیكات یوئێن و وڵاتە ئەوروپیەكان و ئەمریكا بێنەسەرخەت، سنورێك بۆ توركیا دابنێن، بەبڕوای من ئەو شتانەی توركیا دەیكات رەواو دروست نیە، هەر مرۆڤێك پێویستە لەناو وڵاتەكەی خۆی خزمەت بكات. ئەو هەنگاوانەی دەرەوەو ئۆپراسیۆنەكانی دەرەوە بەبڕوای من قازانجی توركیای تێدا نیە». هاوكات بابەكر زێباری وتیشی:» پەكەكە نایەوێت دارەكان ببڕێن چونكە لەپشت دارەكان خۆیان دەشارنەوە، پەكەكە دارەكان دەپارێزێت ئەمە راستییە، پێدەچێت توركیا ئەم كارەی كردبێت». هاوڵاتى: سەرەتا با لەوە دەستپێبكەین، بەڕێزتان بۆ ماوەیەك سوپاسالاری عێراق بوون، ئەوكاتە كورد لەسوپادا رێژەی چەندی هەبوو؟ بابەكر زێباری:  ئەوكاتەی من سوپاسالاری عێراق بووم رێژەی كورد لەسوپای عێراق لەسەدا 20% بووەو لەسەدا 25 % سوننەو لەسەدا 45% شیعەو لەسەدا 10% كەمەنەتەوەییەكان بوو. ئێمە ئەوكات رێككەوتنمان كردبوو لەگەڵ ئەمریكییەكان و لەسەر ئەم رێژەیەی كە من باسمكرد رێككەوتبووین . ئێستا باوەڕناكەم رێژەی كورد لەناو سوپای عێراق بگاتە لەسەدا یەك، چونكە بەڕێژەیەكی یەكجار زۆر كەمبووەتەوە، دایبنێن 1% ، واتە 19% كەمبووتەوە بەراورد بەوكاتەی كە من سوپاسالاری عێراق بووم، لەبەغدا بێ‌ خاوەنییە هیچ كەسێك نیە بەرگری لەم پرسە بكات     هاوڵاتى: ئەوەندەی ئاگاداربن كورد لەسوپای عێرقدا ئێستا رێژەكەی كەمبووەتەوەو گەیشتووەتە چەند، لەسەدا 1% باسدەكرێت؟ كێ‌ لێی بەرپرسە ؟ بابەكر زێباری:  ئێستا باوەڕناكەم رێژەی كورد لەناو سوپای عێراق بگاتە لەسەدا یەك، چونكە بەڕێژەیەكی یەكجار زۆر كەمبووەتەوە، دایبنێن 1% ، واتە 19% كەمبووتەوە بەراورد بەوكاتەی كە من سوپاسالاری عێراق بووم، لەبەغدا بێ‌ خاوەنییە هیچ كەسێك نیە بەرگری لەم پرسە بكات، بەرپرسانی كورد لەوێ‌ نەمان، پۆست لەكورد وەردەگرن و خەڵكی خۆیان لەشوێنی كورد دادەنێن بەتایبەت دوای شەڕی داعش و كەركوك و ناوچەكانی جێناكۆك كاریگەری زۆر خراپی كردووەتەسەر میللەتی كورد بەشێوەیەكی گشتی. بێگومان ئەوە پلانەو كەسانی ناحەز هەن لەنێو  عێراقدا، ئەگەر لەسەرەتای رزگاربوونی عێراق یەك كەسی عاقڵ بهاتایەتە سەرحوكم ئێستا عێراق دەبوو بەبەهەشت، وادەزانن ئەگەر هەندێك پۆست بدرێتە كورد یان سوننە ئەوا دەستەڵاتیان لاواز دەبێت . هاوڵاتى: زۆرجار نوێنەرانی كورد لەبەغدا گلەییان كردووە كەكورد ئامادە نییە بچێتە ناو سوپای عێراقەوە، ئەمە تاچەند راستە، ئایا پارتی و یەكێتی كە حزبی سەرەكین كەمتەرخەمییان لەو پرسەدا هەبووە؟ بابەكر زێباری:   ئەمە دووڕووییەو هیچ راست نیە، كورد ئامادەیە بچێتە ناو سوپای عێراق، بەیانی حكومەتی عێراق دەرگای دامەزراندن لەناو سوپا بكاتەوە هەزاران گەنجی كورد ناوی خۆیان دەنووسن و دەچنە ناو سوپای عێراق، كەمی كورد لەسوپای عێراق خەتای پارتی و یەكێتی نیە ، بەڵكو خەتای حكومەتی عێراقە، هاوكاری ئەوان باش نیە تاگەیشتە ئەم ئاستە. هاوڵاتى: ئێستا باسی گەرمی میدیا لەهەرێم پرسی لەشكركێشی توركیاو ئاڵۆزییەكانی نێوان پارتی و پەكەكەیە ، بۆچوونتان لەو بارەیەوە چیە ؟ بابەكر زێباری:  هەموو دەوروبەری ئێمە، كەس كەیفی بەئێمە نایات، ئێمە فشار ناكەین كە ببین بەدەوڵەت یان سەربەخۆ بین، بەنموونە ئەگەر لەتوركیا جودا بین توركیا لاواز دەبێت، یان لەعێراق جودا بین عێراق لاواز دەبێت، بەهەمان شێوە ئێران و سوریاش، هەموویان تەماعیان لەخاكی كوردو موڵك و داهاتی كورد هەیە، ئەم چوار دەوڵەتە پێكەوە هەوڵدەدەن قەبارەو سەنگی كورد لاواز بكەن، بۆ نموونە لەكەركوك دوای ئەو موئامەرەیە كەركوك و ناوچەكانی تر داگیركران ، ئەم چوار دەوڵەتە دەیانەوێت هەرێمی كوردستان لول پێچ بكەن. پەكەكەش بەبڕوای دارودەستی توركیا نیوەی پەكەكە زیاتر میتی توركیان، هەر شتێك توركیا بەپەكەكە بڵێت دەیكات، ئەوان هۆكاری سەرەكین كەتوركیا رابكێشن بۆ ناو خاكی هەرێمی كوردستان. دەبوایە پەكەكە بەرگری لەهەرێمی كوردستان بكردایە، چونكە تەنها ئێمە خاوەن حكومەت و پەرلەمانین لەپارچەكانی تر نیە، بەڵام بەداخەوە لەجیاتی بەرگریكردن لەهەرێمی كوردستان هەوڵی تێكدانی دەدەن . هاوڵاتى: پێتانوانییە دەبێت هەوڵی نێوەندگیری و گفتۆگۆ بدرێت لەنێوان پارتی و پەكەكە لەجیاتی ئاڵۆزكردنی دۆخەكە؟ بابەكر زێباری: پەكەكە بۆ ئەوە دروستبووە كە دۆخی كورد تێكبدات، ئەم شەڕە شەڕی پەكەكەو پارتی نیە ، بەڵكو شەڕی پەكەكە لەگەڵ هەموو كوردستانە، ئۆجەلان لەسێ‌ كۆنگرەدا دەڵێت من لەگەڵ میتی تورك پلانمان داڕشتووەو هەموو پارتەكانی كورد لەباكور لەناوبران، دەڵێت ئەو شتە بۆ من باشبوو، هەروەها بۆ توركیاش باشبوو،  بەخۆیان دەڵێن ئازادی گەلان، باشە ئەمانە كامە گەل ئازاد دەكەن، گەلی فارس یاخود گەلی عەرەب؟ ، شەڕەكە لەگەڵ قەوارەی كوردستانە. سوێند بەخوا فەرقی پارتی و یەكێتی و هەموو حزبەكان لای پەكەكە یەك حسابە، هیچ كەسێك لای ئەوان بەفلسێك ناهێنێت، هەركەسێكیش ئەمە بەهەڵە دابنێت ئەوە كەیفی خۆیەتی، پەكەكە هیچ زمانێك نازانێت جگە لەزمانی هێز نەبێت، هەر شوێنێك بۆی بچێت دەبێت خۆی حاكم بێت، ئەوەش ناكرێت، ئێمە فیدراڵی خۆمان وەرگرتووە، لەوانەیە پارچەكانی تر وەكو باكور یان رۆژهەڵات داوای شتێكی تر بكەن . نە پەكەكە هی ئەوەیە گفتۆگۆی لەگەڵ بكرێت و توركیاش لێی رازی نیە، بەقسەی پارتی ناكەن چەند جارێك مەسعود بارزانی سەرۆكی پارتی وتوویەتی شەڕی كورد لەگەڵ كورد نابێت بكرێت، ئێستاش باوی ئەمە نەماوە میللەتێك بەشەڕو چەك مافی خۆی وەربگرێت، دەبێت بەڕێگای دیالۆگ و سیاسەت بێت، چەند جارێك پارتی لەگەڵ پەكەكە قسەی كردووە تاگرژی و ئاڵۆزی نەمێنن، بەڵام بێ‌سوود بووە، پەكەكە بەقسەی پارتی ناكات، مێشكی پەكەكە هی ئەوە نیە لەگەڵی گفتۆگۆ بكەی . هاوڵاتى: پەكەكە ئەوە دووپاتدەكاتەوە كە ئەوان نەبوون ئەو پێشمەرگانەیان لەمەتینا شەهید كردووەو رەتیدەكەنەوە، پێتوانیە دەبێت لێكوڵینەوەی لەسەر بكرێت ئەوكات بڕیار بدرێت كە چ لایەنێك بووە؟ بابەكر زێباری: من خۆم چوومە شوێنی رووداوەكە، ئارپێچی و قەناس و بیكەیسی ئەوان، باشە ئەو سێ‌ كەسەی ئەوان كوژراون لەكوێ‌ بوون، سێ‌ تەرمی ئەوان لەوێ‌ بوون، كەدەڵێن ئێمە نەبووین درۆیە، یەكەمجار وتیان ناوچەی ئێمەیە قبوڵ ناكەین هیچ كەسێك بێتە شوێنی ئێمە، دواتر وتیان بەفرۆكەی توركیا ئەو پێشمەرگانە شەهیدكراون، فرۆكەی توركیا لەكوێن، ئەوان لەكوێن، مەتێن لەكوێ‌ تورك لەكوێ‌، 100% ئەو پێشمەرگانە بەدەستی پەكەكە شەهیدكراون و من بەرپرسم لەقسەكانی خۆم. هاوڵاتى: دەوترێت هەوڵێكی گفتوگۆ هەبووە لەنێوان پەكەكەو پارتی لەو شوێنەی پێشمەرگەكان شەهید بوون، هەردوولاش رازی بوون ، بەڵام ئەم رووداوە رایگرت ، پێتوانییە توركیا حەزدەكات پێشمەرگە پەلكێش بكات بۆ شەڕی كوردو و كورد؟ بابەكر زێباری: ئەم قسانە لەبنەڕەتەوە هیچ راست نیە، هیچ پەیوەندی پارتی بەپەكەكەوە نیە،  بۆ توركیا بەرژەوەندی ئەوان چی بێت دەیكەن، دەوڵەتێكی سەربەخۆن، هیچ پەیوەندیمان بەتوركیاوە نیە كە ئەوان چییان دەوێت ئەوان بڕیاری خۆیان دەدەن كەچ شتێك لەبەرژەوەندی ئەواندایە، ئەگەر پەكەكە نەبووایە توركیا بەهیچ شێوەیەك نەدەهاتە كوردستان، بیانووی توركیا بوونی پەكەكەیە، توركیاش دەڵێت ناچارین بەرگری لەخۆمان بكەن، حكومەتی عێراق و یوئێن چی بەتوركیا بڵێن . هاوڵاتى: بۆخۆتان وەك بابەكر زێباری، لەگەڵ شەری پەكەكە و پارتین یان دانوستاندن و گفتوگۆ و رێككەوتن و رێگری لەشەڕ؟ ئایا لەسەر ئەو پرسە گفتۆگۆتان لەگەڵ مەسعود بارزانی و نێچیرڤان بارزانی كردووە ، ئەوان بۆچوونیان چییە؟ بابەكر زێباری: هەر كەسێك عاقڵ بێت و خۆی بەكورد بزانێت لەگەڵ ئەوەدانیە یەك دڵۆپی خوێن لەجەستەی كەسێكی كورد بڕژێت، بەڵام كاتێك ناچاركراین هیچ رێگایەك نیە دەبێت بەرگری لەخۆمان بكەین. كاتێك بێت خەڵكی كورد بكۆژێت یان كەمینی بۆ دابنێت ، خانووەكانمان وێران و خراپ بكات، لەناوەندی دێرەلۆك كەسێكیان رەمی كرد، دواتر وتیان وامانزانی ئەو كەسە میت بووە، لەبەرئەوە رەمیمان كرد. لەچەمانكێ كەمینیان دانا بۆ سێ‌ پێشمەرگەو شەهیدیان كرد، لەزاخۆ بەهەمان شێوە، ئەگەر پارتی نیازی شەڕی هەبووایە لەگەڵ پەكەكە ئەوا زۆر لەمێژە شەڕی لەگەڵ دەكرد، بەڵام سەبری پارتی تاكەی درێژ بێت. بۆچوونی مەسعود بارزانی و نێچیرڤان بارزانی دیارە، خۆ هەزار جار دووبارەی ناكەین لەگەڵ شەڕی كورد لەگەڵ كورد نین، پەكەكە هەر كوردە، بەڵام راناوەستن، ئەو گەنجانەی لەناو ریزەكانی پەكەكەدان لەوانەیە نیەتان باش بێت، بەڵام سەركردایەتییەكی موجریمیان هەیە. هاوڵاتى: پێتانوانییە دەبێت لایەنەكان میساقێك واژۆ بكەن كە شەڕی كوردو كورد حەرام بكرێت ، خۆتان دەزانن شەڕ ماڵوێرانی بەدوادادێت و ئەزموونی هەرێمیش لەكەدار دەكات؟ بابەكر زێباری: لەگەڵ كێ‌ میساق واژۆ بكەین، لەگەڵ پەكەكە هیچ سودێكی نیە، ئێمە ئەزموونمان لەگەڵ پەكەكە هەیە، میساق و رێككەوتن هیچ سوودی نیە، بەهیچ شتێك نایەنە ژێر بار، هەرشوێنێك بۆی بچن دەبێت لەوێ دەسەڵات بن و خۆیان فەرز دەكەن كەئەوان حاكمی ناوچەكەن و هیچ حسابێك بۆ حكومەتی هەرێم ناكەن. هاوڵاتى: راپۆرتێكمان لەدەڤەری كانی ماسی و گوندی هرور ئەنجامدا، یان دەڵێن داربڕینەوە لەلایەن توركیاوە نوێیەو بەردەوامیشە، ئەی لەمەیاندا كێ‌ تاوانبارە، ئەوەش هەر پەكەكە یان توركیا؟ بابەكر زێباری: پەكەكە نایەوێت دارەكان ببڕێن، چونكە لەپشت دارەكان خۆیان دەشارنەوە، پەكەكە دارەكان دەپارێزێت ئەمە راستییە، پێدەچێت توركیا ئەم كارەی كردبێت بەڵام 100% پشتڕاست نیم كەئەم كارە توركیا كردوویەتی. هاوڵاتى: كاك بابەكر دەوترێت پارتی داوا دەكات (یەبەشە) لەشەنگال بكشێتەوە كەزۆربەی ئێزیدین و پەكەکەش چالاكییەكانی دژی توركیا رابگرێت؟ ئەم داواكارییە فەرمییە لەلایەن پارتییەوە ئەوەندی زانیاریتان هەبێت ؟ بابەكر زێباری: نەخێر راست نیە، حكومەتی هەرێم داوای لەعێراق كردووە كە پەكەكە لەشەنگال نەمێنێت، ئەوەش لەڕێگای ئەو رێككەوتنەی كە بەم دواییە لەنێوان بەغداو هەرێم واژۆكراوە، بەڵام حەشدی شەعبی رێگری لەمە كردو رێگای نەدا رێككەوتنەكە بچێتە بواری جێبەجێ‌كردنەوە، توركیاش داوا دەكات كەپەكەكە لەشەنگال نەمێنێت و دەڵێت ئەگەر ئێوە پەكەكە دەرناكەن من بەخۆم پەكەكە لەشەنگال دەردەكەم. هاوڵاتى: توركیا نزیكەی  40 كیلۆمەتر خاكی هەرێمی داگیركردووە، بەڵام پارتی باسی داگیركارییەكان ناكات، ئایا ئەمە رێككەوتنی نێوان توركیا و پارتییە؟ بابەكر زێباری: توركیا تەنها (11) كیلۆمەتر هاتووەتە ناوخاكی هەرێم، هیچ رێككەوتنێك لەنێوان پارتی و توركیادا نیە، بیانووی توركیا ئەوەیە كە پەكەكە بەڕێكخراوێكی تیرۆریستی دادەنێت و لەسەر سنورەكانی عێراقە، عێراقیش نایات سنورەكانی خۆی بپارێزیت، توركیا دەڵێت منیش ناچارم سنورەكانی خۆم بپارێزم. هاوڵاتى: توركیا یارمەتی حكومەتی ویفاقی نیشتیمانی لیبیایداو شەڕی كرد، لەڕۆژئاوای كوردستان عەفرین و گرێسپی و سەرێكانی داگیركرد، لەئازەرباینجان دژی ئەرمینیا شەڕی كرد، پەكەكەی لێ‌ نەبوو ، پێتوانیە توركیا وڵاتێكی داگیركارەو پەیوەندی بەوە نییە كە پەكەكە بوونی هەیە؟ بابەكر زێباری: توركیا دراوسیێ‌ ئێمەیە، حەقە ئەو شتانەی توركیا دەیكات یوئێن و وڵاتە ئەوروپیەكان و ئەمریكا بێنەسەرخەت، سنورێك بۆ توركیا دابنێن، بەبڕوای من ئەوشتانەی توركیا دەیكات رەواو دروست نیە، هەر مرۆڤێك پێویستە لەناو وڵاتەكەی خۆی خزمەت بكات. ئەو هەنگاوانەی دەرەوەو ئۆپراسیۆنەكانی دەرەوە بەبڕوای من قازانجی توركیای تێدا نیە، من ناڵێم توركیا داگیركەرە، چونكە داگیركەر دەبێت بمێنێتەوە تا هەتاهەتایی و بڵێت ئەمە خاكی منە، هاتووەتە عەفرین دەڵێت من دەمەوێت سنورەكان كونتروڵ بكەم، هاتووەتە ناو عێراقیش بۆ ئەوەی سنورەكانی خۆی كونتروڵ بكات، ئەگەر سبەی پەكەكە نەمێنێت دەبێت توركیا لەناو خاكی هەرێم بچێتە دەرەوە، داگیركردن جیاوازە لەگەڵ تەقەدومێكی سەربازیی. هاوڵاتى: ئەگەر هەوڵی نێوەندگیری هەبێت ئامادەن وەك بابەكر زێباری هاوكاری ئەو پرۆسەیە بن بۆ گەیشتن بەڕێكەوتن لەگەڵ پەكەكە؟ كاتی ئەوە هاتووە لایەنەكان یەكهەڵویست بن بۆ ئەوەی شەڕی كوردو كورد دروست نەبێت، لەگەڵ پەكەكەو توركیا گفتوگۆ بكرێت تا شەڕی براكوژی  دروست نەبێتەوە؟ بابەكر زێباری: ئەگەر مێژوو بخوێنیتەوە دەبینین هەریەك لەقازی موحەمەد، سمكۆ شكاك، شێخ سەعیدی پیران، مەلا مستەفای بارزانی ئەمانە هەموویان تەئیكدیان لە یەكهەڵویستی كوردو یەكگرتن كردووە، بەداخەوە تائێستا یەكهەڵوێستی نەبووە چی لێ‌ بكەین. لەشوڕشی ئەیلول بە رابەرایەتی مەلا مستەفا ئەگەر بەشێك لەكورد نەبوونایە بەجاش، لەشكری عێراق هیچ جارێك نەیاندەتوانی بێنە شاخەكانی كوردستان، خۆزگە یەكگرتوو بوونایە، ئەگەر ئێمە یەكگرتوو بین دەبین بەدەوڵەت. باسی گفتۆگۆ لەگەڵ پەكەكە نەكەن، چونكە خۆی لەگەڵ گفتۆگۆ نیە، گفتۆگۆ لەگەڵ پەكەكە هیچ سوودی نیە، چونكە هیچ مەعایرێكیان لا نیەو هیچ پەیمان لای پەكەكە نیە، پەكەكە بەدەستی خۆی نیە، ئەگەر پەكەكە رانەوەستێت و هەر بەردەوام بێت لەسەر چالاكیەكانی خۆی دەبێت بەهێز دەربكرێت، ئەگەر پەكەكە هەروا بەردەوام بێت گورزێگی گەورە لەخۆی دەدات و زۆر پەشیمان دەبێتەوەو پەكەكە هەروا بەردەوام بێت شەڕ دروستدەبێت. هاوڵاتى: ئەدهەم بارزانی كەپێشتر ئەندامی سەركردایەتی پارتی بوو لەبەر داگیركارییەكان هەرێمی كوردستانی بەرەو ئێران جێهێشت كە رەخنەی هەبوو كەپارتی بێدەنگەو رێگای خۆشكردووە بۆ داگیركارییەكان ، قسەتان لەبارەی ئەو هەڵوێستەیەوە چییە ؟ بابەكر زێباری : ئەم پرسیارەم لێ مەكە، بەخوا هیچ ئاگام لەم پرسە نیە.

هاوڵاتى په‌رله‌مانتارێکى خولى پێشووى په‌رله‌مان ده‌ڵێت:"وەزارەتی پیشەسازیی ڕەگەزی كارگەی بەردی مەڕمەڕی گۆڕیوە بۆ كارگەی جگەرەی ساختە، لەكاتێكدا بەهیچ جۆرێك شارباژێر پێوستی بەكارگەی جگەرەو مەشروب نییە، ئەسڵه‌ن لەگەڵ ڕەوشت‌و ئادابی خەڵكى ئەو ناوچەیە نایه‌تەوە". ده‌قى وتاره‌که‌ى زانا عه‌بدوره‌حمان: ئاوا چاکه‌ شارباژێر ئه‌ده‌نه‌وه‌ زانا عه‌بدولڕه‌حمان له‌سه‌ر راسپارده‌ى مام جه‌لال بریاردرا بۆ بوژاندنه‌وه‌ى شارباژێر چه‌ند کارگه‌یه‌ک دروست بکرێت به‌و پێیه‌ ناوچه‌که‌ ده‌وڵه‌مه‌نده‌ به‌ کانزا و به‌ردى به‌نرخ بریاردرا کارگه‌ى به‌ردى مه‌رمه‌ر له‌ ماوه‌ت دروست بکرێت گرێبه‌ست له‌گه‌ل کۆمپانیایه‌کى ئیتالى کرا به‌بڕى ١٣ ملیون یۆرۆ کارگه‌ دروست بکات به‌داخه‌وه‌ کارگه‌ به‌ ته‌واو نه‌کراوى به‌جێما و کۆمپانیا ئیتالیه‌که‌ برى ٥ ملیون یۆرۆى برد و باقیه‌که‌شى وه‌زاره‌تى پێشه‌سازى ئه‌وکات ئه‌زانێت چیلێهات !!!! که‌ ده‌بوو بۆ خزمه‌تى خه‌ڵکى شارباژێر و بوژاندنه‌وه‌ى ناوچه‌که‌ کارگه‌ ته‌واو بکرایه‌ که‌ به‌ نزیکه‌ى بژیوى هه‌زار خێزانى که‌م ده‌ستى ناوچه‌ى شارباژێرى دابین ئه‌کرد و هه‌لى کار بۆ گه‌نجى سنوره‌که‌ ئه‌راخسا به‌ڵام به‌داخه‌وه‌ ئه‌و پرۆژه‌یه‌ به‌ته‌واو نه‌کراوى مایه‌وه‌ هه‌تا ئه‌مساڵ به‌دزیه‌وه‌ کراوه‌ته‌ کارگه‌ى جگه‌ره‌ى ساخته‌ و مه‌شروبی ساخته‌ که‌س نازانێت کێ کردویه‌تى و چۆن کراوه‌ پرکراوه‌ له‌ کرێکارى به‌نگلادیشى وبیانی ئه‌وه‌ى بۆ خه‌ڵکى سنوررکه‌ جێگه‌ى سه‌رسورمانه‌ چۆن وه‌زاره‌تى پێشه‌سازى ره‌گه‌زى کارگه‌ى به‌ردى مه‌رمه‌رى گۆریوه‌ بۆ کارگه‌ى جگه‌ره‌ى ساخته‌ له‌کاتێکدا به‌هیچ جۆرێک شارباژێر پێوستى به‌ کارگه‌ى جگه‌ره‌و مه‌شروب نیه‌ ئه‌سلن له‌گه‌ل ره‌وشت و ئادابى خه‌ڵک ئه‌و ناوچه‌یه‌ نایته‌وه‌ بۆیه‌ وه‌ک گه‌نجێکى خه‌ڵکى ئه‌و سنوره‌ ئه‌و پرۆژه‌یه‌ جێگه‌ى قبوڵ نیه‌ سوکایه‌تیه‌ به‌ خه‌ڵکى ناوچه‌که‌ له‌گه‌ل کۆمه‌ڵێک گه‌نجى ئه‌و سنوره‌ داواى یاسایى له‌سه‌ر وه‌زیرى پیشه‌سازى و به‌رێوه‌به‌رى گشتى پێشه‌سازى سلێمانى تۆمارئه‌که‌ین چۆن رێگه‌یان داوه‌ پرۆژه‌یه‌کى گشتى بخرێته‌ خزمه‌تى کۆمه‌ڵێک بازرگان کارگه‌ى به‌ردى مه‌رمه‌رى ماوه‌ت موڵکى خه‌ڵکى ماندوو ره‌سه‌نى شارباژێره‌ و بۆ هیچ بازرگان و که‌س نیه‌ بخاته‌ خزمه‌تى خۆی بۆیه‌ دواکارین له‌ داوکارى گشتى و په‌رله‌مان کوردستان و دیوانى چاودێرى دارى بێنه‌ ده‌نگ له‌ دۆسیه‌که‌ بکۆڵنه‌وه‌ ئه‌م هه‌فته‌یه‌ دێ به‌دێ ئه‌گه‌رێن ئێمزا کۆئه‌که‌ینه‌وه‌ بۆ وه‌رگرتنه‌وه‌ کارگه‌که‌ و ته‌واو کردنى  

هاوڵاتى ‌ژنان و گه‌نجان له‌ گه‌رمیان ھه‌ڵمه‌تى بایکۆتکردنى کاڵا و شتومه‌کى تورکى و دراما تورکییه‌کانیان ده‌ستپێکرد، بۆ ئه‌و مه‌به‌سته‌ش سه‌دان پڕۆشه‌رییان له‌ ناو خه‌ڵک دا بڵاوکرده‌وه‌. ئه‌مڕۆ له‌ ناو بازاڕى شارۆچکه‌ى که‌لار، کۆمه‌ڵه‌ى گه‌نجانى وڵاتپارێز و ژنانى گه‌نجى تێکۆشه‌ر، له‌ چوارچێوه‌ى ھه‌ڵمه‌تى “وه‌رن بۆ جه‌نگى ئازادی” که‌مپه‌ینى بایکۆتکردنى کاڵا و شتومه‌کى تورکى و فیلم و دراما تورکییه‌کانیان ڕاگه‌یاند. له‌ که‌مپه‌یینه‌که‌دا گه‌نجان و ژنان سه‌دان پروشه‌رییان به‌ ناو خه‌ڵکدا بڵاو کرده‌وه‌ که‌ وێنه‌ى بارکۆدى کاڵا تورکییه‌کان و به‌شێک له‌ کاڵا و دراما تورکییه‌کانى له‌سه‌ر بوو له‌گه‌ڵ چه‌ند په‌یامێک بۆ ھۆشیارکردنه‌وه‌ى خه‌ڵک له‌ بایکۆتکردنییان. ده‌رباره‌ى ئامانجى چالاکییه‌که‌یان و بانگه‌وازییان چیا گه‌رمیانی، رایگه‌یاند:" ده‌وڵه‌تى داگیرکه‌رى تورک جگه‌ له‌ لایه‌نى سه‌ربازى له‌ ڕێگاى فیلم و دراما و ئابورییه‌وه‌ ھه‌وڵى داگیرکردنى باشورى کوردستان ده‌ده‌ن، بۆیه‌ بانگه‌وازى له‌ خه‌ڵک ده‌که‌ین ھۆشیارببنه‌وه‌ و کاڵا و شتومه‌کى تورکى بایکۆت بکه‌ن له‌گه‌ڵ فیلم و دراماکانیاندا".  

هاوڵاتى یه‌کێتی و گۆڕان له‌سه‌ر پرسه‌کانى حکومه‌ت‌و هه‌ماهه‌نگى په‌رله‌مان‌و ئه‌نجومه‌نى پارێزگاکان کۆبونه‌وه‌و ھه‌ردولا ھاوڕابون که‌ کێشه‌ ھه‌نوکه‌ییه‌کانى ئه‌مڕۆى کوردستان‌و ژیان‌و گوزه‌رانى ھاوڵاتیان پێویستى به‌ھه‌ماھه‌نگى زیاترى ھه‌ردولاھه‌یه‌. به‌پێى ڕاگه‌یه‌نراوێک، پاشنیوه‌ڕۆى ئه‌مڕۆ به‌‌میواندارى بافڵ تاڵه‌‌بانى ھاوسه‌‌رۆکى یه‌‌کێتیی، وه‌فدێکى یه‌کێتییو گۆڕان له‌ده‌‌باشان بۆ تاووتوێکردنى چه‌ند پرسێکى تایبه‌ت به‌کاروبارى حکومه‌تى ھه‌رێم‌و حکومه‌تى خۆجێیى سلێمانى کۆبونه‌وه‌. له‌ڕاگه‌یه‌نراوه‌که‌دا هاتوه‌، ھه‌ردولا ھاوڕابون که‌ کێشه‌ ھه‌نوکه‌ییه‌کانى ئه‌مڕۆى کوردستان‌و ژیان‌و گوزه‌رانى ھاوڵاتیان پێویستى به‌ھه‌ماھه‌نگى زیاترى ھه‌ردولا ھه‌یه‌و پێویسته‌ ھه‌نگاوى جدیو عه‌مه‌لى بنرێ بۆ چاره‌سه‌رکردنى گرفته‌کان. هه‌روه‌ها جه‌ختیشکراوه‌ته‌وه‌ له‌سه‌ر ڕێکه‌وتنى یه‌کێتیو گۆڕان‌و چۆنێتى جێبه‌جێکردنى ئه‌و خاڵانه‌ى که‌ ماون‌و پێویسته‌ جێبه‌جێبکرێن‌و په‌‌یوه‌‌ستن به‌دام‌و ده‌زگاکانى حکومه‌ت، هاوکات پێشنیازیشکراوه‌ کۆبوونه‌وه‌کان به‌رده‌وامییان هه‌بێت بۆ سه‌رخستنى ته‌واوى ڕێکه‌وتنه‌که‌ى نێوان یه‌کێتیو گۆڕان.  

هاوڵاتى  هەپەگە ڕایگەیاند کە هێزەکانیان لە بۆتان و خواکورک بە لانیکەمەوە هەشت داگیرکەریان سزاداوە، هەروەها فڕۆکەیەکی بێفڕۆکەوانیشیان لە ئاڤاشین خستووەتە خوارەوە. ئەمڕۆ یەکشەممە 13ی حوزه‌یرانی 2021،  ناوەندی ڕاگەیاندنی هێزەکانی پاراستنی گەل- هەپەگە، لەسەر چالاکیی گەریلاکانی دژی سوپای داگیرکەری تورک لە هەرێمەکانی، بۆتان، خواکورک و ئاڤاشین، ڕاگەیاندبراوێکی بڵاوکردەوە. لە ڕاگەیاندراوەکەدا هاتووە: هێزەکانمان لە هەرێمەکانی بۆتان، زاپ، مەتینا، ئاڤاشین و خواکورک، دژی سوپای داگیرکەری تورک چالاکییان ئەنجامداوە کە لە ئەنجامیاندا بە لانیکە مەوە هەشت داگیرکەر سزادراون. هەروەها ئاماژە بەوەش کراوە کە گەریلاکانی لە هەرێمی ئاڤاشین فڕۆکەیەکی بێفڕۆکەوانی سوپای داگیرکەری تورکیان خستووەتە خوارەوە، هەر لەو هەرێمەش لە ئاسمانەوە لە دوژمنیان داوە.