هاکان فیدان: پشتیوانی حکومەتی سوریا دەکەین

میدیاکانى ڕۆژئاواى کوردستان بڵاویانکردەوە ئەو شاندەى ڕۆژئاواى کوردستان (ئیدارەى خۆسەرى) لەگەڵ ئەحمەد شەرع و حکومەتى سوریا کۆبنەوەتەوە هیچ ڕێککەوتنێکى نوسراویان واژۆ نەکردوەو تەنها بەزارەکى پێشنیارێک بۆ یەکخستنی هێزەکانی سوریای دیموکرات و هێزەکانی ئاسایشی ناوخۆ بە شێوەی زارەکی پێشکەش کراوە. بەیانیی سێشەممە، شاندێکی باڵای بەڕێوەبەرایەتیی خۆسەر لە باکوور و رۆژهەڵاتی سووریا، بە سەرۆکایەتیی مەزڵووم عەبدی، فەرماندەی گشتیی هەسەدە گەیشتنە دیمەشق،  شاندەکە، بە سەرۆکایەتیی مەزڵووم عەبدییە و هەریەکە لە ئیلهام ئەحمەد، هاوسەرۆکی دەستەی پەیوەندییەکانی دەرەوەی ئیدارەی خۆسەر و رۆژهەڵات عەفرین، فەرماندەی یەکینەکانی پاراستنی ژن (یەپەژە) یاوەریان کردو لەگەڵ ئەحمەد شەرع کۆبونەوە. ئەندامێکى شاندی دانوستانکاری باکور و ڕۆژهەڵاتی سوریا بەمیدیاکانى ڕۆژئاواى کوردستانى ڕاگەیاندووە،  تاوتوێکردنی چوار بڕگەی سەرەکی لەگەڵ نوێنەرانی حکومەتی کاتى کراوە. بەوتەى ئەو ئەندامە، هیچ کاغەزێکی فەرمی لە کاتی کۆبوونەوەکەدا واژۆ نەکراوە، تەنها پێشنیارێک بۆ یەکخستنی هێزەکانی سوریای دیموکرات و هێزەکانی ئاسایشی ناوخۆ بە شێوەی زارەکی پێشکەش کراوە. هەروەها ئەوەش باسدەکات ئامانجی یەکگرتنەوەکە بریتییە لە دامەزراندنی سوپایەکی ڕێکخراو و کاریگەر کە هەموو سوورییەکان بپارێزێت. ئەندامەکەى شاندی دانوستانکاری باکور و ڕۆژهەڵاتی سوریا ئەوەش دەڵێت کە  ڕێککەوتن لەسەر ئاگربەستێکی تەواو و دەستبەجێ لە باکور و ڕۆژهەڵاتی سوریا و حەلەب کراوە، دەستور لە سوریا هەموار دەکرێتەوە بۆ ئەوەی نوێنەرایەتی هەموو پێکهاتەکان مسۆگەر بکرێت. لەلایەکى دیکەوەـ مورهەف ئەبو قەسرە، وەزیری بەرگریی سووریا دەڵێت، لە دیمەشق لەگەڵ مەزڵووم عەبدی کۆبووەتەوە و بڕیار لەسەر ئاگربەستێکی سەرتاسەری دراوە.    وەزیری بەرگریی سووریا ئاماژە بەوە دەدات، راگرتنی شەڕ هەموو پێگە سەربازییەکان لە باکوور و رۆژهەڵاتی سووریا دەگرێتەوە.    شەوی دووشەممە 06ـی ئۆکتۆبەری 2025، هێزەکانی ئاسایشی سەر بە حکومەتی کاتیی سووریا، رێگە سەرەکییەکانی هەردوو گەڕەکی کوردنیشینی حەلەب (ئەشرەفییە و شێخ مەقسوود)یان بە بەرزکردنەوەی خۆڵ بەربەست کرد و داخست.   دوای داخستنی رێگەکانی ئەو دوو گەڕەکە، کوردانی ناوچەکە رژانە شەقامەکان، هێزە ئەمنییەکانی حکومەتەکەی ئەحمەد شەرع سەرەتا بە گازی فرمێسکڕێژ هەوڵی بڵاوەپێکردنی خەڵکیاندا، بەڵام دواتر ئاڵۆزییەکان فراوان بوون و بە تەقە خەڵکیان ناچار کرد بگەڕێنەوە ماڵەکانیان.

پۆڵاد شێخ جەنگی، برای لاهوور شێخ جەنگی، کە لە زیندانی کانی گۆمەی سلێمانی دەستبەسەرە، بەهۆی تێکچوونی باری تەندروستییەوە گواستراوەتەوە بۆ نەخۆشخانە. بەگوێرەی ئەو زانیارییانەی لە بنەماڵەی لاهوور شێخ جەنگییەوە  ئاشکرا کراون، تەندروستیی پۆڵاد شێخ جەنگی ناجێگیرە، تووشی هەوکردنێکی زۆر و تەنگەنەفەسی بووە و بە زەحمەت هەناسەی داوە. دوای گواستنەوەی بۆ نەخۆشخانە و وەرگرتنی چارەسەری پێویست، ناوبراو گەڕێندراوەتەوە بۆ زیندان.  هاوکات، خانەوادەی ناوبراو ئاشکرایان کردووە کە لە سەردانێکیاندا بۆ زیندانی کانی گۆمە، بۆیان دەرکەوتووە کە ژوورەکەی لاهوور شێخ جەنگی گۆڕدراوە و بۆ ژوورێکی بچووکتر گواستراوەتەوە کە "وەک پێویست نییە". سەرەڕای ئەمەش، لە ژوورە نوێیەکەیدا کتێب و تەلەفزیۆنی بۆ دابینکراوە و هەواگۆڕکێی هەیە. بورهان ڕەشید گوڵە، سەرۆکی تیمی پارێزەرانی لاهوور شێخ جەنگی،  دەڵێت لەسەر داواکاریی خۆی، داوایان کردووە ڕێگە بە لاهوور شێخ جەنگی بدرێت ڕۆژانە بۆ ماوەی کاتژمێرێک بچێتە دەرەوە و بەر تیشکی خۆر بکەوێت، ئەمەش بۆ پاراستنی تەندروستیی. بەڵام تاوەکو ئێستا وەڵامی ئەو داواکارییەیان نەدراوەتەوە. شەوی 22ی ئابی ئەمساڵ، دوای ڕووبەڕووبوونەوەیەکی چەکداریی خوێناویدا، هێزە ئەمنییەکانی یەکێتیی نیشتمانیی کوردستان لاهوور شێخ جەنگی، سەرۆکی بەرەی گەل و پۆڵاد شێخ جەنگی برای و سەدان کەسی دیکەیان  دەستگیرکرد.

کۆبوونەوەی وەزیرە کوردەکان لەگەڵ سوودانی کۆتاییهات و سەرۆکوەزیرانی عێراق رەزامەندی لەسەر خەرجکردنی مووچەی مانگی هەشت نیشانداوە. سەرچاوەیەکى ئاگادار لەبەغداوە ڕایگەیاند: کۆبوونەوەی فوئاد حوسێن و بەنگین ڕێکانی و خالید شوانی  لەگەڵ محەممەد شیاع سوودانی سەرۆک وەزیرانی عێراق کۆتایی هات و سوودانی بڕیاریدا مووچەی مانگی ئابی مووچەخۆرانی هەرێمی کوردستانی دا تا ئەوکاتەی ڕێککەوتن لەسەر داهاتی نانەوتی دەکرێت. بەپێی زانیارییەکان، محەمەد شیاع سودانی لە کۆبونەوەکەدا رایگەیاندووە: "راستە گرفت لە میکانیزمی داهاتی نانەوتیدا هەیە، بەڵام ئەم گرفتانە نابنە بەربەست لەبەردەم ناردنی موچە." هەمان سەرچاوە ئاماژەی بەوەشکرد، سەرۆک وەزیرانی عێراق جەختی کردووەتەوە کە "لە زوترین کاتدا" بڕیاری خەرجکردنی موچەی هەرێمی کوردستان دەدرێت، و پێشبینی دەکرێت بڕیارەکە لە کۆتایی ئەم هەفتەیە یان سەرەتای هەفتەی داهاتوودا بێت. بەپێی زانیارییەکان  محەممەد شیاع سوودانی ڕایگەیاندووە، تا کۆتایی ئەم هەفتەیە هەوڵدەدەن مووچەی مانگی ئابی مووچەخۆرانی هەرێمی کوردستان بنێرین، بەڵام لەوە دەچێت میکانیزمەکانی ناردنی مووچە بکەوێتە سبەی چوارشەممە و وەزارەتی دارایی ڕابسپێرن بۆ خەرجکردنی مووچەی مانگی ئابی مووچەخۆرانی هەرێمی کوردستان تا ئەو کاتەی حکوومەتی هەرێمی کوردستان و حکوومەتی فیدراڵ لەسەر پرسی داهاتی نانەوتی دەگەنە ڕێککەوتن. حکوومەتی هەرێمی کوردستان بە فەرمی حکوومەتی فیدراڵی ئاگادار کردووەتەوە، ئەو ڕاوێژکارییەی لە ئەنجوومەنی دەوڵەتەوە چووە بۆ ئەنجوومەنی وەزیران، پشتی پێ نەبەسترێت تا ئەوکاتەی ڕێککەوتن لەسەر داهاتی نانەوتی دەکرێت. بڕیاربوو ئەمڕۆ لە کۆبوونەوەی ئەنجوومەنی وەزیرانی عێراقدا بڕیار لەسەر مووچەی مانگی ئاب و ئەیلوول و مانگەکانی دیکەی مووچەخۆرانی هەرێمی کوردستان بدرێت، بەڵام ئەو پرسە لە کۆبوونەوەکە باس نەکرا، دوای تەواوبوونی کۆبوونەوەکە، ئەو سێ وەزیرە کوردە بۆ ماوەی کاتژمێرێک لەگەڵ سەرۆک وەزیرانی عێراق کۆبوونەتەوە و لە کۆبوونەوەکەدا سەرۆک وەزیرانی عێراق ڕایگەیاندووە، مووچەی مانگی ئابی مووچەخۆران خەرج دەکەن تا ئەوکاتەی ڕێککەوتن لەسەر داهاتی نانەوتی دەکرێت و مووچەکانی مانگەکانی دیکەش خەرج دەکرێن.

سەرۆکی یەکێتیی نیشتمانیی کوردستان، سەبارەت بەدەستگیرکردنى لاهور شێخ جەنگى وتى: ئەو خۆى وتى من ملیشیام هەیە، ئەو بەڵگانەى هەبوون لەسەرى وەک چەک و درۆن و هارد بەڵگەى زۆرن لەسەرى.   بافڵ جەلال تاڵەبانی، سەرۆکی یەکێتیی نیشتمانیی کوردستان، لە میانی بەشداریکردنی لە پانێڵێکی تایبەتدا لە دیداری مێری، تیشکی خستە سەر دۆخی ناوخۆی حزبەکەی و رایگەیاند، یەکێتی یەکگرتووە و لە پێگەیەکی بەهێزدایە. سەبارەت بە کێشە ناوخۆییەکانی پێشووی یەکێتی، بافڵ جەلال تاڵەبانی رایگەیاند: "بەڵگەی زۆر لەسەر کاک لاهور هەیە،" ئەمەش ئاماژەیەکی روون بوو بۆ ئەو رووداوانەی کە بوونە هۆی گۆڕانکاری لەناو سەرکردایەتیی یەکێتیدا. تاڵەبانی تیشکی خستە سەر پەیوەندییەکانیان لەگەڵ پارتی و گوتی: "هەر کاتێک لەگەڵ پارتی پێکەوە کارمان کردبێت، سەرکەوتوو بووین. ئێمە لە حکومەت هاوبەشیمان دەوێت و پێویستە هاوبەشی راستەقینەی یەکدی بین." بافڵ جەلال تاڵەبانی جەختی کردەوە کە سلێمانی شارێکی ئارامە بۆ دەنگە جیاوازەکان و گوتی: "هەموو چالاکوانە سیاسییەکان لە سلێمانی هەست بە پارێزراوی دەکەن."  

لە کۆبوونەوەی پارتەکەی لە پەرلەماندا هاوسەرۆکی گشتیی دەم پارتی تولای حاتەم ئۆغوللاری  قسەیکرد و وتی: کاتی پەڕینەوە بۆ قۆناغی یاسایی و سیاسی هاتووە. پێویستە یاسای دیموکراتیک دابڕژێرێتەوە و بە دڵنیاییەوە دەبێت کۆمیسیۆن گوێ لە بەڕێز ئۆجالان بگرێت. هەروەها  ڕایگەیاند پێشبینی دەکەن بڕیارەکە سەبارەت بە دەمیرتاش ئەمڕۆ یان سبەی جێبەجێ بکرێت. هاوسەرۆکی گشتی پارتی یەکسانی و دیموکراسیی گەلان (دەم پارتی) تولای حاتەم ئۆغوللاری لە کۆبوونەوەی پارتەکەی لە پەرلەماندا قسەیکرد، چالاکوانانی ژنی ڕێپێوانەکەی تەژەئا بەشداری کۆبوونەوەکەبوون و لە هۆڵی کۆبوونەوەکەدا درووشمی "بژی سەرۆک ئاپۆ"یان گوتەوە. دوای کۆبوونەوەکە، حاتمئۆغولاری وەڵامی پرسیاری ڕۆژنامەنووسانی دایەوە. لە وەڵامی پرسیارێکدا سەبارەت بە بڕیاری ئازادکردنی سەڵاحەدین دەمیرتاش، هاتیمۆغولار وتی، "ئەمڕۆ یان سبەی پێشبینی دەکەین بڕیارەکانی ECHR جێبەجێ بکرێن و ویژدانی خەڵک ئاسوودە بێت. هیوادارین لە ماوەی چەند کاتژمێرێکدا هاوڕێکانمان ئازاد بکرێن". تولای حاتەم ئۆغوللاری پاش سڵاوکردن لە بەشداربووانی ژنی ڕێپێوانی "بە هیواوە بەرەو ئازادی ڕێپێوان دکەین"، سەرنجی خستەسەر ئێستایی پرۆسەی ئاشتی و کۆمەڵگەی دیموکراتیک و بە تایبەت ڕاوەستەی لەسەر کارەکانی کۆمیسیۆن کرد. تولای حاتەم ئۆغۆلاری گوتی: "لە کۆی ١٣ کۆبوونەوەی کۆمیسیۆندا هەموو کەسانەی قسەیانکرد جەختییان لەسەر بابەتی هاوڵاتیبوونی یەکسان و مافە دیموکراتیکییەکان کردەوە و داوای هەنگاونانی یاساییان کرد. داخۆ دەوڵەت و دەسەڵاتداری بۆ ئەو پرسە بەنیازە کەی هەنگاو بنێت؟ پەیوەست بەم پرۆسەیەوە چارەنووسسازترین هەنگاوە. نابێت ئەو هەنگاوانەی بەڕێز ئۆجالان و ڕێکخستنەکەیمان بیربچێت کە بۆ پەرەدان بە پرۆسەکە هەڵیانگرت. دوابەداوی دامەزراندنی کۆمیسیۆن ئیدی کاتی ئەوەیە بپەڕینەوە بۆ قۆناغی یاسایی و سیاسی. لە پێناو ئەنتێگراسیۆنی دیموکراتیکییدا دەبێت یاسای دیموکراتیکی بنووسرێتەوە. دەبێت بەبێ درەنگ کەوتن کۆمیسیۆن گوێ لە بەڕێز ئۆجالان بگرێت." تولای حاتەم ئۆغوللاری جەختی لەوەکردەوە کلیلی سەرەکی چارەسەری بە گوێگرتن لە ڕێبەر ئاپۆ دەبێت کە بەردەنگ و کارەکتەری سەرەکی پرۆسەیەکە، گوتی: "بۆیە بۆ دڵنیابوونەوەی کۆمەڵگە لە پرۆسەکە پێویستە دەسەڵاتداری ئەو هەنگاوە بنێت. بێگومان بە گوێگرتنی کۆمیسیۆن لە بەڕێز ئۆجالان، پرۆسەکە دەچێتە قۆناغێکی نوێوە." هاوسەرۆکی گشتیی دەم پارتی بەبیری هێنایەوە کە دوای دوو ڕۆژی دیکە ٢٧ساڵ بەسەر پیلانگێڕی نێونەتەوەیی کە لە دژی ڕێبەر ئاپۆ ئەنجامدرا تێپەڕ دەبێت و وتی: "بانگەوازی ٢٧ی شوبات بۆ پووچەڵکردنەوەی پیلانگێڕیی ٩ی تشرینی یەکەم هەنگاوێکی بەهێزە. بەڕێز ئۆجالان ماوەی ٢٧ ساڵە بە بەردەوامی لە دژی ئەو کەسانەی گەلان لە دژی یەکتر بەکار دێنن بە پیداگرییەوە بەرگری لە ئاشتی دەکات. بۆیە مافی هیوا دەبێت بۆ بەڕێز ئۆجالان دانی پێدا بنرێت. مافی هیوا خاڵێکی یاساییە کەچی لەبەرنامەدا نییە. یەکێک لە پێوانە یاساییە جیهانییەکانە. لە ١٧ی ئەیلول کۆمیتەی وەزیرانی ئەنجومەنی ئەوروپا بڕیاری خۆی سەبارەت بە مافی هیوای ڕاگەیاند. سەبارەت بەم بابەتە چاوەڕوانییەکانی خۆی لە کۆمیسیۆن و پەرلەمان ڕاگەیاند. ئەمە بڕیارێکی زۆر گرنگە و دەبێت وڵامی جددی ئەم چاوەڕوانییە بدرێتەوە. ئێوە ناتوانن بۆ هەمیشە دەرگاکە دابخەن و کلیلەکە فڕێ بدەنە دەریاوە. پرۆسەکانی ئاشتی کۆمەڵایەتی تەنیا بە سەرلەنوێ بیرکردنەوە، ڕێکخستنەوە و خاوەنداری لەم ڕوانگەیە دەتوانرێت بەدی بێت. گەڕاندنەوەی مافی هیوا دەبێت وەک هەنگاوێکی بەپەلە بخرێتە ڕۆژەڤەوە." بابەتێکی دیکەی قسەکانی تولای حاتەم ئۆغوللاری بارودۆخی باکوور و ڕۆژهەڵاتی سووریا بوو. هاوسەرۆکی دەم پارتی وتی: "ئیدارەی خۆبەڕێوەبەری باکوور و ڕۆژهەڵاتی سووریا بووەتە هیوایەکی جێگرەوە دژ بە دەسەڵاتداری، ناوەندگەرایی و پیاوسالاری لە ناوچەکەدا. بە ئازادیی ژنان، سیکۆلاری، پێکەوەژیانی فرە کولتوری و نەتەوەیی، نەک تەنها وەک مۆدێلێک بۆ سووریا، بەڵکو دەبێت وەک مۆدێلێکی  هەمە لایەنە سەیر بکرێت و پشتگیری لێبکرێت کە دەتوانێت چارەنووسی خراپی تەواوی ناوچەکە بگۆڕێت. لە کاتێکدا ئێمە سەبارەت بەم بابەتانە قسە دەکەین، ڕووداوەکان لە حەلەب ڕوودەدەن، دڵنیام ئێوەش بەدواداچوونتان بۆ کردووە لە ئێستادا گەڕەکەکانی ئەشرەفیە و شێخ مەقسوود لەلایەن گروپەکانی ئیدارەی کاتی دیمەشقەوە گەمارۆدراون، و هێرش دەکەنە سەر هاووڵاتیانی مەدەنی. حاتەم ئۆغوللاری بەنگەوازی لە حکومەتی کاتی کرد دەستبەجێ کۆتایی بە گەمارۆکان بێنێت و ڕایگەیاند: "لەگەڵ کورد دانوستان مەرجە نەک شەڕ. ڕێککەوتن سوود بە سووریا دەگەیەنێت، شەڕ و خوێنڕشتن کۆتایی پێ دێنێت، بۆیە دەبێت دەستبەجێ هەڕەشە و هێرشەکان کۆتایی پێبێت." باکوور و ڕۆژهەڵاتی سووریا قەت نەبووەتە مەترسی بۆ سەر تورکیا و نابێت وەک هەڕەشە سەیر بکرێت، بەپێچەوانەوە پێویستە وەک خاکی خوشک-برایەتی و ئاشتی سەیر بکرێت. خەڵکی ڕۆژئاوا دەڵێن ڕێز، دیالۆگ و دیموکراسی خوجێی. ئەمە مۆدێلێکی کۆمەڵایەتی دیمۆکراتیکە کە گەلی تورکیاش بەهێزتر دەکات. بۆیە ئەگەر هێڵێکی دیالۆگ و ئاشتی لەگەڵ باکوور و ڕۆژهەڵاتی سووریا لەلایەن تورکیاوە جێبەجێ بکرێت، ئەوەش ئەمەیە و کاریگەری ئەرێنی لەسەر هەموو لایەک دەبێت و هەموو لایەک پێی سوودمەند دەبن."

کۆبوونەوەی وەفدی بەڕێوەبەرایەتیی خۆسەر و هەسەدە لەگەڵ حکومەتی سوریا کۆتایی هات و وەزیری بەرگریی سوریا رایگەیاند: لەگەڵ مەزڵوم کۆبانێ لەسەر ئاگربەستی دەستبەجێ رێککەوتووین. مورهەف ئەبو قەسرە، وەزیری بەرگریی سووریا دەڵێت، لە دیمەشق لەگەڵ مەزڵووم عەبدی کۆبووەتەوە و بڕیار لەسەر ئاگربەستێکی سەرتاسەری دراوە.    وەزیری بەرگریی سووریا ئاماژە بەوە دەدات، راگرتنی شەڕ هەموو پێگە سەربازییەکان لە باکوور و رۆژهەڵاتی سووریا دەگرێتەوە.  مرهف ئەبو قەسرە، وەزیری بەرگری لە حکومەتی سوریا، رایگەیاند کە دوای کۆبوونەوەی لەگەڵ مەزڵووم کۆبانێ، فەرماندەی گشتیی هێزەکانی سوریای دیموکرات (هەسەدە)، گەیشتوونەتە رێککەوتن بۆ ئاگربەستێکی گشتگیر و دەستبەجێ لە باکور و باکوری رۆژهەڵاتی سوریا. ئەبو قەسرە لە لێدوانێکدا کە لە دیمەشقی پایتەختەوە بڵاوی کردەوە، وتی: "کەمێک لەمەوبەر لە دیمەشقی پایتەخت چاوم بە بەڕێز مەزڵووم کۆبانێ کەوت و رێککەوتین لەسەر راگرتنی تەواوەتیی تەقە لە سەرجەم میحوەر و خاڵە سەربازییەکانی باکور و باکوری رۆژهەڵاتی سوریا." وەزیری بەرگری جەختیشی کردەوە کە "جێبەجێکردنی ئەم رێککەوتنە دەستبەجێ دەست پێدەکات." ئەم راگەیاندنە لە کاتێکدایە کە وەفدێکی باڵای بەڕێوەبەرایەتیی خۆسەر و هێزەکانی سوریای دیموکرات بە سەرۆکایەتی مەزڵووم کۆبانێ، بەمەبەستی گفتوگۆکردن لەسەر میکانیزمەکانی جێبەجێکردنی رێککەوتنی 10ی ئادار، لە دیمەشقن. بەیانیی ئەمڕۆ سێشەممە، مەزڵووم عەبدی چووە دیمەشق و میدیاکانی نزیک لە هەسەدە ڕایانگەیاندووە، لەگەڵ ئەحمەد شەرع، سەرۆکی قۆناخی ڕاگوزەری سووریا کۆبووەتەوە. تەوەرێکی سەرەکیی کۆبوونەوەکەیان، وەستاندنی یەکجارەکی شەڕ بوو لە گەڕەکە کوردنشینەکانی حەلەب.  شەوی ڕابردوو (دووشەممە، 06ـی تشرینی یەکەمی 2025)، گرووپە چەکدارەکانی سەر بە حکوومەتی نوێی سووریا هێرشیان کردە سەر هێزە ئەمنییەکانی هەردوو گەڕەکی کوردنشینی حەلەب (ئەشرەفییە و شێخ مەقسوود) و شەڕەکە تا بەرەبەیانیی ئەمڕۆ سێشەممە، 07ـی تشرینی یەکەمی 2025، بەردەوام بوو.  وەزارەتی بەرگرییی سووریا هەسەدەی تۆمەتبار کرد، بەڵام هەسەدە بە ڕاگەیێندراوێک وێڕای رەتکردنەوەی تۆمەتەکان، ئاڵۆزییەکانی خستە ئەستۆی هێزەکانی ئەحمەد شەرع، سەرۆکی قۆناخی ڕاگوزەری سوور

بەوتەی ساڵح موسلیم، لە شەڕ و ڕووبەڕووبونەوەکانی دوێنێی هەردوو گەڕەکی ئەشرەفییە و شێخ مەقسوود دوو کەس شەهیدن و 60 کەسیش بریندارن. ساڵح موسلیم، ئەندامی ئەنجومەنی هاوسەرۆکی پەیەدە ڕاگەیاند، لەو هێرشەی دوێنێی هێزەکانی حکومەتی سووریا بۆسەر دوو گەڕەکە کوردییەکەی حەلەب، دوو کەس شەهید بوون و 60 کەسیش بریندارن. ساڵح موسلیم دەشڵێت: ئەمڕۆ شاندێک بە سەرۆکایەتی مەزڵوم عەبدی، فەرماندەیی هێزەکانی سووریای دیموکرات و ئیلهام ئەحمەد، بەرپرسی پەیوەندییەکانی دەرەوەی ئیدارەی خۆسەر و ڕۆهلات عەفرین، فەرماندەی گشتی یەپەژە لە دیمەشقن و لەگەڵ ئەحمەد شەرع کۆدەبنەوە. کۆبوونەوەکە تایبەتە بە میکانیزمی جێبەجێکردنی ڕێککەوتنی ئاداری ئەمساڵ.  لەماوەی دوو ڕۆژدا شەڕ و ڕووبەڕووبونەوەی گەورە لەنێوان ئاسایشی ناوخۆیی و خەڵکی هەردوو گەڕەکی ئەشرەفییە و شێخ مەقسود و هێزەکانی نزیک لە دیمەشق ڕوویداوە. لەلایەن هێزەکانی سەر بە حکومەتی سووریا بە چەکی قوورس هێرش کرایە سەر هەردوو گەڕەکەکە. لەلایەکى دیکەوە پەیوەست بەگرژیەکانى شەوى رابردوو، شاندێکی باڵای بەڕێوەبەرایەتیی خۆسەر لە باکوور و رۆژهەڵاتی سووریا، بە سەرۆکایەتیی مەزڵووم عەبدی، فەرماندەی گشتیی هەسەدە گەیشتنە دیمەشق و لەگەڵ ئەحمەد شەرع کۆبوونەوە.   شاندەکە، بە سەرۆکایەتیی مەزڵووم عەبدییە و هەریەکە لە ئیلهام ئەحمەد، هاوسەرۆکی دەستەی پەیوەندییەکانی دەرەوەی ئیدارەی خۆسەر و رۆژهەڵات عەفرین، فەرماندەی یەکینەکانی پاراستنی ژن (یەپەژە) یاوەری دەکەن.   بەگوێرەی زانیارییەکان، شاندە کوردییەکە لەگەڵ ئەحمەد شەرع، سەرۆکی قۆناخی راگوزەری سووریا و ئەسعەد شەیبانی، وەزیری دەرەوەی ئەو وڵاتە لە کۆبوونەوەدان.   لە کۆبوونەوەکانی شاندی بەڕێوەبەرایەتیی خۆسەر و سەرۆکی سووریا، تۆم باراک، نێردەی تایبەتی ئەمریکا بۆ سووریا و ئەدمیراڵ کووپەر، فەرماندەی فەرماندەیی ناوەندی ئەمریکا ئامادەن.

لە کاتێکدا تا دێت گرژییەکانی نێوان هەسەدە و ‌حکومەتی کاتیی سووریا زیاتر تەشەنە دەسێنن، ڕۆژنامەی تورکیا نزیک لە ئاک پارتی بڵاویکردەوە بەشێوەیەکى فەرمى بانگهێشتى وەزیرى دەرەوەى سوریا کراوە بۆ ئەنقەرەو بڕیارە سبەی لەگەڵ وەزیرانی دەرەوەی تورکیا کۆ ببنەوەـ بەپێى ڕاپۆرتى ڕۆژنامەکە ئەگەر هەسەدە تیکەڵی سوپای سووریا نەبێت، ئەوا هەردوو سوپای تورکیا و سووریا پێکەوە ڕووبەڕووی هەسەدە دەبنەوە. ڕۆژنامەی تورکیا بڵاوی کردووەتەوە بڕیارە سبەی هاکان فیدان، وەزیری دەرەوەی تورکیا لەگەڵ هاوتا سوورییەکەی، ئەسعەد ‌حەسەن شەیبانی کۆببنەوە و یەکێکیش لە تەوەری گفتوگۆکانیان پرۆسەی تێکەڵبوونی هەسەدە دەبێت لەگەڵ سوپای نوێی سووریا. ڕۆژنامەکە لە زاری گەورە بەرپرسانی تورکیاوە سەرنجی خستووەتە سەر ئەوەی تورکیا مانەوەی هەسەدە وەک هەڕەشە بۆ سەر یەکپارچەیی خاکی سووریا و ئاسایشی نیشتمانیی خۆی دەزانێت، ئەگەر هەسەدە تێکەڵی سوپای نوێی سووریا نەبێت ئەوا تورکیا پشتیوانی لە سووریا دەکات و سوپای تورکیا و سووریا ئۆپەراسیۆنی سەربازیی هاوبەش بۆ سەر هەسەدە ئەنجام دەدەن. ئەم بانگێشتەى وەزیرى دەرەوەى سوریا لەکاتێکدایە شەوی دووشەممە 06ـی ئۆکتۆبەری 2025، نزیک کاژێر 04:00ـی ئێوارە، هێزەکانی ئاسایشی سەر بە حکومەتی کاتیی سووریا، رێگە سەرەکییەکانی هەردوو گەڕەکی کوردنیشینی حەلەب (ئەشرەفییە و شێخ مەقسوود)یان بە بەرزکردنەوەی خۆڵ بەربەست کرد و داخست.   دوای داخستنی رێگەکانی ئەو دوو گەڕەکە، کوردانی ناوچەکە رژانە شەقامەکان، هێزە ئەمنییەکانی حکومەتەکەی ئەحمەد شەرع سەرەتا بە گازی فرمێسکڕێژ هەوڵی بڵاوەپێکردنی خەڵکیاندا، بەڵام دواتر ئاڵۆزییەکان فراوان بوون و بە تەقە خەڵکیان ناچار کرد بگەڕێنەوە ماڵەکانیان.   بەگوێرەی نەخۆشخانەی گەڕەکی شێخ مەقسوود بۆ رووداو، لە رووداوەکانی دوێنێدا کەسێکی سڤیل کوژراوە و 50 کەسیش بریندار بوون.   بۆ هۆکاری دەستپێشخەری شەڕەکەی شەوی رابردوو، وەزارەتی بەرگرییی حکومەتی کاتیی سووریا هەسەدەی تۆمەتبار کرد، بەڵام هەسەدە بە راگەیێندراوێک وێڕای رەتکردنەوەی تۆمەتەکان، ئاڵۆزییەکانی خستە ئەستۆی هێزەکانی ئەحمەد شەرع، سەرۆککۆماری قۆناخی راگوزەری سووریا. هاوکات ئەمڕۆ شاندێکی باڵای بەڕێوەبەرایەتیی خۆسەر لە باکوور و رۆژهەڵاتی سووریا، بە سەرۆکایەتیی مەزڵووم عەبدی، فەرماندەی گشتیی هەسەدە گەیشتنە دیمەشق و لەگەڵ ئەحمەد شەرع کۆبوونەوە.   شاندەکە، بە سەرۆکایەتیی مەزڵووم عەبدییە و هەریەکە لە ئیلهام ئەحمەد، هاوسەرۆکی دەستەی پەیوەندییەکانی دەرەوەی ئیدارەی خۆسەر و رۆژهەڵات عەفرین، فەرماندەی یەکینەکانی پاراستنی ژن (یەپەژە) یاوەری دەکەن.

  شاندێکی باڵای هێزەکانی سووریای دیموکرات (هەسەدە) بە سەرۆکایەتیی مەزڵووم عەبدی گەیشتە دیمەشق. ئەم سەردانە ئامانج لێی بەشداریکردنە لە کۆبوونەوەیەکی گرنگی سێقۆڵی، کە تێیدا نوێنەرانی کورد و حکومەتی سووریا و لایەنی ئەمریکی ئامادەن، بۆ گفتوگۆکردن لەسەر دۆخی باکووری و رۆژهەڵاتی سووریا. میدیاکانى ڕۆژئاواى کوردستان دەڵێن شاندی کوردی بە سەرۆکایەتیی مەزڵووم عەبدی، پێکهاتووە لە رۆیهات عەفرین و ئیلهام ئەحمەد. ئەم سێ کەسایەتییە باڵایە نوێنەرایەتی پێکهاتەی بەڕێوەبەریی خۆسەر و هەسەدە دەکەن بۆ تاوتوێکردنی چارەنووسی ناوچەکانی ژێر دەسەڵاتیان لەگەڵ دیمەشق و واشنتن.   لە کۆبوونەوەکەدا، ئەدمیرال کووپەر، فەرماندەی فەرماندەیی ناوەندیی هێزەکانی ئەمریکا (سێنتکۆم) و تۆم باراک، نوێنەری دۆناڵد ترەمپ، سەرۆکی ئەمریکا بەشدارن. کە رۆڵێکی بەرچاو دەگێڕن لە پڕۆسەی گفتوگۆکان.   لایەنی حکومەتی سووریا بە نوێنەرایەتیی ئەسعەد شەیبانی و ئەحمەد شەرەع ئامادەن، چاوەڕوان دەکرێت گفتوگۆکان سەبارەت بە پرسی پەیوەندیی نێوان هەسەدە و دیمەشق بێت. ئەم هەنگاوە دوای کۆبوونەوەیەک دێت کە لە ٦ی ئۆکتۆبەر بەڕێوەچوو، بە ئامادەبوونی مەزلوم عەبدی، ئیلهام ئەحمەد، ڕۆهلات عەفرین، جێگری هاوسەرۆکی ئەنجومەنی سوریای دیموکرات، غەسان ئەلیوسف و سەرۆکی پارتی سوریای داهاتوو، عەبدولحەمید ئەلمەهباش، لەگەڵ نێردەی ئەمریکا بۆ سوریا، تۆم باراک و فەرماندەی فەرماندەیی ناوەندی ئەمریکا (CENTCOM)، عەدمیرال براد کوپەر کە سەرۆکایەتی شاندێکی هاوپەیمانی نێودەوڵەتی کرد..

سەرۆک وەزیران مەسرور بارزانی جەخت لە پشتیوانیی حکوومەت بۆ گەنجان و پڕۆژە بچووکەکان دەکاتەوە و دەڵێت، گەنجانی کوردستان توانیویانە لە بواری تەکنەلۆژیادا، داهێنان بکەن.  ئەمڕۆ سێ شەممە سەرۆکوەزیران مەسرور بارزانی، شەشەم گەورەترین پێشانگای تەکنەلۆژی لە ڕۆژهەڵاتی ناوەڕاست و گەورەترین پلاتفۆرم و پێشانگە و کۆنفرانسی لە کوردستان و عێراق بۆ تەکنەلۆژیا لە هەولێر کردەوە. مەسرور بارزانی سەرۆکوەزیران  لە پێشانگای هایتێکسدا ڕایگەیاند: دەستخۆشی لە ڕێکخرانی پێشانگەکە دەکەم و کاریکی باشیان کردووە، ئەمە چەند ساڵیکە من بەشدار دەبم و هەر ساڵ دەبینم پێشکەوتنی زیاتر لە پێشانگەدا هەیە، خەڵکێکی شارەزا لەناو کوردستان هەڵکەوتوە، گەنجەکانمان توانیویانە داهینان بکەن و بەشداربن لەم پێشکەوتنە تەکنەلۆژیەی ئێستا لە سەرتاسەری جیهان هەیە. هەروەها تیشکی خستە سەر ئەوەی، حکومەت یارمەتیی هەموو ئەو بزنسمان و داهێنەرانە دەدەن کە ئامادەن خۆیان کار بکەن، وتیشى: . جێگەی دڵخۆشییە و ئومێد زۆرم کە کوردستان ئایندەیەکی گەشتری دەبێت. سەرۆک وەزیران مەسرور بارزانی گوتیشی "خەڵکانێکی زۆر شارەزا لەناو خودی کوردستان هەڵکەوتوون و گەنجەکانمان توانیویانە هەم داهێنان بکەن و هەم بەشداربن لەم پێشکەوتنە تەکنەلۆجییەی کە ئێستا لەسەرانسەری جیهاندا هەیە." لەوەڵامی پرسیارێکدا سەبارەت بە چۆنییەتی پشتیوانیکردنی ئەو گەنجانەی کە پڕۆژەی بچووکیان هەیە؟ مەسرور بارزانی دووپاتیکردەوە "حکوومەت پشتیوانە و یارمەتی هەموو ئەو بزنسمان و داهێنەرانە دەدات کە ئامادەن خۆیان کار بکەن. حکوومەت بێگومان پشتیوان دەبێت و بەردەوام دەبین لەو پشتیوانییە."

دوو ساڵ لەمەوبەر، كەتیبەكانی قەسام، باڵی سەربازی بزوتنەوەی حەماسی فەلەستینی، لە كەرتی غەززەوە هێرشێكی لەناكاو و فراوانیان كردە سەر ئۆردوگا جولەكە نشینینەكان و سەربازگەكانی ئیسرائیل، كە بە قورسترین هێرش دادەنرێت كرابێتە سەر ئیسرائیل لەماوەی دەیان ساڵی رابردوودا، ئەوەش دەرگای بۆ گەورەترین هەڵمەتی سەربازی سوپای ئیسرائیل كردەوە دژی كەرتی لەمێژوویی ململانێی نێوان ئیسرائیل و فەلەستییەكان. لە ماوەی چەند کاتژمێرێى هێرشەكەی حەماس، زیاتر لە هەزار سەرباز و هاوڵاتی لە ناوخۆی ئیسرائیل کوژران و نزیکەی ٢٥١ كەسيش بەدیل گیران و گواسترانەوە بۆ غەززە.  لە رۆژی دوای هێرشەكەی حەماسەوە ، غەززە بوو بە گۆڕەپانێكی كراوەی جەنگ، دوای دوو ساڵ لە بۆردومان و لەشکرکێشی زەمینی ئاسمانی و تەنانەت هێرشی دەریایش، کۆی ژمارەی قوربانی و بێسەروشوێنەكان گەیشتووەتە (76)هەزار و (639)کەس. بەپێی داتا فەرمییەکان، ژمارەی منداڵانی قوربانی (٢٠) هةزار منداڵی تێپەڕاندووە، ژمارەی ئەو ژنانەشی لە شەڕەکەدا كوژراون، گەیشووەتە (12)هەزار و (500)ژن. هەزار و (٦٧٠) کارمەندی پزیشکی و (١٤٠) کارمەندی بەرگری شارستانی و (٢٥٤)رۆژنامەنوس و (١٧٦) کارمەندی شارەوانی کە چواریان سەرۆکی شارەوانین و زیاتر لە (٧٨٧)کارمەندی پۆلیس و فریاگوزاری کوژراون، هەروەها (٨٩٤)وەرزشەوان لە سەرجەم بوارەكان وەرزش. لە لایەنی ئیسرائیلیش، بەپێی ئامارە فەرمییەكان، لە ٧ی تشرینی یەکەمی ٢٠٢٣ەوە تا ئێستا هەزار و (١٥٢)سەربازی ئیسرائیلی کوژراون، ، تائێستاش نزیكەی (45) بارمتە لای بزوتنەوەی حەماس ماون، كە بەشێكین گیانیان لە دەستداوە. لەبارەی قەبارەی وێرانکارییە مادییەكان لە غەززەش، زیاتر لە (60%)ی باڵەخانەكانی بە تەواوی وێران بوون یان زیانێکی زۆریان بەرکەوتووە، 350 هەزار بۆ 400 هەزار یەکەی نیشتەجێبوونيش بە كەڵكی ژیانكردن نەماون. لە ئێستادا نزیکەی 2 ملیۆن کەس لە چادر یان پەناگەی کاتیدا دەژین، کە هەندێکیان سێ یان چوار جار لە کاتی جەنگدا ئاوارە بوون،  جگە لەوەش زیاتر لە 70%ی قوتابخانەکان پەكیان كەوتووە، یان کراون بە پەناگەی ئاوارەکان، هەندێکیشیان وەک نەخۆشخانەی کاتی بەکاردەهێنرێن.  لەبواری تەندروستیشدا، 90%ی نەخۆشخانەو بنکە تەندروستییەکان یان زیانیان بەرکەوتووە یان داخراون. رێژەی  وێرانکاری بە گشتی لە غەززە گەیشووەتە نزیکەی 90%، لەکاتێکدا سوپای ئیسرائیل 80%ی ناوچەكانی کەرتی غەززەی کۆنترۆڵکردوە، ناوچەی ئەلمەواسی کە ئیسرائیل بانگەشەی ئەوە دەکات ناوچەیەکی مرۆیی سەلامەتە، 136 جار بۆردومانی کردووە، زیاتر لە 200 هەزار تۆن تەقەمەنی بەسەر کەرتی غەززەدا بەرداوەتەوە. فەرمانگەی میدیایی حکومەتى غەززە زیانەکانی سەرەتایی راستەوخۆكانى بۆ (١٥) کەرتی گرنگ بە 70 ملیار دۆلار خەمڵاندووە. دووشەممە 6ی تشرینی یەکەمی 2025،  میدیاکانی میسر بڵاویان کردووەتەوە، دانوستانەکانی ناڕاستەوخۆ لەنێوان هەر دوو شاندی حەماس و ئیسرائیل لە شەرم شێخ بە نێوەندگیری قەتەر، میسر و ئەمەریکا لەبارەی ئاگربەستی غەززە بەڕێوەچوو. کەناڵی "قاهیرە"ی میسری، لەو بارەوە ڕایگەیاند، شاندەکان "گفتوگۆ لەسەر ئامادەکردنی زەمینەی گونجاو بۆ ئازادکردنی بارمتەکان دەکەن. ئاماژەشی داوە، "میسر و قەتەر لەگەڵ هەر دوو لایەن کار دەکەن بۆ دامەزراندنی میکانیزمێک" بۆ ئاڵوگۆڕی بارمتەکان و زیندانییەکان. سەرچاوەیەکی نزیک لە سەرکردایەتی حەماس بە ئاژانسی فرانس پرێسی ڕاگەیاند: ئەم خولەی دانوستانەکان، لەوانەیە چەند ڕۆژێک بخایەنێت، گوتیشی: پێشبینی دەکەین دانوستانەکان قورس و ئاڵۆز بن.

 ئیدارەی خۆبەڕێوەبەریی دیموکراتیکی باکوور و ڕۆژهەڵاتی سووریا سەبارەت بە هێرشی هێزەکانی حکومەتی کاتیی سووریا بۆ سەر گەڕەکەکانی شێخ مەقسوود و ئەشرەفیە ڕاگەیاندراوێکی نووسراوی بڵاوکردەوە و بەتوندیی هێرشەکە شەرمەزاردەکات، دەڵێت: "ئەوەی لە شێخ مەقسوود و ئەشرەفیە ڕوودەدات، بەردەوامیدانە بە ڕەفتارە نەژادپەرستییەکان و چەسپاندنی سیاسەتی دابەشکاری کە حکومەتی کاتی پەرەی پێ دەدات. لە نیوەڕۆی دووشەممەوە لە هەردوو گەڕەکە کوردنشینەکەی شاری حەلەبی سووریا، ئاڵۆزی لەنێوان هێزەکانی سەر بە هەسەدە و هێزەکانی حکومەتی دیمەشق دروستبوو. هاوسەرۆکی گەڕەکەکان دەڵێت، حەوت رێگەی هاتووچۆ لەو دوو گەڕەکە هەن سەرجەمیان لەلایەن هێزەکانی حکومەتەوە داخران و هاتووچۆیان قەدەخە کرد.  هەر لەو ڕاگەیەندراوەدا ئەوەش دەخاتەڕوو کە ئاشکرایە، هیچ وانەیەک لە ڕووداوەکانی کەناراوەکان و سوەیدا وەرنەگیراوە. هەمان زیهنیەت و ڕێباز باڵادەستە، ئەمەش سووریا پەلکێش دەکات بۆ کارەسات و وێرانکاریی. بۆیە بانگەواز لە هەموو سوورییە ئازادیخواز و شکۆمەندەکان دەکەین، پشتیوانی لە گەلەکەمان بکەن لە شێخ مەقسوود و ئەشرەفیە. داوا لە هەموو هێزە دیموکراتیکەکانی سووریا و ڕێکخراوە نێونەتەوەییەکان و کۆمەڵگەی نێونەتەوەیی دەکەین ئەم سیاسەتەی حکومەتی کاتیی سووریا بوەستێنن. ئەوەی ئەمڕۆ ڕوودەدات، غیابی جددییەتە لە هەوڵدان بۆ دۆزینەوەی چارەسەرێکی سەراپاگیر بۆ پرسە نیشتیمانییە هەڵپەسێردراوەکان، دەریدەخات هەندێک لایەن هێشتا پەنا بۆ زمانی چەک و شەڕی ناوخۆ دەبەن لەبری دیالۆگی بنیاتنەر و کاری هاوبەش بۆ بنیاتنانی سووریایەکی دیموکراتیک و فرەپارێز کە هەموو ڕۆڵەکانی ئەم وڵاتە بگرێتەخۆ. ئێمە لە ئیدارەی خۆبەڕێوەبەری، سەرەڕای سەرکۆنەکردنی ئەم هێرشانە، بەرپرسیارێتیی ئاکامەکانی ئەم هێرشە دەخەینە ئەستۆی لایەنە هێرشکەرەکان، بانگەواز لە ڕۆڵەکانی گەلەکەمان لە باکوور و ڕۆژهەڵاتی سووریا دەکەین، هەڵوێستی نیشتیمانی و مرۆیی نیشان بدەن، پشتیوانی لە خۆڕاگری و بەرخۆدانی ڕەوای خوشک و براکانیان بکەن دژی ئەم هێرشانە. هەروەها بانگەواز لە هەموو پێکهاتەکانی سووریا دەکەین، یەکبگرن دژی هەموو هەوڵێکی ئاژاوەگێڕیی لەنێوان ڕۆڵەکانی وڵاتدا، ڕێگە نەدرێت بە دووبارەبوونەوەی کارەساتەکان بەسەر سوورییەکاندا. ئێمە جەخت دەکەینەوە، ڕێگەی ئاشتی و چارەسەری دیموکراتیک، تاکە ڕێگەیە بۆ کۆتاییهێنان بە قەیرانی سووریا، بەئامانجگرتنی هاووڵاتیان و شوێنە مەدەنییەکان تەنها ماڵوێرانی زیاتر بەدوای خۆیدا دەهێنێت".

چوارچێوەی هەماهەنگیی شیعەکان، لە کۆبوونەوەیەکدا پرسی هەڵبژاردن، کەمیی ئاو و دۆخی هەرێمایەتیی تاوتوێ کرد و جەختی لەسەر بەڕێوەچوونی هەڵبژاردن لە وادەی دیاریکراوی خۆیدا کردەوە. هەڵبژاردنی پەرلەمانی عێراق لە 11ی تشرینی دووەمی ئەم ساڵ دەکرێت، کۆمیسیۆنی باڵای سەربەخۆی هەڵبژاردنەکان ناوی 7768 بەربژێری پەسند کردووە بۆ ئەوەی لەو هەڵبژاردنەدا رکابەری بکەن. بەپێی راگەیەندراوێکی فەرمانگەی راگەیاندنی چوارچێوەکە، لە کۆبوونەوەکەدا باس لە هەوڵەکانی حکومەت بۆ چارەسەرکردنی کێشەی کەمیی ئاو کراوە و جەخت لە پێویستیی زیاترکردنی بەردانەوەی ئاو کراوەتەوە، بە پشتبەستن بە رێککەوتنە نێودەوڵەتییەکان. چوارچێوەی هەماهەنگی" شیعەکان" داوا لە لایەنەکان دەکات لە پرۆسەی بانگەشەی هەڵبژاردندا  لە ناوزڕاندن، یەکترشکاندن و بەکارهێنانی پارە بۆ کڕینی دەنگ دووربکەونەوە داوای بەردەوامبوونی کۆبوونەوەکانی پەرلەمانیش دەکات. سەبارەت بە خولی ئێستای ئەنجوومەنی نوێنەران، چوارچێوەی هەماهەنگی داوای بەردەوامبوونی دانیشتنەکانی کردووە، بە مەبەستی یەکلاییکردنەوەی ئەو یاسایانەی کە بۆ گەلی عێراق گرنگن و لە بەرنامەی کاری ئەنجوومەنەکەدا ماون. چوارچێوەی هەماهەنگیی شیعەکان، ئاماژەی بە گرنگیی بەردەوامبوونی ئامادەکارییەکان بۆ پرۆسەی هەڵبژاردن کردووە و دووپاتیکردووەتەوە کە دەبێت پرۆسەکە لە وادەی دیاریکراوی خۆیدا بەڕێوەبچێت. چەندجارێک سەرۆکایەتی پەرلەمانی عێراق کاتی کۆبوونەوەی پەرلەمان دادەنێت، بەڵام بەهۆی تەواونەبوونی رێژەی یاسایی ئامادەبوون کۆبوونەوەکە ناکرێت.  لە کۆبوونەوەکەدا چوارچێوەی هەماهەنگی داوای لە پەرلەمانی عێراق کردووە بەردەوام بێت لە بەستنی دانیشتنەکانی بۆ پەسندکردنی ئەو پڕۆژەیاسایانەی لە کارنامەکەیدا ماونەتەوە و بۆ خەڵکی عێراق گرنگن

چەند کاتژمێرێکە  هەر دوو گەڕەکی شێخ مەقسود و ئەشڕەفیەی کوردنشینی شاری حەڵەب لە لایەن هێزەکانی ئاسایشی گشتی دیمەشق  پەلاماردراوەو شەڕ هەڵگیرساوە و دوای ماوەیەکی کورت چەتەکانی وەزارەتی بەرگری و چەتەکانی حەمزات و عەمشاتی جاشی تورک بۆ هاوکارى ئەوان چونەتە لاى هێزەکانى ئەحمەد شەرع، ئەو پەلاماردانە ناڕەوایەى ئەو دوو گەڕەکەی شاری حەڵەب .  تا ئێستا شەڕ و پێکدادان ناوبەناو درێژەی هەیە بانگخوازە توندڕەوەکانی سوریاش بانگەوازی ( حی علی الجهاد ) یان دەستپێکردوە و کۆمەڵێ ڕەش و ڕووتی عەشایەرەکانی ئیدلیب و حەما خەریکە بە ڕێدەکەون بەرەو شاری حەڵەب، هەرچەندە تا ئێستا شەڕ نەگەیشتۆتە ناو جادەکان و ئەوەی هەیە بە چەکی دۆشکە و دور مەودا خەریکە ئاگری شەڕەکە گەرمتر دەکەن. هێزەکانی سوپای ڕزگاری عەفرین و هێزەکانی ئاسایشی ڕۆژئاڤا زانیاری تەواویان لە بەردەستدا بووە کە چەتەکانی بەرەی نوسرە و بەکرێگیراوەکانی تورک خەریکی هێز کۆکردنەوە و گرتنی هەموو ئەو ڕێگایانەن کە بۆ ئەو دوو گەڕەکە دەچن، بەڵام ئەمشەو دوای کۆبونەوەی خەڵکی دوو گەڕەکەکە و ڕاپەڕینیان بە دار و بەرد دژی هێزەکانی ئاسایشی شاری حەڵەب ، گرژی ئاڵۆزیەکان بوون بە ڕاستی و دۆخەکە تەقیەوە و شەڕە تەقە لە هەر دوو لاوە دروست بوو، تا ئێستاش ناوبەناو درێژەی هەیە . شایانی باسە  ۱٤ ساڵ زیاترە ئەو دوو گەڕەکە بەهۆی ئازایەتی و خۆ قایمکردنی نیشان شکێنە کوڕ و کچەکانی کورد  توانیویانە ئاسایش و ئارامی ئەو دوو گەڕەکە بپارێزن کە ڕێژەی دانیشتوانەکەی دەگاتە ۷٠٠ هەزار کەس و زۆرینەی ڕەها کوردن و بەشێکی عەڕەب و مەسیحیش لە خۆ دەگرێ . هەر چەندە هەوڵێکی زۆر لە ئارادایە کە ئاگری شەڕەکە کپ بکرێتەوە ، بەڵام ئەو چەتە و پیاو کوژانە وادەزانن کە هەر وەکو خەڵکی بێدەسەڵاتی عەلەوی و دروزەکانن و زۆر بە ئاسانی دەتوانن پاکتاویان بکەن . نازانن کە شێرە کوڕان و کچان و ڕق ئەستورەکانی شاری عەفرینن و چاوەڕێی ئەو ڕۆژەن کە تۆڵەی کەسوکاریان بکەنەوە . بەهۆی ئاڵۆزییەکانەوە، پارێزگای حەلەب دەوامی سەرجەم فەرمانگەکانی راگرت و تاقیکردنەوەی قوتابخانە و زانکۆکانیشی دواخست، جگە لەو فەرمانگانەی کە خزمەتگوزاریی بەپەلە پێشکەش دەکەن.

میدیای فەرمیی حکومەتی سووریا رایگەیاند، هێزەکانی حکومەتی سووریا و هێزەکانی سوریای دیموکرات (هەسەدە) لەدوای چەند کاژێرێک لە شەڕوپێکدادانی سەخت لە گەڕەکە کوردنشینەکانی شاری حەلەب، لەسەر ئاگربەستێکی کاتیی لەو ناوچانەی شارەکە رێککەوتن.   بەرەبەیانی رۆژی سێشەممە، تەلەڤزیۆنی فەرمیی سووریا رایگەیاند، بەهۆی شەڕوپێکدادانەکانی شەوی دووشەممەی گەڕەکە کوردییەکانی شاری حەلەب، لانیکەم ئەندامێکی هێزەکانی ئاسایشی ناوخۆی سووریا کوژراوە و هاوڵاتییەکیش لە ئەنجامی بۆردوومانەکاندا کوژراوە.   بەگوێرەی سەرچاوە خۆجێیەکانی سووریا، لەبارەی شەڕوپێکدادانەکانی شەوی دووشەممە، هێزەکانی حکومەتی سووریا لەرێگەی بەکارهێنانی درۆنەوە، هێرشیان کردووەتە سەر هەردوو گەڕەکی کوردنشینی شاری حەلەب؛ شێخ مەقسوود و ئەشرەفییە. لای خۆیەوە، عەزام غەریب، پارێزگاری حەلەب دووپاتی کردەوە، هێزەکانی ئاسایشی ناوخۆ و وەزارەتی بەرگری کار بۆ پاراستنی سەلامەتی و ئاسایشی هاوڵاتیان دەکەن و هیچ نیازێکیان نییە بۆ هیچ پەرەسەندێكی سەربازی. پارێزگار حەڵەب لە تۆڕی کۆمەڵایەتی رایگەیاندووە: بڵاوکردنەوەی هێزەکانی حکومەت لە دەوروبەری شارەکە، دوای چەندین پێشێلکاری بەردەوام دێت کە لەلایەن هێزەکانی سوریای دیموكراتەوە لە ماوەی رابردوودا ئەنجامدراون و، پاشماوە لە یاسا دەرچووەكان پشتیوانیان دەكەن پەنایان بردبووە ئەوێ. لە بەرامبەردا، هێزەکانی سوریای دیموکرات رایگەیاند: ئەوەی روودەدات ئەنجامی دەستدرێژی گروپە چەكدارەكانی سەربە حكومەتی دیمەشق و هەوڵەكانیان بۆ پێشڕەویكردن بە تانک، جەختیشکردەوە، هێزەکانیان لە حەلەب کشاونەتەوەو هیچ ئامادەبونێكیان نییە لەوێ‌. هەسەدەئاماژەی بەوەشكردووە: هەندێک لە دەزگاکانی راگەیاندن تۆمەتی درۆ بڵاودەکەنەوە بەوەی کە هەسەدە خاڵە پشکنینەکانی سەر بە چەکدارانی حکومەتی دیمەشقی لە دەوروبەری گەڕەکەکانی ئەشرەفیە و شێخ مەقسودی شاری حەلەب کردۆتە ئامانج.