محەمەد شیاع سوودانی: هێزەکانی سنوورى عێراق بە چەکی پێشکەوتووەوە ئامادە دەكرێن

هەوراز حوسێن هاوڵاتی، سلێمانی دوو راوێژکاریی سەرەکیی دۆناڵد ترەمپ، سەرۆکی پێشووی ئەمریکا و بەربژێری هەڵبژاردنی سەرۆکایەتیی ئەمساڵی ئەمریکا پلانێکیان پێشکێشی ترەمپ کردووە، کە دوای بوونەوەی بە سەرۆکی ئەمریکا گوشار لە ئۆکراینا بکات گفتووگۆی ئاشتی لەگەڵ رووسیا دەستپێبکات و ئەگەر وانەکات ئەمریکا چەکی بۆ نانێرێت. کێز کێڵۆگ، جەنەراڵی خانەنشینی ئەمریکا و راوێژکاریی ترەمپ بۆ بواری ئاسایش لە چاوپێکەوتنێکدا دەڵێت، ئەگەر ترەمپ هەڵبژاردنی سەرۆکایەتی ئەمریکا بباتەوە، دەیکات بە مەرج لەسەر ئۆکراینا، کە ئەگەر چەکی ئەمریکای بوێت، دەبێت بچێتە ناو گفتووگۆی ئاشتییەوە لەگەڵ رووسیا. ئەوەشی خستووەتەڕوو، ئەمریکا هۆشداری دەداتە رووسیاش، کە ئەگەر ئەو گفتووگۆ ئاشتانە رەتبکەنەوە، ئەمریکا هاریکارییەکانی بۆ ئۆکراینا زیاددەکات. پلانەکە کێڵۆگ و فرێد فڵێتز، سەرۆکی پێشووی ئەنجوومەنی ئاسایشی ئەمریکا داویانەتە ترەمپ و فلێتز دەڵێت، پلانەکە بەو جۆرەیە، لەکاتی گفتووگۆکانی ئاشتیدا ئاگربەست لە جەنگەکەد ادەکرێت. فلێتز دەڵێت، وەڵامی ترەمپ بۆ پلانەکە ئەرێنی بووە و باس لەوە دەکات، "نازانم رازی بوو بە پلانەکە یان رازی بوو بە وشە بە وشەی، بەڵام دڵخۆشین بەو وەڵامەی وەرمانگرتووە". 5ی تشرینی دووەمی ئەمساڵ هەڵبژاردنی سەرۆکایەتی ئەمریکا بەڕێوەدەچێت و دوو بەربژێری سەرەکیش دۆناڵد ترەمپ، سەرۆکی پێشووی ئەمریکا و جۆ بایدن، سەرۆکی ئێستای ئەمریکان. کرێملن لەبارەی پلانەکەوە دەڵێت، هەر پێشنیازێکی ئاشتی لەلایەن ئەمریکاوە بکرێت دەبێت رەنگدانەوەی جەنگەکە بێت و ڤلادمیر پووتین، سەرۆکی رووسیاش هەمیشە بۆ گفتووگۆی ئاشتی کراوەیە. ئەگەر دۆناڵد ترەمپ هەڵبژاردنی سەرۆکایەتی ئەمریکا بباتەوە، پێشبینی دەکرێت وەچەرخانێکی گەورە لە ئاڕاستەی جەنگی ئۆکراینا رووبدات و زۆرینەی ئەگەرەکانیش ئەوەن کە جەنگەکە بەرەو ئاشتی هەنگاو دەنێت.

هەوراز حوسێن هاوڵاتی، سلێمانی وەزیری بەرگریی ئەمریکا دەڵێت، ئەگەر جەنگ لە نێوان حیزبوڵای لوبنان و ئیسرائیل هەڵگیرسێت ئەنجامەکەی (کارەساتبار) دەبێت. ئەمە لەکاتێکدایە لە چەند هەفتەی رابردوودا مەترسیی هەڵگیرسانی جەنگ لە نێوان حیزبوڵا و ئیسرائیل گەیشتۆتە لوتکە. لە ئەنجامی ئەو ترسە و تۆپباران و بۆردومانکردنی ناوچە سنوورییەکانی هەردوولا بۆ سەر یەکتر، دەیان هەزار هاووڵاتی لە هەردوو وڵات ئاوارەبوون. ئێوارەی رۆژی سێشەممە 25-6-2024، ڵۆید ئۆستن، وەزیری بەرگریی ئەمریکا رایگەیاند، سەرقاڵی گفتووگۆی دیپلۆماسین لەگەڵ حیزبوڵا و بەرپرسانی ئیسرائیل تاوەکو مەترسی هەڵگیرسانی جەنگ کەمبکەنەوە و رێگە بۆ خەڵک خۆشبکەن بگەڕێنەوە ماڵەکانی خۆیان. گوتەکانی ئۆستن لەکاتێکدایە، یواڤ گالانت، وەزیری بەرگریی ئیسرائیل سەردانی ئەمریکای کرد و لەلایەن وەزیری بەرگریی ئەمریکاوە پێشوازی لێکرا. ئۆستن گوتی، "دنەدانەکانی حیزبوڵا هەڕەشە لە پەلکێشکردنی ئیسرائیل و خەڵکی لوبنان بۆ ناو جەنگێک دەکات کە خۆیان نایانەوێت". یواڤ گالانت رایگەیاندووە، "ئیسرائیل سوورە لەسەر بەهێزکردنی ئاسایشی وڵاتەکەی لە باکوورەوە، ئەوەش بۆ ئامادەبوون بۆ هەر سیناریۆیەک کە ئەگەری روودانی هەیە. گالانت ئەوەشی بە ئۆستن گوتووە، پێویستە ئەمریکا کار لەسەر ئەوە بکات، هەژموونی هەرێمیی ئێران کەمبکاتەوە و رێگە نەدات ئەو کۆمارە ئیسلامییە دەستی بە چەکی ئەتۆمی بگات. پاتریک ئێس رایدەر، جەنەراڵی ئەمریکیش لەبارەی هاریکاریی ئەمریکا بۆ ئیسرائیل رایگەیاند، هاریکاریمان "پۆڵایینە".

مەهران رەمەزان هاوڵاتی، سلێمانی حكومەتی عێراق, دەنگۆی گواستنەوەی بارەگای سەركردایەتی بزوتنەوەی حەماسی فەڵەستینی بۆ بەغدای پایتەخت رەتدەكاتەوە، كە ماوەیەكە لە میدیا ناوخۆیی و جیهانیەكان باس دەكرێت. ئەمڕۆ چوارشەممە، 26ی حوزەیرانی 2024، فادی شەمەری, راوێژكاری سیاسی سەرۆكوەزیرانی عێراق لە لێدوانێكدا بە رۆژنامەی شەرقل ئەوسەتی رایگەیاند، هیچ نوسینگە و بارەگایەكی حەماس لە بەغدا نەكراوەتەوە و سەرجەم ئەو دەنگۆیانەش رەتدەکەیەنەوە کە باس لە کردنەوەی بارەگای حەماس دەکەن لە عێراق. هاوكات سەرچاوەیەكی تری نزیك لە حكومەتی عێراق بە رۆژنامەکەی راگەیاندووە، گواستنەوەی سەركردەكانی حەماس خالید میشعەل و ئیسماعیل هەنیە بۆ بەغدا زۆر دوورە لە راستییەوە. ئەمە لەكاتێكدایە، دوێنێ سێشەممە، 25ی حوزەیرانی 2024، رۆژنامەی زە ناشناڵی ئەمریكی لە راپۆڕتێكدا ئاماژەی بەوەكردبوو، مانگی رابردوو ئیسماعیل هەنیە، سەرۆكی بزوتنەوەی حەماس و نوێنەرانی هەردوو حكومەتی عێراق و ئێران، گفتوگۆیان لەبارەی گواستنەوەی بارەگاو سەركردەكانی ئەو بزوتنەوەیە بۆ بەغدا کردووە. هاوكات هەندێك میدیای عێراقیش بڵاویانكردووەتەوە، نوسینگەی پەیوەندییەكان و راگەیاندنی بزوتنەوەی حەماس لە بەغدادی پایتەختی عێراق, بە رەزامەندی فەرمی حكومەتی عێراق كراوەتەوە.

مەهران رەمەزان هاوڵاتی، سلێمانی نرخی نه‌وتی خاوی ئه‌مریكا و نه‌وتی برێنت به‌راورد به‌ دوێنێ دابه‌زینی به‌خۆیه‌وه‌ بینی، بەشێوەیەک نرخی‌ یه‌ك به‌رمیل نه‌وتی خاوی برێنت به‌ 84 دۆلار و 66 سه‌نته. ئه‌مڕۆ چوارشه‌ممه،‌‌‌ 26ی حوزه‌یرانی 2024، نرخی‌ یه‌ك به‌رمیل نه‌وتی خاوی برێنت به‌ 84 دۆلار و 66 سه‌نته‌ له‌كاتێكدا دوێنێ به‌ 85 دۆلار و 27 سه‌نت ده‌فرۆشرا. نرخی نه‌وتی خاوی ئه‌مریكاش یه‌ك به‌رمیلی به‌ 81 دۆلار و 31 سه‌نته‌، له‌كاتێكدا دوێنێ به‌ 81 دۆلار و 74 سه‌نت مامه‌ڵه‌ی پێوه‌كرا.

هاوڵاتی وەزارەتی دارایی ئەمریکا نزیکەی 50 کەس و دامەزراوەی خستە لیستی گەمارۆکانەوە کە یارمەتی سوپای پاسدارانیان داوە و پارەی نەوتی ئێرانیان بۆ دامەزراوە سەربازییەکانی ئێران سپی کردووەتەوە. بەپێی راگەیەندراوێک کە رۆژی سێشەممە، 25ی حوزەیرانی 2024، لە ماڵپەڕی وەزارەتی دارایی ئەمریکا بڵاوکراوەتەوە، ئەو کەس و دامەزراوانەی خراونەتە لیستی گەمارۆکانەوە، لە وڵاتانی جیاوازن کە بە دروستکردنی "تۆڕی بانکی شاراوە" لە لایەن وەزارەتی بەرگری ئێران و بە  پشتیوانی هێزە چەکدارەکان و هەروەها سوپای پاسدارانی کۆماری ئیسلامی، یارمەتیدەربوون بۆ دابینکردنی چەندین ملیار دۆلار سەرچاوەی ئابووری بۆ گەشەپێدانی بواری سەربازی لە ئێران. ڤاڵی ئادیمۆ، جێگری وەزارەتی دارایی ئەمریکا لەم بارەوە وتوویەتی، ئەو تۆڕە لە ساڵی 2020ەوە  یارمەتیدەر بووە بۆ ئەوەی دامەزراوە سەربازییەکانی ئێران دەستیان بە تۆڕی ئابووری نێودەوڵەتی بگات بۆ سپیکردنەوەی چەندین ملیار دۆلار سەرچاوەی نەوتی و داهاتە نایاساییەکانی دیکەی ئێران.  گەمارۆکانی رۆژی سێشەممە تۆڕێکی بەربڵاو لە کەس و دامەزراوەکانی جێگیر لە هۆنگ کۆنگ، ئیماراتی یەکگرتووی عەرەبی، دوورگەکانی مارشاڵ، ئێران و تورکیای خستووەتە لیستی ڕەشەوە. بەپێی ئەم بڕیارە نوێیە، دەست بە سەر دارایی ئەم کەس و کۆمپانیایانە دەگیردرێت لە ئەمریکا و بە گشتی قەدەغەی ئەکات ئەمریکاییەکان بازرگانی لەگەڵ ئەو کەس و دامەزراوانە بکەن. هەر کەسێکیش لە گەڵیان مامەڵە بکات دەکریتە لیستی گەمارۆ پلە دووەکانەوە.

هەوراز حوسێن هاوڵاتی، سلێمانی جولیان ئاسانج، دامەزرێنەر و خاوەنی ماڵپەڕی ویکی لیکس، کە ماڵپەڕێکی تایبەت بە بڵاوکردنەوەی دۆسیە و زانیاریی دزەپێکراوی وڵاتانە رادەستی ئەمریکا کرایەوە. ئەمڕۆ سێشەممە 25-6-2024، لە لاپەڕەی تایبەتی ماڵپەڕی ویکی لیکس بڵاوکرایەوە، جولیان ئاسانج لە دوای پێنج ساڵ دەستبەسەربوون لە زیندانێکی لەندەن ئازادکرا. هەرچەندە باس لە ئازادکردنی دەکرێت، بەڵام ئاسانج رادەستی حکومەتی ئەمریکا کراوەتەوە و بڕیارە لە دورگەی ماریانای باکوور لە زەریای ئارام دادگایی بکرێت. گەوایە ئاسانج رۆژی چوارشەممە دادگایی دەکرێت و پێشبینی دەکرێت دادگە ئەمریکییەکەش 5 ساڵ زیندانیکردن بەسەر ئاسانجدا بسەپێنێت. بڕیارە دوای زیندانیکردنەکەی ئیدی بە تەواوی ئازادبکرێت و بگەڕێتەوە ئوسترالیا کە خۆی هاووڵاتی ئەوێیە. ئەوە 14 ساڵە کەیسەکەی ئاسانج بە جیهان ئاشنایە کە زانیاریی نهێنی کە لای زۆرێک وەک هەڕەشە بۆ سەر ئاسایشی نیشتمانی ئەمریکا لێکدەدرێتەوە بڵاوکردووەتەوە. جولیان ئاسانج تەمەنی 52 ساڵە و یەکێکە لە داواکراوانی حکومەتی ئەمریکا. لە ساڵی 2010دا هەزاران بەڵگەنامەی نهێنیی ئەمریکای پەیوەست بە ناوەندە سەربازی و دیپلۆماسییەکانەوە بڵاوکردەوە.

هەوراز حوسێن هاوڵاتی، سلێمانی ئەمڕۆ کاتژمێر هەشتی ئێوارە بە کاتی هەولێر پەخشی کەناڵی زووم دەستپێدەکات. بەڕێوبەری تۆڕە میدیاییەکە بە هاوڵاتی گوت، ئەوان کەناڵێکی بێلایەن نین و لایەنگری خەڵکن. رۆژی سێشەممە 25-6-2024، تۆڕی میدیای زووم دەست بە پەخشی تەلەفزیۆنی دەکات و بارەگای سەرەکیی تۆڕەکە لە گەڕەکی کەڕادەی بەغدا دەبێت. هەروەها لە هەولێر و سلێمانیش نوسینگە و ستۆدیۆیان دەبێت. هێمن مەحمود، بەڕێوبەریی گشتی تۆڕی میدیای زووم بە هاوڵاتی گوت، زووم کەناڵێکی ئاسمانیی هەواڵی دەبێت، بەڵام جگە لەوەش، لایەنەکانی کلتوور، ئابووری، وەرزش و تەندروستی بەشێک لە بەرنامە و کارەکانی کەناڵەکە پێکدەهێنن. بە گوێرەی بەڕێوبەری گشتیی زووم، رۆژانە پەخشی راستەوخۆی کەناڵە ئاسمانییەکە لە 8:00ی بەیانییەوە دەستپێدەکات و تاوەکو 12:00ی شەو بەردەوام دەبێت. لە شەویشەوە تاوەکو بەیانی بەرنامەکانیان دووبارە دەکرێتەوە، واتە 16 کاتژمێر پەخشی راستەوخۆیان هەیە و 8 کاتژمێریش پەخشی ئاسایی دەکەن. هاوڵاتی لەبارەی پۆرتاڵی تۆڕی زوومەوە پرسیاری لە هێمن مەحمود، کرد. پێی راگەیاندین، ماڵپەڕی زووم بە هەردوو زمانی ئینگلیزی و کوردی بەردەست دەبێت بۆ خوێنەران و لە ماوەیەکی نزیکدا بەشی عەرەبیش دەکەنەوە. لەبارەی تۆڕی پەیامنێرانی زوومەوە هێمن مەحمود، گوتی، "ئێمە پەیامنێرمان لە سلێمانی، هەولێر، کەرکوک، دهۆک، هەڵەبجە، گەرمیان و راپەڕین هەیە". لەبارەی بەشەکانی دیکەی کوردستانەوە گوتی، لە رۆژئاوای کوردستان لە هەریەک لە شارەکانی قامیشلۆ و کۆبانی پەیامنێریان هەیە. هەر لەبارەی تۆڕی پەیامنێرانی تەلەفزیۆنی زوومەوە هێمن مەحمود، گوتی، لە پلانیاندایە لە رۆژهەڵاتی کوردستان، باکووری کوردستان، ئێران و تورکیاش پەیامنێر دابنێن. هەروەها باسی لەوەکرد، لە ئەمریکا و ئەوروپا و ژمارەیەک شوێنی دیکەی جیهانیش لە داهاتوودا پەیامنێر دادەنێن و کاریان لەسەری کردووە. ئەو بەڕێوبەرەی زووم بە هاوڵاتی گوت، ئەوان لەلایەن کەرتی تایبەتەوە هاریکاریی داراییان دەکرێت و یەکێک لەو کۆمپانیا سەرەکیانەش کە هاریکاریانە کۆمپانیای مەعادل زەهەبییە. هاوڵاتی لەبارەی لایەنگیری کەناڵەکەوە بۆ پارتە کوردستانییەکان پرسیاری لە هێمن مەحمود، کرد و لە وەڵامدا گوتی، ئەوان سەر بە هیچ پارتێکی سیاسی دیاریکراو نین. زیاتر روونیکردەوە و گوتی، "ئەگەر هەڵبژاردنی پەرلەمانی کوردستان بەڕێوەبچێت، ئەوان ئامادەن رێکلام بۆ هەر بەربژێرێکی پەرلەمان و لیستێک بکەن کە خواستی رێکلامکردنی لە زووم هەبێت". لەبارەی بڵاوکراوەی کەناڵەکەوە لە تۆڕە کۆمەڵایەتییەکان، بەڕێوبەری گشتیی زووم گوتی، لە تەواوی تۆڕە کۆمەڵایەتییە باوەکانی هەرێمی کوردستان لاپەڕەی تایبەتییان دەبێت و پێشتریش هەر هەیانبووە.

هەوراز حوسێن هاوڵاتی، سلێمانی لە هێرشێکی سوپای ئیسرائیلدا بۆ سەر کەمپی شەتی لە رۆژئاوای غەززە، 15 فەڵەستینی کوژران و لە نێویاندا خوشکێکی ئیسماعیل هەنیە، سەرۆکی بزوتنەوەی حەماس و 9 ئەندامی دیکەی خێزانەکەی هەبوون. بەرەبەیانی رۆژی سێشەممە 25-6-2024، ئیسرائیل بۆردومانی کەمپی شەتیی لە رۆژئاوای غەززە کرد و 15 هاووڵاتی فەڵەستینی کوژران. میدیای ئیسرائیل بڵاویکردووەتەوە، لە نێو ئەوانەدا کە کوژراون خوشکێکی ئیسماعیل هەنیە و 9 ئەندامی دیکەی خێزانەکەی کوژراون. لە دوای پەلاماری حەماسەوە بۆ سەر ئیسرائیل و دەستپێکی جەنگی نێوان ئیسرائیل و حەماس تاوەکو ئێستا 38 هەزار و 179 فەڵەستینی کوژراون.

هەوراز حوسێن هاوڵاتی، سلێمانی گۆڤاری زە ناشناڵ بڵاویکردووەتەوە، بارەگای سەرەکیی بزوتنەوەی حەماس لە دۆحەی پایتەختی قەتەرەوە دەگوازرێتەوە بۆ بەغدا. ئەوەش بە هۆکاری ئەو گوشارە زۆرەی واشنتن و دۆحە دەیخەنە سەر بزوتنەوەکە بۆ دانوستان. گۆڤارەکە ئاماژەی بەوەشکردووە، حکومەتی عێراق مانگی رابردوو داواکارییەکەی حەماسی قبوڵکردووە. دوای ئەوەی حەماس دەچێتە بەخدا، حکومەت ناچاردەبێت چەکداران و سەرکردەکانی حەماس بپارێزێت. زە ناشناڵ دەڵێت، ئەندام پەرلەمانێکی عێراق کە نزیکە لە هێزێکی میلیشیای سەر بە ئێرانەوە گوتوویەتی، ئیسماعیل هەنییە و محەممەد شیاع سوودانی بە تەلەفۆن ئەم بابەتەیان گفتووگۆکردووە و لەسەری رێککەوتوون. هەروەها ئیسماعیل هەنییە و نوێنەرانی بزوتنەوەکە لە عێراق و ئێرانیش گفتووگۆیان لەو بارەیەوە کردووە. بە گوێرەی ئەو ئەندام پەرلەمانەی زە ناشناڵ قسەی لەگەڵکردووە، لایەنەکانی دیکەی عێراق وەک کورد و سوننەکان ناڕازین لە گواستنەوەی حەماس بۆ عێراق، ئەوەش لەبەر مەترسی دروستکردنی جیاوازی زیاتر لەگەڵ ئەمریکا. لەم مانگەدا حەماس بە سەرۆکایەتی محەمەد حافی نوسینگەی خۆی لە بەخدا کردەوە و بڕیارە ناوەندی میدیاییش بکاتەوە. گواستنەوەی حەماس بۆ عێراق دوای ئەوە دێت، ئەمریکا و قەتەر گوشاری گەورەیان کردووەتە سەر بزوتنەوەکە بۆ ئاگربەست، حەماسیش تاوەکو ئێستا پێشنیازەکانی ئاگربەستی رەتکردووەتەوە یان بە مەرجەکانی رازی نەبووە، بەتایبەت ئاگربەستەکەی کۆتایی مانگی ئاداری جۆ بایدن، سەرۆکی ئەمریکا. ئەگەر حەماس بچێتە عێراق ئەگەری هەیە گفتووگۆی ئاگربەست سەختتر بێت، ئەوەش لەبەرئەوەی دەسەڵاتی بەرپرسانی دۆحە لەسەر بزوتنەوەکە کەمدەبێتەوە.

هاوڵاتی بەرپرسی پێشووی ژووری بازرگانی ئێران رایگەیاند، لە ماوەی ساڵانی 2011 بۆ 2023 و لە ماوەی 12 ساڵدا، بەهۆی گەمارۆ ئابوورییەکانەوە یەک تریلیۆن و 200 ملیار دۆلار زیان بە ئابووری ئێران گەیشتووە. رۆژی دووشەممە 24ی حوزەیرانی 2024، حسێن سەلاح وەرزی، بەرپرسی پێشووی ژووری بازرگانی ئێران لە بابەتێکدا کە لە رۆژنامەی شەرق بڵاوکراوەتەوە نووسیویەتی، "گەمارۆکان زیانی گەورەی بە ئابووری ئێران گەیاندووەو زۆر هەلی ئابووری بە هۆی گەمارۆکانەوە لەدەستچوون". ئەم وتانەی بەرپرسی پێشووی ژووری بازرگانی ئێران لە کاتێکدایە کە چوار رۆژی ماوە بۆ هەڵبژاردنەکانی سەرۆک کۆماری و بە ئەگەری زۆر ئەگەر یەکێک لە پاڵێوراوەکانی سەر بە کۆنسێرڤاتەکان براوەبن، گەمارۆ ئابوورییەکان لە سەر ئێران تووندتر دەبێتەوە. لە شەش پاڵێوراوی سەرۆک کۆماری تەنها مەسعود پزیشکیان لەلایەن باڵی رێفۆرمخوازەوە پشتیوانی دەکرێت، بەڵام پزیشکیانیش رایگەیاندووە، "جێبەجێکاری سیاسەتە گشتییەکانی دەسەڵات دەبێت کە لە لایەن عەلی خامنەیی، رێبەری باڵای کۆماری ئیسلامییەوە دیاری دەکرێت". بەرپرسی پێشووی ژووری بازرگانی رایگەیاند، "بەراورد ئەکرێت، داهاتی لەدەستچووی هەر هاوڵاتییەکی رۆژهەڵاتی کوردستان و ئێران بە هۆی گەمارۆ ئابوورییەکانەوە لە ماوەی ئەو 12 ساڵەدا، نزیک 14 هەزار دۆلار بێت. بە مانایەکیتر بەپێی ئەم بەراوردکارییە، لە ماوەی ئەم 12 ساڵەدا، هەر تاکێکی ئێرانی هەزار و 202 دۆلاری بە هۆی گەمارۆ ئابوورییەکانەوە لەدەستداوە". سەلاح وەرزی وتی، "ئەوەی کە بەرهەمهێنانی ئێران بەهۆی گەمارۆکانەوە بە ناچار کەمبووەتەوە، زیانی گەورەی بە پیشەسازی نەوتی ئێران و ئابووری ئێران گەیاندووە". بەهۆی سیاسەتەکانی ئێرانەوە لە چەند ساڵی رابردووداو بەتایبەت سووربووی لەسەر پیتاندنی یۆرانیۆم، لە لایەن ئەمریکا و وڵاتانی رۆژئاواییەوە گەمارۆی ئابووری خراوەتە سەر ئێران و زیانی گەورەی بە ئابووری ئێران گەیاندووەو بەهای تمەن رۆژ لە دوای رۆژ روو لە دابەزینە.

هەوراز حوسێن هاوڵاتی، سلێمانی جەنەراڵێکی پلە باڵای ئەمریکا رایدەگەیێنیت، هێرشی ئیسرائیل بۆ سەر لوبنان مەترسی دروستبوونی جەنگێکی فراوانتر لە رۆژهەڵاتی نێوەڕاست لە نێوان ئێران و میلیشیاکانی دروستدەکات، بەتایبەت ئەگەر بوونی حیزبوڵا لە لوبنان دەکەوێتە مەترسییەوە. رۆژی یەکشەممە 23-6-2024، سی کیو براون، جەنەراڵی هێزی ئاسمانی ئەمریکا گوتوویەتی، نازانێت هەنگاوەکانی داهاتووی ئیسرائیل بە ئاڕاستەی لوبنان چییە، بەڵام هۆشداری دەدات هێرشی ئیسرائیل بۆ سەر لوبنان "دەکرێت جەنگەکە بۆ رووبەرێکی گەورەتر فراوانبکات". براون دەڵێت، بەشێوەیەکی گشتی حیزبوڵا لە حەماس بەهێزترە بەتایبەت لە ژمارەی مووشەک؛ دەشڵێت ئەو وای دەبینێت ئێران خواستی هاوکاریکردنی حیزبوڵای زیاتر بێت بەراورد بە حەماس. ئەو جەنەراڵە ئەمریکییە باس لەوە دەکات، لەو کاتەدا ئیسرائیل دەکەوێتە دۆخێکی ئاڵۆزەوە و دەبێت لە خەمی ئەوەدابێت لە یەک کاتدا لە باکوور و باشووری وڵاتەکەوە بەرگری بکات، هەروەها شەڕەکە پریشک بۆ رووبەرێکی فراوانتری ناوچەکە دەهاوێت. قسەکانی جەنەراڵە ئەمریکییەکە لەکاتێکدایە، رۆژی یەکشەممە 23-6-2024، بنیامین ناتانیاهو، سەرۆکوەزیرانی ئیسرائیل رایگەیاند، قۆناخی شەڕی سەخت لە غەززە کۆتاییهاتووە و ئەمەش رێگەیان بۆ خۆشدەکات هێزی زیاتر ببەنە سنووری لوبنان. لە سەرەتای شەڕی نێوان حەماس و ئیسرائیلەوە، حیزبوڵا دەستی بە مووشەکباران کردنی ئیسرائیل کردووە و رایگەیاندووە، هێرشەکان راناگرێت تاوەکو ئاگربەست لە غەززە نەکرێت. براون لە بەشێکی دیکەی قسەکانیدا دەڵێت، ئەم جارە ئەمریکا توانای کەمتر دەبێت لە پاراستنی ئیسرائیل لە هێرشەکانی حیزبوڵا.

هەوراز حوسێن هاوڵاتی، سلێمانی رۆژی یەکشەممە، سێ گورگ لە باخچەیەکی ئاژەڵانی فەرەنسا پەلاماری ژنێک دەدەن و بە سەختی برینداری دەکەن. بە گوێرەی بەرپرسانی باخچەکە ژنەکە سەرقاڵی وەرزشکردن بووە و نەیزانیوە کە چووەتە شوێنی ئازادی ئاژەڵەکان. ماریڤۆن کایلیبۆت، بەڕێوبەری پۆلیسی ڤێرسای پاریس رایگەیاندووە، ژیانی ژنەکە لە مەترسیدایە و تاوەکو ئێستا نازانن هۆکاری کەوتنە ناو شوێنی گورگەکانەوە هەڵەی خۆی بووە یان نیشانەکانی ناو باخچەکە روون نەبوون. ئەو ژنەی پەلاماردراوە بەدەم راکردن و وەرزشکردنەوە کەوتووەتە ناو شوێنی گورگەکانەوە و لە پڕ سێ گورگ پەلاماریانداوە. گورگەکان گازیان لە مل، پووز و پشتی ژنەکە گرتووە. باخچەی ئاژەڵانی سۆیری دەکەوێتە 40 کیلۆمەتر رۆژئاوای پاریس، یەکێک لەو خزمەتگوزارییانەی پێشکێشی دەکات، شوێنی مانەوەی شەوانە کە لە پەنجەرەی ژوورەکەتەوە ئاژەڵەکان ببینیت.  نرخی یەک شەو مانەوە لە ژوورەکانی ئەو باجچە ئاژەڵانە لە نێوان 220 بۆ 760 یۆرۆدایە. تیمی فریاکەوتن هەر زوو دەگەنە شوێنی رووداوەکە و ژنەکە رزگاردەکەن و گورگەکان دووردەخەنەوە. لە دواتردا ژنەکە دەگەیێننە نەخۆشخانە بۆ چارەسەرکردن.

هەوراز حوسێن هاوڵاتی، وارشۆ بڕیارە گفتووگۆکان بۆ بە ئەندامبوونی ئۆکراینا لە یەکێتی ئەوروپا دەستپێبکەن، ئەمە لە کاتێکدایە ئۆکراینا 18٪ی خاکەکەی لەلایەن رووسیاوە کۆنترۆڵکراوە. رۆژی سێشەممە 25-6-2024، نوێنەرانی ئۆکراینا و یەکێتی ئەوروپا لە برۆکسلی پایتەختی بەلجیکا بۆ گفتووگۆی وەرگرتنی ئۆکراینا لە یەکێتیی ئەوروپا کۆدەبنەوە. هەر لە سبەینێشەوە ئۆکراینا قۆناخێکی دیکەی چاکسازیکردن لە سیستمی حوکمڕانییەکەیدا دەستپێدەکات، تاوەکو دڵی بەرپرسانی برۆکسل رازی بکات. هەر چوار رۆژ دوای هێرشی رووسیا بۆ سەر ئۆکراینا و لە 28ی شوباتی 2022، ئۆکراینا داواکاریی بۆ بە ئەندامبوون لە یەکێتی ئەوروپا بەرزکردەوە، ئەوەش وەک دانانی قەڵخانێکی دیپلۆماسی لەبەردەم هەڕەشەی هێرشەکانی رووسیادا. رۆژی هەینی 21ی ئەم مانگە، ڤۆلۆدێمیر زیلنسکی، سەرۆکی ئۆکراینا لەبارەی دەستپێکردنی گفتووگۆکانەوە رایگەیاند، "ئۆکراینا دەگەڕێتەوە ئەوروپا، بۆ ئەو شوێنەی سەدان ساڵە بەشێک بووە لێی، وەک ئەندامێکی تەواوەتی کۆمەڵگەی ئەوروپا". کیێڤ لە کانوونی یەکەمی ساڵی رابردووەوە دەستپێکردنی گفتووگۆی وەرگرتنی لە یەکێتی ئەوروپا هێناوەتە بەرباس، ئەوەش دوای ماوەیەکی زۆر لە دژوەستانەوەی گەندەڵی و چاکسازیکردن لە سیستمی دادوەری وڵاتەکەیدا. ئێستا ئۆکراینا دەبێت نەخشەسازییەکی ورد بۆ داهاتووی وڵاتەکەی دابنێت و بۆ بەرپرسانی برۆکسلی بخاتەڕوو چۆن رووبەڕووی گەندەڵی لە ئۆکراینا دەبێتەوە و هەنگاوەکانی بەرەوپێشچوونی چین.

هەوراز حوسێن هاووڵاتی، سلێمانی لە کۆماری داگستانی رووسیا ژمارەیەک چەکدار لە چەند شوێنێکی جیاواز بە هەڕەمەکی تەقە لە خەڵک دەکات و لانیکەم 8 کەس دەکوژێت. هێرشەکە کراوەتە سەر کەنیسەیەکی ئۆرسۆدۆکس و پەرستگەیەکی جوو. ئێوارەی رۆژی یەکشەممە 23-6-2024، وەزارەتی ناوخۆی کۆماری داگستان لە رووسیا رایگەیاند، ژمارەیەک چەکدار لە شارەکانی دێربێنت و مەخاکچکالا سێ هێرشیان کرد کە تێیدا 12 کەس برینداربوون و 6 ئەفسەری پۆلیس، پاسەوانێکی نیشتمانی و قەشەیەک کوژران و 12 هاووڵاتی دیکەش برینداربوون. هێرشی سەر کەنیسەکە و پەرستگای جووەکان لە شاری دێربێنت روویانداوە و هێرشی سەر بنکەی پۆلیسەکانیش لە شاری مەخاچکالا کراوە. بە گوێرەی ژمارەیەک شایەدحاڵ کە بە ئاژانسی رۆیتەرزیان گوتووە، پەرستگەی جووەکان و کەنیسەکەش ئاگریان گرتووە. میدیای فەرمی رووسیا رایگەیاندووە، چوار لە تەقەکەرەکان دەستبەجێ لەلایەن هێزە ئەمنییەکانی رووسیاوە کوژراون. باس لەوەشکراوە، هێرشەکە لەلایەن رزیکخراوێکی نێودەوڵەتی تیرۆرستییەوە ئەنجامدراوە؛ گومان دەکرێت رێکخراوی داعش بێت. شاری دێربێنت کە پەرستگەی جووەکەی لێیە، دەکەوێتە باکووری هەرێمی قەفقاز لە رووسیا کە زۆرینە موسڵمانن، زۆرینەی جووەکانی داگستانیش لەو شارە نیشتەجێن.  

هەوراز حوسێن هاوڵاتی، سلێمانی شازادە ویلیام، شازادەی جێنشینی بەریتانیا ئاهەنگی لەدایکبوونەکەی لە کۆنسێرتێکی تایلەر سویفتدا لە لەندەن کرد. شازادە ویلیام لەگەڵ خۆیدا دوو منداڵە گەورەکەشی بردووە. رۆژی شەممە 22-6-2024، شازادە ویلیام، شازادە جۆرجی کوڕی و شازادە چارلۆتی کچی لە یادی لەدایکبوونی 42 ساڵەی شازادە ویلیامدا بەشدارییان لە کۆنسێرتی تایلەر سویفت لە یاریگەی وێمبلی لە لەندەن کرد. هەر دوای ئاهەنگەکە، تایلەر سویفت و سێ ئەندامەکەی خێزانی شاهانەی بەریتانیا سێڵفییەکیان بەیەکەوە چرکاند. ویلیام لە لاپەڕەی تایبەتی خۆی لە تۆڕی کۆمەڵایەتی ئێکس نوسیویەتی، "سوپاس تایلەر سویفت بۆ ئەو ئێوارە گەورەیە". وێنە سێڵفییەکە لەلایەن تایلەر سویفتەوە گیراوە و سێ شازادەکەش لە دواوە سەیری کامێراکە دەکەن. تایلەر سویفت لە لاپەڕەی تایبەتی خۆی وێنەکەی بڵاوکردووەتەوە و نوسیویەتی، "لەدایکبوونت پیرۆز ئێم 8 ". بە گوێرەی کۆشکی کێنزنگتن، وێنەکان پێش کۆنسێرتەکە گیراون و شازادە کاسرین، هاوژینی شازادە ویلیام کە لە ژێر چارەسەری شێرپەنجەدایە ئامادەنەبووە و لەگەڵ منداڵە بچووکەکەیان لە ماڵەوە بوون. لە ڤیدیۆیەکدا کە لەلایەن ئامادەبووێکی کۆنسێرتەکەوە گیراوە، شازادە ویلیام دەردەکەوێت کە بە توندی سەما لەگەڵ گۆرانی "شەیک ئت ئۆف"ی تایلەر سویفتدا دەکات.