قەرەیلان: ئۆجەلان ئازاد نەبێت و زیندانەکان پڕبن گەریلا چۆن چەک دابنێت؟

هاوڵاتی بەوتەی سەرچاوەیەک لە وەزارەتی دارایی، هێشتا وردبینی لیستی مووچەی مانگی حەوتی فەرمانبەرانی هەرێمی کوردستان تەواو نەکراوە. مانگانە وەزارەتی دارایی هەرێمی کوردستان، لیستی مووچەی مووچەخۆرانی هەرێم ڕەوانەی بەغدا دەکات، بۆ ئەوەی لەکاتی خۆیدا بەغدا پارەکە ڕەوانە بکات و کێشە بۆ مووچەخۆران دروست نەبێت، بەڵام تاوەکو ئێستا مووچەی مانگی حەوتی فەرمانبەرانی هەرێمی کوردستان لەلایەن بەغداوە نەنێردراو هۆکارەکەش درەنگ ناردنی لیستی مووچەی هێزە ئەمنییەکانە. بەوتەی سەرچاوەیەک لە وەزارەتی دارایی و ئابووری هەرێمی کوردستان بۆ هاوڵاتی، هۆکارێکی دواکەوتنی مووچەی فەرمانبەرانی هەرێمی کوردستان، درەنگ ناردنی لیستی مووچەی هێزە ئەمنییەکانە، هۆکارێکی دیکەش بەوتەی سەرچاوەکە "پێمان وتراوە قۆناغێکی تری وردبینی بۆ لیستی مووچە زیاد کراوە، پێشتر تەنیا دیوانی چاودێری دارایی عێراق وردبینی دەکرد، بەڵام ئێستا بەڕێوەبەرایەتی گشتیی بودجەش لە وەزارەتی دارایی عێراق وردبینی دەکات". سەرچاوەکەی وەزارەتی دارایی هەرێمی کوردستان دەڵێت " پەیوەندیم بە وەزارەتی دارایی عێراقەوە کرد، بەڵام ئەوانیش نازانن کەی وردبینیەکە تەواو دەبێت".

هاوڵاتی وەزارەتی دارایی عێراق، ئەو لێدوانانەی دەدرێن سەبارەت بە نەبوونی پارەی کاش بۆ مووچەی مانگی تەمووز دوورن لە ڕاستییەوە. ئەمڕۆ یەکشەممە، 11ی ئابی 2024، وەزارەتی دارایی عێراق لە ڕاگەیەندراوێکدا ڕایگەیاند، ئەو لێدوانانەی لەبارەی نەبوونی پارەی کاش بۆ مووچەی مانگی تەمووز بڵاوکراونەتەوە ڕاست نین. دەشڵێت، دابینکردنی پارەی مووچە لە پێشەنگی کارەکانی وەزارەتی داراییە و مانگانە بڕی 7.5 ترلیۆن دینار بۆ پارەی مووچە تەرخان دەکەن. لە ڕاگەندراوەکەدا ئەوەشخراوەتەڕوو، فەرمانبەران و خانەنشینانی هەرێمی کوردستان هێشتا مووچەی مانگی تەمووزیان وەرنەگرتووە.

هاوڵاتی ڕاوێژکاری سەرۆکوەزیرانی عێراق بۆ کاروباری کوردانی ئێزدی، دەڵێت، بە بڕیاری محەمەد شیاع سودانی بڕیاری پارچە زەوی دەدرێت بە هاونیشتمانییانی ئێزدی و سوودمەنیش دەبن لە قەرزی خانووبەرە. ئەمڕۆ یەکشەممە، 11ی ئابی 2024، خەلەف شەنگالی ڕاوێژکاری سەرۆک وەزیرانی عێراق بۆ کاروباری کوردانی ئێزدی ڕایگەیاند، لە نووسراوێکی نووسینگەی سەرۆکوەزیرانی عێراق دا کە 5ی ئەم مانگە ئاراستەی وەزارەتەکانی پلاندانان، دارایی، ئاوەدانکردنەوە و نیشتەجێکردن، بانکی ناوەندی و پارێزگای نەینەوای کردووە، داوا دەکات پارچە زەوی و قەرزی خانووبەرە بە فەرمانبەرانی کوردی ئێزدی و پێکهاتەکانی دیکە بدرێت بەشێوەیەک کە نەبێتە هۆی گۆڕانی دیموگرافی.  دەشڵێت، نووسراوەکەمان بە دەست گەیشتووە و بڕیارەکە گرنگە، چونکە لە ماوەی 50 ساڵی ڕابردوودا هیچ بڕیارێکی وا نەدراوە. خەلەف شەنگالی ئاماژەی بەوەشکردووە، بەپێی نووسراوەکە، کارمەندانی وەزارەتەکانی ناوخۆ، پەروەردە، تەندروستی، شارەوانی و وەزارەتەکانی دیکە، هەروەها کەسوکاری شەهید و رفێنراوان و نیڤشکان سوودمەند دەبن لە بڕیاری پێدانی پارچە زەوی و قەرزی خانووبەرە. ئەوەشی خستۆتەڕوو، لە نووسراوەکەدا هاتووە، داوا لە فەرمانگەکانی تایبەت و پلاندانان کراوە کار بۆ نەخشەکێشانی ناوچەکان بکەن بەشێوەیەک کە نەبێتە هۆی تێکدانی دیموگرافی ناوچەکان و تایبەتمەندی ناوچەی پێکهاتەکان بپارێزن.  ڕاوێژکاری سەرۆک وەزیرانی عێراق بۆ کاروباری کوردانی ئێزدی، ئاماژەی بەوەشکردووە، بڕیارەکە لە نزیکترین کاتدا جێبەجێ دەکرێت و هاونیشتمانییانی ئێزدی سوودمەند دەبن لە وەرگرتنی پارچە زەوی و قەرزی خانووبەرە. وتیشی، ئەم بڕیارەش وەکو رێزلێنانێک بۆ 10 ساڵەی جینۆسایدکردنی ئێزدییەکان لەلایەن داعشەوە لەلایەن سەرۆکوەزیرانی عێراقەوە دراوە. سەرچآوە، ڕوداو

هاوڵاتی سەرەڕای ئەوەی بەرەی تورکمانی دابەشكردنی پۆستەکانی پارێزگای کەرکووک ڕەتدەکاتەوە، بەڵام بەپێی زانیارییەکانی هاوڵاتی بەشێکی تورکمانەکان بە نهێنی لەگەڵ یەکێتی ڕێککەوتوون و پۆستی جێگری پارێزگاری کەرکووک وەردەگرن.  تورکمانەکان لە کەرکووک لەلایە دەڵێن دژ بە دابەشکردنی پۆستەکانی پارێزگاکەن و سکاڵا تۆمار دەکەن، لەلایەکی دیکەش سەرقاڵی وەرگرتنی پۆستی جێگری پارێزگاری شارەکەن. بەپێی زانیارییەکانی هاوڵاتی، ئەحمەد ڕەزمی ئەندامی ئەنجوومەنی پارێزگای کەرکووک لە بەرەی تورکمانی لەگەڵ یەکێتی ڕێککەوتووە پۆستی جێگری پارێزگار وەربگرێت، بەڵام بە فشاری تورکمانەکان بەشداری لە کۆبوونەوەی شەوی ڕابردووی ئەنجوومەنەکەی لە بەغدا نەکردووە. هەر بەپێی زانیارییەکان ئەمڕۆ هاوپەیمانی عەرەبی و بەرەی تورکمانی کۆبوونەتەوە، بەڵام ئەحمەد ڕەمزی بەشداری نەکردووە و ئەمەش بەوە لێکدەدرێتەوە کە لەگەڵ یەکێتی ڕێککەوتنی ژێربەژێری کردووە.

هاوڵاتی هەپەگە ڕایگەیاند، گەریلاکانی ئازادیی کوردستان بە هۆکاری ساڵیادی هەڵمەتی ١٥ی تەباخ چەندین چالاکییان ئەنجامدا و لە چالاکییەکانیاندا نۆ  سەربازی تورکیا کوژران و داگیرکەرێکیش بریندار بوو. ناوەندی ڕاگەیاندن و چاپەمەنیی هێزەکانی پاراستنی گەل-هەپەگە، لەبارەى هێرشە داگیرکارییەکانی دەوڵەتی تورک و بەکار‌هێنانی چەکی قەدەغەکراوی کیمیایی لە دژی گەریلاکانی ئازادیی، ڕاگەیاندراوێکى بڵاوکردەوە. لە ڕاگەیاندراوەکەی هەپەگەدا هاتووە: لە ١٣ چالاکی گەریلاکانى یەژاستار و هەپەگەدا لە ڕۆژانی ٧ تا ١٠ی ئاب لە گۆڕەپانی بەرخۆدانی گۆلکا لە هەرێمی مەتینا و لە گۆڕەپانی بەرخۆدانی بەهار و لە گۆڕەپانی بەرخۆدانی شاخی جودی و گۆڕەپانی بەرخۆدانی شاخی ئامێدی لە هەرێمی شەهید دەلیلی ڕۆژئاوای زاپ، نۆ داگیرکەر سزادران، داگیرکەرێکیش بریندرابوو، گورز لە سێ حەفارە و میندۆزەرەوەیەک وەشێندرا. هەپەگە ئاماژەی بەوەشکردووە، لە ١٠ی ئاب تونێلەکانی گەریلا لە گۆڕەپانی بەرخودانی شاخی ئێف ئێم سێ جار و گۆڕەپانی بەرخودانی شاخی جودی دوو جار بە تەقەمەنی قەدەغەکراو بۆردوومان کراون. ئەوەشی خستەڕوو، ٩ و ١٠ی ئاب لە هەرێمی خواکورک گۆڕەپانەکانی گردی شەهید هێمن، شەهید شەریف، بەربزن، سنین، لۆلان، لە هەرێمی گارە گۆڕەپانی دێرشێ، گردی زەنگل، گردی کون، زێڤکێ، شیێ، گرێ، دەریا هەرچێ، لە هەرێمی شەهید دەلیلی رۆژئاوای زاپ گۆڕەپانی بەرخودانی شاخی بەهار و ساخی ئێف ئێم، لە هەرێمی مەتینا گۆڕەپانی بەرخودانی بێشیلی؛ بە گشتی ٢٥ جار ئەو شوێنانە بە فڕۆکەی شەڕ بۆردوومان کراون. هەروەها ٨، ١٠ و ١١ی ئاب هەرێمەکانی شەهید دەلیلی ڕۆژئاوای زاپ گۆڕەپانەکانی بەرخودانی شاخی جودی، شاخی بەهار و لە هەرێمی مەتینا گۆڕەپانی بەرخودانی سەرێ مەتینا بە هێلیکۆپتەری هێرشبەر بۆردوومان کراون.

هاوڵاتی کۆمیسیۆنی هەڵبژاردنەکانی عێراق ناوی کارمەندانی سەر سندووقی دەنگدان بۆ هەڵبژاردنی خولی شەشەمی پەرلەمانی کوردستان بڵاودەکاتەوە. بڕیارە 20ی تشرینی دووەمی ئەمساڵ هەڵبژاردنی خولی شەشەمی پەرلەمانی کوردستان بەڕێوەبچێت، بۆ ئەو مەبەستە کۆمیسیۆن 40 هەزار کارمەند بەگرێبەست دادەمەزرێنێت. کۆمیسیۆنی باڵای سەربەخۆی هەڵبژاردنەکانی عێراق بڵاویکردەوە، کارمەندانی سەر سندووقی دەنگدان بۆ هەڵبژاردنی پەرلەمانی کوردستان بەشێوەی ئەلیکترۆنی هەڵبژێردراون و ئەوانەی داواکارییان پێشکەش کردووە، ئێستا دەتوانن لەلیستی پەسەندکراوەکان بەدوای ناوەکانیاندا بگەڕێین.  ئەوانەی ناویان لە لیستی پەسەندکراوەکان دایە تەنها بۆ رۆژی هەڵبژاردن گرێبەستیان لەگەڵ دەکرێت، لە بەرامبەریشدا لەنێوان 150 بۆ 250 هەزار دینارییان وەک پاداشت پێدەدرێت. بۆ دۆزینەوەی ناوەکەت کلیک لەم بەستەرە بکە: 

هاوڵاتی بەرەی تورکمان ڕایدەگەیەنێت، ئەوەی دوێنێ‌ روویدا دژی سازان و پێكەوە ژیانی پێكهاتەكانی كەركوك بوو، ئاماژە بەوەشدەکەن سکاڵا تۆماردەکەن. حەسەن تۆران، سەرۆكی بەرەی توركمانی لە کەرکوک لە کۆنگرەیەکی ڕۆژنامەوانیدا ڕایگەیاند، "ئەوەی پێیوایە بە دابەشكردنی پۆستەكان كێشەكان چارەسەر دەكات لە خەیاڵدا دەژی، چونکە کێشەی کەرکوک بە دابەشکردنی پلە و پۆست چارەسەر نابێت". ئاماژەی بەوەشکرد، "ئەوەی دوێنێ‌ روویدا دژی سازان و پێكەوە ژیانی پێكهاتەكانی كەركوك بوو، توركمان پێكهاتەیەكی سەرەكین لەم پارێزگایەو هیچ لایەنێك نانوانێت فەرامۆشبیكات". حەسەن توران وتی، "كۆبوونەوەكەی دوێنێ‌ پێشێلكردنی یاسایەو دەبێت سەرۆكی تەمەن سەرۆكایەتی كۆبوونەوەی هەڵبژاردنی سەرۆكی ئەنجومەن و پارێزگار بكات، بەڵام بانگهێشتی كۆبوونەوەكە نەكراوە". وتیشی، "نەبوونی توركمان لە دانیشتنەكانی دوێنێ‌، پێشێلكاریەكی گەورەیە و دانیشتنەكە بەتاڵە و لە دەرەوەی یاسایە و ئەنجامەكانی رەتدەكەینەوەو سكاڵا تۆماردەكەین". دوێنێ شەممە 10ی ئابی 2024، لە هۆتێل ڕەشیدی شاری بەغدا کۆبوونەوەی ئەنجومەنی پارێزگا بەڕێوەچوو، لە کۆبوونەوەکەدا ڕێبوار تەها وەک پارێزگاری کەرکوک و محەمەد حافیزیش وەک سەرۆکی ئەنجومەنی پارێزگای کەرکوک هەڵبژێردران.

هاوڵاتی ئەمریکا ڕایدەگەیەنێت، پابەندین بە هاوکاریکردنی هێزەکانی پێشمەرگە لە تێکشکاندن و سەرکوتکردنی چەکدارانی داعش. ئەلینا ڕۆمانۆوسکی، باڵیۆزی ئەمریکا لە عێراق لە تۆڕی کۆمەڵایەتی ئێکس ڕایگەیاند، "دڵخۆشم بەگەیاندنی کاروانێکی دیکەی هاوکارییەکانی ئەمریکا بە هێزەکانی پێشمەرگە، ئێمە پابەندین بە بەهێزترکردنی تواناکانی هێزەکانی عێراق، لە نێوانیان هێزەکانی پێشمەرگە، بۆ ئەوەی دڵنیا بین لە بەردەوامیی تێکشانی داعش لە عێراق". گەیاندنی هاوکارییە سەربازییەکانی ئەمریکا لە کاتێکدایە، کە چەندان جار لە دامەزراوە باڵاکان و باڵیۆزخانە و کونسوڵخانەکانی ئەمەریکا جەخت لە پاڵپشتی هێزەکانی پێشمەرگە کراوەتەوە.

هاوڵاتی مامۆستایانی وانەبێژ گردبوونەوەیەکی فراوان ئەنجام دەدەن دژی دامەزراندنی چەند دەرچوویەک بەشێوەیەکی تایبەت، هەروەها هۆشداری دەدەن بە حکومەتی هەرێمی کوردستان. ئەمڕۆ یەکشەممە 11ی ئابی 2024، کارۆخ عەبدوڵلا، نوێنەری گشتیی مامۆستایانی وانەبێژ  بە هاوڵاتی ڕایگەیاند، "هەواڵمان پێگەیشتووە چەند دەرچوویەک لە هەرێمی کوردستان بەشێوەی تایبەت دامەزراون، بۆیە بڕیارمانداوە ئەمڕۆ یەکشەممە لە بەردەم بەڕێوەبەرایەتیی پەروەردەی سلێمانی گردبوونەوەیەکی بەرفراوان ئەنجام بدەین". ئاماژەی بەوەشکرد، "هۆکاری دیکەی گردبوونەوەکەمان بەردەوامی دامەزراندنە لە کەرتی سەربازی و ڕاگرتنی دامەزراندنە لە کەرتی پەروەردە و دانەمەزراندنی مامۆستایانی وانەبێژ بۆ ماوەی چەندین ساڵە". نوێنەری گشتیی مامۆستایانی وانەبێژ وتیشی، "ئەگەر حکومەتی هەرێم پێش کردنەوەی دەرگای ناوەندەکانی خوێندن وەڵامی داواکاریەکانمان نەداتەوە کە بریتیە لە گرێبەستکردنی سەرجەم مامۆستایانی وانەبێژ، ئەوە بێگومان بۆ ساڵی خوێندنی 2024 – 2025 دووبارە دێینە سەرشەقام بۆ خۆپیشاندان و بایکۆتی پرۆسەی خوێندن دەکەین". لەئێستادا ژمارەی مامۆستایانی وانەبێژ لە هەرێمی کوردستان زیاترە لە 37 هەزار و حکومەتی هەرێم و وەزارەتی پەروەردە چاوەڕێی بەڵێنی محەمەد شیاع سودانی، سەرۆک وەزیرانی عێراق دەکەن بۆ دابینکردنی شایستەی پێویست بۆ بە گرێبەست کردنی وانەبێژانی هەرێم.  

هاوڵاتی لە ماوەی 24 کاتژمێردا ڕابردوودا، لە 15 ناوچەی جیهان بەرزترین پلەی گەرما تۆمار کرا و لەو 15 ناوچەیەش 10 ناوچەیان دەکەونە عێراقەوە. ئەمڕۆ شەممە، 10ی ئابی 2024، ماڵپەڕی بلاسەرڤیل لە ویلایەتی کالیفۆڕنیای ئەمریکا خشتەیەکی بڵاوکردەوە و تێیدا هاتووە، لە ماوەی 24 کاتژمێری ڕابردوودا، لە 15 ناوچەی جیهان بەرزترین پلەی گەرما تۆمار کراوە. دەشڵێت، لەو 15 ناوچەیەش 10 ناوچەیان دەکەونە عێراقەوە. ماڵپەڕەکە باسلەوەشدەکات، بەپێی خشتەکە شاری عەمارە لە عێراق بەرزترین پلەی گەرمای تێدا تۆمار کراوە کە 49.1 پلەی سەدی بووە. ئەوەشی خستۆتەڕوو، دوای عەمارە فڕۆکەخانەی نێودەوڵەتیی بەسڕە دێت بە 48.9 پلەی سەدی، هەروەها بەسڕە بە 48.8 پلەی سەدی ڕیزبەندی سێیەمی گرتووە. ئاماژەی بەوەشکردووە، ناوچەکانی دیکەی عێراق بریتین لە فاو 48.5 پلەی سەدی، عەلی غەربی 47.7 پلەی سەدی، بەدرە 47.7 پلەی سەدی لێ تۆمارکراوە. هەروەها فڕۆکەخانەی نێودەوڵەتی نەجەف ئەشرەف 47.6 پلەی سەدی و ناسریە 47.6 پلەی سەدی، کەربەلا 47.4 پلەی سەدی و تکریت 47.2 پلەی سەدی لێ تۆمارکراوە.

هاوڵاتی لە کۆبوونەوەی ئەمشەوی ئەنجوومەنی پارێزگای کەرکووک کە بە بەشداریی نۆ ئەندام لە بەغدا بەڕێوەدەچێت، پارێزگار و سەرۆکی ئەنجوومەنی پارێزگا هەڵبژێردران. دوای دوو کاتژمێر و نیو لە وادەی دیاریکراو، کۆبوونەوەی ئەنجوومەنی پارێزگای کەرکووک بەسەرپەرشتی پەروین فاتیح، لە هوتێل ڕەشیدی بەغدا دەستیپێکرد، پۆستی پارێزگار بۆ یەکێتی و سەرۆکی ئەنجوومەن بۆ هاوپەیمانی عەرەبی یەکلایی بوونەوە. بەپێی زانیارییەکان، دوای تەواوبوونی کۆبوونەوەی لایەنەکان لە ماڵی حەلبووسی، کۆبوونەوەی ئەنجوومەنی پارێزگا دەستیپێکرد و ڕێبوار تەها وەک پارێزگاری کەرکووک و محەممەد حافز لە هاوپەیمانی عەرەبی وەک سەرۆکی ئەنجوومەنی پارێزگاری کەرکووک هەڵبژێردران. بەشدارانی کۆبوونەوەکە پێنج ئەندامی یەکێتیی نیشتمانیی کوردستان، سێ ئەندامی کوتلەی عەرەبی و یەک ئەندامی کۆتای بزووتنەوەی بابیلیۆن لە کۆبوونەوەکەدا بەشدارن، دوو ئەندامی پارتی، سێ ئەندامی عەرەب و دوو ئەندامی تورکمان لە دەرەوەی کۆبووەنەوەکە بوون.

هاوڵاتی لەسەر داوای سەرۆکوەزیرانی عێراق، بڕیارە کۆبوونەوەی ئەنجوومەنی پارێزگای کەرکووک لە بەغدا بکرێت، بۆ ئەو مەبەستەش هەر شەش ئەندامی ئەنجوومەن لە پشکی لایەنە عەرەبییەکان لە بەغدان و دەیانەوێت ڕێکبکەون. یەکێتیی، کۆتای کریستیانەکان و سێ ئەندامی عەرەب بەبێ پارتی، بەشێکی تورکمان و سێ ئەندامی دیکەی عەرەب ڕێککەوتوون لەسەر ئەنجامدانی کۆبوونەوە و دابەشکردنی پۆستەکان لەنێوان خۆیاندا، بڕیارە ئەمشەو پۆستەکان یەکلایی بکەنەوە. ڕێککەوتنەکە چۆنە؟ بەپێی زانیارییەکانی هاوڵاتی، ساڵێک و چوار مانگی یەکەم پۆستی پارێزگار بۆ یەکێتیی دەبێت، سەرۆکی ئەنجوومەن بۆ عەرەب و سەرۆکی شارەوانی کەرکووکیش وەردەگرن، دوو ساڵی دووەم پارێزگارێکی عەرەب هەڵدەبژێردرێت. بەوتەی سەرچاوەیەک لە لایەنە عەرەبییەکان، تاوەکو ئێستا یەکلایی نەبووەتەوە ژمارەی ئەو ئەندامانەی بەشدار دەبن چەندن. هاوڵاتی زانیویەتی، لایەنە عەرەبییەکان بۆ ئەوەی دووربن لە فشاری شەقامی عەرەبی بەفەرمی هەڵوێستی خۆیان لەسەر ڕێککەوتن و دەستبەرداربوونی پۆستەکە لە بەرژەوەندی کورد ئاشکرا ناکەن و پارتیش بێدەنگی هەڵبژاردووە و چاوەڕێی کۆبوونەوەی ئەمشەو دەکات.

هاوڵاتی ئاسایشی سۆران ڕایگەیاند، کەسێکی فێلباز دەستگیرکراوە کە لە ڕێگەی سحر و نوشتەو جادوو فێڵی لەخەڵکی کردووە. بەرێوەبەرایەتی ئاسایشی سۆران ڕایگەیاند: کەسێکی فێلباز بەناوی (شێخ هاروون) لە دەرەوەی سنووری بەڕێوەبەرایەتی ئاسایشی ڕواندز دێتە ئەو سنوورە بە ناوی سحرو نوشتەو جادوو فێل لەخەڵکی دەکات.  "لەلایەن کارمەندانی سنووری بەرێوەبەرایەتی ئاسایشی ڕواندز دوای دانانی بەرنامەیەکی تۆکمە چاودێریکردنی وورد، توانیان کەسێک دەستگیر بکەین بە ناوی (ن. ع.س) کە لە دەرەوەی سنووری قەزای ڕواندز هاتبوو بۆ فیل کردن لە هاووڵاتیان."ئاسایشی سۆران وادەڵێت بەوتەی ئاسایشی سۆران "تۆمەتبار دانی بەوە دانا کەخۆی کردووە بە شێخ ئەکاوەنتی لەتۆرە کۆمەڵایەتیەکانی سناپ چات و تیک تۆک بەناوی (شێخ هاروون )داناوە ماوەی نزیکەی دوو ساڵە فێڵ لە خەڵک دەکات بەناوی سحر و جادوو لەبەڕامبەر وەرگرتنی پارە ودروست کردنی پەیوەندی لەگەڵ ئافرەتان فێڵی لەزۆر خەڵک کردووە لە شارە جیاجیا کانی هەرێمی کوردستان.

هاوڵاتی فرۆشتنی خواردنەوەی وزە بەخشەکان لە خوێندنگاکانی سنووری بەڕێوبەرایەتی گشتی پەروەردەی هەولێر قەدەغەدەکرێت. ئەمڕۆ شەممە، 10ی ئابی 2024، بە ڕێوبەرایەتی گشتی تەندروستی هەولێر لە ڕاگەندراوێکدا ڕایگەیاند، بەڕێوەبەرایەتی گشتی تەندروستی هەولێر بەهاهەنگی بەڕێوەبەرایەتی گشتی پەروەردەی هەولێر ،لەڕێگەی تیمەکانی هۆبەی تەندروستی قوتابخانەکان سەر بە بەڕێوەبەرایەتی کاروباری پاراستنی تەندروستی هەولێر دەستیان کرد بە هەڵمەتێک بەردەوام بۆ چاودێرکردن و ئاگادارکردنەوەی سەرجەم دەستەی کارگێری قوتابخانەکان و فرۆشگاکان لە نەفرۆشتنی خواردنەوەی وزە بەخشەکان لە ناو ناوەندکانی خوێندندا. لە ڕاگەندراوەکەشدا هاتووە، بۆ بەمەبەستی پشکنینی تەندروستی لەنێو ناوەندەکانی خوێندنی حکومی و نا حکومی بۆ قەدەغەکردن ونەهێشتنی ( خواردەنەوەی وزە بەخشەکان ) لە ناو فرۆشگاکانی قوتابخانەکان، دەستیان کرد بە هەڵمەتێک بەردەوام بۆ چاودێرکردن و ئاگادارکردنەوەی سەرجەم دەستەی کارگێری قوتابخانەکان و فرۆشگاکان لە نەفرۆشتنی خواردنەوەی وزە بەخشەکان لە ناو ناوەندکانی خوێندن. لە کۆتای ڕاگەندراوەکەشدا هاتووە و دەڵێن، شارەزایانی بواری پزیشکی پێیان وایە خواردنەوەی لەڕووی زانستیەوە خواردنەوەی ئەم وزە بەخشانە دەبێتە هۆکاری دواکەوتنی گەشەی مێشکی قوتابیان و ئاڵودەبوونیان ، خواردنەوەی بڕێکی زۆریش دەبێتە نۆرەی دڵ و مردنی کەسەکە.  

هاوڵاتی   كۆمیسیۆنی باڵای سەربەخۆی هەڵبژاردنەكانی عێراق، سبەینێ تیروپشك بۆ كارمەندانی ڕۆژی دەنگدان دەكات. كۆمیسیۆنی سەربەخۆی هەڵبژاردنەكانی عێراق، زۆربەی ڕێكارەكانی پڕۆسەی هەڵبژاردنی پەرلەمانی كوردستانی تەواو كردووە، كە بڕیارە 20-10-2024 بەڕێوە بچێت. بەپێی ڕاگەیەنراوێكی كۆمسیۆن، كاتژمێر (10:00)ی سبەینێ یەكشەممە 10-8-2024 لە شاری هەولێر، تیروپشكی تایبەت بە فەرمانبەرانی سەر سندووق (كارمەندانی ڕۆژی دەنگدان) دەكرێت. كۆمیسیۆنی باڵای سەربەخۆی هەڵبژاردنەكانی عێراق، ئەمڕۆ تیروپشكی بۆ ناوی ئەو لیست و كاندیدانە كرد، كە تازە ناویان لە كۆمیسیۆن تۆمار كردووە.