هاوڵاتى سەرۆکی کۆمەڵی دادگەری کوردستان رایگەیاند: "هیوادارین ئەم پڕۆسەیە بەشێوەیەکی باش بەڕێوەبچێت، دەرئەنجامەکەشی جێگەی رەزامەندی خەڵکی هەرێمی کوردستان بەتایبەتی و خەڵکی عێراق بێت، لە ئیسلامدا دەسەڵات هی خەڵکە و خەڵک دەبێت بەرپرسانی خۆی دابنێت و هەروەکو دانانی بەرنامە و دیاریکردنی حەرام و حەڵاڵ هی خوای پەروەردگارە، بۆیە کۆمەڵگە زیندوەکان ئەو کۆمەڵگەیانەن کە دەسەڵات تیایاندا بەدەست خەڵکەوەیە نەک حزبێک یان بنەماڵەیەک یان کەمینەیەک خۆی بسەپێنێت بەسەر خەڵک و جەماوەردا". ئه‌مڕۆ یەكشەممە 10ى تشرینى یه‌که‌مى 2021، عه‌لی باپیر، سەرۆکی کۆمەڵی دادگەری کوردستان ئەمڕۆ دوای ئەوەی بەشداری لە پڕۆسەی دەنگدان کرد رایگەیاند، "هیوادارین ئەم پڕۆسەیە بەشێوەیەکی باش بەڕێوەبچێت، دەرئەنجامەکەشی جێگەی رەزامەندی خەڵکی هەرێمی کوردستان بەتایبەتی و خەڵکی عێراق بێت، لە ئیسلامدا دەسەڵات هی خەڵکە و خەڵک دەبێت بەرپرسانی خۆی دابنێت و هەروەکو دانانی بەرنامە و دیاریکردنی حەرام و حەڵاڵ هی خوای پەروەردگارە، بۆیە کۆمەڵگە زیندوەکان ئەو کۆمەڵگەیانەن کە دەسەڵات تیایاندا بەدەست خەڵکەوەیە نەک حزبێک یان بنەماڵەیەک یان کەمینەیەک خۆی بسەپێنێت بەسەر خەڵک و جەماوەردا". سەرۆکی کۆمەڵی دادگەری لەبارەی پێکهێنانی بەرەیەک لەگەڵ لایەنە ئیسلامییەکانی کوردستان، وتی، "ئیسلامییەکان ئەگەر نەیانتوانیوە بە یەک لیست بەشداری بکەن زیانیان لێنادات چونکە دەتوانن لە ئەنجومەنی نوێنەراندا پێکەوە بن هەروەکو لە قۆناغی رابردودا گروپی 15 لە ئیسلامییەکان و ئەو لایەنانەی تریش کە قورساییەکی باشیان هەبو، دەگونجێت ئەمجارەش هەمان ئەزمون بە فراوانتر دوبارەببێتەوە، هیوادارم ئەم خولە لە خولەکانی تر کاراتر بێت، بێگومان هەیمەنەی پێکهاتەیەک بەسەر پێکهاتەکانی تردا و پەراوێزخستنی پێکهاتەکانی تر، شیعەش کە پێکهاتەی زۆرینە بوە لەناوخۆدا ناکۆک بون و هیوادارم هەموان عیبرەتیان لە هەڵەکان وەرگرتبێت".
هاوڵاتى مەسعود بارزانی، سەرۆکی پارتی دیموکراتی کوردستان لەبنکەیەکی دەنگدان لە پیرمام دەنگیدا. ئه‌مڕۆ یەكشەممە 10ى تشرینى یه‌که‌مى 2021، له یه‌كێك له بنكه‌كانی ده‌نگدان له شارۆچكه‌ی پیرمام، سه‌رۆك مه‌سعود بارزانی به‌شداری له ده‌نگدانی گشتی كرد، بۆ دیاریكردنی كاندیدانی كورد بۆ ئه‌نجومه‌نی نوێنه‌رانی عێراق. کاتژمێر 7:00ـی بەرەبەیانی ئەمڕۆ یەکشەممە پرۆسەی دەنگدانی گشتی لەعێراق و هەرێمی کوردستان دەستیپێکرد و 23 ملیۆن و 986 هەزار و 741 دەنگدەر مافی دەنگدانیان هەیە. سێ هەزار و 226 کاندیدیش کێبڕکێ بۆ بەدەستهێنانی 329 کورسی پەرلەمانی عێراق دەکەن.
.jpg)
هاوڵاتى سه‌رۆكی حكومه‌تی هه‌رێمی كوردستان به‌شداری له پڕۆسه‌ی ده‌نگدان كرد و رایگه‌یاند:" ده‌نگمان به‌و كاندیده دا، كه بڕوامان پێیه‌تی نوێنه‌رایه‌تیمان بكات له په‌رله‌مانی عێراق". ئه‌مڕۆ یەكشەممە 10ى تشرینى یه‌که‌مى 2021، مه‌سرور بارزانی، سه‌رۆكی حكومه‌تی هه‌رێمی كوردستان دوای پڕۆسه‌ی ده‌نگدان وتی "ئه‌مڕۆ به‌شداربووین بۆ هه‌ڵبژاردنی ئه‌و كاندیده‌ی بڕوامان پێیه‌تی نوێنه‌رایه‌تیمان بكات له په‌رله‌مانی عێراق." هیواشی خواست كه پڕۆسه‌ی هه‌ڵبژاردن تا کۆتایی بە ئارامی بەڕێوەبچێت و ئه‌وانه‌ش کە مافی ده‌نگدانیان هه‌یه بچنه سه‌ر سندوقه‌كانی ده‌نگدان و به‌شداری له پرۆسه‌كه‌دا بكه‌ن. کاتژمێر 7:00ـی بەرەبەیانی ئەمڕۆ یەکشەممە پرۆسەی دەنگدانی گشتی لەعێراق و هەرێمی کوردستان دەستیپێکرد و 23 ملیۆن و 986 هەزار و 741 دەنگدەر مافی دەنگدانیان هەیە. سێ هەزار و 226 کاندیدیش کێبڕکێ بۆ بەدەستهێنانی 329 کورسی پەرلەمانی عێراق دەکەن.
هاوڵاتى سەرۆکوەزیرانی عێراق لە بەغدا دوو بانگەوازی کرد و رایگەیاند:"پێویستە هەموومان بەشداربین لە گۆڕینی واقیعەکەمان، بانگەوازم بۆ عێراقییەکان ئەوەیە، وەرنە دەرەوە، دەنگ بدەن، واقیعتان بگۆڕن لەپێناو عێراق و لەپێناو داهاتووتان. بانگەوازی دووەمم بۆ ئەوانەی دوودڵن لە دەنگدان، پشت بە خودا ببەستن و بڕۆن دەنگ بەو کەسە بدەن کە پێتانوایە گونجاوە بۆ داهاتووی خۆتان و داهاتووی عێراق، ئەمە یەکەم هەڵبژاردنە لەدوای ساڵی 2003 کە بەبێ قەدەخەی هاتووچۆ بەڕێوەدەچێت". ئه‌مڕۆ یەكشەممە 10ى تشرینى یه‌که‌مى 2021، مستەفا کازمی، سەرۆکوەزیرانی عێراق کە لەیەکێک لە بنکەکانی دەنگدان لە شاری بەغدا دەنگی دا، بە میدیاکانی راگەیاند، "رۆژی هەینی هەڵبژاردنی تایبەت بوو، ئەمڕۆش هەڵبژاردنی گشتییە، پێویستە واقیعی خۆمان بگۆڕین، بە عێراقییەکان دەڵێم دەنگتان بدەن، دەنگتان بدەن دەنگتان بدەن". سەبارەت بە هەڵبژاردنی پیشوەخت و ئەنجام و کاریگەرییەکانی بەسەر داهاتووی عێراق، سەرۆکوەزیرانی عێراق ئاماژەی بەوە کرد، "ویستم ئەمڕۆ یەکەم کەس بم لەم بنکەی دەنگدان دەنگی خۆم بدەم، داوای هەڵبژاردنی پێشوەختەم کردووە، دەبووایە هەڵبژاردنەکان لە 6ـی حوزەیران بەڕێوەچووبان، هەندێک داوایانکرد دوایبخەن بۆ بەهاری 2022، بەڵام گوتم نەخێر، پێویستە لە 10ـی ئۆکتۆبەر ئەنجام بدرێت، ئێمە بەڵێنمان بە گەلەکەمان دا و بەڵێنەکەمان بردەسەر، لەگەڵ گەلەکەماندا راستگۆ بووین، ئەوە دەرفەتە بۆ گۆڕان، سەرەڕای ئەوەی هەندێک کەس گومانیان هەبوو کە لە 10ـی مانگ هەڵبژاردنەکان بکرێت، ئێستا مەرەکەبی شین بە پەنجەمەوەیە، پشت بە خودا بە پەنجەی هەموو عێراقییەکەوە دەبێت". دەربارەی بەهای دەنگی عێراقییەکان لەم هەڵبژاردنەدا، کازمی داوای لە خەڵک کرد دەنگ بدەن و "دەتوانن بە دەنگەکانتان دۆخی ئێستای وڵات بۆ باشتر بگۆڕن". هاوکات دوو بانگەوازی کرد و گوتی، "پێویستە هەموومان بەشداربین لە گۆڕینی واقیعەکەمان، بانگەوازم بۆ عێراقییەکان ئەوەیە، وەرنە دەرەوە، دەنگ بدەن، واقیعتان بگۆڕن لەپێناو عێراق و لەپێناو داهاتووتان. بانگەوازی دووەمم بۆ ئەوانەی دوودڵن لە دەنگدان، پشت بە خودا ببەستن و بڕۆن دەنگ بەو کەسە بدەن کە پێتانوایە گونجاوە بۆ داهاتووی خۆتان و داهاتووی عێراق، ئەمە یەکەم هەڵبژاردنە لەدوای ساڵی 2003 کە بەبێ قەدەخەی هاتووچۆ بەڕێوەدەچێت". سەرۆکوەزیرانی عێراق دەڵێت، بەشداریی لەم هەڵبژاردنەدا کردووە بۆئەوەی پەیامێک بۆ گەل بنێرێت و بڵێت "دەسەڵاتدار خزمەتکاری گەلە، دابەشبوونێکی کۆمەڵایەتی هەبوو بەهۆی رووداوەکانی تشرین کە داوای چاکسازییەکی راستگۆیانەی دەکرد، بۆیە دەبێت هەموومان بەشداری بکەین لە گۆڕینی واقیعەکە، ئەمە دەرفەتە بۆ ئێمە، دەرفەتە، دەرفەتە. بڕۆن بە دەستی خۆتان واقیعی خۆتان بگۆڕن ئەی عێراقییە پاڵەوانەکان". کازمی باسی لەوەش کرد، "هەندێک گوتوویانە حکومەت لە دۆسیەکانی دەرەوە و ئەمنیدا سەرکەوتوو بووە و لە دۆسیەی ئابووریدا شکستی هێناوە، من دەڵێم حکومەت لە دۆسیەکانی دەرەوە و ئەمنیدا سەرکەوتوو بووە و سبەی دووشەممە گوێبیستی دەستکەوتێکی ئەمنیی گەورە دەبن". دەربارەی چاکسازی و ئاڵنگارییەکانی حکومەت لەڕووی ئابوورییەوە، سەرۆکوەزیرانی عێراق ئەوەی خستەڕوو، "بۆ ئەوانەش کە دەڵێن حکومەت لە دۆسیەی ئابووریدا شکستی هێناوە، دەڵێم حکومەت لە ماوەی کەمتر لە ساڵێکدا توانیی 12 ملیار دۆلار یەدەگ دابین بکات، لە دۆخی دابەزینی نرخی نەوت، قەیرانی کۆرۆنا و لە وڵاتێکی نیمچە مایەپووچدا. حکومەت توانیی لاپەڕەیەکی سپی بۆ چاکسازی پێشکێش بکات، کە سێ تاوەکو پێنج ساڵ پێویستە بۆئەوەی عێراق هەستێتەوە و دەرفەتی ئەوەمان هەیە عێراق بچێتە ریزی وڵاتە پێشکەوتووەکان، بەڵام پێویستی بە سەرکردایەتییەکی دڵسۆزە". مستەفا کازمی، سەرۆکوەزیران بە شێوەیەکی جیاواز داوای لە خەڵک کرد بەشداریی بکەن و گوتی، "بڕۆن دەنگ بەوانە بدەن کە لە بەرژەوەندیی وڵاتەکەتاندان، دوا بانگەوازم ئەوەیە وەرنە دەرەوە، وەرنە دەرەوە، دەنگ بدەن". بەپێی کۆمیسیۆنی هەڵبژاردنەکانی عێراق، ژمارەی ئەو کەسانەی لە هەڵبژاردنی پێشوەختی پەرلەمانی عێراق مافی دەنگدانیان هەیە، 24 ملیۆن و 29 هەزار و 927 دەنگدەرە، کە لە هەشت هەزار و 273 ناوەندی دەنگدان لە هەموو عێراق و هەرێمی کوردستان دەنگ دەدەن، ئەو ناوەندانە بریتین لە 55 هەزار و 41 وێستگەی دەنگدان، لە هەر وێستگەیەکیش نزیکەی 450 دەنگدەر مافی دەنگدانیان دەبێت.
.jpg)
هاوڵاتى قوباد تاڵەبانی، جێگری سەرۆکی حکومەتی هەرێمی کوردستان لەسلێمانی دەنگی دا و رایگەیاند، ئەمڕۆ رۆژێکی "پیرۆزە" بۆیە هیوادارم هەموو کەسێک دەنگ بدات ". ئه‌مڕۆ یەكشەممە 10ى تشرینى یه‌که‌مى 2021، قوباد تاڵەبانی دوای ئەوەی دەنگیدا لەبنکەی رەوشەن بەدرخانی شاری سلێمانی بە رۆژنامەنوسانی راگەیاند، بانگەشەی هەڵبژاردنەکانی پەرلەمانی عێراق لەسەرەتاوە تاوەکو ئەمڕۆ بەشێوەیەکی ئارام بەڕێوەچوو و ئەمڕۆش رۆژێکی "پیرۆزە" بۆیە هیوادارم هەموو کەسێک دەنگ بدات. ئاماژەی بەوەشكرد، "ئەرکی ئێمەیە دەنگدەری نوێ هەڵبژێرین و بینێرین بەغدا، چونکە باوەڕمان وایە بەشێکی زۆری کێشەکانی ئێمە لەبەغدا چارەسەر دەبن". سەبارەت بە پۆستی سەرۆکایەتی کۆماریش، قوباد تاڵەبانی جەخت دەکاتەوە کە یەکێتیی هەوڵ بۆ بەدەستهێنانەوەی پۆستی سەرۆککۆماریی عێراق دەدات کاتژمێر 7:00ـی بەرەبەیانی ئەمڕۆ یەکشەممە پرۆسەی دەنگدانی گشتی لەعێراق و هەرێمی کوردستان دەستیپێکرد و 23 ملیۆن و 986 هەزار و 741 دەنگدەر مافی دەنگدانیان هەیە. سێ هەزار و 226 کاندیدیش کێبڕکێ بۆ بەدەستهێنانی 329 کورسی پەرلەمانی عێراق دەکەن.
هاوڵاتى سەرۆکی هەرێمی کوردستان کاتژمێر 7:00ی بەرەبەیانی ئەمڕۆ لەهەولێر بەشداری پرۆسەی دەنگدانی گشتی کرد و رایگەیاند:" هیوادارن ئەم هەڵبژاردنە دۆخی عێراق و هەرێمی کوردستان بەرەو باشتربوون بەرێت". نێچیرڤان بارزانی، سەرۆکی هەرێمی کوردستان لە وەڵامی پرسیاری رووداودا سەبارەت بە پێکهێنانی حکومەتی داهاتووی عێراق گوتی، "ئەوەی من تەمەننا دەکەم، هەموو هێزە کوردستانییەکان دوای هەڵبژاردن هەموومان لە بەغدا کۆدەنگ بین بۆ داکۆکیکردن لە مافەکانی هەرێمی کوردستان لە چوارچێوەی عێراقی فیدراڵدا. هەروەها هیوادارین پەرلەمانی داهاتوو، بۆ چارەسەری کێشەکانی هەموو عێراقییەکان بێت. ئێمە هەموو جارێک گوتوومانە گەلی عێراق شایستەی ژیانێکی باشترە لەوەی کە هەیە، ئێمە هیوادارین تەرکیزی سەرەکی لەسەر دۆزینەوەی دەرفەتی کار بۆ گەنجان و نەهێشتنی گەندەڵی بێت. لەسەر دروستکردنی دەوڵەتی دامەزراوەیی بێت". سەرۆکی هەرێمی کوردستان ئاماژەی بەوەش کرد، "وەکو کوردستان، وەکو واجبی خۆی لە چوارچێوەی دەستووردا هەموو ئەو ئەرکانەی لەسەریەتی جێبەجێی دەکات". هیوایشی خواست، "ئەوانەی دەچنە پەرلەمان بتوانن داکۆکی لە هەموو لایەک بکەن، لە مافەکانی هەموو عێراقییەکان. لەمەودوا شایەتی ئەوە بین بارودۆخی هەرێمی کوردستان لە هەموو روویەکەوە بەرەو باشی بچێت". نێچیرڤان بارزانی کە یەکەم سەرکردە بوو لەسەر ئاستی هەرێمی کوردستان و عێراق دەنگی دا، گوتیشی "خۆشحاڵم کە یەکەم کەس بم دەنگم داوە. ئەوە مافێکی یاسایی هەر کەسێکە دەنگ بدات". دوای دەنگدان، سەرۆکی هەرێمی کوردستان پەیامێکیشی ئاراستەی گەلی عێراق کرد و گوتی، "پەیامی من بۆ هەموو گەلی عێراق، پەیامی ئاشتییە، پەیامی برایەتییە. پەیامێکە کە هەموومان پێکەوە دەبێت هەوڵبدەین بارودۆخی عێراق بەرەو باشتر ببەین. هەموومان لەنێو یەک پاپۆڕداین، دەبێت هەموومان هەوڵی جیددی بدەین عێراق سەربکەوێت". نێچیرڤان بارزانی ئاماژەی بە یەکەم هەنگاوی دوای هەڵبژاردن دا کە پێویستە لایەنە سیاسییەکان بیگرنەبەر و گوتی، "دوای هەڵبژاردن بانگهێشتی لایەنە سیاسییەکان دەکەین و گفتوگۆی جیددیی دەکەین، تاوەکو بتوانین بە چ شێوەیەک بەشداربین، بتوانین بە چ شێوەیەک هەموومان پێکەوە لە حکومەتی داهاتوو بەشداربین". بەراورد بە هەڵبژاردنەکانی رابردوو ئەم هەڵبژاردنە لایەنە عێراقییەکان لە کاتی بانگەشەدا کەمتر هێرشیان کردە سەر هەرێمی کوردستان. نێچێرڤان بارزانی گوتی، "ئامانجی ئێمە ئەوەیە کە ئەو متمانەیە دروست بکرێتەوە. پێموایە بە شێوەیەکی گشتی، هەر حکومەتێک لە بەغدا بێتە سەر دەسەڵات، دەبێت تەرکیزی لەسەر ئەوە بێت خزمەتگوزاری پێشکێش بکات بۆ هاووڵاتییانی هەموو عێراق. خەڵک ماندوو بووە لە دروشمی بێ ناوەڕۆک، هیوادارم ئەو حکومەتە جیاواز بێت، هیوادارم تەرکیز لەسەر ئەو لایەنە بێت، کە ئێمە چۆن دەتوانین ئەو متمانەیە لەگەڵ هەموو عێراق دروست بکەین، پێموایە ئەوە گەورەترین تەحەددایە دەبێت لە حکومەتی داهاتوودا بە جیددی ئیشی بۆ بکرێت". سەبارەت بە ئاییندەی پەیوەندییەکانی هەولێر و بەغدا دوای هەڵبژاردنەکان، سەرۆکی هەرێمی کوردستان باسی لەوە کرد، "هەرێمی کوردستان وەکو هەرێمێکی دەستووری لە چوارچێوەی عێراقدایە. هەرێمی کوردستان خوازیاری ئەوەیە هەموو ئەو کێشانەی کە ماونەتەوە بە دیالۆگ و لەسەر مێزی گفتوگۆ چارەسەر بکرێن. پێشتر هەرێمی کوردستان ئەو سیاسەتەی هەبووە. ئێستاش هەرێمی کوردستان ئەو سیاسەتەی هەیە. هەرێمی کوردستان دەزانێت هەم مافی هەیە و هەم ئەرکیشی هەیە". نێچیرڤان بارزانی ئەوەی خستەڕوو، "ئەوەی بەلای هەرێمی کوردستانەوە گرنگە، سەقامگیریی عێراقە. پێموایە بە چارەسەرکردنی کێشەکانی نێوان هەولێر و بەغدا دەگەینە ئەو ئامانجە". لە کاتی بانگەشەی هەڵبژاردن جارێکی دیکە کورد بە تایبەتشی پارتی گەڕایەوە ناوچە ناکۆکی لەسەرەکان. نێچیرڤان بارزانی ئاماژەی بەوە کرد، "ئەمە هەنگاوێکی دروست بوو، چونکە بەپێی یاسا هەر حیزبێک مافی هەیە بانگەشە بکات. ئەو هەنگاوە گرنگ بوو بۆ بانگەشەی هەڵبژاردن، بەڵام بابەتەکە کردنەوەی بارەگای حیزبێک نییە لە کەرکووک یان شوێنێکی دیکە. ئێمە ماددەیەکی دەستووریمان هەیە کە ماددەی 140ـە، هەرێمی کوردستان دەیەوێت لە چوارچێوەی عێراقدا ئەو ماددە دەستوورییە جێبەجێ بکات. بە جێبەجێکردنی ئەو ماددەیە ئێمە پێمانوایە هەم سەقامگیری دەگەڕێتەوە بۆ ئەو ناوچانە، هەم خەڵکیش لە هەموو عێراق خۆشحاڵ دەبن، ببینن کێشەکان چارەسەر کراون". نێچیرڤان بارزانی دەڵێت، "زۆر گرنگە پێگەی هەرێمی کوردستان لە بەغدا بەهێز بێت. کورد وەکو نەتەوەیەک لە عێراقدا دەژی. لەبەرئەوە رۆڵی کورد لە بەغدا لە دوای ساڵی 2003 زۆر گرنگ بووە. ئێمە دەمانەوێت رۆڵی خۆمان ببینین بۆ باشکردنی هەموو بارودۆخی عێراق". بەپێی کۆمیسیۆنی هەڵبژاردنەکانی عێراق، ژمارەی ئەو کەسانەی لە هەڵبژاردنی پێشوەختی پەرلەمانی عێراق مافی دەنگدانیان هەیە، 24 ملیۆن و 29 هەزار و 927 دەنگدەرە، کە لە هەشت هەزار و 273 ناوەندی دەنگدان لە هەموو عێراق و هەرێمی کوردستان دەنگ دەدەن، ئەو ناوەندانە بریتین لە 55 هەزار و 41 وێستگەی دەنگدان، لە هەر وێستگەیەکیش نزیکەی 450 دەنگدەر مافی دەنگدانیان دەبێت.
هاوڵاتى سەرۆکی پێشووی پەرلەمانی کوردستان، پشتیوانی خۆی بۆ کەمپینی ئازادی عەبدوڵا ئۆجالان راگەیاند و داوای ئازادی بۆ دەکات. ئه‌مڕۆ شه‌ممه 9ى تشرینى یه‌که‌مى 2021، یوسف محەمەد، سەرۆکی پێشووی پەڕلەمانی کوردستان و ئەندامی خولی چوارەی ئەنجومەنی نوێنەرانی عێراق لە تویتەرەوە پشتیوانی خۆی بۆ کەمپینی هاشتاگی ئازادی ئۆجالان ڕاگەیاند. لە تویتەکەیدا نوسیویەتی “کاتی گەڕانەوەیە بۆ پرۆسەی ئاشتی لە تورکیا بۆ چارەسەرکردنی کێشەی کورد لە ڕێگەی دانوستان لەگەڵ ئۆجالان” لەگەڵ دانانی هاشتاگی کەمپینەکە ئەوەشی وتووە “کاتی ئەوە هاتووە ڕێبەرانی کورد لە زیندانەکان ئازاد بکەین، بەتایبەتی عەبدوڵا ئۆجالان و سەلاحەدین دەمیرتاش”. ئەمڕۆ ٢٣ ساڵ بەسەر گەلەکۆمەی نێودەوڵەتیی دژ بە عەبدوڵا ئۆجالان، ڕێبەری گەلی كورد تێدەپەڕێت، لەو ساڵیادەدا لەسەر ئاستی جیهان داوای ئازادكردنی دەكرێت و کەمپینێک لە تۆڕە کۆمەڵایەتیەکان لە جیهاندا دەستی پێکردووە.
هاوڵاتى قوباد تاڵه‌بانی، جێگری سه‌رۆك وه‌زیرانی هه‌رێمی كوردستان نوسینگه‌ی كلتوریی جێگری سه‌رۆكی حكومه‌تی له‌باڵه‌خانه‌ی كارگه‌ی كلتوری سلێمانی (كارگه‌ری جگه‌ره) كرده‌وه و رایگه‌یاند: "سلێمانی وه‌ك پایته‌ختی رۆشنبیری هه‌میشه پێشه‌نگ ده‌بێت و هه‌میشه شوێنی ئازادی ده‌بێت". ئه‌مڕۆ شه‌ممه 9ى تشرینى یه‌که‌مى 2021، نوسینگه‌ی راگه‌یاندنی جێگری سه‌رۆك وه‌زیران له راگه‌یه‌ندراوێكدا ئاماژه‌ی به‌وه‌دا كه ئه‌مڕۆ شه‌ممه به‌ئاماده‌بونی قوباد تاڵه‌بانی، جێگری سه‌رۆك وه‌زیران نوسینگه‌ی كلتوریی جێگری سه‌رۆكی حكومه‌ت له‌باڵه‌خانه‌ی كارگه‌ی كلتوری سلێمانی (كارگه‌ری جگه‌ره‌ی سلێمانی) كرایه‌وه و قوباد تاڵه‌بانی رایگه‌یاند، "ئه‌م نوسینگه‌یه نابێته جێگره‌وه‌ی هیچ دامه‌زراوه‌یه‌ك، به‌ڵكو بۆ خزمه‌تكردنی كلتور و هاوكاریكردنی هونه‌رمه‌ندانه، تا ئه‌و روئیایه‌ی هه‌مانه بۆ پایته‌ختی رۆشنبیری له‌نازناوێكه‌وه بیگوازینه‌وه بۆ كار و چالاكی، وتیشی مێژوی كوردستانه‌كه‌شمان پره له‌جوانی و داستان و داهێنان كاتی ئه‌وه هاتوه نوێی بكه‌ینه‌وه." وتیشی، "ده‌بێت هونه‌رمه‌نده‌كانمان ئه‌ستێره بن نه‌ك سیاسیه‌كان، ئه‌م نوسینگه‌یه ده‌كه‌ینه‌وه بۆ هاوكاری دام و ده‌زگا فه‌رمیه‌كان تا ئه‌و دۆستایه‌تییه‌ی له‌گه‌ڵ هونه‌ر و كلتور هه‌مانه به‌هێزتر و جوانتر و به‌رهه‌مدارتری بكه‌ین". قوباد تاڵه‌بانی به‌هونه‌رمه‌ندانی راگه‌یاند: "له‌م كارگه‌یه‌وه كه هێشتا ئه‌و روئیایه‌ی هه‌مانه بۆی به‌دینه‌هاتوه، كه ببێته ناوه‌ندێكی كلتوریی كه‌له‌سه‌ر ئاستی جیهان جێی خۆی بگرێته‌وه، به‌ڵێنتان پێده‌ده‌م كه هه‌میشه دۆست و هاوكارتان بم". جێگری سه‌رۆكی ئه‌نجومه‌نی وه‌زیران رایگه‌یاند، "سلێمانی وه‌ك پایته‌ختی رۆشنبیری هه‌میشه پێشه‌نگ ده‌بێت و هه‌میشه شوێنی ئازادی ده‌بێت، ئه‌و شوێنه ده‌بێ كه‌خه‌ڵك بتوانێ به‌بێ ترس، گله‌یی و ره‌خنه بگرێت، ئیشه‌ڵا ئه‌و ئازاییه‌تییه‌ی لێره ده‌یبینم له‌هه‌مو شوێنێكی كوردستان ده‌بێت، هه‌میشه سلێمانی پێشه‌نگ و شاری شاران بێت.
هاوڵاتى ئەندامێکی سەرکردایەتی یەکێتی رایگەیاند:" بەشێک لە لایەنە عەرەبییەکانی کەرکووک دەستکاری تۆماری دەنگدەرانی کەرکووکیان کردووە. ئەمەش لەپێناو ئەوەی پێکهاتەی عەرەبی لە کەرکووک زیاتر بێت لە کورد و دەشڵێت "هەر ئەوان پێناسی باری شارستانیان بۆ داعش و ئیرهابییەکان دەرکردووە." ئه‌مڕۆ شه‌ممه 9ى تشرینى یه‌که‌مى 2021، خالید شوانی، ئەندامی سەرکردایەتی یەکێتی لە کۆنگرەیەکی رۆژنامەوانیدا لە کەرکووک رایگەیاند "چەند رۆژێکە بۆمان دەرکەوتووە کە هەندێک لە لەلایەنە عەرەبییەکانی کەرکووک بە تەواوی دەستکاری تۆماری دەنگدەرانی کەرکوکیان کردووە، دەستکارییەکەشیان بۆ ئەوەیە پێکهاتەی عەرەبی لە کەرکووک زۆرتر بێت و بتوانن دەنگ بدەن و زۆرینەی کەرکووک بەدەستبهێنن." ئەو ئەندامەی سەرکردایەتی یەکێتی پێیوایە کە بەشێک لە لایەنە عەرەبییەکان "کۆمەڵێک موئامەرەیان کردووە" و راشیدەگەیێنێت "یەکێک لەوانە هێنانی لیژنەیەکە لە بەغداوە بۆ ئەوەی سەرپەرشتی لیژنەی باڵای کۆمیسیۆنی کەرکووک بکەن. هەروەها داوایان کردبوو کارمەندەکانی فەرمانگەی یەک کە زۆرینەیان کوردن بگۆڕێن بە فەرمانبەری عەرەب و تورکمان و هەردوولایان داوایەکیان ئاراستەی کۆمیسیۆنی باڵای هەڵبژاردنەکان کردووە." خالید شوانی باسی شتێکی "مەترسیدار" دەکات و ئاماژە بەوە دەدات کە ئەمڕۆ بۆیان ئاشکرا بووە کە ئەو لایەنە عەرەبیانە " داعشیان تۆمارکردووە لە بایۆمەتری ئەمە لە کاتێکدایە کە فەرمانی دەستگیرکردنیان لە دەسەڵاتی دادوەریی عێراق هەیە." دەشڵێت "چۆن ئەمانە تۆمارکراون و کێ کردوویەتی و کێن ئەوانەی لە پشت ئەو کارەوەن دەبێت بدرێنە دادگە. ئێمە شکاتمان لە کۆمیسیۆن تۆمارکردووە. ئەمەش بۆ ئەوەیە کە دەنگی عەرەب لە کەرکووک زیاد بکەن، بۆیە دەبێ بزانین کە ئەم موئامارەیە چەند گەورەیە و داواکاری فەرمیمان داوەتە کۆمیسیۆن و لەگەڵ هەرێمی کوردستانیش هەماهەنگیمان کردووە." لە بەشێکی دیکەی قسەکانیدا خالید شوانی رایگەیاند، کە ئەوان بێدەنگ نابن و داواکارییەکانیان دەدەنە باڵاترین شوێن بۆ ئەوەی بابەتەکە روون بکرێتەوە. خالید شوانی وتی "زیاتر لە 10 پێناسی باری شارستانی و زیاتر لە 10 کەس کە فەرمانی دەستگیرکردنیان بۆ دەرچووە لەنێو بەڵگەکانی ئێمەدا هەن و بەدەستمان گەیشتووە کە ئەمانە ئیرهابین و داعشن و پێناسەی باری شارستانیان بۆ دەرکراوە، ئەمانەش خەڵکی نزیکن لە بەرپرسانی عەرەب لە شاری کەرکووک."
هاوڵاتى فیدراسیۆنی ڕێکخراوەکانی کۆمەڵگەی مەدەنی لە سلێمانی داوا لە هاوڵاتیان دەکەن بەشداریی لە پرۆسەی هەڵبژاردنی سبەینێ بکەن و بە گوێرەی راپرسی رێکخراوێکیش ٦١٪ی خەڵک بەشداری دەکات. ئێوارەی ئەمڕۆ فیدراسیۆنی ڕێکخراوەکانی کۆمەڵگەی مەدەنیی لە کۆنگرەیەکی ڕۆژنامەوانی لەبارەی پرۆسەی هەڵبژاردنی پێشوەختەی عێراق لە سلێمانی ئەنجامدا و تیادا داوایانکرد خەڵک بەشداری هەڵبژاردنەکانی سبەینێ بکەن. هەر لەو کۆنگرە رۆژنامەوانیەدا ڕاپرسییەکی پلاتفۆڕمی کوردستان بۆ پرسە نیشتمانییەکانیش خرایەڕوو کە تیادا ئاماژەی بە چەندین پرسیار کردبوو کە لەشارە کانی هەرێمی کوردستان خراوەتەڕوو. عیماد حامید، بەیاننامەی فیدراسیۆنی ڕێکخراوەکانی خوێندەوە، تێیدا داوا لە هاوڵاتیان دەکەن “بەگرنگییەوە لە پرسی هەڵبژاردن بڕوانن و بەشداربن لە چوونە بەردەم سندوقەکانی دەنگدان، بۆ بەشدارییەکی ڕاستەقینەی هەڵبژاردن، چونکە بەشداریکردنی هاوڵاتیان کاریگەریی ئەرێنی لەسەر پرۆسەی دەنگدان جێدە‌هێڵێت و بازنەی بەلاڕێدابردنی دەنگ بچوک دەکاتەوە”. فیدراسیۆنی ڕێکخراوەکان داواش لە لایەنە سیاسییەکان دەکات، بەرپرسانە مامەڵە لەگەڵ ڕۆژی دەنگدان و ئەنجامەکانیدا بکەن و “خۆیان دووربگرن لە هەر پێشێلکارییەک کە وێنەی هەڵبژاردن دەشێوێنێت و بێ متمانەیی زیاتر گەشە پێدەدات”. هەر لە کۆنگرە ڕۆژنامەوانیەکەدا ئەنجامیی ڕاپرسییەکیش خرایەڕوو، کە سێ هەزار و ١٥٩ کەس لە هەرسێ پارێزگای سلێمانی، هەولێر و دهۆک بەشدارییان تێداکردووە، بەپێی ئەنجامەکانیش ٦١٪ی بەشداربووانی راپرسیەکە بڕیاریانداوە بەشداریی لە هەڵبژاردندا بکەن و ٣٣٪یش بڕیاریانداوە بەشداریی لە پرۆسەکەدا نەکەن. بڕیارە سبەینێ دەنگدانی گشتیی لە سەرتاسەری عێراق و هەرێمی کوردستان بەڕێوەبچێت، ٢٥ ملیۆن و ١٣٩ هەزار کەس مافی دەنگدانیان هەیە. سێ هەزار و ٥٢٣ کاندید کە هەزار و ٢ کاندیدی هاوپەیمانییەکان و هەزار و ٦٤٣ کاندیدی پارتەکان و ٨٨٧ کاندیدی سەربەخۆ، کێبڕکێ لەسەر بەدەستهێنانی ٣٢٩ کورسی ئەنجومەنی نوێنەرانی عێراق دەکەن.
.jpg)
هاوڵاتى بافڵ تاڵه‌بانی له‌په‌یامێكدا كه ئاراسته‌ی خانه‌واده‌ی رێكه‌وت محه‌مه‌دی كردوه رایگه‌یاندوه: "به دڵته‌نگی و خه‌مێكی قوڵه‌وه ھه‌واڵی شه‌ھید بونی پێشمه‌رگه‌ی دژه‌تیرۆر رێكه‌وت محه‌مه‌د ھه‌یاسم پێگه‌یشت، كه له‌شه‌ڕی روبه‌ڕوبونه‌وه‌ی تیرۆر له كه‌ركوكی قودسی كوردستان برینداربو، كه پاش چه‌ند ساڵێك له‌گه‌ڵ ململانێی سه‌خت و به‌ئازار ئه‌مڕۆ گه‌یشته كاروانی شه‌ھیدان و ماڵئاوایی لێكردین". ئه‌وه‌شی خستوه‌ته‌ڕو، "بۆ ئه‌م خه‌مه پرسه ھاوخه‌می و سه‌ره‌خۆشیمان ئاڕاسته‌ی كه‌سوكار و خانه‌واده‌ی سه‌ربه‌رزی و به‌ڕێوه‌به‌رایه‌تی دژه‌تیرۆر و ھه‌ڤاڵان و ھاوسه‌نگه‌رانی شه‌ھیدی قاره‌مان كاك رێكه‌وت ده‌كه‌ین و خۆمان به به‌شداری ئه‌م ماته‌مه ده‌زانین". ئەمرۆ شەممە 9ی تشرینی یەکەمی 2021، دەزگای دژە تیرۆە بڵاویکردەوە، "بەدڵێکی پڕ لە خەمناکەوە ڕایدەگەیەنین بەرەبەیانی ئەمڕۆ هاوڕێ و هاوسەنگەرمان (ڕێکەوت محەمەد هیاس) کەلەشەڕی ڕوبەڕووبونەوەی تیرۆر بۆ پارێزگاریکردن لە کەرکوکی قودسی کوردستان بریندار بوو گەشتە کاروانی شەهیدانمان".
هاوڵاتى نرخی نەوتی سووکی تەکساسی ئەمریکاش ژمارەیەکی پێوانەیی تۆمارکرد و گەیشتە بەرزترین ئاستی خۆی كە 83 دۆلاری تێپەراندووە. رۆژی هەینی نرخی نەوتی سووکی تەکساسی ئەمریکا بە رێژەی 2٪ بەرزبووەوە و گەیشتە سەرووی 80 دۆلار کە بەرزترین ئاستییەتی لە دوای ساڵی 2014. رۆژی هەینی دوای داخستنی بازاڕە جیهانییەکان، نەوتی برێنت ئاستێکی نوێی تۆمارکرد و رۆژی هەینی بە رێژەی 1.7٪ بەرزبووەوە هەر بەرمیل بە 83 دۆلار و 32 سەنت مامەڵەی پێوەکرا. بەرزبوونەوەی نرخەکانی نەوت هاوکاتە لەگەڵ بەرزبوونەوەی نرخی جۆرەکانی دیکەی وزە وەک گازی سرووشتی و خەڵوز و کارەبا کە دواجار بووەتە هۆکار بۆ بەرزبوونەوەی خواست لەسەر بەکارهێنانی نەوتی خاو. بەگوێرەی پێشبینییەکان لەمساڵدا بەراورد بە ساڵی رابردوو، خواست لەسەر نەوت زیاد دەکات و بۆ 96 ملیۆن و 400 ھەزار بەرمیل لە رۆژێکدا بەرز دەبێتەوە.
هاوڵاتى سەرۆکی ویلایەتە یەکگرتووەکانی ئەمریکا بە تووندی رەخنە لە ئۆپەراسیۆنە سەربازییەکانی تورکیا لە رۆژئاوای کوردستان و ناوچەکانی دیکەی ژێر دەسەڵاتی بەڕێوەبەرایەتیی خۆسەر دەگرێت و باڵیۆزى پێشوى ئه‌مریكا له‌سوریا دەڵێت :" ئیدارەی خۆسەر له‌ڕۆژئاواى كوردستان دەبێتە دەوڵەتۆکەیەک لەناو سوریادا". جۆ بایدن، سەرۆکی ئەمریکا ماوەی بڕیاری جێبەجێکاریی ژمارە 13894ی تایبەت بەو "هەڕەشانە" درێژکردەوە کە لە ئەنجامی دۆخی سووریا بۆسەر "ئاسایشی نیشتمانی و سیاسەتی دەرەوەی ویلایەتە یەکگرتووەکان" دروستدەبن. بڕیارەکە لە 14ی ئۆکتۆبەری ساڵی 2019 واژۆکرا. بایدن لە نامەکەیدا کە دەبێت لە تۆماری فیدراڵیی ئەمریکا بڵاوبکرێتەوە و رادەستی کۆنگرێسیش بکرێت، دەنووسێت: "بارودۆخی نێو سووریا و پەیوەندیدار بە سووریا، بەتایبەتی ئەوەی کە پەیوەندیی بە هەنگاوەکانی حکومەتی تورکیاوە هەیە بۆ ئەنجامدانی ئۆپەراسیۆنی سەربازی لە باکووری رۆژهەڵاتی سووریا، کاریگەریی نەرێنییان لەسەر هەڵمەتەکانی تایبەت بە تێکشکاندنی دەوڵەتی ئیسلامی لە عێراق و شام – داعش دەبێت، ژیانی هاووڵاتیانی سڤیل دەخەنە مەترسییەوە، دەبنە هەڕەشەی زیاتر بۆسەر ئاشتی و ئاسایش و سەقامگیریی ناوچەکە؛ ئەو کارانە بەردەوام دەبن لەوەی هەڕەشەیەکی نائاسایی بن بۆ ئاسایشی نیشتمانی و سیاسەتی دەرەوەی ویلایەتە یەکگرتووەکان". بایدن دەڵێت، لەبەر ئەو هۆکارانەی کە باسی کردوون، دەبێت ئەو بارە نائاساییە نیشتمانییەی لەسەر بنچینەی بڕیاری جێبەجێکاریی ژمارە 13894 لە 14ی ئۆکتۆبەری 2019 دەرچووە بۆ دوای 14ی ئۆکتۆبەری 2021یش بەردەوام بێت و بۆ ماوەی یەک ساڵی دیکە درێژدەکرێتەوە. نامەکەی سەرۆکی ئەمریکا لە کاتێکدایە، لە ماوەی سێ ساڵی رابردوودا تورکیا دوو ئۆپەراسیۆنی سەربازی بۆ سەر رۆژئاوای کوردستان ئەنجامداوە. هاوكات لە ڕاپۆرتێکی ڕۆژنامەی "شەرقولئەوسەت"، دوای لێدوانەکەی ئیلهام ئەحمەد هاوسەرۆکی ئەنجومەنی سوریای دیموکرات (مەسەدە) بەوەی واشنتۆن بەڵێنی تەواوی پێداون كه ڕۆژئاوای کوردستان جێناهێڵن‌و بەردەوامدەبن لەپێشخستنی ژێرخانی ناوچەکەیان، ڕۆبەرت فۆرد باڵیۆزی پێشوی ئەمریکا لەسوریا ڕایگه‌یاند: "ناوچەکانی باکورو ڕۆژهەڵاتی سوریا کە لەژێر کۆنترۆڵی ئیدارەی خۆسەردایە، بەرەو ئەوە دەچێت لەژێر سێبەری ئەمریکادا ببێتە دەوڵەتۆکەیەک لەناو سوریادا". باڵیۆزی پێشوی ئەمریکا لەدیمەشق وتویەتی:"ئەمریکا لەبەرامبەر گروپە ئیسلامییەکانی سەر بەهاوپەیمانی نیشتیمانیی سوری‌و پشتیوانیکردنی تورکیا لێیان لەماوەی چەند ساڵی ڕابردودا ئاسودە نییە، لەبەرامبەردا واشنتۆن سوپاسگوزاری ئیدارەی خۆسەرە کە ئیدارەیەکی سیکۆلارەو یەکینەکانی پاراستنی گەل (یەپەگە)ش بەسەرکەوتویی جەنگی دژی داعشیان کردوە". ڕۆبەرت فۆرد بەڕۆژنامەی "تایمز"ی بەریتانی ڕاگەیاندبوو، ئەمەریکا بەڵێنی دەستبەردارنەبونی کوردی پێداون، وتى:"لێدوانەکانی واشنتۆن بەوەی پشتگیریی سەقامگیری ناوچەکە دەکات بەومانایە دێت کە هێزەکانی ئەمریکا لەڕۆژهەڵاتی سوریا دەمێننەوەو لەبەرامبەر هەڕەشەکانی دیمەشق‌و ڕوسیاو ئێران‌و تورکیا، پارێزگاری لەئیدارەی خۆسەر لەڕۆژئاوای کوردستان دەکەن". سەبارەت بەئەگەری بەدەستهێنانی خۆبەڕێوەبەریی لەلایەن کوردانی سوریا، جەیمس فۆرد وتویه‌تى:"هەرچەندە ئەمریکا ناتوانێت ئەسەد ناچاربکات سازش بۆ کوردەکان بکات، بەڵام لەژێر سایەی بەردەوامبونی ئەو دۆخەدا، ئیدارەی خۆسەر لەژێر سایەی پاراستنی سەربازیی ئەمریکا، دەبێتە دەوڵەتۆکەیەک لەناو سوریادا". لە کانوونی دووەمی 2018دا سوپای تورکیا و هێزە نزیکەکانی لە ئۆپۆزیسیۆنی سووریا هێرشیانکردە سەر هەرێمی عەفرین و دوای نزیکەی 2 مانگ شەڕ، شاری عەفرین و بەشی زۆری هەرێمەکەیان کۆنترۆڵکرد. هەروەها لە تشرینی یەکەمی 2019شدا تورکیا و هێزە نزیکەکانی لە ئۆپۆزیسیۆنی سووریا هێرشیانکردە سەر سنوورێکی دیکەی رۆژئاوای کوردستان و سەرێ کانی، گرێ سپی و گوندەکانی دەوروبەریان کۆنترۆڵکرد.
هاوڵاتى هەپەگە ڕایگەیاند:"لە ئەنجامی هێرشێکی کیمیایی دەوڵەتی تورکیا لە مەیدانی وەرخەلێ، پێنج گەریلامان شەهیدبون". ئه‌مڕۆ شه‌ممه 9ى تشرینى یه‌که‌مى 2021، ناوەندی ڕاگەیاندنی هێزەکانی پاراستنی گەل- هەپەگە، لەسەر کردەوە دژمرۆڤانەکانی دەوڵەتی دەوڵەتی تورکیا، کە هەموو یاساکانی شەڕ پێشێل دەکات، ڕاگەیەندراوێکی بڵاوکردەوە. لە ڕاگەیەندراوەکەدا، ئاماژە بەوەکراوە کە ڕۆژی ٥ی ئەم مانگە، لە مەیدانی وەرخەلێ، دەوڵەتی دەوڵەتی تورکیا هێرشێکی دیکەی بە چەکی کیمیایی ئەنجامداوە. هەروەها ئەوەش خراوەتە ڕوو، کە لە ئەنجامی ئەو هێرشە کیمیاییەدا، پێنج گەریلا بە ناوەکانی “جومالی، چاڤڕێ، ئارام، ماهیر و دلڤان” شەهیدبوون.
هاوڵاتى پارێزگاری هەولێر رایگەیاند:" دەستکراوە بە دروستكردنی چەند بەنداوێكە لەسەروی هەمویانە بەنداوەكانی گۆمەسەپان، بەستۆرە و مەنداوایە كە بەنداوی بنەڕەتی دەبن بۆ گلدانەوەی ئاو لەسنوری پارێزگای هەولێر، دەشڵێت:" کۆی بودجەی خەرجکراو بۆ چارەسەربونی دۆخی وشکەساڵی لە پارێزگای هەولێر بریتی بووە لە هەشت ملیار و 643 ملیۆن و 411 هەزار و 900 دیناری عێراقی، کە سەرچاوەکانی بریتی بوون لە پاڵپشتی راستەوخۆ مەسرور بارزانی، سەرۆکی حکومەتی هەرێم و داهاتی بەڕێوەبەرایەتییەکانی ئاو و بودجەی تەرخانکراوی وشکە ساڵی". ئه‌مڕۆ شه‌ممه 9ى تشرینى یه‌که‌مى 2021، ئومێد خۆشناو، پارێزگاری هەولێر لە كۆنگرەیەكی رۆژنامەوانیدا لەبارەی كەم ئاوی و وشكەساڵی لە پارێزگاكە رایگەیاند، 76 بیری جێگرەوە لەو شوێنانە لێدراون كە بیرەكان بەتەواوەتی وشك بون، 25 بیری دیكەش ئێستا لە پڕۆسەدایە و هەندێكیان لە ئایندەیەكی زۆر نزیكدا كاریان تێدا دەكرێت، دەشڵیت، لە ماوەی رابردوو چارەسەری كێشەی 513 بیرمان كردوە لەوانە شۆڕكردنەوەی بۆری و ماتۆڕیان بۆ ئەنجامدراوە. باسیلەوەشکردووە، گەیاندنی كارەبای جێگر دانراوە و موەلیدە بۆ 46 بیر كە ئەوانیش تەواو كراون، لەگەڵ 133 پڕۆژەی راكێشانی تۆڕی ئاو و گەیاندنی كارەبا جێبەجێ كراون. ئەوەشی خستەڕوو، "ئەو كارانەی كە كراون بۆ دەربازبونی كاتییە لە دۆخێك، بۆ چارەسەربونی ئەو دۆخە لە هەولێر چەند پلانێكی ستراتیژیمان هەیە و باش چونەتە پێشەوە یەكێك لەوانە تەواوكردنی پڕۆژەی ئیفراز 4 كە هۆكارێكی سەرەكی دەبێت كە هەولێر لە قەیرانی گرفتی كەمئاوی رزگاری ببێت. ئاماژەی بۆ ئەوەشکردووە، دروستكردنی چەند بەنداوێكە لەسەروی هەمویانە بەنداوەكانی گۆمەسەپان، بەستۆرە و مەنداوایە كە بەنداوی بنەڕەتی دەبن بۆ گلدانەوەی ئاو لەسنوری پارێزگای هەولێر.
